• #الامانة ...
• الحلقه15......
• عند الحاجه مبروكه.....
• الحاجه مبروكه .....وانت تعرفهم العرب هذوم
• الحاج مصطفي ...اهاا نعرف الحاج ناس اكويسه معروفين هو خذا مني موعد علي بكرا ايجوكم وبعدها ايصير خير ولها القرار ياتوافق ياترفض
• الحاجه مبروكه .... ربي ايقدم اللي فيه الخير ان شاء الله
• الحاج مصطفي ....انا مابيتش انلط عليها بعد قال نبو موعد منكم قتله تفضل
• الحاجه مبروكه .... لا صاح صدقت بالك يطلع راجل اكويس وانتريح عليها
• الحاج مصطفي .... ان شاء الله وصبا تبي شي يا امي
• الحاجه مبروكه ....سلامتك
• الحاج مصطفي .... اللي ناقص تو انجيبه انا وسليمه
• الحاجه مبروكه .. سلمك جياب ان شاء الله وقول لسليمه اتجي نبيها تكون قاعده
• الحاج مصطفي ...حاضر تو انقوللها هي السلام عليكم
• الحاجه مبروكه.... وعليكم السلام وقعدت سرحانه وتسبح
• سعاد ...امي كنه مصطفي جاي توه في هالليل مش عوايده ان شاء الله خير
• الحاجه مبروكه .... صاحب خوك مصطفي بكرا جايين هله عندنا
• سعاد .... غريبه ليش جايين عندنا مش عند سليمه
• الحاجه مبروكه ...جايات يخطبن فيك لولدهم
• سعاد ....😳يخطبو من
• الحاجه مبروكه ....يخطبوك انت كنك متفاجاة
• سعاد ...اااااه لا شي شي منو باهي تعرفيهم انت
• الحاجه مبروكه ...لا مانعرفهم صاحبه قال معرفه قديمه تلاقا هو وياه الايام اللي فاتن وردو يحكو مع بعضهم شوي اليوم كلمه بالتلفون وخذا موعد منا علي بكرا جايين
• وصال ... منو اللي جاينا بكرا
• الحاجه مبروكه .... بحتت في سعاد قوليلها منو اللي جاي بنخش داري انتريح وصال جيبيلي كاس المياه راه تنسي
• وصال ..حاضر يا امي تو انجيبه لك اشويه ولاحقتك وبحتت في سعاد سوسو كنك
• سعاد ...مش عارفه قلبي غم هك مش عارفه كني
• وصال ...بسم الله الرحمن الرحيم قمعزي بس كنك مصبيه وقمعزتها شن قالتلك امي كنه عمو جاي هالوقت
• سعاد ...بحتت في وصال قالت بكرا جايين عرب يخطبو
• وصال ...وهيا عاقده حواجبها يخطبو وهيا متفاجأة قصدك انت
• سعاد ... اهاا قالت هك
• وصال ....نجك ليا سوسو ياخيه ان شاء الله ربي ايتمم علي خير وكنك منفجعه يعني اكيد حيجو ناس يخطبوك
• سعاد ...انا موضوع الزواج محولته من راسي اساسا منبيش لانزوج ولاشي نبي نقعدجنب امي وبعدين تحسابي عمري صغير انت انا قريب انخش علي 45 يعني خلاص وقت الكلام هضا فات
• وصال ...سوسو شن اللي اتقولي فيه كنك تحكي هكي وبعدين انت مازال صغيره وباينه اصغر حتي مني وهذين ارزق من ربي ونصيبات عمرك ماتقولي هالكلام
• سعاد ..... اوووف استغفر الله العظيم من وين طلعلي توه هالموضوع عارفه امي انا حتمسك فيه ومش حتسيبني علي راحتي متاكده
• وصال ...ومعها حق اسمعي صبي خشي ارقدي وبكرا تنوضي مصحصحه وتطلعي للعرب وتعرفي الراجل اللي جايك شنو وبعدها حتوضح الرؤيا قدامك متسبقيش الاحداث بتفكيرك السلبي مش هضا كلامك والا لا
• سوسو ...ابتسمت نجك ليا يارب كبرتي يافرخه وقعدتي تعرفي تنصحي
• وصال ...ضحكت منكم نتعلم وناضت خليني نشيل للامي ميه اللي قالت عليها وانت صبي خشي تريحي عشان وجهك ايبان حلو ومش مرهق
• سعاد ... تمام اهو لاحقتك
• 🍃🍃🍃🍃🍃🍃🍃🍃🍃🍃🍃🍃🍃🍃🍃
• عند بشير ......
