• #الامانة .......
• الحلقه 4.......
• ايه .... دقت علي الباب وقعدت ترجا
• سعاد ....هيا هيا جايه وفتحت الباب
• ايه ..خيرات يا عميمه شن جوك
• سعاد ..اهلين الحمدلله خشي هيا وينك اليوم مش باينه
• اية ..خشت هيا وسعاد شور الحاجه مبروكه والله مالياش ساعه مروحه من المعهد حني كيف حالك اليوم وحبت علي يدها وراسها
• الحاجه مبروكه ...الحمدلله بخير شن دايره في قرايتك
• اية ..الحمدلله ماشيه وبحتت في سعاد وين وصال قالي ايوب جبتها
• سعاد ..اهاا خشت اتدوش خشي شوفيها في دارها ممكن طلعت
• اية...تمام عميمه خاطري في فنجان قهوة من ايدياتك
• سعاد ... حاضر هي اصلا نرجا فيكن لعند اتجن عشان نشربوها مع بعضنا
• اية... ياخيا ربي مايحرمنا منك ياعسل
• سعاد ... ولا يهمك قاعده مادام متمسكات بدعوتكن هذي ومتغيرتش من وانتن اصغار
• ايه ....وهيا تضحك ييييي نسيت والله نغيرها من اليوم ربي ايفرح قلبك ياعميمه اكويس هك خشت لدار وصال
• سعاد ... ايوه هذين الدعوات والا بلاش
• اية ....خشت لدار وصال نعيما ياحلو
• وصال ... وهيا تجفف في شعرها ومبتسمه الله ينعم عليك شن الجو
• اية..قمعزت علي السرير وهي مبتسمه تمام
• وصال . ..شن سر هالابتسامه
• اية..ولا حاجه يعني لازم في حاجه لما نقعد مبسوطه وفرحانه
• وصال ..رفعت حواجبها اهاا اكيد احكي هيا
• اية ... الدكتور عامر اللي قتلك عليه اليوم كلمني
• وصال ...وهيا مش عاجبها باه وشن يبي
• اية .. قالي انا نبي نحكي معاك في موضوع ومتردد ومش عارف شن ردت فعلك انت عاجبتيني وانا منيش اصغير ولا نحب انلف واندور وفعشان هك نبي نعرف رايك قبل لاندير اي خطوه تفادي للاحراج ليا ولك طبعا اكيد تعرفي اني انا متزوج بس ربي ماردش يرزقني بعيال وعشان هك انا نبي نتزوج
• وصال .... وهيا عاقده حواجبها وانت شن رديتي عليه ردي بالك اتكوني وافقتي
• اية ...تنهدت ونزلت راسها لالا ماوفقتش اكيد بس قتله نبي مده انفكر ونصلي استخاره ونرد عليك
• وصال .. قدمت يلاها ومسكت يدها بحتي فيا عارفه انت شن معني انك اتكوني زوجه ثانيه يعني اللي لك لغيرك يعني ملكش الحق انك تغيري ولا تزعلي لو يوم غاب عليك ومسالش فيك لانك انت من الاساس خاشه عليه الكلام هضا طبعا بغض النظر عن راي ايوب وعمي مصطفي اللي انا متاكده منا انهم حيرفضو انت مش ناقصك شي عشان تاخذي واحد اكبر منك بعمر ليش اتخشي في متاهات انت في غنى عنهن ممكن هو انسان اكويس بس مافيش اصعب من ان الوحده اتكون مضطره انها اتحمل تكون طرف ثالث في مكان حتحتس انه مش لها اساسا ليش اتكوني انت الطرف اللي حيخرب علاقه اثنين اللي مهما اتديري مستحيل حتشوفك الا انك دخيله عليها وخربتي حوشها وخذيتي راجلها منها الجامعه مليانه شباب ممكن ايكون في حد معجب بيك وايحبك اخري عشان هك م متخليش واحد تافه ايأثر عليك وايغير نظرتك وطريقه تفكيرك
