• #الامانة ....
• الحلقه 22.....
• عند الحاجه مبروكه ......
• ايوب ....شن الجو
• ايه ....اهلا غريبه مروح بدري
• ايوب .....بدري من عمرك الساعه قريب تسعه وين البدري في الموضوع وين امي
• ايه ...تصلي في العشاء جوا
• ايوب ..اهاا
• وصال .... ايه تعالي تبيك دانا وخشت عليهم ايوب امتي جيت
• ايوب ....لاحول الله كنكن يعني هذا لك عشان روحت توه
• وصال .... هههه لا مش هك استغربت بس
• ايه ...كنك اتضبحي
• وصال .... تبيك دانا هاكي
• ايه .... كنها ماكلمت علي فوني
• وصال .... امسكي من امبدري ترجا
• ايه ...هاتي ايوه اهلين وطلعت من يلاهم
• وصال ... بحتت فيه انديرلك عشاء
• ايوب ...لالا نبي فنجان قهوه بس ديريها مره
• وصال ...تمام هيا برمت تبي تمشي
• ايوب .....كلمتو سعاد اليوم
• وصال ..اهاا اكويسه قالت تسلم عليك
• ايوب ... اهاا وبحت فيها بتمعن وصال
• وصال ....سكرت ايديها بالقوه نعم
• ايوب ....نبي نسألك يعني وسكت اشويه دانا مخطوبه والا لا
• وصال ....كانت حاسه بقلبها يوجع فيها ومن كثر الالم وخنقتها العبره حاولت انها اتمالك نفسها وتبين روحها طبيعيه اهاا ليش تسال
• ايوب .... لو قتلك نبي نخطبها قولك اتوافق
• اية ..... وصااا وسكتت لما سمعت كلام ايوب وبحتت بصدمه في ايوب وبرمت بحتت في وصال
• وصال ....كان كلامه ينزل عليهازي النار بس كانت مبينه روحها عاديه زمطت ريقها ابتسمت اكيد يعني توافق هيا وين تلقي زيك
• ايوب ... قلت قبل لاندير اي شي رسمي نسالك قبل انت اكثر وحده تعرفيها لو في حد في حياتها اولا
• وصال .... لا اطمن دانا مش متاع الجو هضابكل صدقني مش حتلقا زيها و لافي طيبه قلبها ولا خفة دمها
• اايه ...كانت اتبحت في وصال وهيا قريب تبكي
• وصال ...وهيا خانقتها العبره احمم لوتبي نسالها لك يعني
• ايوب ...لالا مافيش داعي
• وصال .... زمطت ريقها وفي قلبها غصه مش قادره اتطلعها تمام وبرمت ماشيه انديرلك القهوه وطلعت بسرعه وهيا حاطه يدها علي فمها وخشت بسرعه للدارها ودموعها اللي كانت ماسكتهن نزلن ووقعدت تبكي بعبره ومسكره فمها لعند طاحت وقمعزت
• ايه ...كانت اتبع فيها بعيونها لعند طلعت برمت عليه وهيا متشوفش فيه انت شنو من شنو مصنوع ماعندكش احساس معندكش قلب كيف اتدير فيهاهك ودموعها نزلن بجد مصدومه فيك كنك قعدت هك عارف من اللي كسرت قلبها توه عاااارف من هذي وصاااااال وصااااال لو كنت ناسي اللي خلاها باتها امانه عندك وصال ...اللي كانت اتشوف فيك سندها ووحياتها كلها معقوله لهدرجه مستهين بحبها لك معقوله هك تكسرها حرام عليك والله ماتستاهل منك المعامله هذي حرام عليك ليش شن دارتلك عشان اتجازيهاهك انت عارف شن درت انت قهرتها ناسي الايه اللي اتقول (اما اليتيم فلا تقهر) عمري ماتخيلت انك اتدير هك فيها ياخساره بس ياخساره والاول مره نصدق كلامها ونعرف انها صح بلا هل لانك لو صاح عادها كيف اختك مكنتش رضيت فيها الكسره والقهره هذي وطلعت من يلاه
