رحلة الأخذ بالثأر

الفصل الثاني عشر

وجه يوم حفلة عيد ميلاد سهى، الحفلة كانت في قاعة في النادي، والقاعة كانت متزينة على أعلى مستوى، وسهى كانت لابسه فستان جميل بلون رصاصي، أما نغم فـ لبست فستان هادي باللون البيچ، وإيمان كان لون فستانها بلون الورد البلدي الهادي، أما بالنسبة للولاد فكانوا لابسين لبس casual بسيط، t-shirts وبنطلونات كل واحد بما يتناسب ذوقه.

ثائر لبس t-shirt رمادي بكم عليه رسمة محارب بالأبيض وبنطلون jeans أسود، زين لبس t-shirt نبيتي عليه رسمة حمامة باللون الأبيض وبنطلون jeans رمادي تلجي، وياسر لبس t-shirt أزرق عليه رسمة تعبان وبنطلون jeans أزرق.

جو الحفلة كان لطيف وهادي، ودي كانت اللحظة المناسبة لتنفيذ الخطة، خطة ثائر.. عشان القنبلة تنفجر، ونغم ترجع تاني.

☆~☆~☆~☆~☆~☆~☆~☆~☆~☆~☆

ثائر بيشاور لزين عشان يباشر بالحركة الأولى؛ فـ بيروح زين بالفعل يطلب من نغم إنهم يخرجوا يتكلموا سوا برا القاعة شوية لوحدهم، وبالفعل بتخرج نغم معاه، وطبعًا ثائر وراهم واستخبى في مكان قريب، بحيث يكون سامع كل الحوار اللي هيدور، ويقدر يتدخل في أي وقت إذا ساء الوضع.

- خير يا زين !، عايز تتكلم فـ ايه ؟
- عايز أخد رأيك فـ حاجة تخص مستقبلي.
- وأنا ايه دخلي في الحوار ؟!
- ازاي بقى، مش احنا زمايل، وبعدين أنتِ عارفة إني بحب تفكيرك؛ فـ كنت عايز نصيحتك ومساعدتك كمان.
- نصيحتي.. ومساعدتي !!.. في ايه ؟!
- أنا أصلي قررت أتجوز.

اتوترت نغم للحظات، بلعت ريقها بهدوء، ورجعت ملامحها للجمود تاني بسرعة، وزين مخدش باله من اللحظات دي، أو قرر إنه يعمل مخدش باله.

- وأنا مالي، أنا قولت لك قبل كدة إني..
- سهى.. أنا عايز أتجوز سهى.
- امممم.. تمام.. أنا بقى مطلوب مني ايه ؟!
- عايز رأيك، وبما إنك قريبة أوي من سهى الفترة دي، عايزك تقولي لي إذا كان الطريق مفتوح قدامي ولا ايه النظام، يعني إذا كانت بتحب حد ولا لا.

سكتت نغم شوية، بتحاول تتمالك نفسها، وتجمع حروفها، هي عارفة إن سهى بتحب شخص، وإنها في الأول كانت عايز تتغير عشان تلفت نظره ليها وتعجبه، وبعد كلام نغم هي قررت تتغير عشان خاطر نفسها؛ بس هي لسه بتحب الشخص ده ولا لا ؟، ومين هو من الأساس ؟، ده سؤال محدش يعرف إجابته غير سهى....

بصت نغم لزين بكل ثبات وقالت..

- مش هقول لك سهى متتعايبش يا زين؛ عشان مفيش حد كامل، كلنا عندنا عيوب، احنا مش ملايكة؛ بس هقول لك إن سهى بنوته جميلة، ورقيقة، آه هي كانت مايصة شوية؛ بس ده بحكم إنها بنوتة وحيدة، وأظن أنت خدت بالك زي كتير أوي، من التغيير اللي حصل لسهى في الفترة اللي فاتت، وإنها بقت tougher.. بنسبة طبعًا؛ بس المهم إنها بتحاول تكون the best version of herself، ودي حاجة حلوة، ومعناها إنها عندها طموح كبير، أما بالنسبة لسؤالك عن إذا كانت بتحب حد ولا لا؛ فـ أعتقد ده سؤال إجابته عند سهى.. وبس، أنا مقدرش أقول لك إجابته، حتى إذا كنت أعرفها؛ لإني هبقى بخون الأمانة، ما هي الأسرار أمانة، وأنا عمري ما كنت خاينة؛ بس هقول لك خد فرصتك وروح كلمها، وهي ليها حق القبول أو الرفض.