• #الامانة ....
• الحلقه 18......
• ابراهيم ....وهو ايدف فيه وسع غادي وتحشم علي وجهك وعد الجيره اللي بينا
• خو ايمان ...خلا خوك فيها جيره هو قوله يطلع العيل احسنله انا عارف انه جوا اللي يضحك علي بنات يحساب ماورهنش رجاله
• احمد ....بيهد عليه بيضربه صكر فمك مافيش عيل غيرك يا ######
• خوها .... امشي يا###انت وياه اليوم والله انوريكم عشان تحسبو علي الرجاله اطلع اطلع خليك راجل واجهني
• خالد ..... طلع وبحت فيه راجل غصبنا عنك واحترم نفسك احسن لاني مازال محترم الجيره والعشره اللي بينا
• خوها .... انت تعرف عشره انت علي اساس محترم وتخاف ربك حووووول وقعد ايكر في روحه من اللي ماسكينه خليني انوريه كيف المرجله علي اصلها وطلق روحه وهد علي خالد
• خالد ..... مسكه وقعدو يضااربو وابراهيم واحمد وشباب الشارع يحزو
• سالم ..... جاء درس سيارته وبحت لقاء عركه قدام الحوش نزل بسرعه يا ساتر ياساترشن في ومشا يجري وبحت لقاء خالد يضارب هو الشاب خااااااالد ابراهيم وسع انت وياه
• خالد ..... ضربه وفك يده منا وخر وهو داهش ودبشه متبهدل
• وخوها .. قعدو ايكرو فيه شباب الارع اطلقوني خليني انت وياه قتلكم حوووووولوو
• ابراهيم ....وهو داهش بحت في احمد وخالد
• سالم ...وهوراقيتله شن في شن صاير وبحت في عياله كنكم معقوله عركه مع الجيران
• خوها .... بحت في سالم ولدك يضحك علي بنات الناس ياحاج ودايرنا مضحكه ونقعد مش راجل لو ماخذيت حقي منه
• سالم ..... لو عندك حق عنده تاخذه وحقك في رقبتي بس مش بالضرب والعراك وتشهدير
• خالد ..... وهو يبحت في باته وراقيتله لانه عارف باته حيجي عليه حقك تاخذه مني قبل باتي لو عندك حق
• خوها .... عندنا حق وانت عارف وفاهم وعندي الدليل
• سالم .... بحت في الناس كلم خوك الكبير وتعال نرجو فيكم جوا التفاهم مش في الشارع واللي عنده حق ياخذه
• خوها ...هذا اللي يبي يصير وخذا تلفونه ورن علي خوه
• سالم ...بحت فيهم خش انت وياه قدامي واحسابكم بعدين
• امال ....كانت مصبيه في الجنان هيا والبنات وتبكي خايفه وترعش وتسمع فيهم يانعليا شن المصيبه اللي جتنا يارب سترك يارب سترك
• صالحه ...ياماما اهدي الله ايربحك ضغطك يرتفع متخوفينش عليك
• احمد ...خش هو الاول وخشو وراه الباقي
• سالم .... خشو جو وانت ياخالد نبي نفهم شن صاير
• امال .... وهيا تبكي هيييي حي عليا فمك دم يانعليا عطيه كسره في يده ان شاء الله
• سالم ...بحت فيهم كلهم وهو ايفنص خشن جوا انتن شن طلعكن هنا وانتم الحقوني للمربوعه
• سميه .... وهيا تبكي مسكت يد احلام خشن بسرعه يانعليا ربي يفوت اليوم علي خير حي عليا لو يعلمو اني انا عطيتها الرقم
• صالحه ...اسسسس حتي وكان قالت متقوليش انك انت فاهمه
• احلام ...يانعليا هالداهيه شوفن كيف لعبتها الحيوانه معقوله اتشوه سمعتها في الشارع عشان تاخذه لانها بابا حيقوله ياخذها بعد الشهدره هذي كلها مستحيل ايخليها تمشي هك
