أنا والماضى

الحلقة السادسة

(.دخل حسام اوضته عشان يلبس وبعدها بشوية جت علا.)
علا : حسام
حسام(من غير ما يبص) : ايوة يا روح قلبى
علا(بحزن) : ايه ده يا حسام
حسام : ايه فى ايه ؟
علا : بُص كده وانت تعرف
حسام : ماله الموبايل مش فاهم يعنى
علا : اللى كلمتك من شوية واحدة اسمها لينا
حسام (واداها ضهره وبص للمراية) : طيب وايه المشكلة ؟
علا : ازاى يعنى انت مش قولتلى انك رايح شغل
حسام : وقولتلك برضه ان الشغل ستات ورجاله ولينا دى سكرتيرة عميل عندى وهى اللى اتصلت خدت المعياد
علا : ايوة بس انت قولت الحمد لله وانت مقولتش وانتى
حسام : عادى اتلخبطت
علا : يا سلام والمفروض انى اصدق
حسام : لا طبعاً
علا : يعنى ايه ؟
حسام : يعنى عايزة تصدقى براحتك مش عايزة براحتك برضه يا حبيبتى عن اذنك بقى الموبايل امووه (ونزل)
علا لـ نفسها : ما تهدى يا علا فى ايه انتِ عارفة حسام بيحبك ازاى واستحالة يخونك ، وبعدين ما انتِ عارفة ان شغله فى ستات ورجاله وطبيعي جداً يحتك بـ ستات ، اهدى كده ومتخليش الشك يدخل قلبك عشان الشيطان ميدخلش بينكم ، هقوم اصلى ركعتين كده بنية ان ربنا يبعد عنى الشيطان ده
*_____________________________________________**___________________________*
فـى بيت هاجر :
هاجر لنفسها : يا ترى ايه الموضوع المهم اللى حسام عايزنى فيه !! مش ممكن يكون عايز يخطبنى !! لا لا لا لا مش عايزة افكر في حسام خالص انا هقوم اعمل اى حاجه
(..هنا دخلت هدى..)
هدى : الناس اللى بقت بتقعد لوحدها كتير وبتسرح اكتر
هاجر : والله كنت لسه قايمة اقعد معاكى يا ماما
هدى : وطبعاً كالعادة هتقعدى ساكتة
هاجر : ماما انا نفسى اعمل حاجه جديدة اكسر بيها روتين حياتى
هدى : ريحي قلبى واتجوزى
هاجر : ده على اساس انى لما اتجوز قلبك هيرتاح
هدى : وميرتحش ليه بقى
هاجر : اللى اعرفه ان قلب الام مبيرتحش
هدى : بس لو مُت هبقى مطمنة عليكى
هاجر : بعد الشر عليكي يا ماما ، ماما ممكن اطلب منك طلب
هدى : اطلبى عنيا
هاجر : تسلميلى يا ماما ، ممكن تكلمينى عن بابا شوية
هدى : حاضر
هاجر : طب استنى اجيب صورته ابُص فيها وانتِ بتتكلمى عنه (وقامت هاجر)
هدى لنفسها : يا حبيبتى يا بنتى لو تعرفى ابوكى كان بيحبك قد ايه ، انا عارفة انك محتجاله اوى بس خايفة ان الاحتياج ده يخليكي تحب واحد اكبر منك بكتير ، يارب احرسها واحفظها ووقف لها ولاد الحلال
هاجر : انا جبت البوم الصور كله ، هتحكيلي قصة كل صورة ماشى
هدى : ماشى يا حبيبتى (وقعدوا يتحاكواا ويتفرجوا سوا)
