Unicode~
Raven မြို့က ဒီနေ့မှ လူစည်နေတာပါပဲ။
အကြောင်းရင်းကတော့ လက်ကျန် Hawkတွေ အလုပ်ရှုပ်နေကြခြင်း။ အရက်ဆိုင်၊ စျေးဆိုင် စသော လူစည်ကားရာနေရာတွေမှာ တခြားမျိုးစုဝင်တွေကို မသိမသာစည်းရုံးသိမ်းသွင်းနေကြခြင်း။ ရက်ပိုင်းအတွင်းဖြစ်လာနိုင်မလားမသိပေမယ့် အတတ်နိုင်ဆုံးတော့ လှုပ်ရှားနေရတာပင်။
"ခင်ဗျားတို့ အခုတောင် ကိုယ့်ပစ္စည်းကိုယ်ပိုင်လို့လား"
"အလိုဗျာ...ကျုပ်တို့ပစ္စည်းတင်မက ကျုပ်တို့ကိုပါ ခေါင်းဆောင်ကပိုင်တာပါ"
"ကဲ....အဲ့တာပဲကြည့်! ခင်ဗျားတို့ခါးကျိုးမတတ်အလုပ်လုပ်တာတောင် ထမင်းနပ်မှန်အောင်စားရရုံပဲဆိုတော့"
"မကျေနပ်တော့ရော ကျုပ်တို့က ဘာတတ်နိုင်မှာလဲ။ နှစ်ပေါင်းများစွာဖြစ်လာတဲ့ စနစ်လေဗျာ"
လက်ဖက်ရည်ဆိုင်က ဟိုဟိုဒီဒီ ရောက်တတ်ရာရာစကားတွေထဲမှာ စည်းကမ်းမဲ့နေတဲ့ စနစ်ကို မကျေနပ်ကြသူတွေရဲ့ရင်ဖွင့်စကားတွေပါလာသည်။
နည်းနည်းစျေးကြီးကိန်းကြီးသော အရက်ဘားလိုနေရာတွေကတော့ အာဏာရှင်အသိုင်းအဝိုင်းတွေရှိနေတာကြောင့် အကုန်လုံးက မိုက်မိုက်ကမ်းကမ်းတွေချည်း။ စည်းရုံးသိမ်းသွင်းဖို့ မလွယ်ကူ။
ဆန်အရက်ဆိုင်၊ ပြန်ကျစျေးဆိုင်လေးတွေကနေသာ သတင်းတွေ အတွေးအမြင်တွေကို ဖြန့်နေရသည်။ လူလတ်တန်းစားနဲ့ အောက်ခြေလူတန်းစားတွေကတော့ မွန်းကြပ်နေကြပုံ။ သားစဥ်မြေးမြစ်က အာဏာရှင်ခေါင်းဆောင်တွေအတွက် အလုပ်အကျွေးပြုနေရပြီး ကိုယ်လုပ်သမျှအလုပ်ကအကျိုးရလဒ်က ခေါင်းဆောင်ဆိုသူဆီရောက်သည်။
တကယ်ပင်ပန်းရတဲ့မိမိတို့မှာတော့ ကိုင်းဖျားကိုင်းနား အကြွင်းအကျန်လောက်သာ။
"အင်း...မင်းတို့ပြောတာလည်း မှန်သလိုပါပဲ။ ဒါပေမယ့် ကျုပ်တို့က အသက်လည်းရလာပြီ အင်အားလည်းမရှိဘူးလေ"
ဒီပုံအတိုင်းဆို တော်လှန်ဖို့ကိစ္စကို စိတ်ဝင်တစားရှိကြပြီဟု ယူဆရသည်။
မွန်းလွဲချိန်လောက်ရောက်မှ Hawkတွေလည်း သူ့အိမ်ရာကိုယ့်အိမ်ရာအသီးသီး ပြန်ကြပြီး တချို့ကတော့ အိမ်တော်ဆီသို့။
