رجعتلكم ورح نختصرلكم شوي
منار وجدت روحها للعشاء طبعا بعد مابعثلها امجد خبيرة ازياء و ميكآب ارتيست
رجعوها تهبل
في جهة اخرى مدام فريدة وزوجها يوجدو للعشاء وحسام معاهم يعاون
حسام : خالتو فريدة حاب نطلب منك كلب
فريدة : اطلب عيوني
حسام : معليش نجيب معايا حبيبتي للعشاء !
فريدة : غالي والطلب رخيس فرصة هايلا نتعرفو على لي دات قلبك
حسام : ميرسي خالتو فرحتيني
في جهة أخرى شفاء وجدت روحها لبست اونسومبل كلاسيك سروال وفاست نوار مع صباط طالون فار و بوشات كوتشي فار وعملت شعرها كود شوفال و طبعا رحيم لبس كوستيم زادو رونق على رونق
شفاء : خموس وجبريل على حبيب قلبي وروحي هاهو وجهي إذا ماعشقوكش كامل بنات دزاير كي يشوفوك .
رحيم : انت لعيونك عسل يا امي تو نا عندي مرا حلوة فدار كيفك و نخزل لبنيات تي انت القمر ياقلبي
شفاء: شوفو شوفو الستوت كي رآه يكلخلي نشوفك كي تتزوج لما نستنيش ههههه
رحيم : تي ننسى العالم الكل ماعداك ياروحي ،
وعنقها تعنيقة كبيرة تعبر على مدى تعلق تاعو فيها وحبو لكبير ليها
نروحو عند حسام
حسام : الو هالة توحشتك
مريم : اهلين حسام .. اااا ه تتوحشك الصحة
حسام : برك !
مريم : حتى انا تتتتت توحشتك
حسام : اااااااااااااه قلبي يايما ارواحي طلب على قلبي
مريم : شششششت فضحتنا متعيطش
حسام : ليوم عارضيني جماعة للعشا ورح تروحي معايا نص ساعة ونجيك نلقاك بأحلى حلة بيززوووو
غلق الخط
مريم : ككك كفاش وشبيه هذا آلو الو الو كوبا في وجهي كيفاش ندير اعععععع قلي بيزو 😍😍 نروح نوجد روحي
عند منار
منار : 😱😱😱😱😱 وااااو مستحيل تكون هذي انا
ريم (خبيرة لمكياج): مشاء الله عليك تهبلي ، باين مسيو أمجد يحبك بزاف وإلا علاه يوجدك كامل هاك ويخسر عليك دراهم
سلمى (خبيرة موضة): وي باينا اصلا مسيو امجد اول مرة يطلب منا نوجدو بنت بهذا الاهتمام لكبير باينة نتي مهمة بالنسبة ليه
خلاولها ذو الجمل وراحو
قعدت على سرير
منار: ههه احي عليا ،كون تعرفو بلي هذا شي كامل يدير فيه باش يتهنى من خطيبتو وغير يفسخ الخطوبة تكمل خدمتي هنا للأسف مش اي حاجا تشوفوها معناتو واقعية ،
ياعمري على انا خرجت نهوووووبل
أمجد وجد روحو وهبطو الخدام لتحت يستنى في منار
هبطت منار بروبة ماغو كروازي فصدر عريانة فظهر طويلة وجايا سيغ طاي ومشلوقة فجيهة وشعرها مطلوق ومحكوم فجيهة باكسسوار فدوغي وصندال دوغي مع سلسلة قصيرة فرقبتها
هي هابطة وعينين أمجد وساعو جامي تخيلها تخرج بهذي الأناقة شوي مكياج رجعوها بوبية شوي على شوي بدأ يفهم مشاعرو بصح مش حاب يستعرف
تكاكا أمجد على روحو وهبط عينيه كملو مشاو للوطو و قلعو لدار فريدة
نروحو عند فريدة لي راحت تفتح لباب لشفاء ورحيم
غير فتحت لباب عنقت شفاء بكل قوتها شحال متوحشتها صحبتها و خت راجلها شفاء تان ضمتها
فريدة رحبت بيهم
فريدة: اهلا اهلا نورتو تفضلو
زوج فريدة : اهلا شفاء مش معولة تضمي خوك
شفاء بلبكى : توحشتكم
وراحت تجري عنقاتو تنح فالشوق لي مخبياتو من سنين
