الامانه

الحلقه 20

• #الامانه .....
• الحلقه 20.....
• وصال .... سوسو صبي هيا العريس جاء
• ايه ....ارجي نبخلك عطروقعدت اتبخ تمام هك
• سعاد .... قعدت متوتره تمام صبت
• موده .... ركبت علي المسرح سعاد مايبيش ايخش راه هيا اطلعي معايا
• سعاد ...بحتت في وصال وايه تمام هيا وقعدت تنزل لعند وصلت في الحاجه مبروكه ضبطتها وقعدت تبكي
• الحاجه مبروكه ...... مبروك عليك يابنيتي وردي بالك علي روحك وراجلك حطيه في عيونك وعمتك عامليها كيف امك وديري بالك علي العيال هذيم يتامي ايحاسبك ربي عليهم حطيهم في عيونك
• سعاد ...وهيا تبكي حاضر يا امي وانت ردي بالك من صحتك وصال ديري بالك عليها
• وصال ...وهيا تبكي في عيوني متخافيش
• سليمه .... هيا ياسعاد عيب الراجل يرجا بره
• سعاد .... تباعدت علي امها ونزللها الطرحه وطلعت
• عزيز.... كان واقف ومنزل راسه ويلاه امه جاته نوسه تجري
• نوسه ... بابا حبيبي
• عزيز ... نزل عليها وحضنها ياروح بابا انت
• نوسه ...وهيا فرحانه حي ياباباصاح عميمه سعاد تروح معانا وتقعد عندنا
• عزيز .... اهاا ياعيوني حتقعد معانا مش قالتها لك امي ربيعه
• نوسه ... اهااا يعني تقعد وااااجد معانا معش اتروح
• عزيز ...اهاا يانوسه ورفع اعيونه
• سعاد ... كانت تمشي وقلبها ايدق واتبحت فيه وهو يلعب في نوسه لعند رفع اعيونه فيها نزلتهن بسرعه وصبت جنبه
• عزيز ... نزل نوسه وبرم عليها ورفع الطرحه وسلم علي راسها مبروك
• سعاد .....الله ايبارك فيك
• ربيعه ....لووووووووللللللي اضبطاته وهيا تبكي مبروك ياغالي وربي يسعدك وايهنيك ان شاء الله
• عزيز ... الله ايبارك فيك يارب وبرم علي سعاد شنو نطلعو
• سعاد ... هزت راسها وهيا ترعش موده الكاب
• موده .... اهو عندي ولابساته لها مبروك ربي يهنيكم يارب
• سعاد ...تسلمي
• عزيز .. مسك يدها ويبي يطلع بيها نوسه مسكت في كراعه بابا نبي نمشي معاكم انا
• ربيعه ... مسكتها لالا تعالي اهي عميمه موده قاعده تحطك علي المسرح وترقصي
• نوسه ...طلقت باته صاح اتخليني نركب ونرقص ياعميمه
• موده ...اهاا تعالي هيا انت ويقين
• ربيعه ...خلاص اطلع ياباتي
• عزيز .... طلع وهو ماسك الفيلو باليد اويساعد فيها واليد الثانيه حاطها وراء ضهرها لعند ركبها في السياره وسكر الباب
• وصال ...جت تجري موده شنطه سعاد عطيها لها
• موده .... ماما شنطه سعاد كلمي عمران والا واحد من الشباب يعطيها لهم
• ربيعه ...خذت الشنطه عمران يا عمران
• ايوب.... نعم ياعمتي
• ربيعه ....معليش يااوليدي كلملي عمران نعطيه شنطه العروس
• ايوب .... عمران مش قاعد انا ايوب ولد خوها هاتي نعطيها لعزيز
• ربيعه ...هاك يا باتي ومدتها له
• ايوب ... خذاها منها وقدم سلم عليه الف مبروك ان شاء الله ومدله الشنطه
