على مَهلِك ..

20

[8:18]
سلمت ورقة الأختبار .. بعد ماتمالكت نفسي
وجمعت شتات عقلي ومشاعري ، قدرت افتش عن المعلومات المطلوبة واجاوب على الأسئلة ..

استأذنت للخروج وسمحت لي ..
كنت امشي بخطوات سريعة ، مافي وجهة محددة
تمنيت اثناء ذلك تكون عندي قدرة خارقة تسمح لي بالطيران ، او الاختفاء او اي شيء من هذا القبيل
اي شيء ممكن يسعفني من هذا المكان

ما عرفت اذا كنت أبالغ فقط ، ولا اللي حصل يزعل
حاسة بعقلي مشوش ، ما عندي الأحقية الكافية اني احكم على الموقف .. لكنها الوحيدة اللي بإمكانها توضح لي ، على الأقل .. اعرف وضع علاقتنا
اعرف لفين امشي انا وخطواتي .

دخلت للحمام ، اسوأ مكان على الإطلاق لكنه الوحيد الفارغ حالياً .
غسلت يدي بدون اي سبب ، احتجت اشغل عقلي
واشغلته بالفعل من لما اطرافي لمست المويه الباردة  وشعرت بلسعة البرد..جففت يدي بشكل سريع وانا احس بالرجفة اللي بدأت تتملك يدي .. هذا اللي كان ناقصني ؟

حاولت اصنع احتكاك مابين كفوفي لعل وعسى تدفى قليلاً ..
بعد وقت قصير من المحاولات الفاشلة لتدفئة يديني
قررت اطلع من هنا ، مازلت ما اعرف الوجهة
احس اني داخل سجن .. مافي مكان اقدر اهرب له وهذا مزعج ، تمنيت يدق الجرس على الأقل وتبدأ حصة جديدة تجبرني اشغل عقلي وما اركز الا فيها .

توقفت لما شفتها قدامي ، تتوجه نحوي بخطوات ثابته وابتسامة هادئة وقدرت من خلالها اشعر بطاقتها المُشعة
نفس العادة ..

شتت نظري لا إرادياً بالمكان ، وشديت على يدي
اللي يشوفني من بعيد بيظن اني اتخذ وضع الحماية والدفاع من ضرر قادم ..

غرام : توقعت القاك هنا
تكلمت بسخرية : هل فيه مكان آخر متوقع ؟
غرام : امم يمكن ..
آيار : اذاً دليني عليه ، سئمت من هذا المكان البائس
غرام : باخذك هناك بيوم ، بس قولي اول زعلانة من شيء ؟
رفعت حاجبي وانا احاول اكبت ابتسامتي الساخرة ،
انا بس أحاول قدر المستطاع استقبل سؤالها بطريقة طبيعية وابطل اسلوب العدائية اللي ممكن يصدر مني..

قربت مني غرام اكثر بينما ضربات قلبي بدأت بالأرتفاع
بدأت اشعر فيها ..
تقدمت ومسكت يدي اللي رجفت لثواني لما لامست أطرافها الدافئة أطرافي المتجمدة .
غرام : تعبانة آيار ؟
سحبت يدي بهدوء وانا انفي :
لا ، بس خلينا نتكلم بصراحة
غرام : وحابة نتكلم هنا ؟
جاوبتها بأسلوب ساخر مو قادرة اتخلص منه :
حابة اعزمك على مقهى ولا بحر ؟ يعني الأجواء ماتتفوت صراحةً..احنا بالمدرسة لو ملاحظة يعني ؟

ابتسمت غرام بهدوء ، بينما نظراتها مليانة بمشاعر مو قادرة افسرها ..
غرام : خففي من اسلوبك اللاذع آيار ، واهدأي
وخلال ثواني بدون ماتنتظر مني جواب
مسكت يدي وبأسلوب أمر سحبتني : تعالي