#من_صفحة_هنا_نحكي_حكايتي
#ليلى
#الحلقة_7
قتلكم صباح جاو يجرو ليا خواتي قلولي وين راهي يمينة مع رقاد خلعوني نضت نرجف وبقشي تاع الرقاد وبديت نقلهم واش راكم تهدرو شكون ذي يمينة ...قلولي يمينة وين راهي هاتي تالفونك ...حاصروني فالكوان تاع الشومبرة دخلو قاع عندي فالشومبرة حتى يماها ودخلت عليا و انا ماني فاهمة والو ..وهوما يقلبو فالتلفون ...وبدا خويا الكبير يقلي هدري نطقي علبالك بلي رايحة تهرب ...نخلعت ...وانا نبكي و نقلهم و الله ماعلبالي عندي شعال مهدرتش معاها ....كل ما نجي نهدر يضربني بكف و كانت اول مرة يمدو يدهم عليا ....مخلاونيش قاع نتحرك ..داو تلفون تاعي ووبداو يعيطولها بصح والو مغلوق .....راحو نوضو طومبيل خاوتي و خواتها وراحو يحوسو عليها ....وانا بقيت في شومبرتي ...جات ثان يما عاودت حكمتني من شعر و جرتني للكولاوار قاتلي اهدري صحبتك و تعرفيها معاكن كانت تهدر باين عندها واحد تهدر معاه ....بديت نعيط لربي لي خلقني منيش موالفة الضرب بديت نقلهم اااي و الله معلبالي منيش عاااارفة مكانتش تحكيلي ...(صح مكانتش تحكيلي كانت تهدر مع واحد بصح منعرفوش وديجا كانت تحكي مع بزااف لبنات كي راني نحكيلكم عل يمينة هاك متتخيلوهاش كلوشارة بلعكس انسان اية فالجمال شابة بزاف على ذيك بطلوها خوتها بكري من القراية كانت دير المشاكل ) ..المهم طلقتني يما و عاودت رجعت ليا يمات يمينة تبكي و تحلل و تقولي ا ليلى بنتي ها خمي فيا واش يقولو ناس علينا انا ضروك تصرالي تبهديلة و الغاشي قاع يسمع ...وانا نقلها اخالتي و الله و الله معلبالي ....المهم رايحين و جايين يسقسو فيا ....ذاك نهار ضلينا هاكك و بابا قاع مهدرش راح صباح مزادش رجع حتى للعشية ....المهم حتى العشية باه جاو لي راحو حوسو عليها قلولنا بلي سقاسو عليها قاع فالمحطات و صحاب طاكسيات بصح والو ....مكاش لي شافها ....يماها مرضت داوها ديراكت لسبيطار و انا لي يفوت يبزق عليا ...والقصة تفضحت و لاو الغاشي يعيطو لحبابهم و معارفهم هاك و هاك بلاك يلقاوها ..راحو لابوليس قلولهم راهي كبيرة و مفاتش 24 ساعة منقدروش نحوسو عليها ...احنا في ذيك الحالة حتى جا السيد مع ختو صحاب الذهب ...قلولنا من تالي علبالنا واش صرا و هذ لي تثبت بلي هي لي دات الذهب احنا معلبالناش بيكم ...قلهم بابات يمينة واش خصكم ضروك كي عرفتو بلي هربت قلهم روحو لابوليس و يلا حكمتوها دوها و شرحوها ...بصح في هذ الحالة انا نروح فيها باسكو كنت معاها ....خرج بابا لسيد وساكت و دخلو لدار قلو شوف اولد الناس علبالي بلي حقك و دراهمك و الله غالب جابها شيطان ...بصح لي نقدر نديرها معاك ......#تصبحون_على_خير....
أنت تقرأ
ظلموني و بكاو عليا قصة ليلى " باللهجة الجزائرية "
القصة القصيرةاخطأت فلازمها عذاب ضميرها .. ارادت فعلا ان تصحح خطأها .. ليلى فتاة مدللة وجدت نفسها امام ظلم كبير فقط لانها حالت ان ترضي ضميرها قصة واقعية و للامانة حزينة من عمق المجتمع الجزائري
