أنا والماضى

الحلقة السابعة عشر

حسام بعصبية شديدة : لا انتِ اللى خلتينى امشى ورا كل ست شوية لمجرد انى اتخيلها انتِ ، انتِ اللى خلتينى اتحرش بمرات اخويا لمجرد انها فيها شبه منك ، صح ولا غلط (وضربها بالقلم)
هاجر : اه انت مجنون انت اكيد مش طبيعي
حسام : يا ترى جاية هنا ليه ؟ يمكن حاسة بيا وجاية تقعدى معايا ولا يمكن جاية تشمتى فيا ما تردى
هاجر بارتباك شديد : انا كنت جايه عـ عـ عشان ............
حسام يقاطعها : انا بقى هقولك انتِ جاية ليه ، اكيد جاية لحبيبك وحشتك صح !! او جاية لقدرك يا هاجر انا بقى قدرك
(. وهجم حسام على هاجر وحاول اغتصابها ، بس هى كانت بتحارب بكل قوتها عشان تتخلص منه وقدرت تفلت هاجر من حسام ووقعت على الارض وفجأة مسكت هاجر الطفاية وخبطت بيها دماغ حسام اكتر من مرة وجت فى منطقة صعبة ادت الى اصابة حسام ودخوله فى حالة اغماء .)
هاجر بـ انهيار شديد ودموع : حسام ، يا حسام فوق بالله عليك حسام فوق
(هاجر حاولت تفوق حسام وهزته جامد لكنه مافقش وقالت لنفسها ان دى انسب فرصة انها تدور على الفلاشة ، هاجر لقيت كذا فلاشة فى المكتب وخدتهم كلهم واخدت اللاب والموبايل بتوع حسام من على المكتب ، وبعد كده راحت جابت فوطة من الحمام مسحت بيها كل بصاماتها وخدت الفوطة معاها وخرجت من المكتب وهدومها متقطعة ، ووقفت تاكسى اللى فهم طبعاً ان هاجر اتعرضت لـ اغتصاب .)
*____________*
(. وصلت هاجر بيتها وكانت فى حالة انهيار شديدة وقعدت على الارض وبدأت تبكى بـ هستريا رهيبة وتكلم نفسها .)
هاجر لـ نفسها : ده ممكن يكون مات ، او ممكن لو عايش يبلغ عنى انى سرقت حاجات من المكتب ، انا مش عارفة اتصرف ازاى ولا اعمل ايه ، ليه كده بس يارب ليه عماله اخرج من مصيبة ادخل فى مصيبة اكبر يارب انا عملت ايه فى دنيتى عشان يحصل فيا كده ، طول عمرى فى حالى عمرى ما اذيت حد ولا كرهت حد ولا بفوت فرض ولا بكدب وبتصدق يارب انا عمرى ما غلطت عشان يحصل فيا كل ده حتى يوم ما ارتبطت بـ حسام ملمسش منى شعرة استغفر الله العظيم ،يارب لو دى محنة او اختبار انا تعبت والله تعبت ومبقتش قادرة استحمل يارب ساعدنى يارب اقف جنبى وخرجنى من المحنة دى علي خير (وصرخت هاجر باعلى صوت وقالت) يااااااااااارب ياااااارب
(. هاجر مددت جسمها على الارض ومازالت بتكلم نفسها وافتكرت ياسين .)
هاجر : ايه ده !! افرض ياسين عرف هقوله ايه وهقوله كنت بعمل ايه هناك وهقوله اعرف حسام منين !!
(. فجأة فاقت هاجر وبصت لـ هدومها المقطعة وشكلها اللى مش طبيعي .)
هاجر : لا لا ياسين اصلاً لو شافنى كده اكيد هيشك
(. دخلت هاجر خدت دش ، وصليت ركعتين لله ، وقفلت موبايل حسام وخبت الموبايل واللاب والفلاشة تحت سرير ، وحطيت الفوطة اللى مسحت بيها البصامات والهدوم اللى كانت لبساها فى كيس زبالة اسود ونزلت رميتهم فى باسكيت فى الشارع .)