• اية... تنهدت ومسحت وجهه بيديها مش عارفه مش عارفه شن اندير
• وصال ...بحتت فيها وابتسمت صدقيني حتعرفي انت ردي اية اللي قبل وحتعرفي
• سعاد .. يابنات تعالن جبت القهوة
• اية...ابتسمت هيا تعالي بسرعه نشربو القهوه قبل لاترن عليا ماما اصلا ماشيين عند عيت خالتي
• وصال ... هيا تعالي
• 🍃🍃🍃🍃🍃🍃🍃🍃🍃🍃🍃🍃🍃🍃🍃
• امال ... خشت لدارها لقت سالم مقمعز ويقرا في قران بحتت فيه وعلقت دبشه وقمعزت علي السرير وقعدت ترجا فيه ايكمل
• سالم ...اشويه وسكر المصحف وحول المصليه وحطهن في مكانهن وجاء قمعز في جنبها
• امال... تقبل الله ياغالي
• سالم.... منا ومنك صالح الاعمال
• امال ...كنك من اول ما روحت من مشوارك وحسيتك مهموم ومضايق
• سالم ... تنهد عارفه وين مشيت اليوم
• امال ...وين ان شاء الله خير
• سالم..... مشيت للعنوان القديم لحوش صالح
• امال ...وهيا متفأجاة شن صار معاك
• سالم ..... مشيت للفيلا رنيت دقيت محد فتح شوي طلعلي جارهم قالي ياحاج مافي حد هنا من ميتت المرحوم صالح مسيبينها لانه صارت مشاكل بين الخوت
• سالم ....باهي متعرفش وين بنته
• جارهم ..والله اللي نعرفه مشت مع جدتها وعمها مصطفي لحوشهم لولي
• سالم .... باهي متعرفش وين ساكنين
• جارهم .... اهاا في منطقه ال******* الحوش الرابع علي يدك اليمين والله مانعرف هو اللي عرفته انه الحاجه ردت لحوشها وشالت معاها البنيه ومن يومها معش في حد جاء هنا نهائي
• سالم ....هز راسه وسكت وبحت في الراجل هي السلام عليكم وبارك الله فيك
• جارهم... وعليكم السلام تبي اي حاجه انوصلها لهم لو جاء حد
• سالم .لا ماقصرت بارك الله فيك
• امال ...باهي انت ليش مشيت تشوف في الحوش مع انه قايلك صالح الله يرحمه متحكي علي الشنطه لحد لعند ايجيك حد ويعطيك العلامه
• سالم .... والله ليا كم يوم نحلم بصالح يسلم عليا وايقولي ياسالم االله الله في الامانه اول مره قلت اكيد من كثر مانفكر في الشنطه وشاغلتني لعند تكررت نفس الحلمه معش تريحت وقلت نمشي انشوف حوشه بالك نعرف حاجه ممكن الشنطه فيها حاجه متعلقه بهالبنيه القزونه ونلقي حد من هلها نشوف شن صاير فيها
• امال ...لاحول ولاقوة الا بالله انا من راي معش تسال علي حد زي ماقالك المرحوم لانه كان شرط من شروطه انك متحكيش ولاتعطيها لحد الا بعلامه
• سالم ...ان شاء الله خير هذا اللي يبي ايصير ان شاء الله
• امال ...ان شاء الله مافي الا الخير انت متكدرش روحك ربي ايحلها من عنده
• سالم ...ونعمه بالله شنو ابراهيم روح والا مازال
• امال ...لا مازال ماجاء بس اكيد علي جيه
• 🍃🍃🍃🍃🍃🍃🍃🍃🍃🍃🍃🍃🍃🍃🍃🍃
