البطل المغمور "زهور القمر"

الجزء التاسع عشر3

#البطل_المغمور2  "زهور القمر"
#جمان_فريد
#الجزء_التاسع_عشر "آلام الآثام3"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
"وشن دايرة بنتي مع راجلها"
:والله هياجه وجو مليح وسفر من تركينه لتركينه..
اسعد ابتسم وقال:كويس كويس..ومع هدا خلو عيونكم مفتوحه لراجلها لو حسيتوا بيه هاه حسيتوا انه غلط فيها بكلمه تعرفوا شن ديروا..
:معلوم ياراس معلوم..
مرر نظره حواليه وجي بيقوله حاجه..
بس تراجع..وين ركز بنظره عليها..
شكلها مش غريب عليه حاس انه يعرفها من قبل وشايفها كذا مرة..
اللي معاه ركز فيه وين يشبح ابتسم وقال؛حاجه صح عندك حق..
واسعد مازال مركز فيها يبي يعرف وين شايفها..
••نوال:خلينا منه توا وقولي شن داير هني..
فاتح؛عايش والحمد لله..
نوال؛مايضايقوش فيك..
ضحك بتهكم وقال؛جو..
ابتسمت وقالت:مافهمتش..
فاتح تنهد وقال؛يعني سنين عمري كلها قريت في مدرسه قريت في جامعه خشيت نوادي وغيره وغيره..ولا مرة جيتي سألتيني السؤال هدا ولا اي سؤال تاني عن حالي..وين نخش الحبس يخطر عليك تسألي..
تعبوا عيونها بالدموع بس حافظت ع ابتسامتها وهزت راسها وقالت:عندك.حق...بس ان تصل متأخرا افضل من الاتصل ابدا..
فاتح؛واثقه من روحك هلبه انك حتوصلي..
نوال؛نحاول...يستاهلوا صغارنا نحاولوا بش توصلولهم...وابتسمت..
ضيق عيونه وقال:الكلام هدا مش كلامك..
نوال:حيولي كلامي من اليوم وبرا غادي..
هو تنهد وقال:شن حال نرجس وبناتها..
نوال:الحمد لله مرتاحين..
فاتح؛واني هدا اللي يهمني بس..
ابتسمت وقالت؛جبتلك حاجات تو بعدين يعطوهملك..
فاتح؛علاش متعبه روحك مانبي منك شي وهني ماناقصني شي بكل..
نوال ابتسمت بألم وهي تشوفله..
وهو كان يتظاهر بلامبالاة والقسوة..بس من داخل قلبه راق هلبه لأمه...عطشان لحنها وحبها واهتمامها...بس لأنه جي متأخر مش قادر يقبله..
"عرفتها"
:من هي..
اسعد وهو رافع حاجبه وشبحله؛الولد هدا من اول ماشفته واني مشبه عليه شكله مار عليا شكل حد نعرفه كويس بس ماجاش في بالي ولا جزء من عشره في الميه يطلع ولده..
:ولد مني..
عقد حواجبه وقال:القصقصه فوتها اكثر من مرة نقولك كان ماقلتش كل شي ماتسألش لإني مانبيكش تعرف..
خاف اللي قدامه وقال:خلاص ياغالي سامحنا..سكتنا..
"الزيارة تمت"
ناض فاتح وقف وقال:معاش تجي مرة تانيه مافرحتنيش شوفتك..
ومشي وخلاها..وعيونها اللي نزلوا منهم دموع الألم يتبعوا فيه..
اسعد وهو ماشي كان يشوفلها..وقف وجاها وطلع من جيبه كلينكس ومدهولها...
هي شبحتله بإستغراب..
اسعد بإبتسامه؛كان تبيه يطلع نطلعه لعيونك ماعندكش مشكله..
هي شبحتله من فوق لتحت بعدين ناضت ومشت وخلاته..
هو ضحك وحط يده في جيبه وقال:ماتغيرتش نفس النظره..
"اسعد"
سمع صوت العنصر وهو ينادي فيه ابتسم وهز راسه ومشي
طلع من مكان الزيارة...
🍁هداكا الوقت خش عليهم آذان المغرب..
طول فاتح مشي بطريقه وين مافي المصلى كان في جنبه مكان للوضوء..
خشله..
لقي فيه زياد وخليل يتوضوا وهما يهدرزوا..
زياد؛عندي الشيتات كلهم مادورش..
خليل بإبتسامه؛تسلم...
فاتح:السلام عليكم..
الزوز شبحوله وقالوا:وعليكم السلام..
بدي يتوضا وزياد يسأل فيه؛من جاك .
وفاتح سرح ومش معاه..
زياد؛فاتح...
شبحله..
زياد؛نكلم فيك..من جاك؟
فاتح بحيره؛امي..
ابتسم خليل..
زياد بضحكه فرح؛والله فرحتلك..
شبح فاتح لزياد ويدوب ابتسم..
زياد خفت ضحكته وقالت؛احمد ربي ع النعمه اللي قاعده عندك..امك موجوده وتجيك ودور فيه..اني نتمناها لو قعدت موجوده مانبيهاش لاتجيني ولانشوفها نفسها في الدنيا بروحه يصبرني..
فاتح شبحله وابتسم بحزن..
وخليل سرح وهو يسمع في كلامه وقلبه لهف بشوقه لأمه..
ضحك زياد ودموعه ع طرف عينه وقال؛المهم شن جابت معاها..
فاتح؛مش عارف قالت جابت حاجات تو نمشي بعدين ناخدهم..
خليل شبحله وقاله؛خلاص ياراجل فك العقده امك جاتك هني من زيك..
فاتح شبحلهم شويه وقال:قالتلي حاجه قلبتلي راسي قلب..
ضيق زياد عيونه وهو يشوفله..
وخليل قال:شن قالتلك؟
تنهد وسكر الشيمشمه وقال؛هداكا اسعد كانت جاياته زياره ولما شافاته قالت تعرفه...كان ضابط في الشرطه زمان..
زياد اتفاجأ..بس خليل انصدم..
فاتح؛مش هكي وبس..قالت كان يجي لبوي زمان..
الزوز قعدوا ساكتين وهما يشبحوله بدهشه..
واللي قاله مش مخلي في خليل صبر يبي يعرف مدى صحة المعلومات اللي سمعها..وشن شكل علاقة بوفاتح بأسعد..
"شباب"
التلاته التفتوا للباب..
عقيل؛هيا وقت الصلاة بيفوت مغرب هدا وقته ضيق..
