• #الامانه.....
• الحلقه 21......
• عند موسي .....
• موسي .... ها وين القهوة
• رندا ...اهي واتيه خوذها
• موسي ...كلمي هويدا هيا قوليلها اشويه وتلحقني
• رندا ...تمام هي تو نمشي انشوفها وطلعت خشت عليها هيا قالك موسي تعالي خشي
• هويدا ...هيا شنو طلع القهوه
• رندا ..اهاا عطيتها له توه كنك لابسه ايشارب اسود ارجي هاكي غيريه خوذي البيج حيطلع عليك احلي
• هويدا .... حتي هضا اكويس مافيش داعي
• رندا .... لالا هيا هاكي البسي بسرعه موسي قال اشويه وتلحقني
• هويدا .... هاتي باهي لبساته هاشنو اكويس هك
• رندا .... بعتتلها بوسه في الهوا قمر هيا تعالي متخليش الراجل يرجا
• هويدا ...تمام هيا ااووووه قلبي ايدق وحطت يدها علي قلبها
• رندا ... خوذي شهيق زفير ايوه تمام هك ارفعي راسك وخشي
• هويدا .... مشت وصبت يلا باب المربوعه بسم الله الرحمن الرحيم وخشت السلام عليكم
• سليمان .....وعليكم السلام ورفع اعيونه فيها وورد بحت في موسي
• هويدا ...خشت وقمعزت يلا موسي وهيا منزله راسها
• موسي ... ناض احكو مع بعضكم انا هنا قاعد يلا الباب
• سليمان ... بحت في موسي وهو طالع كيف حالك
• هويدا ...حمدلله بخير وسكت
• سليمان ....كان ايبحت فيها بتمعن وابتسامة رضا وانا بخييير بعد شفتك
• هويدا ...رفعت راسها وبحتت فيهوهيا متفاجأة بجرائته
• سليمان ... مستغربه صاح حتي انا مستغرب من روحي والله مش عارف حاس انك اللي كنت اندور عليها وعلي فكره اول مره نجرا ويطلع من كلام زي هك انا شفتك كذا مره في المحل وكل مره كنتي تلفتي في نظري بطريقه لبسك واسلوبك وخجلك الواضح
• هويدا ....كانت تسمع في كلامه وقلبها ايدق بالقوه وجهها انحمر
• سليمان .... بحت فيها بتمعن وهو مبتسم نزل اعيونه اسف لوازعجتك بصراحتي وعد مش حتكرر مره اخري حنخش في الموضوع دغري لو صار نصيب بنينا حتكون معيشتنا عند امي يعني غدانا مع امي وباقي اليوم علي جونا طبعا هضاشرطي الوحيد منبي منك شي الا انك تعتبريه زي حوش هلك وتاكدي انها مستحيل اتجي عليك في حاجه ويوم اللي خواتي ايكونن قاعدات تبي تقعدي في حوشك زي ماتبي وغيره معنديش شروط طبعا انت لو عندك اي شي تبي اتقوليه تفضلي
• هويدا .... انا واختي نشتغلو في التغليف وطبيعه شغلي كله عن طريق النت او زباين المحل اللي ماسكه موسي طبعا بدايته كانت هوايه بس بعدها تحولت وقعدت مش قادره مانسيبه ممكن انوقفو فتره بس الشغل هضا ضروري بالنسبه لنا
• سليمان ... تمام شنو في حاجه اخري
• هويدا .... طبعا هلي في اي وقت انجيهم عشان انا اكثر وحده عارفه ومتابعه مرض امي وكل اوراقها وتحاليلها شوري
• سليمان ...وهضا موضوع منقدرش انقاشك حتي فيه حقك وامتي ماحتاحوك حتكوني عندهم
• هويدا ...تمام
• سليمان ...مافيش حاجه اخري تبي اتقوليها
• هويدا .....لالا تمام
• سليمان ... باهي بالنسبه لشرطي موافقه عليه او لا
• هويدا .... ان شاء الله خير
