أنا والماضى

الحلقة الخامسة

وائل : بس شادي متكلمش معايا فى اى حاجه تخصك
مى : نعم !!! يعنى ايه كان بيضحك عليا !!!
وائل : مى انتوا حصل بينكم حاجه
مى : حاجه !! حاجه ايه
وائل : انتِ فهمانى جاوبيني بصراحة
مى : ازاى يعنى تشك ان انا اعمل حاجة زى كده
وائل : انا مش شاكك فيكى انا شاكك فى شادى ليكون كل دماغك
مى : هو شادى مش كويس
وائل : بصراحة انا مشوفتش من شادى حاجه وحشة بس اخو حسام وتربيته هيبقى ايه يعنى
مى : مش فاهمه هو حسام ماله ؟
وائل : ماملوش يا مى بس الغريب انه قالك انه متكلم معايا وانا اصلاً معرفش انكم عارفين بعض
مى : انا هكلمه دلوقتى واسأله (وطلعت موبايلها)
وائل : لا لا لا استنى متكلمهوش
مى : ليه
وائل : متقوليش لـ شادى انك عرفتينى اصلاً وانا بكرة لما اشوفه هفتح معاه الموضوع
مى : حاضر
(هنا موبايل وائل رن)
وائل : الو اذيك يا ماما
زينب : الحمد لله ، ممكن تجى عندى دلوقتى
وائل : خير يا ماما
زينب : لما تجى هتعرف
وائل : اوكى ساعة بالكتير وهكون عندك
زينب : ماشى يا حبيبي تجى بالسلامه
*_____________________________________________**___________________________*
فى شغل هاجر :
هاجر : مش يالا بقى يا امنية عشان نروح
أمنية : اوكى
ياسمين : بقولكوا ايه ، ياسين اخويا هيعدى عليا بعربيته يروحنى هنوصلكم فى طريقنا
أمنية : انتِ عايزة اخوكى يوصل كل واحدة فينا بيتها ازاى احنا كل واحدة فى حتة
ياسمين : ايه المشكلة يعنى
هاجر : لا يا ياسمين ملوش لزوم احنا بناخد تاكسى
ياسمين : اسمعوا الكلام بقى والله هزعل منكم
أمنية : خلاص يا هاجر عشان متزعلش
هاجر : يا ياسمين انا هبقى مُحرجه من اخوكى انا معرفوش
ياسمين : يا ستى وانا بقولكوا اخرجوا سوا دى توصيلة
أمنية : خلاص يا جوجو وبعدين يمكن اخوها اصغر مننا
ياسمين : هههه اصغر ايه بس ده عنده ٢٦ سنة
أمنية : وبيشتغل ايه
ياسمين : ظابط
هاجر : شرطة ولا جيش
ياسمين : شرطة ورُتبته نقيب ، اهو بيرنلى يالا بقى ننزله
(..ونزلوا ، ركبت ياسمين جنب ياسين وهاجر وأمنية ورا ،ووصلوا هاجر وأمنية لبيوتهم..)
ياسمين لـ ياسين : هااا بقى ايه رأيك
ياسين : انتِ كلمتينى على مين فيهم
ياسمين : أمنية اللى كانت لابسة بنى
ياسين : طب ليه مش هاجر ؟
ياسمين : جايز هاجر اجمل من أمنية بس انا معرفهاش زى ماعرف امنية ، انا عارفة كل حاجة عن امنية وواثقة من اخلاقها لكن هاجر معرفش عنها الا حاجات بسيطة
ياسين : اممممممممم
ياسمين : هى معجبتكش !!