• موسي ... نزل امه علي الكروسه وصلها لعند السياره وساعدها هو وهويدا لعند ركبها من لاقدام ونزل الكرسي عشان اتريح وسكر الباب وبحت في هويدا اركبي انشوف الشباب وانجي
• هويدا ... تمام
• امجد ...كان متكي علي السياره من القدام وابراهيم مصبي قدامه شاف موسي جاي جيهتهم اهو موسي جاء
• ابراهيم ...برم بحت في موسي وهو جاي ولمح هويدا بحتت فيهم وركبت
• موسي ...وصل فيهم بارك الله فيكم يا شباب تعبتكم معايا
• امجد ...مش بينا الكلام هضا
• ابراهيم ...ها شنو كيف حالها الحاجه
• موسي... حمدلله احسن طلعت وماشي مروح بيها
• ابراهيم ..باهي الحمدلله ان شاء الله لاباس عليها
• امجد ...خلاص توكل متخليهش ترجا في السياره اطلع ونحنا وراك
• موسي ..تم هي سلام انتلاقو
• هما.... سلام
• موسي ... ركب السياره ولعها وطلع وطلعو وراه امجد وابراهيم
• رندا ... فطومه هي خلاص خشي ارقدي الساعه قريب ل12
• فطومه ...لالا نبيش لعند انشوف ماما مش نعسانه انا
• راند ....تنهدت وبحتت في الساعه وتنهدت وحكت في سرها طولو بكل يارب وهيا مقمعزه سمعت صوت المفتاح نطت بسرعه وعدت تجري شور الباب اهي جت الحمدلله ياربي العالمين
• هويدا... فتحت الباب وخرت خلت موسي ايخش وهو شامر فايزه
• رندا .... حي عليا كنها ليش شامرها
• هويدا ...خشت وهيا تعبانه اكويسه الحمدلله تقدر تمشي بس مازال داهشه اشويه
• رندا ... حطت يدها علي قلبها اااااااااه الحمدلله وخشت للدار هيا وفطومه لقت موسي يسقملها في المخده
• موسي ..شنو تمام هك
• فايزه ..اهاا تمام ربي يحفظك ويحميك سامحني ياغالي تعبتك معاياوشغلتك
• موسي ..وهو يسلم علي يدها تعبك راحه يا حويجه انت شدي حيلك ونوضي بالسلامه وانا نقعد متريح
• فايزه ..ان شاء الله
• رندا ...ماما كيف حالك توه
• افطومه ..ماما كيف حالك وركبت حضنتها
• فايزه ...حمدلله يا مي اكويسه انا
• موسي ... بحت في رندا جيبيلها عشاء خليها تاكل وتريح
• رندا ...هي دقايق نسخنه بس تبي تطلع اذكرت برمت عليه وانت نحطلك انت وهويدا
• موسي ..انت حطي لامي وتعالي يلاها ونحنا تو تحط اهويدا بعدين
• رندا ...حاضر هي وطلعت خشت للمطبخ لقت اهويدا تسخن في البرودو ليش ماخشيتي دوشتي تو نحط انا
• هويدا ... تو نخش خلي موسي ايخش قبل وبعدها انا وحطت البردو في الصفره وحطت معاه موز وتفاحه هاكي شيلي وخليك يلاها وبعدها غيريلها دبشها من بنه المستشفي عشان ترقد وتريح
• رندا ...تمام وخذت منها السفره وشالتها لامها فطومه عدي هويدا تبيك
• فطومه ...باهي وبرمت باست امها علي خدها تصبحي علي خير مامي
• فايزه ...وانت من اهل الخير
• رندا ... حطت الصفره علي طاوله صغيره وسقمت تقمعيزت امها وحطتها قدامها هيا ماما هكي اكويس
• فايزه ....وهيا داهشه اشويه اهاا اكويسه وقعدت تاكل بشوي عليها
• 🍃🍃🍃🍃🍃🍃🍃🍃🍃🍃🍃🍃🍃🍃🍃
• صباح يوم جديد ☀️......