• سليمان. ابتسم ان شاء الله مافي الا الخير
• موسي ... خش وبحت في هويدا
• هويدا ...بحتت في موسي وصبت خشت وهيا مبتسمه
• موسي .... معليش طولت عليك
• سليمان .... لا عادي ولايهمك وناض اسمحلي توه وان شاء الله بيناتنا تلفون
• موسي .... تمام ان شاء الله
• فايزه .... ها شنو صار معاك
• هويدا ... والله كل حد حكا اشروطه وطلعت مش عارفه شن ايصير توه
• فايزه ...ان شاء الله مافي الا الخير
• هويدا ....ابتسمت وخشت لدارهن ولحقتها رندا
• رندا..... حسيتك فرحانه شنو عجبك
• هويدا ... ابتسمت سمح الحق بس مش واو ايهبل يعني في حاجه سمحه لما يبتسم ايتغيرن ملامحه يقعد جميل بكل واسمر اشويه
• رندا ... يعيني يعيني
• هويدا ...تضحك مش عارف بس شرط انه الغداء ديما مع امه
• رندا ...عقدت حواجبها كيف يعني قصدك كل يوم تنزلي اتسوي انت
• هويدا .... اهاا شرطه انه غدانا مع امه وباقي اليوم براحتي
• رندا ....مش عارفه الحق شن انقولك هو عادي هيا مراه كبيره وحدها صاح لو عندك وحده من البنت مش متزوجه حنقولك لا ارفضي الا مايصيرن مشاكل بينكن بس هيا عادجي انقول حتفاهمي معاها شكلها هك اكويسه وفي حالها
• هويدا ... ان شاء الله خير مرات هو اللي يرفض متعرفيش يعني مش حنرد عليهم لعند نعرف رده
• رندا .... اهاا اكيد يارب لو فيه خير لك ربي ايقربه منك ولو في شره ربي ايباعده عليك
• هويدا ..يااارب ان شاء الله
• 🍃🍃🍃🍃🍃🍃🍃🍃🍃🍃
• نوسه ... ايهبببببل ياعميمه لابسيه ليا نبي ننزل بيه لامي
• سعاد ..وهيا مبتسمه تعالي ولابساته لها ايجننن عليك يانوسه
• نوسه ... خليني انشوفه وقدت تبرم وتبحت في المرايه شوفي ياعميمه كيف يبرم معايا
• سعاد ...تضحك شفته اهاا تعالي خليني نمشطلك شعرك وانديرلك تسريحه سمحه
• نوسه ... قمعزت تمام وبعدها ننزلو لامي باهي
• سعاد ...باستها علي خدها باااهي ياسمحه وقعدت تمشطلها في شعرها هيا تعالي
• نوسه ... مسكت يدها وطلعت بابا شوف وقعدت تبرم
• عزيز ...بحت في نوسه وابتسم باهي خلاص راسك ايدوخ بطلي
• سعاد....قمعزت جنبه تعال ياسمح عطيه ليا
• يوسف ...بحت فيها وخش في باته
• عزيز .... مدا لهاعدي لعميمه
• يوسف ...زاد مسك في باته
• سعاد ... تعالي نعطيك شكلاطه عندي عرررم راه هيا تعال
• يوسف.... بحت فيها ويرمش في عيونه
• عزيز ... مدلها عدي
• نوسه ..حتي انا ياعميمه
• سعاد ...تعال هيا وقدمت عليه وخذاته من عزيزوبحتت في نوسه انت اول وحده ياسموحه وشالتهم للمطبخ وطلعت طرفين شكلاطه وعطهن لهم
• يوسف ....خذاها وقعد يبي ينزل
• سعاد .....هييي قصدك خلاص بعد خذيتها معش تبيني نزلته وعدا يجري لباته
• عزيز...تعال تعال يامجرم قصدك خذيتها وجيت
• سعاد ..اها اول مخذاها قعد يبي ينزل
• عزيز ... هو نوعه هك يستغرب بس حياخذ عليك عطيه يومين شنو ننزلو
• سعاد ..اهاالحظه نلبس ايشرب وانجي
• عزيز ...تمام