ورحيم قاعد غير يتفرج اول مرة يشوفهم ويتعرف عليهم
قعدو كامل
فريدة : شفاء ماعرفتيناش على الشباب هدا لي حداك
زوج فريدة : متقوليليش تزوجتي ههههههههه
شفاء : ههههه نعرفكم ولدي رحيم
فريدة : 😱
زوجها : 😶😐
رحيم : انا رحيم تشرفت بيكم
فريدة : كككفاه انت زدتي ولدتي ! مشسشسش
شفاء : ولدي مي مولدتوش انا
رحيم مهبط راسو ويسمع
زوج فريدة : مزال مافهمتش
شفاء : رحيم تبنيناه انا و منذر جبناه في عمرو سبع سنين وهو ولدي حتى وكي راح منذر انا بقيت مربياتو وكبرتو و صار طبيب قد دنيا ربي يحفظهولي 😌
زوج فريدة : مشاء الله
فريدة : ربي يحفظه
في هذي الأثناء دخلت شيرين ومراد ومعاذ
شيرين جرات عنقت ختها و معاذ قعد يتعرف على ولد خالتو وهوما يحكو ومقصرين حتان دخل حسام ومريم
فريدة : مرحبا بحسام هههه صح قتلي بلي شابة مي ماتوقعتهاش لهذي درجة مشاء الله تهبل
مريم : هذا من ذوقك طاطا
فريدة راحت دخلهم ومريم همست لحسام علاش جبتني هنا دوك يعرفوني
حسام حكمها من كتافها وقال : وانا حابهم يعرفو مش حنحمل تبقاي معذبة وانا معذب كي نشوف حالتك جا الوقت لي يعرفو فيه كلش ونقدر نكون معاك قدام كامل ناس حكملها يدها ودخلها
فريدة : نعرفكم حسام صاحب امجد وعشيرو راكم تعرفوه في صغرو وحبيبتو ... وش اسمك
مريم : مريم
حسام : هالة
فريدة بإستغراب : مريم ولا هالة
مريم : هههه هالة ومريم في زوج
فريدة : ههههه مرحبا هالة
شيرين تخزر وساكتة ومراد القهوة خرجت من نيفة
شيرين : حبيبي تفضل كاس ما وهمستلو ماتبينش خلينا نشوفو لحكاية وين ماشية
معاذ مستغرب مريم كفاش صار اسمها هالة وش لي تبدل ومن ويكتا حبيبة حسام وماقالتلناش بقى ساكت والأفكار تدي فيه وتجيب
أما شفاء عينيها ماتنحاوش على مريم كأنو تعرفها قلبها يدق بلقاوي و وجها جا ألوان وراح ألوان
فريدة : مشاء الله مريم تهبلي عندك شبايه من شفاء
مريم سمعت كلمة شفاء وهي نتبهت انو يماها من الحاضرين و طاحت العين في العين مريم عينيها ترغرو ماقدرتش تحكي حتى ورحيم شلق بأمو مش على بعضها
حسام حب يبدل الجو ودخلهم في حكايات يقصرون عليهم
وهوما شايقين فالهدرة وصلت لوطو قدام الفيلا وي وصل أمجد ومنار منار هبطت وأمجد هبطو الخدام وقعدو فالكرسي المتحرك منار تراقب فلخدام كفاش جبد عصى ومدها لأمجد
منار : سي أمجد وش هذا
أمجد : دوك تشوفي
حكم أمجد هذيك العصى و الخدام عاونو باش ينوض و أخيرا أمجد ناض على رجليه وخطر زوج خطوات بمساعدة العصى ودار لمنار لي باهتة
أمجد : مفاجأة
منار حالة فمها و تخزر مش مصدقة لي تشوف فيه
أمجد : علابالي راكي تقولي كفاش و وقتاش حكاية طويلة مي لازم تعرفي بلي نتي لي ألهمتيني باش نعالج وباش ترجعلي الحياة ونحبها كيف ما كنت
منار ماصدقتش وش رآها تشوف وتسمع طاحو دموعها وراحت تجري عنقاتو مش عارفا علاه مي احساسها خلاها دير هاك
بعد ماعنقاتو فاقت مع روحها و بعدت جاو داخلين حكملها يدها خزراتو بإستغراب
أمجد : تفاهمنا بلي تمثلي حبيبتي ولا نسيتي
منار تفكرت : اه وي تفكرت ايا نفوتو