• خالد ..... صباح الخير يا امي
• امال ...صباح النور تعال افطر اهو الفطور واتي
• خالد ..صبيلي فنجان قهوه يا غاليه بس
• امال ... رفعت صفره الفطور ومدتها له هاك خوذ شيلها لباتك وقمعز افطر وبعدها توكل اهو جايه ورك بسلة الخبزه
• خالد ...خذا منها السفره وهو مبتسم وخش لدار صباح الخير ياحاج كيف حالك اليوم
• سالم ...وهو متكي ويتفرج علي الاخبار صباح الخير
• خالد ...حط السفره قدام باته وقمعز هيا قدم يا باتي
• سالم ... سقم تقمعيزته هيا وين امك
• امال ...وهيا جايبه سله الخبزه اهو جيت يا حاج وحطتها قدامهم وقمعزت
• سالم ....هي بسم الله بحت في خالد كيف حال العمل معاك
• خالد ...الحمدلله ماشيه
• سالم ... امس الحاج عطيه قالي ولده عنده سياره يبي ايبيعه قتله خليني انشوف خالد له كم ايدور في سياره تو انقوله ايجي ايشوفها
• خالد ... والله توونمشي انشوفها بعد الغداء لانه اليوم طالع بدري
• سالم ...خلاص عديله شوفها كان عجباتك متبحتش في السعر اللي ينقصك ساهل نزيدك عليه وخوذها بدال قاعدين علي سياره وحده انتم الثلاث
• خالد ... ان شاء اللهيا حاج الحمدلله دايمه ان شاء الله
• امال ..صحتين وهناوبحتت فيه قتلك يا خلوده
• خالد ...نعم
• امال... اليوم خواتك يبن السوق العشيه
• خالد...والله انا مش فاضي اليوم شوفي ابراهيم والا احمد
• امال ... باهي ياحني ربي ايعاونك ويرزقك ان شاء الله
• خالد ...ان شاء الله هي السلام عليكم
• سالم وامال ...وعليكم السلام
• سالم ....وين البنات مازال راقدات لعند توه
• امال ...لا وعن صالحه تنزل في الدبش وسميه واحلام يبرمن علي الصور
• 🍃🍃🍃🍃🍃🍃🍃🍃🍃🍃🍃🍃🍃🍃🍃🍃
• الحاجه مبروكه ...ياسعاد ...وعي ايوب شكله مازال ماوعا امس كم مره وهو ايقول وعوني عند مشوار
• سعاد ...واعي ياامي شفته قاعد ايصلي
• الحاجه مبروكه ...وباهي وهيا تحكي دق باب الحوش ياوصال شوفي من الباب ايدق
• وصال ...حاضر يا امي هيا جيت
• مصطفي ...صباح الخير يا عمي
• وصال ...صباح النور ياعمو وسلمت علي يده وراسه تفضل
• مصطفي ..برم يده عليها حضنها وخش هو وياها كيف حالك ياعمو
• وصال .. الحمدلله بخير
• مصطفي ...يستاهل الحمد خير ياحاجه
• الحاجه مبروكه ... خير خير نهارك مبروك ان شاء الله
• مصطفي ...كيف حالك اليوم شن دايره صحتك
• الحاجه مبروكه ...اهو الحمدلله مادام كريعاتي يوصلني لوين مانبي وانا في نعمه
• مصطفي ...الحمدلله ربي العالمين ماله وين ايوب والاطلع
• ايوب ... خش عليهم في الصاله صباح الخير ياحاج
• مصطفي ..صباح الخير
• ايوب ...وهو يسلم علي راس ويد الحاجه مبروكه كيف حالك اليوم
• الحاجه مبروكه ..الحمدلله بخير
• مصطفي ... بحت في ايوب شنو طالع شكلك
• ايوب ..اهاا عندي مشوار شور المصارف
• مصطفي ... حطني علي طريقك معنها