• عزيز ..الله ايبارك فيك خذا الشنطه وركب السياره وحطها علي الكرسي الوراني وطلع وطلعو وراه اصحابه
• سعاد ...كانت متوتره وترعش وكان مولع المسجل وحاط قران بصوت هادي
• عزيز .... بحت فيها ورد ايسوق انقص المكيف لومصقعه
• سعاد .... ياريت اهاا نقصه اشويه
• عزيز ....نقص المكيف وورد ايسوق وقعدو ساكتين لعند وصلو وخش للصورهم ودرس سيارته ونزل وفتحلها الباب هيا انزلي
• سعاد .... سمت بسم الله ونزلت وصبت ترجا فيه
• عزيز ... نزل الشنطه وبرم عليها ومسك يدها وحس برعشتها رفع الكاب من علي وجها اشويه ارفعيه اشويه مافيش حد وخشو وركبت هيا وياه لعند الشقه فتح الباب وخشت قبله وهو خش وطبق الباب
• سعاد .... خشت تمشي اول شي قابلتها صاله صبت فيها وقعدت تحاول اتفك الكاب من كثر ماترعش معش قدرت اتفكه
• عزيز ... بحت فيها كنه ماقدرتيش اتفكيه
• سعاد ...وهيا متوتره اهاا متبش تنحل انخنقت منه
• عزيز ...قدم شورها وقعد ايفك فيه لها وحوله حطه علي الكنبه
• سعاد .... رفعت الطرحه وتنهدت وين الدار
• عزيز .... اهي من هنا تعالي وخذا شنطتها وخش للدار
• سعاد ..بحتت فيه ولحقاته وهيا ماسكه الفيلو بيديها
• عزيز ...حط شنطتها خوذي راحتك وفتح الدولاب وخذا توته وطلع وسكر الباب وراه
• سعاد ....تنفست براحه وقمعزت علي السرير وخذت شنطتها وفتحتها وطلعت بيجامه ومنظفاتها وسلحت الفيلو وتشطفت ولابست البيجامه كانت بيجامه حرير لونها سكري دنتيل فيها مسكه من عند الصدر ونازل منها طرف حرير وعليها طرف دنتيل خففت مكياجها وفكت تسريحتها وطلعت لقاته مش قاعد ردت تبي اتخش لدار بحتت لقت دار مقابله دارهم فتحتها لقتها دار الاعيال خشت تفرجت عليها وفتحت الدولاب شافت دبش ايه ويوسف وقعدت تدعي انه ربي ايقدرها اتعوضهم عن حنان امهم طلعت وسكرته وطفت الضي وهيا مبتسمه رفعت اعيونها شافته طالع من الحمام وعيونه حمر نزلت راسها وتنهدت
• عزيز ..... بعد طلع من عندها سلح جاكته وحطها علي الكرسي وغير دبشه وخش ايتوضي بحت في المرايه متاع الحمام وسرح واذكر مراته وكيف كان فرحان بيها وكيف كانت حياتهم نزل راسه وهو عيونه مليانات دموع وحاط ايديده علي الحوض قعد فتره مغمض اعيونه رفع راسه وبحت في شكله في المرايه استغفر الله في سره وتعوذ من الشيطان وغسل وجهه وطلع
• عزيز .... بحت فيها سكر الباب وجاء جيهتها رن جرس الحوش تو نفتح مشى جيه الباب
• سعاد .... ردت خشت للدار وقمعزت علي السرير وغمضت عيونها ومرفعه راسها وحاطه ايديها علي السرير وتفكر كيف حتمش حياتها معاه اشويه وسمعت صوت الباب اسكر
• عزيز .... خش للمطبخ حط العشاء علي الطاوله وجاء عند الدار بحت فيها وهيا سرحانه احممم
• سعاد ...فطنتله سقمت تقمعيزتها وبحتت فيه
• عزيز .... هذا عمران جاب عشاء تعالي نتعشو اكيده مش واكله شي
