البطل المغمور "زهور القمر"

الجزء الأول

العمل الصالح هو الرفيق الوحيد في القبر..
واحب الاعمال إلى الله الصلاة في وقتها...
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
•••قبل شهر ونصف••••
في مدرسة المجد للبنات...
الدور التاني...
في الممر اللي يرفع للفصل اللي تقرا فيه دانية...
قدام معمل الفيزياء..
واقفه هي وقدامها استاذها جمعه..
ووراها جيهان خطيبة جمعه..
دانيه كانت واقفه في مكانها مصدومه في كلام استاذها...
وهو كان واقف مصدوم يشوف لخطيبته..
ملامح الغضب اللي ع وجهها والدموع اللي ينزلوا من عيونها..
خلاه يستشعر خطر ردة فعلها اللي ممكن تضر دانيه بالدرجة الأولى...
ولأنه الخطر هدا لو وقع حيكون هو المتسبب الاول فيه..سارع بتفاديه...
مشي طول فات من حدا دانيه وجي لجيهان خداها من يدها وهو يقول:تعالي..
جيهان وهي ماشيه معاه:شن قلتلها..
كيف جي بيرد شاف طالبه جايه..
خلا روحه عادي وهي لاحظت ودارت روحها عاديه..
البنت كملت طريقها..
وهو خش بجيهان لحجرة اعضاء هيئة التدريس..
جيهان وقفت وربعت ايديها وقالت:شن كنت تقوللها الجربوعه هادي..
جمعه وهو عاقد حواجبه:شن بنقوللها طالبه عندي شن طبيعة الكلام اللي بيكون بيني وبينها!؟
جيهان:انت ادرى..ضيقت عيونها وكملت تقول..باك تحسابني غبية وهبله ولاعميه بش مانفهمش ولانشوف تصرفاتك مع الفرخه هادي..لاعزيزي اني واعيه وفاهمه كل شي وفاهمه حتى تصرفاتها الصايعه هادي.
فنص فيها وقال:جيهان..
قدمتله وقالت بحده:تعرف لو تطلع بتسيبني ع خاطرها ندير شي عمرك ماتتخيله..
جمعه:تهددي في مني انتي..وبعدين من قالك بنسيبك!؟ لو ع الدوة اللي صارت بيني وبينك اخر مرة كنت قاصدها بش نأدبك بس لأنك تماديتي هلبه وتجاوزتي حدك..الاوهام اللي في دماغك هادي حوليها..
هدت شويه..بس مازالت تشوفله بنفس النظرات الحاده المليانه دموع..
جمعه قعد يشبحلها شويه بعدين قال:وكأنك ع العرس خلاص حددت الموعد...
توسعوا عيونه ع الآخر من المفاجأة...
جمعه:بعد نهاية الفصل الفصل الدراسي ع طول..
ارتسمت ع وجهها ابتسامه بعدين قالت؛بس لازم تجي امك لأمي وهي تقول بروحها..
هو غمض عيونه وفتحهم مع تنهيده وهز راسه بإيجاب..
جيهان ابتسمت بحب وقالت؛اسفه..
رفع حاجبه وقال:مش مشكله...بس بنقولك..
عقدت حواجبه وهي مبتسمه بتساؤل..
جمعه:خوك راجح...شفته امس قدام المدرسه راكب موطو شن عنده؟
جيهان رفعت حواجبها ونزلتهم بعدين قالت:والله شن بنقولك..البنت هادي اللي اسمها دانيه بنت مشبوهه..
تبدلت ملامح وجهه للإمتعاض..
جيهان:هو هكي قالي وقاعدين يراقبو فيها شاكين انها تبيع المخدرات في المدرسه..
جمعه:وع اي اساس شكوا فيها؟في حالات ادمان اكتشفوها هني؟
جيهان؛لا بس حتى هو شافها مع هداكا متاع المخدرات وشك فيها..
جمعه هز راسه وقال:باهي بري توا بعدين نكملوا كلامنا
هي بإبتسامه:تمام..
ومشت طلعت من حداه..وهو معاها بعيونه لين طلعت..
قعد واقف لحظات يشبح للباب.
بعدين غمض عيونه بشده من الغضب...ولف ومشي للطاوله نزل عليها بإيديه وخبطها...وقعد متكي عليها وهو يتنفس بسرعه من الغضب...
••ودانيه..
في الفصل تنظف فيه مع زميلتها وهي تفكر في اللي صار قبل شويه...مازال مش مستوعباته..ولخبطلها عقلها هلبه..
🍁🍁🍁🍁🍁
في الحديقه العامه...
هيثم ونسيبه مع ريحان وجنان يفطروا..
وماجده واقفه بعيد عليهم شويه تتكلم بالتليفون..
ماجده تنهدت وقالت:صباح الخير مجيد.
"شن تبي متصله!؟"
ماجده:نبي نقعمزوا مع بعض نهدرزوا ونتفاهموا بهدوء.
"لانبي نقعمز معاك ولانهدرز..كانك ع الطلاق بنطلقك يومين بالكثير وتوصلك ورقة الطلاق.."
هي غمضت عيونها بإحباط وقعدت ساكته..
"ايه ومعلومه ع الماشي خطبت وحده اصغر منك واحلى منك وظفرها برقبتك"
فتحت عيونها وقالت بعصبيه:برا عفريت يكسر رقبتك ويفصلك بين 16 إن شاء الله..يااجرب ياقفاص يامعفن ظفري اني برقبة 100 من شكالك يافسخه معفنه..وروروروروي...افتكيت منك..وسكرت في وجهه وهي تقول...سحيقه ومسحق..
مررت نظرها قدامها..بعدين حطت ايديها في نصها والتفتت بتولي للعيله..
لقتهم كلهم يشبحولها وع رووسهم علامات استفهام..
خدت نفس..بعدين نزلت ايديها ومشتلهم..
وصلت فيهم وقالت:فطرتوا حبيباتي..
نسيبه:شن في خالتي!؟
قعمزت ماجده وقالت؛شي واحد قلل ادب عطيته ع راسه..
هيثم قعد يشبحلها بشك..
ماجده:هيا افطروا افطروا..شبحت للتوأم ابتسمت وقالت..عجبوكم الفطاير...
والبنات يجاوبوا فيها...
وهيثم ونسيبه بعد كانوا يشبحولها شبحوا لبعض..
بعدين اللي هدا لهي في فطوره..
🍁🍁🍁🍁
الساعه الثانية عشر بعد الظهر...
كانت رتاج مع حمواتها تعاون وتتحرك..
وهما يحاولوا فيها بش تقعمز لكن هي سكرت راسها تبي تكسب العيله وثبت روحها...
وفي وسط هالزحمه كانت ضرتها تتحرك من فم ساكت وماجتش ناحيتها بكل..
لكن بنت ضرتها عيونها عليها وكانت نظراتها مليانه حقد..
رتاج؛هكي كويس..
:ايه كويس...ماشاء الله عليك تعرفي طيبي كمية كبيرة..
رتاج:متعوده في حوش بوي ديما عزايم.
:ماشاء الله...
ابتسمت رتاج وقعدت تحرك في الطنجره بعدين غطتها...
:خليها ع نار هاديه..
رتاج؛ايه ايه...وهدت النار تحتها ع الآخر..
وقعدت ضم في الحوسه..
بعدين حماتها قالت؛همانه حبيبي بري بخي معطر في الحوش..
همانه:حاضر عمتو...ومشت طلعت..
:هيا رتاج اطلعي ياسرك حركه..خوي ياخد ويوصي عليك يقول دلعوا صغيرونتي وماتعبوهاش..
ضحكت رتاج بخجل..
حماتها بإبتسامه:الله يبارك عليك..هي تعالي..
ومشت طلعت رتاج مع حماتها..
وهما طالعات كانت همانه تراقب فيهم..
راجتهم لين ادرقوا..
ومشت تجري للكوجينه..
خشت وعلت النار تحت الطنجرة..وجري طلعت من الكوجينه...
🍁🍁🍁🍁🍁
"هدا خيره هبل!؟"
دانيه:والله لتوا نرعش ياسارة مش مصدقه بكل..
سارة:ردي بالك تحكي لغيري بش ماتطلعش الدوة وتصير مشاكل..
دانيه:ايه اكيد اني حكيتلك انتي بس..لكن اني توا عقلي بيوقف ونبي نعرف خطيبته سمعت الدوة وشن صار بيناتهم..
ع جية وحده من البنات تجري..
:وحش الممرات يابنات..
طول البنات خشوا يجروا لفصولهم..
ولأن دانيه فصلها كان الأخير..كانت اخر من وصل والابله شافتها..
؛دانيه!..
استاذ جمعه؛عندها حصة ياابله معليشي..
الأبله تحشمت وقالت؛باهي..
ولفت ومشت..
وجمعه قال لدانيه:استني ماتخشيش.
ودانيه ترعش مع بعضها...
وصل فيها وقال:اسمعي اللي صار بكري انسيه كإنه ماصارش..