• ايوب ...وهو مستغرب تمام
• مصطفي .. صبا هيا عشان متاخرش علي موعدك وبحت في الحاجه مبروكه تبي شي ياحاجه
• الحاجه مبروكه ....سلامتك
• ايوب ... حني الظرف هضا عطيه لوصال
• الحاجه مبروكه ..بحتت فيه اهي وصال تلقاها في المطبخ مع سعاد وعطيه لها وحدك
• ايوب ...مستعجل توه وهيا مش حتاخذه وحتدير مية قصه والحاج يرجا وحطه علي الكرسي جنبها هي سلام توه
• الحاجه مبروكه ..وهيا تنهد مع السلامه وبحتت في ظرف الفلوس اللي جنبها
• ايوب ....طلع لقا باته يرجا فيه يلا السياره هي نسخنها ونطلعو
• مصطفي ..تعال بس قبل منبيش انأخرك اليوم جاء جارنا عبد الحفيظ قالي في واحد جاء ودق واجد علي فيلا صالح وسال عليكم وسال علي وصال
• ايوب .... ومنو هضا معقوله يطلع
• مصطفي ...لالا هضا قال كبير في العمر من عمر عمك صالح الله يرحمه
• ايوب ....معقوله يكون عمي سالم
• مصطفي ...احتمال كبير هو قال سال علي عنوانكم ودليته عليه
• ايوب ...زعما شن اللي خلاه ايجي ويسال معقوله فتح الشنطه
• مصطفي .. ما اعتقدش
• ايوب ... لو جاء هنا حيكون اكيد عنده سبب لجيته خلينا منسبقوش الاحداث
• مصطفي ...ايوه بالضبط انت توكل ومتفكرش في الموضوع
• ايوب ...ان شاءالله
• 🍃🍃🍃🍃🍃🍃🍃🍃🍃🍃🍃🍃🍃🍃🍃🍃
• سعاد .... خشت للصاله وقمعزت وهيا ماسكه تلفونها شن اخبارك انت شن دايره مبروك ماجد عليكم
• المراه ...الله ايبارك فيك كيف حال الحاجه ان شاء الله طيبه
• سعاد...بخير والله شن اخبار البنات كلهن
• المراه ..اكويسات والله قتلك ياسعاد قولي لامك وصبايا خوتك بيش اتفضلن كلكن عندنا لمه يوم الاحد
• سعاد ...ان شاء الله وانت طيبه حاضر حنوصلهن عزومتك
• المراه ...تمام سلميلي عليها الحاجه ووصال مع السلامه
• الحاجه مبروكه ..من اللي تكلمي فيها
• سعاد ...جارتنا مرت الحاج عبد الحفيظ تعزم علي لمه مرت ولدها جايبه وتسلم عليك
• الحاجه مبروكه .. سلمك وسلمها
• سعاد ..بحتت يلا امها شنو الظرف هضا
• وصال ...منو اللي كان ايكلم فيك يا سوسو
• سعاد ...مرات عبد الحفيظ تسلم عليك
• وصال ...اهاا
• الحاجه مبروكه ...خذت الظرف ومداته الوصال هاكي يا وصال ايوب قالي عطيه لها
• وصال ....بحتت في الظرف ورفعت اعيونها مليانات ادموع وبحتت في سعاد وخذاته من جدتها وخشت للدار
• الحاجه مبروكه ...سعاد صبي الحقيها وربي يهديه حتي هو
• سعاد ... ليش ماعطاهن لها زي قبل
• الحاجه مبروكه ...قال مستعجل حطهن وطلع
• سعاد ...لاحول ولاقوة الا بالله انا غير ايجي حنحكي معاه
• الحاجه مبروكه ...خشي شوفيها وطيبي خاطرها
• سعاد ...صبت تو انشوفها وخشت عليها لقتها تحكي عالفون
• وصال .... اهاا متصلوش بيك حتي انت صاح
• دانا ...اهاا شكله مصار شي
• وصال ...ان شاء الله خير