• سعاد ... كليت اشويه مبدري وانا في المزين وطلعت هيا وياه كرت الكرسي وقمعزت
• عزيز .... قمعز مقابلها كان العشاء رز بالخلطه وعصبان ونوعين موالح وسلايط وغازي
• سعاد ...قعدت تاكل بالشويه بحتت فيه
• عزيز .... بحت فيها كولي كنك تنقرشي
• سعاد .... ناكل قاعده يوسف وين مشفتش في الصاله مع موده وعميمه
• عزيز .... رفع اعيونه فيها ونزل عيونه عند جدته اليوم الصبح شلته لها
• سعاد .... اهاا وقعدت اتحرك في الرز من غير ماتاكل وهيا ساكته
• عزيز .... فتح المشروب وشربه الحمدلله وناض
• سعاد ...صحتين وحطت الكاشيك وناضت قعدت اتلم في الطاوله وحطت الوكال في الثلاجه وغسلت ايديها ونظفت الطاوله وطلعت لقته ايصلي خشت للدار ومعش عرفت شن اتدير
• عزيز ...... سعاد
• سعاد ....طلعت بسرعه وهيا متفاجاة نعم
• عزيز ...البسي عشان انصلو مع بعضنا
• سعاد ...ابتسمت حاضر لبست ملايتها وطلعت
• عزيز .... بحت فيها ورد بحت القدام الله اكبر وصلي بيها ركعتين وسلم وقعد يدعيمن غير ماتسمع شن ايقول
• سعاد ....غمضت اعيونها اللهم اني تو كلت عليك وسلمت امري اليك اعني علي مااقدمت عليه يارب اللهم اجعلني سكنا له واجعله سكنا لي وعوضني فيه خيرا يارب العالمين اللهم امييين
• عزيز ... برم عليها لقها تدعي حط يده علي راسها اللهم ارزقي خيرها وخير ماجلبها عليه واعوذ بك من شرها وشر ماجلبها عليه يارب العالمين اللهم اجعلني لها خيرا الزوج والاب والاخ وجلها لي خيرالزوجه والام والاخت اللهم اجمع بيني وبين زوجتي بخير والف بين قلوبنا وارزقنا الرضا وراحه البال والراحهاللهم امييين يارب العالمين
• سعاد .... فتحت اعيونها حست بررررررااااااحه وطمائنينه نزلت علي قلبها ابتسمت
• عزيز .... نزل يده وحبها علي راسها وناض
• سعاد .... خشت سلحت للملايه وسقمت شكلها بحتت لقت هديتها قاعده خذتها وطلعت لقاته مقمعز وايتفرج قدمت عليه مدتها له تفضل
• عزيز .... خذاها وابتسم شكرا مكانش في داعي
• سعاد ...حاجه بسيطه ان شاء الله تعجبك كان بوكس فيه عطر وساعه وسير جلد ونضارات ودبله ومحفظه وقلم حبر
• عزيز ..... فتحها وقعد ايبحت فيها شكرا
• سعاد .... كانت تشوف في رد فعله بتوتر العفو
• عزيز ....حطها علي الطاوله وناض خش للدار
• سعاد .... بحنت فيه وقعدت اتبع فيه بعيونها وهيا عاقده حواجبها
• عزيز .... طلع وفي يده بوكس قدم شورها وقمعز جنبها
• سعاد ...كانت اتبحت فيه باستغراب
• عزيز .... فتح البوكس وطلع دبله وخذا يدها ولبسها لها ومدلها بوكس ثاني كان فيه طوق علي شكل دمعه مرصعه
• سعاد ...خذاته منا شكرا حلوات
• عزيز ... خذا دبلته من البوكس متاعه ومدها لها
• سعاد ...خذتها منا وهيا مبتسمه ولبستها له
• عزيز ... مسك يدها نخشو للدار
• سعاد ... تمام وخشو وفاتت ليلتهم كيف اي عرسان
• 🍃🍃🍃🍃🍃🍃🍃🍃🍃🍃🍃
• في الصاله.....
