• الامانة .......
• الحلقه 19......
• وصال .... ايوا اول شارع بعد الصيدليه الباب اسود علي اليسار
• موسي.... .تمام الصيدليه قدامي
• وصال ..خلاص اول شارع خش يسار ثالث فيلا
• موسي ...تم وصلت
• وصال ...تمام اهو فتحت الباب معليش ممكن تنزل عشان في حاجات اثقال
• موسي ...تمام اهو نازال وسكر
• وصال ...امي تعالي وصل الشاب
• الحاجه مبروكه ... هي جايه خليك تو نفتح انا الباب طلعتن الدبش كله
• وصال ...اهاا ياامي بس قوليله علي القزاز
• الحاجه مبروكه ...اقعدي هنا وقوليله انت انا منعرف وينهن كله نفس بعضه كراتين
• وصال...تمام
• الحاجه مبروكه ...فتحت الباب وتباوعت منا
• موسي ...السلام عليكم يا حاجه
• الحاجه مبروكه ...واتبحت فيه بتمعن وحاجه تحركت في قلبها وعليكم السلام يا وليدي
• موسي .... منزل صالح الفلاني
• الحاجه مبروكه ...اهاا انت متاع التوصيل
• موسي ...ان شاء الله تواصلت معاكم اختي
• الحاجه مبروكه .... اهاا تفضل خش اهو حاطينه كله هنا
• موسي ...تمام وخش وهو منزل راسه
• الحاجه مبروكه .... تعالي ياوصال قوليلا علي اللي يبي مساعده
• وصال ...قدمت معليش الجيهه هذي كلها قزاز والباقي عادي مينخافش عليه
• موسي ...كان ايبحت فيها ومنزلش عيونه من عليها لعند هيا ارتبكت وجهه انحمر بعدها فطن لروحه وقدم علي البوكسات وقعد يشيل و ايستف فيهن في السياره
• وصال ...خشت بسرعه وهيا مرتبكه من نظراته اوووف استغفرالله ربكني بنظراته خليني انديرله قهوه
• الحاجه مبروكه ...ياريت جبت معاك حد واعر عليك والله دبش واجد
• موسي ... لاخلاص قريب يكمل
• وصال .... جابت سفره القهوه وحطتها علي الطاوله بره يلا الحاجه مبروكه قوليله يا امي ايجي يشرب قهوه انا جوا لو تبي شي ضبحي
• الحاجه مبروكه .... تعال يااوليدي اشرب قهوه وخليني نكلمك واحد من عويل الجيران ايشيل معاك
• موسي ..تريحي ياحاجه خلاص شبه كملت
• الحاجه مبروكه ... لا تو انكلم سليمان ايجي معاك مازال تنزله اخري غادي وفتحت باب الحوش وتباوعت وقعدت تشير بيدها سليمان يا سليمان تعال ياباتي
• سليمان ..جاها نعم ياعمتي مبروكه تبي حاجه
• الحاجه مبروكه ..اهاا تعال عاون هالشاب وشيل معاه حط الدبش في هالكنتر
• سليمان ..حاضر ياعمتي وين ايوب غريبه مش قاعد
• الحاجه مبروكه ...خشت هيا وياه ايوب مش قاعد نبو كم حاجه ماشي ايجيب فيهن والوقت زر خلاص
• سليمان ...اهاا الف مبروك ان شاء الله وربي ايتمم علي خير السلام عليكم ياشاب
• موسي ..وكان يرفع في البوكسات الكبار عليكم السلام
• الحاجه مبروكه .... تعالو اشربو قهوه ياسليمان بعدها كملو
• موسي ... اهواشويه خلاص انحط هذين بس وقعد ايشيل وايحط في السياره هو وسليمان لعند جاء عنداخر بوكس كبير وثقيل معليش تعال ارفع معايا هضا
• سليمان ...هي جيتك ورفعوه وحطه في السياره تمام هك
• موسي ...تمام بارك الله فيك
• سليمان .... فينا وفيك ان شاء الله وايبارك في رزقك