دانيه؛علاش شن صار بكري استاذ!؟
هو رفع حواجبه..
وهي تشبحله بتساؤل مصطنعه..
نزل حواجبه وقال؛باهي خشي خشي..
هي مشت طول خشت وفي نفسها تقول"مريض"
وهو خش بعدها وسكر باب الفصل..
🍁🍁🍁🍁🍁
في مركز علاج الإدمان...
كان مقعمز في مكتبه وواحد من النزلاء قدامه يتكلم هو وياه..
هيثم؛قالت بترفع قضية ع ادارة المركز..
فاتح قعد يشبح لهيثم وهو ياكل في شاربه التحتاني بعصبيه بعدين قال:معليشي دكتور نبي التليفون..
هيثم شبح للهاتف متاع المكتب..
بعدين ناض وهو يقول؛خود راحتك..
ومشي طلع من المكتب...
هو قعد يشبح للتليفون شويه وهو يمضغ في المستكه..
بعدين ناضله وقام السماعه وقعد يضرب ع الرقم..
وحط السماعه ع وذنه...
••في قاعة الإجتماعات لواحد من الاحزاب السياسيه..
كانت مقعمزة في كرسيها تراجي في الاجتماع امتى يبدا..
كيف جت بدير تليفونها صامت..جاها اتصال..
شافت الرقم خافت...كان رقم المصح..
مررت نظرها حواليها من غير ماتلفت انتباه..بعدين ناضت ومشت طلعت من حداهم..
بعدت عن مكان القاعه وفتحت الخط وردت..
نوال"ام فاتح":ايوه..
مافيش رد..
نوال؛آلو..
سمعت تنهيده بعدين صوت يقول
"شن فكرك بيا"
قلبها رجف..وتسارعت نبضاته ودموعها عبوا عيونها..
"تفكرتي ان عند ولد ملوح في مركز الادمان لما صارت حاجه تمسك..وتمس السمعه متاعك ولا..لكن لما سمعتي بغيرها ماهمكش ماحرك فيك شي..تي من هو فاتح كلب جابلكم العار تتمنوا موته بش ترتاحوا منه وينقطع عاركم"
هي ماقدرتش تتكلم بكل ودموعها كانوا ينزلوا ورا بعض...
"اسمعي..القضيه اللي بترفعيها خاسرة..حنوقف في المحكمه ونقول المراة هادي كذابه مش امي مانعرفهاش.. اني مانعرفش الناس هادوا..اني ماعنديش مالي..اني مقطوع من شجرة ماعندي حد...فاهمه...ماعندي حد"
وسكر الخط في وجهها..
هي نزلت التليفون..ومسحت دموعها بسرعه...
وخدت نفس...ومشت ولت طول لمكان الإجتماع...
🍁اما هو طلع من المكتب..
وقف في الباب وهو شاد روحه..يمضغ في المستكه ويفش غله فيها ويقول:خلاص دكتور كون هاني معاش في لاقضيه ولاهم يحزنون..
ومشي طول بدون مايعطي فرصه لهيثم يرد عليه...
مشي ودموعه ينزلوا منه سيل..
وقلبه موجوع....
كان يقاوم في الوجع متاعه..يبي شعوره اتجاه اهله يموت يبي ينساهم زي ماهما نسوه وطلعوه من حياتهم..
وهيثم واقف يشبحله وهو يمشي ونظراته كلها أسف..
▪▪▪▪▪▪
◇فاتح كان كتوم مايحبش يتكلم عن شي يخصه..قليل النادر ماكان يبوح عن اللي في داخله ويحكي..بس كل شي باين في عيونه...ورا الملامح المتمرده اللامباليه والباردة احيانا...جبل اوجاع وآلام...حرمان..احتياج...
اني تمنيت لو نقدر نديرله شي..بس مادام هو ماطلبش مساعده وقتها اني مانقدر نديرله شي...للأسف
▪▪▪▪▪▪
"حيي عليا البصله شاطت"
هادي حماة رتاج بعد خشت الكوجينه وشمت ريحه حرق الطنجره وهو مغبق الدنيا...
طول طفت تحتها وهي تقول:مش قتلك هدي النار تحتها يارتاج..
رتاج وهي مصدومه وترعش:والله هديتها ع الآخر والله العظيم..
وحده تانيه قالت؛حتى انتي ربي يهديك كان درتيها بروحك..
:هي حلفت ديرها مابيتش نكسر حلفتها...وتدوي ع اساس انها تعرف..
رتاج؛والله العظيم نعرف الله..وهديت النار ع الآخر في حد علاها متأكده..
:خلاص خلاص ماترعيشيش روحك اطلعي قعمزي حني تو نتصرفوا..
رتاج قعدت تشبح للطنجرة ودموعها تنزل..
:علاش البكي ماصار شي..هي تعالي اطلعي معاي..
خدت رتاج وطلعت بيها..
وخواتها قعدوا يجروا بش يديروا طبيخه غيرها..
رتاج؛انتي مش قتيلي هدي النار والله طول هديتها..
:خلاص مش مشكله حبيبتي خلاص..بري خشي قعمزي..
ومشت ولت الكوجينه وخلتها...
ورتاج وهي منحرجه ومضايقه ع الاخر خشت للدار اللي كانت معبيه بالسلفات والاقارب والكل يشبحولها..
هي قعمزت وخدت شطنتها بطلع التليفون..
جو عيونها في عيون ضرتها...
قعدت تشبحله بنظره رتاج ماقدرتش تفهمها..
نظرة قهر..ولاكره ولاانكسار..
ع خشة همانه؛انحرقت منك البصله ابله رتاج؟
كلهم شبحولها..
رتاج مابتش ترد..
همانه؛ووك عليك عمله الحوش كله ريحة شياط حتى الرجاله برا شموه..
بنت خالة همانه؛حتى راجل عمتو عاركها قاللها علاش تخلي في فرخة دير الغدي..
رتاج:فرخه!؟
ام البنت قالت لبنتها؛خلاص انتي وياها اسكتوا واطلعوا برا..
همانه؛باهي..شبحت لرتاج وقالت..معليشي ابله رتاج تو تتعلمي وتولي زي عماتي في تطييب...مانبيش نقول زي ماما لأنها صعبه عليك..
ام همانه بصوت عالي:همانه..اطلعي برا..
همانه؛حاضر ماما..
وخدت بنت خالتها وطلعوا..
ورتاج حطت عيونها في تليفونها وهي شاده روحها ماتبيش تبكي..زبطت ان همانه ورا اللي صار ومع همانه ماتقدر دير شي...
وضرتها واختها يشبحولها..
:تمسح ع الكبد همونه..
ام همانه؛حتى اني متهنيه بيها..بوها ماعنداش الروح معاها لو شن دير مايديرلها شي..
:نجيها ياربي هادي اللي بتجيبلك حقك..
هي تسمع في اختها شن تقول وعيونها ع رتاج ...
🍁🍁🍁🍁🍁
الساعه الواحده ظهرا..
نهاية الدوام...
طلعوا البنات برا المدرسه وهما يهدرزوا..
ساره بقلق:شغلتني هلبه..
دانيه:ان شاء الله مافيها شي..
"دنو"..
دانيه:خلاص ساره بنمشي توا سمعتي عنها شي طمنيني..
سارة هزت راسها بإيجاب..
مشت دانيه مع هبه للباص ولما جو بيركبوا صاحب الموطو جي..
ابتسمت دانيه وركبت طول...
والباص تحرك..وصاحب الموطو وراهم..
وسارة معاه بعيونها وهي تقول في سرها"لو فيه شره ليها اصرفه عنها ياربي"..
ومشت ركبت في باصها اللي جي..
وتحرك حتى هو وفات من قدام جيهان وجمعه..
جمعه:خوك مايراقبش فيها زي ماانتي فاهمه كان هدا خلاص تموا العناصر مافيش من يطلع يراقبها غيره هو..
جيهان:شن قصدك..
جمعه؛انتي فاهمتيه...ولبس نظاراته ومشي بيركب السيارة..
جيهان:راك تنسى..
التفت وقال؛شنو..
جيهان؛الموعد..
هو هز راسه وركب السيارة..
وهي مشت ركبت سيارتها وفي عقلها يدور كلامه عن خوها ودانيه..
سكرت باب السيارة وهي تقول:مستحيل..لو تقعد اخر بنت في الدنيا راجح مايشبحلهاش..
تحركت بسيارتها..
وجمعه تحرك وراها وهو محروق ومقهور ومش عارف شن يدير..
خوفه كله من راجح لو فعلا دارها وارتبط بدانيه..
🍁🍁🍁🍁
وصلوا باصات تهاني وسارة مع بعض..
نزلوا الزوز..
وتلاقوا..
سارة؛تاهو..
تهاني وهي مضايقه؛شن جو سارة..
سارة ضيقت عيونها وقالت؛خيرك تاهو..
