اتفق الكل على إنه هيتم عمل حفلة كبيرة الأول؛ عشان رجوع ياسين بالسلامة بعد كل السنين دي، وفي نفس الوقت هيبدأوا يجهزوا لفرح زين ونغم، ياسين وحياة، ثائر وإيمان، وفي الحفلة اللي هيعملوها لياسين الولدين هيكتبوا كتابهم على البنات اللي مستحملينهم بقالهم سنين لحد ما خللو جنبهم....
وطبعًا نغم رجعت الڤيلا مع أخواتها، وزين يا عيني رجع الڤيلا بتاعة باباه لوحده، رجوع ياسين جاي عليه بخسارة هههههه.
- بتفكر في ايه يا عم الحبيب.
- بفكر في حبيبتي اللي اتخطفت مني دي من ساعة ما أخوها رجع، بختي منيل يا أنس، ده أنا كنت بساعدها؛ عشان لما يرجع أخطفها وتبقى ليا لوحدي، مكنتش أعرف إن هو اللي هيخطفها مني، أهيء أهيء.
- هههههه يا عيني عليك يا أخويا، مش عيب عليك يا حضرة الظابط، ده أنت حتى نقيب جيش، مش عارف تروح تخطف مراتك.
- أخطفها من مين يالا أنت اتهبلت، دي معاها كتيبة في البيت، اتنين رائد، وواحد مقدم، واتنين لواء متقاعدين، أنت عايزهم يحبسوني ياض، بتضحي بيا يا هرم.
قعد أنس يضحك وزين يندب في حظه، وبعدها نده أنس لدهب؛ عشان تحفل معاه على أخوهم الكبير.
- يا دهب.. دودو.. تعالي شوفي خيبت أخوكِ الكبير يا روحي.
- ولا أنت جايبها تعملوا عليا حفلة ياض ؟
- طبعًا يا باشا، اومال أنت فاكر ايه !!
- نعم يا أنس.
- تعالي شوفي البيه الظابط، أخونا الكبير، الضهر والسند، اللي مش عارف يجيب مراته.
- ولد.. أنس.. عيب كدة.. ده أخونا الكبير برده..
- أصيلة يا دودو يا حبيبتي.
- هو يعني عشان هي مرمطته قبل الجواز، ومطلعه عينه بعد الجواز، ومش عارف يقف لأخواتها، وياخدها منهم، تقول عليه كدة، لا عيب يا أنس، عيب ميصحش.
فضل زين يبص لهم شوية، بيستوعب اللي حصل، وأنس ودهب فضلوا يضحكوا سوا على تعابير وش زين، وبعدها وطى ومسك الشبشب.
- آه يا جزمة، وأنا اللي لسه قايل عليكي أصيلة، ده أنت طلعتي قليلة الأصل، بره يا كلاب، بره من أوضتي.
- طب بالراحة بس متزقش، أنت مش عارف تتشطر على الحمار، هتتشطر على البردعة.
- يعني أنا مراتي حمار يا حيوانه.
- لا.. احنا اللي بردعة هههههه.
- برا يا أنس، خد توءمك واتهوا بره، خلوني أكلم البت شوية، برا يا فردتين جزمة شمال مالكوش لازمة.
☆~☆~☆~☆~☆~☆~☆~☆~☆~☆~☆
وفي الناحية التانية
كانوا متجمعين في أوضة الألعاب، فارس وندى بيلعبوا بلياردو، ياسين الصغير بيلعب Playstation، الكبار بيتفرجوا على فيلم مع الفشار والمقرمشات، والثلاثي المشاغب كانوا بيتكلموا سوا....
- ها يا ناني قررتي ايه ؟
- في ايه يا ياسو ؟!
- في حياتك يا حبيبتي، في career شغلك.
- ماله career شغلي ؟!
- يعني.. أنا رأيِّ ترجعي لـ career شغلك الأصلي بقى، وكفاية مغامرات بقى ولا ايه ؟
- هههههه.. أنت بتهزر صح ؟
- ليه ؟!، ايه المانع ؟!
أنت تقرأ
رحلة الأخذ بالثأر
Aksiyonكانت فتاة ناعمة تعشق الموسيقى، مدللة أبيها، وطفلة أخيها، مجرد فتاة هادئة، تملك من الأمان ثلاثة جواهر، حتى فقدت إحداها يومًا، وحينها.... تحولت النعومة إلى القسوة، واختفى الدلال والطفولة، أصبح الهدوء جمر من نار ينتظر الأمر للانفجار، قررت ترك كل ما تمث...
