أنا والماضى

الحلقة الحادية عشر

ياسين : مبسوطة
هاجر : اووووووووى ، انا حبيتك اوى يا ياسين بجد انت احسن رجل فى الدنيا
ياسين : وانت احلى بنوتة خلقها ربنا ، فى حاجه جت فى بالى كنت عايز اسألك عليها
هاجر : ايه يا حبيبي
ياسين : انتِ ارتبطى قبل كده
هاجر : مش شايف ان السؤال ده متأخر شوية
ياسين : متأخر ازاى
هاجر : يعنى كنت اسأله من اول ما اتعرفنا قبل ما نحب بعض ونتخطب
ياسين : اوعى تكونى فاكرة ان حاجه زى كده ممكن تأثر على علاقتى بيكي ، حتى لو كنتى مرتبطة قبل كده فـ اللى فات مات
هاجر : ولما اللى فات مات عايز تصحيه ليه
ياسين : يعنى كان فيه حاجه
هاجر : لا انا عمرى ما ارتبطت قبلك انت اول حب فى حياتى
ياسين : طيب وبتحبينى
هاجر : لا بتسلى بيك
ياسين : ههههههه اتسلى براحتك ، بس انا بحبك اوى بجد انتِ احلى حاجه حصلتلى
هاجر : عمرك ما هتتندم
ياسين : اندم ايه بس ، انا كنت هعيش عمرى كله ندمان لو كنت سيبتك تضيعي من ايديا
هاجر : انا عايزة اطلب منك طلب
ياسين : يا حبيبتى انتِ تُأمرى على طول
هاجر : نفسي يا ياسين تكونلى ابويا واخويا
ياسين : ابوكى واخوكى بس ؟
هاجر : هههههه لا طبعاً ده بجانب جوزى وحبيبي
ياسين : متخافيش يا حبيبتى معايا مش هتحسى ان ناقصك حد ولا حاجه
هاجر : ربنا يخليك ليا يا حبيبي
ياسين : وعلى فكرة بالنسبة لشغلك ....
هاجر تقاطعه : ايه عايزنى اسيبه
ياسين : لا طبعاً هههههه اعملى اللى يريحك يا حبيبتى
هاجر : بجد يا ياسين انت بتحبنى للدرجة دى
ياسين : فووووووق ما تتصورى انا بعشقك
هاجر : انا عمرى ما تخيلت انى ممكن اقابل حد يحبنى كده
ياسين : يمكن عشان مبتعرفيش تتخيلي او يمكن عشان مش عارفة قيمة نفسك
هاجر : بحبك
ياسين : مش سامع بتقولى ايه
هاجر : بــحــبــك
ياسين : صوتك بعيد اوى انتِ قولتى حاجه
هاجر : قولت بحبك وبطل دلع بقى
ياسين : هههههههه انتِ لسه شوفتى دلع
هاجر : انا زعلانة اوى ان امنية مش هتحضر فرحي
ياسين : يا حبيبتى معلش هى مسافرة امتى
هاجر : الاسبوع الجاى
ياسين : تعرفى انى كنت المفروض اخطب امنية
هاجر : ازاى يعنى مش فاهمه
ياسين : ياسمين قالتلى تعالى شوف امنية لو عجبتك نخطبهالك يوم ما جيت لكم الشغل ووصلتكوا
هاجر : اه فاكرة
ياسين : اليوم ده كان المفروض اقول رأيى فى امنية ، بس انا بقى طبيت وحبيتك انتِ
هاجر : يا سلام
ياسين : والله بتكلم جد لو لاحظتى انى منزلتش عينى من عليكي يومها
هاجر : اه لاحظت بس عملت مش واخده بالى
ياسين : ههههههه ماشى يا عم التقيل ، انا هقفل دلوقتى لانى وصلت الشغل
هاجر : شغل ايه دلوقتى
ياسين : انا نبطشى يا حبيبتى هبات النهاردة فى الشغل
هاجر : ماشى يا حبيبي ربنا معاك ابقى طمنى عليك
ياسين : ماشى يا روحى سلام
*_____________________________________________**___________________________*
فى بيت حسام :
حسام : لولو
علا : ايوة يا حبيبي
حسام : انا خلاص حجزت السفر بعد بكرة
علا : بسرعة كده
حسام : سرعة ايه بس يادوب يا قلبى