• ايه ... خلاص يا وصال اسكتي كنك
• وصال ...كانت تبكي بعبرتها مش متخيله الحوش بلاها
• الحاجه مبروكه ... كانت مضبطتها ربي يهنيها يابنيتي خلاصةسادك بكا الحمدلله اللي فرحنا بيها
• وصال ... ساكته ومرادتش عليهن
• سليمه .... خلاص ياوصال صبي امسحي ادموعك وافرحيلها وكان علي انك قعدتي وحدك اهي ايه تو اتجي تبات معاك لعند اتلزيها
• وصال .... ضحكت وقعدت تمسح في دموعها
• الحاجه مبروكه.... باعدتها عنها عدي يا ايه جيبيلها اميه
• دانا ....هيييييي كنك تبكي ياوصال قصدك علي سعاد
• وصال .... اهو طلعتها شينه مش متخيله الحوش بلاها
• دانا ..... نعليا تبي اتبكيني معاك انت خلاص اسكتي انت تبكي عليها وهيا توه تندريش حتي عليك وغارقه في العسل
• وصال .... مسكت ضحكتها ياحيوانه سكري فمك امي تسمع فيك
• الحاجه مبروكه ....بحتت فيها وهزت راسها وسيبتها وعدت اتسلم علي العرب اللي يبو ايروحو
• دانا..... حي عليا نسيتها بكل عليك فضيحه
• ايه ....هاكي اشربي تدور فيك سميه تبي اتسلم عليك تبي اتروح
• وصال ..... مسحت ادموعها وينها هيا
• ايه ..... طالعات ورايا سيبتهن اهي جت
• سميه ...هيييي تبكي قصدك ياهبله ربي ايهنيها ان شاء الله وعقبالك
• وصال ...ان شاء الله خلاص مروحات
• احلام ...اهاا خالد يرجا بره قاعد سلام
• امال ....مع السلامه وربي يسعدها ان شاء الله وعقبالكن
• وصال ...تسلمي ياعميمه وسلمي علي عمي سالم
• امال..... يوصل ايسلم عليك حتي هو
• وصال ...سلمك وسلمه ان شاء الله
• سميه ...خلاص باي يابنات انتلاقو وبيناتنا فون
• دانا وصال ...سلام
• احلام ....هيا ياماما خالد ايرن قاعد
• امال ...هيا اطلعن
• وقعدو الناس ايروحو وفضت الصاله
• سليمه ...خلاص هيا البسن عباياتكن ايوب يرجا
• دانا .... حي مازال مراد ماجاء
• ايه.... كلميه شوفيه لو مطول روحي معانا وايجيك غادي
• وصال ...اهااشوفيه تو انجيب عبايتي ونجي انا
• الحاجه مبروكه ..... نا طلعت ياسليمه مع مصطفي وانت خليك معاهن اركبن مع ايوب
• سليمه ... حاضر ياعمتي اهو طالعين وراك
• وصال ..لبست عبايتها ها شن صار معاك
• دانا ...تكلمته قالي روحي معاهم وتو انجيك غادي
• ايوب ....فتح الباب امي
• سليمه .... نعم يا ايوب
• ايوب ...ها شنو خلاص ٨وبحت لقا دانا معاهن
• دانا .... بحتت فيه ونزلت راسها و قعدت علي اساس لاهيه في تلفونها
• سليمه .... اهاا اهو طالعين جبتن يابنات حاجتكن كلها اللي في الدار
• ايه....اهاا ياماما خلاص
• ايوب ..تمام هيا اهي السياره قدام الباب
• سليمه .... هيا اطلعن يابنات قدامي طلعت وصال وايه وقعدت اخر وحده دانا
• دانا ...بحتت لقتهن راكبات وقعد الكرسي اللي منوراء ايوب برمت فتحت الباب وركبت وهيا متوتره
• وصال ... بحتت فيها كنك
• دانا .... اهو حسيتها عيب مرواحتي معاكم تو انوريه عليها مراد
• وصال ...عادي ماه تروحي معايا من قبل شن حد يعني
• دانا ... اهو مش عارفه
• ايوب ...قعد ايسقم في المرايه اللي قدامه جيهه دانا وطلع شن جو الفرح يا امي
• سليمه ..... مشاء الله جاء علي قيس نيتها حفله سمحه وكل شي جاءكيف مانبو
• ايوب .... باهي حمدلله ميه ميه وربي يسعدها ان شاء الله
• سليمه ..ان شاء الله وعقبالك حتي انت نفرحو بيك
• ايوب ..ابتسم وحط يده علي فمه ويسرق في نظرات لدانا
• ايه .... ولعنا شي حاجه مروحين من فرح شن الجو الكئيب هضا
• سليمه.... ياخيه راسك مصدعش ننقانه مخلاص راسي يبي ينفجر
• ايه .... ولع وراس ايوب ياماما منبيش ننعس عشان بعدها معش نقدر انحرك شي
• وصال ...بعدك متسبله ياعميمه راه اتديرها
• سليمه ...عارفتها اتديرهاونص ولعه لها لكن نقصه تعليش واجد
• ايوب .... تمام وبحت في دانا شنو يادانا نوصلك للحوش والا نحطك عندنا
• دانا .... رفعت اعيونها في المرايه لا عندكم جاي مراد غادي
• ايوب ...ابتسم تمام ولع المسجل وقعد ايسوق وهو مبتسم ويلعب في السياره ايمين وايسار ودايرلهن جو
• وصال ...كانت عيونها عليه كيف يحكي وكيف ايبحت فيها تنهدت ونزلت اعيونها وبحتت في دانا اللي باين عليها الارتباك وابتسمت ابتسامه حزن
• دانا ...نزلت اعيونها وكان قلبها ايدق وفرحاااانه بس مكانتش حاسه بوصال اللي في جنبها وكميه الحزن اللي في قلبها
• 🍃🍃🍃🍃🍃🍃🍃🍃🍃🍃🍃🍃
• عند سالم .....