(. هاجر منمتش طول الليل ، عماله تفكر يا ترى حسام حصله ايه ، مرة تتخيل انه مات وترجع تقول لنفسها اكيد خبطة زى دى متموتوش وتقول انه ممكن يجي عندها ويتهجم عليها او يروح لـ ياسين ويحكيله ، الليل كان طويل اوى على هاجر لكنها مش عارفة تنام .)
*_____________________________________________**___________________________*
الساعة ٩ الصبح فى شركة حسام :
يوسف : هو شكله مخبوط على دماغه
ياسين : تفتكر دى محاولة سرقة
يوسف : احتمال كبير
(. التفت ياسين حواليه وشاف الخزنة مفتوحة .)
ياسين : لا مش سرقة الخزنة مليانه فلوس يعنى لو سرقة كانت الفلوس دى اتسرقت
يوسف : بس انا ملاحظ حاجه غريبة
ياسين : ايه هى
يوسف : ان القتيل مامعهوش موبايل
ياسين : عادى
يوسف : عادى ازاى ، رجل اعمال كبير زى ده ازاى ميشلش موبايل
ياسين : ما هو اكيد اللى قتله مقتلوش عشان موبايل ، عموماً لما نعمل تحريات وتحقيقات كل حاجه هتبان
ياسين لـ عسكرى : ناديلنى يا بنى الـ security بتاع العمارة دى
العسكرى : تمام يا افندم
يوسف : بس تفتكر خبطة زى دى تموت رجل فحل زى ده
ياسين : الطب الشرعى هو اللى هيحدد لنا سبب الوفاة بس هو واضح ان كان فى مطاردة عنيفة جداً بين القاتل والقتيل وعلى فكرة الخبطة دى جاية فى مؤخرة الدماغ ودى ممكن تموت بسهولة
العسكرى : الحراس يا افندم
(. بدأ ياسين يستجوب الحراس .)
ياسين : انتوا عارفين القتيل
حرس ١ ، ٢ : اه عارفينه
ياسين : تمام وعارفين الموظفين
حرس ١ : مش كلهم يا افندم عشان حسام بيه بيغيرهم كل شوية
ياسين : طيب فى اشكال مُميزة عارفينهم
حرس ٢ : مفيش الا شادى بيه ووائل بيه
ياسين : مين شادى ووائل بيه دول
حرس ٢ : دول بيشتغلوا معاه
حرس ١ : بيتهيألى فى واحد اخوه وواحد شريكه
ياسين : فى حد جه قبل وقوع الجريمة
حرس ١ : شادى بيه
حرس ٢ : والمدام بتاعته جت بعده
ياسين : مدام مين ؟
حرس ٢ : مدام حسام بيه الله يرحمه
ياسين : وهى عادةٍ بتيجي هنا
حرس ٢ : لا يا باشا دى كانت تانى او تالت مرة
ياسين : جت تقريباً الساعة كام
حرس ٢ : بعد شادى بيه على طول
ياسين : وهو شادى ده جه الساعة كام
حرس ١ : جه الساعة ٦:١٥ تقريباً
ياسين : وهى جت فى حدود الساعة كام
حرس ٢ : ٦:٣٠ تقريباً برضه
ياسين : حد فيهم رجع تانى
الحرس : لا احنا ما شوفناش حد فيهم رجع تانى
ياسين : فى حد مريب دخل العمارة
حرس ١ : لا كلهم اشكال مألوفة
ياسين : تمام
ياسين لـ العسكرى : فين اللى بلغ يا بنى
العسكرى : اهى موجودة يا افندم
ياسين : طب هاتها ، وانتوا اتفضلو بس هنحتاجكوا بعد كده ان شاء الله
يوسف : ياسين ، الشقة دى متراقبة
ياسين : انت عايز تقنعنى ان القضية كده اتحلت
يوسف : ماحنا اكيد لو لقينا جهاز المراقبة هنعرف مين القاتل
ياسين : احنا للاسف منقدرش نلمس حاجه قبل النيابة ما توصل
يوسف : هما على وصول
ياسين : انتِ اللى بلغتى
السكرتيرة : ايوة انا
يوسف : انتِ بتشتغلى هنا
السكرتيرة : ايوة انا سكرتيرة الاستاذ حسام
ياسين : طب قولى لنا ايه اللى حصل
السكرتيرة : انا جيت بدرى زى كل يوم لانى الوحيدة هنا اللى معايا مفتاح وفتحت ودخلت مكتب الاستاذ حسام لقيته بالمنظر اللى انتوا شوفتوه ده معرفتش اتصرف وخوفت المسه فـ بلغت
يوسف : تمام عموماً احنا هنحتاجك
(. بعد حوالى نص ساعة وصلت النيابة ، ومعاها فريق من الطب الشرعى ، رفعوا البصامات ونقلوا جثة حسام لمصلحة الطب الشرعى ، وحرزوا كل اللى فى المكتب ، واكتشفوا ان جهاز المراقبة مش موجود الكاميرات بس هى اللى موجودة ، وقفلوا الشركة بس سابوا عندها اتنين عساكر .)
