أنا والماضى

الحلقة الرابعة

هدى : طب انتِ متقدملك عريس
هاجر : عريس !!
هدى : ايه رأيك
هاجر : رأيى فى ايه هو انا اعرف هو مين
هدى : سيبك من العريس ، ايه رأيك فى المبدأ
هاجر :معرفش يا ماما الموضوع مش فى دماغى اصلاً
هدى : طيب انا هقولك على العريس يمكن يخليكى تغيري رأيك ؛)
هاجر(بترقب) : مين يا ماما
هدى :حسام
هاجر (بلهفة) : حسام !!!!! حسام مين
هدى : انتِ مالك وشك اتخطف ليه كده
هاجر : لا اتخطف ولا حاجه ، هاا حسام مين بقى
هدى : مالك يا بنتى ملهوفة كده ليه
هاجر : خلاص يا ماما مش عايزة اعرف
هدى : بس انا عايزة اعرف
هاجر : تعرفى ايه
هدى : اعرف مين حسام ده
هاجر : مش المفروض انه متقدملى يبقى اكيد انتِ عرفاه
هدى : لا مفيش حد متقدملك اسمه حسام
هاجر(بخيبة امل) : ايه !!!
هدى : انا بس كنت عايزة اشوف لهفتك اول ما اقول حسام
هاجر : هو فى ايه يا ماما
هدى : فيه انى سمعتك انتِ وامنية بتتكلموا عن واحد اسمه حسام وواضح من الكلام انه يخصك انتِ ،وانتِ بقالك فترة باين عليكي انك بتحبى فـ كنت عايزة اشوف رد فعلك لو قولت ان فى واحد اسمه حسام متقدملك وللاسف شوفت لهفتك
هاجر : انتِ بتعلبى بـ أعصابى يا ماما
هدى : وانتِ بتكدبى عليا يا هاجر
هاجر : لا بكدب ولا حاجة ، حسام ده زميلى فى الشغل وانا كنت مُعجبة بيه بس مفيش حاجه اكتر من كده احكيهالك
هدى : مُتأكدة
هاجر : ايووون
هدى : ماشى يا بنوتى قومى بقى خلينا نفطر سوا(وخرجت هدى)
هاجر لنفسها : ياااه انا قلبى طلع سابع سما اول ما قالت حسام واترزع فى سابع ارض لما عرفت انها اشتغالة ههههههه (بتنهيدة طويلة) اااااااااااه يا قلبى ربنا يسامحك يا حسام
*_____________________________________________**___________________________*
بــالليل فى بيت حسام :
علا : شوفت يا حبيبي اللى حصل مع بُثينة صاحبتى
حسام : خير !
علا : عرفت ان جوزها بيخونها
حسام : طيب كويس
علا : هو ايه ده اللى كويس
حسام : كويس انها عرفت
علا : المشكلة انها مش عارفة تعمل ايه ، تنطش ولا تواجهه ، هى برضه خايفه تهد بيتها وبتقول طالما بيرجعلى فى الاخر وبينام فى حضنى انا يبقى مش مُشكلة
حسام : وانتِ مالك انتِ بحوار زى ده
علا : مالى ازاى دى صاحبتى
حسام : ايوة بس مش صاحبتى متوجعيش دماغى بمشاكل الناس كفاية اللى عندى
علا : اوكى ، بس انا مش عارفة ازاى واحدة تقبل على نفسها كده
حسام : طب انتِ هتعملى ايه لو عرفتى انى بخونك
علا : تصدق يا حبيبي انى عمرى ما فكرت فى كده ، لو كل الرجاله خانت مراتتها انت استحالة تخونى
حسام : وجايبة الثقة دى كلها منين
علا : يمكن من حبي ليك او من حبك ليا
حسام : اممم ، قوليلي يا لولو يعنى رغم انى بزعلك كتير بحكم انى عصبي شوية ، عمرك ما خاصمتينى ولا حتى سبتى البيت زى ما ستات كتير بيعملوا
علا : لو بتحبنى قد مانا بحبك هتعرف الاجابة
حسام : طب جاوبيني
علا :انا بعرف ازاى اقدر الظروف واخلى المشكلة الكبيرة تبقى مجرد خلاف اهبل
حسام : بموت فى عقلك ده
علا : عقلى بس
حسام : بموت فيكى كلك(وحضنها)
(.بعد شوية ولع سيجارة.)