علا : هنروح فين الاول
حسام : تركيا ومن تركيا على فرنسا
علا : طيب تمام
حسام : متاخديش هدوم كتير هنشترى من هناك
علا : بس دى تكاليف كتير اوى
حسام : مفيش حاجة تغلى عليكوا ابداً
علا : ربنا يخليك لينا
حسام : لينا مين ؟
علا : هههههه لا قصدى ربنا يخليك انت لينا انا والولاد يعنى
حسام : ههههههه مانا عارف بس بهزر معاكى بقالى كتير مبشوفش ضحكتك يالا خدى الـ passports و الـ tickets (جوازات السفر والتذاكر) خليهم معاكى
علا : انت رايح فين
حسام : هغير هدومى وانزل عندى شغل
علا : اوكى يا حبيبي ربنا معاك(وخرج حسام)
*_____________________________________________**___________________________*
بالليل متأخر فى احدى الكافيهات :
وائل : ايه يا عم المواعيد الخربانه دى
حسام : كنت عند البنت اياها اللى قولتلك عليها
وائل : هى اسمها
حسام : مش مهم تعرف بس زى ما قولتلك شمال شمال يعنى
وائل : ده على اساس ان انت اللى يمين
حسام : بس انا رجل
وائل : انت عارف ان انا بالنسبة ليا الست والرجل حاجة واحده
حسام : ما علينا ، انا من يوم ما عرفت هاجر واى واحدة اكون معاها اتخيلها هاجر الا بتاعة النهاردة دى نسيتنى الدنيا باللى فيها
وائل : ودى بقى جواز عرفى ولا ........
حسام : لا ولا ، هى فتحت حوار الجواز العرفى قال ايه عشان متبقاش بتعمل حاجه حرام ههههههه مؤمنة البت بس انا كلت دماغها ونسيتها الحوار ده
وائل : طيب اشمعنى هاجر اللى كنت هتجوزها ورسمى كمان
حسام : ههههههههههه
وائل : بتضحك على ايه
حسام : ههههههه على انك مصدق انى كنت هجوز هاجر رسمى
وائل : مش انت عرضت عليها العرض ده
حسام : ايوة بس كان المأذون والشهود هيبقوا مزورين مش حقيقين
وائل : يخرب عقلك ، تصدق انا عمرى ما فكرت اعمل زيك كده
حسام : عشان اهبل
وائل : لا يا عم انا بخاف يترد ليا فى مراتى ولا بنتى
حسام : الحمد لله ان علا سقطت كنت خايف اوى تخلف بنت
وائل : اشمعنى يعنى
حسام : انت مجنون عايزنى اخلف بنت هأثق فيها ازاى يعنى
وائل : انت عرفت ستات متجوزة قبل كده
حسام : اه ، عارف يا وائل احسن علاقة مع ست متجوزة ، دى بقى لا هتقولك استرنى ولا انا حامل ولا حتى اتجوزنى لانها مش عايزة منك الا حاجه واحدة بس
وائل : طب انت ازاى بتثق فى مراتك
حسام : انت اتهبلت يا وائل ، سيرة مراتى متجيش فى حوار زى ده
وائل : ماشى يا عم ربنا يهديك
حسام : شادى ومى اتفقوا الفرح امتى
وائل : بيقولوا اخر الشهر
حسام : يالا خلينا نخلص منهم
وائل : انا مش عارف انت مخنوق من مى ليه
حسام : مش مخنوق منها هى ، مخنوق من شادى اول مرة ياخد حاجه معايا تحدى
وائل : بيحبها
حسام : ربنا يهنى سعيد بـ سعيدة ، المهم انا هقوم اروح اه صحيح انا مسافر بعد بكرة ، الشهر اللى هغيبه الشركة بفروعها فى عينيك ، خد بالك من الشغل
وائل : ماشى يا معلم تروح وتجى بالسلامة، يالا انا همشى انا كمان
*_____________________________________________**___________________________*
عدى شهر .....