تهاني:الحقير هدا...اليوم ضايقني بسيارته واني مروحه بالباص لدرجة صاحب الباص قالي ياديري حل ياسيبي الباص..حطني في موقف حقير ومسخ...
سارة:خبري خوتك..
تهاني؛ايه بنقوللهم مال شني خلاص معاش فيها..
وقعدوا يمشوا الزوز مع بعض لين قربوا من الورشه..
تهاني شافت رفيق واقف قدامها اشرتله يجي..
بعدت سارة عمها..
وتهاني مشت وراها للزنقه ورفيق جاها..
رفيق وعيونه ع سارة:خيرك؟
تهاني؛في واحد حقير مدرهلي كبدي في المدرسه..
شبحلها رفيق وهو يفنص بغضب..
تهاني؛ضايق الباص والسواق قالي ديريله حل ولامعاش تركبي..
رفيق بغضب:تعرفي اسمه ال....وبلعها وسكت..
تهاني؛ايه مصعب *****
رفيق:نهار فية اصله احرف!
سارة؛تعرفه!؟
رفيق؛بري انتي توا بري روحي..
سارة:باهي..
ومشت بسرعه..
ورفيق مشي ولى للورشه..
ع جية خليل..
وقف وقعد يراجي فيه ينزل من السيارة..
نزل خليل ومشي بيخش للورشه..
وقفه خليل لما شد ذراعه..
خليل بإستغراب:شن في!؟
رفيق:تعرفه مصعب ****..
خليل هز راسه وقال:صاحب جهاد..خيره؟!
🍁🍁🍁🍁
وجهاد كان في كلية الطب..
داير موعد مع بنت متعرف عليها من فتره...
اتفق يتلاقى معاها في مكان جاي في تركينه فاضيه..
بش ياخد راحته بعيد عن عيون البشر..
وناسي العين اللي لاتغفل ولاترقد ولايغيب عنها شي لو كان تحت سابع ارض...
كيف وصل للمكان هدا قام تليفونه بيكلم البنت..
سمع صوت بكي...جاي من داخل..
التفت نص التفاته..وقعد يسمع...
"كيف دير فيا هكي كيف..اني بنت عمك ياحقير عرضك.....................حبيتك ياوسخ حبيت وحطيت فيك الثقه قلت ولد عمي مستحيل يرخي بيا اني بنت عمه وفي وجهه...............ياحيوان!....اني عرفت حد غيرك ياوسخ يامنحط"
وقعدت تبكي..
جهاد قدم خطوة..وراها خطوه ..بعدين وقفت..وميل راسه وقعد يشوف..
لقي بنت مقعمزة وعاطيه بالظهر..
تبان لابسه بلوزة لونها بترولي..وتحتها سروال ابيض..ووشاح مخربش..وفي رجليها سبديروا ابيض..تحك بيه في الارض.
وهي متابعه تقول..
"الله يلعنك ويلعني اني الف مرة اللي بعت شرفي وشرف خوتي وبوي لواحد ماعنداش شرف وسخ زيك انت..الله يلعنك الف مرة..الله اللي درته تلقاه في المراة اللي بتاخدها بعدين وبناتك يافاسد......الو....الو.....ياحيوان..ياحيوان الله ينتقم منك"..
نزلت التليفون وقعدت تقول..
"حي عليك يامريم...ضعتي يامريم...ضيعتي روحك ضيعتي سمعة بوك وخوتك..حي عليك يامريم ..حي..حي..حي"
وقعدت تخبط ع وجهها..بعدين حطت ايديها ع وجهها وقعدت تبكي بالعبرة..
وعيون جهاد عليها...
وجعاته...واول مرة توجع بنت من نوعيتها..
بنت سلمت نفسها للحرام..وباعت اعز ماتملك بلاش...
تقول حطيت فيك الثقه...اي ثقه تحطها البنت في شاب اجنبي عنها حتى لو كان ولد عمها او ولد خالها!!؟
هلبه هكي توا...تقول حبيته...وثقت فيه...صدقته..
يقولي انتي مرتي..
يحلفلي انه مش حيرخي بيا..
يقول نموت ولانخليك..
وهي تصدق طول...غباء...سذاجه...جنون...!؟
وبعد مايطيح الفاس بالراس...وتروح السكرة وتجي الفكره..
ويهرب بشرفها لغير رجعه..
تقعد تبكي وتندب زي مريم....
جهاد...وقتها اذكر موقفه مع رتاج..كيف استاقظت لروحها في أخر لحظة ونقدت نفسها...
بس البنت هادي وكأنها مشت للحفرة برجليها وهي مغمضه عيونها حواليها يقولوا "ردي بالك قدامك حفره ماتكمليش"
بس هي ماكانتش تسمع لحد وكملت الطريق وطاحت في الحفره..
الغارقه...المظلمه...الطلعة منها شبه مستحيله..
شافها نزلت ايديها ومازال صوت عبراتها يطلع..
ناضت بصعوبه وقعدت تمسح في وجهها..بعدين التفتت..هو ادرق..
خدت نفس..ولبست شنطتها كويس..وبدت تمشي..
وكانت مشيتها مشية تعب...
الدنيا كانت سودا في عيونها...
طلعت من هديكا التركينه...
وقفت وقعدت تشبح للكياس والسيارات اللي تمشي...
نظراتها المتعبه تلحق في السيارات..
وعقلها يفكر...لو توا تمشي ترمي روحها قدام وحده فيهم وترتاح...
وهو واقف مدرق عنها بس يشبحلها...وفهم في شن تفكر...
هي في هاللحظه خدت قرارها..
خدت نفس عميق..وجت بتمشي..
لولا شنطتها اللي انشدت بقوة وشدتها معاها...
وهي مفجوعه شافت لشنطتها بعدين شافت من شدها..
جهاد؛وين ماشيه..
هي بخوف جبدت شنطتها ومشت بسرعه هاربه منه..
هو تلقائيا..بدون مايحس لقي روحه ماشي وراها...
وهي تمشي بسرعه وخايفه..
لما خشوا في مجمع هي دارت روحها عاديه بش ماتلفتش الإنتباه..
وهو عيونها عليها وبس..
وصلت في المبنى خشتله تجري..
وهو قعد واقف برا..يشبح للمبنى...
"جهاد"..
هو انخلع وشاف للبنت اللي مواعدها.
قعد يشبحلها ويفكر في اللي كان ناويلها عليه...
جي بين عيونه منظر مريم..
وعياط رتاج وبكاها هديكا الليله..
وطيف اخته جي بين عيونه..
غمض عيونه بشده بعدين فتحهم..
؛خيرك جهاد فيك حاجه؟
جهاد حرك راسه بالنفي وقال؛صارلي ظرف بنمشي..
:خوفتني جهاد قولي شن صاير؟!
جهاد مشي وهو يقول؛مافي شي قتلك..
:باهي بالله عليك طمني ماتخلنيش هكي..
هو يسمع في نبرة الخوف في صوت البنت..
حسها خايفه عليه بجد..
كره نفسه هديكا اللحظه هلبه..
كره استغلاله لعاطفة الأنثى وهشاشة مقاومتها للإهتمام والكلام الحلو..
كره نفسه لما تفكر قداش وحده وقع معاها في الحرام لما لعب بمشاعرها وملكها وخلاها تحت امره..
كره نفسه وين تفكر اللي صارله مع رتاج بعده مااتعضش بكل..
ماخافش ع اخته...مافكرش في اخته..
زاد كره نفسه..لما وصل لنتيجة ان اللي يدير فيه في اعراض الناس حيلحقه في عرضه...
كم من واحد من ضحك على وحده وجردها من عفتها وشرفها..
وفي نفس الوقت كان في غيره يجرد في اخته من عفتها وشرفها..
اللي ديره في الرخيص تلقاه في الغالي..
هدا مش بس مثل..
هادي قاعده..سنة في هالحياة وماشيه..
زي ماانت تضحك ع بنت وتستغل فيها بش تشبع شهوتك..
فيه من يشبع في شهوته في اختك ويضحك عليها وهازي عليك كيف ماانت هازي ع الرجاله اللي في حوشها..
اللي حطوا فيها الثقه ويحسابوها اهلها...
طبعا مش قاعده..
لو كان في وحده في عيلة ما ضيعت شرفها معناها في حد من عيلتها دار هكي ولقاه لاابدا مش قاعده..
في من بنات...عندهم خلل في التربيه...
زي مريم توا...البنت الوحيده ع 6شباب...
خوتها وبوها ناس ليهم قدرهم واحترامهم..هما صح ناس حالتهم الماديه متوسطه..
بس بأخلاقهم وسمعتهم الطيبه اغنياء...
بوها راجل مقدر..
وخوتها نعم الرجال متدينين واخلاقهم جدا عاليه..
عند ورشة حداده مشهورة يخدموا فيها كلهم..
ومؤخرا ولت ورشة لتركيب البيبان والرواشن اللي يخصوا ماركة معينه...
زوز منهم متزوجين وواحد منهم خاطب والباقي عزابه..
مريم الأخيره..الصغيره..