• صالحه .... مستحيل خالد ايوافق وبابا مش حيجي علي خالد مادام مش غلطان و ايجيبها له شن دخله خالد تستاهل هيا اللي شهدرت بروحها
• سميه .... بابا والله ماحيسكت وايخلي سمعت البنت هك وتشوفي يانعليا خالد حيدبس فيها يانعليا خايفه يابنات
• صالحه...يرزيها في عمرها ان شاء الله الكلبه هذي حي عليا لو صاح معقوله ندخلو لحوشنا لفعه هك يانعليا ينخاف منها والله
• سالم ..... شن قصه البنت وبحت في خالد شن صايرشن في بينك وبينها انت
• امال ...كانت مصبيه وتبحت فيهم وهيا ترعش
• ابراهيم ...قمعزي يا امي بس مافي شي ان شاء الله
• سالم ..... بحت في خالد وهو راقيتله وحاط ايديه علي اركابه
• خالد ..... ياحاج خشيت من الورشه لقيت امي مكلمتها وحده من بنات وقايلتها ان انا نحكي مع بنتهم وخوتها مسكوها وهيا تحكي معايا وطبعا الكلام هضا كله مافيش منا انا لامتاع حركات عيال هك ولا فاضي لها الوجيج
• سالم ....بس كيف خوها ايجي للحوش هك وايهارج وتضاربو اخري قدام الناس حتي لو كان معندكش رقمها ولاتكلم فيها حتجي ضدك توه والناس اتعيب عليك
• خالد .... هذا اللي صار قعد يغلط في الكلام طلعت وانا منبيش نمد يدي عليه بس هو محترمش نفسه وقعد ايفترش في الدوه
• سالم .... بحت فيه وسكت اشويه وقال رانه عليك هيا
• خالد ...وهو منحرج من الموضوع وراقيتله اهاا ياحاج رانه كم مره وانا حطيتها في الحظر وكل مره طالعلتي برقم بس كنت بمجرد مانسمع صوتها نسكر وونحطها في الحظر
• سالم ..... متاكد ياخالد منبيش نطلع قدامهم منعرف شي ايجو وايقولو شي وانا نقعد معنديش علم بيه
• خالد ....يضغط علي يديه من كثر الغضب مافيش شي ياحاج وتاكد اني مستحيل اندير حاجه تنزل قدرك قدام حد
• سالم ..... هز راسه وسكت خلي خوتها ايجو ونفهمو شن في لانه قال عنده دليل انشوفو قبل وبعدها ساهل
• خالد ..... ياحاج نبي انقولك انا عمري ماكسرت كلمتك ولا عاش من يكسرها بس انا عارف في شن اتفكر بعد الشهدره اللي صارت فقبل لاتقرر اي قرار اعرف اني راضي بالي اتديره عليا بس اني نخطبها زي مايبو هما وهيا مستغفله خوتها علي احساب اسمي فهذي اسمحلي فيها مش حنقبل ولا حتنكتب علي اسمي واضني انت مترضاش ليا وحده زي هذي
• سالم ....كان ايبحت فيه وهو ساكت ومابش ايرد عليه بكلمه اشويه وهك دق الباب احمد افتح الباب وانت ياامال صبي خشي جوا وباذن الله تنحل
• امال ....ان شاء الله تعال صبيني يا ابراهيم
• ابراهيم .... مسكها من يدها ودخلها جوا قابلته احلام عطيها دواها ومدلها يدها امسكيها دخليها جوا
• احلام ...تعالي ياماما خشي بس تنحل والله متخافيش
• امال .... يستر الله من باتك البنت انفضحت في الشارع خايفه ايزر خالد عليها
• احلام ...متخافيش ياماما مستحيل بابا يظلم خالد تعالي قمعزي تريحي بس
• امال ...قمعزت وهيا ترعش وخايفه
• احمد ...فتح الباب وخشو عليهم
• خوها الكبير ...السلام عليكم ياحاج