ياسين : انا عجبتنى هاجر
ياسمين : بس احنا منعرفش عنها حاجه
ياسين : دى حاجه سهلة عليا يعنى ، سهل اوووى اعرف عنها كل حاجه فى اقل من ٢٤ ساعة
ياسمين : خلاص اوكى بس انا كان نفسى تتجوز امنية
ياسين : انتِ جوزتينى خلاص ههههههه ، انتِ بس اعرفيلى منها هى مرتبطه ولا لا
ياسمين : مين ، أمنية ؟
ياسين : ههههههه لا هاجر
ياسمين : اوكى
*_____________________________________________**___________________________*
فى بيت حسام :
حسام لـ شادى : انت مش ناوى تتجوز ولا ايه
شادى : انت مالك مستعجل عليا كده ليه
حسام : يا ابنى انتِ امانه فى رقبتى وعايز اطمن عليك
شادى : طيب اصبر شوية
حسام : لا مفيش صبر ايه رأيك فى دينا بنت عم علا مراتى بنوته جميلة وشيك وخريجه جامعة امريكية
شادى : ايه يا حُس هتجوز سماعى
حسام : لا مانت هتشوفها وتتكلموا وكده لو اتفقتوا يبقى على خيرة الله
شادى : بس انا بحب واحدة تانية
حسام : مين ؟
شادى : مى
حسام : مى مين
شادى : تبقى اخت مرات وائل
حسام : ودى من عيلة يعنى نسب يشرف
شادى : هى البنت كويسة وانا بحبها
حسام : طيب سبنى اسأل وائل عنها وعن عيلتها لو كويسة نخطبهالك مش مشكلة
شادى : والنبى يا حسام متتلككش وتقولى مش عيلة والكلام ده انا بحبها
حسام : خلاص يا عم روميو هتخطبها قريب ان شاء الله
*_____________________________________________**___________________________*
فى بيت ام وائل :
وائل : خير يا ماما فى ايه
زينب : مُشيرة اختك مُصممة تقعد فى شقتها
وائل : طب وفيها ايه
زينب : انت اتهبلت انت كمان ، يعنى ايه واحدة مُطلقة تقعد فى شقة لوحدها
وائل : يا امى مُشيرة مش عيلة
زينب : ايوة بس الناس يقولوا ايه
وائل : يقولوا اللى هما عايزينه ، هى اكيد خلاص اتعودت على القعدة لوحدها سبيها تروح شقتها وصدقينى هتزهق وهترجع تانى
زينب : انت شايف كده يعنى
وائل : ايوة ، هى مُشيرة فين اصلاً
زينب : خرجت ، مفيش اى احترام لشهور العدة خالص
وائل : متدقيش معاها اوى كده يا ماما ، مُشيرة فيها اللى مكفيها ، شافت ايام سودة مع جوزها وكمان موضوع الخلفة ده اكيد تاعب نفسيتها
زينب : انا خايفة عليها
وائل : اطمنى ان شاء الله خير
*_____________________________________________**___________________________*
تانى يوم فى شغل وائل :
وائل : شادى انا عايزك فى موضوع
شادى : انا اللى عايزك فى موضوع
وائل : خير
شادى : انا عايز اخطب مى اخت مراتك ، انا قولت لـ حسام امبارح وقالى هيسألك عليها وعلى عيلتها عشان خاطرى قوله كلام كتير حلو انت عارف حسام بيحب المظاهر
وائل : هى مى كلمتك فى حاجه
شادى : لا مى مكلمتنيش امبارح خالص
وائل : اوكى لما حسام يتكلم معايا هظبطه بس انت ليه مقولتليش على اللى بينك انت ومى
شادى : اللى بينا !! احنا مفيش حاجه بينا
وائل : بس مى قالت انكم مرتبطين من اربع شهور
شادى : احم اه ، كنت مُحرج بصراحة
وائل : عموماً حصل خير وربنا يقدم اللى فيه الخير
*_____________________________________________**___________________________*
فى خلال شهر :
-هاجر تعيش حياة طبيعية وبتحاول بكل جهدها تنسى حسام
-حسام بـ يحن لـ هاجر كتير وساعات بيتصل بس هى مبتردش
-ياسين قدر يعرف عن هاجر تفاصيل اكتر واعجابه بها زاد جداً
-مُشيرة راحت عاشت فى شقتها
-شادى بـ يحاول يقنع حسام بـ مى
*_____________________________________________**___________________________*
فى شغل هاجر :
حسام اتصل بـ هاجر مردتش كالعادة فبعت لها رسالة (هاجر لو سمحتى ردى انا عايزك فى حوار مهم)
برضه مردتش ولما اتصل تانى قفلت الموبايل
أمنية : انتِ بجد رائعة يا هاجر
هاجر : اشمعنى يعنى
أمنية : يعنى بتقاومى قلبك ونفسك بطريقة رهيبة
هاجر : انتِ قصدك عشان مردتش على حسام
امنية : اى نعم
هاجر : انتِ عارفة ليه انا مغيرتش الخط
امنية : ليه
هاجر : عشان كل لما يتصل وانا اشوف اسمه ومردش قلبى بيقوى اكتر وبيقسى اكتر واكتر