• ايوب ..... كان يسمع فيها وكان مش عارف ليش دار هك كان كل تفكيره انه ايبينلها انه هو خوها بس مفكرش في انه حيجرحها كان كلام ايه زي الكف اللي خلاه يستوعب شن دار بمجرد ماطلعت لحقها علي طول وطلع
• ايه ...مشت لدار وصال فتحتها بحتت ملقتهاش طلعت اتدور خشت للمطبخ لقتها عاطيه بظهرها للباب وصااال
• وصال .... تعالي شيلي لايوب القهوه
• ايه ...وصاااال بحتي فيا بس
• وصال ...ايه انا اكويسه ولو سمحتي صكري علي الموضوع ومنبيش نحكي فيه
• ايه ....برمتها وبحتت في عيونها مايستهلكش صدقيني وربي اكيد حيعوضك باللي احسن منا
• وصال ...ابتسمت بالم وتنهدت وغمضت اعيونها وزمطت ريقها شيليله القهوه انا ماشيه لامي
• اية ... حطت ايديها علي عيونها وتنهدت خذت السفره وطلعت
• وصال .... خشت للدار الحاجه مبروكه لقتها مقمعزه علي المصليه وتسبح امي
• الحاجه مبروكه ...برمت عليها تعالي يا امي
• وصال ...قمعزت يلاها وسلمت علي راسها حطت راسها علي ركبت امها وغمضت اعيونها
• الحاجه مبروكه ...قعدت تمشي في يدها علي شعرها كنك يا امي لك زمان مارقدتي الرقده هذي
• وصال .... حاسه روحي تعبانه ولما نرقد هك انتريييح
• الحاجه مبروكه ...ربي مايجيبلك تعب يارب ويفرحني بيك ويعوضك ياعيني
• وصال ...امييين يارب وايخليك ليا يارب
• الحاجه مبروكه ... خطت يظها علي راسها وقعدت تقرا في قران
• اية ...كانت اتبحت فيهن من الباب وتبكي
• ......مغير نساير...
• ..مكسور خاطري وقتي عليا جايرنضحك مع إللي يجي إمغير نساااااير نساير فيهم ..نضحك ونلعب ودمعتي امخبيها ياصاحبي لهموم لو نحكيها تبكيك وتخليك ديمة حايرنضحك مع لحباب غير انساير
• 🍃🍃🍃🍃🍃🍃🍃🍃🍃🍃🍃🍃
• ايوب ...طلع بسيارته وقعد يبرم ومشعارف شن ايدير لعند مارن تلفونه بحت فيه وفتح ايوه
• دانا .... اهلين انشغلت عليك قلتلي اشويه وانرن عليك معش رنيت
• ايوب .... اهاا انشغلت اشويه بس
• دانا ...كنه صوتك في حاجه
• ايوب ..... انت حكيني لوصال علي اني انكلم فيك
• دانا .... لالا محكيتلهش قلت بكرا نبي انشوفها في المكتب ونحكيلها ليش تسال
• ايوب .... معنها اجاليها ومتحكيلها شي توه دانا
• دانا ...وهيا عاقده حواجبها ليش باهي
• ايوب .. هك خلينا نتعرفو علي بعضنا قبل وبعدها احكيلها
• دانا .... قعدت ساكته ومردتش عليه
• ايوب ... دانا نبيك تعرفي يوم اللي تجرأت ورنيت عليك كان نيتي الحلال ويشهد عليا ربي مش انا اللي نعشم حد فيا وانسيبه
• دانا ... ايوب شن في شن صاير معاك ليش الكلام هضا
• ايوب ... مافي شي مشاكل العمل سلام توه انا مازلت بره ماشي شور الشباب واحتمال انطول تصبحي علي خير
• دانا ...وانت من اهل الخير سلام
