ظلموني و بكاو عليا قصة ليلى " باللهجة الجزائرية "

2

#من_صفحة_هنا_نحكي_حكايتي
#ليلى
#الحلقة_2
قتلكم فتحت يمينة الساشي صابت كسوة تاع بيبي صغير و في وسطهم تريكو صغير مربوط زدنا فتحناها صبنا ذهب  خاوتم و سلاسل و براصليات نخلعنا بدينا نفيبرو نشوفو في بعضانا و فالشوفار سكتنا دارتهم يمينة فالصاك و بقينا ساكتين و قاتلي بلعي فمك متهدريش احنا صبنا مسرقناش
المهم قبل ما نوصلو لدار قاتلو يمينة حبسلنا هنا نسكنو غير هنا (كذبتها ) ....جيت نهدر قرصتني قتلي سكتي ....المهم هبطنا و خلصاتو ..وعاود رجع قتلها علاه حبستي هنا نعاودو نكرو ثان طاكسي قاتلي نورمال قاتلي كون ديناه لوين يسكن باين يعاود يرجع و يحوس علينا ...قتلها وكيفاه نديرو لهذ الساشي قاتلي مشفناش و مديناش ....صح تاع ربي غرتني ذيك الساشي و رحت معاها فالخطة ..قاتلي نكملوها مشي ...شرينا قرعة ما رحنا نمشو قاتلي شوفي علبالي بلي ضروك يبرطجوها فالفيس و يحوسو على هذ الامانة قاتلي بلاكي تزلقلك كلمة قاتلي هذي هيا فرصتنا باه نفتحو حانوت في رحبا ...قاتلي وساشي نخليها عندي انا ندسها و كي نعرفو بلي مكان والو رانا نديرولها حل المهم وصلنا لدار صبنا خوها عند الباب قاعد قلنا مالكم شفتكم جايين تمشو من بعيد قلنالو مصبناش النقل قلنا كيفاه جيتو قاع المسافة تمشو قاتلو لالا جبتنا وحد الاستاذة كانت تقري ليلى مع رجلها تسكن ف (.....) حطتنا ف(....) وكملنها مشي ....سكت مجوبناش ايا دخلنا لديارنا .....ومبديتش كامل حاصية راسي و لي يحكي معايا منجاوبوش بديت ميتة بالخوف و نضل فلنترنات نحوس نقول بلاك ضروك نصيب كاش سطاتي يحوسو على هذ الذهب ...المهم فاتت يومين على الحادثة قعدنا نتعشاو حتى جاو خاوتي لي خدامين فالقراج جاو روطار قلهم بابا ماشي من عوايدكم تجو روطار قلولو اودي لابوليس اليوم قلبو البلاصة الفلانية بالتحواس ( نفس البلاصة لي هبطنا فيها الطاكسيور ) ..قلهم علاه ..قلو خويا الكبير راهم يقولو زوج شيرات سرقو  ذهب من عند وحد المرا فالبلاصة الفلانية و جاو هبطو ف بالبلاصة الفلانية لي رانا خدامين فيها  و مصبح هوما يسقسو عليهم ...انا خلاص لسقتلي و فشلت باينة سقساو الحانوت لي شرينا من عندو القرعة تاع الما ....كي كملنا العشا غسلت ماعيني و قلت لماما ني رايحة عند يمينة نجمع شوية ..قاتلي روحي ...رحت نجري خبرتها ..قاتلي واش قتلك فاللول قتلك مشفناش و مسرقناش و معرفناش ....قاتلي قاع ويلا شفونا نزلنا فهذيك البلاصة قال ايه نزلنا خفنا من الشوفار بدا يهدر هدرة عيانة نزلنا قاتلي ساهلة ..ويلا سقساونا على الساشي مشفناش ......قاع هذ الشي و خفت ....المهم الصباح عيطولي تاع المعهد قالولي نورمالو راهم كاينين بلايص ايلا تجو تسجلو قلولي جيبي صحبتك و رواحي .......رحت خبرت يمينة و رحنا ..كي وصلنا صبنا مول طاكسي ثم عند الباب و طومبيل تاع لابوليس مقبلتنا ووفيها شوفار ...فشلت ...مت ...الدم حبس فيا ...قتلها نرجعو ...قاتلي وين ترجعي كملي بلاعني خلاونا نشوفو الطومبيل تاع لابوليس باه نخافو و نهربو و يعرفو بلي حنا لي دينا الساشي .....قاتلي شوفي بلاكي بلاكي تتبنيكاي هدري عادي و كيما قتلك جينا نسجلو مصبناش النقل ركبنا فالطاكسي و مول الطاكسي مكانش محترم روحو خفنا منو نزلنا فالبلاصة الفلانية شرينا قرعة ما و كملنها مشي وبلاكي يهفوك بكاش قضية نهدرو كيف كيف ....#يتبع