ظلموني و بكاو عليا قصة ليلى " باللهجة الجزائرية "

الاخيرة

#من_صفحة_هنا_نحكي_حكايتي
#ليلى
#الحلقة_26_و_الاخيرة
قتلكم رحت لطبيبة نشوف ..قاتلي مدام ليلى بالباركة عليك عندك طفلة و راهي تبان مشاء الله عليها و العلم لله ...قاتلي بصح لازملك عناية راكي تباني مذبالة و مصفارة مكيش تاكلي و لاطونسيو مهيش مريقلة ...(قتلها في قلبي مكيش دارية ) ..المهم فرحت فرحة متتوصفش عندي شعال مسمعتش خبر شباب ...اول واحد عيطتلو هو محمد على الفرحة قلي انا ثان قررت نروح نسكن فليكول المهم نتهناو ...قلت الحمد لله يارب...رجعت لدار ميتة بالفرحة و زهو ...خبرتهم ...وقتلهم ني رايحة الجمعة الصباح ...المهم بالجمعة بكرت جا محمد داني دهمنا الحانوت شرينا صوالح تاع التسياق و رحنا ليكول خطرنا كلاصة جابدة على جيهة  خرجنا منها طوابل وسيقناها نقينها من الغبار....بقات فالماعين ووصوالح تاع الكوزينة ...مكاش لي تفكرني و لا بغا يعاوني قلت و الله ما نحط نيفي على وحدة رحت بعت خاتم جابلي زوج ملايين ....رحت شريت كلش فورنو ليزارات تاع تواقي ماعين  شريت بتية نتاع غاز ...صوالح لي يخصوني .....وكي جيت رايحة نجيب قشي لي عند ناسي مبغاوش يعطوهني بسيف ...حتى دخلو فيها الجيران ...بسيف باه ديتو ....ديت كلش .....ورحت استقليت عليهم ....حسيت بوحد الراحة متامنوش ريسانكم ....نطيب غير شوية ...وخطرات قاع منطيبش يعطوني من المطعم باسكو الغاشي قاع عارف حالتنا   ..نضل راقدة ...وزدت شرية تلفويون من ذوك القدم  خلاص ريحت منهم وليت واحد منرفدش عليه من غير زهيرة ....كانو وحد زوج استاذات داصرتهم ثم هوما شراولي الصوالح تاع البيبي امنو حتى عاودت رجعت قاع لصحتي ..موليتش انا نروح لدارنا و محمد كذلك ...حتى لحق نهار المشؤوم كنت داخلة فشهري السابع ....و ذراري داو العطلة ....وحد الخطرة على العشرة تاع الصباح جات طومبيل عند ليكول كنت نسيق حتى نشوف يما نازلة مع بابا و كنتنا زهيرة ورفدين سواشي تاع القضيان ...قلت لموحا روح روح قلهم اهي راقدة ...قلي لالا نحشم قلي والله ما نقدر قلي معليش المدير مهوش هنا و راهي العطلة باين يطلو عليك دقيقة ويروحو ...سكت ...راح دخلهم جاو عندي قعدتهم فوق الكراسة تاع ليكول ..تبغو صح قاع مقيمتهمش خلاص نفرتهم ...قاعدين يهدرو حتى سمعنا طبطيب ف الباب الكبير تاع ليكول يطبطبو بالحجرة  ...خرجنا قاع نتجراو تخيلو شكون ....عجوزتي طبطب و تهدر و طيح مسمعنهاش واش راهي تقول راح موحا فتح عليها دفلت عليه في وجهو ..وقاتلو تفووووه لا انت راجل بلخف سيطرت عليك هي ماليها تجيبهم و احنا قطعتنا ...ودمراتو...(شفتو لي خيناتو صحتو لي يجي يدمرو ).....خلاتو طايح وجات للكلاصة ..بديت نفيبري ....دارت يديها في جنابها و بدات تعاير يا لجعانين يا سراقين ..و يما تقلها يا الجهلا يا الموسخين وزهيرة تسلك ..وزادت عجوزتي دفلت على بابا و ذراري يطلو من الشباك تاع ليكول ....خلاص هنا خلااااص ..طحت على ركبيا .