زياد؛هيا هي..
التلاته لبسوا في رجليهم ومشوا لحقوه..
ومازالت عقولهم مشغوله بالتفكير...
🍁🍁🍁🍁
ثاني يوم...
الساعه التاسعه صباحا..
عفاف:برا لخدمتك سلم ولدي هاني قاعده معاها شن مش مأمن عليها معاي..
ضحك جهاد بإحراج وقال:مش قصدي يام..هز راسه وقال..تمام ماشي...ماتبوا شي .
عفاف؛مريومه ماتبي شي..
مريم بإبتسامه؛جيبلي سعيد بس..
عفاف بإستغراب:من سعيد هدا!؟.
ضحكت مريم..
وجهاد بضحكه قال:الشكلاطه يام...حاضر..من عيوني.
ابتسمت بخجل..
وهو قال بإبتسامه؛السلام عليكم..
ومشي طلع من حداهم..
عفاف بعد ماطلع فتحت شنطتها وطلعت منها شيت وكتاب لمريم وقالت...اهما عطتهمولي تهاني الصبح..هادم اللي تبيهم ولا..
خدتهم مريم وقالت بإبتسامه؛ايه هما هادم..
عفاف؛كويس..بعدين قالت..ايه وهدا هاتفك..طلعاته ومدتهولها...
خداته مريم وقالت؛صحيتي..
عفاف:سلمك بنتي..
مريم شافت للتليفون عقدت حواجبها وقالت:اييه..
عفاف؛خيرك؟
مريم:خوي متصل بيا هلبه..اتصلت بيه طول...
نادى تلاته مرات بعدين انفتح الخط..
مريم؛ايوه معاذ..
"ياهلا"
هي توسعوا عيونها بصدمه وقعدت ساكته..
"وينك ياقلبي وين هكي ماتقوليش لحبيبك مبروك حتى بالكذب ياقطوسه زعلان منك هلبه..ع العموم امورنا تمام اني والعروس تمام التمام..."
مريم بدت ترعش ودموعها عبوا عيونها وهي شدتهم بقوة...
"جديده بسفارها..تعرفيني ماليش في المستعمل خليته للمكانيكي"
نزلت التليفون وسكرت عليه ودموعها غلبوها ونزلوا.
عفاف بخوف:خيرك بنتي شن سمعتي شن قالك خوك!؟
مريم بنبرة صوت مرتجفه:ميه...
عفاف ناضت طول وعبتلها ميه في طاسه ومدتهالها وقالت؛ان شاء الله ماليك مافيهم شي..
مريم قعدت تشرب في الميه وهي ترعش وكلامه يرن في وذانها..
 🍁عنده هو..
كان شاد تليفونه خوها ويشبحله وهو مبتسم بنصر..
ع خشة معاذ وهو يسمع في ايديه؛من اتصل؟
مدله التليفون وقاله:مريم هدرزنا شويه وباركتلي وقالت لما يطلع من الحمام قوله يعاودلي..
خدي التليفون وقاله؛امس اليوم كله نتصل بيها ماتردش كلمت راجلها قالي تقرا ماتقرا..واتصل بيها..
🍁هي كانت مغمضه عيونها وتاخد في نفس..
وعفاف واقفه عليها وهي في قمة القلق..
رن تليفونها..فتحت عيونها شافت المتصل..
قعدت تشبحله ومش قادره ترد..
عفاف بقلق؛نرد اني بنتي..
هي بنطه قالت؛لاتو نرد اني تو نرد..وفتحت الخط..
"مريومه"
غمضت عيونها براحه وقالت؛-معاذ
"وينك يابنتي من امس نتصل وماترديش وراجلك كلمته قالي داسه تليفونها وتقرا"
مريم فركت جبهتها وقالت؛ايه صح نقرا والتليفون يلهى فيا بعدته عني..سامحني شغلتك..
"باهي صار خير.غير بنقولك بوك وامك يبوا يجوك يتغدوا عندك"
فنصت عيونها بخوف وقالت؛لالا اليومين هادم لا وراي هلبه قرايه واموري متفركسه شويه خلوها الخميس ان شاء الله شن رايك..
"خلاص الخميس الخميس..بس اني نبي نجيك اليوم نبي نحكي في موضوع ضروري مش قادر نأجله.
غمضت عيونها شويه وفتحتهم وقالت؛معليشي موعا خليها يوم تاني حبيبي..
تنهد وقال
"باهي ع راحتك ماتبي شي"
مريم؛سلامتك وخيي..
"اوكي..تشاو"...وسكر..
حساته من نبرة صوته حرج ضايقت هلبه..
عفاف:خيرهم!؟
مريم تنهدت بضيق وقالت؛قبل يبوا يجوني يتغدوا عندي
عفاف بأسف؛لاحول ولاقوة الا بالله...
مريم؛قلتلهم الخميس نكون طالعه من المستشفى و حالي ولى باهي وقتها..
عفاف؛ع راحتك بنتي...
حطت مريم التليفون ع الطاوله اللي حداها وفي عقلها كلام ضرار قاعد....ومن داخل تدعي بعروقها تدعي..
"حسبي الله ونعم الوكيل..."
🍁🍁
معاذ:بالله ضرار خش قولي لامي تطلع..
ضرار؛لا وين ياغالي تفطروا قبل بعدين اطلعوا..
معاذ:فاطر والله..
ضرار؛هما داخل مازال مافطروش فطورهم بديره المراة..
معاذ بضحكه؛اللي زيها تهيج في تركيا توا..
ضرار؛لاتركيا لاتونس ماعنديش ليهم جهد توا اللي عندي كله حطيته في الشراكه متاع المكتب لما ربي يفتحها عليا نرفعها للمالديف..
ضحك معاذ وقال؛قول الحق مادارتلكش نشفه عليه..
ضرار ابتسم بثقه وقال؛والله ولاجابت سيرته..ولاقالت نبيه مراة شن مانقوللها دير بشن مااني ماشي تمشي ماتعرفش تقول لا ولاكيف..
معاذ بضحكه قال:صحه ليك والله..
ضرار؛مالا شنو يامعلم موازيها موازاة هادي..صغيره مطيعه هاديه ست بيت قطة مغمضه زي مايقولوا المصريه..وضحك..
ابتسم معاذ ع جنب وقعد ساكت..
🍁والقطه المغمضه...
حطت سفرة الفطور قدام النساوين وولت بسرعه للكوجينه دير في فطور الرجاله..