علا : ايه ده يا حسام فين الولاعة الفضة اللى عليها اسامينا :(
حسام : فضيت يا روح قلبى بكرة هخلى حد يملاها
علا : رغم محاولاتى المُستميته انك تبطل سجاير روحت بهبل جبتلك ولاعة
حسام : مانتِ جبتيها عشان تكتبى عليها (حسام & علا)
علا : بحبك :*
حسام : بعشقك :* (كفاية كده عشان السناجل اللى فى الصفحة :D )
*_____________________________________________**___________________________*
فى خلال الاربع ايام ....
-هاجر اتقبلت فى الوظيفة الجديدة
-اخت وائل اتطلقت
-حسام بـ يحاول يتصل بـ هاجر ولكنه بـ يتراجع تانى
*_____________________________________________**___________________________*
اول يـوم شغل لـ هــاجــر فى الشركة الجديدة :
ياسمين : مش قولتلك هتتقبلى
هاجر : وشك حلو عليا
ياسمين : انتِ اللى وشك يفتح النفس هههههه
أمنية : طب خدوا يالا ارقام موبايلات بعض ، على فكرة يا ياسمين ، هاجر مرحة جداً ومبتبطلش ضحك وهزار بس هى الايام دى عندها اكتئاب
ياسمين : لا يا هاجر فكك بقى من جو الاكتئاب والنكد انا وامنية هنتطرد قريب بسبب ضحكنا
هاجر : ههههههه
(.هنا موبايل هاجر رن.)
ياسمين : مالك يا هاجر وشك اتقلب ليه كده
هاجر(بارتباك) : هاا !! نعم !! لا لا مفيش حاجه
(بعد شوية)
أمنية : ده حسام اللى اتصل
هاجر : ايوة :(
أمنية : بُصى يا هاجر انتِ لقيتى شغل بسرعة الصاروخ وده مبيحصلش كتير ولا حتى مع الشباب فلازم تعرفى ان ربنا بيحبك وبيحبك اووووووى كمان لانه كده عايز يبعدك عن سكة حسام
هاجر : قصدك ايه
أمنية : قصدى انه ميبقاش ربنا بيساعدك وواقف جنبك وانتِ محلك سر ، لازم تغيري نمرة رموبايلك عشان تبقى قطعتى كل الخيوط مع حسام اوكى
هاجر : ربنا يسهل بس مش يمكن ......
أمنية تقاطعها : لا مش ممكن طبعاً ، يالا بقى عندى شغل
*_____________________________________________**___________________________*
بـالليل فى بيت حسام :
(.كان فى صراع بين عقل حسام وقلبه.)