• صالحه .... وهيا مقمعزه في سريرها شنو جو الفرح
• احلام ....فرح ايهبببببل عليك ديكور وفرقه كل شي ايجنننن
• صالحه ...مشاء الله وللعروس اكيده سمحه طلعت
• سميه ...بكللل متغيره رايحه اتجننن بكل سألت وصال علي المزينه قلت بالك تمشيلها
• احلام ...والا اللي خش معاها عليك جمال فيه وشخصيه
• صالحه.... خش معاها خوها
• احلام ...لالاخوتها كبار شياب ولد خوها اسمه ايوب يانعليا ياصالحه عليك جمال والا لبسته اتهبببل
• صالحه ..حي عليك يافرخه كنك رايحه هك انت اتبحتي واجد في الشباب
• سميه ....هو الصراحه وسيم بكل البنات كلهن انكلبن بعد شافنه
• صالحه ...هي عيلتهم كلهم اسماح شوفي وصال حتي عمتها نقشها حلو وسمحه
• سميه ...اهاا حتي ايه اخته اتهبببل
• احلام ...بس خساره ماشفنش العريس
• صالحه .... هههههههه صار مشفتش كنتي طلعتي مع البنات شفتيه
• احلام ...ياريت سمعت ايقولن عليه سمح وشخصيه
• سميه ... قالتلي دانا صورته تو انوريه لك
• احلام ..... صاح كان نندري عليها راه قلتلها وريه ليا
• سميه .... تو انقوللها تبعته ليا وتس وانوريه لك لكن طلع عنده عيال بنته اتهبل قاعده تجري وتلعب فرحانه
• صالحه ...صاح مطلق والا شنو
• سميه ...لا قالتلي دانا مراته متوفيه قالت توفت وهيا اتجيب في ولدها
• صالحه .... صاح ياناري ربي يرحمها ان شاء الله شن جوهاوصال
• سميه ...يانعليا بكت بكاء بعد عدت سعاد قعدن ايسكتن فيها قريب ساعه
• صالحه .... صاااااح اكيده واعره بكل طلعتها عليها
• سميه .... بكل بعد حقيتها تبكي قريب بكيت حتي انا خطر عليا فرحك
• صالحه ...ييييي منبيش نذكر يعني خلاص مازال شهرين ونسيبكم وعيونها قعدن مليانات ادموع معش انوض علي صوت ماما ونصبح علي بابا نمشي لحوش منعرفش
• احلام ....وووووه ووووه عليك نكد انت وهيا شن هذا افرحي وعيشي فرحتك هذي فرحة العمر راه استمتعي بيها مش تفوتيها في النكد والبكا
• سميه ... كلا انت كان تنخطبي ماضني الا نلقوك طايره من الفرحه
• احلام... اكيد هذي مستحيل انفوت فرحتي في البكا والنكد وتفكير السلبي هضا
• صالحه ...كذابه متاكده انت اكثر وحده حتبكي بعدين غير اتكابري واتديري في الجو
• احلام .... خشت سريرها وتغطت غير خليه ايجي وبعدها ساهل انا نبي نرقد بالك تسكتن ساد دوه وطفن الضي وغمت راسها
• سميه .... وهيا تمشط في شعرها ارقدي من ماسكك انت
• احلام ....صالحه احمد جاء
• صالحه ...اهاا جاء اشويه وقال طالع بايت بره مع صحابه كنك تسالي
• احلام ..... مش عارفه سميه مدي تلفوني نبي انرن عليه
• سميه ...كنك خوفتيني توه كنتي مافيك شي
• احلام ... هاتي بس هك حاجه غمت عليا وخذت تلفونها وقعدت اترن عليه
• صالحه .... صبت من مكانها شنو رد
• احلام ...ايرن ومايردش
• سميه ....تعوذي من الشيطان مافي شي اكيد ناسي تلفونه في السياره والا مش يلاه
• احلام ..... اعوذ بالله من الشيطان الرجيم وناضت نبي انشوف خالد ايكلمه والا ايرن علي حد من اصحابه
• سميه ..... عدي شوفيه باهي بالك ايرد عليه
• احلام .... طلعتولحقنها خواتها وعدت دقت علي دار خوتها وفتحتها