:واخيرا طحتي في كنه مقومه ياخديجه..
خديجه؛وكان يسمعوك سلفاتها..
ضحكوا كلهم..
ودنيا في الكوجينه ترتب في صواني الفطور..
فجأة..
"صباح الخير"
انفجعت والتفتت..
رضوان بإبتسامه:خيرك خفتي..قصدك نخوف اني..
دنيا بخجل؛لا مش هكي..غير الدنيا ساكته وفجاة انت...تكلمت..
هو مشي فتح الدولاب وقال؛درتيه انتي الفطور؟
دنيا وهي مرتبكه؛ايه..
هو طلع شكولاته من الدولاب وقعد يشبحلها..
كيف تبان طفله خجوله لابعد حد ابتسم وقال؛تبي شكلاطه..
دنيا؛لاشكرا..
وحطت الصواني فالسفره
فجأة..طلعت في وجهها يده مدلها طرف شكولاته..
هي قامت عيونها وشافتله.
رضوان بإبتسامه؛ماترديش يدي..
هي بشي من الخوف مدت يدها وخدتها وكلتها في مرة..
وهو واقف يشوف شن صاير فيها من التوتر والارتباك..
ع خشة ضرار؛اووو صباحو ياكينج
التفت رضوان لخوه وقاله؛تعالى تفاهم مع مرتك ياراجل خاشه بعضها وحاصله في روحها وين تشوفني تخاف..
راهو لو متزوج بكري جايب وحده في عمرك يابنتي..
ضرار بضحكه؛رضوان جوه ديما هكي اسألي سلفاتك عليه..
رضوان؛اني اقربلهم من خوتهم ورجالاتهم مرات وحده تطلب من راجلها حاجه مايجيبهاش تقولي اني توصلها طول حتى لو كنت برا البلاد..
ضرار:خليك عاديه دنيا وفي علاقتك مع خوتي ماتحطيش حواجز هادو زي خوتك لما نغيب ونمشي هني ولاهني تلقيهم هما..
دنيا هزت راسها وقالت؛حاضر..
رضوان قلدها وقال؛حاضر..
هي ضحكت بخجل..
ضرار بضحكه؛عاد ماتعقدهاش انت..
رضوان بضحكه؛حنطوشه..
وهي تضحك بإرتباك ...
رضوان؛خلاص نخلوك مع راجلك هاني طالع..
ومشي طلع..
ضرار بضحكه:خليك عاديه ارخي روحك..
دنيا؛خوك هدا مانعرفاش من قبل مش زي خوتك التانيين نعرفهم وبعدين هو مش زيهم كانه بصايري زياده.
ضرار غمض عينه اليمين وقال؛فرفوش زياده..
دنيا ابتسمت وقالت؛نبي شويه بش نتعود..
ضرار ابتسم وقال؛شن دايرتلينا فطور..
دنيا:ان شاء الله غير ماصقعش..الصفرة هادي..
رفعها وقال؛يعطيك الصحه..
ومشي طلع..
وهي وراه طلعت..
تلاقوا مع رضوان ماشي للمربوعه..
رضوان؛من في فالمربوعه..
ضرار؛معاذ..
رضوان؛اها..والتفت شبح لدنيا وغمزلها..
هي نزلت عيونها طول..
ضحك والتفت القدام ولحق راجلها...
وهي في قمة التوتر فاتت للصاله...
🍁🍁🍁🍁
في مدرسة المجد الثانويه..
في فصل سنة ثالثة ثانوي..
كانوا البنات في حصه فاضيه ابلتها غايبه مقسمات مجموعات وكل مجموعه مشغوله بحكاية البحث متاع مادة الأحياء..
ازهار اغلب الوقت عيونها دانيه تشبح فيها كيف تتكلم بحماس مع مجموعتها..
خافت منها هلبه كعادتها تجيب البحث الأحسن وتكون الاولى..
تسنيم؛ازهار هييه نكلم فيك..
ازهار:تس..كان نعرف اللي اسمها دانيه ع شن بديره البجث..
التفتت تسنيم وشبحت لدانيه..
ازهار؛صح مانطيقهاش لكن الحق الفرخه فلته وماتعرفش تكون الا الاولى حتى وين جت بنت الكاتب للمدرسه ماغلبتهاش جابتها الاولى ع المدرسه جابتها..
تسنيم؛هداكا زمان..شبحت لأزهار وقالت..توا الوضع اختلف كان ماتعرفنيش بري اسألي عني المدرسه اللي كنت نقرا فيها اني ديما الاولى .
ازهار؛باهي ورينا فلاحتك في البحث..
تسنيم بإبتسامة ثقة؛تو تشوفي..المهم توا لوحي عليك دانيه وركزي معاي...
🍁🍁
وفي الفصل اللي قدامهم..
ابلة الماده طلعت برا الفصل تتكلم بالتليفون وهما قالبينها دوشه وهدرزة..
في اخر مقعد في صفة الحيط..
ميس بضحكه؛بريلها بري..
ناضت روعه وهي شاده ضحكتها ومشت لسارة..
وقفت ع مقعدها وقالت:سارة..
سارة شبحتلها..
روعه؛قالوا انتي عندك لغة انجليزيه واني وصلتني رساله بالإنجليزي ماقدرتش نترجمها كويس ممكن ترجميهالي..
سارة بحسن نيه؛هاتي..
طلعت روعه تليفونها اللي جايباته بالسر...وحطت ع حاجه ومداته لسارة..
سارة خداته وقالت؛حي عليك كان يشدوك..
روعه؛فوتيهم..
سارة شافت للتليفون انصدمت..لوحاته طول وقالت بعصبيه...ياحقيره ياوسخه..
وروعه بإستعباط؛خيرك شن شفتي!!!!؟
وميس تضحك..
ع خشة الابله؛خيركم..
سارة ناضت من مقعدها ومشت تجري للتليفون خداته قبل لتوصل قيه روعه..
مداته للأبله وقالت؛شوفي ياأبله هدا لروعه جابتهولي ع اساس فيه رساله بالآنجليزي تبي نترجمها طلعت حاطتلي ع صورة وسخه..
خدت الأبله التليفون وشبحت لروعه بحده..
وروعه تشبح لسارة بغل..
الابله؛تحركي قدامي يللا...
وروعه مازال تشوف لسارة بنفس النظره..
وسارة تشبحلها بإزدراء..
الابله بصوت عالي؛تحركي..
