مين اللي بعت الرسالة لنغم ؟!، وليه قال كدة ؟!، والدنيا مقلوبة ليه ؟!
الدنيا بعد ما اتظبطت بعد مهمة نغم، وكل المطلوب القبض عليهم اتقبض عليهم، والأوراق خلصت واتستفت، وتمام كدة، كان شيء طبيعي جدًا إنه ينزل خبر في كل الجرايد وصفحات النت يقول إن ياسين عايش، وإنه كان مختفي السنين دي كلها لظروف أمنية، وحتى إذا كان الخبر صغير كدة إلا إنه قلب الدنيا كلها، ما أصل محدش عرف إن ياسين رجع غير أهل البيت، حتى مفيش حد من العيلة ولا أصحاب ياسين ولا في الشغل عرف إنه عايش وإنه رجع من الأساس.
الرسالة كانت من حياة.. بنت خالهم.. حبيبة ياسين من لما كانوا في الجامعة.
ولإن الوقت كان اتأخر قررت نغم تكلمها الصبح وتشرح لها كل حاجة، وأتنهدت وبدأت تستعد للنوم؛ بس إيمان لاحظت إن mood نغم أتغير.
- ناني.. مالك يا حبيبتي ؟!، قرأتي ايه ضايقك.
- أبدًا.. دي حياة كانت باعته لي رسالة.
- حياة !، حياة بنت خالك أحمد ؟!
- آه.
- اشمعنى ؟!
- عشان نزل خبر إن ياسين عايش ورجع، وإنه كان مختفي بسبب ظروف أمنية.
- نعم !!، نغم أنتم محدش قال لحياة إن ياسين عايش وإنه رجع ؟!
هزت نغم دماغها بـ لا من غير ما ترد.
- أنتِ بتهزري يا نغم ؟!، ازاي متعرفيهاش ؟!، أنتِ عارفة كويس أوي هي كانت تعبانة في بُعده قد ايه.
- كنتِ عايزاني أعمل ايه يا إيمان ؟، هي بالفعل تأقلمت وظبطت حياتها على إن ياسين مبقاش فيها، أنا متأكدة إن ياسين لسه بيحبها، ومحبش غيرها؛ بس مش ممكن هي يكون قلبها أتغير ؟!، محدش عارف ايه اللي حصل في قلبها طول ٧ سنين غير هي وربنا وبس، وأنا مش هينفع أوجع ياسين، وبعدين محدش عرف غير احنا وأنتِ أصلًا؛ عشان سلامتنا وسلامة ياسين، كان لازم نتأكد الأول إن كل حاجة مشيت تمام، وإنه مبقاش في خطر على حياة أي حد فينا.
☆~☆~☆~☆~☆~☆~☆~☆~☆~☆~☆
وفي أوضة ياسين وثائر
- ياسو..
- هممم..
- الخبر أتنشر..
ياسين كان نايم على جمبه على السرير، مغمض عينيه، وحاطط إيديه تحت رأسه، وضهره لثائر، ولما ثائر قال له الخبر أتنشر فتح عينه في لحظة.
- خبر ايه ؟
- خبر رجوعك، وإن اختفائك كان بسبب ظروف أمنية.
- امتى ؟
- من الصبح؛ بس أنا لسه شايفه دلوقتي....
طال الصمت فـ قرر ثائر يقطعه تاني.
- أنت خايف تكون مشافتوش ؟
- خايف تكون شافته.
- نعم !!، مش فاهمها دي، يعني ايه ؟!
- نام يا ثائر.
- نام وكمان يا ثائر، لا دي فيها قاعدة بقى.
قام ثائر أتعدل ومستني ياسين يقول حاجة؛ بس طبعًا ياسين مش هينطق، ومنفض له خالص، ولسه مفتح عينيه؛ بس ذهنه في حته تانية خالص، في عالم مختلف.. وبعيد.. بعيد أوي..
أنت تقرأ
رحلة الأخذ بالثأر
Acciónكانت فتاة ناعمة تعشق الموسيقى، مدللة أبيها، وطفلة أخيها، مجرد فتاة هادئة، تملك من الأمان ثلاثة جواهر، حتى فقدت إحداها يومًا، وحينها.... تحولت النعومة إلى القسوة، واختفى الدلال والطفولة، أصبح الهدوء جمر من نار ينتظر الأمر للانفجار، قررت ترك كل ما تمث...