• سعاد ....لبست ايشاربها وسقمت شكلها وزادت عطرها ووخذت معاها اكياس هدايا وطلعت هيا
• عزيز ...بحت فيها هيا وطلع هو ماسك يوسف من يده ونوسه ماسكه سعاد دقو الباب وخشو
• عزيز ...خير ياحاجه
• ربيعه ..مرحبتين مرحبتين
• سعاد ..خير ياعميمه كيف حالك وسلمت عليهابالخد وعلي يدها وراسها
• ربيعه ..وهيا باينه عليها الفرحهوحمدلله تفضلي تفضلي موده تعالي
• موده ......وهيا مبتسمه خيرات انستي
• سعاد ....اهلين الله يأنسك
• موده ..حي نوسه شن اللبسه والمشطه السمحه هذي
• نوسه ..من عميمه سعاد جاباته ليا حقيتي
• ربيعه ....سلم اعميمه ياخيه تفضلي قمعزي
• سعاد ... دام فضلك تفضلي ياعميمه ومدلتها الكيس
• ربيعه ... ليش يابتي تعبتي روحك
• سعاد ...مافيهش تعب حاجه بسيطه ومدتلها كيسووحد اخر الاخرهضا لعمي ومدت لموده كيس كبير تفضلي حاجه بسيطه
• موده ..شكرا مكانش في داعي والله
• عزيز ...كان مقمعز وايبحت فيها
• نوسه ....حي يا امي انا جابتلي الالعاب هك هك عررررم وقدت اتدير في حركه بيدها بمعني واجد
• ربيعه ...ههههههه حي حي مشاء الله
• موده ....ههههههههه عاد توه معش انشوفوك بكل معنها
• عزيز .. بحت فيهن ومابش ايعلق وين عمران وباتي
• ربيعه ...عمران في شقته اكيد شوي اخري وينزل وباتك صلي العصر وطلع
• عزيز ...اهاا انا طالع اشويه وجاي تبو حاجه وبحت في سعاد
• ربيعه ... لا سلامتك ياباتي
• موده ..خليك اشرب قهوه قبل اهو اشويه بس
• عزيز ..لا لا تو نشربها بعد انروح وطلع
• 🍃🍃🍃🍃🍃🍃🍃🍃🍃🍃🍃
• بشير ...اهااا اشويه هك وجايكن مش مطول
• بشري ...خلاص نرجو فيك
• بشير .....تمام سلام وبحت في احمد كنك اتحس في حاجه
• احمد .... لا تمام في بندول هنا والا اي مسكن
• بشير ... لا والله كنك شن اتحس
• احمد ..مافي شي يدي بس عدي توكل للمشوارك
• بشير ..شكلك تعبان وين نمشي بس وجهك حمر بكل شكلك حراره بالك يدك ملتهبه والا حاجه هات وريني بس مفروض مشيت للدكتور نضفلك الجرح
• احمد .. وهو مش قادر اايصبي مدله يده
• بشير ... حول الفاشه وبحت في الجرح لقى الجرح منتفخ لاياراجل جرحك شكله التهب صبي هيا نمشو للدكتور ضروري يبي تنظيف هضا متهزاش عليه
• احمد .. مش ضروري ارجاني هنا نمشي للصيدليه نجيب مسكن ونجيك وانت عدي للمشوارك
• بشير ...صبي امشي للمستشفي مش تاخذ مسكن قتلك ملتهب مش اكويس هك مرات يوصل للعظم وبعدين مش طايره الدنيا حتي بكرا نمشي والا بعدين
• اسامه ...السلام عليكم
• بشير ...وعليكم السلام تعال تفاهم مع صاحبك هضا بالك تقدره
• اسامه .. بحت في احمد وهو عاقد حواجبه كنك
• بشير .... بالله خليه يمشي للدكتور جرحه التهب ضروري يبي تنظيف وشكلها حتي حرارته مرتفعه
• اسامه ...يرا كله من تسكير راسك امس قتلك خلينا نمشو اينظفوه لك بس انت شي
• احمد .... وهوماسك يده و ايتألم عندك مسكن في السياره
• اسامه ... لا والله هيا صبي نمشو للعياده اينظفو جرحك ويعطوك غادي