مشت روعه بغضب وطلعت والابله وراها...
سارة ولت لمكانها وقالت؛تستاهل الحقيره..
ميس؛والله مافب حقيره وانتي عايشه...هي بصرت عليك بصارة عاديه لكن انتي ديري في جو الإستشراف والله اعلم بالمدرق..
التفتت سارة وقالت؛اني الباين زي المدرق عندي زيكم بالزبط بس الفرق في التربيه..
ناضتلها وقالت؛شن قصدك..
سارة خافت منها بس تظاهرت بالعكس وناضت وهي تقول:اللي فهمتيه..
ميس قامت كمامها وقالت؛تو نوريك شن شكلها ربايتي..
وكيف جت بتضرب سارة خشت الأبله شافتها وقالت بصوت عالي...هيييه انتي تبي تلحقي صاحبتك؟
ميس وخرت وقعدت تشوف للأبله بغضب..
؛تحركي جيبي شنطتها وانزلي بيها للإداره حصلت فصل اسبوع وشويه عليها..
ابتسمت سارة بشماته..
ميس شافتها هزت راسها بعدين مشت خدت شنطة صاحبتها وطلعت من الفصل والأبله وراها...
••••••••••
في الإستراحه..
دانيه؛موسخهم..
سارة؛قليلات ادب بلا ربايه...
انبار:مرة واني في الحمام شفت وحده فيهم تكلم في واحد في التليفون وتقوله في كلامه مقرف..يما...ماكو حشم..
سارة بإبتسامه:محلاك لما تتكلمي..
دانيه بضحكه؛فيها شوي عراقي..
انبار ضحكت وقالت؛المهم...شفتوا هديكا ميس حاطه عينها ع استاذ جمعه اللي عيونه ملونه..
دانيه؛سمعتهم كذا مرة يدووا عليه كان تندري عليهم جيهان تفترسهم..
ضحكوا....
وجمعه من الروشن كعادته يشرب في قهوته وعيونه عليها..
خش عليه اسماعيل شافه هكي ابتسم..
اسماعيل؛عندك ليك خبر..بس قبلها بنسألك سؤال..
جمعه:قول الخبر طول من غير اسئله..
اسماعيل بضحكه؛ماينقالش الخبر من غير اجابة السؤال..
جمعه؛اسأل..
اسماعيل قعمز وقال؛شن رايك في دانيه!؟
التفت جمعه وشبحله بعقده حواجب وقال:علاش تسأل في سؤال زي هدا!؟
اسماعيل؛قررت نخطبها هي المرة هادي..
جمعه قدمله وحط المق ع الطاوله وقال:تتسهوك انت البنت المخطوبه نسيبي خاطبها..
اسماعيل بضحكه؛يعني مزبوط مش عارف انت برغم انه نسيبك..
جمعه بنفاد صبر:ياراجل قول شن عندك طول من غير لف ودوران..
ضحك اسماعيل وقال:فضت الخطبه خلاص كل حد مش ع حاله..
جمعه بصدمه؛كيف!؟ من قالك؟...
اسماعيل؛مصادر خاصه..
جمعه شبحله شويه بعدين مشي طلع من حداه..
واسماعيل معاه بعيونه وهو مبتسم ابتسامه جانبيه..
🍁جمعه قلبه كان يحرك فيه مش مركز ع روحه شن قاعد يدير نهائي..
وصل لحجرة المدرسه..دق الباب...
الابلات شبحوله..
وجيهان طول ناضتله..
هو بعد عن الباب..
وهي جاته وقالت؛خيرك جومعه..
جمعه:حق خوك راجح فسخ..
هي انصدمت في السؤال..
جمعه:خيرك تبكشتي!
رفعت حاجبها وقالت:ايه..في شن يهمك انت !؟
هو قعد يشبحلها وهو ساكت مش عارف شن بيرد..
بس من داخله قلبه كان يحتفل بالخبر اللي سمعه.
منع ظهور ملامح الابتسامه ع وجهه وقال بعد صمت طال لثواني؛مايهمني في شي..
ولف ومشي واعطي لإبتسامته الحريه في الظهور ع  وجهه..
وقلبه طاير بين ضلوعه من الفرحه.
ومرته كانت حتبكي بس المكان اللي هي فيه مش مناسب.
🍁خش جمعه ع اسماعيل وقال؛حياته الخاصه مش ضروري نعرف عنها كل شي..خدي مق القهوة وكمل شرب..
اسماعيل؛صح ولا؟
جمعه هز راسه تأكيدا وهو ساكت..
اسماعيل؛معناها نتوكل ع الله ونفتح مع البنت الموضوع..
جمعه فنص فيه.
اسماعيل قعد يضحك..
جمعه؛شن الجو اللي دير فيه هدا..
اسماعيل هدى ضحك وقال؛فايقلك والله فايقلك من وقت..نبي نعرف علاش تزوجت مادام تبي البنيه لهالدرجه..
جمعه غمض عيونه بإستسلام..بعدين فتحهم وقعمز قدامه وقال؛حظ..الحظ خلاني نخش المدرسه هادي واني خاطب وخلا خطيبتي تجي معاي في نفس المدرسه..وخلاني نحبها واني مش حاس بروحي..اقسم بالله ماني عارف كيف..لقيت روحي مش طايق حياتي لأنها مش فيها..لاطايق مرتي لاطايق روحي..
اسماعيل:مرتك حاسه  بشي هدا علاش خطبتها لخوها..
جمعه حرك راسه يمين ويسار وقال:مش عارف..ممكن..
اسماعيل؛باهي وتوا ع شن ناوي..
جمعه رفع ايديه بقلة حيلة وقال؛مش عارف..
اسماعيل رجع  يشرب في القهوة وهو يشوفله..
وجمعه سرحان وطايح في حيره..ومش عارف شن لازم يدير...
🍁🍁🍁🍁
واقفه تشوف في قائمة الاسماء للمتحنين اللي تخطوا امتحان المفاضله بنجاح..
وين وصلت في الحرف متاعه شاف اسمه...
خليل خالد جمعه *****
نسيبه بفرحه ودموعها ينزلوا:الحمد لله ياربي الحمد لله..
ومشت بسرعه طالعه من الكليه وناويه الحوش بش تبشر أهله...
وفي الطريق..
اتصلت بعفاف...
🍁عفاف:هي بنيتي زيدي كولي راك خسرتي دمي هلبه لام تعوضي..
مريم؛والله معاد نقدر..