*_____________________________________________**___________________________*
فى بيت لينا :
لينا : تشرب ايه
حسام : لا مش عايز
لينا : انت مالك مبقتش بتشرب زى الاول ليه
حسام : مراتى بتزعل منى لما بشرب
لينا : مراتك !! ههههههههههه وانت بتعمل حساب لمراتك اوى ، وبعدين مراتك سورى يعنى عبيطة اوى سهل تضحك عليها
حسام(بزعيق) : ما تحترمى نفسك ، مراتى خط احمر متجبيش سيرتها فاهمة ولا لا
لينا : انت زعلت يا حبيبي انا بهزر ، انا بس مستغربة انت ازاى بتحبها اوى كده وبتعرف عليها ستات
حسام : دى حاجة متخصكيش يا لينا
لينا : يعنى انت مبتحبنيش نص حبها حتى ؟
حسام : لينا احنا متفقين من زمان ان اللى بينا مش حب احنا عارفين بعض لاننا بنرتاح سوا وبنتبسط سوا فـ متوجعيش دماغى بحوار حب وكلام فارغ
لينا : حاضر
(..وبعد شوية من الهلس والمسخرة..) :D
حسام : هى الساعة بقت كام
لينا : داخلة على اتنين
حسام : يااااه انا اتأخرت اوى
لينا : ما تبات معايا النهاردة
حسام : لا ابات ايه مينفعش
لينا : بليز يا حبيبي عشان خاطرى
حسام : معلش يا هاجر يا حبيبتى لازم امشى
لينا : هاجر !! هاجر مين
حسام : مين جاب سيرة هاجر
لينا : انت دلوقتى قولت يا هاجر يا حبيبتى
حسام : تلاقينى اتلخبطت يالا انا هامشى
(ومشى وركب عربيته)
حسام فى العربية لـ نفسه : ايه يا حسام للدرجة دى هاجر مسيطرة عليك وعلى عقلك ، انت عمرك ما اتلخبطت وقولت اسم واحدة من اللى بتعرفهم ، اشمعنى هاجر !!! وليه وانت مع لينا مكنتش شايفها او حاسسها !! ليه مكنتش بتحس بـ لينا غير لما تتخيلها هاجر !! اعترف انك حبيت هاجر ، لا لا لا لا انا محبتهاش والله محبيتها ، امال ليه كل الاحاسيس دى ناحية هاجر ، انت مقتنع انها مجرد رغبة فيها مش اكتر
(فضل حسام على الحال ده لحد ما وصل بيته)
حسام : ايه ده يا علا انتِ منمتيش
علا : مجاليش قلب انام وانا حاسة انى زعلتك
حسام : زعلتينى !!
علا : ايوة عشان شكيت فيك
حسام : ههههه لا طبعاً مزعلتش ، عارفة يا لولو انتِ مفروض يتعملك تمثال
علا : اشمعنى يعنى
حسام : ممكن اطلب منك طلب
علا : انت تُأمر يا حبيبي
حسام : اوعى فى يوم من الايام تزعلى منى ، ومهما حصل او مهما زعلتك خليكي فاكرة انى بحبك اوووووى وعمرى ما حبيت ولا هحب زيك ، انا بعشق كل حاجه فيكى
علا : طب بعد الكلام الحلو ده المفروض اقول ايه
حسام: متقوليش اى حاجه خالص (وحضنها)
*_____________________________________________**___________________________*
فى بيت هاجر :
(..هاجر على سريرها بتحاول تنام ، وحاطة جنبها البوم صور ابوها بتتفرج عليه..)
