أنا والماضى

الحلقة التاسعة

حسام : هاجر انا مش جاى ارغى انا جاى اسمع قرارك ، لو وافقتى هاخدك دلوقتى على المأذون ومن المأذون على البيت موافقتيش انتِ حرة بس متلومنيش
هاجر : انا مش قادرة اصدق انك حسام
حسام : يا حبيبتى انا .........
هاجر : حبيبتك !!!
حسام : يووووووه مش عايز رغى كتير خلصينى وقوليلى رأيك ؟
هاجر : قبل ما اقولك انا موافقة ولا لا عندى كام حاجه عايزة اوضحهم لك ، ممكن تسمعنى
حسام : اتفضلى
هاجر : انا يوم ما حبيتك ، حبيت فيك حنيتك وخوفك وغيرتك عليا ، اهتمامك بيا ، انا معاك حسيت احاسيس عمرى ما حسيتها ، مش احاسيس حب وغرام لا احاسيس تانية هوضحهالك .. لما كنت بتخاف عليا كنت بحس ان ابويا خايف عليا ولما كنت بتغير عليا او تتنرفز عليا كنت بحس انك اخويا الكبير ، لما كنت اعمل حاجه مش عجباك وتفهمنى غلطى بهدوء بحسك ابويا ، انا لقيت فيك الاب اللى اتحرمت منه وبسبب الحرمان ده اتحرمت من احاسيس كتير ، لقيت فيك الاخ اللى دايماً بتمنى يكون عندى عرفت ليه بقى انا حبيتك ، الحرمان دفعنى ليك
حسام : يعنى ايه !! مكنتيش بتحبينى شيفانى اب واخ بس !! يا سلام
هاجر : هى دى الحقيقة اللى كنت بنكرها لنفسى طول الوقت ، لو كنا اتجوزنا مكنتش هستحمل انك تلمسنى
حسام : بس الوضع دلوقتى اختلف بمعنى ان كده كده هتجوزك وانا بخيرك ما بين انى استرك او افضحك
هاجر : يعنى بتخيرنى بين فضيحة وفضيحة
حسام : هى فضيحة واحدة
هاجر : لا فضيحتين ، الفضيحة الاولى اللى انت بتهددنى بيها والفضيحة التانية جوازى منك
حسام : انا مش فاهم حاجة
هاجر : هفهمك ، انا لو اتجوزتك بالطريقة دى هبقى بـ اعصى ربنا اللى ممكن يفضحنى فى اى لحظة ، ولو مجوزتكش انت هتفضحنى بس ربنا قادر يحمينى منك ويسترها معايا عارف ليه عشان انا هـ ارضيه واكيد واحد زيك ميعرفش يعنى ايه شخص ربنا راضى عنه بيلاقى دايماً الخير وربنا بيسترها معاه من شياطين الجن وشياطين الانس امثالك ، انا مش هتجوزك يا حسام باى طريقة من الطُرق رسمى عرفى انا عمرى ما هتجوز واحد زيك ومش خايفة منك ولا من اللى انت عايز تعمله لان انا معايا ربنا اللى انت اكيد متعرفوش وربنا اقوى منك حسبي الله ونعم الوكيل فيك
(.ومشيت وبعد كام خطوة رجعت تانى وطلعت الصور من شنطتها ورميتها فى وش حسام.)
وقالت : خد دول يمكن ينفعوك وانت بتفضحنى ، واعلى ما فى خيلك اركبه حسبى الله ونعم الوكيل فيك تانى(ومشيت)
(.حسام مصدوم من رد فعل هاجر اللى مكنش متوقعه ، مصدوم من كلامها من كل حاجه لانه شاف هاجر تانية غير اللى عرفها ، شاف واحدة قوية مش خايفة من حد ولا من حاجة ، بعد وقت طويل قام حسام روح.)
