على مَهلِك ..

1

6:31 صَ ..
دخلت مدرستي بدري على غير عادتي بسبب انه اول يوم دراسي ، احتاج جلسة مع صحباتي .. واحشيني جداً خصوصاً بعد ماتحولت اخر سنتين لنا " اونلاين " ورجعنا الآن كآخر سنة لنا بالثانوية .
كانت شوفتنا لبعض من فترة لفترة والفترات ماكانت قصيرة لذلك قررت اداوم بدري هالمره لعل وعسى استفتح سنة دراسية جديدة بـ طاقة حلوة معاهم .

طاح نظري على ' لانا ' صحبتي من الطفولة ولكن صدقاً هي ماتعرف عني الكثير يعني اللي بيننا مجرد سنين ولكني احبها واقدرها جداً ..
حضنتها بكل حب وطلبتني نروح للحمامات عشان تعدل شعرها ، كالعادة مهووسة بالترتيب والجمال بينما انا ما اهتم كيف شكلي لدرجة الهوس وغالباً اهتمامي
على حسب مزاجي

تبادلنا الكلام وقمت اعدل بشعري القصير بملل
دقايق ودخلت لمى
كانت غاضبة  لانها من وقت طويل تدور علينا ..
لمى : ساعة ادور لكم مو اتفقنا نكون كلنا بمكاننا المعتاد ؟؟
رديت عليها : لانا بتعدل شعرها وجيت معاها
وسرعان ماحضنتها عشان اهدي من اعصابها: صباح الخير وحشتيني
بادلتني بهدوء وابتسامه : صباح النور مو أكثر مني
فكيتها وراحت حضنت لانا
طلعنا من الحمامات واحنا نخوض النقاش المعتاد
لانا وهي موجهة كلامها لنا : متحمسسة هالسنة انا حاسة انكم بتدخلوا بعلاقة واضحك عليكم هالمره ! راح زمن انكم تضحكوا علي وتهاوشوني صار دوركم ..
ضحكت ورديت عليها رافضة : صح اني غثيتكم ابي احب وانحب بس مستحيل ادخل علاقة خصوصاً هنا بالمدرسة ، انسوني
بينما لمى واللي ردها كان عكسي تماماً: انا هالسنة بجنن المدرسه كلها علي بحب البنات كلهم مقدر اتقيد بوحدة لحد يفكر اني راح ادخل بعلاقة
ضحكت اكثر وانا أوترها : ويمكن تسرقك وحده هالمره خففي من هالثقة العالية
ضربتني على كتفي مو عاجبها كلامي واللي حاسة انه بيكون هو الصح بالأخير
كملنا نقاشنا واحنا نتهاوش ونضحك
سرعان ما شفنا صحباتنا راما و جمانه سلمنا عليهم وجلسنا بمكاننا المعتاد ، دقايق قليلة و الجرس يرن وصفينا بالطابور بطريقة عشوائية مع بعض بحكم انه اول يوم ومحد يعرفنا بشكل كافي ..
مر اليوم الدراسي بسرعة وهالشيء ارضاني جداً ما اطيق احساس اني متقيدة بهالمكان ساعات طويلة .. احب يضيع الوقت وانسى نفسي لين نهاية الدوام .
و الحلو المداومين اليوم قليل بحكم انه اول يوم وفعلاً اخذت راحتي من كل النواحي .
انا آيار ، عمري 17 ، مواليد أواخر مايو ..
اقدّس صداقاتي جداً ولكن دائماً صداقاتي المقربة كانت خارج نطاق المدرسة ، واللي كانت بالعالم الافتراضي ودائماً كنت احاول تحويلها لواقعية حتى مع اصعب الظروف وخرجت بصديق واحد استند عليه دائمًا
لذلك نطاق صداقاتي او معارفي بالمدرسة محدود جداً وقليل بحكم اني حالي حال نفسي وما أحب الحياة الاجتماعية وصخبها ولا اقدر أتقبل الآخرين بسهولة وغالباً معارفي اعرفهم من خلال صحباتي ..

لانا ، صحبتي من سنين طفولتي على الرغم من هالسنين كلها ولكني ولا مره حسيتها فعلاً قريبة يمكن بفترة من الفترات فكرت انها الأقرب لي ولكن هالشيء مو صحيح .. احبها واقدرها واعاملها كانها اختي الأصغر واخاف عليها كثير وهي فعلاً تعتبرني اخت لها .
لمى ، كنا بفترة من الفترات جداً قريبين لبعض ولكن حصلت مشكلة بيننا سببت فجوة واضطريت ابعد نفسي لفترة من الوقت لين تقبلت نرجع طبيعي مع مرور الوقت .. بالرغم من الماضي إلا إني مازلت أحبها واعزها جداً .
جمانه  وراما ، تعرفت عليهم بأول سنة لي بالثانوية وهم الألطف ويضحكوني دائمًا .

_________
إنتهى