• سالم ...وعليكم السلام تفضلو تريحو
• خوها الكبيرر...دام فضلك ياحاج وين الراحه نلقوها بعد اللي صار
• سالم .... اللي صار كله من تحت خوك اللي يبي التفاهم ميجيش ايتهجم علي الناس ويشهر باخته هك ويحط سمعتها في الوطي حتي لو صاح انه خالد له علاقه بيها والا مش هك ياحسن
• حسن .... بحت في خوه صح عندك حق في هذي صغير ميعرفش بس اعذره بس لما شاف اللي علي تلفونها واسم خالد والكلام اللي بينهم متحملهش فينا
• خالد ..... انا وهيا مافيش بيناتنا كلام ولاعمري حكيت معاها ولا مع غيرها الوجيج هضا مش لنا ولا فاضي بيه
• فيصل ... والكلام اللي شفته ورقمك اللي علي تلفونها يعني نصدقك ونكذب عيوني
• خالد ...رفع حاجبه وبحت فيه رن علي الرقم اللي منا الرسائل ولو طلع رقمي انا مستعد اندير اللي تبوه
• سالم ..... وانا لو طلع رقمه من قبل لاتطلعو من هنا نعطيكم كلمتي بكرا حنكونو عندكم ونقرو فاتحه ونكملو فيها وبهك نحنا اللي علينا درناه ويطلع معاكم راجل
• حسن ....عداكم العيب ياحاج
• فيصل ..... بحت في سالم كلمتك علي عيني وراسي بس شن ضمني انه معندش رقم اخر وهو اللي يكلم فيه
• ابراهيم ...كلمتنا ضمان وانت عارف من قبل نحنا شنو
• حسن .... بحت في خوه فيصل خلاص
• خالد ..... بحت فيه وهو راقيتله لا خليه ضمانك اني مستعد نحلف علي المصحف اني هذا رقمي ومعنديش رقم غيره
• فيصل ....سكت وبحت في خوه
• سالم .... طلع الرقم ورن عليه من تلفون واحد فيكم عشان نعرفو ومل واحد ياخذ حقه وقدره
• حسن .... وهو ايبحت في خوه بغل هات الرقم
• فيصل .... فتح تلفون ايمان وحط علي الرقم اللي كان باسم خالد وعطاه له
• حسن ....سجل الرقم ورن عليه وفتح السبيكر وقعد يرجا اشويه وسمع صوت شاب بحت في خوه وفنص اعيونه ايوه
• فيصل .... صبابسرعه يبي ياخذ التلفون منا هاته نبي نعرف من ال#####
• حسن ......باعد التلفون من فيصل وسكر عليه وفنص خوه خلاص ساد فضايح اسكت وسكر فمك وبرم بحت في سالم وخالدوهو وجها منسود سامحينا ياحاج علي الموقف اللي صار وامسحها في وجهي والغلط منا نحنا واللي تبوه نحنا فيه
• سالم .... مسامح بالنسبه لنا ومش بينا نحنا عشره عمر وبحت في فيصل بس ياريت مره اخري تعلم وتريت وتستر علي اختك حتي لو غلطانه ومتعطيش فيها قدام حد
• حسن ... بارك الله فيك ياعمي معروف معدنك وباصلك الطيب وسامحنا ياخالد انت وابراهيم واحمد
• خالد ....مسامح وزي ماقال الحاج نحنا عشره عمر
• حسن ....بحت في خوه هيا اسمحلنا ياحاج وبعد اذنك تأسفلنا من الحاجه علي الفجعه اللي حصلتها هي السلام عليكم وطلعو وهما منزلين روسهم علي الموقف اللي حطو ارواحهم فيه
• سالم .... تنهد وعليكم السلام وقعد يمسح بيديه علي وجهه استغفر الله العظيم من كل ذنبا عظيم
• احمد ...معقوله ايدير هك وايفضح باخته في الشارع كله
• سالم ....عيل صغير مايعرفش ايفكر كل تفكيره علي اساس ياخذ حقه
