أنا والماضى

الحلقة السابعة

(.ياسمين قالت لـ ياسين يلحق هاجر ويوصلها.)
ياسين : يا آنسة هاجر يا آنسة هاجر
هاجر : نعم
ياسين : انا ياسين اخو ياسمين
هاجر : اه تشرفنا
ياسين : انتِ مروحة صح
هاجر : اه كنت لسه هوقف تاكسى
ياسين : ممكن اوصل
هاجر : لا طبعاً مينفعش
ياسين : ليه مينفعش
هاجر : الوقت متأخر ومينفعش ادخل منطقتى وانا راكبة عربية مع واحد
ياسين : ما هو عشان الوقت متأخر مينفعش تروحى لوحدك
هاجر : بس لما اخد تاكسى غير لما اركب عربية ملاكي
ياسين : طب انا عندى فكرة
هاجر : صدقنى مش هينفع ومتشكرة اوى لذوق حضرتك
ياسين : اسمعى الفكرة بس
هاجر : اتفضل
ياسين : انتِ هتركبى التاكسى وانا همشى وراكى بعربيتى لحد ماتوصلى عشان اكون مطمن عليكي لكن تركبى تاكسى لوحدك دلوقتى مش امان ، هااا قولتى ايه ؟
هاجر : بس .....
ياسين يقاطعها : لا انا مبحبش البسبسة كده امان ليكي
هاجر : اوكى :)
.. وهما فى طريقهم لـ التاكسى ..
ياسين : انتِ صاحبة ياسمين من زمان
هاجر : لا مش من زمان اوى من فترة بسيطة
ياسين : بس واضح انكم بقيتوا اصحاب اوى
هاجر : ياسيمن عسولة اوى واى حد يحبها
ياسين : بس هى بتقول عليكي كلام كتير اوى
هاجر (مخضوضة) : كلام !! كلام ايه
ياسين : انتِ مالك اتخضيتى كده ليه
هاجر : عادى بس هى ياسمين بتقول ايه
ياسين : امممم مش هقولك
هاجر : لا بالله عليك قولى
ياسين (وقف وبص لـ هاجر فى عينها) : بتقول انك طيبة ومرحة ودمك خفيف وجميلة اوى وصراحة هى عندها حق اوى اوى اوى
هاجر(بتبص الناحية التانية) : وقعت قلبى الله يسامحك افتكرتها بتقول كلام وحش
ياسين : حد يقول على القمر ده كلام وحش
هاجر : انا اتأخرت اوى واحنا اتمشينا كتير لازم امشى
ياسين : اوكى اتفضلى
(. خرجوا بره وركبت هاجر التاكسى وياسين وراها بالعربية .)
فــى العربية ياسين لـ نفسه : ايه يا ياسين طبيت ولا ايه ، لا ما هى بصراحة تتحب وتوقع اجدعها قلب ، انا مش هضيع وقت وهخلى ياسمين تفتح معاها الحوار واخطبها مش لازم اضيع وقت
فـــى التاكسى هاجر لـ نفسها : ايه يا هاجر مال قلبك دق ليه اول ما ياسين قالك كلمة حلوة ، وقع قلبك من كلمة بسيطة زى دى ، طب وحسام نستيه !! لا مش نسيته بس حبى لـ حسام حب ابوى .. احتياج بنت اتحرمت من ابوها مش حب جواز وغرام وكده ، ايوة حسام كان بالنسبة ليا اب لكن ياسين ..... ، ياسين انتِ لحقتى
(وفاقت هاجر وهى قدام بيتها)
هاجر لـ ياسين : متشكرة اوى وسورى لو تعبتك
ياسين : العفو
هاجر : طب عن اذنك مضطرة اطلع
ياسين : طبعاً اتفضلى
(وطلعت هاجر بس ياسين فضل واقف تحت ، واول ما طلعت دخلت بلكونة اوضتها تبص على ياسين اللى لقيته واقف مستنى تحت ، ياسين ابتسم لها وهى ابتسمت له وشاور لها تدخل )
*_____________________________________________**___________________________*
فـى احدى الكافيهات :
وائل : انا مش فاهم ليه هاجر دى مُصمم عليها ما انت تعرف ١٠٠ بنت غيرها وكلهم مستنين منك اشارة
حسام : بقولك ايه مش كل ما تشوف خلقة اهلى تقولى هاجر ، ده حوار انا قولتلك ملكش دعوة بيه
