-නිසල රැයේ ආලෝකය-

~5~

තමන්ගේ පියවි සිහියට පැමිණි හේරු වටපිට බැලුවේ තමා සිටින ස්ථානය පිලිබද අවබෝධයක් ලබාගැනීමටයි. රැම්සිස් දෙස බලාගෙන පැමිණියා විනා ඔහු පැමිණියේ සිහියෙන් නොවන බැවින් ඔහු තමන් දැන් සිටගෙන සිටින ස්ථානය දැක පුදුමයට පත්විය.

ඔහු සිටියේ අබුසිම්බල් මන්දිරයේ දක්ශිණ ද්වාරය අසලය.එයට එපිටින් පිහිටියේ අබුසිම්බල්හි ප්‍රධාන දේවස්ථානයයි.එයට ඇතුලු විය හැක්කේ ප්‍රධාන පූජක, පාරාවෝ ,මහරැජින සහ ප්‍රධාන වෙදැදුරු හට පමණක්ම වූ අතර එය ගුප්ත බලයන්ගෙන් සම්පන්න ස්ථානයක් විය.

ප්‍රධාන දෙවොලට ඇතුලු වන මාර්ගයේ උස කුලුණු පිහිටි අතර ඒවායේ රැම්සිස්ගේ ජීවිතයේ විශේෂ සිදුවීම් කැටයම් කර තිබුනි.පාරාවෝ රාජ්‍යත්වයට පත්වීම, පාරාවෝ සහ මහරැජින දෙවියන් හමුවී ආශිර්වාද ලබාගැනීම,කාඩේශ් සටන සහ තවත් බොහෝ දේ එහි සුන්දර ලෙස කැටයම් කර තිබුනේ ඊජිප්තු ගල්වඩුවන්ගේ අනගිභවනීය කලාකෞශල්‍යය මනාලෙස විදහා පාමිනි.

හේරු සිදුවන්නේ කුමක්දැයි වටහා ගත නොහැකිව පුදුමයෙන් රැම්සිස් දෙස බැලීය.

" උතුමාණනි , මා කුමක්ද කල යුත්තේ ?" හේරු අබුසිම්බල් අහසෙහි පායා ඇති තාරකා මණ්ඩල දෙස ඇසිපිය නොහෙලා බලා හිඳි රැම්සිස්ගේ දැහැන බිඳිමින් විමසීය.

" පලමුව අපි දෙවොලට ඇතුලු විය යුතුයි..ඉන් පසු ඔබ මගේ අණට අනුව කටයුතු කලයුතුයි..
නමුත් එයට පෙර මට දැනගැනීමට අවශ්‍යයි ඔබ නිසැකවම මෙය සිදුකිරීමට සූදානම්ද? ඔබට අවශ්‍ය නම් පිටව යාහැකියි මේ අවදානම් කාර්‍යබාරයට සහභාගී නොවී.." රැම්සිස්ගේ ගැඹුරු මෙන්ම ආධිපත්‍යය පිරි හඬ හේරු මොහොතක් ගොළු කිරීමට සමත් විය.

" මම සූදානම් ඕනෑම දෙයකට...උතුමාණන් වෙනුවෙන් ජීවිතය වුවත් පූජාකල හැකියි මාහට.."

" ඔහ්..සාම්ප්‍රදායික ප්‍රකාශයක්..සෑම දිනකම මගේ කන වැකෙන...නමුදු මට අමතක නැහැ ඔය ලෙසින් දිවුරූ අයවලුන් කාඩේශ්හිදී මා අතැර පලා ගිය ආකාරය.."

" නමුත් මා එලෙස පලායන්නේ නැහැ..මා ඒ බියගුල්ලන් මෙන් නොවෙයි..ඒ කාලය වෙනවිට මා කුඩා දරුවෙක්..මා කාඩේශ්හි සිටියානම් ඔබතුමා තනිකර පලායන්නේ නැහැ..මා.."

" සන්සුන් වන්න හේරු..මා ඔබව පරික්ශා කලා පමණයි..නමුත් ඔබ කෝපයෙන්...කුමක්ද කාරණය...ඔබ අකමැතියි කිසිවෙකු හෝ ඔබේ ශක්තිය සහ ගෞරවය පිලිබද ප්‍රශ්න නගනවාට..එසේද?.." මහා රැම්සිස් තමා ඉදිරිපිට සිටින දහසය හැවිරිදි තරුණයා දෙස බලා සිටියේ අවබෝධයෙනි.වසර ගණනාවක රාජ්‍යත්වයේ අත්දැකීම් සහ බල අරගල වලට පින්සිදු වන්නට ඔහු හේරුගේ නිර්මල මානසිකත්වය වටහාගත්තේය.