أنا والماضى

الحلقة الثالثة

هاجر : لا يا حسام انا مش هتجوز بالطريقة دى
حسام : حتى لو كنتى هتخسرينى للابد
هاجر : حتى لو كنت هخسرك للابد
حسام : فكرى يا هاجر لاما توافقى لاما اللى بينا كله انتهى
(.اتصدمت هاجر من كلام حسام وفكرت فى كلامه وكانت خايفة يسيبها وبعد ما سرحت وفكرت شوية.)*
هاجر (بنبرة جرح واستحقار) : انا جايز اكون حبيتك اوى ، لانى لقيت فيك الرجل اللى بتمناه ، ولانك اديتنى حب واهتمام ولانى لقيت فيك حنية الاب اللى فقدته وانا عندى اربع سنين ، بس مهما كان حبى ليك عمرى ما هعصى ربنا عشان ارضيك وبعد اللى انت قولته يا حسام اللى انا هقولك كل اللى بينا انتهى ومتفكرش تكلمنى تانى (وخرجت هاجر من الشركة كلها)
حسام لـ نفسه : ماشى يا هاجر برضاكى او غصب عنك هجيبك وهتوافقى
*_____________________________________________**___________________________*
فــى بـيـت أمـنيـة :
عفاف (ام امنية) : مالك يا هاجر انتِ كويسة
هاجر : اه كويسة الحمد لله
عفاف : شكلك تعبانه مالك
هاجر : مفيش يا طنط انا مُرهقة شوية ومخنوقة هى امنية فين
عفاف : جوا يا حبيبتى ادخلى لها
_*_*_*_*_*_
امنية : مالك يا هاجر
(.رمت هاجر نفسها فى حضن امنية وانهارت من العياط وبعد ما هديت.)
امنية : قوليلى بقى مالك منهارة من ايه كده
هاجر : انا سبت حسام ، سبت حسام
امنية : ليه بس حصل ايه
(.حكت هاجر لـ امنية كل اللى حصل.)
امنية : بس انتِ كده صح والمفروض انك متندميش
هاجر : بس انا حبيته اوى ومش عارفه هعيش من غيره ازاى
امنية : بس هو محبكيش يا هاجر وميستاهلش انك تعملى كده عشانه
هاجر : مبحبنيش ازاى
امنية : ايوة مبحبكيش ، المفروض ان حسام مش مراهق ولا واحد لسه بيكون نفسه عشان يقعد يعيش قصة حب ويتفسح ويتنطط
هاجر : يعنى ايه
امنية : يعنى لو بيحبك كان جه اتقدملك على طول، حسام شخص كبير وعاقل وناضج ودى مش تصرفات واحد شاريكى
هاجر : بس هو ظروفه مع مراته هى اللى ..........
امنية قاطعتها : انتِ اصلاً متأكده انه عنده مشاكل مع مراته وهيطلقها وحتى لو مانتِ قولتيله تعالى اتقدملى ومش لازم مراتك تعرف ، حسام كداب وكان بيضحك عليكِ وكان عايز يستغل حبك بمعنى انه ياخد اللى هو عايزه وكان هيرميكى
هاجر : ازاى ده رجل متجوز يعنى مش محروم من حاجه زى كده
امنية : فى رجاله واطية طفسة وعنيها فارغه والنوع ده بيعرف ستات كتير
هاجر : طب انا اعمل ايه دلوقتى
امنية : انتِ سبتى الشغل صح
هاجر : اكيد يعنى
امنية : يبقى لازم تشتغلى وفوراً عشان تشغلى وقتك ومتفكريش فى حسام خالص
هاجر : شغل !! ده انا لقيت الشغل ده بمعجزة
امنية : الشركة اللى بشتغل فيها كانوا محتاجين موظفين بس مش متأكده انهم لسه عايزين هسأل بكرة واعرف التفاصيل
هاجر : ممكن تجى تباتى معايا النهاردة
امنية : حاضر يا حبيبتى هقول لماما
(.وقالت امنية لامها ووافقت و راحوا بيت هاجر.)
*_____________________________________________**___________________________*
بـالليل فى بيت حسام :
حسام : هاجر سابت الشغل وسابتنى
وائل : سيبها فى حالها بقى يا حسام
حسام : وحياة امى ما هسيبها
وائل : حرام عليك يا حسام البنت دى غلبانه وملهاش فى سكتك
حسام : ماهو مش انا اللى يتعمل معايا كده
وائل : سيبك من الغرور اللى بياكل فيك ده وسيب البنت فى حالها
حسام : مالكش دعوة انت
وائل : انا حاسس انى بكلم عيل عنده ١٥ سنة
حسام : ماشى
وائل : طب انت ناوى تعمل ايه
حسام : قريب هعرفك
وائل : طيب طاوعنى وسيبك منها
(.هنا دخلت علا.)