*_____________________________________________**___________________________*
(. بدأت التحقيقات ، وتم استدعاء علا وشادى والحراس والسكرتيرة .)
التحقيق مع شادى :
شادى : خير يا افندم ، انا مطلوب للتحقيق بخصوص ايه
ياسين : دلوقتى هتعرف ، انت شادى عبد الرحمن الوكيل
شادى : ايوة يا افندم وده تحقيق الشخصية
ياسين : اخر مرة كنت عند حسام اخوك امتى
شادى : امبارح
ياسين : اقدر اعرف السبب
شادى : هو فى ايه يا افندم
ياسين : جاوبنى الاول
شادى : كان فى خلاف عائلى
ياسين : امممم والخلاف ده يخليك تروحله الساعة ٦:١٥ يعنى بعد انتهاء مواعيد الشغل بـ حوالى ساعتين
شادى : انا كنت عارف انه هناك والموضوع مكنش ينفع يستنى
ياسين : احنا لقينا حسام اخوك مقتول فى شركته
شادى : حسام اخويا اتقتل !!!!!
ياسين : للاسف
(. شادى كان على وشك الانهيار من الخبر اللى سمعه لكنه حاول يتماسك .)
شادى : ومين اللى قتله
ياسين : لسه منعرفش ، ياريت بقى تجاوبنى على كل اسئلتى
(. وبدأ شادى يحكى كل حاجة ، وطلب من ياسين انه ميكتبش فى التحقيقات سبب خلافهم حفاظاً على سمعة حسام وياسين وافق لان ده مش هيفيده كتير فى القضية .)
التحقيق مع علا :
ياسين : حضرتك مدام حسام عبد الرحمن الوكيل
علا : المفروض
ياسين : يعنى ايه المفروض
(. للعلم علا لسه متعرفش مقتل حسام .)
علا : يعنى احنا اختلفنا وهخلعه ، واكيد طبعاً هو مقدم فيا بلاغ بسرقة امواله وممتلكاته
ياسين : حضرتك فاكرة انك جاية عشان متقدم فيكي بلاغ
علا : امال فى ايه
ياسين : حسام جوز حضرتك لقيناه مقتول فى الشركة النهاردة الصبح
(. علا مقدرتش تستوعب كلام ياسين ، ودخلت فى حالة اغماء من الصدمة .)
بعد ما فاقت علا من حالة الاغماء :
ياسين : مدام علا ياريت حضرتك تهدى عشان نقدر نوصل للى قتل جوزك
(. بدأت علا تحكى سبب زيارتها لـ حسام فى الشركة وسبب انه بات هناك وانه اصلاً من وقت للتانى بيبات فى الشركة ، واتهمت شادى بالقتل لانها سمعته وهو بيقوله هقتلك وتم استدعاء شادى تانى .)
التحقيق مرة تانية مع شادى :
ياسين : احنا حققنا مع مرات القتيل واتهمتك بالقتل
شادى : انا اقتل اخويا دى مجنونة ولا ايه
ياسين : هى بتقول انها سمعتك وانت بتهدده بالقتل
شادى : كلمة قولتها فى لحظة انفعال عادى يعنى
ياسين : عموماً التحقيقات هتوضحلنا
شادى : على فكرة حسام حاطط جهاز مراقبة فى شركته ممكن تعرفوا من خلاله مين اللى عمل كده وانى مرجعتش تانى
ياسين : امضى على اقوالك واتفضل لما نحتاجك هنبعتلك
(. تم التحقيق مع كل الموظفين وكل اللى يعرفهم حسام ولسه متوصلوش لحاجه .)