• خالد .... عقد حواجبه كنك شن في
• احلام .... اءءء قتلك رنيت علي احمدانت
• خالد ...لالا كنك شن في
• احلام ...مش عارفه حاسه ان فيه شي وانرن عليه مايردش
• خالد ...تو انشوفه وخذا تلفونه وقعد ايرن عليه
• ابراهيم ...خش عليهم كنكم شن في
• احلام ...بحتت فيه هيا وصالحه وسميه وسكتت
• خالد ...بحت في ابراهيم وهو متوتر ايوه احمد وينك
• صاحبه .... صوته فيه الرعشه ايوه ياانا اسامه ياخالد
• خالد ...وين احمد كنه مارد علي تلفونه
• احلام ...حطت يدها علي قلبها وهيا خايفه
• اسامه .....ءءء اهو قاعدجنبي
• خالد ...عطيه ليا كنه مارد علي تلفونه
• اسامه .... نحنا مروحين توه صار سو تفاهم هو واحد من الشباب سيبناهم وطلعنا
• خالد ...اسامه احمد وين وكنه شن صاير
• اسامه .... والله مروحين اشويه ونوصلو وهو ايفهمك وحده شن صار
• خالد ...متاكد مافي شي
• اسامه ... بحت في احمد اللي كان مضروب في يده ملفوفه بشاش
• احمد ...هات يا اسامه ايوه ياخالد
• خالد ...كنك شن في انت ومن تاكه
• احمد ...اشويه وجاي تو نحكيلك
• خالد ...تمام المهم انت اكويس
• احمد ...اهاا
• خالد ....تمام نستنا فيك
• ابراهيم ..... كنه وين هو اساسا
• خالد .... علي اساس بايت مع اصحابه بس قال جاي واسامه قال متعارك هو واحد منهم
• ابراهيم .... رافع حاجبه ان شاء الله تطلع هك بس
• خالد ...خلاص خشن ارقدن مافي شي قال اشويه وجاي
• احلام ....متاكد قالك اكويس
• خالد ...اهاا مافيه شي بس شكله مضايق هذا ليش حسيتي بيه
• احلام ....ان شاء الله خير
• 🍃🍃🍃🍃🍃🍃🍃🍃🍃🍃🍃🍃🍃
• اسامه .... ارجا خليني ننزل معاك
• احمد ..لاتمام مافيش داعي اكويس قعدت
• اسامه ..كان غيرت دبشك عشان ماينفجعوش من الدم
• احمد ..ماتدور شي اكيده راقدين وخالد عادي نتفاهم انا وياه
• اسامه ..تمام طمني عليك وفوته علي متدورش بكرا تلقاه جاي نادم سيبه نعنه مارد
• احمد ... منقدرش ياراجل كيف انسيبه وهله اللي معتمدين عليه واجعني حال امه اللي تبحت فيه ومش قادره اتديرله شي انا نصحته وجيته باسلوب عشان يسيب الفرخ مصعب ياراجل حيودره معاه وهو مايبيش يفهم واليوم جايبه معاه عشان متحملش كلامي يومتها له بس ان شاء الله بعد اللي صار يفطن لروحه
• اسامه ...ان شاء الله انت رد بالك من الفرخ هضك بعد كلامه اللي قاله مازال حاطك في راسه
• احمد .... حتي انا حاطه في بالي مش ناسي شن قال ان شاء الله خير انت توكل الوقت تاخر
• اسامه .....تم هي سلامات انتلاقو
• احمد ....تم وخش للحوش بالشويه قابلاته احلام
• احلام ...فنصت اعيونها هييييييي حي عليا شنو الدم هضا ودموعها نزلن
• احمد ...اسسسسس بس ومسكها من يدها ودخلها للدار لقا ابراهيم وخالد يرجو فيه
• ابراهيم ...انفجع من الدم اللي عليه كنك شن في شن صاير
• احمد .... مافي شي تعاركت انا واحد وحصلت ضربه علي يدي
• احلام ...مش قتلك صايره معاه حاجه
• خالد .... احمد شن صاير الموضوع الباين مش ساهل شن في
• احمد .... احلام طلعيلي دبش وهاتيه معاك نبي اندوش قبل وبحت فيهم وبعدها نحكيلكم وطلع