وائل : بس انت مُصمم تأذيها واللى انت ناوى تعمله معاها ده حرام وصعب جداً تستحمله
حسام : خير يا وائل من امتى ما ياما بنات اذيتهم وانت كنت بتوقف تتفرج
وائل : بس دى صعبانه عليا
حسام : والباقيين يعنى ولاد كلب
وائل : لا بس هاجر غير اى واحدة تانية
حسام : طالما خايف عليها اوى كده روح حذرها منى
وائل : ما انت صاحبى برضه
حسام : يبقى فكك من الحوار ده
وائل : انت ازاى مراتك مبتحسش بكل اللى انت بتعمله ده
حسام : عشان عمرى ما عملت حاجه تشككها فيا
وائل : ازاى يعنى
حسام : يعنى معنديش موبايل مخبيه عنها ، مش حاطط باسوورد (كلمة مرور) على الموبايلات او اللاب توب ، مبكونش قاعد معاها واقوم اكلم الموبايل فى السر ، مبروحش البيت وانا ريحتى بيرفيوم حريمي او عالق فى هدومى شعرة ، يعنى مبعملش اى حاجه تشككها فيا
وائل : ده انت ديب بشرى فعلاً
حسام : هههههههه خليك فى حالك
وائل : والله بتصعب عليا
حسام : انت مالك مقضيها صعبانيات ليه هى الشيشة اللى معاك دى فى حاجه تانية
وائل : ههههههه مش عارف
حسام : سيبك ، اما انا اتعرفت على واحدة اوووووباااا حاجه كده تقفيل بره
وائل : عندك فى الشغل
حسام : لا ، انا شوفتها فى النادى وعجبتنى جداً وواضح كده انى عجبتها بس مش عايز اخد خطوة الا لما احس انها مستوية وعلى اخرها
وائل : امممم طيب
حسام : بقولك ايه انا هقوم اروح بقى لانى مرهق جداً
وائل : اوكى ماشي
حسام : معلش يا وائل خد الولاعة دى ابقى خلى حد يملهالى
وائل : ولاعة ايه دى
حسام : دى ولاعة فضة علا كانت جيبهالى هدية وكاتبة عليها اسامينا ، ابقى املاها لانى مكسل اروح وهى زعلانه انى مبستخدمهاش
وائل : اوكى
حسام : سلام
*_____________________________________________**___________________________*
تانى يوم فى بيت امنية :
حسين (والد امنية) : يالا يا أمنية بسام(٢٨ سنة ، مهندس) بره
امنية : حاضر يا بابا انا جاية
حسين : بُصى انتوا هتقعدوا فى الصالون وانا هقعد فى الصالة لما تدخلى متقفليش الباب
امنية : حاضر يا بابا
(.خرجت امنية وراحت عند بسام وعملت زى ما ابوها قالها.)
بسام : مالك ساكتة ليه
أمنية : مانت برضه ساكت
بسام : انا مستنيكي تتكلمى لان والدك قالى انك عايزة تتكلمى معايا قبل اى خطوة رسمى
أمنية : بصراحة كده ومن غير لف ودوران انا كنت عايزة استفسر عن خطوبتك الاولى
بسام : انا كنت متوقع كده ومن غير ما تسألى هحكيلك تفاصيل الخطوبة ، انا اتخدعت فى البنت اللى كنت خطبها المظاهر عمتنى وبعدين كدبت عليا اكتر من مرة وبدأت اشك فيها فوجودنا سوا كان هيعمل مشاكل اكتر فقررنا الانفصال ، اما بالنسبة لسؤالك حبيتها او لا فانا اتعلقت بيها جداً وكنت حاسس انى بحبها بس مع الوقت الشعور ده اختفى بالتدريج
أمنية : تمام
بسام : اما بقى بالنسبة لسؤالك اتقدمتلك ليه ، فـ عشان انا شايف فيكي البنت المناسبة اللى هتحبنى وهحبها بجد وبدون اى تكلف
أمنية (بخجل) : بس انا مسألتش
بسام : وانا كان نفسى اقول الكلام ده
(. بسام وامنية اتكلموا شوية وبعد كده هى دخلت جوه وقالت لابوها انها موافقة وقرأوا الفاتحة وحددوا معاد الخطوبة واتصلت أمنية بـ ياسمين وهاجر حكيتلهم .)