*_____________________________________________**___________________________*
فى بيت اهل علا :
علا فى حضن قسمت : انا السبب يا ماما انا السبب فى قتل حسام
قسمت : يا بنتى متعمليش فى نفسك كده ده قضاء ربنا
علا : لا يا ماما انا لو مكنتش قولتله مترجعش البيت كان زمانه رجع ومتقتلش
قسمت : يا بنتى اهدى
علا : حسام مات وهو زعلان منى يا ماما ، مات وانا جرحاه ، ازاى انسى لـ حسام احلى سنين قضيتهم معاه عشان غلطة ازاى قدرت اعمل كده ازاى نسيت قصة الحب اللى بينا وولادنا ازاى يا ماما انا السبب انا السبب
(. هنا جه عبد الله وعبد الرحمن ، وقامت علا عليهم وحضنتهم .)
علا : ابوكوا مات مات ، ابوكوا مات وسابنا ، انا السبب فى قتل ابوكوا
(. عبد الله وعبد الرحمن اتفتحوا فى العياط ، وجت داليا خدتهم من علا بالعافية ودخلتهم اوضه وقفلت عليهم وقعدت معاهم .)
علا بهستريا : انا السبب يا ماما انا السبب (واغمى عليها)
*_____________________________________________**___________________________*
الساعة ٧ مساءً فى بيت هاجر وياسين :
هاجر : حمد الله على السلامة يا ياسين
ياسين : الله يسلمك يا حبيبتى
هاجر : اتأخرت كده ليه قلقت عليك
ياسين : معلش كان عندى قضية مهمة
هاجر : انا كلمتك كتير وموبايلك كان مقفول
ياسين : كنت مضطر اقفله
هاجر : طب ثوانى اغرف الاكل
ياسين : لا يا حبيبتى مش قادر اكل هموت وانام (ودخل ياسين اوضة النوم ودخلت هاجر وراه)
هاجر : طب انت كلت
ياسين : اه كلت فى الشغل ، يوم صعب ومرهق اوى من مسرح الجريمة لـ المباحث لـ التحقيقات حاجه مُتعبة جداً
هاجر : ربنا معاك يا حبيبي
ياسين : يارب يا حبيبتى ادعيلى كده اقدر اعرف القاتل
(. اول ما ياسين قال القاتل كأن هاجر حد دخل سكينة فى قلبها ووشها كله قلب .)
هاجر : هى هى جريمة قتل
ياسين : اه رجل اعمال اظن تعرفيه
هاجر : وانا هعرفه منين
ياسين : بحكم انك بتشتغلى فى شركة لها نفس النشاط واكيد حسام الوكيل ده من اكبر منافسين شركتك
هاجر وبتحاول تبلع ريقها : مين !!
ياسين : القتيل اسمه حسام الوكيل
هاجر : وانت ماسك القضية دى
ياسين : امال انا بقول ايه من الصبح
هاجر : هو مات ازاى
ياسين : لسه مصلحة الطب الشرعى هتبعتلنا التقرير كمان اسبوع بس اللى انا شوفته بعينى انه واخد خبطة جامدة اوى فى دماغه
هاجر : طيب طيب (. وقامت هاجر من جنب ياسين .)
ياسين : هاجر
هاجر : نعم
ياسين : انتِ كويسه يا حبيبتى
هاجر : اه اه كويسة انا هروح اصلى
*_____________________________________________**___________________________*
بعد مرور اسبوع :
(. مصلحة الطب الشرعى بعتت تقريرها عن سبب الوفاة .)
(.التحقيقات والتحريات اثبتت تعدد علاقات حسام الغير شرعية وبدأ الشك يكون حول انها واحده من عشيقاته.)
(. مازال اختفاء الموبايل واللاب لغز غير مفهوم لدى جهات التحقيق ، خصوصاً بعد تأكيد شادى وعلا انهم لما راحوا كانوا موجودين .)
(. طبعاً معروف ان جهاز المراقبة اكيد القاتل خده وبرضه شادى اكد انه كان موجود .)