• ابراهيم .... من زمان الفرخ فيصل هك نوعه مايفكرش متسرع وبعدها تجي علي راسه
• امال ....خشت تجري للمربوعه وراها البنات شن صار ياحاج
• سالم ...بحت فيها تريحي انحلت علي خير
• امال ...بحتت في خالد كيف ياحاج انحلت كيف روحو هك واسكتو
• سالم ...بحت في خالد طلع الموضوع مش شور خالد الحمدلله وسكرو علي السيره معش نبي حد يحكي فيها هذين اعراض ناس وصبا طلع
• امال ...بحتت فيه وهو طالع وردت بحتت في خالد شن صار حد ايفهمني
• خالد ...اللي صار طلع الرقم مش رقمي وهيا مسجله الرقم باسمي واول ماحقوه خوتها جو دغري من غير مايحاولو يستفسرو حتي
• امال ..الحمدلله ربي ايباعد عنكم المشاكل بس البنت اللي خوها شهدر بيها في الشارع شن بيصير فيها
• خالد ...منهم بيدهم مش منا لو جاء سأل باحترام راه لم الموضوع من غير ماحد يعرف
• ابراهيم .... نبي نعرف ليش سكتت مقلتش انه تبعتلك وتجري وراك وكل مره خاشتلك برقم
• خالد .....ربي يستر عليها المهم تخطاني منبي منها شي انا خاش انتريح
• امال ....عدي يا امي ربي ايريح بالك ان شاء الله ويباغد عنك بنت واعيالةالحرام وانتم خلاص خشو تريحو من هالفجعه
• ابراهيم .... في عشاء ننقاني جاي جيعان ولقيت قدامي الفرخ هضا ولهينا فيه د
• امال ... هيا تو انقوللهن ايحطلكم خشو جوا هيا
ر🍃🍃🍃🍃🍃🍃🍃🍃🍃
• بعد مرور ايام .......
• عند الحاجه مبروكه .......
• وصال ..... يانعليا خلاص كرعيا طاحن من كثر اللف علي المحلات
• الحاجه مبروكه .....شنو خلاص كملتن
• سعاد ....اهاا شبه خلاص كملت معش مازال شي الا حاجات بسيطه و عندي جلسات تنظيف بشره بكرا
• وصال ...خلاص الوقت زر شنو قررتي بتصبغي والا لا
• سعاد ...لالا نبي انخليه هك ممكن لو صبغت حنديره كستنائي فاتح يعني افتح من لون شعري بشوي
• وصال ..اهاا حيطلع حلو صاح
• الحاجه مبروكه ....وا نت شن صار فيك يا وصال خذيتي اللي تبيه
• وصال ...اهاا خلاص كملت اهو قفطاني شوفيه وهذين الاكسسوارات وخذيت كم لبسه للايام العاديه شن رايك
• الحاجه مبروكه ... مشاء الله تبيدي وتجددي وهيا عيونها مليانات ادموع وربي ايفرحني بيك ان شاء الله عن قريب
• سعاد ... ابتسمت ان شاء الله يارب
• وصال ....تنهدت وقعدت تلم في دبشهاوتحط فيه في الاكياس متاعها قتلك ياسوسو امس حقيت وحده اتغلف في دبش تغليفتها حلوة بكل بعتلها قالت اهاا نغلف وفاضيه هاليومين حجزت فيها تعالي نوريك تغليفها اهي صفحتها
• سعاد ..... كان عجبك خلاص نسقي معاها خليها اتغلفه هيا معنديش راس والله وديري اللي يعجبك
• وصال ...خلاص تمام حنكلمها توه معنها نسق معاها
• الحاجه مبروكه .... شوفيها كان هيا اتجي تاخذ الدبش ايوب مش فاضي وعمك مصطفي حتي هو حايسين هو وسليمه في حاجات الفرح تجي تشيله تغلفه وتزيديها حق خدمه توصيل علي حق التغليفه
• وصال ...حاضر تو انتفاهم معاها عليه بس مش عارفه عندها حد يستلم من هنا والا لا
