-නිසල රැයේ ආලෝකය-

~4~

හේරු තමා ඉදිරියෙන් ගමන් කරන ඒ ප්‍රතාපවත් රුව දෙස ඇසිපිය නොහෙලා බලා සිටියේය.
"හොඳයි හේරු ඔබට විශ්වාසයි නොවෙද ඔබ රාජකාරි අතර නින්දට නොවැටුණු බව" හේරු තමාගෙන්ම ප්‍රශ්න කලේය.
ඔහු චකිතයෙනි.

ඔහු දන්නා පරිදි මහා රැම්සිස් ගුප්ත සහගත පුද්ගලයෙකි .වැසියන් අතර වන්දනාවට පාත්‍ර වන ඔහුට ආමන් දෙවියන්ගේ ආශිර්වාද හිමි බවද නොරහසකි.නමුදු මහා රැජින නෙෆටාරිගේ මරණය මෙම ප්‍රතාපවත් පුරුෂයා සෙලවීමට ලක් කල බව හේරු පවා දැන සිටියේය. මහ රැජින නෙෆටාරිගේ ස්ථානය රැම්සිස්ගේ දෙවෙනි බිරිද ඉසෙට් පූරණය කලද ඇය ජනයාගේ හෝ රාජ සභාවේ කිසිවකුගේ හෝ හදවත් දිනා ගැනීමට අසමත් විය.නෙෆටාරි අමරණීය වූ අතර රැම්සිස්ගේ හදවතෙහි රැදී ඔහුට මග පෙන්වන බවට වැසියන් අතර විශ්වාසයක් විය.

"හොඳයි දරුවා , ඔබේ පියවි සිහියට පැමිණීමට කාලය" රැම්සිස්ගේ ගැඹුරු හඬ හේරුගේ තිගැස්මකට හේතු විය.
පියවි සිහියට පැමිණි හේරු තමා ඉදිරිපිට සිටින පාරාවෝ දෙස බැගෑපත් බැල්මක් හෙලීය.
" සිහියේ තබා ගන්න, තමා යම් රාජකාරියක යෙදෙනවා නම් ඒ කෙරෙහි පමණක් අවධානය යොමු කිරීමට...ඔබේ මනස පැහැදිලි රෙදි කඩක් වගෙයි. ඔබ එය වර්ණ ගැන්වීමට අවශ්‍ය වර්ණයෙන් එය පෙඟවූවොත් පමණයි ඔබට ඒ වර්ණය ලැබෙන්නේ ...වැටහුණාද ඔබට ?.."

හේරු තම පාරාවෝගේ දයාබරිත දෑස් දෙස බලා හිස සෙලවීය..නොදන්නා කුමක්දෝ හැගීමක් ඔහුගේ හදවත බර කිරීමට සමත් විය..
ඔහු ඒ හැඟීම වටහා ගත්තේය. තමන් රා දෙවියන්ට පූජා පවත්වන විට දැනෙන හැඟීම..ගෞරවය ..
තම සිත පුරා මෙම තේජස්වී පුරුෂයා කෙරෙහි ගෞරවයක් හටගෙන ඇති බව ඔහු වටහා ගත්තේය.