امها بتموت عليها...وبوها وخوتها ماعندهمش معاها الروح..
مريم في عيلة كلها ذكور ماعندهمش بنات بكل..
يعني عمامها كلهم ذريتهم ذكور ومافيش بنات..
كانت عندها عمه وحده وتوفت..وبعد جت هي ولت اهم الأحفاد..
ادلعت ع الآخر....وكانت طلباتها كلها مجابه...
في واحد من ولا عمها حط عليه العين قرب منها صداته هلبه..
بس هو لف ع عقلها بكم كلمه وحركة خلوها تلين معاه وحباته بصدق..
التمادي في العلاقه بدي في مكالمات التليفون..
هي في اول كانت ترفض..بس بعدين رضخت ورضت..
وتطورت الحكايه لين وصلت في اللقاءات اللي يكون شيطان حاضر فيها وبقوة..وولد عمها شيطان بروحه..
وفي يوم من الأيام..استغل جيتها عندهم بش تعاون مرت عمها...ووقع المحظور....
ومن بعد هداكا اليوم....بدي يتهرب منها وهي قرب تنجن من تغيره معاها بعد ماخدي منها اللي يبيه..
وفي يوم سمعت بيه سافر برا البلاد بش يكمل قرايته..
قريب طلعت من عقلها...
وقعدت وراه لين حصلت رقمه..
واتصلت بيه فهاليوم..
وسمعت منه نكرانه للي صار واتهامه ليها بأنها داراته مع غيره مش هو بس..
طبعا اي بنت تسلم شرفها بداعي الحب المزيف هكي يفكروا فيها انها رخيصه...
🍁🍁
روحت مريم للحوش ..
لما خشت قعدت تشوف لخطوات رجليها زي ماتعودت من بعد اللي صار..
مش هاين عليها حوش بوها الطاهر الشريف يتنجس بخطواتها..
سكرت الباب وهي تسمع في اصوات هدرزة بوها وخوتها وضحكاتهم..
هالرجاله اللي باعت شرفهم ووسخت عرضهم..
هالرجاله اللي عاشوا عمر روسهم مرفوعه...حيجي يوم وبسببها هي تنكسر رقابيهم وروسهم ادلدل من الخزي..
لما بانوا عليها..
عيونها جو ع بوها...
الراجل اللي مدايرها ضي عيونه..
وديما يحكي ع اللي بيديره لما تتخرج من الطب..
واللي بيديره في عرسها لما تتزوج...
من غلاوتها وكبر قيمتها عنده...
شي يقهر..لما تلقى بنت وضعها زي وضع مريم ضيع عقلها وتبيع كل شي غالي عليها في لحظة ضعف شيطانيه..
"مريومه"
ارتسمت ع وجهها ابتسامة باهته لما سمعت خوها ينادي فيها..
بوها:اووي مريومتي روحت...خلاص حطي الغدي يامراة..
مريم؛لاتغدوا انتو بابا ماعنديش نيه..
واحد من خوتها؛لالا انتي وضعك ماينسكتش عليه باين عليك مريضه وجهك اصفر وحاسك مرخية مش زي قبل..
بوها بقلق:صح كلامك..بنتي قولي شن في تحسي في حاجه..
مريم حركت راسها بالنفي وقالت؛لالا بس ضغط قرايه وامتحانات..
واحد تاني من خوتها قال:هالقراية اللي بتقتلك هادي..اسمعي نقولك حاجه..فوتيها اليوم..وبعد العصر نطلعوا اني وياك في مول مفتوح جديد فيه حاجات مليحه تعجبك..
ع جية امها؛ايه بنتي اطلعي غيري جوك القراية سلباتك ياماما..
مريم؛ياريت والله بس خلاص توا عندي امتحانات مانبيش نضيع وقت..
خوها الكبير:قولي مريم ناقصاتك حاجه تبي حاجه..شن ماتبي يجيك مادوريش..
بوها:ايه بالذات في قرايتك مش خسارة في مستقبلك بنتي.
مريم حس روحها قاعده تتعذب اشد العذاب..
بلعت ريقها اللي نزل عليها زي النار يحرق في جوفها وقالت:لالا والله مانبي حاجه...حبيبتي ماما خليلي غدي ع تركينه بنخش نرقد شويه تاعبه.
ومشت طول لدارها..
امها شبحتلهم وقالت:نادمه اللي خليتها تخش طب..
بوها؛معليشي خلوها ع راحتها توا..تو بعدين نهدرز عليها ..
:واني وراها لين تطلع من الدار اللي حابسه روحها فيها القراية مش هاربه..
هي كانت ورا باب دارها تسمع فيهم..
حطت جبهتها الباب وغمضت عيونها بشده وقعدت تبكي بصمت..بألم..بقهر..بندم...وبحسرة..
🍁🍁🍁🍁
الساعه الرابعه عصرا...
خشوا للمستشفى هو وبناته التلاته...
رافع وحده من بناته في حضنه..
والزوز التانيات ع يمينه ويساره...
ريحان:بابا ماتوجعش ولا..
هيثم حرك راسه بالنفي وهو مبتسم بعدين قال:لالا بابا مش حتحسي بشي بكل..انتي تكوني وقتها راقده مرتاحه وتحلمي احلام حلوة...
ريحان:نحلم بشني بابا؟
هيثم:اي حاجه حلوة تحبيها..
ريحان؛نبي نحلم بماما..
سارة ابتسمت وعيونها تعبوا دموع..
هيثم:ان شاء الله تجيك ماما في الحلم وتشوفيها..كان شفتيها خوديلي منها بوسه باهي..
ضحكوا البنات.
ريحان بضحكه؛حاضر..
هو ضحك وباسها من خدها وقال:اااه..محلاها بنتي..
وصلوا للأصنصير وخشوله..
ولحظات ووصلوا للدور اللي فيه غرفة العمليات اللي حيديروا فيها العمليه لريحان..
دكتورة اللي حدير العمليه صاحبة خبرة وقديمة في المجال تخصصها جراحة قلب اطفال..
خدت البنت وهي تهدرز عليها وتضحك معاها ومعاها زوز ممرضات...
ومن بعدها معاش شافوا منهم حد...
سارة قعدت تشبح لبوها كيف واقف يشوف لباب غرفة العمليات..
شافت كيف صدره يعلى ويهبط من سرعة التنفس..
جاته وشدت يده وقالت؛حتطلع من هني احسن من ما خشت..
شد ع يد سارة وشبحلها بعدين نزل عيونه وهز راسه..
شويه سمعوا صوت بكي..
التفتوا لقوا جنان مقعمزة ع الكرسي وتبكي..
مشولها هما الزوز..
سارة قعمزت جنبها..وهيثم قعمز قدامها ع روس صباعه..
سارة؛جنونه خيرك ياعمري..
هيثم؛بابا حبيبي تو تطلع اختك من هني بإذن الله وتصح وتولي احسن من قبل..تلعب معاك وتجري ودير اللي تبيه ومعاش تمرض مرة تانيه..
شبحتله جنان وقالت؛حقه بابا..
مسح هيثم دموعها وقال:حقة ياقلبي حقه..
جنان:بابا..ضبطني..
ابتسمت سارة بالم من بين دموعها..
هيثم خداها في حضنه وقال؛تعالي يابابا تعالي عمري تعالي..
وقعمز ع الكرسي وهي فحضنه..
شويه وهدت جنان...وهي تسمع في بوها كيف يردد..
"لاحول ولاقوة إلا بالله"
وجنبه سارة فاتحه ع تطبيق القرآن في الهاتف وتقرا...
🍁وفي الحوش نسيبه وماجده قاعدين ع نار..
نسيبه وهي متكيه حدا الروشن وتشبح للجنان؛مش عارفه شن نقولك غير جيتي خالتي بس..
ماجده:ياحمارة اني نحساب روحي بندير حاجه باهيه..قهرني ياناس قهرني...
نسيبه:لايقهرك ولاهم يحزنون..افرحي وزغرطي اللي افتكيني منه بري صلي صلاة شكر بري..
ماجده؛ايه والله ع قولتك..اصلا زغرطت وين قال بنطلقك زغروطه طرش الودان..
ضحك نسيبه نص ضحكه وشبحتلها..
ماجده:لكن تعرفي..والله لتوا نحس في روحي مثقله ع هيثم نبي نولي لشقتي..
نسيبه:شن تقولي انتي مستحيل..مايخليكش هيثم تطلعي من هني بكل..وبعدين في شن بتقلي قوليلي..
ماجده:مش عارفه..
نسيبه؛لالا وجودك هني توا ولا مهم اكثر...ابتسمت وقالت...خلاص العرس ان شاء الله بعد شهر ونص..بعد محكمة زياد ع طول..
ماجده بإبتسامه:إن شاء الله يولي فرحنا فرحين يارب..
نسيبه بإبتسامه؛يارب..بعدين تنهدت بقلق وقالت..زعمه شن صار في حونه..
ماجده تنهدت وقالت؛ربي يطمنا عليها...