• الحاجه مبروكه .....انت شوفيها ولو معندهش ساهل ايوب ايفضي روحه وخلاص بعدين
• وصال ...تمام توانشوفها
• سعاد .... امي عازمين انتم علي الحنه
• الحاجه مبروكه ...اهاا جيران القريبين بس والاقارب
• سعاد .....معنها نحجز في مزين حتي للحنه الصغير
• وصال ..... اهاا اكيد احجزي متعبيش علي حد كلنا مش فاضيات وصبت خذت الكياس متاع دبشها نحط هذين و نبي اندير قهوه راسي صداع بكل
• سعاد .... خليك خشي دوشي انت اتطولي بكل في الحمام اندوش وتو انديرها انا ونكلم الفرخه ايه اليوم كلمتها مبدري الصبح نبيها تمشي معانا قالت مش ماشيه
• وصال... عارفتها الفرخه طولت في السهر امس اليوم مش حتقدر توعى اصلا خميره نوم
• سعاد .... بكللللل وناضت هاتي هذين خليني نحطهن مع الدبش عشان نرتبو الحاجات اللي نبوهن هنا بعدين
• وصال ...هاتي تو انشيلهن ا معاك
• 🍃🍃🍃🍃🍃🍃🍃🍃🍃🍃
• عند عزيز .......
• الحاج يوسف .... ها ياعزيزشن صار خلاص جبت الاثاث كله
• عزيز .....اهاا ياحاج تمام كله مازال بكرا نركبو دار العيال
• الحاج يوسف .... باهي علي بركه الله كلمتي ياربيعه الحاجه واتفقتي معاها
• ربيعه ... اهاا ياحاج ا تفقت معاها الاثنين نشيلو السياق و تقرو الفاتحه ونحنا عندنا هنا عزومه للرجاله والثلاثاء ايجيبو ايستفو الدبش والاربعاء نحنا عندنا راحه وهما عندهم حنه صغيره والخميس زفه وحنه كبيره في الصاله عندهم نمشو في الصاله نحنوها وهو ايجي ياخذها من الصاله
• الحاج يوسف ...تمام بكل منبيش انقص علي البنت شي والا شنو ياعزيز
• عزيز ...اللي اتشوفه ياحاج
• الحاج يوسف ...خلاص السياق تمشن انتن عرب الحوش بس تعزميش علي حد
• ربيعه ...كيف عاد خواتي يبن ايجن من غير عزومه هنا وخياتك
• الحاج يوسف ... المهم مافيش كثرت صبايا يمشن
• ربيعه .....حاضر ياحاج تو انقوللهن
• الحاج يوسف ... منبوش زعل نحنا من توه قولي مش دايرين فرح ولا عازمين واللي يبي ايجي ايتفضل
• ربيعه ...وحتي انا قلت هك وان شاء الله مافيش زعل وقعدت تبرم وتشير لعزيز قتلك ياحاج كيف ايصير في مرات عمران عيب قدام الناس دايرين فرح سلفها ومتنزلش متجيش الناس تعرف بمشاكلنا
• الحاج يوسف ..... وهووراقيتله شن قصدك انت بتعلميني عقاب عمري كيف نصرف
• ربيعه....وهيا خايفه حشاك ياحاج مش قصدي هك انا قلت نسالك وانكلمها تنزل بس منبيش حد يطق فينا بكلمه
• عزيز ...وسع بالك ياحاج بس وبعدين صدقت امي مافيش داعي الناس تعرف مشاكلنا لانه كل اللي حيجن يبن يسالن عليها عشان عمران ياحاج
• الحاج يوسف .... اللي تبوه ديروه انا مش شوري وكل اللي درته عشان العيل
• عزيز ... عارفك ياحاج وخليها اتجي منك اتقولها لعمران عشان يفرح نشهد بالله انه من يوم ماقتله يمسكها وهو مش متريح
• ربيعه ....اتبحت في عزيز وابتسمت وغمضت عيونها وتنهدت
• الحاج يوسف .... خلاص تمام زي ماتبو بس لو تصير حاجه زي اللي صارت مره اخري معش نبي انشوف وجهها بكل