• احلام ....فتحت الدولاب وطلعتله دبشه وطلعت وراه مداته له
• احمد .... انت وراء اتصال خالد صاح
• احلام ...ابتسمت اهاا اكيد من غيري ايحس بيك ومشقيني وراك وساحن كبدي من نحنا وصغار
• احمد ...ابتسم وخذا منها دبشه اسمعي نبيك تغسلي الماليه قبل لاتشوفها امي الصبح وتنفجع تمام وجيبيلي معاك حبه مسكن والا باندول
• احلام ... حاضر رد بالك من الجرح توصله الميه وانا نمشي انديرلك تاكل حاجه شكلك نزفت واجد
• احمد .... تمام وخش دوش وطلع لقاهم يرجو فيه
• خالد.... ها احكي مع من طاحنها
• احمد .... وهو ايفك في الفاشه علي ومصعب
• ابراهيم .... مصعب مره اخري شن ايدير معاك
• احمد .... علي جايبه معاه من غير مايكون عندنا علم اول ماجا كبرت عقلي وفته وخذيت الوسع عنه بس هو كان حاطني في راسه كلمه منا وكلمه مني كبرت القصه واضاربنا ولما عرف اني غلبته وعلمت عليه طلع الموس متاعه خاوتني وضربني لولا علي راه رحت فيها
• ابراهيم ...وهو شن يبي عليش حاطك في راسه
• خالد ...عشان علي صاح
• احمد ...اهاا انا لما شفته جايبه رقتلي ومسكت علي حكيت معاه يسيبه وايفوته ومن هالكلام هو شكله جاء ورانا من غير ماننتبهو وسمع كلامي كله
• خالد .... شن قتلك انا من قبل رد بالك منا اللي زي هضا لو حطك في راسه ميجيش ايواجهك ايجيك من وراء ضهرك
• احمد ...وانا والله فايته بكل ومعش حكيت معاه لاهو ولا علي بس انت عارف بعد جت اخته وحكتلي علي علي وجيت وقتلك انت بروحك قتلي امسكه وانصحه ورد صاحبه بس هو طلع عيل شايل الكلام كله لمصعب
• ابراهيم .... يرا شن اتقول انت هضا مش صاحب هضا واحد ماينلعبش معاه هضا ايودرك ومتحركش فيه شعره
• احمد .... باهي شن اندير قولي لو انت في مكاني وجاك حد من هل صاحبك ايقولك شوفه بالك يسمع كلامك علي مكانش هك والله كان شاب في حاله طيب وبعدين انا مدرتش شي الا بعلم خالد وهو شجعني
• خالد ...استغفر الله العظيم المهم توه فوتهم هما الاثنين مادام مسمعش النصيحه ويبي ايطيحك هضا معنها ماينفعش فيه لا صحبه ولاشي رد بالك منهم ومتأمنلهمش لو شن ايديرو
• احمد ..... ان شاء الله خير انا متوكل علي الله وربي يباعدهم عن طريقي
• احلام ...جت وجايبتله وكال وعصير حطاته له اهو المسكن خوذ
• احمد ...هاتي وجيبيلي فاشه اللي غادي خليني انغير هذي انبلت
• احلام .... اهي وجبتلك اسبيريتو حطه عليه عقمه قبل
• خالد .... هات يدك تو انلفه لك وانت خلاص عدي ارقدي
• احلام ...اهو ماشيه لو تبي شي وعيني
• احمد ... تم تو انرن عليك
• احلام ....تصبحو علي خير
• 🍃🍃🍃🍃🍃🍃🍃🍃🍃🍃🍃
• ثاني يوم
• سعاد .... كانت في المطبخ توتي في الفطور وبارمه علي الغاز اتدير في القهوه
• عزيز ....صباح الخير
• سعاد ...برمت عليه وابتسمت صباح النور بحتت للغاز لقت القهوه تبي اتفوج طفت الغاز وحطتها علي الطاوله
• عزيز ....ليش متعبه روحك ودايره هضا كله
• سعاد ..معرفتش شن اتحب قلت انحط من كل حاجه واللي تعجبك تاكلها
• عزيز ...كر الكرسي وقمعز في شاهي
• سعاد ..اهاا واتي
• عزيز ... معنها ديريلي حليب بالشاهي