عفاف:ع خاطري بنتي ماتكسريش بخاطري..
ابتسمت وقالت؛حاضر..وكلت من يدها..
فجأة رن تليفون عفاف...
حطت الكاشيك..وطلعت التليفون من الشنطه لقت نسبيه تتصل ردت طول..
عفاف؛ايوه نوسه..
"خليل نجح ياعمتي نجح بيخش الطب خلاص بيخش الطب"...
بدت انفاس عفاف تتسارع من قوة المشاعر اللي حست بيهم كلهم في مرة..
فرح..حزن...
دموعها نزلوا وهي تقول بصوت مبحوح:ولدي خش طب..خليل خش الطب..
مريم ابتسمت بفرح وين سمعتها شن قالت...
وعفاف مازال تبكي وهي مصدومه؛خليل بيولي دكتور .
مريم بإبتسامه فرح؛مبارك عليه عمتي ربي يفتحها عليه ويفرج عنه..
عفاف من وسط قلبها:ااااه يارب...يارب...
🍁فهالاوقات في السجن..
المهجع متاعهم كان هادي..
وهو مقعمز يستنى ع نار وكان همسا يردد..
"لاحول ولاقوة إلابالله"
بحداه بمسافه في دار اسعد الكبير..
اللي كان يتكلم بالهاتف...
اسعد؛ايه جت تزوره بس مالاحظتنيش في الاول وجربت نتأكد انها مش متفكرتني طلعت فعلا ناسيه..
اللي يكلم فيه قعد ساكت ماعقبش ع كلامه..
اسعد؛معاي يارايس..
"معاك معاك..خلي الموضوع هدا عندي..المهم توا التموين حيوصلكم الليله وجماعتنا بيدخلوه..حاول تسيطر ع جماعتك اللي داخل..ابسط غلطه ضيع كل شي"
اسعد؛كون هاني ماتخمم في شي ياغالي..
نهي الطرف التاني المكالمه..واسعد نزل التليفون وقال:لمرة وحده سلم ياراجل..السلام لله...حرك راسه يمين ويسار وقال..مايبيش تنكتب عليه حسنه وحده..شيطان رجيم..
ضحك ودس التليفون..
فجأة سمع صوت العجيلي وهو يردد..
"وحياة قلبي وافراحو...وهناه في مساه وصباحه..
دامافيش فرحان في الدنيا زي الفرحان بنجاحو...'
مشي طلع من داره..
لقاهم كلهم ملتمين ع خليل ويغنوا مع العجيلي ويصفقوا..
وخليل في وسطهم يوزع عليهم في نظره وهو مبتسم بفرح ودموعه في عيونه..
مشي لجماعته وقال:افتح المكبر متاعك واعلقه ع التليفون وشغللنا هديكا متاع الغزاله..
واحد منهم قاله؛حاضر ياكبير...
العجيلي..
ونغني نقول دايما..دايما ع طول دايما..
كلهم بصوت واحد..
دايما ع طول...دايما ع طول..
العجيلي..
ده مافيش فرحان في الدنيا زي الفرحان بنجاحو..
ضحك خليل ومشاله ضمه وهو يقول:بارك الله فيك..
العجيلي:ربي يفتحها عليك ويفرجها..
خليل؛اجمعين ان شاء الله..
وقعدوا زملائه يهنوا فيه..
وفي عز التهاني والمباركات...
اسعد وجماعته شغلوا الاغاني الهابطه وبدوا يرقصوا وهو معاهم..
كلهم قعدوا يشبحولهم..
اسعد وهو يرقص:مبروك يادفعه مبروك..رغم اني مش عارف شن بدير بيها القرايه لكن ماعلينا خلينا نهيجوا..والغزاله رايقه 
العجيلي وهو يشبحلهم كيف يرقصوا قال:وانت الصادق والثيران الهايجه..
كلهم قعدوا يضحكوا..
واسعد قعد يشبحله ويقول؛حالف بالله ماني معكر جوي اليوم..هيا عطيه عطيه عطيه عطيه..
والكل يشبحولهم بين المزدري والمتهكم واللي يدعي بالفرج
واللي يضحك..
🍁🍁🍁
وخبر نجاح خليل انتقل للمهجع التاني وخالد اكثر من فرح بيه وكان يراجي امتى يجي وقت الغدي بش يشوف خليل
مش طامع في انه يهنيه ويضمه بفخر وفرح..
يبي بس يشوف الفرحه ع وجهه..
وجي وقت الغدي..
في المطعم تلاقوا....
واللي يهني ويبارك واللي يقول في اهازيج الفرح..
وخالد يتفرج من بعد ع فرحة ولده..
عقيل كان في جنبه يشوفله كيف يشبح لولده ودموع الفرح ينزلوا ويمسح فيهم..
تنهد بعدين شبح لخليل وزملائه كيف فرحانين بيه..
غير عيونه وشبح لأسعد..لقاه يشبحله..
غير اسعد عيونه وشبح لفاتح اللي كان يدربك ع الطاوله ويغني..
وعقيل حتى هو قعد يمرر في نظره بين فاتح واسعد..بعدين غيرهم لخليل واللي معاه...
🍁🍁🍁🍁
ونسيبه روحت للحوش وهي خاشه بسفرة حلويات.
بشرت صالحه اللي قعدت تزغرد لما سمعت الخبر..
ع مرواحة تهاني..
تهاني؛خيركم تزغرطوا..فنصت عيونها وقالت..نجح خليل!
نسيبه بضحكه؛مالا شنو ياماما مش قتلك من امس اني..
عيطت تهاني بفرحه ومشت لمرت خوها وضمتها بقوة
ونسيبه ضمتها وهي تضحك ومازال الحاجه صالحه تزغرد..
🍁اما جماعة المستشفى..
لما جي جهاد العشيه كان سامع بالخبر..
من فرحته شري مجموعه من شكولاته ميلكا متاع المناسبات ووزعها ع المستشفى...
وحصة الأسد منها كانت لمريم اللي اجواء فرحة نجاح خليل نستها اللي صار الصبح..
🍁🍁🍁🍁
بعد المغرب..
تم وقت حلقة التحفيظ..
والطالبات روحوا وقعدوا هما مع المعلمه لين يجوا اهاليهم.
المعلمه كانت عندها مكالمه..
وهما الزوز قعدوا مع بعض..
دانيه بضيق؛سارة..في حاجه نبي نقولهالك..
سارة قعدت تشبحلها وتراجي فيها تتكلم..