• بشري ... كانت مقمعزه في دارهاوهيا قالبه وجها
• مروه ...خشت عليها وسكرت الباب وبحتت فيها انت من عقلك اتقولي الكلام هضا لبشير كنك انت
• بشري .... اهاا من عقلي ونص اهاا نقوله له ماله شن انخليه ياخذها البيئه هذي
• مروه ... وحق الله مابيئه الا اسلوبك ومنظرك كيف اتبحت فيهم كيف جاء من قلبك تكسري فرحته وهو جاي فرحان يسال فيك شن رايك اتقوليه مش لك وشينه وعيله بيئه شن حقيتي منهم اصلا انت الناس تأنا مستغربه كيف صبر عليك وسمع كلامك ومامدش يده عليك
• بشري ...ياسلام ويمد يده عليا عشانها هذا اللي ناقص والله لو دارها ورحمه بابا وماما محتخش للحوش وانا فيه
• مروه ....انت كنك مريضه مجنونه كنك عارفه علي من تحكي انت علي بشير راه اللي ياما تحمل علي شانه وياما شقا وتعب كنك قعدتي هك هضا كله غيره عشان يبي ايتزوج وايتريح مستخسره فيه الراحه كنك انانيه انت
• بشري ..... اهاا انانيه فيه بشير لنا نحنا وبس منقدرش انشوف حد مشاركني فيه الفرحه هذي كلها في عيونه لها هذا كله وقبل ماتجي ماله كان جت شن حيصير
• مروه ..... قعدت تبحت فيها وومتفاجأه من كلامهة انت كنك من الي كانت اتقول امتي بشير ايتزوج ونفرحو
• بشري ... انا متغيرتش بس كنت نبي انجيبله انا مش يمشي من غير مايقول وايكلم صاحبه عليها وايفوتنا بكل مكأنش خواته
• مروه ....انا بجد مصدومه فيك يعني انت توه بكلامك لبشير استفدتي حاجه غير انك زعلتيه وخليته ياخذ منك موقف
• بشري ... مش عارف كيف درت هك وعيونها امتلن ادموع مروه انا خايفه تاخذه منا مش قادره شعور مسيطر عليا من يوم ماقالي علي خطبته
• مروه ... قمعزت جنبها وحضنتها صدقيني مستحيل ايتغير علينامتخليش الشيطان ايوسوسلك ويسيطر عليك
• بشير ....كان يسمع في الحوار اللي صار كله دق الباب وفتحه وخش كر كرسي كان محطوط يلا المكتب متاعهن وقمعز عليه مقابلهن وقعد ساكت وايبحت فيهن
• بشري .. منزله راسها ودموعها ينزلن وماحكتش ولا حرف
• بشير ...متبيش تقولي ليش تبكي
• بشري .... رفعت راسها ومسحت ادموعها وتنهدت اسفه علي الكلام اللي قلته وحقك عليا عشان عليت صوتي عليك
• بشير .... نبي نحكي معاكن ونبيكن تسمعني للاخر تمام
• هنا ...تمام
• بشير .... انا سمعت كل الكلام اللي حكيتنا توه كله من البدايه لعند النهايه وكنت قاصد نجي ونسمع عشان يا بشري منبيش نرقد وانا زعلان منك
• بشري .....نزلت راسها وادموعها موقفنش
• بشير ..... انا يابشري البنت لانعرفها ولاعمري حقيتها ولاحكيت معاها الا اليوم وخطبتها عشان خوتها وباتها وناس عارفه وضعي ونعرف كيف متربين مهمنيش جمال ولا شكل ولا حتي حالتهم الماديه بقد هامني ترباية البنت والبيتيه اللي طالعه منها مفروض اتكوني واثقه في اختياري شن حيكون وقبل كل هضا مفروض اتكوني واثقه فيا لانكن اكثر حد عارفني كيف انفكر وكيف تربيت وكيف عاملتكن من صغري
• مروه ...كانت تسمع فيه ومركزه مع كل كلمه ايقولها