🍁🍁🍁🍁🍁
في المصح...
مقعمز في المكان المخصص للزياره..
شويه وخش عليه الشخص اللي يستنى فيه..
ناضله وهو يضحك..
فاتح:حي ع امك خيرك وليت هكي..
صاحبه بضحكه:الزواج ياصاحبي خودها فالحة تعرف طيب وتشكل وتنوع وانسى الفيتنس..
فاتح بضحكه؛تي تعال ياوغد تعال..
وتصافحوا وسلموا ع بعض بحرارة بعدين قعمزوا..
:سامحني قصرت معاك..
فاتح؛مش لايمك ولاعاتب عليك كان ماليا نسوني..
اقسم بالله من غير قصد والله..
فاتح شد ع كتفه وقاله؛مادورش ياراجل مش جايبك ع خاطرهكي...المهم توا اسمعني جاي..
:شني ان شاء الله خير.
فاتح؛راك تقولي بعد تزوجت تبت وقعدت ع مرتك وخلاص..
:مصح وجهك..شن مازال نبي بعد تزوجت..
فاتح؛تي نبي منك خدمة ياراجل مستعد نعطيك اللي تبيه كان درتهالي..نبيك تشوفلي وحده من جماعتك هما الفلوس بس..
:اسمع الجو متاع زمان خلاص راهو انساه..
فاتح حرك راسه بالنفي وقال؛تس تس.مش زي مافي بالك..حاجه تانيه انت خليني نحكيلك ع اللي فعقلي وبعدين انت قول قولك..
:تمام هات اللي عندك...
🍁🍁🍁🍁
في مكان خالي.
جهة مزارع في وحده من ضواحي من العاصمه..
شاد واحد ويضرب فيه ضرب مبرح...
وكان يسب فيه بأفضع السباب والشتائم..
خليل بإنزعاج؛اضرب وانت ساكت..
رفيق:حول خل نكمل عنك.
جهاد وهو داهش ؛مانخليشي لغيري مسخ زي هدا دايره صاحبي ...واطلق لفظ نابي..
خليل بصوت عالي؛قلنا اضرب وانت ساكت.
وجهاد طاح فيه ضرب والولد تحته مش قادر يقاوم حتى المقاومه..
خليل:خلاص..
وجهاد مازال يضرب..
خليل بصوت عالي:خلاص..
بالسيف جهاد وخر عنه...
خليل:كلم واحد من خوته يجي يرفعه..
رفيق:خليه يموت هني..ودفل عليه..
خليل:كلم واحد من خوته قتلك..
قام جهاد تليفونه وهو داهش اتصل بواحد من خوت الولد وماخلا ماقاله بعدين سكر ومشي..
وخوته معاه...
جهاد وهو يضرب كان يشوف في مريم بين عيونه ويسمع في كلامها..
وتخيل لو اخته كانت في مكانه والضربه جاته من اعز صحابه..
ربي هالمرة نجا تهاني..
بس مش في كل مرة تسلم الجرة..
الله يمهل ولايهمل...
وصلوا لسيارة خليل..ركبوها التلاته..
خليل ورفيق القدام وجهاد نقز وركب من الخلف..
"سيارته من النوع المكشوف والعالي تشبه متاع الغابات"
خليل:حتى تهاني تبي طريحه كيف تسكت عنه لين يتمادى معاها..
جهاد؛خافت من المشاكل..
رفيق؛وكان الكلب هدا دار فيها حاجه..
جهاد؛نعدم فيته كامله..
خليل وهو يسوق ويشوف للطريق:غير راك تتعلم من اللي صار بس..
تنهد جهاد وقعد ساكت وهو يشوف للطريق..
ومش عارف علاش مش قادر ينسى مريم والموقف اللي شافها فيه..
رفيق:ايه حقه اليوم بنت دكتور بدير عمليه..
خليل خبط بيده ع جبهته لأنه نسي وماكلمش مرته..
جهاد؛من فيهم..
رفيق؛وحده من التوامه اللي عندها القلب..
جهاد: اها...ربي يشفيها..
رفيق؛عرس ملاك بعد اسبوعين..
جهاد؛احسن ارتحنا من همها..
خليل؛عينك..هادي زي سارة بتقعدوا وراها حتى بعد تتزوج خلو نيار وعيلته يعرفوا ان في وراها تريس..مانبي حد يستوطى حيطها..
رفيق:بتقعدوا!
جهاد؛علاش مولي تتكلم هكي هلبه زي اللي توصي..
خليل؛نتكلم عادي جدا غير انتم مركزين..
شبح رفيق لجهاد وهو شبحله بعدين شافوا لخليل اللي كان مركز بنظره ع الطريق...
🍁🍁🍁🍁🍁
الساعه السادسه مساءا...
قعدت تساويلها في الشنبير وهي تقول:الله يبارك عليك...قل هو والله احد..عليك جمال عندك..
:والله مانلومه وخيي اللي نسانا بكل بعد خداها..
ابتسمت رتاج بخجل..
:غير العوينات سادات اللهم صل ع النبي..
:تنادي عادل يشوفها..
رتاج:لالا بالله لا..
استغربوا..
رتاج؛مانبيش مرته الاولى تتحسس وهمانه تزيد تكرهني..
:بالعكس همانه تحبك وعاجبيتها..
رتاج؛مافي بنت تحب ضرة امها..
:لا في وهلبه..
رتاج؛مش همانه..
:لالا حولي من دماغك الدوة هادي همانه طفله كلها براءة ماعندهاش لافي الخبث ولاالشر.
رتاج في نفسها"طفلة وبريئة!"
ومشت طلعت وحده منهم واتصلت بعادل يجي..
وشويه وخش عادل لحوش اخته..
همانه:بابتي..
هو ضمها وباس راسها وقال؛شن الحلو هدا كله..
همانه ضحكت..
ع جية اخته خداته من يده وقالت:تعالى شوف رتاج..
ومشي معاها وهو يضحك..
وهمانه تشبحلهم بغيظ..بعدين مشت خشت داخل وقعدت تفكر دير اي شي لمرت بوها بش طيرها..
شويه سمعت بنت عمتها العروسه تقول..
:مرت خالي عادل التانيه آية من الجمال فرق بينها وبين مرته الأولى..
:اني وين شفتها قلت هدا وين عاش خالي..
التفتوا الزوز شافوا همانه واقفه تشبحلهم بحقد..
:مش قصدي همونه حبيبي..
همانه دفت التحفه بيدها طاحت تكسرت...ومشت طلعت من حداهم...
:مسمة الفرخه راهو
:واضح..ومتعلقه ببوها هلبه حي عليها مرت بوها منها 🍁🍁🍁🍁
"بابا"
شبح لباب غرفة العمليات لماسمع صوت سارة تكلم فيه..شاف الدكتورة طالعه..
ناضلها وبنته في حضنه والتانيه ناضت معاه..
الدكتورة بإبتسامه:الحمد لله كل شي تمام...
سارة:حالها باهي يادكتورة..
الدكتورة:الحمد لله حبيبتي..
مد هيثم جنان لسارة خدتها منه وهو قال:ترا شويه دكتورة..
هزت الدكتورة راسها...
والزوز مشوا مع بعض وقفوا بعيد شويه..
وسارة قعمزت مع اختها وقعدوا يشبحولهم...
الدكتورة:طبعا زي ماتعرف يادكتور بعد العمليه لازم تهتموا بيها كويس لين يولي حالها باهي..
هيثم هز راسه وقال؛فاهم دكتورة عارف..بس اني نطمن مافي شي ممكن يصير معاها مستقبلا..
الدكتورة:الدكتور هيثم الكاتب يسأل سؤال زي هدا؟!
هيثم بتحكم:كنت نحساب روحي فاهم وهادي النتيجه..
الدكتورة:كلنا هكي لما توصل فينا حني وفي اللي نحبوهم ننسوا كل شي..
هيثم تنهد بألم وقعد سكت..
الدكتورة؛اطمن دكتور معاش في خوف عليها بإذن الله..
هيثم:إن شاء الله مشكورة دكتورة..
الدكتورة؛واجبنا دكتور..ابتسمت ومشت..
وهو شاف لبناته لقاهم يشبحوله بقلق..
ابتسم ومشالهم كان يمشي براحه بعدين قعمز حداهم..
سارة؛شني بابا..
هيثم بإبتسامه:اطمني بابا اختك في احسن الحال..
سارة بإبتسامه راحه؛الحمد لله..
جنان؛بابا نبي نشوفها..
هيثم؛غدوة إن شاء الله نجيبكم تشوفوها...هي نوضوا بابا..
سارة:بتقعد هني بروحك..
هيثم:لابنروح بيكم وبنجيب عمتك تقعد هني لين نروح من عملي لهني وهي تروح مع راجلها..
سارة هزت راسها بإيجاب وقالت:هي نوضي جنو..وناضوا الزوز..
وهيثم ناض معاهم..وكلهم مشوا مع بطريقهم للأصنصير...
