Sunflower: always long for only one.

_1_That day love was not found. It found me.

သူ့ဆီကို ကျမက သွားခဲ့တာမဟုတ်ပဲ သူက ကျမဆီကို ရောက်လာခဲ့တာပါ။ မပျော်ရွှင်တတ်တဲ့ ကျမဆီကို ပျော်ရွှင်ခြင်းတွေ သယ်ပိုးပြီး သူက ရောက်လာခဲ့တာပေါ့။ ဟိုးအဝေးကြီးကနေ.... ကျမတို့ မြို့ကလေးဆီကို... ပါပါးရဲ့ကော်ဖီဆိုင်လေးဆီကို..... ကျမဆီကို.... သူကပဲ အရင် လာခဲ့တာပါ။ ကျမက ဖိတ်ခေါ်ခဲ့တာမဟုတ်ပါဘူး။ သူကိုယ်တိုင် ကျမကမ္ဘာငယ်လေးဆီ ဝင်ရောက်လာခဲ့တာ။

🌻🌻🌻🌻🌻

သူမအသက် ၁၁နှစ်။

" နေကြာ.... ဟေ့.... သမီးရေ.... "

နေကြာ.... လောကကြီးထဲ ကြာကြာနေရအောင်လို့ နာမည်ပေးခဲ့တဲ့ နေကြာ။

" သမီးရေ.... "

ဆိုင်ထဲကနေ လူတစ်ယာက် ထွက်လာကာ ကလေးမငယ်လေးရှိနေသည့်နေရာသို့ ရောက်လာသည်။

" ပါပါခေါ်နေတာကို.... မကြားချင်ယောင်ဆောင်နေတယ် "

" မီး... ပုံဆွဲနေလို့.... "

ဆီမလိမ်းရသေးသည့် ဆံနွယ်လေးများက လှိုင်းထကာ လည်ဂုတ်နားမှာ ဝဲနေကြသည်။

" ဘာပုံဆွဲတွေနေတာလဲ..... "

သူမက မြေကြီးပေါ်မှာဆွဲထားတဲ့ပုံကို တုတ်ချောင်းနဲ့ ခြစ်ပစ်လိုက်ပြီး....

" ဘာမှ မဟုတ်ပါဘူး.... "

" ဟုတ်လား..... အင်းပါ။ ထမင်းမစားသေးပဲ ပျောက်နေလို့.... "

မကြည့်စေချင်လို့ ဖျက်လိုက်တာကို သိပေမယ့် သူ တစ်ချက်ကြည့်လိုက်သေးသည်။

" မစားချင်သေးလို့.... "

" မစားချင်သေးလို့ မရပါဘူး.... မနက်ကလည်း ဘာမှမစားပဲ... "

ဝေါ.....

သားအဖနှစ်ယောက် စကားပြောနေတုန်း လမ်းကလေးထဲကို အိမ်ထောင်ပရိဘောဂများ သယ်ဆောင်လာသည့် ကားတစ်စင်း ဝင်လာသည်။

" အိမ် ပြောင်းလာတာလား မသိဘူး "

နေကြာဆိုသည့် ကလေးမကလေးကတော့ လမ်းထဲရောက်လာသည့်ကားက သူမနှင့် မဆိုင်သလိုမျိုး ခေါင်းငုံ့ကာ မြေကြီးကိုပဲ ကြည့်နေခဲ့သည်။ ကားက သူတို့ဆိုင်ရှေ့က ဖြတ်သွားတော့ လေဟပ်ကာ သူမရဲ့ ဆံနွယ်ခွေလေးများက လေထဲမှာ လွင့်ပျံသွားကြသည်။  ကျောက်တုံးကြီးတွေ စီထပ်ကာ ကာရံထားသည့် ကုန်းမြင့်ပေါ်က အိမ်လှလှလေးရှေ့မှာ ကားက ရပ်သွားသည်။