و قتلهم اااااي ااااااااااي قيلووووووني بااااااغية نعيش وحدي قيلوووووووني خلوووووني منستحقمش و نعيط من كرشي  ....وبديت نضرب روحي بالصفعة بيديا لزوج  ونقول اا ربي ووعلاش ياا ربي انا شادرت  انا شدرت حتى ني نقاصي ونخلص ...انا ما قريت كي لبنات...ماوتزوجتش كيفهم ...ما حوست كيفهم ........حتى نحس بحاجة كيما تريسنتي ضربتني من الفوق لتحت طلعو عينيا فالسما وطحت .........المهم داوني لسبيطار نسمع غير فالفرمليات يقولو تاع زيادة زيادة ......دخلوني للبلوك بعد تقريب زوج سوايع خرج ليهم طبيب و قلهم .....عظم الله اجركم .....المدام توفات .....وطفلة راهي بخير عليها
انا زهيرة ..ني نكتب و نبكي .....ماتت حماتي لي سميتها فالقصة ليلى باسكو بنتها سمينها ليلى ....علبالكم علاه سميتها ليلى هيا كي كانت تجمع معايا كانت حاسة بلي تموت كيما تعرفو قاع الحوامل يحسو ذاك الاحساس ..تقولي زهيرة خايفة نموت كي تزيد بنتي سميها ليلى و راهي عندك امانة ...قريها و كي تكبر و تولي تعرف قوليلها يماك حنينة و مسرقتش ووجامي حطت يديها على الحرام .....علميها تصلي و خليها تكمل قريتها ....متزوجيهاش فورصي و مشي معاها بالشرع و الدين و اش يقول .....خلاتلي بزاف ميساجات ...ماتت  و خلات الظلمة من مورها .....ماتت و الجميع اصبح ندمان على جالها .....ماتت وخلتنا قطعة منها تشبهلها .....الله يرحمها
دينا ذيك الطفلة و سبحان الله كانت موصية حتى راجلها قاتلو ايلا مت اعطيها لمرت خويا .....
منحكيلكمش على والديها و خوتها لحد الان مزالو عايشين الصدمة و خاصة زوجي تبدل 180 درجة و هو لي راه مربي بنت ختو و مفضلها حتى على ولادو ......اما ناسها مزالو هاكك على حد علمي في عقليتهم  ....و رجلها راه بلا زوج لحد الساعة ....انا رحلت انا و زوجي لبلدية اخرا خوفا على مستقبل طفلة خيفينها تكبر و تعرف القصة و يأثر عليها ...حاليا  دخلت لسنة اولى .........
اما يمينة سبب القصة قالو كي سمعت بليلى بدات خفيفة وومهيش حاصية روحها و نص عقلها راه و راهي هايمة من ولاية لختها و بنتها كذلك راهي عند خوالها يربو فيها ....
لحقنا لنهاية ....وهذي هي قصة خت زوجي الله يرحمها ....كانت اجمل مخلوق فالقصة كانت حنينة بزاف كانت تحوس تعيش بسلام فقط مكانت تحوس لا على دراهم لا على  طومبيلات.....راحت و خلات غصة في قلوبنا...كانت اختي ..ولا مرة جرحتني بكلام عيان ....هذي الحكاية حكيتها من مور حكاية زوليخة و صحبتها باه نبين بلي ماشي كامل الصحبات كيف متأمنوش كلش ....و فنفس الوقت حكيتها باه لي عندها بنت ديرها صحبتها ماشي بنتها و تخليها تحكيلها كلش ووتعلمها على شريعة ..وحتى الرجال لي راهم هنا متزوجوش بناتكم  ولا خواتتكم من اجل كلام الناس .......معنديش واش نقاك كثر من هاك ...علبالي القصة توشات كل واحد منا في جانب معين .......وواخيرا نشكر صفحة هنا نحكي حكايتي على تقبلها لهذ القصة و كذلك الشكر الموصول لصاحبة القلب الابيض فطوووم ....#النهاية .....#الوداع......