دانيه تنهدت وقالت؛من وحني فالمدرسه بنقولك وماعرفتش كيف...مجاهد بيخطب..
نزل الخبر ع سارة زي الصاعقه قعدت مسهمه في دانيه وخلاص..قلبها وين قلبها معاش حست بيه غاص في احشائها ...
دانيه؛سارة حاسه روحي بنقوله..
شدت سارة ذراع دانيه بقوه وقالت وهي بنبرة مخنوقه؛تقوليله معاش نعرفك يادانيه..خليه يخطب ربي يهنيه المهم عايش وموجود ومافيه شي..طلقتها وسكتت وهي تبلع في عبراتها..
رن تليفونها ناضت وقالت لصاحبتها؛السلام عليكم..ومشت بسرعه طلعت من الجامع..
ع خشة المعلمه؛خيرها سارة ؟
دانيه بحزن؛خوي بيخطب..
فاطمه ضمت شواربها لداخل بحزن بعدين قالت؛الخيره فيما اختاره الله..
🍁🍁🍁
وسارة مش عارفه كيف شدت روحها عن البكي وهي مع بوها
وبوها كان ملاحظ ان فيها شي سألها وهي قالت انها مرهقه وتبي ترقد...
واول ماخشت للحوش مشت طول لدارها خشتلها وسكرتها عليها..
ماجده بإستغراب؛خيرها!؟
هيثم وهو يفكر بقلق؛مش عارف صاير معاها شي وماتبيش تقول..
ماجده:زي شنو يعني!؟.
هيثم؛بالزبط مش عارف..لكن تو نعرف...
🍁🍁🍁
ويامصعبها ليله مرت ع ساره..
قلبها انفطر من البكي هديكا الليله..
قعدت تصلي وتدعي ربي يطلعه من قلبها ويخليها تنساه بسرعه..
وبش تهدا شدت المصحف وقعدت تقرا..
كانت تقرا وهي تبكي...وشويه شويه هدت لين خداها النوم ورقدت....
وقبل الفجر بشويه فاقت..
كانت ناسيه اللي صار..بس لما تفكراته رجعت تبكي من جديد وقلبها في بين ضلوعها كأنها جمرة والعه تحرق فيها حرق..
صلت القيام ومابطلتش دعاء..ومن بعده الفجر كذلك ومابطلتش دعاء..
وقبل ماتجهز نفسها للمدرسه..خدت كتاباته اللي هداهولها وحطتهم جنب شنطتها...
🍁🍁🍁🍁🍁
الساعه الثانية عشر الاعشر دقائق..
نهاية الدوام...
قبل ليطلعوا من المدرسه..
سارة؛خودي دانيه.
دانيه؛هادم هديه سارة.
سارة؛صح بس مايجيش يقعدوا عندي بعد هكي..
دانيه شبحتلهم شويه وبعدين قالت بحزن؛هاتي...
ومشوا الزوز طلعوا من المدرسه وكل وحده في قلبها حزن كبير...
وجمعه برا يراجي في دانيه تطلع وين شافها حتى من عيونه ضحكوا..
بس الضحكه فيسع اختفت...
سارة بدهشه؛دانيه!!؟
دانيه اللي كانت دايرة روحها ناسيه وعايشه حياتها عادي...
اول ماشافاته جاي ع الموطو...ولابس الخوذة..
بنفس الهيئه اللي عرفاته بيها قلبها خارت قواه الكاذبه..
غيرت عيونها عنه وشبحت لسارة وقالت بنبرة باكيه؛علاش جاي شن يبي..
سارة بنفس النبرة؛جاي يوجعلك قلبك وخلاص..
الزوز كانوا شادات رواحهم عن البكي بقوة...
وجوا باصاتهم وانقدوهم في اخر لحظه..
كل وحده فيهم مشت بسرعه لباصها وركباته..
واطلقوا سراح دموعهم...
راجح لحق الباص....وفات من حدا سيارة راجل اخته..
جيهان بضحكة فرح؛والله عرفته مايسلم فيها يحبها من جده..
جمعه بحده؛يحبها يدير جو المراهقين هدا ويشهدر بيها..
جيهان؛وشن شفته يعيط في الشارع بإسمها
جمعه؛هادي اللي نقصت عليه هو..قالك رائد في الشرطه..
وشغل سيارته وتحرك وهو يحرق في العجل..
جيهان" ان شاء الله تهبل المهم مش حتى فالحلم مش واخدها"
🍁🍁🍁🍁
"هي بالشويه عليك"
ركب مريم جهاد للسيارة وهو يقول في هالكلام..
بعدين مشي ركب هو..
جهاد؛هاشن تبينا نروحوا للحوش طول ولانديروا حاجه تانيه خاطرك فيها..
مريم؛نقولك لكن ماتضحكش..
جهاد ضحك..
مريم بضحكه؛مبردك..
جهاد بضحكه؛قولي شن تبي..
مريم؛ارفعني للملاهي خاطري فيهم قداش ليا عليهم..
جهاد قعد يضحك..
مريم؛باهي فهمنا بترفعني ولالا..
جهاد بضحكه؛نرفعك لكن لعب هلبه لا مازال تعبانه راهو..
ابتسمت بفرح وقالت؛باهي..
هو ضحك وحرك راسه يمين ويسار وتوجه لأقرب مكان يكون فيه مدينة العاب..
🍁🍁🍁🍁
الساعه الخامسه عصرا..
في حوش مجيد..
تحديدا دار البنات..
دانيه بضيق؛مانيش ماشيه اليوم وحتى سارة مش ماشيه..
رتاج؛علاش شن في..
دانيه؛هكي وخلاص..
دق باب دارهم..
رتاج؛خش..
فتح مجاهد الباب وقال؛مش ماشيه..
عقدت دانيه حواجبها وقالت؛ايه..
مجاهد شبحلها شويه بعدين قال:كويس خل نقعمز مع بوي تقعميزة رايقه ونتفاهموا في هداكا الموضوع..
دانيه ناضت وهي تقول؛استنى...
قعدوا يشبحولها هو ورتاج..
وهي خدت الكتابات من فوق الطاوله وجاته بيهم..
دانيه؛كتاباتك اللي كانوا عند ساره...
هو قعد يشبحلهم..
دانيه؛قالت توا مايجيش يقعدوا عندي..
رتاج قعدت تشبح لخوها...
وهو يشوف للكتابات..
ودانيه تشوفله..
شويه وسكر الباب وقال بإنفعال؛اتصلي بيها..