• عزيز .... حاضر ياحاج وباذن الله مايصير الا الخير
• ربيعه ..... وانا من عندي انبها ونقوللها كلامك
• الحاج يوسف ....وين موده هيا والعيال مش باينه وملهمش حس
• ربيعه ... العيال جاهم عمهم خذاهم اليوم وموده طالعه للسوق شايلها عمران
• الحاج يوسف ..... هز راسه وهو ساكت سخنيلي طاسه شاهي خليني نشربها ونطلع
• ربيعه ...هي حاضر وصبت
• 🍃🍃🍃🍃🍃🍃🍃🍃🍃🍃
• هويدا ...... ها شنو تمشي اتجيبه انت يادوب نلحق انا ورندا نكمل اللي عندي ونسلمها
• موسي ..... تمام خلاص تو نمشي انجيبها انت ابعتيلي العنوان وين بالضبط والا الرقم
• هويدا ..تمام تو انقوللها تبعتلي العنوان ونبعته لك ونبعتلك رقمها
• موسي ...تم خلاص نرقد اشويه وعيني علي العصر معنها نمشي انجيبه
• هويدا ... تمام وخشت يلا امها لقتها تحكي بالتلفون قمعزت وقعدت ترجا فيها
• رندا خشت بسفره فاكهه وحطتها وقمعزت منو اللي تحكي معاها
• هويدا ..مش عارفه وين البنات
• رندا ....حطيتلهن في الدار يلا التلفزيون
• فايزه .... خير خير سامحيني والله ماعرفتك من حضرتك
• المراه ....عندك حق انا والله خذيت رقمك من صبيتك عايشه انا جارتها
• فايزه ...اهاا كيف حالك وكيف حال صحتك
• المراه.... الحمدلله بخير والله يا فايزه انا ليا كم اندور لوليدي الكبير وصبيتك دلتني عليك قالت عندها بنات
• فايزه .... وهيا تبحت في هويدا اهاا
• المراه .... لو فاضيين ان شاء الله بكرا نبي انجي انا وبناتي الاثنين
• فايزه .... وهياعاقده حواجبها تفضلي مرحبتين بيك
• المراه .... خلاص ياحنه نتلاقو بكرا وان شاء الله فيها النصيب وعنوان حوشكم خذينه عطه لنا واحد من الشباب مع السلامه
• فايزه.... تسلمي وسكرت
• هةيدا ...وهيا عاقده حواجبها في من اتكلمي ياماما
• فايزه ...جارت عمتك عايشه دالتها عليكن تبي تخطب قالت
• هويدا ...عمتي عايشه شن خطرنا عليها نحنا لنا كم ماشفنها حتي في مرضتك ماجت كلمت بالتلفون وخلاص
• فايزه .... ماني عارفه ان شاء الله خير بعد كلمتني والله ماقدرت انردها
• هويدا .... يستر الله وخلاص انا مش متريحه للموضوع
• فايزه .... ان شاء الله خير وحطي في بالك انتن الاثنين حتطلعن عليهن
• هويدا ...لا ياماما مش طالعه انا ره خلي رندا تطلع اهو قتلك من توه
• فايزه ..... ليش كنك كان علي انه من طرف عمتك مستحيل نعطوك هك وخلاص اكيده حنسألو عليهم قبل
• هويدا ..... عارفه ياماما بس انا منبيش اهو قتلك نطلع نمد الضيافه اهي رنداقدامك وتطلع ايشوفوها
• فايزه ...ان شاء الله خير ساهل توه شنو قلتي لموسي علي المراه اللي تبي اتغلف دبشها
• هويدا ...اهاا قتله وقالي بعد العصر ايجيبه
• فايزه ...اهاا خلاص شوفي شن ناقص عشان نعرفو شن انديرو للعرب
• هويدا .... ساهل تو نوصي موسي علي ناقص ايجيبه وانديرو نوعين والا ثلاثه مالح في الليل
• فايزه ...خلاص نعبا عليك معنها
• هويدا ...ان شاء الله
• 🍃🍃🍃🍃🍃🍃🍃🍃🍃🍃🍃
• عند بشير ........