• ايوب ....سلام وعزق التلفون علي الكرسي وكمل طريقه وهيا ضايقه بيه الدنيا بحت في الساعه درس علي جنب وخذا تلفونه وبعت رساله لسعاد
• 🍃🍃🍃🍃🍃🍃🍃🍃🍃🍃🍃🍃
• سعاد ..... كانت ماسكه يوسف وترقد فيه نوسه حبيبتي بطلي لعب وتعالي ارقدي خلاص
• نوسه ...حاضر ياعميمه وجت باستها علي خدها تصبحي علي خير
• سعاد ...وانت من اهل الخير ياعمري
• نوسه ...نمشي لبابا ونجي
• سعاد .....لالا تعالي ارقدي
• نوسه ...اشويه بس حرام عليك بابا هضا
• عزيز ... خش وبحت في سعاد كنك يابابا
• سعاد ..بحتت فيه تبي اتجيك وانا قلتلها لا
• نوسه ... تصبح علي خير وحضناته
• عزيز ...وانت بخير يا روح بابا هيا خلاص نرقدو باهي ومتعبيش اعميمه حطها في سريرها وغطاها وباسها تمام
• نوسه ...تمام
• عزيز .... بحت في سعاد خليه يوسف في سريره وهزي بيه بس تو يرقد متعود علي هك
• سعاد ... اهاا تمام اساسا ناعس وعيط معرفتش شن انديرله وحطيتها قعد يبي ايجيني
• عزيز ... متخليش ياخذ عليك ايتعبك بعدين هو عشان اليوم كله مشى وانت رافعتيه
• سعاد ..نزلت اعيونها تمام وحطاته في سريره وقعدت اتهز بيه وهيا ساكته
• عزيز ...بحت فيها كيف اتعامل معاه وطلع
• سعاد .. تنهدت وقعدت تلعب بشعر يوسف وتغنيله لعند رقد
• نوسه .... عميه سعاد نبي عميمه موده انا
• سعاد ..بحتت فيها وجت قمعزت يلاها عادي نرقد يلاك انا وخشت معاها في السرير
• نوسه ... احكيلي قصه باهي
• سعاد ..ضحكت قصه قصه اممم خليني انشوف من هالنت اهي في وحده سمحه كان ياماكان كان في بنيه صغيره اسمها حلا وقعدت تحكي ونوسه اتأثر مع احداثها وبدال ماترقد زادت انشطت لعند كملت
• نوسه .... حلوة بكل ياعميمه
• سعاد ... نحنا قرينا القصع عشان ترقدي مش تنشطي هيا خلاص ارقدي عشان بكرا نحكيلك وحده اخري باهي هيا غمضي اعيونك
• نوسه ...حاضر وغمضت اعيونها وقعدت سعاد يلاها لعند ارقدت
• سعاد ... غطتها وخلت الباب مفتوح اشويه وطلعت لقت عزيز ايقلب في تلفونه
• عزيز ...بحت فيها ارقدو
• سعاد ..اها وخشت للمطبخ دارت سفره مكسرات وعصير وشكلاطات وخذتها وطلعت
• عزيز ... جاء في وقته
• سعاد ...تفضل وحطاته قدامه وقمعزت بحتت فيه لقاته سارح في التلفون خذت الريموت وفتحت التلفزيون وقعدت اتقلب في القنوات وسرحت في مسلسل اشويه وسمعت صوت رساله خذت تلفونها وفتحتها لقتها من ايوب سوسو شن الاخبار اسف علي الازعاج ياريت تتصلي بوصال ضروري سلام كانت تقرا في الرساله وهيا عاقده حواجبها ومش فاطنه للعزيز اللي كان ايبحت فيها من غير ماتحس من اول ماقمعزت
• عزيز ...كنك في حاجه
• سعاد ...بحتت فيه اااه مش عارف هضا ايوب قال اتصلي بوصال
• عزيز ...اهاا اتصلي شوفيها
• سعاد . اهو نرن عليها قاعده ايوه وصال شن اخبارك
• ايه ..خيرات ياسوسو انا ايه شن خطرنا عليك وين راجلك