-حسام وعلا سافروا ورجعوا مصر تانى
- أمنية سافرت الامارات
- هاجر وياسين اتخطبوا واتكتب كتابهم وعايشين احلى ايام حياتهم
- مى وشادى اتجوزوا وسافروا اجازة طويلة لـ تركيا
*_____________________________________________**___________________________*
الـنهاردة فرح هـاجـر وياسين :
الفرح بدأ من ٨ مساءً لـ ٣ الفجر ، كانت ليلة من الف ليلة وليلة الكل كان مبسوط ، اهل ياسين واهل هاجر كله مبسوط ، كان باين اوى الحب بين ياسين وهاجر كان نظراتهم لبعض كلها حب ورومانسية ، وياسين عمل لـ هاجر فرح حلو اوى وكان مليان بالمفاجأت ليها ......
- كل اغانى الفرح اختارها ياسين وفقاً لـ ذوق هاجر وبكده هاجر كانت بتسمع كل الاغانى اللى بتحبها
- الكاسات اللى فى الفرح عليها اساميهم
- كل تربيزة عليها كارت تعارف بالعروسين صورهم واساميهم وتواريخ الميلاد
- الـ guest book (كتاب الزوار) عليه مجموعة صور ليهم من اول ما عرفوا بعض لحد يوم الحنة
- باتفاق مع ام هاجر .. ياسين عرض صور له هو وهاجر من اول ما اتولدوا لحد يوم الحنة
كل حاجة فى الفرح كانت حلوة خصوصاً ان كان باين اوى حبهم لبعض ، بعد ما الفرح خلص ياسين شال هاجر لحد العربية وفتحوا سقف العربية وخرجوا منه لحد ما وصلوا شقتهم .....
*_____________________________________________**___________________________*
بعد الفرح فى شقة ياسين وهاجر :
ياسين : مالك يا هاجر ؟
هاجر : مفيش يا حبيبي
ياسين : لا فيكي حاجة ايه مش مبسوطة
هاجر : لا طبعاً مبسوطة
ياسين : بس شكلك معيطة ، مالك يا هاجر فى ايه
هاجر : كان نفسي يبقى بابا جنبى فى يوم زى ده
ياسين (وخد هاجر فى حضنه) : طب متعيطيش يا حبيبتى هو اكيد معاكى بروحه وحاسس بيكي ربنا يرحمه ان شاء الله
هاجر : رغم انى مش فكراه اوى الا انى مش بنساه ومبيروحش من على بالى
ياسين : طيب بطلى عياط ولا انتِ بتعيطى عشان تهربى من المفاجأة اللى انتِ عملاها ليا
هاجر : هى ياسمين قالتلك عليها
ياسين : لا والله ما قالتلى حاجه
هاجر : امال عرفت منين انى عملالك مفاجأة
ياسين : يالهوووى على الزهايمر مش انتِ قولتيلى فى القاعة حلوة اوى المفاجئات دى وانا برضه عملالك مفاجأة حلوة
هاجر : اه صحيح طب غمض عينك
(. غمض ياسين عينه وخدته هاجر من ايده ووصلوا لحد الـ living room -غرفة المعيشة- .)
هاجر : فتح عينك بقى
ياسين : ايه ده يا هاجر
هاجر : ايه رأيك فى المفاجأة دى
ياسين : انتِ عرفتى منين انى بحب الـ play station
هاجر : عرفت من ياسمين
ياسين : وكمان xbox
هاجر : انا بقالى شهر بحوش عشان اجيبهم لك
ياسين : طيب يا حبيبتى ليه كلفتى نفسك
هاجر : مفيش حاجة تغلى عليك ، اللى انت عيشته ليا والاحساس اللى حسستهولى يخلينى اديك عمرى كله ويبقى برضه قليل عليك
ياسين : انتِ اللى تستاهلى عمرى كله يا هاجر انا بحبك اوى
هاجر : وانا بعشقك
ياسين : ربنا ميحرمنى منك ابداً (وباسها فى جيبنها)
هاجر : بُص بقى ، play station و xbox اهو وكمان فى كوتشينة وشطرنج يعنى مش هتنزل من البيت
ياسين : ههههههههه انتِ بقى جايبة كل ده عشان منزلش واسيبك
هاجر : هو فى الاساس عشان تبقى مبسوط واكيد يعنى مش عيزاك تنزل وتسيبنى
ياسين : حد برضه يسيب الملاك ده وينزل
هاجر : انت مش جعان ، انا جعانه اوى
ياسين : عايزة تاكلى
هاجر : اكيد يعنى
ياسين : بذمتك هو ده وقت اكل
هاجر : امال وقت ايه
ياسين :( بص كده O.o ) ، تعالى نلعب play station (وشالها)
(. خدها اوضة السفرة ، وكانت مامة هاجر مجهزه ليهم سفرة رومانسية .)