• موسي .... وهو ايسكر في باب السياره تسلم ياغالي هي اسمحلنا ياطيب
• سليمان ...لا وين تعال اشرب قهوتك وبعدها امشي تزعل عمتي مبروكه
• موسي .... مافيش داعي والله وبيني وبينك خلاص كملت شغلي وبنطلع عندي ماندير
• سليمان ...ابتسم تمام ارجى هنا تو انجيبها ونجي القهوه وبعدها توكل
• موسي ...تم هي نرجا فيك
• سليمان ....خش هاتي ياعمتي القهوه نشربوها بره و اندق عليك نعطيك السفره
• الحاجه مبروكه .. اهي السفره شيلها وعقبالك ان شاء الله نفرحو بيك
• سليمان .... وهو مبتسم ان شاء الله وخذا السفره وطلع تفضل يا
• موسي ....موسي وخذا فنجانه وقعد يشرب كاني شايفك من قبل او مشبه عليك
• سليمان .... اهاا في محل الاقمشه الي في *****
• موسي ... اهاا تمام زبطتك صح والله شكلك عرفتني دغري
• سليمان ...اهاا انتم زباينا
• موسي ...بس انا منشوفش فيك واجد اغلب الشي الشاب الاخر مفتاح تقريبا
• سليمان ..... اهاا خويا انا اغلب الشي مش قاعد
• موسي ...اهاا شكلكم جيران قدم اللي كلماتك الحاجه
• سليمان ..... لا والله لنا ممكن في الخمس اسنين محولين هنا كنا نسكنو في ***** الحاج مصطفي صاحب باتي من زمان شرو قطعه الارض هذي مع بعضهم هما بنو وسكنو دغري ونحنا قعدت ارض فتره وباتي قعد يبني بالشويه وبعدها حولنا هنا ايوب نعرفه من زمان وبيناتنا صحبه تقدر اتقول معرفه قديمه ولانه معندهمش الا ايوب كل مايستحقو حاجه وهو مش قاعد تكلمنا انا والا واحد من خوتي
• موسي ...اهاا ربي ايدوووم صحبتكم ان شاء الله
• سليمان .....تسلم وانت وين تسكن
• موسي ...في ال****** ونخدم في محل تغليف في الحدائق
• سليمان ...اهاا تمام باهي ممكن رقمك عشان في هاليومين ان شاء الله عندي موضوع ان شاء الله ايسير منا وانجي نغلف عندك
• موسي ...تم وربي ايتمملك علي خير ان شاء الله سجل عندك هذا رقمي091*********ولو ملقيتنش تلقا صاحبي امجد قوله من طرفي وباذن الله مايقصرش معاك
• سليمان ....تم اهو خزنته ورنيت عليك خزن رقمي سليمان الفلاني
• موسي ...تمام نتلاقو معنها تبي شي
• سليمان ...سلامتك في امان الله
• موسي ..... شيرله بيده وركب سيارته وطلع
• 🍃🍃🍃🍃🍃🍃🍃🍃🍃🍃🍃
• وصال ...شنو طلعو
• الحاجه مبروكه ...اهاااخذا سليمان سفره القهوه وطلع بيها سبحان الله هالشاب خش خاطري مش عارفه كيف كاني نعرفه مش اول مره انحقه
• وصال ... غريبه حتي انا نظرته لنا وترتني بس هك تحسيه في حاجه معرفتش شن وحسيته كانه يشبه حد بس معرفتش منو
• الحاجه مبروكه..... ربي يحفظه لهله ان شاء الله و يرزقه ان شاء الله بحلاله شنو سعاد مازال ماكملت مرنيتش عليها
• وصال ...لا قالت طلعت من المزين شايلها ايوب عشان تختار هديته علي ذوقها
• الحاجه مبروكه ...وهيا مبتسمهةربي ايخليكم لبعضكم و ايفرحني بيكم كلكم يارب علي حياة عيني
• وصال ... جت يلاها وضبطتها وايخليك لينا يارب
• 🍃🍃🍃🍃🍃🍃🍃🍃🍃
• عند سالم ....