حسام لـ نفسه : طالما وحشتك كده كلمها
- وحشتنى !! انا اول مرة اسيب واحدة وتعمل فراغ كده او توحشنى
- قصدك اول مرة واحدة تسيبك من غير ما تطول منها حاجة
- بس للاسف سابت فراغ كبير اوووى
- انت حبيتها ولا ايه
- حبيتها !! اكيد لا طبعاً انا عمرى ما حبيت غير علا
- طالما بتحب علا اوى كده بتخونها ليه
- معرفش بقى ، مريض نفسى مجنون المهم انى بحب اعمل كده مع الستات بس مبحبش الا علا
- يعنى محبتش هاجر
- لا طبعاً اكيد محبتهاش
- امال وحشتك ليه وهتموت وتشوفها او حتى تسمع صوتها ليه
- هاجر بنت طيبة، رقيقة، مرحة ،دمها خفيف ،بسيطة ،جميلة جداً و بريئة اى حد تدخل حياته لازم يتعلق بيها وانا اكيد حصلى كده
- ولما هى طيبة وبريئة عايز توسخها معاك ليه
- دخلت دماغى اووووى ، اول مرة اعرف بنت من نوع هاجر ده
- خلاص اتجوزها
- استحالة طبعاً اتجوز على علا ، استحالة اصغر فى نظر ولادى
- يبقى سيبها فى حالها متأذيهاش ولا تلوثها
- استحالة برضه مش قادر اطلعها من دماغى
حسام : اوووووووووف يا علا يا علا
علا : ايوة يا حسام فى ايه
حسام : اعمليلي قهوة
علا : ده خامس فنجان قهوه يا حسام غلط كده
حسام : اعملى اللى بقولك عليه
علا : حاضر حاضر
*_____________________________________________**___________________________*
فى بيت وائل :
سماح(زوجة وائل ، ٣٠ سنة) : انا مش عارفة ازاى توافق على طلاق اختك
وائل : فى ايه يا سماح احنا مالنا هى عايزة تتطلق مش مرتاحة معاه
سماح : ايوة بس انت عارف نظرة مُجتمعنا لـ المطلقة عاملة ازاى
وائل : يا ستى طظ فى المُجتمع ونظرته اللى تجبر واحدة تعيش مع واحد مبتحبوش وهو مبيحترمهاش
سماح : يا وائل يا حبيبي والله انا بقول كده من خوفى على مُشيرة مش عشان حاجه تانية
وائل : انا فاهم كل ده بس قولتلك ١٠٠ مليون مرة متهتميش بـ كلام الناس او نظرة المجتمع طالما مبتعمليش حاجه غلط لان احنا مُجتمعنا فى مغلوطات كتير
سماح : عندك حق ، طب هى هتعيش فين
وائل : تعيش فى الحتة اللى تريحها ، مع ماما او فى شقتها المهم تكون مستريحة كفاية اللى شافته مع جوزها
سماح : مش عارفة ايه اللى خلاها تحب المنيل ده ، مُشيرة الف من يتمناها واحسن منه مليون مرة
وائل : كانت بتحبه
سماح : بس هو كان كويس جداً قبل الجواز ، ايه اللى حصله
وائل : اااااخ يانا من رغى الستات وجعتى دماغى يا سماح قومى هاتيلي اللاب خلينى اخلص شوية شغل واى اسألة تانية كلمى مُشيرة
سماح : هههههه طيب ماشى
وائل : اه صحيح اخبار مى (اخت سماح ، ٢٤ سنة) ايه
سماح : كويس انك فكرتنى انت لازم تتكلم مع شادى وتخليه يتقدملها ويلموا الموضوع ده
وائل (باستغراب) : شادى !!! شادى مين
سماح : شادى اخو حسام اللى بيشتغل معاك ده
وائل : وانا اقوله يتقدملها ليه
سماح : الله هما مش مرتبطين
وائل : نعم !!!
سماح : هو انت متعرفش
وائل : اعرف ايه ؟؟
سماح : بُص عشان ما اعُكش واقول كلام متلخبط مى جاية بكرة عندنا ابقى اسألها ماشى
وائل : ماشى :/
*_____________________________________________**___________________________*
فـى شغل حـسـام :
حسام اتصل بـ هاجر كتير جداً لحد ما ضعفت وردت عليه ...