*_____________________________________________**___________________________*
هاجر اتصلت بـ ياسمين :
هاجر : ايوة يا ياسو اذيك
ياسمين : صوتك احسن النهاردة
هاجر : انا كلى بقيت احسن الحمد لله
ياسمين : يارب دايماً يا حبيبتى
هاجر : يارب . بصى انا متصلة عشان اقولك ان المشكلة اللى عندى اتحلت وشوفى انتِ كنتى ناوية تعملى ايه فى موضوع ياسين
ياسمين : بجد يا هاجر
هاجر : اه والله بجد
ياسمين : طيب كويس انا مكنتش عارفة اقول لـ ياسين ايه
هاجر : هو انتِ مكنتيش قولتيله
ياسمين : لا هو نبطشى ومقولتلوش لسه
هاجر : طيب شوفى هتعملى ايه
ياسمين : بكرة ان شاء تقابلينى فى كوستا كوفى اللى جنب شغلنا على خمسة العصر والباقى بقى هتعرفيه
هاجر : الباقى عرفته يعنى مش محتاجه ذكاء هههههه ، المهم خليها على ستة
ياسمين : خلاص اوكى ( وخلصوا المكالمة وقفلوا )
هاجر لـ نفسها : مفيش حد يستاهلنى الا واحد زى ياسين وان شاء الله الموضوع يكمل على خير
*_____________________________________________**___________________________*
فى بيت مُشيرة :
وائل : انتِ ليه قاعدة لوحدك
مُشيرة : يا وائل ماما كل ما تشوفنى تقعد تتحصر عليا
وائل : طيب ما ده حقها هى ام ولازم تزعل على بنتها
مُشيرة : ايوة بس انا تعبت من نظراتها ليا
وائل : يعنى انتِ مرتاحة لوحدك
مُشيرة : جداً ، الصبح بروح الشغل وعلى بالليل بخرج مع صحابى انا مستريحة كده
وائل : خلاص يا مُشيرة اللى يريحك
مُشيرة : ربنا يخليك ليا يا وائل مش عارف من غيرك كنت عملت ايه
وائل : متقوليش كده يا مشمشة انا اخوكى يا بت قومى يالا غيري هدومك خلينا نتفسح
مُشيرة : اوكى ماشى (وخرجوا)
*_____________________________________________**___________________________*
بالليل فى بيت حسام :
علا : ماالك يا حبيبي ، حسام مالك
حسام : فى ايه
علا : مفيش بسألك مالك
حسام (بعصبية) : مماليش
علا : لا يا حبيبي انت باين عليك متعصب ومضايق من حاجة
حسام : يوووووه يا علا متخنقنيش الله (وخرج فى البلكونة)
علا لـ نفسها : سبيه براحته يمكن عنده مشكلة فى الشغل ولا حاجه ربنا معاك يا حسام يا حبيبي
حسام لـ نفسه : ايه يا حسام هتعمل ايه هتأذيها زى ما بتقول ، متستاهلش منك كده ، بلاش ترضى غرورك على حساب شرف وسمعة بنت بريئة ، هتستقوى على واحدة بتقولك لقيت فيك الاب والاخ اللى اتحرمت منهم ، هتستقوى على بنت ضعيفة ملهاش سند ولا ضهر ، ما هى برضه اللى اضطرتنى اعمل كده انا اتعلقت بيها و... وايه !! اكيد محبتهاش غرورك بس هو اللى مخليك متعلق بيها عشان استعصت عليك اوووووف
علا : رايح فين يا حسام
حسام : خارج (وخرج حسام)
*_____________________________________________**___________________________*
فى بيت هاجر :
أمنية اتصلت بـ هاجر :
أمنية : اذيك يا هاجر عاملة ايه
هاجر : الحمد لله وانتِ يا مونى عامله ايه
أمنية : الحمد لله ، مجتيش الشغل النهاردة ليه
هاجر : كنت تعبانه شوية
أمنية : كنت عايزة اخد رأيك فى حاجه
هاجر : خير
أمنية : بسام جايله شغل فى الامارات وبيقول انها فرصة كويسة وعايز بدل الخطوبة يبقى كتب كتاب وفرح ويسافر هو وبعد كده يبعتلى اسافرله
هاجر : طب وايه المشكله
أمنية : موضوع السفر ده عاملى قلق
هاجر : ليه
أمنية : هسافر بلد معرفهاش وناس معرفهمش
هاجر : بس فى مصريين هناك وتقدرى تكونى صداقات وكمان ممكن بسام يملى حياتك ومتحتاجيش غيره والامارات حلوة اوى على حسب ما اسمع يعنى
أمنية : بس بسام عايز الفرح اخر الشهر
هاجر : هو بدرى اه بس مشكله
أمنية : مش مشكلة ازاى انا هلحق اعمل ايه ولا ايه بس
هاجر : يا حبيبتى انا وياسمين واخواتك البنات معاكى وبما انك كده كده هتسيبي الشغل يبقى تسبيه دلوقتى عشان توفرى وقت
أمنية : اوكى طيب
هاجر : ايه ده اقتنعتى بسرعه يعنى
أمنية : اصل ماما وبابا قالوا نفس الكلام يبقى اكيد انتوا صح وعايزين مصلحتى
هاجر : ربنا يكملك على الف خير يا حبيبتى ، كنت عايزة اقولك على حاجه (وحكيت لها على موضوع ياسين)
أمنية : يارب يا هاجر الموضوع يكمل على خير
هاجر : يارب ، بُصى انا هقفل دلوقتى عشان الحق احكى لماما قبل ما تنام
أمنية : ماشى يا حبيبتى تصبحي على خير سلام
(. راحت هاجر وحكيت لمامتها على كل حاجه وفرحت جداً واستأذنت منها عشان تقابله مامتها رفضت الاول ولكنها اقنعتها .)