هاجر لـ نفسها : يا ريتك كنت معايا يا بابا ، محتجالك اوى جنبى ، عارف يا بابا رغم انى مش فكراك اوى الا انى بحبك اوى ودايماً حساك حواليا بروحك الطيبة اللى الكل بيتحاكى بيها ، انا بوعدك يا بابا انى عمرى ما هعمل اى حاجه غلط ولا هـ الوث سمعتك انت وماما ، عشان انت كل الناس بتتحاكى بيك وماما ضيعت عمرها كله عليا رغم انك سيبتها صُغيرة وكان ممكن تتجوز الا انها اختارت تربينى ، اوعى يا بابا تكون زعلان انى حبيت حسام ، انا حبي لـ حسام عمر ما حد هيقدر يفهمه ، انا لقيت فى حسام الاب اللى انا اتحرمت منه ، حسام دايماً كان بيعاملنى على انى بنته خوفه عليا كان خوف اب على بنته ، كنت محتاجه وجود الاب فى حياتى ، يعنى بتهيألى لو كنت اتجوزت حسام مكنتش هستحمل انه يلمسنى ، اصل ازاى اب يلمس بنته ، انا متأكده ان حبى لـ حسام وتعلقى بيه كان عشان احتياجى لوجوده جنبى والفراغ اللى هو سابه عشان فعلاً كان معوضنى عن حاجات كتير فقدتها من غيرك يا بابا ( وراحت هاجر فى النوم وهى بتكلم فى صور بباها)
*_____________________________________________**___________________________*
تانى يوم الصبح فى شغل هاجر :
ياسمين : صباح الخير يا بنات
هاجر : صباح الفل
أمنية : صباح النور
ياسمين : بصوا بقى دى دعواتكم لانى هاخد اجازة التلات والاربع والخميس
هاجر : طب الخميس عشان الخطوبة والاربع بتجهزى للخطوبة طب ايه لازمة التلات
ياسمين : والله يا جوجو عندى حاجات كتير اوى لازم اخلصها خصوصاً ان يوسف مش عارف ياخد اجازة الا يوم الخميس
هاجر : ربنا يكملك على خير يا حبيبتى يارب
ياسمين : ابوس ايدك يا هاجر اثبتى على المود والضحكة دى واحضرى بيهم الخطوبة
هاجر : هههههه لا متخافيش انا هثبت بيهم على طول من النهاردة هتشوفى هاجر جديدة
ياسمين (بصوت واطى) : هى أمنية سرحانه فى ايه
هاجر : مش عارفة تعالى نُخصها
(..بعد ما خضوها..)
أمنية : والله انتوا بتستعبطوا
هاجر وياسمين : ههههههههههه
هاجر : كنتى سرحانه فى ايه
أمنية : طب قربوا بقى عشان احكيلكوا ، انا متقدملى عريس
هاجر : بجد ، مين مين ها مين
ياسمين : ايوة مين حد نعرفه
أمنية : ما تصبروا بقى ، اسمه بسام وجارى
هاجر : بسام !! بسام اللى كنتى بتحبيه
أمنية : يخربيتك وطى صوتك
ياسمين : انتِ بتحبى من ورايا
أمنية : انا هـ احكيلكوا القصة .. بسام ده جارى من زمان جداً وانا بحبه من زمان برضه بس هو تقيل اوى مكنش مدينى اى اهتمام ومن حوالى سبع شهور كده خطب وانا صرفت نظر عن الموضوع وبعدين فركش من شهرين واتقدملى امبارح ، انا بقى محتارة لو هو بيحبنى كان خطب ليه ولو مبيحبنيش اتقدم ليه
ياسمين : بُصى قولى لـ بباكى انك عايزة تقعدى معاه قبل اى خطوة رسمي واسأليه فى كل ده والله لو اجاباته منطقية وحسيتى انه شاريكي بجد يبقى وافقى طبعاً
هاجر : ياسمين بتتكلم صح وياريت بقى توافقى خلى الافراح تملى المكان
ياسمين : طب انا هتخطب وأمنية ان شاء الله موضوعها يكمل وتتخطب سيادتك هتعملى ايه
هاجر : ههههه هقعد انُق عليكوا واحسد فيكوا وتفركشوا بقى ونبقى سناجل سوا
أمنية : هههههههههه
ياسمين : بتكلم بجد انتِ مفيش اى حاجه كده
هاجر : فيه طبعاً
ياسمين : بجد يعنى انتِ بتحبى
هاجر : ايوة طبعاً بحب ربنا وبحب بابا وماما واصحابى هههههه
ياسمين : يخربيت السكر ، هاجر اكتأبى تانى والنبى
هاجر : بعينكم بقى ، هقضيها الش وتريقة عليكوا
أمنية : طب يالا نشوف شغلنا بدل ما كلنا نتسوح

*_____________________________________________**___________________________*
فى شغل حسام :
السكرتيرة : الاستاذ شادى عايز يقابل حضرتك
حسام : خليه يدخل
(..وبعد ما دخل..)