علا : مين دى اللى يسيبه منها
وائل : دى موظفة عندنا فى الشركة
علا : وعملت ايه دى
حسام : سرقت فلوس
علا : ياااه ودى هتعمل معاها ايه يا حبيبي
وائل : ناوى يأذيها رغم انها بنت غلبانه جداً والظروف اضطرتها لكده
علا : ليه كده بس يا حبيبي طالما بنت غلبانه يبقى حلال عليها الفلوس وربنا هو اللى يعاقبها يعنى هى الفلوس دى هتفرق معاك ما احنا معانا الحمد لله
وائل : والله مراتك بتقول كلام زى الشهد
حسام : محدش ليه دعوة بالحوار ده ، انا ادرى بشغلى وموظفينى
علا : هو مش وائل شريكك
وائل : بس هو فى الحوارات دى مبيسمعش كلامى هههههه
حسام : انتِ جاية تعملى ايه هنا
علا (باحراج) : انا كنت جايبة الشاى والكيك (عن اذنكوا)
وائل : ايه يا عم ده احرجتها
حسام : عادى هى اللى حشرت نفسها ، انت عملت ايه مع جوز اختك
وائل : هى عندنا فى البيت وعايزة تطلق وهو معاند
حسام : اخلعوه اصله لو دكر مكنش مد ايده عليها
وائل : شكلها هترسي على كده ، يالا انا همشى بقى سلام (ومشى وائل)
*_____________________________________________**___________________________*
فــى بـيـت هـاجـر :
هاجر : تفتكرى هلاقى شغل
امنية : استنى انا هسأل واحدة زميلتى هى معاها تفاصيل الموضوع ده
(اتصلت أمنية بـ ياسمين-زميلة امنية فى الشغل، ٢٣ سنة-)
أمنية : اذيك يا ياسمينه عاملة ايه
ياسمين : الحمد لله يا قمرايه وانتِ
امنية : بخير الحمد لله ، كنت عايزة اسألك عن الموظفين اللى هما محتاجينهم عندنا فى الشركة التخصصات والشروط وكده ، هما اصلاً لسه محتاجين
ياسمين : اه باب التقديم هيتقفل كمان اربع ايام ، ومحتاجين موظفين حديثى التخرج شعبة ادارة اعمال ومحاسبة
امنية : بجد والله
ياسمين : انتِ ليكى حد عايزة توظفيه
امنية : اه واحده صاحبتى سابت شغلها ومحتاجه شغل ضرورى
ياسمين : يبقى متضيعش وقت ، خليها تجى معاكى بكرة ومعاها السى ڤى (cv) بتاعها وتعمل المقابلة (interview) ويارب تتقبل ان شاء الله
امنية : متشكرة اوى يا ياسمين
ياسمين : العفو يا حبيبتى اى خدعه تانية
امنية : لا يا حبيبتى متشكرة ، اشوفك بكرة ان شاء الله
ياسمين : ان شاء الله سلام
_*_*_*_*_*_*_
أمنية : بُصى بقى هو محتاجين شعبة ادارة اعمال قومى بقى هاتى السى ڤى بتاعك عشان نظبطه وشوفى طقم كده للمقابله
هاجر : بسرعه كده
امنية : باب التقديم هيتقفل كمان اربع ايام
(.راجعت هاجر وامنية السى ڤى واختاروا الطقم.)
هاجر : بس انا هقول لماما ايه
أمنية : هتقولى لها انك لقيتى شغل احسن وهتقدمى فيه
هاجر : بس شغل احسن معناه مرتب احسن افرضى بقى طلع المرتب اقل
امنية : هى مامتك بتاخد منك مرتبك
هاجر : لا
امنية : خلاص قوللها رقم زيادة
هاجر : ماشى
امنية : يالا بقى ننام عشان نصحى بدرى(وناموا)
*_____________________________________________**___________________________*
فــى بيت ام وائل :
وائل : انتِ موافقة على الخُلع ؟
مُشيرة (اخت وائل، ٢٨ سنة) : اى حاجه يا وائل المهم اخلص منه
زينب (ام وائل ، ٥٧ سنة ) : انا مش فاهمه انتِ ازاى يا مُشيرة تسيبي بيتك ، الشقة دى بتاعتك ولا انتِ تنازلتى عنها للباشا
وائل : تتنازل ازاى يعنى !!! الشقة دى ابوكى الله يرحمه اللى جبهالك اوعى تكونى اديتهاله
مُشيرة : يا جماعه لا الشقة لسه بأسمى
زينب : امال سبتيها ليه
مُشيرة : يعنى اعمل ايه هو مش عايز يمشي منها وانا مش طايقة ابص فى خلقته قولت امشى وسواء خُلع او طلاق فـ الشقة كده كده من حقى
وائل : انا هروحله بكرة لو مرضيش يطلق يبقى هاهدده بـ الخُلع
مُشيرة : روح ارفع قضية الخُلع على طول ده حيوان مبيحسش ولا هيفرق معاه
زينب : انا مش عارفة ايه خلانا نوافق عليه من الاول
وائل : نصيب بقى يا امى يالا انا هقوم اروح بقى تصبحوا على خير
زينب : وانت من اهل الخير
*_____________________________________________**__________________________*
تـانـى يـوم الصبح فى شغل أمنية:
أمنية : صباح الخير يا ياسمين
ياسمين : صباح النور
أمنية : دى هاجر صاحبتى اللى قولتلك عليها امبارح
ياسمين : انتِ بتتكلمى جد ، ليه هى عندها كام سنة
هاجر: ٢٣ سنة
ياسمين : والله اول ما شوفتك افتكرتك بنوته صغنتوته جاية مع امنية شكلك لسه ١٧ او ١٨ سنه
أمنية : هى جوجو كده لسه مُحتفظة بـ براءة الاطفال
ياسمين : فرصة سعيدة يا هاجر ويارب تتقبلى هنا ونبقى اصحاب ان شاء الله
هاجر : ان شاء الله :)
(.دخلت هاجر المقابلة وتمت بـ نجاح وهيردوا عليها اول الاسبوع.)
