كاتمشى بالزربة وهي كاتقاد نظاراتها الشمسية السوداء بيد و باليد الأخرى هازة معطف أسود خفيف، إلياس غادي بنفس السرعة حداها هاد بنتو وشاد فيد رودِين، ولكن السرعة باش غاديين ماكافياش تمنع عدسات الپاپاراتزي من التقاط بعض الصور ليها هي بالخصوص.
مورا گاع الإجراءات اللازمة وصلو لمتن الطائرة وبالضبط لطبقة رجال الأعمال، جلسات فمقعدها و بعد الإقلاع تكمشات في بلاصتها بكل هدوء وبدأت كتأمل منظر السماء عبر النافذة- زُرقة السماء الصافية رجعات بها عبر الزمن وغادرت بها ذاكراتها لفصل من فصول حياتها...
▓▓ ࿇ بــدايـة الفـــلاش بــــاك ࿇ ▓▓
《...الشيء اللي كيأدي لإرتفاع مستوى الچلوتامات في الدم و السائل الشوكي، وبالتالي ضمور الخلايا العصبية الحركية نظرا لفشل الاستروسيت في التخلّص من الچلوتامات الزائدة. الإشكال اللي كيتطرح هو... 》
هدشي اللي قدرات آذانها تلتاقط من الدرس، التفتات بان ليها كلشي منتابه و دارت كتشوف فزُرقة السّماء عبر النافذة المجاورة ليها- الزّرقة اللي ممخلياش أي نجم آخر من غير الشمس يتلألأ و يشّع !
مادازش بزاف ديال الوقت حتى بانوليها زُملاؤها نايضين، ناضت حتى هي هزات حقيبة الظهر ديالها و غادرات القاعة بخُطى بطيئة، و فطريقها للردهة سمعت صوت مألوف...
...: ⊰ إيلودي! إيلودي! ⊱
سدات عينيها بانزعاج، يلاه بغات تدوز من طريق مُغايِرة حتى كتحس بيد جاراها من دراعها...
...: ⊰ عرفتي شحال تشطنت عليك ؟ شحال من رِسالة سيفط ونتي ماكلّفتي راسك حتى تطمئنيني عليك، مالك على فعايل المراهقات؟ ⊱
ملامح اللامبالاة باقين مكتسيين مُحيّاها و هي كتحاول تخلص دراعها من قبظتو...
إيلودي: ⊰ غيكون عندك مشوار فنّي واعد ف 'برودواي' بهاد الدراما الزائدة اللي ولات فيك ⊱
دازت فيه بعدما سلات تهَكّمها مكملة طريقها، ماكان عليه غير يبقا غادي موراها بحُكم ممر الردهة ضيق و مزدحم...
نطق باهتمام...
...: ⊰ كيف بقيتي دابا؟ ⊱
إيلودي: ⊰ غير لكمة ماكانش خاصها تجي فيا وجات فيا ا رَسلان، ماتزيدش فيه ⊱
ركز نظراتو على الكدمات الواضحة على رقبتها وكتفها...
رَسْلان: ⊰ مافهمتش سبب إلحاحك على بحال هاد الخرجات، ياك غي العصا؟ أنا نشبعك عصا ⊱
كمل هضرتو و تبّعها بضحكة خفيفة خلاتها تدور و تخنزر فيه...
إيلودي: ⊰ مافهمتش هاد التناقض اللي ولاّ فيك مؤخراً، ياك نتا اللي دخلتيني لهاد العالم؟ ياك نتا اللي شجّعتيني نوقف فوجه المُتنمّرين؟ ⊱
جرها لأحد الأركان المخبية ديال الردهة قبل ماينطق بانفعال...
رسلان: ⊰ أشمن تناقض؟ علاش كاتخلطي الأمور؟! تدافعي على راسك إيلا اقتَضى الحال حاجة، تعرّضي راسك للخطر وسط قتالات شوارع ما عندها باش تفيدك حاجة أخرى! بهاد التصرفات الطائشة ديالك مؤخراً كتخلّيني نندم علاش وريتك الطريق لهاد العالم من أصلو ⊱
إيلودي[قارنة حجبانها]: ⊰ ندمتي؟ كيفاش ندمتي؟ أنا ماشي صغيرة و كانتحمل عواقب أي قرار خديت! أنا مانادماش كنحس باللي هذا هو العالم لاش كنتمي... وماخاص تكون عندك ولو درة شكّ بخصوص قُدراتي ولاش ممكن نوصل! هدشي ما... ⊱
أنت تقرأ
🎴قصة BORZ | بالدارجة المغربية🎴
Action••قصة بالدارجة المغربية بطابع رياضي درامي•• 🀄تأليف: ليلي ديلاشاو🀄 •قصة عنوانها باللغة الروسية و كايعني الذئب؛ المتميز بالدهاء و بالتخطيط العالي للهجمات، و تسبر أغوار عالم رياضة من أكثر الرياضات إثارة للجدل! •قصة...