• سعاد ... بحتت في عزيز تمام انا وناضت
• ايه ..حي قصدك جنبك قاعد
• سعاد ..كنها وصال شن في
• ايه ... كنها نمفي شي انت عليش تسالي
• سعاد ... ايوب بعتلي مسج كلمي وصال ضروري ايه شن في كنها وصال
• ايه ...تنهدت هضا مش عارفه كنه خويا اليوم مش طبيعي معقوله يرن عليك ايقولك
• سعاد ...ايه حرقتي دمي شن صاير وينها وصال عطيها ليا
• ايه ... راقده مع حني مافي شي كنك
• سعاد ...ايه
• ايه ...اووووف هذا ايوب قال لوصال وحكتلها اللي صار كله وايوب تعاركت معاه وبعدها طلع معش جاء
• سعاد ...اوووف ياربي كنه ايوب بس باهي هيا شن دارت
• ايه .... ولا حاجه خشت دارتله قهوه وطلعت عدت ارقدت عند حني وبس ولما حكيت معاها قالت منبيش نحكي في الموضوع وبس
• سعاد ... حطت يدها علي راسها مشكله كل ماتزعل ترقد ومعش توعا هذا اسلوبها هيا
• ايه ..... اهاا مش عارفه حتي دانا من امبدري اترن معش عندي نيه انرد عليها
• سعاد ...دانا ملهش علاقه في الموضوع بكل متخليش علاقتك اتغير بيها عشان وصال هك حتزعل جديات
• ايه ...ان شاء الله خير خلاص سلام عدي لراجلك ومتشغليش بالك اكيده حتقعد اكويسه
• سعاد ...تمام سلام وخلي عينك عليها ومتسيبهاش ورني علي ايوب شوفيه وين
• ايه ...تشغليش بالك في عيوني وحاضر حنرن عليه انشوفه
• سعاد ..تمام سلام توه وسكرت وحطت ايديها علي اعيونها وتنهدت وطلعت
• عزيز ... ان شاء الله مافي شي
• سعاد ... لاتمام اكويسين غير وصال تعبانه اشويه
• عزيز ..هذي بنت خوك صاح
• سعاد ...اهاا هيا كانت كل ماتتعب اتجي ترقد عندي عشان هك كلمني ايوب عارف انها مش حتكلمني من لماتوفت امها و ربتها امي قعدنا منبوهش تزعل ولاتضايق وكبرت معانا وقعدت اختنا الصغيره كانت لما اتحس بفقد امها اتجي ترقد علي كراع امي لعند انجو وانحطوها في مكانها مع انه كان صالح مش منقص عليها شي لافي حب ولاحنان ولا طلعات يعني مدلعها لكن بعد توفي صالح مرضت لعند خفنا عليها لولا ايوب راه راحت فيها انعزلت علي الناس مكنتش تأثر الا لما نحكي معاها انا والا ايوب كان لما ايخش نظرة اعيونها اتغير كانه باتها ومن يومها قرر ايوب ايعيش معانا في الفيلا وقعد فعلا مصدر سعادتها وضحكتها
• عزيز .... ربي ايعوضها خير ان شاء الله وايخليه لها
• سعاد ...ان شاء الله
• عزيز ... صبا خاش انشوف العيال
• سعاد ...لحقاته بعيونها لعند اختفى وتنهدت وصبت اتلم في السفره
• 🍃🍃🍃🍃🍃🍃🍃🍃🍃🍃🍃
• بعد مرور اياااام ........
• بشير....ها ياخالد وينك نرجا فيك قاعد
• خالد ...وسع بالك بس اهو جايك مسافة الطريق ماشي لموسي وجايك
• بشير ...وموسي هضا الشاب اللي قتلي عليه
• خالد ...اهاا هيا اشويه وجايك انت وين قاعد
• بشير ... في المحل
• خالد ...تم ودرس يلا محل موسي وبيبله
• موسي .... ركب شن الجو