(هنا جت ياسمين)
ياسمين : عندى ليكم خبر حلو اوى
هاجر وامنية : خير
ياسمين : انا هتخطب
هاجر وامنية : بجد الف مبروك
ياسمين : الله يبارك فيكم
هاجر : بس بسرعة كده
ياسمين : لا الحوار قديم اوى احنا مرتبطين من زمان بس انا نسيت احكيلك
أمنية : يبقى يوسف هو العريس (نقيب شرطة ، ٢٦ سنة)
ياسمين : ايوة هو فى غيره
هاجر : ربنا يتمم لك على خير يارب
ياسمين : يارب
أمنية : هو يبقى صاحب ياسين اخوكى صح
ياسمين : ايوة صاحبه من زمان اوى وبيشتغلوا سوا فى المباحث ، عقبالكم انتوا الاتنين يارب ، المهم دلوقتى انكم لازم تيجوا الخطوبة
هاجر : هى امتى
ياسمين : يوم الخميس وان شاء الله بعد بكرة هجيبلكم الدعوات فيها اسم القاعة وعنوانها والساعة
أمنية : اوكى ان شاء الله
*_____________________________________________**___________________________*
فى شغل شادى :
اتصلت مـى بـ شادى :
مى : عملت ايه مع حسام
شادى : طب قولى سلام عليكم الاول
مى : عملت ايه مع حسام جاوبنى
شادى : لسه يا مى بحاول معاه وان شاء الله هيقتنع
مى : هو اخوك بسلامته شايف نفسه على ايه
شادى : يا حبيبتى ادينى فرصة وان شاء الله هيوافق اصله كان جايبلى عروسة ومُصمم عليها
مى : بُص يا شادى قدامك لحد اخر الشهر ده لو متقدمتش يبقى كل واحد يروح لحاله
شادى : يا وحشة هان عليكى تقولى كده
مى : هو ده اللى عندى
شادى : اقفلى يا مى شكلك شاربه حاجه
مى : اوكى باى
*_____________________________________________**___________________________*
فى بيت حسام :
علا : مالك كده مبقتش بتروح الشغل كتير
حسام : زهقان بس انا بباشره اول بـ اول
علا : هو انت صحيح حاطط كاميرات فى المكاتب
حسام : ايوة ايه المشكلة
علا : لا مش مشكلة بس عايزة اعرف السبب
حسام : انتِ مين اللى قالك اصلاً
علا : والله مش فاكرة عرفت منين
حسام : عموماً انا بحطها عشان اشوف كل اللى بيحصل وعشان اعرف اللى بيحصل فى غيابى
علا : ده انت سوسة :*
حسام : هههههههه لا انا اكبر من سوسة ، ذئب بشرى
علا : طيب يا عم الذئب عندى ليك خبر حلو
حسام : خير
علا : انا حامل
حسام : حامل !!!
علا : ايوة حامل فى شهر ونص
حسام : احنا مش كنا اتفقنا ان خلاص مفيش خلفة وكفاية عبدالرحمن وعبدالله
علا : بس انا نفسي فى بنت
حسام : وانتِ تضمنى منين تبقى بنت وبعدين انا اصلاً مش عايز بنات
علا : فى ايه يا حسام انت غاوى تنكد عليا فى عز فرحتى (وعيطت وخرجت)
...راح حسام وراها....
حسام : انا اسف يا لولو انا بس تفاجأت
علا : محسسنى انها اول مرة تخلف
حسام : ايوة بس انا عندى ٤٠ سنة ، يعنى يبقى بينى وبين بنتى ٤٠ سنة ازاى يعنى
علا : انا مكنتش مخططة للحمل هو جه صدفة
حسام : صدفة !! عبد الله عنده ٧ سنين
علا : طيب وفيها ايه
حسام : ما علينا ، متزعليش منى الايام دى انا حالى كله متلخبط
علا : ربنا معاك
حسام : خلاص بقى متزعليش الف مليون مبروك يا روح قلبى وربنا يكملك على خير
(.هنا موبايل حسام رن ، كانت واحدة من الستات اللى بيصاحبهم-لينا-.)
لينا : حسام حبيبي اذيك
حسام : بخير وانت
لينا : كويسة ، شكل مراتك جنبك
حسام : بالظبط كده
لينا : طب مش هطول عليك ، انا مستنياك فى شقتى اوكى متتأخرش عليا
حسام : اوكى ساعة واكون عندكوا جهزوا الاوراق والمستندات بقى
لينا : هههههه اوراق ومستندات هههه حاضر متتأخرش بس يالا باى (وقفلوا)
حسام لـ علا : انا هنزل يا حبيبتى عندى شغل مهم
علا : شغل !! شغل مع مين
حسام : من امتى وانتِ بتسألى الاسئلة دى
علا : اقصد ستات ولا رجالة
حسام : الاتنين يا حبيبتى ، يالا انا هطلع البس ومتستنينيش لانى هتأخر اوكى
علا : اوكى يا حبيبي خد بالك على نفسك
(.دخل حسام اوضته عشان يلبس وبعدها بشوية جت علا.)
علا : حسام
حسام(من غير ما يبص) : ايوة يا روح قلبى
علا(بحزن) : ايه ده يا حسام
اتلفت حسام : .........................

#يتبع