🍁وفي مكان تاني كان الكلام عليهم...
دانيه؛بكري كلمتها قالت مازال..
سدينه:ربي ينوضها بالسلامه مسكينه قاعده صغيره..
مجاهد:ياما منهم اللي زيها يام..باهي هي جتها ع هكي..
سكتوا شويه وهما يشربوا في الشاهي ويفكروا بعدين سدينه قالت.
سدينه؛بوك خطب..
ضحك مجاهد بتهكم..
ودانيه شبحت لأمها بخوف..
سدينه؛وقال الاسبوع الجاي بيجيبها..
مجاهد؛عندي علم..وخالتي ماجده بيطلقها خلاص..
سدينه تنهدت بحسرة وقالت:الله غالب...ان شاء الله اللي بعدها تجي زيها يارب..وقعدت تشرب في الشاهي وهي تخمم وصغارها يشبحولها بحزن..
🍁🍁🍁
وسبب حزنهم ونكدهم..
مقعمز في مربوعة النسابات الجدد يتفاهم مع بنتهم...
مقبوله..
في بداية الأربعينات..لم يسبق لها الزواج..
من عيلة ظاهرها ملتزم دينيا..
يعني النساوين يطلعوا بالزي الشرعي ومختمرات..
ورجالتهم لحايا طويله وثوب قصير...
ماعندهمش تلفزيون في الحوش..اخطا واحد لبوهم يتبع عليه في الأخبار...
عرفهم عن طريق صديق ليه يكون جار العيله...
مقبوله:وزي ماقتلك اني مانبيش في الحوش غير الراديو فقط...
عبدالمجيد؛حاضر..
مقبوله:زوجتك الأولى لانحتك بيها لاتحتك بيا..
عبدالمجيد:احسن شي..
مقبوله؛المدرسة السلفيه مش مسيبتها راهو..
عبدالمجيد؛مادامها سلفيه ماعنديش مانع..
مقبوله؛كويس..
عبدالمجيد؛عندك شروط تانيه..
مقبوله؛اهلي..في اسبوع بنجيهم مرتين زي ماتعرف اني هني الكل في الكل يعني لازم نشوف شن صاير في الحوش من بعدي اني مانأمنش ع بوي واني مع الكناين هدا نظام اني دايراته ماشيين عليه خواتي واني بنمشي عليه..
عبدالمجيد:حاضر ماعنديش مشكله..
مقبوله؛كويس..وانت شن شروطك؟
عبدالمجيد؛مانبيكش تقصري في حقي نهائي...
مقبوله:اكيد القيام بواجبك طاعة لله عز وجل..
عبدالمجيد بإبتسامه؛كويس..
مقبوله ناضت وقالت؛نستأذنك...
عبدالمجيد؛تفضلي..
مشت طلعت..
بعدين خش خوها وقعمز..
عمران؛هاه خوي مجيد تفاهمتوا..
عبدالمجيد:ايه ع كل شي..نهار الخميس عقد القران..
عمران؛وبعد العشي روح بيها..
عبدالمجيد؛إن شاء الله..
ناض خوها وهو يقول؛خلاص مالا اني توا مضطر نطلع بنمشي للجامع عندي حلقة تحفيظ..
ناض عبدالمجيد وقال؛تمام...
ومشوا طلعوا مع بعض وكملوا هدرزتهم برا...
وحده من الكناين "مرت عمران" من روشن شقتها شافت راجلها طالع مع خطيب حماتها..
حنان "مرت عمران"؛عليك سريفه دره الكبد..غير بيشجع المصيبه اللي عندي ياخد عليا...ياربي ساعدني كيف ندير بس...
ومشت خدت تليفونها اتصلت بسلفتها بش تحكيلها..
هدرزوا ع عريس حماتهم بعدين قالت هي..
حنان:باهي اني كيف ندير ياوخيتي حاولت وحاولت...حتى كرامتي مسحت بيها الوطا..وهو شي..ليه لتوا سته شهور ياوخيتي الحق اللي عطاهوله ربي معاش يدور فيه..
"تو يبان كان في وحده تانيه تو يبان"
حنان غمضت عيونها بألم وتنهدت بعدين فتحتهم وقالت:نهبل كان خدي عليا نهبل...
🍁🍁🍁🍁
ماشيين بإتجاه المصلى وهما يهدرزوا..
زياد؛بوي ونعرفه في حاجه مدرقها عليا..
فاتح؛مافي شي غير انت حشيشتك نكد بس..
خميس:مرات عنده خدمة في مكان تاني..
زياد تنهد وقال:مش عارف..قلبي مش مرتاح..
فاتح حط يده ع كتفه وقاله؛ريح بالك وقلبك مافي كان كل خير..
ع جية واحد من النزلاء فات من حداهم وهو يقول:دكتور هيثم جي...
زياد بلهفه؛وين شفته..
:توا ريته مع الدكتور منصور..ومشي كمل طريقه..
فاتح؛نصلوا بعدين تمشي تشوفه..
زياد هز راسه..
وصلوا في باب المصلى وخشوله..
🍁🍁🍁🍁🍁
فهالوقت..
واقفه في الكوجينه..
حدا الغاز..قدامها بكرج قهوة محطوط ع النار..وهي تحرك فيه وسرحانه..
شويه سمعت باب الحوش انفتح..
استاقظت وشبحت جهة باب الكوجينه...
شافت بوها خاطم..
تنهدت ورجعت شافت للقهوة لقتها بتفوج طفت عليها بسرعه..
بعدين خدت البكرج وصبت لروحها قهوة...
وكيف جت بتطلع خشت امها..
:بوك اشبح خيره..
شبحتلها وقالت؛خيره..
؛مش عارفه وجهه مش عاجبني اصلا مرواحته من العمل متأخر شغلتني هلبه..
رنيم؛ماتخوفنيش ماما.
:ان شاء الله خير وخلاص..المهم اسمعي جاي كلمتني بكري ام سفيان قالت بيجوا غدوة بش يحددوا موعد العرس
رنيم بلامبالاة:ايه قالي..
وجت بتطلع امها وقفتها لما قالت؛قالك امتى!؟
رنيم؛تس..قالي امي بتجيكم غدوة ع خاطر موعد العرس وخلاص واني مابيتش نسأله..
ومشت طلعت..
امها مطت شواربها للأسفل بعدم فهم بعدين صبت لروحها فنجان قهوة وطلعت...
🍁🍁🍁🍁
"ايه جتني اليوم وحددت موعد العرس"
بو راجح:امتى..
عواطف"ام راجح":تالت اسبوع من شهر سته..
بوراجح؛ع بركة الله...
عواطف؛من توا نجري ونوتي وان شاء الله نلحق..
بوراجح؛ماتكتريش بهرجة يامراة..
عواطف؛بالله عليك انت ماتدخلش هدا فرح بنيتي الوحيده والله ماني حارمتها من حاجه..خوتها اللي تبيه نجيبوه مانا منقصين عليها حاجه..
بوراجح؛تو اني بنقص ع بنتي وحيده شي لين خوتها يمدولها!؟
عواطف بخوف؛مش هدا قصدي اني قصدي انهم فرحانين بيها وخيتهم الوحيده..
بوراجح:المهم ماتكتريش ع ماوصوك..
عواطف "غير اعبى":باهي...
وجيهان في دارها...شغاله اتصالات بالأقارب والصاحبات.
في من تبي تفرحهم معاها ومن تبي تقهرهم وتغيظهم..
وخطيبها مقهور ع الآخر..
ادبس فيها زي مانقولوا خلاص لامفر..
بس اللي قاهره حق هو دانيه...وراجح..لو صار وراجح فكر فيها بجديات كيف يدير بعدين!؟!....
🏵ودانيه وسط همومها ومشاكلها...كانت شاده كتابها وسرحانه بتفكيره في راجح..
عاجبها هلبه..وحست قلبها ماله هلبه...
بس في نفسها خوف من نيته اتجاهها..
وطلعت صافيه...كيف يصير لما يعرف انها مريضة سكر...
🍁🍁🍁🍁
"اطمن حالها باهي..وبإذن الله بعد عشرة ايام تطلع من المستشفى".
زياد بنظرات رجاء:نبي نشوفهم..مستاحشهم هلبه..
هيثم :تعرف انه صعب..
زياد غير عيونه المعبيات دموع عنه..
هيثم:شن رايك تهدرز عليهم بالهاتف..
شبحله زياد وقال؛مش مشكله حتى هكي راضي..
هيثم ابتسم وقال:خلاص ان شاء الله غدوة لما تفيق وتشد روحها..نخليها تكلمك..
زياد؛مش تنسى..
هيثم حرك راسه بالنفي وهو مبتسم..
زياد شبحله شويه وقال؛انت كويس..
هيثم بإبتسامه:ايه..علاش..
زياد؛مش عارف حسيتك تاعب..
هيثم:لا مش تاعب مافيا شي..خلاص برا انت توا..
زياد؛مش تنسى..
هيثم بضحكه؛ياودي مش ناسي غير برا..