*_____________________________________________**___________________________*
فى بيت اهل علا :
محمد(والد علا) : خير يا دكتور
الدكتور : دى غيبوبة سكر ، اكيد فى حاجة زعلتها
محمد : هى فعلاً زعلت شوية
الدكتور : لا مش شوية ، دى زعلت جداً السكر عالى اوى
قسمت : جوزها اتقتل يا دكتور
الدكتور : لا حول ولا قوة الا بالله البقاء لله
قسمت : طب هى هتبقى كويسة
الدكتور : انا أُفضل انها تتنقل مستشفى عشان يتابعوا السكر كويس
محمد : اوكى هننقلها دلوقتى
(. وبالفعل اتنقلت علا المستشفى وكان معاها امها وابوها ، وداليا كانت مع اولاد علا .)
*_____________________________________________**___________________________*
فى بيت هاجر وياسين :
هاجر : اخبار القضية ايه
ياسين : عماله تتعقد ومليانه الغاز
هاجر : معرفتوش القاتل
ياسين : اكيد واحدة ست
هاجر بـ قلق وصوت مرتعش : اشمعنى ست
ياسين : القتيل كان ليه علاقات نسائية كتير غير شرعية يعنى القتيل ربنا يرحمه ويسامحه بقى كان رجل مش مظبوط واكيد اللى كان يعرفهم عاهرات يعنى امال هيكونوا ايه
هاجر : وهما كتير
ياسين : يوووووه ، ده احنا اكتشفنا فى اليومين دول بلاوى ده نص موظفاته متجوزهم عرفى وناس بتأكد انه ٩٩٪ من الموظفات هو على علاقة بيهم لاما علاقات او جواز عرفى
هاجر : يااااه
ياسين : الغريب ان الرجل ده كان مراقب كل شركته
هاجر : يعنى فى جهاز مراقبة
ياسين : للاسف اختفى بعد وقوع الجريمة
هاجر لـ نفسها : ده معناه ان استحالة ياسين يعرف انه انا
ياسين : سيبك من السيرة المُقززة دى ، قوليلى انتِ بقى مالك الايام دى
هاجر : مالى ازاى
ياسين : عصبية و على طول سرحانه ، بتنامى كتير جداً فى حين ان وشك باين عليه التعب والارهاق كأنك مبتناميش، خدتى اجازة بدون اسباب
هاجر : مفيش زهقانه شوية متنساش انك بقيت بتتأخر فى الشغل
ياسين بهزار : اخلص بس من القضية دى ، وافوق لـ قضيتك يا جميل
حاولت هاجر تغتصب ابتسامة :)
بعد شوية :
هاجر لـ نفسها : غريبة اوى ان جهاز المراقبة يختفى من الشركة ، ما هو حاجه من اتنين لاما اللى خده قاصد يتوه المباحث عنى لاما هو واخده دليل عليا ، يعنى ممكن القضية تتقيد ضد مجهول ويطلعلى حد يهددنى بالفيديو بتاع القتل ، اااااااااااه يارب انت الوحيد اللى عارف انى مكنش قصدى اقتله والله كنت بدافع عن نفسى يارب الهمنى يارب وارشدنى للطريق الصح
*_____________________________________________**___________________________*
بعد مرور تلت ايام .....
-هاجر لا بتنام ولا بتاكل ، مش عارفة تتصرف ازاى ، صعبان عليها نفسها وجوزها وتأنيب الضمير ناحية حسام هيموتها
- علا فى حالة يُرثى لها من شدة الصدمة واحساسها بالذنب وكل شوية تدخل فى غيبوبة سكر
- شادى لا بيقابل حد ولا بيخرج من البيت
*_____________________________________________**___________________________*
فى الـمـبـاحـث فى مكتب يوسف :
العسكرى : يا افندم فى واحدة بتقول انها عارفة معلومات بخصوص جريمة القتل اللى حضرتك ماسكها
ياسين : فين هى دى
العسكرى : فى مكتب حضرتك
ياسين لـ يوسف : مش قولتلك اكيد ست
يوسف : بس هو بيقول واحدة تعرف معلومات مقلش انها قتلت
ياسين : تعالى واحنا هنعرف القصة ايه
(. راح ياسين ويوسف على مكتب ياسين و ................. .)

#يتبع