• سميه ...... امتي تبي تبدي في دبشك انت حيزر عليك الوقت راه وكله حيبان علي وجهك ارهاق وتعب
• صالحه .... مش باديه لعند يدفعو منبيش ناخذ شي قبل مانعرف الميزانيه
• احلام .. ميزانية شن بس انت شن تبي تشري اساسا مش شقه وحدك عشان اتفكري في التكاليف
• صالحه ...مهما كان اكيد بناخذ حاجات للمطبخ متجيش مانشيلش معايا عشان هك نرجا لعند يدفعو بعدها ناخذ حاجتي زي مانبي ونعرف الميزانيه كم وبعدين بابا ساده مصاريف الفرح وخوتك يبو يبدو في شققهم انجي نشرط ونطلب زي مايقولو علي قد الحافك مد رجليك ناخذ حاجتي داب المدفوع والزايد بلاش منا
• امال ..... خشت عليهن وهن يحكن لو يسمعك باتك والا خوتك يزعلو منك يا صالحه اذا انا كلامك وجعني كيف هك اتقولي في حد شكالك والا عمرك طلبتي حاجه وماشروهش لك شن يعني خلاص معش نصروفو عليك وقعدتي ملزومه من الراجل البراني وهلك معش تبي منهم شي
• صالحه ....وهيا منحرجه مش هك والله يا ماما قصدي انا لما يدفعو نعرف كيف انقسم الفلوس ونعرف شن نشري انت عارفتيني انا ديما هك منحبش انتقل علي بابا ولا خوتي
• امال .... ولو كان كلامك مايجيش واللي تبيه خوتك وباتك مش حيقصرو ومش مستحقين فلوس الراجل عشان تصرفي بيهن علي دبشك وحتاخذي كيف كل عروس ومش حنقصو عليك بحاجه وكلام زي هضا معش نبي نسمعه فاهمه انت وهيا لما خوتك وباتك يشكولكن هضك الوقت فكري فيهم
• صالحه ..... صبت بسرعه لامها مش قصدي والله ياماما انت عارفتيني منقصدش شي والله انا منبيش انتقل عليهم وراهم شقق هذا قصدي انا عارفه انهم عمرهم ماقصرو معايا عشان هك والله قلت كلامي هضا مش قصدي انه هو ملزوم بيه وهما لا انتم هلي مليش غني عنكم ياماما
• امال ..... سكتت ومابتش اترد عليها اليوم بشير كلم باتك وخذا منا موعد السبت يبي ايجي يدفع ويحدد موعد الفرح
• احلام ...صاااح حي وقت يومين زعما نلحقو انديرو فيهن حاجتنا لدفع
• سميه .... اللي منلحقوش عليه نشروه من السوق وحزت
• امال .... لا نلحقو هو قال مش جاييين واجدين حدهم عمه وجارهم ولد الحاجه فاطمه بس يعني يا اثنين بالكثير ثلاث انفار بس
• احلام ...اهااا لا ساهل هك باهي بابا بيعزم حد والا لا
• امال ...مش عارفه محكش بس مضنيش
• سميه ...لا تمام معنها انوتو حاجاتنا كلها الجمعه عشان السبت يقعد شور حوسه الحوش
• امال ....اهاا قررن شن بتديرن واكتبن الناقص في ورقه تو نعطيه لواحد منهم ايجيبه
• سميه .... حاضر
• امال ...بحتت في صالحه وابتسمت ربي ايتمملك علي خير ويسعدك معاه وايهنيك يارب
• صالحه ....امييين وربي مايحرمني من دعواتك يا عيني
• سميه ....بعد خطرها ياماما وصال كلمتني عزمتني علي فرح عمتها سعاد اللي جت يومتها
• امال ..... شوفن باتك لو وافق نمشو
• سميه ..... لاعاد شوفيه انت هو اكيد مش حيقول شي وبعدين هيا قالتلي امها حتكلمك تعزمك قلتلها مش بيناتنا تو انقوللها ماما
• احلام ...الله بعدك الواحد خاطره في فرح
• امال ...تو انشوفه امتي هو
• سميه ..... قالت تفضلن من يوم الثلاث بس الزفه وعزومتهم الخميس في الصاله حنه وزفه
• امال ...اهاا تو انشوفه باتك بتمشن كلكن
• صالحه ...انا لالا مش ماشيه
• سميه ....كنك لنا زمان علي الافراح
• صالحه ... معنديش نيه توه ونقعد اندير العشاء لبابا وخوتي عشان تاخذن راحتكن
• احلام ...لا صاح صدقتي اقعدي خير مايجيو ايروحو بينا بدري ومنشوفوش العريس شن شكله
• صالحه.....عاد انت المهم اتشوفي العريس
• احلام ...ماله شن ضروري يقعد الفرح ناقص كان مشفتش
• صالحه ...عليك حاله كلا انت
• 🍃🍃🍃🍃🍃🍃🍃🍃🍃🍃🍃
• ثاني يوم ......
