Unicode~
တောင်ကြားတစ်နေရာ။
လမ်းကကြမ်းတာမို့ ခရီးပန်းသည့်အပြင် ထင်သလောက် ခရီးမရောက်။ လူသူမတွေ့နိုင်တဲ့လမ်းတွေထဲ ရမ်းသမ်းမောင်းခဲ့ရတာမို့ Roninလည်း အထိနာသည်။
အဲ့တာတွေကြောင့် မမြင်ကွယ်ရာလို့ထင်ရတဲ့ တောင်ကြားလမ်း တစ်နေရာမှာ နားလိုက်ကြခြင်းဖြစ်သည်။
"မောနေပြီလား"
Kimရဲ့ နဖူးက ချွေးများက တစက်စက်ကျနေတော့သည်။ ဆံပင်တွေကလည်း စိုရွဲလို့။ နေပူကျဲကျဲမှာမို့ ခရီးပိုပန်းသည်။ Kimဆို မျက်နှာလေးကို နွမ်းလို့။ ကျွန်တော့်ကို ချစ်မိလို့ဖြစ်လာတဲ့ အကျိုးဆက်တွေမလား။ ကြာရင် Kim ခံနိုင်ရည်ရှိပါ့ဦးမလား။
ဒီလို ဆင်းရဲဒုက္ခတွေမခံနိုင်တဲ့အဆုံး ကိုယ့်ဆီက ထွက်ပြေးသွားမှာလားဆိုတဲ့ အတွေးတွေနဲ့တင် ကိုယ့်မှာ ခြောက်ခြားရပါတယ်။
"မမောပါဘူး။ မင်းပဲ တစ်လမ်းလုံးမောင်းလာတာကို"
နဖူးထက်က စိုရွဲနေတဲ့ ဆံသားတွေကို လက်ဖြင့် ခပ်ဖွဖွသပ်ပေးသည်။ မျက်ဆံအနက်ရောင်လေးတွေ ပေါ်လာသည်။ သိပ်လှတာပဲ။ တကယ့်ကို အဖိုးတန်လေးတွေ။
"ချွေးတွေတောင် ထွက်နေပြီ"
"မင်းဆို တစ်ကိုယ်လုံး ရွှဲနစ်နေတာ"
နှစ်ယောက်သား တစ်ယောက်ကိုတစ်ယောက်ကြည့်ပြီး ပြုံးလိုက်ကြသည်။ ခက်ခဲလွန်းပေမယ့် သဘောကျကြတယ်လေ...ကြင်နာသူနဲ့ရှိနေရတာကိုပေါ့။ တစ်ယောက်တည်းရွှေဘုံမှာနေရတာထက် နှစ်ကိုယ်တူ ငရဲဘုံမှာနေရတာကို စွဲလမ်းနှစ်ခြိုက်တာ။
"ဒီတစ်ခါပြီးရင် ထပ်ထွက်မပြေးရလောက်တော့ပါဘူး"
"အင်း...."
'အင်း' လို့ပြောလိုက်ပေမယ့် ရင်ထဲကတော့ စနိုးစနောင့်။ Hawk မျိုးစုဝင်တစ်ယောက်အနေနဲ့ရှိခဲ့ဖူးတာမို့ Hawkတွေအကြောင်း ကောင်းကောင်းသိတာပေါ့။ သိပ်ဇွဲကြီးကြတာ။ အထူးသဖြင့် မျိုးစုနဲ့ဆိုင်တဲ့ကိစ္စတွေဆို ရေဆုံးမြေဆုံးလိုက်တတ်တာမျိုး။
ကိုယ်ထွက်ပြေးလာပြီဆိုတည်းက Hawk သိက္ခါ အနည်းအများတော့ ထိခိုက်လိမ့်မည်။ အဲ့အငြိုးတွေကြောင့် ဒီနေရာထိ လိုက်လာတာ။
ဒါ့အပြင် ကျွန်တော့်ကျားက သာမာန်မဟုတ်ဘူးလေ။