أمنية : هاا ايه الاخبار
هاجر : تمام هيردوا عليا اول الاسبوع
أمنية : خير ان شاء الله
ياسمين : ان شاء الله هيقبلوكى وابشرك ان شعبة ادارة الاعمال مفيش كتير قدمولها
هاجر : يارب خير ، طيب همشى انا بقى
ياسمين : ليه خليكي معانا
أمنية : ايوة خليكي يا جوجو هتمشى ليه
هاجر : هروح ارتاح شوية وعشان اسيبكوا لـ شلغكوا
أمنية : اوكى خلاص لما توصلى كلمينى
هاجر : حاضر ، فرصة سعيدة يا ياسمين ، سلام (ومشيت)
*_____________________________________________**__________________________*
فى بيت هاجر :
هاجر لـ نفسها : فعلاً حسام محبنيش ومش عايز منى غير اللى هو طلبه ، اصله لو حبنى مكنش تمنانى فى الحرام ، ايوة اللى عملته صح ومش هرجعله ، بس انا لسه مكملتش ٢٤ ساعه سيباه ووحشنى اوى يا ترى هنساه بسهولة ، لازم تنسيه غصب عنك يا هاجر انتِ لو فارقه معاه اصلاً كان عبرك حتى برسالة :(
هنا دخلت هدى .....
هدى : ايه يا هاجر انتِ مروحتيش الشغل
هاجر : مانتِ كمان مروحتيش اهو
هدى : انا ضغطى وطى خدت اجازة عرضة وجيت
هاجر : الف سلامة يا ماما اجبلك دكتور
هدى : لا مش مستاهلة انا احسن الحمد لله ، قوليلى بقى انتِ مروحتيش الشغل ليه
هاجر : انا روحت عملت مقابلة النهاردة فى شركة جديدة
هدى : ليه كده
هاجر : الشركة اللى انا بشتغل فيها دى مش مضمونة كل شوية يستغنوا عن موظفين وممكن فى لحظة يستغنوا عنى غير كده الشركة اللى انا عملت فيها المقابله احسن من دى بكتير
هدى : مالك يا هاجر
هاجر : مالى ازاى
هدى : زمان كنت ابصلك اعرف انتِ زعلانه ولا مبسوطة ، زمان مكنتش بلحق اسألك مالك لانك كنتِ بتحكيلى كل حاجه اول بـ اول دلوقتى انتِ بعيدة ، بعيدة اوووووى يا هاجر لا بتقعدى ولا بتتكلمى معايا ، لا بتحكيلي ولا بتفضفضيلى زى زمان ، بقالى فترة طويلة حاسة ان فيكى حاجه ومستنياكى تجى تحكيلي يوم ورا يوم وانتِ بتبعدى اكتر
هاجر : ايه كل ده يا ماما انا زى مانا بس ضغط الشغل هو اللى عمل كل ده
هدى : انتِ بتحبي يا هاجر
هاجر : بحب !! لا يا ماما مبحبش
هدى : طب انتِ متقدملك عريس
هاجر : عريس !!
هدى : ايه رأيك
هاجر : رأيى فى ايه هو انا اعرف هو مين
هدى : سيبك من العريس ، ايه رأيك فى المبدأ
هاجر :معرفش يا ماما الموضوع مش فى دماغى اصلاً
هدى : طيب انا هقولك على العريس يمكن يخليكى تغيري رأيك ؛)
هاجر(بترقب) : مين يا ماما
هدى : حسام

#يتبع