• فايزه .... الله ايربحك اطلعي للعرب عيب يسالن عليك جايه طالبتك انت ياهويدا
• هويدا .... ياماما اهي رندا تطلع الله ايربحك منبيش انا
• فايزه .... هويدا نبي نخش علي المراه توه واشويه وتلحقيني وانت مغيره لبستك وبارمه علي روحك فاهمه مش وقت دواه توه والصبايا جوا وانت يارندا متطوليش بالضيافه وطلعت
• رندا ...حاضر ياماما هويدا كنك بس عليش مسكره راسك هك يعني اللي ايشوفك ايقول تبي حد
• هويدا ....حد شنو بس هك منبيش وخلاص
• رندا .... تعوذي من الشيطان وعدي غيري لبستك بسرعه وابرمي علي وجهك عشان ماما الله ايربحك فكينا تو تزعل وتمرض ماصدقنا قعدت اكويسه
• هويدا ...اوووف اوووف حاضر ماشيه
• موسي ....خش عليهن وهو عاقد حواجبه كنك اتنفخي شن في
• هويدا ... مافي شي تبي حاجه انت
• موسي .... اهاا نبي قهوه الشاب اللي جايبهم نعرفه سبحان الله علي الصدف لعند امس انا وياه محكاليش انه جاي يخطب المهم توه وتي القهوة ورني عليا نحنا في المربوعه
• رندا.... تعال اهي خوذ هذي الواتيه نغير السفره بس وقعدت تحط في السفره الاخره ومدتها له
• موسي ...هاتي هيا
• رندا ...شن ترجي انت بسرعه هيا امشي علي بين مازدت قهوه
• هويدا ...باهي اهو ماشيه وخشت غيرت لبستها وبرمت علي وجها دارت مكياج خفيف ومسكت شعرها بطريقه حلوه وطلعت
• رندا .... نجك ليا ايوه تهبلي هك خلاص خشي يسالن عليك طولتي وماما من امبدري قاعده علي اعصابها وتفنص
• هويدا .....اهو ماشيه وخشت عليهن السلام عليكم وقعدت اتسلم عليهن
• امه .... مشاء الله مشاء الله هذي هويدا يافايزه
• فايزه .... اهاااا هذي
• امه ...كيف حالك
• هويدا ....حمدلله بخير شن اخبارك انت وسلمت علي خواته وقمعزت
• امه .... والله ليا كم وانا اندور ماعقبت حوش ماخشيتله واللي تعجبنا يدير مقابله معها وايقول مافيش نصيب بعدها خلاص سكر راسه معاش يبي بكل لعند عايشه دلتني عليك وقتله عليكم طلع يعرف ولدك وافق
• فايزه .... ربي ايقدم اللي فيه الخير ان شاء الله
• امه ...ان شاء الله والله بيني وبينك نبي انتهني عليه هو وخوه معش عندي غيرهم شباب وخوتهم متزوجين وكل حد لاهي في عياله وخواتهم متزوجات مش كل يوم بيجن ايعاننهم رجالتهن وعربهن عندهم حق عليهن وانا مراه كبيره كرعيا بالهون قعدن يادوب اندير الغداء ونظم حوسه الحوش من فوق فوق لو قاعدين الله يسامحهم حاجتهم ايقيموها برواحهم وعوايزهم يغسلوهن لما يلقوني تاعبه وغاسله دبش هما اللي ينشرو ويحددو
• فايزه ...ربي يحفظهم لك وايفرحك بيهم ان شاء الله
• امه .... ان شاء الله وايفرحك بعويلتك
• هويدا ...طلعت وخشت للمطبخ شنو كملتي حطيتي
• رندا ...اها خلاص حطي المشروب في السفره عشان انطلعوه شنو جوك امه اكويسه صاح
• هويدا ...الباين اكويسه واخته سلمت محكتش ولا كلمه
• رندا ...اهاا حقيتها زعما من وين يعرفه موسي
