• #الامانه.......
• المقدمه ........
• في احدي ضواحي بنغازي في حوش كانو هله ناس علي قد حالهم
• سالم :شن صار في الغداء كله تمام مش ناقصك شي
• امال : وهيا واصله حدها وبطنها قدامها وداهشه لا الحمدلله ربي يسترنا ديما مع الضيف
• سالم :خلاص لما يوتا دزيلي خالد
• امال :حاضر وخذت السفره من علي الطاوله ومدتها له خوذ طلع القهوه معاك
• سالم ..خذاها منها وعينك من البنيه راه العيال ايديرولها حاجه اتضرها
• امال: يلاها سميه تلعب معاها هيا وصالحه وتو نطلع انشوفها وطلعت وراه خشت ولقتهن يلعبن معها ابتسمت سميه ردي بالك عليها راهو ابراهيم يضربها والا اينتشلها شعرها
• سميه ...لالا يقدرش اصلا خالد ضربه لما جاء يبي ايريشلها شعرها وقاله نحرش فيك باتي
• امال ..بحتت في ابراهيم وخالد كنك معها تضرب فيها ليش حرام صغيره ياناري وين تعرف
• ابراهيم :خذت اللعبه ماتبيش تعطيها ليا
• امال ...خليها تلعب هي جايه اشويه ومروحه معش اتعاركو فاهم انت وخالد
• خالد ..هو اللي نابش مش انا
• امال ...خلاص خلاص انا قلت نسمع حس واحد نهاركم اسود وطلعت من الدار خشت للمطبخ اتكمل حوستها
• سالم : نورت ياصلوحه نورت هي تفضل
• صالح :منور بهله الله يزيد فضلك
• سالم :كيف حال الحاج والشباب كلهم
• صالح: الحمدلله بخير كلهم
• سالم ..شن داير مع البنيه وكيف حال الحاجه
• صالح ....الحمدلله اكويسه تسلم عليك و وصال الحمدلله ربي عوضها واختي تونست بيها طول الوقت معها مراعيتها هيا والحاجه
• سالم ..ربي يحفظها لك ان شاء الله ويطول في عمرالحاجه
• صالح :تسلم ان شاء الله والله انا جيتي هذي كلها نبي منك خدمه
• سالم ...ادلل لو نقدر عليها ماتطلع الا راضي
• صالح ...لاني عارف مافيش حد غيرك يقدر عليها لجأتلك
• سالم ...ان شاء الله انت تغدا قبل وبعدين انهدرزو وماتطلع من هنا الا راضي
• صالح ..... ان شاء الله
• خالد .. خش وجايب في يده مفرش باتي تعال الغداء واتي وطرح المفرش قدام الراجل وطلع
• سالم ....ناض هي وطلع خش للمطبخ بحت في السفره وابتسم سلم ايديك وربي مايحرمني منك
• امال .... صحتين وهنا ولايحرمنا من حسك ياغالي
• سالم ...رفع الصفره وطلع بيها علي صالح وحطهاقدامه هي تفضل تفضل
• صالح ...دام فضلك ان شاء الله وقدم علي الصفره
• تغدو وشالو السفره وجاب سالم الشاهي وقمعز مدله الطاسه هي تفضل
• صالح : تسلم وخذا منا الطاسه وشرب شاهيه وبحت في سالم خليني انخش في الموضوع اللي جايك عشانه
• سالم: تفضل نسمع فيك
• صالح : خذا شنطه من يلاه ومدها له هذي الموضوع نبي انحط الشنطه هذي امانه عندك ومنبيش منك تفتحها ولاتشوف شن فيها بس اطمن اللي فيها كله اوراق متخافش مستحيل انضرك
• سالم :حشاك مستحيل انخونك حتي بتفكيري واعتبر الشنطه في الحفظ والصون لعند اتجي وتطلبها مني
• صالح : وهذا اللي انا عارفه ومتاكد منا بس الشنطه هذي متطلعش بكل ولا تعطيها لحد حتي لو متت الا بعد ما يجيك شخص ويعطيك العلامه اللي حنقولك عليها
• سالم .... بعد عمر طويل ان شاءالله وزي ماتبي حيصير
• صالح .... ان شاءالله وبارك الله فيك علي الغداء واسمحلي توه يالله نلحق انروح قبل لاتضلم الدنيا
• سالم ..... فيك بارك الله ادلل حوش خيك في وقت
• صالح ...تسلم واعز من الاخ نتعبك ا تجيبلي البنت من جوا وانا نرجا فيها في السياره
• سالم ...غير مازال بدري ياراجل
• صالح ..بدري من عمرك لاهذاك هو عندي كم مشوار نقضيهن يدوب نلحق
• سالم ...مربوحه ان شاء الله وخش خذا البنت وطلعها لبوها
• صالح ....هي في امان الله السلام عليكم
• سالم :وعليكم السلام وربي ايوصلك طيب ان شاء الله
• صالح: ركب سيارته وحياه بيده ومشا
• سالم :بحت فيه وتنهد خش لمربوعته خذا الشنطه ووهو يدعي انه ربي ايقدره انه ايصون الامانه ويكون قد كلمته وخش دسها في داره وهو ايفكر في هالامانه
• 🍃🍃🍃🍃🍃🍃🍃🍃🍃🍃🍃🍃🍃🍃
• اكيد تبن تعرفن علي العيله
• الاب: سالم انسان بسيط ودخله محدود وعايشين علي قد حالهم قوتهم معتمدين عليه كل يوم بيومه ويخدم علي سيارته لكن راجل بمعني الكلمه وكلمته سيف علي رقبته ايموت ومايكسرها
• الام:امال مراه طيبه وتحب عيلتها ومتحمله وراضيه بعيشتها معا راجلها لانها تحبه متفاهمين وعمره فقرهم ماسببلهم مشاكل في مابينهم وعندهم اعيال اللي هما
• خالد وصالحه ابراهيم وسميه وحامل بتؤام
• صالح ....صاحب سالم تعرفو علي بعضهم في العسكريه وقعدو كل بين فتره وفتره متواصلين مع بعضهم مراته متوفيه وسيبتله بنت اللي هيا وصال
• وامه ...مبروكه مراه كبيره بعد وفات مرات ولدها قعدت للبنيه كانها امها ومربيتها
• سعاد .... اخت صالح طيبه وحنونه وتموت في وصال وتعامل فيها كانها بنتها
• مصطفي ...خو صالح راجل طيب وفي حاله
• سليمه ...مراته عندها منا
• ايوب واية
• و باقي الشخصيات حيتوضحن مع الحلقات
• يتبع ......
• قراءة ممتعه ❤❤....
• بقلمي :احلام