*_____________________________________________**___________________________*
فـى بيت ياسمين :
ياسمين : يعنى انت متأكد من اللى بتطلبه ده
ياسين : ايوة قولت ١٠٠ مرة ايوة مُعجب بيها وعايز اخطبها
ياسمين : ايوة يا ياسين يا حبيبي بس ممكن تكون مش مُعجبة بيك وانا محبش احطك فى وضع زى ده
ياسين : بس انا متأكد انها مُعجبة بيا
ياسيمن : ليه بقى يعنى
ياسين : عشان لما وصلتها اول ما طلعت شقتهم دخلت البلكونة بصت عليا وابتسمتلى
ياسمين : تبقى كده بتحبك ؟؟
ياسين : انا مقولتش انها بتتنيل بتحبنى بس ده معناه ان فى قبول ، يبقى نتخطب وان شاء الله الحب يجى بعد كده
ياسمين : طيب يا ياسين حاضر ، انت اصلاً قولت لبابا وماما
ياسين : انتِ بس كلميها وخدى منها التمام وبعدين هكلمهم
ياسمين : طيب بكرة ان شاء الله هكلمها
*_____________________________________________**___________________________*
فى بيت حسام :
علا : بس انتِ ازاى بثينة ساكتة على خيانة جوزك ليكى
بثينة : انا مش ساكتة انا بس مستنية الوقت المناسب
علا : اللى هو امتى الوقت المناسب ده
بثينة : لما ولادى يخلصوا امتحانات
علا : ربنا معاكى يا بُسبُس الموضوع صعب اوى
بثينة : بس انا هنصحك نصيحة ، متأمنيش اوى لجوزك لانى كنت بثق فى جوزى ثقة عمياء وعمرى ما فتشت وراه لحد ما هو استغل ده وخانى
علا : متزعليش منى يا بثينة مهما كنتى انتِ وجوزك بتحبوا بعض فـ أكيد مش زيي انا وحسام ، اللى بينا انا وحسام صعب اى حد يفهمه ، اللى بينى انا وهو اكبر من تصور اى حد
بثينة : خليكي عايشة كده فى احلامك الوردية دى وبكرة تاخدى على قفاكى . يالا انا هقوم امشى عشان هعدى على ولادى فى النادى
علا : اخلى السواق يوصلك
بثينة : لا معايا عربيتى . باى بقى
(..حسام خرج..)
علا : ياااااه اخيراً صح النوم
حسام : صحيته
علا : جعان احضرلك اكل
حسام : لا انا هاخد دش وانزل عندى كام مشوار لازم اخلصهم
علا : هى المشاوير دى مهمة
حسام : اشمعنى
علا : ما تقعد معايا الليلة انت واحشنى اوى
حسام : خير شكلك عايزة حاجه
علا : يا حسام يا حبيبي شوف بقالنا قد ايه لا خرجنا سوا ولا اتغدينا او اتعشينا سوا زى زمان
حسام : حاضر يا حبيبتى بكرة ان شاء الله هفضى نفسى ونروح نتغدى سوا ونقضى اليوم كله بره البيت
علا : بجد !!
حسام : بجد يا روح قلبى ، يالا طلعيلى هدوم اخرج بيها لحد ما اخد دش
علا : حاضر يا حبيبي
حسام : اه يا علا صحيح ، متقربيش اوى من بثينة دى ومتديهاش ودانك اوى
علا : ليه ؟
حسام : انا سمعت الكلام اللى قالتهولك واسمعى كلامى بقى
علا : حاضر يا حبيبي
حسام : انا داخل اخد دش
*_____________________________________________**___________________________*
فى بيت وائل :
مى : انا مش عايزة اقابل عرسان
وائل : اسمعى الكلام بس وقابلى العريس ده وانتِ هتغيري رأيك تماماً فى حوار شادى ده
مى : بس انا بحب شادى
وائل : ما هو عشان انتِ بتحبى شادى لازم تقابلى العريس ده
مى : مش فاهمه ، ازاى يعنى اكون بحب واحد واقابل واحد تانى
وائل : اسمعى كلامى تكسبى
مى : طيب مانا كده كده رفضاه اقابله ليه
سماح : يوووووه يا مى اسمعى الكلام وخلاص متوجعيش قلوبنا
مى : ماشى ، هو عريس الغفلة جاى امتى
وائل : بعد بكرة ان شاء الله
مى : هنا
وائل : لا طبعاً عندكم فى البيت
مى : طيب ماشى ربنا يستر
*_____________________________________________**___________________________*
تانى يوم فى شغل هاجر :
ياسمين : جوجو عيزاكى فى موضوع مهم
هاجر : خير
ياسمين : خير ان شاء الله ، فى البريك (الراحة) ابقى انزليلى الكافتريا
هاجر : طيب مينفعش دلوقتى
ياسمين : مش هينفع خالص انا عندى شغل كتير وانتِ كمان
هاجر : اوكى
(..بعد شوية موبايل هاجر رن وكان المُتصل حسام ، لكن هاجر مردتش ومكنتش مُهتمة خالص ، بعد شويه حسام بعت لها رسالة \- هاجر لو سمحتى ردى فى حاجه معايا لازم تشوفيها لانها هتغير حاجات كتير -/ .. هاجر قعدت تفكر تكلمه ولا لا وهى بتفكر كان وقت البريك جه وقررت انها تنزل تشوف ياسمين عايزة ايه الاول وبعد كده تفكر فى موضوع حسام ..)