• هويدا ...الله اعلم هيا انشيلو قريب ايروحن اكيد
• رندا ... هيا وطلعن ايقدمن في الضيافه واشويه وطلعن روحن
• فايزه .... شنو قالن البنات الشاب تعرفه
• موسي ...اهاا هضا صاحب محل الاقمشه اللي ناخذو منا يا هويدا وامس بالصدفه طلع جار العرب اللي جبت منهم الدبش وحكينا بس متوقعتش انه نفسهم العرب جيران عمتي اللي قلتي عليهم يا امي
• فايزه ....قالت لهم خمس اسنين محولين بس مازال ايواصلن في بعضهن هيا وعمتك
• موسي ...اهاا قالها ليا
• فايزه ...انت شن رايك فيه العيله باين عليهم اكويسين
• موسي ..... والله الشاب هكي مشاء الله عليه لكن نسالو عليه في شارعهم هضا وعيال عمتي وبعدهالو طلع اكويس الراي راي اهويده والا شنو ياهويدا
• هويدا ... مش عارفه ان شاء الله خير
• فايزه ...ربي ايقدم اللي فيه الخير ان شاء الله
• موسي ...لو مش موافقه حقك ترفضي وانا مستحيل نجبرك علي شي ماتبيش
• فايزه ...لا شنو ترفض انت اسال عليه قبل وبعدها ايديرو مقابله وتستخير وبعدها ساهل مش فن طب هك ترفض
• موسي .... تمام حتي هضا راي وين البنات مش باينات
• رندا ...في الدار قاعدات يلعبن
• موسي ... اهاا خليني انشوف شن مخربات بعدك شكلكن حابساتهن
• رندا .... يستر الله انضر عاد تسكيتت الفرخه نسرين مش بلاش نمشي انشوفهن حتي انا
• 🍃🍃🍃🍃🍃🍃🍃🍃🍃🍃
• عند بشير .....
• بشير ......بشري مروه وينكن
• بشري ....هنا قاعدين في المطبخ
• بشير ..... خشن للدار في عمال جبت دار النوم بس وبعدها اطلعن
• مروه .... حاضرهي نغسل ايديه بس طفي علي الطنجره يا بشري تعالي يلا عمتي فاطمه
• بشير ...اشويه اينزلوها مش مركبها اليوم
• بشري .... طفت علي الطنجره وطلعت هيا ومروه
• الحاجه فاطمه ....كنكن تجارن شن في كنه بشير
• مروه... جياب دار النوم بينزلوها قال خشن جوا
• الحاجه فاطمه ...صااااح مبرووووك عليه الغالي ربي يسعده ان شاء الله وانشوف اعويلته
• مروه ...امين يارب
• بشير .... طلع بعد خشن هيا تعالو من هناونزلوها وحطوها في الصاله وطلعو دق الباب وخش عليهن خير يا عمتي كيف حالك
• الحاجه فاطمه.... الحمدلله يا غالي مبروك عليك وربي ايكمل ان شاء الله
• بشير ...الله ايبارك فيك يارب
• بشري..... شنو طلعو
• بشير ....اهااخلاص اطلعن
• مروه ...شنو جبتها مبروك يا غالي لووووووووولللللللللي
• بشير ...وهو مبتسم الله ايبارك فيك ان شاء الله
• بشري .... قعدن ايكشكن والغالي درنله دولاب... معش ايعلق فوق الباب
• يامبروك علي غالينا ...فرحانه من جد ونيه
• الحاجه فاطمه ...مبروك علي اوخيهن نورالعين وضيهن
• يامبروك عليك بتاتك ... يا صباي مع اوخياتك
• مروه .... يامبروك عليه شقيقي.. هذا وين زمطه ريقي
• هضا اليوم اللي نبيه..... فرحانه ونراجي فيه للللللللللللووووووووووووولللللللللللللي
• بشير .... ههههههههههه وخش لداره وسيبهن وهو فرحان
• 🍃🍃🍃🍃🍃🍃🍃🍃🍃🍃🍃
• يوم الزفه .......