• خالد ...تمام وينه امجد له فتره رايح كنه معش انشوفو فيه
• موسي ...قاعد والله بس باته تاعب اشويه قال ديما في الحوش معش ايسيبو فيه
• خالد ...معنديش علم والله خلاص بعدين نمشوله
• موسي ..... تم شن صار في السياره اللي قتلك عليها امتي نمشو اتشوفها
• خالد ... بكرا كان فاضي الصبح قبل نمشي للورشه
• موسي ... والله هيا سعرها اكويس ونظيفه لكن قلت اتشوفها انت تعرفها اكثر
• خالد ....تم يامعلم انشوفها لك ودرس يلا محل بشير هيا ياباشا حرقت التلفون وهذا كله علي بدله
• بشير .... يرا شكلك تبي اتخليني نندم اللي قتلك
• خالد .... اركب اركب بس
• بشير ... ركبنا يستر الله من الجيه معاك اسمع معش عندي وقت ضروري اليوم ناخذ البدله ونثبت عليها عندي كم حاجه نبي انديرها في الحوش
• خالد ...دابين جاء معانا موسي معنها الامور تمام
• بشير ...خير ياباشا سامحني هضا حارق دمي له ايام
• موسي ...نسيبك الله غالب تحمل لعند تقرا فاتحتك
• خالد ..ضحك ومابش ايعلق
• بشير ...انك قلتهاوبعدها انديرو راي
• موسي .... خالد خش من هنا ايوه هضا المحل
• خالد ...درس السياره وبحت في بشير من المرايه كم ميزانيتك اللي حاطها عشان نبقو علي بينه
• بشير .... لا مفتوحه دايرها اول مره ونزلو وخشو للمحل
• موسي...ابتسم مبروك ان شاء الله وربي يهنيك
• بشير ...الله ايبارك فيك وعقبالك
• خالد ... تعال شوف هذين شن رايك
• موسي ...عطيه الجاكه ايجرب هذي
• بشير ....خذاها ولبسها لالا مش ماشيه معايا
• موسي ...باهي جرب االاسود هضا حيمشي معاك
• بشير .... برضو رقبتها شينه شن هالموضه بس
• موسي ... كنها ياراجل طلعت عليك والله وتاخذلها قميص ابيض
• خالد .... جرب هذي قبل لونها حيمشي مع شعرك الاشقر هضا
• بشير ...خليه في حاله خير من نصبغه واتريح من كثر ماتعلق عليه وخذاهالبسها
• موسي....لاهذي احلي الصراحه تطلعت
•
• خالد ... ننقانه من اول ماخشيت قلت هذي بدلته توه شور موسي ايركبلك عليها
• موسي ..ساهل قميص سكري تبي قرواطه والا فيونكه
• خالد ...فيونكه احلي راه
• بشير ...مش عارف اين احلي
• خالد ....الله ايفضح بيك قصدك تلبس افيونكه تحساب روحك اصغير
• بشير ....عنجد وجهك بكل باهي ندمتني اني قتلك تعال
• موسي ...يضحك عليه كنك يا راجل ايركب عليك
• ابراهيم .....خش للمحل وقعد ايدور فيهم لعند لقاهم اوووو بشورا الغالي وقعد ايصفقله بارك للسلطان تهني بارك ياجبناله نقراش الحنه
• بشير .... وهو يضحك عنجد وجوهكم بكل من قاله هضا ايجي
• ابراهيم ...عيب يارا معقول تفوت عليا شريت بدلتك وين طالع طرف والله
• بشير ..... شن رايك خلاص نثبت عليها
• خالد ...القهوي احلي عليك خوذها مني
• موسي ...لا تم في هذي لو لقينا حاجتها كلها
• بشير .... تمام بكم هذي يا شاب
• 🍃🍃🍃🍃🍃🍃🍃🍃🍃
• عند سالم ......