• بشير .... وبما انك مازال متعرفيش بشير صح حنقولك اني مستحيل انبدلكن بكنوز الدنيا وعهد عليا اني نخاف الله فيكن ونراعيكن ونصون الامانه اللي خلوها ليا هلي لعند ما ربي ياخذ امانته
• مروه ... بعد عمر طويل ان شاء الله ومن غير ماتقول انت صاينا وموفي حقك علينا وسامحنا واعذرنا علي جهلنا وتفكيرنا فيك
• بشير ....ابتسملها طبطب علي خذها وحنقولكن كلمه قلتها لها ومن واجبي وحقها عليا اني انقوله لكن زي ماقلته لها زي ماانتن خواتي ولكن حق عليا زي ماهيا حتقعد مراتي ولها حق عليا يعني يابشري اللي منرضاش فيك انت ومروه منرضاشي في بنت الناس اللي نكتبت علي اسمي وقعدت مسؤليتي وبهكي ان شاء الله انكون ريحتك وياريت تغيري نظرتك فيها لعند تعاشريها وتعرفيها مش من اول نظره نحكمو علي الناس شن ولا علي اساس مشاعرنا نعاملو الناس بغير اصلنا وانضني هك درت اللي عليا وضحتلك رؤيه ممكن كانت غايبه عليك وصبا وطلع
• 🍃🍃🍃🍃🍃🍃🍃🍃🍃🍃🍃🍃🍃🍃🍃
• عند سالم ......
• سالم ... هاشنو جوكم الصبايا ودارت مقابله والا
• امال ...اهاا جن خواته الاثنين وجارتهم مراه كبيره في العمر
• سالم ...اهاا باهي شنو البنات اكويسات هضا المهم هيا اللي حتقعد معاهن اليوم كله
• امال ... والله هك اكويسات وكلا الطبع ماتعرف الشخص نين اتعاشره وبعدين هنا اصغار الحق حتي صار ماصار اتحملهن
• سالم .... ان شاء الله مايصير الا الخير
• امال ...هو قال لابراهيم انه موافق ويرجا في الرد منا و
• سالم .... خلاص خلو يومين هك وردو عليهم وربي يسعدها وايهنيها ان شاء الله
• امال ...ان شاء الله يارب ونفرحو بيهن كلهن هنا وخوتهن
• في الدار عند البنات
• صالحه ...وبس هضا اللي قاله
• سميه .... يانعليا شخصيه اتحسي عنده هيبه
• صالحه .... اهاا بكل بعد يحكي معاك تحسي حضوره طاغي تلقي روحك تسمعي فيه وماتبيش يسكت
• احلام .. يا نعليا يارب انطيح في واحد زيه واحسن منا اخري
• سميه .... مالك الا اصحاب خوتك بعدك اصحابهم اطروف اسأليني انا
• احلام ..... صار اسأليني ماعلينا منبيش انعلق عشان مش وقتك بس وبحتت في صالحه المهم قوليلي اول ماخشيتي شن حسيتي
• صالحه ...مش عارفه في الاول متوتره بكل ونرعش ونحس في قلبي يبي يطلع بعد ماحكاا سبحان الله نسيت التوتر بكل وقعدت نهدرز معاه عادي لعند.خش ابراهيم وفطنت لروحي
• سميه ....شكله هضا القبول اللي ايقولو عليه
• صالحه ..مش عارفه عاد بس شفتن اخته شكلها مش حتريحني كنها مش طايقتني حسيتها
• سميه ... حسيتها حتي انا انت تعاملي معاها عادي في البدايه لو لقيتيها اتدير في الطروح فوتيها ومعش تحتكي بيها
• صالحه ...يستر الله وخلاص
• احلام ...بس مروه عسل بكل راه وجوها ايهبببل بعد خطرها خذت حتي رقمي وعطيتني رقمها
• صالحه ...صاااح باهي حمدلله اقل شي تطلع وحده اكويسه
• سميه ....انا خلاص راسي ونعسانه تصبحن علي خير هيا صبي انت وهيا كل وحده في سريرها نبي نرقد
• صالحه ...صبت وخشت سريرها ارقدي ياحنه تصبحن علي خير وحطت راسها علي المخده وقعدت اتفكرفي بشير ومبتسمه
• 🍃🍃🍃🍃🍃🍃🍃🍃🍃🍃🍃🍃🍃🍃🍃
• عند الحاجه مبروكه .....