فـى كافتريا الشركة :
هاجر : خير يا ياسمين
ياسمين : بدون لف او دوران ، ياسين اخويا مُعجب بيكي جداً وعايز يخطبك
هاجر : ايه !!!
ياسمين : مالك اتخضيتى كده ليه
هاجر : لا انا بس تفاجأت
ياسمين : امممم وطب ايه رأيك
هاجر : مش عارفة
ياسمين : لا مفيش مش عارفة ياسين اخويا كل دماغى وصدعنى ، خلاص اتجنن بيكي
هاجر : اتجنن ايه ، ده لسه شايفنى اول امبارح
ياسمين : لا طبعاً ياسين بيفكر فيكي من اول مرة شافك فيها يوم ما وصلناكم وسأل عليكي كتير واتعلق بيكي
هاجر : ايه ، بجد ؟
ياسمين : هكدب عليكي يعنى وبعدين متلفيش عليا انتِ كمان معجبة بيه
هاجر(بتوتر) : ايه انا لا طبعاً
ياسمين : بامارة ما طلعتى تبصى عليه من البلكونة
هاجر : ده انا .....
ياسمين تقاطعها : انا مش بقولك حبيه ، بس انتِ مش مرتبطة وهو كمان وفى قبول يبقى وارد جداً الحب يجي ، هااا موافقة
هاجر : انا مش فاهمه يعنى هو عايز يخطبنى ولا عايزنا نقرب من بعض ولا ايه
ياسمين : بصى هو عايز يخطبك ، بس انا شايفة انكم تدوا نفسكم فرصة قبل الخطوبة شهر كده تعارف ، ايه رأيك ؟
هاجر : مش عارفة
ياسمين : انتِ شكلك مكسوفة
هاجر : بصراحة اه
ياسمين : جاوبينى بصراحة انتِ مُعجبة بـ ياسين ولا لا
هاجر : اه
ياسمين : طيب تمام كده سبينى انا بقى ارتبها من غير احراج ليكي ، يالا بقى عشان شغلنا
*_____________________________________________**___________________________*
بعد العصر فى بيت هاجر :
هاجر لـ نفسها : انا فعلاً ماستحقش الا واحد زى ياسين ، من سنى وداخل البيت من بابه مُحترم وشخصية وكمان مركز مُحترم ده غير انه هيكونلى لوحدى مش مشاركنى فيه زوجة واطفال ، يارب الموضوع يكمل على خير انا لازم افرح قلب ماما
(.قطع حبل افكارها اتصال من حسام وقررت انها ترد تحدى له .)
حسام : اخيراً رديتى
هاجر : عايز ايه يا حسام
حسام : معايا حاجة لازم تشوفيها
هاجر : حاجة ايه
حسام : مينفعش فى الموبايل تعالى قابلينى
هاجر : مفيش بينا حاجه عشان اقابلك
حسام : لما تشوفى اللى معايا كلامك كله هيتغير هى نص ساعة مش اكتر
هاجر : ماشى يا حسام لما نشوف ايه الحاجة دى
(. اتفقت هاجر مع حسام على المكان والزمان واستأذنت من مامتها وخرجت ولما وصلت لقيته مستنيها .)
حسام : اذيك يا هاجر وحشتينى
هاجر : ياريت يا حسام تخش فى الموضوع على طول
حسام : اوكى زى ما تحبى ، اتفضلى (واداها ظرف مقفول)
هاجر : ايه ده
حسام : ظرف
هاجر : ايوة مانا عارفة ، فى ايه يعنى الظرف ده
حسام : فى مفاجأة هتفرحى اوى لما تشوفيها افتحيه
(. مسكت هاجر الظرف وبكل ترقب وقلق وخوف وارتباك ولهفة فتحت الظرف وطلعت اللى جواه وشافته .)
هاجر : ..............................

#يتبع