هاجر لـ نفسها : اهو ده اللى يستاهل ان احكى لماما عليه مش الحيوان اللى اسمه حسام ، خلاص انا مش هخبى على ماما حاجه تانى ابداً
*_____________________________________________**___________________________*
تانى يوم فى كوستا كوفى :
هاجر : على فكرة انا حكيت لـ ماما
ياسمين : طيب تمام يا حبيبتى ربنا يكمل على خير
هاجر : ايه ده مش ده يوسف
ياسمين : ههههه يعنى نظرك جاب يوسف ومجبش ياسين يا لئيمة
هاجر : ههههه
(. جه عليهم ياسين ويوسف وقعدوا كلهم شوية مع بعض ، بعدها يوسف خد ياسمين وراحوا مكان تانى وفضل هاجر وياسين فى كوستا .)
ياسين : اخيراً
هاجر : اخيراً ايه
ياسين : اخيراً قعدنا مع بعض يعنى
هاجر (ابتسمت بخجل)
ياسين : بُصى بقى من غير لف ودوران انا اعجبت بيكى من اول لحظة شوفتك فيها واتمنى اتمنى انك تبقى مراتى
هاجر : بس انت متعرفش عنى حاجه
ياسين : لا على فكرة اعرف عنك كل حاجه اصل انا من يوم ما شوفتك وانا بسأل عنك واصلاً مفيش حد سألته الا لما شكر فيكي
هاجر : طب كويش
ياسين : كويس جداً طبعاً ، ها بقى قولتى ايه
هاجر : قولت ايه فى ايه
ياسين : اه صحيح لنا لسه مقولتش حاجه ، بُصى يا ستى ياسمين اقترحت موضوع التعارف ده بس انا مش عاجبنى الجو ده اصلاً يعنى انا مرتاحلك ومُعجب بيكي وانتِ نفس الحكاية يبقى على الاقل نقرأ فاتحة ومن خلالها نتعرف على بعض اكتر وكمان اهلى واهلك يعرفوا بعض اكتر ، بعد ما نتعرف نعمل خطوبة وكتب كتاب وبندأ نجهز للفرح ونتجوز الحوار ده مش هياخد اكتر من اربع شهور
هاجر : اربع شهور !!
ياسين : عندك مانع
هاجر : طيب خلينا بس نعمل الفاتحة ونشوف اللى جاى
ياسين : بالوش اللى انا شايفه ده كل اللى جاى خير ان شاء الله
(. فضل هاجر وياسين يتكلموا ويتعرفوا على بعض اكتر وتبادلوا ارقام الموبايلات وهو قالها انه هيتكلم مع اهله ويبلغها عشان يجي يقابل مامتها .)
*_____________________________________________**___________________________*
فى بيت لينا :
لينا : صح النوم يا حسام
حسام : انا نمت كتير
لينا : لا حوالى ساعة وشويه
حسام : طيب كويس يدوب اقوم
لينا : موبايلك رن كتير ، علا وحد تانى اسمه عبد الرحمن
حسام (بقلق) : عبد الرحمن ، ده ابنى هاتى الموبايل ده
(. اتصل حسام بـ علا مردتش وبعد كده اتصل على عبد الرحمن .)
حسام : ايوة يا بودى يا حبيبي معلش كنت فى meeting
عبد الرحمن : الحق مامى يا بابى (عيل فرفور بقى)
حسام : خير يا ابنى فى ايه
عبد الرحمن : ....................

#يتبع