• سعاد ...تمام و دارته له وحاطاته قدامه وقمعزت قعدت تفطر
• عزيز.... ننزلو للعشيه عند امي
• سعاد ...تمام زي ماتبي
• عزيز ...معنها تو ننزل نعطيهن العلم ونشوف العيال
• سعاد .... وانت راكب خلي نوسه تركب ولو يوسف قاعد جيبه عشان نبي انشوفه
• عزيز ...بحت فيها وناض تمام سلم ايديك خاش انغير وننزل
• سعاد ...صحتين تمام وصبت قعدت اتلم في سفره الفطور وتغسل في التباسي
• عزيز ....تلفونك ايرن هاكي
• سعاد ...صاح مسمعتش ومسحت ايديها من الميه وخذت منا التلفون
• عزيز ... بحت فيها كنك تغسلي علي يدك اهي الغساله
• سعاد .... الخيط متاعها مركبش يبي وصله
• عزيز ...اهاا تمام تو بعدين نطلع وانجيبه انا نازل
• سعاد ... تمام بحتت في تلفونه ورنت علي وصال
• وصال ...وهيا صوتها مخنوق سوسو ياقلبي كيف حالك
• سعاد .... حمدلله يا عيني كيف حال امي
• وصال ...اكويسه اتسلم عليك واجد شن اخبارك انت الحوش بلاك شيييين بك لرايفنا عليك
• سعاد ...وهيا تبكي حتي انا والله
• ايه ...مبروووك ياسوسو شن جوك ياعروس
• سعاد ...وهيا تضحك وتبكي الله ايبارك فيك حمدلله تمام انا
• وصال ...هاكي تبي اتكلمك امي
• سعاد ...هاتيها امي كيف حالك
• الحاجه مبروكه .... حمدلله يا غاليه شن اخبارك انت كيف حال عزيز معاك
• سعاد ....حمدلله اكويس بكل متخافيش ياغاليه
• الحاجه مبروكه ...دووم مبسوطهيارب
• سعاد ... ان شاء الله يارب كيف حال ايوب وشن دايرات البنات بلايا
• الحاجه مبروكه ..حايسات في بعضهن اهن قاعدات ايلمن في الحوسه سليمه اتسلم عليك
• سعاد . سلمك وسلمها سلميلي عليهم كلهم يا امي
• الحاجه مبروكه ...يوصل مع السلامه يا عيني اهي تبيك وصال
• وصال ... ايوا سوسو شن جوك مع عزيز شنو اكويس
• سعاد ..تمام ااكويس قاعدين اهو ناخذو علي بعضنا
• وصال ... اهاا المهم اكويس معاك مش زي ماخايفه
• سعاد ..لا تمام الحمدلله
• وصال ...ربي يسعدك وايهنيك يارب هيا توه باي نبيش انطول عليك
• سعاد ...تمام سلام وسكرت وقعدت تمسح في ادموعها وردت ااتلم في حوستها
• 🍃🍃🍃🍃🍃🍃🍃🍃🍃🍃🍃🍃
• عند موسي .....
• موسي .... ها وين القهوة
• رندا ...اهي واتيه خوذها
• موسي ...كلمي هويدا هيا قوليلها اشويه وتلحقني
• رندا ...تمام هي تو نمشي انشوفها وطلعت خشت عليها هيا قالك موسي تعالي خشي
• هويدا ...هيا شنو طلع القهوه
• رندا ..اهاا عطيتها له توه كنك لابسه ايشارب اسود ارجي هاكي غيريه خوذي البيج حيطلع عليك احلي
• هويدا .... حتي هضا اكويس مافيش داعي
• رندا .... لالا هيا هاكي البسي بسرعه موسي قال اشويه وتلحقني
• هويدا .... هاتي باهي لبساته هاشنو اكويس هك
• رندا .... بعتتلها بوسه في الهوا قمر هيا تعالي متخليش الراجل يرجا
• هويدا ...تمام هيا ااووووه قلبي ايدق وحطت يدها علي قلبها
• رندا ... خوذي شهيق زفير ايوهتمام هك ارفعي راسك وخشي
• هويدا .... مشت وصبت يلا باب المربوعه بسم الله الرحمن الرحيم وخشت
• سليمان .....
• موسي ....
• يتبع.....
• قراءه ممتعه تو قعاتكن للحلقات الجايه
• بقلمي ...احلام