ياسين : طبعاً ده وقت اكل يالا عشان انا كمان ميت من الجوع
هاجر : مش هعرف اكل بالفستان
ياسين : ولا يهمك
(وشالها ووداها اوضة النوم)
ياسين : يالا غيرى الفستان (وخرج من الاوضه ورجع تانى بسرعه)
ياسين : على فكرة انا ضهرى اتقطم متحلميش انى اشيلك تانى :p بحبك
هاجر : بمووووت فيك
*_____________________________________________**___________________________*
فى بيت حسام :
علا : كنت فين كل ده يا حسام
حسام : شغل
علا : شغل لحد الساعة اربعه الفجر
حسام : هو فى ايه
علا : هو عشان بسألك كنت فين يبقى جريمة
حسام : علا يا حبيبتى ١٠٠ مرة اقولك لما اكون راجع من بره متسأليش كتير عشان بتخنق وبعدين انتِ مكنتيش كده ايه حصلك
علا : محصليش حاجه يا حسام انا بس بطمن عليك
حسام : خلاص بقى متزعليش يا حبيبتى
علا : حسام انت عارفنى مبحبش اللف والدوران ، انت كنت مع واحدة صح
حسام : ايه الهبل ده
علا : انا جانى اتصال قالى انك مع واحدة
حسام : ايه شغل الافلام العربى ده
علا : اهو ده اللى حصل
حسام : اكيد حد بيشتغلك
علا : مفيش دخان من غير من نار
حسام : عربيتك معاكى اى حاجه زي كده تحصل ابقى تعالى امسكينى مُتلبس
علا : يا ..............
حسام يقاطعها : انا عايز انام مش فايق للهجص ده
علا : طب انت رايح فين
حسام : هنام فى اوضة تانية عشان تبقى تصدقى براحتك
بعد ما خرج حسام ......
علا لنفسها : ايه يا علا اللى انتِ عملتيه ده ، بتشكى فى حسام ، حسام اللى لو طال يجيبلك حتة من السما هيجبهالك ، انا هسيبه شوية يهدى وبعد كده هروح اصالحه
فى الاوضة التانية ......
حسام لنفسه : يا ترى انتِ فين يا هاجر !! يعنى يوم ما اكلمك الاقى موبايلك مقفول يا ترى قفلاه عشان نايمة ولا غيرتى نمرتك ، انت لسه شاغل نفسك بيها ليه يا حسام ، الظاهر كده انى فعلاً اتعلقت بيها بس لازم اوصلها
هنا جت علا .....
علا : انا اسفة
حسام : خلاص محصلش حاجه
علا : لا حصل بدليل انك منمتش عشان زعلان منى
حسام : خلاص والله يا علا مش زعلان
علا : طيب لو مش زعلان تعالى نام فى اوضتنا
حسام : حاضر يا حبيبتى (وقام معاها ولكنه معرفش ينام من كتر تفكيره فى هاجر)
*_____________________________________________**___________________________*
تانى يوم الصبح فى بيت ياسين وهاجر :
(. هاجر صحيت متأخرة جداً ، ولما صحيت ملقيتش حسام جنبها ولقيت كل انوار الشقة مطفية .)
هاجر لـ نفسها : الظاهر ياسين خرج ونسي ينور الشقة
(. وخرجت هاجر الـ Reception -غرفة الاستقبال- ونورته ، وكانت زعلانه جداً ان ياسين خرج فى يوم زى ده ،. بس هاجر لقيت حاجه فى الـ Reception .)
هاجر مصدومة : ..................

#يتبع