• وصال ..... خير ياعميمه امال انسيتنا
• امال ... خيرات مبروك عليها عمتك وعقبالك
• وصال ...الله ايبارك فيك سوما شن اخباركن
• احلام.... تمام بخير
• سميه ...تمام شن دايره انت
• وصال ..حمدلله حال الجري وتعب عقبه عندكم
• سميه .... تسلمي وين دانا مش باينه
• وصال ...مش عارفه مازال ماجت امس جت هيا اكيده خوها مش فاضي
• ايه ..... وصال سوسو جت تعالي بسرعه تبيك في الدار قاعده
• وصال ..... هيا هيا جايه شوفي عميمه سليمه وين وكلميها
• ايه .....تو نمشيلها عدي شوفي سعاد بس
• وصال .... طلعت بسرعه قابلتها خاشه هيا ودانا
• سعاد .... تعالي خوذي الشنطه من ايوب
• وصال .... مش لابسه حجاب انا اطلعي دانا خوذيها منا والنبي
• دانا ...قولي خير بس وانت طول علقتي
• وصال ...اطلعي بس بعدين انسلم والله حايسه بكل
• ايوب .... وصال ايه وينكن
• وصال ...اطلعي بسرعه حي عليا لبستي فضيحه قدامه
• دانا .... باهي نعن داء وترتيني معاك وبرمت وطلعت كانت دايره مكياج قوي راسمه عينها كات ودايره روج داكن وطالعه حلوه ومتغيره ايوه نعم
• ايوب .... بحت فيها واستك وقعد منسته فيها لعند هيا ارتبكت وجها انحمر وين ايه و وصال
• دانا ..نزلت راسها وقعدت تحكي وهيا متوتره مش فاضيات سعاد قالتلي خوذي الشنطه من ايوب
• ايوب ... فطن لروحه اهااا تمام هاكي اهي الشنطه
• دانا ...مدت يدها وخذتها وخشت عليهن وهيا حاطه يدها علي قلبها هاكي الشنطه ياحنه يا وجه الكشايف خليتني نطلع عليه بمكياجي
• وصال .... ههههههه عادي مكياج ولايشوفني بلبستي هذي
• دانا ... خير ياسوسو مبروووك ياقلبي ماشاء الله وين السماحه هذي كلها
• سعاد ....الله ايبارك فيك ياقلبي وعقبالك شنو مكياجي اوفر حسيته
• وصال ...بلعكس طالعه اتهبلي خليك اشويه انكلم عميمه سليمه ونجيك
• دانا ... انا نبي انخش تبن شي
• وصال .... طالعه معاك انكلم الفرقه والمصوره حتي هيا
• سعاد ...تمام البسي يا وصال نبي نكلم ايوب ايخش معايا
• وصال ... تمام وخذت عبايتها في يدها وطلعن
• دانا ...سميه جت والا لا
• وصال ...اهااا جت مقمعزه الجيهه هذك
• دانا ...... اهاا نمشي نسلم عليها مش كانه ايوب زايد متسمح والا انا تهيالي
• وصال ...بحتت فيها وابتسمت متسمح صار علي فكره زارقه عليك
• دانا ...ارتبكت شنو زارقه عليك هذي شن قصدك
• وصال .... قصدي بعدين انتفاهمو مش وقتها توه وشيرت الايه اتجيها وكلمت الفرقه وعدت لسعاد وطلعن
