လေးတွေးတွေး ငိုက်စိုက်စိုက်ဖြင့် လွေးအောင် စာကြည့်တိုက်သို့ စက်ဘီးလေးနှင်လာသည် ။
ခပ်တိုးတိုးသက်ပြင်းတို့ကလည်း ခဏခဏချမိသည် ။မွန်းကြပ်၏ ။
သူသည် မချစ်ခင်ကတည်းက မွန်းကြပ်နေသည် ။
" ကျောင်းစာမလိုက်နိုင်ဘူးလားကွယ် ''
ခပ်ချိုချိုအသံကြားသည့်အခါမှသာ လွေးအောင် ငုံ့ထားမြဲခေါင်းကိုမော့ကြည့်လိုက်သည် ။
ခပ်ရေးရေးလေးပြုံးပြနေသော အမျိုးသမီးမှာ ပါးချိုင့်သေးသေးလေးများဖြင့် ။
နီဆွေးဆွေးမြန်မာဝတ်စုံဟာ သူမကိုယ်ပေါ်၌ ရဲရဲရင့်ရင့်နေရာယူသည် ။
အနီရောင်ဟူသော အသိကြောင့် လွေးအောင် ပြုံးမိသည် ။
သခင်လေးသည် အနီရောင်ကိုမုန်းသည်မဟုတ်လား ။စိတ်နှင့်အာရုံတို့က တောင်ပံပါသည်ထင်ပါ၏ ။
သခင်လေးထံသို့သာ ထပ်ခါတလဲလဲ လမ်းမှားရောက်သွားမိသည် ။ပိန်ပိန်ပါးပါးနှင့် နုနယ်ပုံပေါ်သော သူမမှာ အသက်ကြီးပုံမပေါ် ။
" စာလိုက်နိုင်ပါတယ် မဆူး ''
ဆူးသည် စာကြည့်တိုက်ဘေး နှင်းဆီများကို နမ်းရှိုက်ရင်းပင် လွေးအောင်၏အဖြေကိုနားထောင်သည် ။
" မင်းကြည့်ရတာ ပြိုတော့မယ့်မိုးလိုပါလားလွေးရယ် အှုံ့မှိုန်းနေတာပဲ ''
သွယ်လျလျလက်ဖျားလေးများနှင့် နှင်းဆီပွင့်ကိုကိုင်ကာ နှာဖျားတွင် မွှေးကြူစေသည် ။
ဘေးတွင်ရပ်နေသူ လွေးအောင်ကိုအကြည့်တစ်ချက်မပို့ပါဘဲ စကားတို့သာ ပြောသည် ။" မဆူးထင်လို့ပါ လွေးအဆင်ပြေပါတယ် "
ထိုစကားကြောင့် ဆူးသည် တဟားဟားရယ်လိုက်သည် ။
မိန်းမကောင်း ၊ မိန်းမငယ်များ ရယ်သလို လက်ဖဝါးလေးအုပ်ကာ ရှက်ရယ်ရယ်ခြင်းမဟုတ် ။
ပါးစပ်ကိုဟ၍ စိတ်မပါဘဲ ခပ်ခြောက်ခြောက်ရယ်ပုံမျိုးဖြစ်သည် ။" မညာတတ်ပါလာလွေးရယ် ညာတာလဲတုံးလိုက်ပါဘိ ''
လွေးအောင်အကြောင်းကိုသိသလိုပြောလာသော ဆူးကို လွေးအောင်ကြည့်မရတော့ပါ ။
ESTÁS LEYENDO
Beholders(complete) (Z+U)
Romanceတက္ကသိုလ်တက်ရန်အတွက် မြို့၌ အဘဖြစ်သူအလုပ်ကြွေးပြု သည့်အိမ်သို့ လာရောက်နေထိုင်မည့်ကောင်လေး နှင့် လူသူမသိသော ကြီးမားသည့် စံအိမ်ထဲမှ ထူးခြားသည့် သခင်လေးအကြောင်း တစ်နည်း.............. လိင်တူချစ်ကြိုက်ခြင်းကို လက်မခံနိုင်သည့်၁၉၇၀ ဝန်းကျင်၌ ခင်မင်ရင်းနှီ...