• دانا ...قتلك بعد بكرا ماشيه للجامعه عازمتني سمية علي تخرجها نبيك تمشي معايا
• وصال ...مش عارفه معنديش نيه بصراحه وبعدين البنت منعرفهش
• دانا ...لا تعرفيها كنك انت نسيتيها بنت عمي سالم صاحب باتك الله يرحمه غير هيا صارلهم ضروف وقفت قيدها وبعدها ردت
• وصال ...اهاا عرفتها بس نا معنديش نيه نمشي وبعدين البنت عزماتك انت مش نا
• دانا ...مش شوري حتمشي راه لانه بابا مش حيخليني الا كان انت معايا نبي انقوله ماشيين انا وصال مش حيقول شي
• وصال ...مش عارفه نشوف الجو ونقولك بعدها
• سعاد ...تبحت فيها وساكته
• دانا ...كنه جوك شين يابنت حسيتك صايره معاك حاجه مش عارفه لك كم معش تحكيلي
• وصال ...لا مافي شي عادي يعني ماله بس
• دانا ...باهي تمام خليني انشوفك ونعرف كنك توه سلام ماما تضبح من امبدري
• وصال ... سلام انتلاقو وسكرت التلفون وبحتت في سعاد انا اكويسه ومعليش سوسو نبيش نحكي في الموضوع وهو حر في تصرفاته
• سعاد .... تمام مش حنحكي شن رايك اتصبي اتديرلنا كيكه نشربو بيها قهوتنا
• وصال ...حاضر اهو تو انصبي انديرها
• 🍃🍃🍃🍃🍃🍃🍃🍃🍃🍃🍃🍃🍃🍃🍃🍃
• عند سالم ....
• ابراهيم .... يامي كلمينهن الفرخات هذين هيا يرا ساعه وانا نرجا
• امال ...بشواش كنك انت اللي مستعجل هات المفتاح واربح كان عندك مشوار وخلي احمد ايشيلهن
• ابراهيم .... نبيها السياره انا وبعدين احمد ماشي معاهن بنحطهم في السوق ونمشي للمشوار وبعد ايكملن ايرن عليا احمد نجيهم
• صالحه ... هيا يا فرخه احلام ابراهيم يشطح وبعدين فكينا من الايشرب هضا بيدير قصه عليه عرفته هاكي هضا غيريه فكينا من الشطحه
• أحلام.... اوووف هاتي المعيشه السوده
• سميه ..انا طلعت هيا اطلعن
• ابراهيم ....باهي اللي طلعتن هيا احمد يرجا بره قاعد وطلعن وركبن في السياره نحطكم وبعد تكملو رن عليا نجي انروح بيكم
• احمد ...سكت ومردش عليه
• احلام ...وهيا تكلم في صالحه بصوت واطي احمد مايكلمش في ابراهيم انضر شن صاير بيناتهم
• صالحه ..اهاا لاحضته
• احلام ...امس مرقدتش بكل حاجه غامه علي صدري شوي نضت شفت احمدلقيته واعي حكيت معاه بس مابش يحكيلي كنه
• سميه ....بحتت فيهن وقربت من احلام اللي مقمعزه في النص شن تو شوشن
• صالحه ...شي بعدين انقولك وبحتت في ابراهيم وشريتلها عليه بعيونها
• 🍃🍃🍃🍃🍃🍃🍃🍃🍃🍃🍃🍃🍃🍃🍃🍃
• عند خالد في الورشه ....
• خالد ...كان ايصلح في السياره
• صاحب الورشه ...خالد تلفونك يرن تعال شوفه بالك حد يبيك معش بطل رن راه
• خالد ..رفع راسه وبحت في الرجل وخذا فوطه مسح ايديه من الشحم اهو جاي وصل في تلفونه والرنه كملت خذاه وبحت فيه لقا خمس مكالمات من رقم غريب عقد حواجبه وجا بيرن عليه اشوي رد رن الرقم اخري فتح الخط ايوه
• البنت... بصوت تجعوين الوووو
• خالد ....😳😳
• البنت ...
• يتبع ......
• بقلمي.... أحلام