دانيه انصدمت فيه..
مجاهد بعصبيه؛شن تشبحيلي هكي اتصلي بيها قلت..
دانيه هزت راسها ومشت تجري حطت الكتابات ع الطاوله وجت لتليفونها خداته واتصلت بسارة..
🍁سارة فهالوقت كانت مقعمزة ع سريرها.
عقلها سارح ودموعها تنزل...
استاقظت ع صوت رنة تليفونها..
خداته من ع الكامدينو وردت ؛ايوه دانيه..
🍁دانيه كانت فاتحه المايك..
شبحت لخوها..
مجاهد ربع ايديه وقال؛سارة..
البنت جمدت في مكانها..
مجاهد؛سارة اسمعي اني اللي صار هدا كله ماخشليش راس وماتحاوليش تقنعيني بيه..سارة قولي الحق شن اللي خلاك تردي عليا بلا...قولي ياسارة..
سارة حطت يدها ع فمها وهي تبكي بصمت..
مجاهد؛والله ياسارة لو ماقلتيش توا نمشيلكم الحوش ونتفاهم اني وبوك بتقولي الراجل هبل قولي اما بش تبيني نخليك تريحي مني هكي لا ياسارة..
دانيه:قولي ياسارة..
مجاهد؛هاه معناها في حاجه..
سارة ببكي..
"باهي نحلفك بالله تتصرف بحكمه بالله عليك"
مجاهد:حاضر والله حاضر انتي غير قولي شن في بس..
هدت سارة نفسها وبدت تحكيله عن تهديدات رفيق..
وهو ولعت فيه وين سمع القصه كلها..
سارة بنبرة باكيه؛هدا يدير اي حاجه والله يديرها مش كلام وخلاص..
"مايدير شي مايقدر يدير شي مادوريشي اني نعرف نتصرف مع اللي زيه"
سارة بخوف؛شن بدير..
"قتلك تو نتصرف مادوري شي انتي..ماتخافي من شي..سلام"
ومشي طلع من الدار ..
"ياحليلي يادانيه شن بيدير خوك..حي عليا كان تصير فيه حاجه"
رتاج:مايصيرله شي بإذن الله والفرخ هداكا ماعنده مايدير غير الدوة يحساب الدنيا السايبه يدير فيها مايبي..
دانيه:تعالي جاي انتي..هدا كله جو درتوه عليا ولا؟
ضحكت رتاج..
دانيه:حيي ماغباني واني اللي صدقت انه بياخد هديكا..
"من هي؟!"
دانيه بضحكه؛قاعده ماسكرتيش انتي..
"من غير براده دانيه قولي من هي"
ورتاج تسمع فيها وتضحك...
🍁🍁🍁🍁
في الطريق كان يسوق في سيارته وهو يفكر وحاير ومش عارف كيف يدير...
يرد مرته وولده للحوش ولايطلقها ويفتك منها وياخد العيل ويبدا حياة جديده مازال يحلم بوجود سارة فيها...
ماكانش في حالته الطبيعه كان شارب بس مازال محتفظ بنص وعيه..
وقف في الطريق عند الاشارة...
قعد يمرر في نظره حواليه...ولما قربت الإشارة تتغير في لونها..
شاف في الطريق التانيه وحده نازله من سيارة  وهي لابسه عبايه ووشاح ومشت تجري ركبت في ميكرو..
وين سكرت الباب شاف وجهها كويس...فتح عيونهم ع وسعهم..
بعدين حركهم باتجاه االسيارة اللي نزلت منها شاف فيها واحد يدوي بالتليفون...
انفجع لما سمع صوت منبهات السيارة..
شبح للإشارة لقاها خضراء..
تحرك بسرعه...ولف للطريق التانيه وين مافي الباص اللي قاعد واقف..
درس وراه ونزل يجري..وصل فيه وقعد يخبط ع بابه..
"انزلي ياحيوانه انزلي" ...وقعد يشتم بأقبح الألفاظ..
هي لما شافاته ماتت من الخوف قعد تقول بهلع؛تحرك تحرك وراس خوي تحرك..
سواق الميكرو تحرك طول والناس في اللي باص يسألوا فيها من يكون...
هو قعد يجري ورا الباص ومازال يشتم فيها..والعالم حواليه يتفرجوا....
بعدين وقف والتفت لصاحب السيارة..
لقاه يهرب بسيارته وهو يحرق في العجل..
مشي رفيق جري لسيارته وهو يقول:الله لما نقتلها بالله...
وركب السيارة ولحق الميكرو بسرعه...
وسجى تندب وتبكي...
السواق:يااختي شن دايره وهدا منو تكلمي..
وسجى ماغير تبكي وخلاص...
وحده قالتلها؛خوك...
سجى ببكي وهي تخبط ع رجليها:راجلي راجلي..
سواق الميكرو شد فيرنو وقاللها؛انزلي اختي..
سجى بخوف شديد:لالابالله عليك لا وراس من
عندك غالي لا...
السواق: اني غالط مفروض ماخليتكش تركبي مانتحملش المسؤوليه يااختي انزلي..
سجى بتوسل:بالله عليك لالا ورحمة بوك يقتلني الله يقتلني...
هو درس وراهم..ونزل يجري فتح باب الميكرو وخش..
قعدت تعيط بهلع:لا لالا..يابشر خلصوني منه ياناس..
هو جبدها من وشاحها والألفاظ النابيه تنهال عليها...
والموجودين مافيش حد منهم يبي يدخل..
طلعها برا الميكرو...
وصاحب الميكرو هرب بسرعه..
رفيق:اني ياكلبه اني تقرنيني..وقعد يشتم فيها ويعطي فيها في كفوف ورا بعض..
والناس تتفرج...
وهي تعيط وتقول..تعالولي ياناس تعالولي...
وهو يضرب فيها بكل وحشيه..
بعدين جبدها للسياره ركبها وسكر عليها..
وركب وهو يقول:نقتلك ياكلبه نقتلك..
وسكر الباب وتحرك طول...
والناس اللي كانت تتفرج تسترجع وتحوقل وخلاص...
وهو في السيارة شدها من شعرها اللي تعرى وقعد يخبط في راسها ع درج السيارة ويقول؛اني ياجربه ياخامرة تقرنيني يافاجره...وهي تعيط  ع طول رقبها..
وهو يخبط فيها بيده قريب يقتلها....
ومع هذا مازال يسوق..وكأن اللي صار فيقه من السكرة اللي هو فيها..