زياد؛باهي قبل لنمشي..مافيش جديد.
هيثم تنهد وقال؛لتوا مافي شي..لكن اطمن احسان قاعد يخدم ع قضيه بكل جهده..انت بس كثر ذكر ودعاء..وشد حيلك بش تشفى بسرعه وتولي لقرايتك..
رفع زياد حواجبه وقال:قرايتي!
هيثم:ايه قرايتك..بالك عابي بتسيبها..شن اتفقنا حني..
هز زياد راسه وقال:إن شاء الله خير...تصبح ع خير..
ولف ومشي..
وهيثم قعد معاه بعيونه لين اختفي..
بعدين لف وخش لمكتبه..
🍁🍁🍁🍁
وفي المستشفى الموجوده فيها ريحان..
كانوا مقعمزين مع بعض يهدرزوا...
خليل:شوفي هادم واختاري..
خدت نسيبه منه التليفون وقعدت تفوت في الصور وبعدين قالت؛اهيا..هادي حلوة..
خليل شبح لدار النوم اللي اختارتها نسيبه وقال؛خلاص اخر كلام..
نسيبه هزت راسها بإيجاب وهي مبتسمه..
هو ابتسم بعدين خدي التليفون وحط ع صور تانيات وقالت:مشي الصور واختاري..
نسيبه قعدت تمشي في الصور وتشوف وهو يتأمل فيها بإبتسامه..
نسيبه:اهيا هدا..منظره يفتح النفس ع تطييب..
خليل:اللي يسمع..
نسيبه؛تو نتعلم يابارد مش حنقعد عمري كله بايره..
خليل ضحك بعدين قال؛باهي شوفي هادم...وخشلها ع صور تانيات وقال..اختاري.
نسيبه بإندهاش:حتى دار الصغار!؟
خليل:ايه..نبيها شقه كامله ماناقصها شي..هي اختاري..
هي ابتسمت وقعدت تمشي بعدين اختارت وحده..
هو ابتسم وقال:كويس..
وهي تشبحله بنظرات حب مغرقتها الدموع..
هو شبحلها ابتسم خدي يدها وشدها وقال:نوسه..ردي بالك مهما صار توخري..راني بعد ربي متقوي بيك انتي..
شدت ع يده وقالت:مستحيل..والله مانخليك بعد نموت غولتي تطلعلك..
هو قعد يضحك وهي ضحكت..بعدين هدى ضحك وقال..
خليل:بعد عمر طويل ماتفارقيني فيه لين نفارقك..
نسيبه شبحت القدام وقعدت تسمح في دموعها..
هو شد ع يده وقال؛نبيك تقعدي مع امي نوسه..عارف اللي بصيير فيها بعدين نبيك تقعدي معاها تقويها..
هي ترشف وتمسح في دموعها وتهز في راسها..
خليل:المدة طويله نوسه مانبيش البعد يخليك جافيه..
شبحتله وقالت:حنقعد نستناك بالدقيقه والساعه واليوم والشهر والسنه..وحنزيد نحبك ع قد مانستناك واكثر..
شد ع يدها بقوة وعيونه معبيات دموع ..
وهي شدت ع يده وعيونها اللي يذرفوا فالدموع في عيونه
نسيبه؛خليل..
خليل:حبه..
نسيبه رشفت وقالت؛جعانه...
خليل غمض عيونه وقعد يضحك..
وهي تقول بضحكه؛والله جعانه من الغدي ماكليت شي..
وهو مازال يضحك..
وهي تمسح في دموعها وتشوفله بإبتسامه..
🍀🍀🍀🍀🍀
ومروا يومين...
ريحان فاقت وكان متعبه شويه من العمليه بس وجود بوها جنبها نساها تعبها..
كلمت زياد بالتليفون في ثالت يوم ليها بعد العمليه ماطولتش مدة المكالمه..
بس كانت اسعد اللحظات اللي مرت ع زياد في هديكا الفترة..
من سعادته بيها...بدي طول يرسم في لوحة تخص خواته التوأم وناوي يهديهالهم...
من جهة تانيه..
كانت اختهم سارة مشغوله ع زميلتها رهف اللي معاش جت للمدرسه..تليفونها مقفل..معاش فتحت ماسنجر...ومافيش وسيلة تانيه للأتصال بيها...
لدرجة انها سألت الاخصائيه والمديرة عنها تحساب بتلقى عندهم اي معلومه تريحها بس مالقت شي...
وعقلها ماجابلهاش خير ابدا..
ودانيه في المدرسه كانت تتعامل مع جمعه وكأن ماصار شي...وهو كذلك يظاهر بنفس الشي بش يصرف نظر جيهان عنها..ومع هدا كله مازالت حاطتها في راسها..
وخوها راجح..مازال يجي الصبح وفي نهاية الدوام بش يشوفها..وهني جيهان بدت تصدق في شكوك جمعه بس معاش تلاقت مع خوها بش تتأكد منها..
ورتاج..
مروا عليها باقي ايام العرس وهي اعصابها من تصرفات همانه اللي كانت في منتهى الخبث وقلة الأدب..
المشكله ان كل شي يصير بيناتهم مافيش عليه شهود ومافي حد بيصدق في البنت شي..بالذات بوها..
لهدا رتاج مضطرة تبلع وتسكت...
وهدا حظ رتاج ونصيبها...او ممكن جناية بوها عليها اللي خلاها تختار بين ضياع شرفها او ضياع سنين عمرها..
وهي اختارت احلى الأمرين..اللي كان مر..مر هلبه..
بس فهاليومين هي ماغابتش عن احلام جهاد او كوابيسه..
من بعد هداكا اليوم وهو عقله مايفكر كان في مريم..
مريم اللي خلاته يوقف في نقطة معينه ويراجع نفسه فيها.
يراجع ماضيه كله...ياترى في بنات خلاهم يعيشوا مأساة مريم!...
باهي لو في...شن هو مصيرهم توا..
ومريم اللي ماكانتش ضحية من ضحاياه..
خلاته يدير في حياته شي اول مرة يديره...
:علاش باهي!؟
جهاد؛شوفي اني واحد..نضيع في وقتي الحق مش متاع زواج بكل..
البنت قعدت تشبحله وهي مصدومه..
جهاد؛سامحيني..لكن هدا الحق انت تستاهلي راجل حقاني يقدرك..وخوديها مني نصيحه...حافظي ع روحك لين يجيك نصيبك..خليه هو راجل يكون اول راجل في حياتك..
البنت بلعت ريقها وشدت دموعها بعدين هزت راسها بدون ماتقول كلمة ولفت ومشت...
هو قعد معاها بعيونه لين بعدت..
تنفس بإرتياح..
ولف بيمشي..
شاف مريم جايه..
وقف في مكانه وقعد يشبحلها..
تبان عاديه...بس...شحوب وجهها زاد..
قعد يشوفلها لين خشت داخل...
مرر نظره حواليه..بعدين خدي نفس ومشي...
🍁🍁🍁🍁🍁
"طيب فيك طيب فيك مبارك مبارك"
هادي نسيبه تحضن في خالتها بعد جتها ورقة الطلاق..
نسيبه؛تنزكر وماتنعاد..
ضحكت ماجده وهي تقول؛يامعفنه..
نسيبه بعدت وهي تقول؛تي بري بري اسجدي سجود شكر لربي لطف بيك وفكك منه.
ماجده:ايه الحمد لله..بس اني عقلي مع سدينه ودانيه ربي يكون معاهم مسكينات..
نسيبه:إن شاء الله...المهم توا ياسمح اني ماشيه للمدرسه ماتبي شي.
ماجده؛سلمي ع نسيبنا..
نسيبه بضحكه:يوصل..هي سلام..ومشت .
ماجده بإبتسامه:في أمان الله...
🍁🍁🍁🍁
"ماتقوليش خيرك ياراجل شن صاير معاك"
تنهد تنهيده قهر وقال:لزوني من الخدمة وبيحولوني ع التحقيق..
ام رنيم بصدمه؛شن تقول!؟
بو رنيم؛اللي سمعتيه..اني بعد 30سنه خدمة في المصرف يطلعوني مختلس...
ام رنيم خبطت بيدها ع خدها..
بورنيم؛مش عارف من حفرلي هالحفرة مانيش عارف...
مرته قاعده تشبحله وتسمع شن يقول وهي تحت تأثير الصدمه..
:تعرفي اني شن اللي قاهرني بالحق...ان الموظف اللي يخدم معاي وكل شي ندير فيه يمر عليه ويشوف فيه ماشهدش معاي...لاشهد معاي ولاضدي..قعد ساكت وخلاص..ساكت..نقوله انت تعرفني قوللهم قول كان اني درت حاجه زي هادي ولالا...قعد يقول مانعرفش ماعنديش علم...
اقسم بالله يامراة قريب بست ايديه بش يقول اللي يعرفه..والراجل شاد هالكلمتين..مانعرفش ماعنديش علم...
