Unicode~
"ဘာတွေရခဲ့လဲ"
နေအိမ်ရောက်ရောက်ချင်း ခေါင်းဆောင်ကတန်းမေးသည်။ ကျားမျိုးနွယ်ဆီသွားတာ ပထမဆုံးမို့ စောင့်နေတာ ထင်ပါရဲ့။ သယ်လာသော အိတ်ကို ခေါင်းဆောင်ထံသို့ ကမ်းပေးလိုက်ပြီး
"လက်သည်းတွေရယ် အမြီးရယ် မျက်လုံးအဝါရယ်"
"အဝါလား...အင်း ရှားပါးလွန်းတာမဟုတ်ပေမယ့် မဆိုးလှပါဘူး"
မြေခွေးတွေ ဝံပုလွေတွေရဲ့ အစိတ်အပိုင်းဆိုရင် ပေါများလွန်းလို့ အဝတ်အစားတွေကအစ သူတို့အရေခွံနဲ့ ချုပ်ဝတ်နိုင်သည်အထိပင်။ သဘာဝလွန် သားကောင်တွေက သေပြီးတာနဲ့ တိရစ္ဆာန်အသွင်သာ ပြောင်းသွားတာကြောင့် သူတို့ရဲ့အစိတ်အပိုင်းတွေကို အလွယ်တကူယူလို့ရသည်။
"ကျားတွေက အဖိုးတန်တယ်။ နောက်နေ့ များများလိုက်"
ခေါင်းကို ဦးညွှတ်လိုက်ပြီး အိပ်ခန်းထဲသို့ ပြန်ခဲ့သည်။ ဝါကျင်ကျင်မီးရောင်က အလင်းက အခန်းတစ်ခုလုံးစာ မလုံလောက်နိုင်။ ကုတ်အင်္ကျီကို ချွတ်လိုက်ပြီး ကျွဲခေါင်းရိုးနဲ့ လုပ်ထားသောနေရာမှာ ချိတ်လိုက်သည်။ အထဲက အနက်ရောင် ချည်သားအင်္ကျီလက်ပြတ်နဲ့ မိချောင်းသားရေသားဘောင်းဘီရယ်က ပနံသင့်လှသည်။ ကြွက်သားတွေ အများကြီးနဲ့ အဖုအထစ်တွေတန်းစီနေသော ယောကျ်ားတစ်ယောက်မဟုတ်သော်ငြား Taehyungရဲ့ ခန္ဓါကိုယ်က ကျစ်ကျစ်လျစ်လျစ် တောင့်တောင့်တင်းတင်းနဲ့မို့ ချောမောခန့်ညားပြီး ကြည့်ကောင်းလွန်းပါသည်။
ငှက်မွေးနဲ့ လုပ်ထားသော ဖောင်တိန်ကိုယူပြီး မင်ရည်ထဲနှစ်လိုက်ကာ ညစ်ထေးထေးစာရွက်တွေပေါ်မှာ စာတွေချရေးလိုက်သည်။
ကျွန်တော်က စာရေးလေ့ရှိသောသူမဟုတ် တစ်သက်လုံး ငွေဓါးရှည်ကိုကိုင်ပြီး ငွေဓါးမြှောင်ကို ခါးကြားထိုးထားခဲ့သူ။ ၆နှစ်အရွယ်တုန်းက အမေဆုံးတာတောင် ဘာမှမခံစားခဲ့ဖူးသူ။ ဒီလောက်ထိ အသည်းမာကြမ်းတမ်းလွန်းတဲ့သူဆီမှာ ပထဆုံးနူးညံ့မှုကိုခံစားရတော့ ၅မိနစ်မျှကြာတဲ့ တွေ့ဆုံမှုတစ်ခုကြောင့်တဲ့လား။
