ظلموني و بكاو عليا قصة ليلى " باللهجة الجزائرية "

11

#من_صفحة_هنا_نحكي_حكايتي
#ليلى
#الحلقة_11
قتلكم رحت نعقد كي وصلت للبلدية بقينا نستناو فيهم يجو وحد شوية حتى جاو ونزلو مطوبيل ..حتى نشوفهم ينزلو  في واحد فلول بقيت حايرة شكون هذا ...حتى نزلت ليا زهيرة و قدمت لوذني و قاتلي اا ليلى هذا هو راجلك ....هنا كانت الضربة القاضية و اهنا كملو عليا و تفيكسيت في بلاصتي ...السيد معاق من رجليه لزوج كي شغل مشيتو انوغمال ...عمري وحياتي لا تخيلت نوصل لهذ المواصيل ...تعمرو عينيا بالدمعة و شفت في بابا حتى هو عينيه معمرين بالدمعة نشوف وونهزز في راسي كي شغل راني نقلو لالا متدمرنيش متريسكيش ...قدم ليا قلي بلاكي ديري جاست عيان نتبرا منك دين ودنيا حافظي على وحد شوية تاع احترام بيني و بينك ....حسيت روحي في منام منيش مأمنة ....حطوني في موقف مهوش متوقع اطلاقا يا تديري برايك و تعيش الحرية وتخسري لاخرة  و يا ديري براي والديك و طيعيهم و تربحي لاخرة وتعيشي الميزيرة فالدنيا...خلاص مقدرتش ..ومعنديش حتى الوقت باه نخمم ...كي وصل عندي اقسم بالله ما قدرت نشوف فيه ..الله غالب يا لبنات الله غالب متقولوليش نورمال هذا اول لقاء بيني و بينو باينة ردت فعلي كي دايرة ....دخلنا للبلدية و ماني شايفة و الو خلاص غمامة على عيني ..مجيت نشد ذاك الستيلو و نسنيي على حياتي حتى عمري خرجت ...سنييت و ليت مارتو شرع و قانون ...خلاواني وحدي انا ويا هو يهدر معايا وانا مدورة راسي مقدرتش نشوف فيه ....رجعنا لدار ما بكيت ما والو ..رجعت و فاقدة لذة الحياة كي نزلت مطوبيل و دخلت لدار رحت نيشان عند يما قتلها عندي اخر طلب في حياتي وولازم يطبق ...يما سكتت عارفتني بلي خلاص لحق لغاز لراس ...قتلها مكاش عرس خملولي قشي و سرحوني نروح نسمع زغريدة اقسم بالله غير ندلكم تبهديلة ....ليلة عرسي جات جدة و خلاتي و عماتي و بناتهم دارو عشا خفيف هوما ياكلو و انا حاقدة عليهم كامل ....قلت لزهيرة غدوا مكاش لي يروح معايا من غيرك انتي و يما ومنعاودش الهدرة ني درت برايكم ضروك لازم عليكم ديرو برايي .....مع 12 جا الكورتاج ....بغاو بنات خالتي يروحو معايا بصح قتلهم و الله ما تروحو .....رحنا ووحاسة روحي رايحة لجهنم  بلاك يوم وفاتي اهون من هذ اليوم ...المهم رايحين حتى نحس بطوبيل تتعجر و تطلع و تهبط وانا مغمدة بذاك البرنوس ..عرفت بلي يسكنو على برا و طريق لا اله الا الله محمد رسول الله ...جاتني عادي خلاص معادش يهمني ...ااه يا لبنات كي وصلت ونزلوني .....#تصبحون_على_خير....لسا ما بدينا مع فطوم مش حتقدر تغمض عينيك