• ايوب ...كان مقمعز يفطر ومقمعزه مقابلته الحاجه مبروكه وتحكيله علي العرب باهي كل شي علي البركه وان شاء الله ربي ايتمم علي خير
• الحاجه مبروكه .... ان شاء الله بس بيني وبينك بنتي وعارفتها انا وجهها باين عليه انها مرقدتش الليل احكي معها يا ايوب تطلع للعرب ومتحشمنيش مع اصحاب باتك
• ايوب ... يا امي امتي زعلاتك سعاد غير اكيد تلقيها متوتره وعد لو صار نصيب وعجبتهم و بعد مانسالو عليه ولقيتها معارضه حنحكي معاه
• الحاجه مبروكه ...هزت راسها وسكتت
• ايوب....سفره دايمه يا امي
• الحاجه مبروكه.... صحتين وهنا يا غالي
• وصال ...صباح الخير
• ايوب ....صباح النور شنو كنك مالبستي وقت نبي نطلع
• وصال ..لا مش ماشيه كلمت دانا حتاخذلي اجازه اليوم
• ايوب ....تمام تبو شاي ناقصكم شي
• الحاجه مبروكه ...لا باتك قال تو انجيب مربوحه ياباتي
• ايوب ..هيا سلام خش علي سعاد للمطبخ كنه السمح زعلان ومضايق
• سعاد ..... من قال مضايقه وزعلانه عاديه انا
• ايوب ...تمام وهضا اللي نبيه تبي شي
• سعاد ... ابتسمت سلامتك
• ايوب ....نتلاقو في الليل ونحكو وطلع
• وصال ..... خشت للمطبخ صباحو سوسو
• سعاد ...صباح الورد كنك معديتش للعمل
• وصال ... كيف نسيب العسل بروحه في يوم زي هضا قوليلي
• سعاد ..... نجك ليا كنت توه نبي نطلع نبرم علي الصاله
• وصال ...خلاص وانا نطلع نسيق الجنان معنها
• ايه .... خشت عليهن صباح الخير علي العروس
• سعاد ...ييييييي جت اللي تبي اتحنط توه شن يسكتها توه
• وصال ...امتي جيتي انت
• ايه ... لقيت ايوب بره فتحلي الباب هيا جايه نبي انساعدكن شن تبن اندير
• وصال .... تعالي معايا نسيقو الجنان عشان نكمل بسرعه
• اية ....لالاالاا مش جنان شمس بكل توه
• وصال ....يااااااي اطلعي قدامي اطلعي قتلك عشان نكملو بسرعه ونكسبو وقت مازال حاجات واجد نبي انديرهن
• ايه ...طالعه معاك بالشويه وبطلي دف يافرخه
• وفات الوقت وهنا وكل وحده اتدير في حاجه وحطن الغداء وتغدن ولمن حوستهن لحد مارن الجرس وجو العرب وخشن وتعرفن علي بعضهن
• ربيعه ...والله يا حاجه هيا توفت مراته وهيا اتجيب في الوليد عقبات قبله بنيه ولها توه ثلاث اسنين متوفيه
• الحاجه مبروكه ...ربي يرحمها ويغفرلها ان شاء الله
• ربيعه .... وقعدو العويله معانا وموده خذت يوسف ورباته مع اعويلتها
• سليمه ....ربي ايخليكم لهم ان شاء الله وايعوضهم خير
• ربيعه ....سلمك عاد انا معش عندي جهد للجري وراء العيال بسليمتهم وعلي مانديرو مش كيف لما باتهم يتزوج وايربي اعويلته علي عينه والراجل حتي لو مش مقصرين معاه يبي مراه تراعيه وتعاونه علي هالحياة
• الحاجه مبروكه ...ايوالله ماقلتي الا الصادقه وربي يسرله امره ان شاء الله وايعوضه خير
• سعاد ....خشت عليهن السلام عليكم وبحتت في ربيعه تفاجأت وابتسمت خير ياكيف حالك
• ربيعة...بحتت فيها وبانت الصدمه علي وجهها وخير خير كيف حالك
• سعاد ...حمدلله بخير وسلمت علي موده
• موده ...اهلين شن اخبارك
• سعاد ...تمام حمدلله وقمعزت
• ربيعه .... ابتسمت وبحتت في موده هذي اللي عطت نوسه اللعبه