• بشير ..... هاشنو رايكن اين احلي
• مروه ..... هذي احلي تمشي مع الزواق ودير فرشه بيج وعليها عجمي اكسره بلون فاتح
• بشير .... وانت يابشري شن رايك
• بشري ...بحتت في التلفون بصراحه عجبتني هذي احلي من الاثنين اللي قلتو عليهن
• بشير .. علي اساس ساعدتني توه كل وحده منكن اختارت غير اللي اخترتها
• بشري ... انا عجبتني هذي احلي بس هيا دارك من راي انت اللي اختارها احسن شي
• مروه ....عارف شنو تعال انقولك وخذاته من يده وطلعت بيه بره شن رايك نعطيك اتكلمها تسالها اين احلي واللي تختارها هيا تاخذها
• بشير ...لا متجيش عاد كيف انكلمها من وراء هلها لو نبي انكلمها حنقول لخوتها يعطوني رقمها مش هك من وراهم
• مروه ...غير اصبر بس انا نكلمها وتس ونقوللها بشير يبي ياخذ رايك في دار النوم
• بشير ...لالا متجيش مستحيل نحكي معاها من وراء خوتها
• مروه ...عادي توه انت خطيبها خلاص كنك بس
• بشير ....ولو كان مستحيل قلت خلاص انهي
• مروه ...وهيا مكشره باهي خلاص بس نسالها انا شن رايك
• بشير ...تمام عادي اساليها وابعتيلها حتي هذين تو نبعتهن لك واللي تعجبها ناخذها
• مروه ..تمام بس ارجا خليك هنا اهي فاتحه تونبعتلها اهلين صالحه كيف حالك
• صالحه ...كانت مقمعزه ويلا خواتها وايهدرزن حي يابنات مروه بعتتلي وتس
• احلام ....ردي عليها شن ترجي
• سميه .. لالا خليك اشويه ترديش ومتفتحيش المحادثه
• صالحه ... فتحتها خلاص
• سميه ..هيييي طيح سعدك كانك ترجي فيها تبعتلك
• احلام ....فوتيها النبي المكلوبه هذي وردي عليها
• سميه ...مافي مكاليب غيركن اللي مصربعات علي الرد
• صالحه ..... خزي وكشخت علي سميه وبعتت خيرات مروه الحمدلله بخير شن اخباركم
• مروه ...بحتت في بشير اهي ردت الحمدلله كلنا بخير
• بشير .... كان ملهوف عشان ايشوف شن ردت
• مروه ...جت جنبه وقعدت ترجى فيها ترد وبشير اعيونه علي المحادثه
• صالحه .... دوووم يارب ان شاء الله
• مروه .... سلمك ياعسل قتلك يا صالحه ايسلم عليك بشير ويبي ياخذ رايك في دار النوم باهي حنبعتلك صور تختاري منهن باهي
• بشير ....شن ايسلم عليك هذي امتي قتلك سلميلي عليها
• مروه .... من غير ماتقول ذوقيا انقوللها عاد مادام تبيها تختار الدار
• بشير ...وهوو مبتسم باهي انشوفو اخرتها معاك
• صالحه ..... حي عليا تعلن شوفن شن قالتلي
• سميه ...جت جنبها وريني شن قالت شنو يبي ايكلمك
• صالحه .... ابعدي راسك اشويه بس
• سميه ...ردي عليها باهي ترجا قاعده
• صالحه ... سلمك وسلمه 😊تمام ابعتي