لو تشوفي...انتي لو تشوفي الموظفين كيف كانوا يشبحولي...تمنيت الأرض تنشق وتبلعني...اني بعد هالعمر هكي يصير فيا اني...تي غير كان راجو عليا شويه كنت حنتقاعد خلاص...علاش خلوا سنين خدمتي..الخدمة اللي خدمتها بشرفي تنختم بوصمة عار علاش...
مرته قعدت تبكي...
هو سمع صوت بكاها قعد يشبحلها...
ويفكر شن حيصير فيهم بعد مايخش الحبس...حياتهم كلها حتدمر...بعد خسارة السمعة الباهيه شن مازال بيقعدلهم!
انقهر..انقهر هلبه...
فجأة حس بوجع في كتفه وبيده اليسار وقعد يمشي عليهم..
لاحظاته مرته وقالت بخوف:خيرك..
نزل يده لصدره وقعد يمشي عليه....
والنفس قعد ياخد فيه بصعوبه..
مرته قعد تنادي فيه بعياط...
سمعتهارنيم طلعت تجري من دارها وخشت ع بوها وامها الدار..
قدامها بوها طاح ع السرير...وامها قعدت تعيط بأعلى حسها..
🍁🍁🍁🍁
الساعه الرابعه عصرا...
طلعت من دارها بعد ناداها خوها...
مشتله وين ماهو لقاته في الصاله مع باقي خوتها وبوها وامها..
واحد منهم قال؛تعالي ياشفشة تعالي.
مشتله وقعمزت جنبه..
:اليوم كلنا ماشين لحوش خوك ياسر بتمشي معانا غصب عنك..
مريم:عندي قرايه..
:يقطع القرايه وسنينها..
بوها قال بضحكه؛خوك غادي دايرلك حاجه..
مريم:حاجه شني.
امها:لا انتي ناسيه حق..
؛غريبه قبل تعششي وانتي ذكري فينا ع خاطر الهدايا..
هي اذكرت ان اليوم ذكرى ميلادها رفعت حواجبها وقالت:اها اليوم..ايه تفكرت..
؛يابنت انتي خيرك..فيك شي مش طبيعي مش زي قبل بكل..
مريم:وخيي مافي شي..لكن انتم مش عارفين قراية الطب وانتي في سنة ثالته اصعب سنه حاسه روحي بنموت من التخميم..
بوها؛بعيد السو عليك بنتي..استهدي بالله وماتضغطيش ع روحك واني وخوتك من قبل قلنالك تحتاجي شي تكلمي.
:اسمعي اليوم لازم تمشي معانا تبيها تغييرة الجو انتي..
امها:بتمشي خلاص هي كلمه والله مانك كاسرتيها..
بوها:هيا سلم مريم..سلم مريومه..هي نوضي وتي روحك..
مريم كانت تقاوم في دموعها بقوة وهي تقول:ع خاطركم بس راهو..
:والله اليوم تنسي القرايه ومايجي منها لما تشوفي ياسر شن دايرلك..
ابتسمت ابتسامه سعاده مصطنعه..
تنهد بوها وقال؛نذكر لما جيتي قعدت محتار في اسمك شن بنمسيك..ع امي ولا ع اختي الله يرحمها..بس بعدين خطرلي اسمي مريم..مالقيتش خير منه...ع اسم مريم ام سيدنا عيسى سيدة نساء العالمين...
مريم كانت تشد في روحها بالقوة بش ماتنهارش وهي تسمع في بوها شن يقول...
بعدين ناضت وقالت:خلاص ماشية نوتي روحي..
ومشت طول..
وخوتها يصفروا ويقولوا..ايوه مريم..ايوه مريومه...
يشجعوا فيها..يبوا يحمسوها ويخلوها تولي زي قبل..
مريم المرحه...اللي دمها خفيف..اللي تحب تشاغب ودير في المقالب ومخليه الحوش كلها دوشه بجوها..
هي انطفت والحوش انطفي معاها..
وخوتها حاسين بالفرق ومش متحملين حالة اختهم هادي يبوها تطلع منها بأي شكل..
كانوا مصدقين تماما ان اللي هي فيه سببه القرايه..
وياريتها كانت القرايه فعلا اكبر هموم كل بنت..
🍁في هداكا اليوم مريم شافت الحب الحقاني اللي فرطت بيه وضحت بيه في لحظه..
حب بوها وامها وخوتها وعيلتها...الحب اللي مايجيش جنبه اي حب..
كانوا يبوا يسعدوها بأي شكل..ومساكين ماكانوش عارفين انهم يزيدوا يعذبوا فيها اشد انواع التعذيب...
هديكا الليله..مريم بعد ماروحت كانت ناويه تنهي حياتها بالحق هالمرة...
ومصرة ع هالشي ...
راجت لين الكل رقد...والحوش هدي ع الآخر..
وبدت تجرب في طرق الأنتحار..
مرة تبي تشنق روحها..بس خافت وماقدرتش..
مرة تبي تقطع شرايينها وحتى هادي خافت منها ماقدرتش..
ومرة تبي تبلع دواء...وكذلك خافت وماقدرتش...
خشت دارها وسكرت عليها...وانهارت بالبكي اللي كانت تكتم في عبراته وماتبي حد يسمعه..
رفعت عيونه فوق وقعدت تقول..
يارب انت خودني وريحني ياربي..ياربي خلصني من اللي اني فيه ياربي...ياربي اني حقيرة..اني مسخه اني حتى ماليش عين نرفعها فيك ونكلمك..
نزلت راسها بخجل وقالت..ياربي..بعد هداكا اليوم..قعدت كل مانخش للحمام نكد جسمي بقوة لين يصب دم..
كشفت ع ذراعتها وشافت اثار الخدوش...نحساب روحي هكي بننظاف...نحساب هكي العار درته ينغسل..نحساب هكي ذنبي بيتحول..اه وياريت هكي يتحول ياربي ياريته..
وهي مقعمزة ع السريرة..طاحت بوجهها عليه وقعدت تبكي بقهر وتكتم في صوتها..
تبكي وتقول..يارب...بخجل شديد...ماقدرتش تسيبها بكل برغم خجلها..
لين داخت من كثر البكي ورقدت وهي ع نفس الوضعيه...
🍁اما جهاد ليلتها..
من كثر خوفه من النوم..خوفه من انه يرقد ويرجع يحلم بنفس الكوابيس..
قعد ساهر للفجر...
سمع الآذان..بس مالباش النداء..
سمع صوت خوه خليل طالع...كانت في رغبه داخليه عنده انه ينوض ويمشي معاه..
بس مالباش رغبته..
قعد في سريره ماتحركش.
لين سمع صوت العصافير..
حول الغطا...ونزل من سريره..
ومشي طلع من الدار...
وتوجه طول للدروج ونزل لوطا...
وطلع منهم جت قدامه شكارة كناسة قاعده برا مافي حد لوحها..
شبحلها شويه..
بعدين مشي خداها...
وتوجه طول للباب وطلع بيها..
قعد يمشي...لين طلع من الزنقه..
شاف خوه مروح مع هيثم من الجامع...
جهاد:صباح الخير.
هيثم وخليل؛صباح الخير...
وهيثم قعد معاه بعيونه بعدين خش للزنقه هو وخليل وهو يقول..بنمشي ناخد خالتك ماجده نروح بيها ونولي بعدين...
خليل:اها...
فهالوقت جهاد فتح المكب الكناسه بيحط الكيسه..
حطها ولما حطها بان عليه شي غريب..
قعد مددق فيه...مد يدها وزاح الكيسة السودا شويه..
وجمد في مكانه لما شاف للي تحتها...
بعدين بهلع صاح ينادي:خليل..
خليل وهيثم وقفوا والتفتوا يشبحوله...
شافوه كيف واقف يشبح للمكب..
استغربوا ومشوله بسرعه..
قصوا الكياس ووصلوا فيه وشافوا لشن يشبح..
هيثم غطا عيونه ووخر..
اما خليل كان يشوف بنظرة ألم واشمئزاز وهو يقول:لاحول ولاقوة الا بالله..
وجهاد يرعش مع بعضه..
هيثم؛حسبنا الله ونعم الوكيل..إنا لله وإنا إليه راجعون.
وبدت الناس تجي وتشوف..
كان مشهد مؤلم وصادم..ياما قروا عنه وشافوه في الاخبار ع صفحات مواقع التواصل..
بس ماتوقعوش يصير معاهم يوم من الايام..
طفل رضيع عمره مايتجاوزش ايام محطوط في كيس قمامه اسود وملوح في المكب...
اخر طريق العلاقات المحرمه..
والانحلال..والتسيب..والأهمال في التربيه..
العيل هدا واللي زيه ذنبه مش بس في رقبة من جابه ولوحه لا...
ذنبه يلحق الوالدين اللي معرفوش يربوا وخلوا لصغارهم الحبل ع الغارب....

علقوا ب تاق #البطل_المغمور
وتاق #توبه
واذكروا الله...وصلوا ع الحبيب

....