• الحاجه مبروكه ..... سلمت عليها وهيا عيونها ادموع مبروك يا عيني ربي يهنيك ان شاء الله
• سعاد ...وهيا تضبط في امه وحبت علي راسها ويدها الله ايبارك فيك يا عيوني
• سليمه ..... هاكي اشربي اميه مقريه وسمي بسم الله وخشي
• سعاد .... وين ايوب نبيه ايخش معايا
• ايوب ..... جيت جيت مشاء الله شن السماحه هذي كلها
• سعاد .... لا عاد انت اللي حتغطي عليا اليوم بشكلك هضا
• ايوب ...... ننقاني صرفت واجد اليوم علي روحي متجيش نطلع شين بعدها ههههههه
• الحاجه مبروكه ..... ربي يحفظكم انتم الاثنين هيا خشو سمو بسم الله
• ايه .... خلاص خشو وقت
• ايوب ....وين وصال غريبه مش هنا
• وصال ... جيت جيت نعم تبي حاجه
• ايوب ..ابتسم لا خلاص هيا سوسو وخذا يدها حطها في يده بسم الله وخشو علي اسماء الله الحسني
• سعاد ...كانت تمشي وهيا مبتسمه كانت مشيتها ثابته وطالعه اتجنن وايوب يبتسم وايبحت قدامه والمصوراتيه تصور فيهم
• ايوب .... طبس علي ودنها كنه المسرح قعد بعيد سرعي مشيتك اشويه ازح سخنت
• سعاد ...قعدت تضحك حاضر مش قتلك حتغطف الانظار البنات يبن ياكلنك بعيونهن
• ايوب ... اركبي بس واخيرااا وصلنا للمسرح
• سعاد .... قعدت تضحك وركبت وايوب سلم عليها ونزل
• سميه ... دانا من هضا اللي خش معاها
• دانا .... هضا ايوب ولد عم وصال وخو ايه
• احلام ...مشاء الله عليك جمال
• دانا ...بحتت فيهاا ورفعت حاجبها
• سميه ...قصدك هضا ايوب اللي زمان
• دانا ...فنصت وضحكت اهاا وسكري فمك خلاص
• سميه ...يانعليا خلاص سكتت هههههه
• بدت الفرقه وركبن البنات دارن جو عليها
• اشويه وجن الحنايات وحننها وقعدن ايشتن وبعدها كملت الفرقه وصلتها
• وصال .... سوسو صبي هيا العريس جاء
• ايه ....ارجي نبخلك عطروقعدت اتبخ تمام هك
• سعاد .... قعدت متوتره تمام صبت
• موده .... ركبت علي المسرح سعاد مايبيش ايخش راه هيا اطلعي معايا
• سعاد ...بحتت في وصال وايه تمام هيا وقعدت تنزل لعند وصلت في الحاجه مبروكه ضبطتها وقعدت تبكي
• الحاجه مبروكه ...... مبروك عليك يابنيتي وردي بالك علي روحك وراجلك حطيه في عيونك وعمتك عامليها كيف امك وديري بالك علي العيال هذيم يتامي ايحاسبك ربي عليهم حطيهم في عيونك
• سعاد ...وهيا تبكي حاضر يا امي وانت ردي بالك من صحتك وصال ديري بالك عليها
• وصال ...وهيا تبكي في عيوني متخافيش
• سليمه .... هيا ياسعاد عيب الراجل يرجا بره
• سعاد .... تباعدت علي امها ونزللها الطرحه وطلعت
• عزيز.......
• يتبع ......
• بقلمي .....أحلام
•