حسام : وحشتينى يا هاجر
هاجر : (ساكتة)
حسام : ايه يا هاجر ساكتة ليه
هاجر : عايز منى ايه يا حسام
حسام : بقولك وحشتينى ، هو انا موحشتكيش
هاجر : ( ساكتة)
حسام : يا هاجر قولى اى حاجه
هاجر(بكبرياء) : مش انت خيرتنى ما بين انى اتجوزك عرفى او ان اللى بينا ينتهى وادينى اخترت
حسام : وقدرتى تختارى الاختيار ده يا هاجر
هاجر : انت اللى خيرتنى وانا اخترت
حسام : طب سامحينى انا بحبك انتِ متعرفيش الكام يوم دول عدوا عليا ازاى انا ....
هاجر تقاطعه(بكبرياء): انا مش عايزة اعرف حاجه ، كل اللى اعرفه انك لو بتحبنى زى ما بتقول تجى تقدملى غير كده شكراً
حسام : اوكى بس ادينى فرصة اظـ......
هاجر تقاطعه : مفيش فرص يا حسام انا اديتك فرصة واتنين وتلاته ، متكلمنيش تانى يا حسام الا اذا كنت جاى تتقدملى غير كده مش عايزة اشوف رقمك عندى .سلام (قفلت هاجر وانفجرت فى العياط)
(.حسام لـ نفسه : ماشى يا بنت الـ انتِ اللى بدأتى العناد استحملى بقى اللى هعمله.)
ياسمين لـ هاجر : مالك يا هاجر فى ايه
هاجر: (مبتتكلمش من شدة حالة الانهيار اللى هى فيها)
ياسمين : يا أمنية يا أمنية
أمنية : فى ايه يا ياسمين (اول ما شافت هاجر) يا نهارى مالها هاجر
ياسمين : مش عارفة انا جيت لقيتها قاعدة فى الارض ومنهارة كده
(.حضنت أمنية هاجر بقوة.) وقالت : اهدى يا هاجر اهدى يا حبيبتى (وهكذا لحد ما هاجر بقت كويسة)
أمنية : مالك بقى فى ايه
هاجر : معلش يا امنية مش قادرة اتكلم دلوقتى
أمنية : اوكى يا حبيبتى براحتك
هاجر : عن اذنكوا هروح الحمام اغسل وشى
ياسمين لـ أمنية: هى مالها
أمنية : هى بتجيلها حالة انهيار تام لما بتزعل ، مبتقدرش تتحكم فى العياط لدرجة انها مبتعرفش تاخد نفسها ولا تتكلم
ياسمين : ياااااه اكيد زعلت جامد
أمنية : لا والله مش دايماً ابسط زعل بيعمل فيها كده وساعات بتوصل للاغماء
ياسمين : هاجر حساسة اوى باين عليها
أمنية : هاجر بباها متوفى وهى ٤ سنين وملهاش حد غير مامتها عشان كده دايماً حاسه انها ضعيفة ومكسورة
ياسمين : يا حرام دى صعبت عليا اوى :(
أمنية : اوعى يا ياسمين تبينلها انك مُتعاطفة معاها او كده لان ده بيجرحها
ياسمين : اوكى خلاص اسكتى عشان جاية علينا
هاجر (بمرح) : بطلوا نَم بقى واشتغلوا
ياسمين : سُبحان مُغير الاحوال ، هى المياة بتغير الموود كده
أمنية : بالنسبة لـ هاجر اه ههههههه
*_____________________________________________**___________________________*
الضهر فى بيت وائل :
وائل : ايه يا مى حوار شادى ده ؟
مى : انت متعرفش !!
وائل : معرفش ايه
مى : انا فكراك عارف
وائل : اللى هو ايه
مى : ان انا ووائل مُرتبطين
وائل : من قد ايه
مى : من حوالى اربع شهور وهو قالى انه اتكلم معاك وهتتفقوا على الخطوبة
وائل : بس شادي متكلمش معايا فى اى حاجه تخصك
مى : نعم !!! يعنى ايه كان بيضحك عليا !!!
وائل : مى انتوا حصل بينكم حاجه
مى : حاجه !! حاجه ايه
وائل : انتِ فهمانى جاوبيني بصراحة
مى : .....................

#يتبع