رحلة الأخذ بالثأر

النهاية

وبكدة تكون القصة خلصت، القصة مكتوبة المرة دي لتخليد شخص مات؛ لإني لسه نفسي يكون كل اللي فات ده مجرد كابوس؛ لإن الفرق الوحيد بين الرواية، وبين الحقيقة، إن في الحقيقة البطل مات بالـ cancer.

القصة دي كلها خيالية، كلها ماعدا.. شخصية ياسين.. شخصية ياسين كانت موجودة فعلًا؛ بس مكنش اسمه ياسين؛ لكنه كان فرفوش، واجتماعي، بيحب الناس، وبيساعد الكل، وبيعمل خير كتييير أوي.

كان بيحب الكورة، ومسرح مصر، وإسكندرية، كان بيحب الأسود والكحلي، كان بيحب التجارة، وكان تاجر شاطر جدًا، كان بيحب بنوتة جميلة رقيقة، كان بيحب كل أصحابه، وكان له أصحاب كتير، كان شخصية جميلة أوي، وساب ذكريات حلوة كتير لكل اللي عرفوه.

كان بيحب عيلته أكتر ناس في الدنيا، أمه وأبوه وأخواته، أتوجع.. كتييير، وأستحمل أكتر، عمره ما اشتكى، وكان دايمًا بيقول أنا كويس والحمدلله، لحد ما مات بالـ cancer، وحتى وهو عيان بيه، كان بيقول أنا كويس، ومكنش بيحسس اللي حواليه بوجعه أبدًا، وكان برده بيتكلم ويرغي، ويهزر، برغم تعبه لكنه كان بيسأل على حبايبه، وبيوصيهم على بعض كمان، هو وحشني أوي، هو كان ابن خالتي، وأخويا الكبير، وأحلى قدوة في الدنيا، وأكبر وجع كان موته.

أنا كتبت الرواية المرة دي؛ عشان اخلد شخصية ياسين؛ عشان أنا لسه مقتنعة إني في كابوس، وهصحى منه ألاقي أخويا.. لسه.. عايش.. مامتش.. ومتعذبش.. بسبب.. الـ cancer..

صحيت مـ النوم وأنا فاكر
بإنها من زمان ماتت
وكل ده كان مجرد حلم
مفيش فيه حاجة موجودة

قصيدة مجرد حلم لـ محمد إبراهيم.

Afnan☆.....
15/6/2021
7/1/2022
7/11/2022