دخلو بكل وهرة فريدة تعيط وتبكي: أمجججججد
كفاش ويقتاش ياعمري على ولدي وراحت تعنق فيه هي وباباه
ناض حسام يضحك و يصفق و شيرين فرحانة انو أمجد واخيرا رجع يمشي
الكل كان مصدوم و فرحان أما شفاء فرحت وقلبها وزير أكثر
أمجد : حبيبتي وروحي و عمتي الغالية شفاء مش ناوية ترحبي بيا ولا مش متوحشتني
ناضت شفاء : خليت لنفسي آخر من يعنقك باش يكون عناق طويل كشما ينسيني في شوقي ليك
عنقاتو وباستو وحمدتلو على سلامتو عبرت على فرحتها انو رجع يمشي
الجميع قعد وكل واحد تخمامو وين
أمجد : نعرفكم على منار حبيبتي وعن قريب خطيبتي ☺️
منار : ☺️😐
فريدة بفرحة : كنت حاسة بلي كاين حاجا بيناتكم فرحتلكم حبيبي
أمجد وهو حاكم يد منار : يعيشك بما الحبيبة
كامل باركولهم ماعدا مريم و اب أمجد
أمجد : بابا مش حاب تقول حاجا
اب أمجد : وداليا كيفاش ، انا فرحتلك مي ماننساش رآها بنت عمك
أمجد : الخطوبة رح تتفسخ منيش مرغم نتزوج بكرا منحبهاش وباس يد منار حاب مرا نحبها و توقف معايا و تحبني وماتتخلاش عليا كيما منار
شفاء : انا معاك اياك انك تتخلى على حبك لأنو الحب يجي مرة وحدة وإذا خسرتو مش رح ترجع طاحت دمعة من عينها جرات مسحتها
أمجد : على ذاك انا قررت اني نفسخ الخطوبة ونعيش على جال روحي مش رح نرضي اي انسان
شيرين : احسن ماعملت
معاذ : انا معاك ولد الخال
حسام : عرسي وعرسك رح يكون فنهار ههههه
معاذ : وعرسي نسيتوه ههههه
شفاء : هههههه ماتتزوجوش حتان نخطب لرحيم ونديرولكم عرس جماعي هههههههه
اب أمجد : هههههههه ماتنساوش انتحار خونا فيه العرس هههه إذا سمعوا بالحكاية منعرف وش يصرا
فريدة : خلينا من ذا الموضوع طابلة العشاء واجدة تفضلو
ناضو لطابة وبداو يأكلو
منار : طاطا مشاء الله طيابك يهبل يعطيك الصحة
فريدة : يعيشك بنتي .
اب أمجد : كفاش عرفتي انو هي لي طيبت يعني بلاك كانو لخدم .
منار : ههه المرأة تبان من طريقة كلامها وتصرفاتها ايلا تعتمد على الطباخين ولا نو وانا من شوفتي ليها فهمت انو هي إنسانة مسؤولة مش لي تخلي زمام أمور بيتها للخدم
شفاء : وانا معاك فهذي الهدرة نعطيك مثال مرت خويا لآخر متدخلش لكوزينة ومعندهاش مسؤولية اتجاه دارها وراجلها عكس فريدة تماما
حسام : منار تفسيراتها دائما صحيحة حتي هي كانت سبب فأنو أمجد يرضى يتعالج
أمجد : حساام سكتنا
شيرين : علاش يسكت خليه يحكيلنا كفاش رضيت تتعالج
مراد : كامل علابالنا بلي كنت ضد العلاج مادام قنعاتك بحاجة كامل ناس مقدرولهاش معناتو تحبها
أمجد حكم منار من كتفها خاتش كانت قاعدة مساميه وقال : العاشق يفعل المستحيل
كامل ضحكو عليه إلا شفاء خزراتو وقالت : ولا يتخلى على هذا ماتتخلاوش على بعض نصيحة مني ابقاو مع بعض للأبد
كملو ماكلتهم ورجعو لصالون وقعدو ساكتين مي كسر سكوتهم شفاء كي قالت : مريم ماسمعتيناش صوتك
حسام ناض يصفق : نحب الجميع يسمعوني ملييييح مليح عندي خبر مهم خاصة ليك خالتو شفاء
شفاء بإستغراب وش هو الخبر
راح نوض مريم وحكمها من يدها انا حاب نخطب هالة تقبلي خالتو شفاء !