• احمد .... معش فيها بكل شن هالالم ورن تلفونه بحت فيه لقها احلام وداره صامت ورده في جيبه سامحني يا بشير
• بشير ..تعدي يرا بلا جو وروح للحوش متجيش خليك تريح
• احمد ....تمام معنديش جهد انقاشك اصلا القصه في الحاجه توه طلعت امبدري الصبح عشان متشوفنيش
• بشير .... قوللها انجرحت طاح عليا قزاز وخلاص
• احمد ...هذا اللي يبي ايصير وقعد تلفونه ايرن
• اسامه ....هات يدك نمسكك شكلك دايخ
• احمد ..لالا تمام هيا وطلع وركبو في السياره اوووف عليك قصه ايوه
• احلام ...كنك تحس في حاجه
• احمد .... اكويس انا مافي شي
• احلام ...احمد
• احمد ... يدي بس وتوه ماشي للصيدليه يعطيني مسكن ومروح
• احلام ...تمام خلاص نرجا فيك معنها سلام
• احمد ...سلام وسكر
• اسامه ..... شن صار مع هلك امس
• احمد ...خالد انا حاكيله اصلا علي قصه علي نفس الكلام رد بالك ومتأمنلهمش وهلي طلعت بدري محقني حد
• اسامه ...ان شاء الله خير وخلاص هيا انزل وصلنا
• احمد ...نزل وخش علي الدكتور نظفله الجرح وخيطه له وعطاه مضاد ومسكن ورحو
• 🍃🍃🍃🍃🍃🍃🍃🍃🍃
• امال ....كنك يابنت شكلك تبي تمرضي والا شنو
• احلام ...لا اكويسه مافيا شي
• امال .... وهيا عاقده حواجبها ماله كنك تبرمي من امبدري شن في ومطلعتيش حتي مع خواتك
• احلام ... عادي ياماما راسي صداع بس مش جو طلوع وسوق وهنا يحكن خش احمد
• احمد ...سلام عليكم
• امال .....بحتت فيه وهيا مستغربه مرواحته وعليكم السلام كنك مروح بدري
• احمد .... لاشي غير شكلي بنمرض
• امال ...كنك شن اتحس وعقدت حواجبها كنها يدك وقدمت اتشوف فيها
• احمد... ااااه لا شي غير انجرحت خبطت في روشن مكسور جرحني
• امال ..هييي وين لقيته الروشن الل فتح يدك هك يانعليا ان شاء الله ساهله بس
• احمد .... بحت في احلام وفي امه بسيطه يااموله ماتخافيش
• امال .... عدي تريح باهي وانت ناريتك حايسه وخاشه طالعه
• احمد .... بحت في احلام وابتسم الله غالب حاصله فيا وحاصل فيها ضروري ماتعرف كني من غير مانحكي
• امال ..ربي ايخليكم لبعضكم خلاص خش تريح ياباتي
• احمد ...خش لداره ولحقاته احلام بحت فيها وضحك
• احلام....عليش تضحك توه وكشخت عليه
• احمد ...تعالي طلعيلي دبش مش قادر انحرك يدي
• احلام .... طلعتله خوذ شنو قالك الدكتور
• احمد ...الجرح ملتهب اشويه وخيطه ليا عطيني الدواء وجيبيلي كبايه حليب قبل
• احلام .... هيا حاضر غير ادبشك باهي علي ماجبته لك
• 🍃🍃🍃🍃🍃🍃🍃🍃
• خالد ...وين تبن توه
• سميه ....في محل متاع فستاين سهره في الحدائق اهو شوف عنوانه
• خالد .....والله هالنت دار فينا جميل تخشي تاخذي حاجتك وتطلعي وتروحي
• صالحه... اهاا والله في حاجات نبي ناخذهن خدمة توصيل قلت
• خالد .... غريبه احلام مجتش معاكن كنها
• صالحه ...قالت مريضه
• خالد ...امبدري كانت مافيها شي هضا المحل صاح
• سميه ... اهاا هو
