Pastel Colours [Myanmar Translation]

Chapter 1 [Unicode]

Day 01 17:08

စုန့်ရန်ဟာ ကလေးရုပ်စုံစာအုပ်တွေ ရေးဆွဲသူဖြစ်တယ်။

ဒီအလုပ် စလုပ်တဲ့အခါ ငယ်ရွယ်စဥ်မှာ ကြိုးကြိုးစားစား အလုပ်လုပ်မယ်လို့ ရည်ရွယ်ပြီး S မြို့တော်ကို ပြောင်းခဲ့တယ်။ နှစ်အတော်ကြာရုန်းကန်ခဲ့ရပြီး နောက်ဆုံးတော့ သူဟာ စာအုပ်တိုက်အချို့နဲ့ ရေရှည်စာချုပ် ချုပ်ထားနိုင်လာတယ်။ သူ့ရဲ့ လုံ့လရှိမှု၊ ယဥ်ကျေးမှုနဲ့ အချိန်တိကျမှုတွေကြောင့် အယ်ဒီတာဌာနက အန်တီတွေနဲ့ အစ်မတွေက သူ့ကိုအရမ်းသဘောကျကြတယ်။ သူတို့က သူ့ကို သားအရင်းတစ်ယောက်လို သဘောထားကြပြီး ဒီအလားအလာကောင်းတဲ့ လူငယ်လေးအတွက် ချစ်သူကောင်မလေး ရှာပေးချင်တယ်လို့ မကြာခဏပြောတတ်ကြတယ်။ သူကတော့ အမြဲတမ်းရယ်မောပြီး အဲ့လိုလုပ်ပေးဖို့မလိုပဲ အရာအားလုံးကို သဘာဝအတိုင်းဖြစ်လာတာမျိုးပဲ သဘောကျတယ်လို့ ပြန်ပြောလေ့ရှိတယ်။

အဖြစ်မှန်ကတော့ နည်းနည်းဟာသပဲ။ တကယ်တော့ သူက ဂေးတစ်ယောက်ဖြစ်နေတဲ့အတွက် တခြားမိသားစုရဲ့ အပြစ်ကင်းတဲ့ သမီးတွေကို ဦးမဆောင်နိုင်တာပဲ ဖြစ်တယ်။

စုန့်ရန်ရဲ့ လိင်စိတ်ခံယူချက်က မွေးကတည်းက ပါလာတာမျိုးဖြစ်တဲ့အတွက် ပြောင်းလဲဖို့မဖြစ်နိုင်ဘူး။ ဒီကုန်လွန်ခဲ့တဲ့နှစ် နှစ်ဆယ်ကျော်မှာ သူ့အတွက် အချစ်ရေးတစ်ခုတည်ဆောက်ဖို့ အချိန်မရှိခဲ့သလို တစ်ယောက်ယောက်ကို အမှန်တကယ် သဘောကျမိတာမျိုးလည်း မရှိခဲ့ဖူးဘူး။ သူ့ရဲ့ နွေဦးအိပ်မက်တွေထဲမှာ သူ့ကိုဖိထားတဲ့ ချွေးစက်တွေနဲ့ မှုန်ဝါးဝါးသဏ္ဍာန်ဟာ တင်တွေ ရင်တွေ မရှိနေခဲ့တာကိုတော့ သူ အကြွင်းမဲ့ သိရှိတယ်။

တစ်ကိုယ်တော်စုန့်ရန်လေးမှာ အခုထိလက်တွဲဖော် မရှိသေးပါ။

သူ S မြို့တော်ကို ရောက်ကာစက ရထားပေါ်မှာ လက်ချင်းတွဲထားတဲ့ လိင်တူစုံတွဲတစ်တွဲကို တွေ့ခဲ့တယ်၊ သူ အဲ့ဒီတုန်းက ဒီ S မြို့တော်ရဲ့ ဂေးအသိုင်းအဝိုင်းက တခြားလူတွေဟာလည်း ဒီစုံတွဲလိုပဲ သာမန်အတိုင်း ပွင့်ပွင့်လင်းလင်းနေကြလိမ့်မယ်လို့ အထင်မှားခဲ့မိတယ်။ အဲ့ဒါကြောင့် သူသတ္တိမွေးပြီး တစ်ညတာအဖော်ရှာဖို့ ဂေးဘားတစ်ခုကို သွားခဲ့ပေမယ့် မလုံ့တလုံဆွဲဆောင်တဲ့ အဝတ်အစားတွေနဲ့ တပ်မက်မှုအငွေ့အသက်တွေ အပြည့်လွှမ်းနေတဲ့ ပတ်ဝန်းကျင်ကြောင့် ထွက်ပြေးခဲ့ရတယ်။ အဲ့ဒီကတည်းက ဒီလိုနည်းလမ်းနဲ့ အဖော်တစ်ယောက်ရှာဖို့ စိတ်ကူးကို သူ လက်လျှော့ခဲ့တယ်။