حسام : انت سايب الشركة وجاى هنا ليه
شادى : اخيراً عرفت انت قاعد هنا ليه ، الشركة دى مليانه مُزز
حسام : جاوب على السؤال
شادى : جاى اكلمك فى موضوع مى
حسام : احنا مش كنا قفلنا الموضوع ده
شادى : يا حسام انا بحبها ومش قادر اسيبها ومش هقدر اتجوز غيرها
حسام : يا ابنى افهم عمرك ما تعلق قلبك بواحدة
شادى : يا سلام ، طب ده انت بتعبد علا مش بتحبها بس
حسام : وهى مى زى علا
شادى : يعنى هى دينا بتاعتك دى اللى زى علا
حسام : يعنى انت مُصمم على مى
شادى : اه مُصمم وجداً كمان
حسام : طيب انا هكلم وائل وناخد معاد ونتنيل نروح نخطبها
شادى : ربنا يخليك ليا يا احسن اخ واحلى اب فى الدنيا
حسام : ماشى يالا بقى روح شوف شغلك(ومشى شادى)
فـى عربية شادى :
شادى اتصل بـ مى : الو
مى : هاا عملت ايه
شادى : حسام مش موافق خالص وانا مش هقدر ازعل اخويا
مى : بتتكلم جد
شادى : وانا هكدب عليكى يعنى ، انا اسف اوى وبتمنالك السعادة من كل قلبى
مى قفلت الخط فى وش شادى
شادى لـ نفسه : هههههه مجنونة خليها بقى كده
*_____________________________________________**___________________________*
فى خلال الايام دى :
- حسام كلم وائل وطلب منه معاد عشان يخطبوا مى ، وشادى طلب من وائل انه ميعرفش مى عشان يعملها لها مفاجأة
- أمنية طلبت من ابوها تقعد مع بسام ووافق
- هاجر منتعشة جداً لاحساسها انها مبقتش بتفكر فى حسام وكمان هو مبقاش بيتصل بها
*_____________________________________________**___________________________*
فـــى خـطـوبــة يــاسـميـن :
هاجر وأمنية قاعدين على تربيزة واحدة :
أمنية : يعنى انتِ بجد مبقتيش بتفكرى فيه
هاجر : والله لا ، زى ما قولتلك انا كنت شايفة فى حسام الاب اللى فقدته او الاخ الكبير اللى مش عندى اصلاً
أمنية : انا مبسوطة اوى من كلامك
هاجر : وانتِ عملتى ايه فى موضوع بسام
أمنية : بكرة بعد المغرب ان شاء الله هيجي وهنتكلم
هاجر : ان شاء الله خير
أمنية : مش ملاحظة ان ياسين منزلش عينه من عليكي
هاجر : ياسين مين
أمنية : ياسين اخو ياسمين
هاجر : ههههههههه لا ملاحظتش
أمنية : انا بتكلم جد
هاجر : وانا والله بتكلم جد ملاحظتش حاجه ، فكك شايفة يوسف وياسمين لايقين على بعض اوى ، شكلهم بيحبوا بعض جداً
امنية : ايوة بيحبوا بعض من زمان ، بقولك انا لازم امشى عشان باباهقوم اسلم على ياسمين انتِ طبعاً قاعدة شوية
هاجر : اه انا هقعد ساعة كده كمان عشان متزعلش اننا مشينا احنا الاتنين
أمنية : ماشى اشوفك يوم السبت بقى ( ومشيت أمنية)
(.بعد شوية هاجر قامت تسلم على ياسمين.)
ياسمين : انتِ هتمشى لوحدك
هاجر : هاخد تاكسى
ياسمين : استنى هخلى حد يوصلك
هاجر : لا متشغليش بالك همشى انا
(.ياسمين قالت لـ ياسين يلحق هاجر ويوصلها.)
ياسين : يا آنسة هاجر يا آنسة هاجر
هاجر : نعم
ياسين : انا ياسين اخو ياسمين
هاجر : اه تشرفنا
ياسين : انتِ مروحة صح
هاجر : اه كنت لسه هوقف تاكسى
ياسين : ممكن اوصلك
هاجر : ...............

#يتبع