لما قرب يوصل لشارعهم..
وقف السيارة..وطاح فيها ضرب..وراسها قعد يخبط فيه لين نزفت واغمى عليها..
رفيق بغضب وحقد شديدين؛ان شاء الله معاد تولي يافاجره..
وحرك السيارة وقعد يسوق لين وصل لحوش خالته..
نزل وجاها هي نزلها ولوحها قدام الحوش وهو يقول بصوت عالي...
"تعالوا نظفوا وسخكم ياعيت*****"
والجيران طلعوا من الرواشن والبيبان وقعدوا يتفرجوا...
ولى ركب سيارته وتحرك طول...
وخلاها زي الجثه الهامده ع باب حوش اماليها...
🍁🍁🍁🍁
فهالوقت خش جهاد بمريم للحوش...
لاقتهم عفاف وهي مبتسمه؛هدا وين نور الحوش..
مريم ضحكت..
عفاف بضحكه:ولتله الغزاله متاعه اللي تجري هني وهني .
ضحك جهاد..
ومريم سلمت ع عمتها وقالت:تسلميلي ياعمتي والله عسل انتي باهي..
وعفاف تضحك..
ع جية صالحه وتهاني..
تهاني بإبتسامه؛حمد لله ع سلامتك مريومه..وسلمت عليها..
مريم؛الله يسلمك توهه..
صالحه؛طيب ع سلامتك يابنيتي ربي يحفظك بحفظه..
مريم جتها سلمت عليها وقال؛يطول في عمرك خالتي..
جهاد؛اسمعوا ماديروش عشي بنجيب برا زردة سلامة العزوزة هادي...
ضحكوا ومريم ابتسمت بخجل...
🍁ونسيبه كانت تنزل من شقتها...
وصلت لوطا فتحت الباب وطلعت..
ع فتحة باب الحوش الخارجي..
شبحتله..شافت رفيق خاش بسيارته...
غيرت عيونها عنه ومشت خشت للحوش..
وهو درس ونزل يجري من السيارة..
خش عليهم زي الوحش الضاري....
رفيق بغضب شديد؛كله منك انتي كله منك..
كلهم انفجعوا وقعدوا يشبحوله..
هو قدم لأمه وقال؛كان مش منك انتي راهو ماخديتش هالفاجرة ولاانحسبت عليا..
جهاد؛خير دعوتك انت شن جاك!!
رفيق وهو مازال يشوف لأمه؛نقولك كنت شارب ماكنتش بوعيي تقولي لابتتزوجها غصب عنك وترقع عملتك..عملة شنو تي بنت اختك الكلبه هي اللي جتني هي..اني شارب مش بوعيي لو كنت بوعيي مانشبحلها ع الوسخه هادي مش نقربها..
كلهم يسمعوا فيه شن يقول وهما مصدومين..
وعفاف اللي كانت مصدومه اكثر منهم شبحتلهم بعين مكسورة..
رفيق:خلتيني ناخد هالخامره الفاجرة غصب عني بش نستر عليها ع قولتك..
مريم كورت قبضة يدها وشدت عليها بقوة..
رفيق؛والسترة مش ليها والشكالات اللي زيها..
جهاد جاه جبده من كبوطه وهو يقول:شارب ياكلب ولا..
رفيق حول يده بقوة:وقاله ايه شارب لكن اللي نعرف شن نقول...اني تزوجت الكلبه بنت خالتك بعد ماغلطت معاها واني شارب..امك عرفت..شافتنا ايه شافتنا وجبرتني ناخدها بالسيف..حتى من خالتي اسيمه الله يرحمها جابتها هني هني وفضحتني قدامها وحشمتني بش ناخد بنت اختها الفاجرة ونستر عليها..
الكل الصدمه مسيطره عليهم مش مصدقين اللي يسمعوا فيه..
ومريم اكثر وحده تأذت من اللي تسمع فيه...
جهاد شبح لأمه..
وعفاف تشوف لرفيق بإزدراء ودموعها ينزلوا...
جهاد بصدمه:شن يقول هدا يام!..
شبحت لجهاد وماعرفتش شن ترد..
جهاد؛تكلمي يام هدا كله صاير وحني مانندروا ع شي!
رفيق بدي يضحك زي المجنون..
كلهم بشبحوله...
هو هدى ضحك وحط يده ع كتف وقاله:مالا اسمع هادي..
عفاف فنصت بخوف وقالت؛رفيق...
رفيق بضحكه؛بوك بوك ريته..
عفاف بعياط؛رفيق..
رفيق بصوت عالي:اسكتي انتي خليني ندوي خليه يعرف مسكين ساده ماعاش غافل...
جهاد وعيونه معبيات دموع:خيره بوي!؟
رفيق؛بوك ياغالي دار نفس الشي مع خالتك سماح..حتى هو غلط معاها بش مافيش من شده وقتها..
تهاني وكأنه نزلت عليها صاعقه لما سمعت شن قال...
ونسيبه ومريم كانوا الصدمه كادت تفقدهم الوعي..
اما صالحه قعدت تشبح لعفاف وهي مش مستوعبه..
جهادمن صدمته جي بيتكلم ماقدرتش...
طاحوا دموعه...ويدوب تحركوا شفايفه لما قال بلاصوت...
بوي !!!!.....
رفيق هز راسه:ايه ايه بوك..مالا علاش اني وخليل قطعناه ومعاش دورناه...ااه ياخوي اااه اللي داره بوك قاعد يولي علينا واحد واحد..الله اعلم انت في شن تجيك..
مريم نزلت عيونها وشبحت بألم وخزي لمعصم يدها اليسار اللي كان ملفوف بالشاش..
رفيق اشر ع تهاني وقالت؛وانتي مع سمعة عيلتك المحترمه حتقعدي في رقبة امك لين تموتي...وكله من مني..من بوك..ياريته ماكان ولاصار..شبح لأمه وقال..ولاعرفتيه ولاعرفك..ولاكنا فهالدنيا المسخه..
عفاف بكره ودموعها ينزلوا:ياريتك انت اللي ماكنت ربي يغضب عليك دنيا وآخره يارفيق...
فجأه...
انسمع صوت منبهات سيارات الشرطه...
عفاف غمضت عيونه بشده..
وهما كلهم التفتوا وشبحوا لباب الحوش الخارجي..بنظرات ترقب وخوف وألم.....

#آلام_الآثام
#البطل_المغمور2

....يتبع....