• موده ...بحتت في سعاد وهيا متفاجاة
• ربيعه ...سبحان الله علي الصدف عرفتيني انا اللي يومتها تلاقينا في لاقونا وعطيتي نوسه اللعبه
• سعاد ...اهاا عرفتك كيف حالها نوسة
• ربيعه ...حمدلله بخير تسال عليك العافيه سبحان الله ياحاجه من يوم حقيتها تمنيتها لوليدي وجعتني اني معرفتش عنها شي هذاك اليوم الا اسمهاواهي موده ياما حكيت عليها لها وعجبني موقفها اللي دارته مش اي حد ايديره
• الحاجه مبروكه .... ابتسمت وبحتت في سعاد
• سعاد .... معنديش فيه جميل هيا كانت عاجبتها اللعبه وانا مقدرتش انخليها في خاطرها
• موده .... قعدت اكثر من اسبوع وهيا اللي ايجي اتوريها له اتقوله صاحبتي عطتها ليا هديه
• سعاد ...ربي يحفظها ان شاء الله
• ربيعه....ان شاء الله والحاج باني شقق لكل واحد منهم شقه مايبيش العيال يطلعو بره ويتباعدو عليه ولو صار نصيب حيصينها ويسكنو فيها
• الحاجه مبروكه وسليمه ...ان شاء الله ربي ايقدم اللي فيه الخير
• وقدمو ضيافتهم وتعرفن علي بعضهم وخطبنها وروحن
• سليمه ...مشاء الله عليهم تحسيهم عيله اكويسه هك
• الحاجه مبروكه ... اهاا والله المراة اكويسه ومتواضعه وبيني وبيك الراجل مش عارفه ارمل وعنده عيال صح انا نبيها تزوج ونتهني عليها لكن العيال تربيتهم واعره وتحاسب عليهم قدام ربي لو غلطت معاهم اي غلط
• سليمه ... والله ياعمتي نحنا مانبوش نسبقو الاحداث خليهم يسألو عليه بعدها نشوفو سعاد شن رايها وفي النهايه كله نصيبات وكان نصيبه فيها ربي طيحهم في سعاد الحنينه تربيهم وتاخذ اجرهم وتعوضهم علي امهم اللي انحرمو منها
• الحاجه مبروكه ...ان شاء الله خير انا مانبي غير هناها
• 🍂🍂🍂🍂🍂🍂🍂🍂🍂
• ايه ...قصدك ياسوسو االعريس هو نفسه اللي شفناه يومها في لاقونا
• وصال ...اهاا شفتي الصدف سبحان الله
• ايه ....كنك ياسوسو سرحانه
• سعاد .... بصدق قبل لانشوف المراه كنت حنرفض من غير مانفكر بس بعد شفتها تلخبطت مش عارفه
• وصال .... توكلي علي الله واستخيري قبل تعطي اي قرار هضا اللي مفروض ايصير وخليها علي ربي صدقيني مش حتاخذي غير نصيبك
• سعاد .... ان شاء الله يارب وهضا اللي يبي ايصير
• 🍃🍃🍃🍃🍃🍃🍃🍃🍃🍃🍃🍃🍃🍃🍃
• عند موسي .....
• هويدا .... مش عارفه ياموسي ماما لها كم يوم مش طبيعيه
• موسي ...كنها قصدك اتحس في حاجه والا شنو
• هويدا .... قعدت منعزله وفي دارها متطلعش بكل وكان طلعت عيونها مليانات ادموع وكلام وكل منخش عليها نلقاها ماسكه صوره بابا وتبكي ولما نسألها كنك اتقول مافي شي
• موسي ...وليش ساكته لعند توه كنك ماقلتي بالك اتحس في حاجه ومتبيش تحكي
• هويدا .... مش عارفه قلت ممكن اذكرت بابا صاح محبيتش نشغلك
• موسي ...تمام تو نمشي انشوفها ممكن في حاجه مضايقتها ومتبيش تحكي
• هويدا ...ممكن بس هيا من يوم المول وجت المراة سلمت عليها وهيا حسيتها متوتره وخايفه
• موسي ...عقد حواجبه اين مراه هذي
• هويدا ...قالت بنت جيران عيت جدي تعرفها من زمان
• موسي..... اهاا تعالي معايا نشوفوها
• هويدا ...تمام ومشت دقت علي دار امها وفتحت الباب ماما
• فايزه .....
• هويدا......😱😱😱😱😭
• يتبع ......
• بقلمي ......أحلام