هالة تبكي وشفاء تبسمت وقاتلو : هههه قصدك انا نروح معاك لدارهم نخطبهالك
حسام : لا خالتو انا حاب نخطب هالة منك
شفاء : مافهمتش
حسام : هالة بنتك لي هربت قبل سنين هاهي قدامك
شفاء طاحو دموعها : وشراك تقول حسام
حسام : كيما سمعتي خالتو وهذا الشي لي خلاني نجيبها معايا للعشا خلاص وهي هاربة خلاص وهي متعذبة وحدها وانا متعذب من شوقي ليها
شفاء : هالة قولي الصح نتي بنتي ؛! 🥺🥺
هالة قوات فلبكى ورفعت على يدها و وراتلها وحمة على يدها
شفاء شافت لوحمة راحت تجري عنقتها وتبكي
شيرين مع مراد : شفت علاش قتلك غدوة يذوب الثلج ويبان المرج علابيها محبيتش ندخل روحي
مراد : وانا قلت علاش شيرين مدخلتش روحها ظهرتي خممتيلها
شيرين : اكيد
شفاء قررت تدي معاها هالة ويبداو من جديد
منار فرحت كي صحبتها لقات أهلها مي بقات غايضتها أنها ماحكاتلهاش على أهلها على هروبها على علاقتها مع حسام حست بالخيبة وقررت تجبد منها
وصل نص ليل وقرر الجميع يروح لدارو حتان يدخل شيباني بكل وهرة بعصاه لابس كوستيم و ساعة بجيهة في جيبو وداير نواظر مدورين و شهرو ماكاو شيب ولحيتو بيضة ثلج
عباس : واش ولادي وليتو تحتفلو وديرو عزومات بلا بيا
يمشي ويتركز على عكازو باين صحتو مش مليحة
عباس : ولاو يجوني خباركم من عند الغرباء ، انا لي كبرتكم انا لي درتلكم هذا الخير
اب أمجد : شفاء هنا علابيها محبيناش نقولولك شيخ بابا
عباس : اسكت ماتمدليش الأعذار
تقدم أمجد لجدو وباسلو بدو
أمجد : جدي بديت نمشي شوف جدي وليت نخطئ خطوات
عباس عنق أمجد وقلو : كنت نعرف انك قدها وقدود انت الوحيد في عايلتي لي تستاهل وعندك هدف فالحياة
شفاء مهبطة راسها ومخبية هالة مور ظهرها
شيرين ومراد قدموا سلمو عليه ومعاذ وحسام ومنار كيف كيف وفريدة تان
عباس : واش ياشفاء ماتسلميش عليا ولا مزال قلبك حاقد عليا
شفاء : هذا السؤال موجه ليك لأنو انا عمري ماحقدت انت لي حقدت وعذبت
عباس قعد بكل حيل مهدود وتعب ويحكي بغصة : بنتي انا غلطت وغلطتي كبيرة بصح كنت نخمم فمستقبلكم كنت نحسب هذا الشي هو الصحيح ليراني ندير فيه بصح عرفت بلي كان غلط ولكن بعد فوات الآوان فقت سامحيني بنتي ونوعدك رح نعوضك والأسرار لي كنت مخبيهم رح نقولهملك كامل خاتش العمر مش دايملي وانا مابقاليش غير الما يحمى نحوس نصفي ذمتي
شفاء راحت عنقاتو وشما ريحتو شحاااال عندها ماضماتوش ماشمتش ريحتو تبقى هي بنتو الصغيرة المدللة من صغرها واحب ابنة ليه
شفاء : وش هوما الأسرار لي مخبيهم !؟
.
.
.
.
.
توقعاتكم فالحلقة القادمة وفي رأيكم وش هو السر لي متخبي من سنين
أنت تقرأ
أحببت مريضي
Storie d'amoreعندما ترغمك الحياة على البكاء لايبقى لك مجال للابتسامة ، يقال في قانون الحياة لايجتمع قلبان من دون حب ولا يحق للمعاق ان يُحَب ولا الفقير ان يُحِب الحياة ترغمك احيانا على مواقف لا تريد الخضوع لها ولكن عندما لاتكون لك أسرة تحميك فلا مجال للهرب ومن نا...