• مروه ..... بحتت فيه وهيا تضحك هك 😁 تسلم عليك راه و هيا ابتعلي الصور
• بشير ...... ابتسم وطلع تلفونه وقعد يبعتلها في الصور
• مروه .... اشويه بس قاعد يبعت فيهن ورفعت تلفونها وخذتله لقطه عفويه وهو منزل راسه ويبحت في التلفون وبعتتها لها ومعاهن غمزه😉شن رايك
• بشير.... بحت فيها وابتسم شن اتديري انت
• مروه ...وهيا مبتسمه شي شنو بعتتهن
• صالحه .... وصلتها الصوره اهي بعتت يابنات وقعدت مستوها في الصوره
• احلام .....وريني وقعدت تضحك هههههههه صار صور دار نوم عليك جو مروه طلعت خطيره
• سميه ... مشاء الله عليك سماحه فيه واخيررا توعي الصبح تصبحي علي هالسماحه
• صالحه .... وهيا وجها احمر وتبحت في الصوره وعيونها قلوب
• احلام .... حي شوفي وجها البنت خلاص راحت اووووي انت يا بنت صاااالحه
• صالحه ...امشي انت وياها من يلا وجهي عليك براده فيكن
• سميه ..اسمله علينا وخلاص يااحلام ياشريني انخطبت هذا كله وضور ماله بعد توصل فيه شن اتدير
• احلام حقاتها صدقت حد ايبدل غزلانه بقرود وشيرت علي سميه
• سميه ...خزي امشي نعن داء ان شاء الله
• صالحه ...غمي انت وياها داهيه ان شاء الله
• مروه .... اهن وصلن وخشت دارتلهن تحديد وبعتتهن لها
• بشير ... قعد مصبي يلاها ويرجا في ردها
• صالحه ...وصلنها وقعدت اتشوف هيا وخواتها انا عجبتني هذي وهذي شن رايكن
• احلام... اهاا حلوات بس هذي احلي راه
• صالحه ...وانت ياسميه اين احلي
• سميه ...انا عجبتني البيضه احلي وحده
• صالحه ...لالا مش حلوة خلاص حنبعتلها هذين الاثنين وهو يختار ودارتلهن تحديد وبعتتهن للمروه هذين احلي وحدات عجبني وحرت بينهن بصراحه انتم اخترو منهن عاد
• مروه ... شوف يابشير حي اختارت متاعك اللي عجباتك وهذي بحتت فيه خليني انرد عليها ونوريهن لك
• و ردت عليها تمام سبحان الله نفس الذوق انت وهو خلاص تو انقوله يختار منهن ولو معجبنكش بكل عادي مازال يبي ايدور
• صالحه ... لا تمام حلوات هذين وبعدين السوق كله نفس البضاعه مفيش داعي يقعد ايدور واجد
• مروه ... وهيا تضحك تمام تو انقولها له وبحتت فيه قالتلك تعبش روحك واجد حتي هذين عجبني
• بشير .... وهو يضحك تمام خلاص معنها حنتوكل علي الله ونتم في هذي
• مروه .... اهاا والف مبروووك مقدما ويارب دوووم فرحان ومبسوط
• بشير .... وهو مبتسم وعيونه يلمعن الله ايبارك فيك وايخليكن ليا
• بشري ...كانت اتبحت فيهم وهيا راقيتلها وعيونها مليانات غضب
• 🍃🍃🍃🍃🍃🍃🍃🍃🍃
• يتبع .....
• بقلمي..... احلام
