رحلة الأخذ بالثأر

الفصل الثامن

وبعد ما رجعوا، لما نزلوا من الطيارة كان ثائر ونغم ماشيين سوا، كان ثائر حاطط إيده على كتف نغم، وهي حاطه إيدها على وسطه، وماشيين سوا وهي في حضنه، وندى وفارس ماشيين وراهم بمسافة شوية.

- ها Deal ؟
- ماشي Deal، ويا رب نكسب.
- هو ايه ده اللي بتتفقوا عليه، ويا رب تكسبوه ؟
- ده اتفاق سري بيني وبين ثيو يا ندى، أطلعي أنتِ منها.
- امممم يعني هنرجع لأسرار الثنائي المشبوه خلاص.
- اهمم، هنرجع للثنائي المشبوه.... وكملت في سرها *لحد ما أرجع التالت بتاعنا.*

كانوا بيهزروا سوا وكان الجو لطيف، وقرر مهاب إن صبري وثائر هيرجعوا يعيشوا معاهم في نفس الڤيلا من تاني، هما كانوا بالفعل عايشين سوا من يوم ولادة ثائر وياسين؛ بس لما ياسين أستشهد، ثائر مقدرش يفضل موجود في الڤيلا من غيره؛ عشان كدة قرر يعيش برا لوحده؛ بس طبعًا صبري مقدرش يسيب ابنه لوحده، وراحوا عاشوا سوا في الڤيلا بتاعة صبري، اللي أتجوز فيها ماما ثائر.

وبكدة رجعت العيلة كلها تعيش في مكان واحد، ثائر في أوضته هو وياسين، وصبري في أوضته برده.

☆~☆~☆~☆~☆~☆~☆~☆~☆~☆~☆

شخص واقف على باب الأوضة ومايل عليه بجنب، وثائر واقف في وسط الأوضة، ساكت، حيران، عينه بتتأكد من إن كل حاجة زي ما هي في نفس مكانها لسه، وإن مفيش أي حاجة أتحركت ولو حتى سم.

- أوضتك وحشتك ؟
بضحكة خفيفة - كنت عارف إنك هتيجي ورايا.
ابتسمت - مجاوبتش على السؤال.
- آه يا شقية وحشتني؛ بس اللي وحشني أكتر هو توءمي الحقيقة.
- هرجعه يا ثيو، قلبي بيقول لي إني هرجعه.
- وأنا مستنيكي ترجعيه يا ناني، مع إن كان المفروض أنا اللي أوصل لحاجة مش أنتِ.
- هتساعدني يا ثيو، هنجمع المعلومات سوا؛ بس أنا اللي هوصل له.. لوحدي.

أتحرك ثائر ناحية نغم، وحط إيديه على أكتافها، ولفها وخرج بيها بره الأوضة.

- ماشي، ودلوقتي يا مشاغبتي يالا على النوم، الوقت أتأخر، وأنتِ بذلتي مجهود كبير أوي النهاردة.

دخل أوضتها، ونيمها في سريرها، وغطاها، وخلاها تشرب اللبن الدافي اللي متحلي بعسل؛ عشان تعرف تنام كويس، وبعدين حط إيده على شعرها، وباس جبينها، وبعدين..

- تصبحي على خير يا عروستي اللعبة.
- وأنت من أهله يا ثيو.
- أحلام حلوة.

وسابها وخرج، وقفل الباب وراه.

ودخل أوضته هو وياسين تاني، وقعد يفكر ويفتكر ذكرياته مع ياسين، امتى جابوا البرواز ده ؟، وليه حطوه هنا بالذات ؟، امتى كسب ياسين الجائزة دي ؟، والكأس ده بتاع ثائر، وركن الصور بتاعهم، وصورة الشقية الصغيرة وسط صورهم، وصورهم هما التلاتة سوا، وألبومات صورهم اللي في الدرج، وركن الـ Playstation الصغير اللي ياسين بيعشقه، واللي صمم يعمله في أوضتهم، رغم وجود واحد تاني في أوضة الألعاب، والكورة بتاعتهم؛ عشان ياسين مدمن كورة.