• خالد ...تمام هيا انزلن وخشن وانا اندرس السياره ونلحقكن
• سميه وصالحه ...تمام ونزلن خشن
• سميه ...تعالي من هنا ومشن شوفي هضا سمح صاح
• صالحه ..اكويس بس الوانه شينات
• سميه ... شن رايك في هضا ايهبببل شكلي نبي ناخذه عجبني بكل
• صالحه ...حلو حيطلع عليك
• خالد ...ها شن صار
• سميه.... اهو مازال انتفرجو
• خالد ..باهي تعالن من غادي هنا زحمه
• صالحه .... هيا مشن الجيهه الثانيه بحتت قابلتها بشري ومروه وقفت
• سميه .... امشي كنك وقفتي
• خالد .... رفع حاجبه وابتسم وبحت فيهن بالجنب بشير شن الجو
• بشير ....اوووو خالد شن الاخبار
• خالد ....تمام
• سميه ...خيرات شن اخباركن
• بشري ...اهلين
• مروه ...خيرات شن الصدفه السمحه هذي
• صالحه ...اهلين شن اخباركن
• بشري ...كانت اتبحت فيها وهيا راقيتلها
• مروه ..شن بديتي اتبتتي شكلك
• صالحه ...اهاا والله اليوم كيف طلعنا
• بشري ...هيامروة
• مروه ..بحتت فيها ورقتلها هيا سلام انتلاقو
• صالحه ...سلام ومشن شفتيها كيف اتكشخ
• سميه .... شفتها فوتيها عليك ثقاله فيها مهضمتهاش بكل شفتي بشير كيف كان ايبحت فيك
• صالحه.... لالا مشفته اصلا مبيتش انبحت جيهته بكل يلاه خالد تخايلي انبحت فيه ويشوفني
• سميه ...ييييي عليك حصله خطيبك ياهبله بحتي مايقدرش يحكيلك اصلا
• صالحه ...فكيني والنبي منحبش الصدف اللي هك تو خالد ايفكر اني دايره موعد معاه خلاص نبي نطلع انا
• سميه ...تعالي هنا وين تطلعي المحل فيه حاجات سمحه ناخذو قبل
• صالحه ..منبيش انجوه مره اخري هيا قتلك
• سميه ..اوووف منك اطلعي قدامي خالد
• بشير ... مشا جيهه خواته مره مره ايبحت في صالحه
• خالد ..شنو خلاص
• صالحه ...رفعت اعيونها لقت بشير ايبحت فيها ارتبكت اهاا معجبنيش شي
• خالد ... تمام هيا اطلعن وبرم علي بشير وشيرله بيده وطلعو
• 🍃🍃🍃🍃🍃🍃🍃🍃🍃🍃🍃🍃
• عند الحاجه مبروكه ......
• ايوب ....شن الجو
• ايه ....اهلا غريبه مروح بدري
• ايوب .....بدري من عمرك الساعه قريب تسعه وين البدري في الموضوع وين امي
• ايه ...تصلي في العشاء جوا
• ايوب ..اهاا
• وصال .... ايه تعالي تبيك دانا وخشت عليهم ايوب امتي جيت
• ايوب ....لاحول الله كنكن يعني هذا لك عشان روحت توه
• وصال .... هههه لا مش هك استغربت بس
• ايه ...كنك اتضبحي
• وصال .... تبيك دانا هاكي
• ايه .... كنها ماكلمت علي فوني
• وصال .... امسكي من امبدري ترجا
• ايه ...هاتي ايوه اهلين وطلعت من يلاهم
• وصال ... بحتت فيه انديرلك عشاء
• ايوب ...لالا نبي فنجان قهوه بس ديريها مره
• وصال ...تمام هيا برمت تبي تمشي
• ايوب .....كلمتو سعاد اليوم
• وصال ..اهاا اكويسه قالت تسلم عليك وبرمت تبي طلع
• ايوب ... اهاا وبحت فيها بتمعن وضبح وصال
• وصال ....سكرت ايديها بالقوه نعم
• ايوب ....نبي نسألك يعني دانا مخطوبه والا لا
• وصال ....
• اية .....
• يتبع .......
• بقلمي ...أحلام