• كان البنات ايغلفن في دبش صالحه ودايرات جو
• دانا ... مشاء الله ربي ايتمملك علي خير يارب كله حلو
• صالحه.. تسلمي يارب وعقبالكن كلكن
• احلام .... هيا ياحناتي ايديكن انكملو بدري نبو نبدو في الجو اصلا الفرح حيمشي كله جري
• وصال ...بكل تحسيه مشى من غير ماتشعري نحنا كلمت وحده من النت غلفاته ليا
• سميه ...شن اسمها وعندها صفحه علي الفيس
• وصال ..اهاا هيا اسمها هويدا اللي تواصلت معاها اهي صفحتها شوفي
• سميه ...بحتت في هويدا انت اللي مغلفتيه لها
• هويدا .... اهاا انت وصال
• وصال ... اهاا معرفتهش والله تشرفت بيك بصراحه سلم ايديك كله حلو وراقي وجاء كيف مانبو
• هويدا ...سلمك يارب
• رندا ....هيا العروس وين اختفت
• صالحه ...خشت وهيا ماسكه سفره عصير اهو جيت
• دانا ....مبروك الدنيا الجديده يابو خد اتقول اوريده
• صالحه ......ههههههه
• سميه ...انت يابنيه ريدك جاء العقبه لجيت ريدي انا
• احلام ... ياسلم بونا اللي ربانا يجرو كيف الجيش ورانا
• وصال ....نور العين وشمعتها والعقبه لوخيتها
• سميه ....ييييييييييييي ايوا ايو نجك ليا ياخيه
• ماينطاق الحوش بلاها لكن مانبو غير هناها
• احلام ..... اسمعن هذي بس
• ان شاء الله بعدك ياصالحه ....انديرو كنه فالحه
• صالحه .... هيييي ههههه شن قالولك عليا بايره
• دانا .... هههههههه سمحه والله
• صالحه .... هيا تفضلن العصير خلاص ساد
• هويدا ...تعالي قمعزي باهي ها من وين نبدو
• سميه ...اسمعن ديرن في حسابكن مش مروحت بدري راه لعند انكملو اليوم
• امال ..... خشت عليهن انستن وعقبالكن ان شاء الله
• هنا .....تسلمي ياعميمه
• سميه ....هويدا انخطبت ياماما
• امال..... مبروك ان شاء الله وربي ايكمل عليك
• هويدا ...الله ايبارك فيك يارب
• امال ...كنها ياوصال بنت عمك مجتش
• وصال ...والله مش قاعده ماشيه لعيت جدها اليوم
• امال ...اهاا خلاص خوذن راحتكن
• دانا ...هاتي نبدو قربيلي الدبش يا احلام وين البوكسات
• سميه ...تو نركب انجيبهن فوق امس حطيتهن
• وصال ...لو مافيش حد نركب انجيب معاك
• سميه ...تعالي لالا مافيش حد بس للاحتياط خوذي الايشارب مرات يزرق حد
• وصال ...تمام ولبست ايشاربها عمو سالم مش قاعد
• سميه ...مضنيش امبدري طلع ماما قالتله يبن ايجن البنات وايغلفن تعالي من هنا ردي بالك من الدؤوج مازال بلاحديد
• وصال ....لا تمام متخافيش قتلك نزلو الببوكسات ونبي نطلع نشوف الجنينه اتهبببل
• سميه .... تمام اهن خوذي هذين
• وصال ...مسكتهن ونزلن وحطنهن وقعدن لاهيات في التغليف
• دانا .....مراد قال جاي يبنات اسمحلي ننبي انروح
• صالحه ...يييي كان قعدت والله مازال الوقت
• دانا ...لالا قال عنده مشوار ومطول منقدرش انخليك
• صالحه ...تمام ارجي باهي اشويه وخشت للمطبخ ماما دانا مروحه نبي انحطلها عشاها
• امال ...هاتي تو انحطلها انت عدي حطي من الحلو وجيبي مشروب من الفريز وحطي الفاكهه
• صالحه ...تمام حطتهن لها وغلفتهن بسلفر وعطتهن لها
• دانا ...مبروك ياقلبي ان شاء الله ربي ايهنيك
• صالحه ....االله ايبارك فيك وعقبالك
• امال .. تفضلي وسلمك جيايه متغيبش في الفرح
• دانا ...انشاء الله ياعميمه ليش تعبتي روحك ياعميمه
• امال ....تعبك راحه سلمي علي امك وخياتك
• سميه .... وصال صبي المغرب اذن تعالي مش قلتي تبي اتشوفي الجنان
• وصال ...اهاا لهيت بس
• سميه ...تعالي هيا قبل لاتظلم اخري
• وصال ...هيا وطلعن ماشاء الله حلوة بكل القعده هذي
• سميه ...بابا ديما مقمعز هنا غالي عليه بره هو ماما
• وصال ... ننقانه ايسهف الجو
• سميه ...تعالي من هنا هذا شور صالحه غالي عليها الورد
• وصال .... ايهبببل بكل مشاء الله
• سميه ....واجعها تبي تعدي وتسيبه وتوصي عليه راه تنسوه واسقوه وردن بالكن منا
• وصال ..صاح عندها حق حرام وهنا يحكن يسمعن صوت جاي جيهتن
• سميه ..... هيييييي
• وصال .....
• يتبع .....
• توقعاتكن للحلقات الجايه ❤❤❤
• بقلمي.... احلام
