البطل المغمور "زهور القمر"

الجزء الرابع 2

#البطل_المغمور2  "زهور القمر"
#جمان_فريد
#الجزء_الرابع  "مقسوم2"
☄رد بالك☄
شهر رجب بدي..
كل عمل ديره حيكون اثقل في ميزانك
وأي ذنب اثمه اكبر...لأن الله اختصه وباقي الأشهر الحرم بالتعظيم..
"فلا تظلموا فيهن أنفسكم"
اذكروا الله...وصلوا على الحبيب
💐💐💐💐💐💐💐💐💐💐💐💐💐💐💐💐💐
الساعه التاسعه ليلا..
في الحوش ماكان في حد غيره هو وريحان..
والباقي كلهم موجودين في صالة عرس ملاك..
هو كان مقعمز في الجنان يهدرز مع ولد جيرانهم..
وبعيد عليهم ريحان شويه مقعمزة ترسم..
•••هيثم؛غدوة بإذن الله جهز نفسك بنمشولهم اني وياك..
جهاد:غدوة؟!
هيثم:مالا امتى..قتلك قبل موضوع زي هدا مايتأجلش..
جهاد قعد يشبحله وهو يفكر..
هيثم حرك راسه بتساؤل وهو يقول:شنو..ماتقولش بتولي في كلامك؟
جهاد؛اكيد لا..نفكر بس في اللي بيصير..
هيثم؛شن ماصار وشن ماسمعت ماتقولش الا الكلام الموزون ياجهاد..
جهاد؛نخاف يطلعوني عن طوري..
هيثم؛لالالا رد بالك.. خليها عليا تمام؟
جهاد تنهد وهز راسه بإيجاب..
رن جرس الحوش..
هيثم:اكيد العشي..نوض نوض افتح الباب جعان..
جهاد بضحكه:قبلها خديت دواك..
هيثم هز راسه بإيجاب وهو مبتسم..
جهاد بإبتسامه:كويس..ومشي للباب بيفتحه..
ريحان عيونه ع الباب..
شويه خش جهاد وفي يده شكاير...
ريحان حطت حاجاتها و ناضت ومشتله وهي تقول:شن هدا؟
جهاد بإبتسامه:عشي ياسمحه..
هيثم:هي تعالي قعمزي بابا..
ريحان مشت قعمزت ع الكرسي وقالت:بابا انت تاكل زيي راهو..
ضحك جهاد..
هيثم:توصيات هادي..
جهاد؛حتى اني وصوني راهو...
هيثم مط شواربه بإستياء:مافيش كيف ناخد راحتي بكل..تصدق وين نكون في الخدمه نقول كول ياهيثم من يشوف فيك..وين نذكر الوعد اللي عطيته لبنتي نولي ع تالياتي..
جهاد ضحك وقال:غير قول مافيش حاجة زرقت من هني ولاهني الممنوع المرغوب..
هيثم حرك عيونه ناحية ريحان اللي كانت تشبحله..رجع شاف لجهاد وعقد حواجبه وحرك راسه نافيا وهو يقول:لا ابدا..
جهاد قعد يضحك..
وهيثم؛بالك ياسرك ضحك وهيا بناكل جعان..
ريحان بضحكه؛اول مرة تقول جعان هلبه مرات..
هيثم؛ماهو جعان حق من جوعي ناكلك حتى انتي..وطبس عليها زعيمته ياكل فيها وهي تضحك...وجهاد يشبحلهم وهو مبتسم...
ريحان:اه بابا خلاص..وجعني الجرح..
هيثم بخوف:هلبه بابا؟
ريحان:لالا مش هلبه نشته بالشويه..
هيثم باس راسها وقال:اسف بابا..
ريحان:عادي بابا..هيا كولوا حتى جيعااانه..
ضحكوا الزوز...وبدوا يتعشوا مع بعض...
🍁وفي صالة العرس كانت الاجواء حلوة..
وملاك طلعت جميله جدا..
بس ابتسامتها المرسومه ع وجهها كانت مغصوصه..
والدمعه معبية عيونها  وهي تذكر في اللي صار اليوم قبل لتمشي المزين..
🔺️في وقت سابق..
مقعمزة في دارها وخوها واقف فم الباب يشوفلها..
ويسمع في عفاف شن تقول..
عفاف:هي سلم بنتي تعوذي من الشيطان اطلعي سلمي ع بوك..
ملاك ودموعها وهي تتكلم بعصبيه:مانبيش ومانيش طالعه مانيش..شن يبي جاي توا شن عنده من قاله يجي اصلا اني مانبيش نشوف وجهه..
عفاف:معليشي بنتي يقعد بوك..اطلعي سلمي وخشي طول هيا بش ربي يرضى عليك ويباركلك في حياتك..
ملاك بعصبيه ونبرة باكيه؛قلت مانيش طالعه مانيش..مانبيش نشوفه..اني ماعنديش بو اصلا ولاأم دافنتهم من زمان ماتوا وشبعوا موت..
ع خشة صالحه:خلاص ياعفاف خليها تبوها تمشي للمزين هكي...
عفاف تنهدت بضيق وقالت؛الله غالب..ولفت ومشت طلعت..
صالحه؛نوضي سلم بنتي دوشي ووتي روحك..
ملاك ببكي:مانبيش نشوفه ياحناي..
صالحه قعمزت حداها وضمتها وهي تقول؛لزيته بنتي لزيته جاي يخرب عليك فرحتك ولزيته..ايه صح ولدي لكن اني نكرته كيف مانكركم ونساكم ونسيته...
و ملاك تسمع فيها وتبكي..
صالحه بعدتها وقعدت تمسح في دموعها وهي تقول:نوضي بنتي سادك بكي نوضي دوشي هي بش تمشي للمزين هيا نوضي..
هزت ملاك راسها وقعدت تمسح في دموعها وهي تقول:باهي..
🔺️في الوقت الحاضر..
جوها صاحباتها ونوضوها بش ترقص معاهم..
وهي معاهم نست كل شي وعاشت فرحتها...
🍁وبرا الصاله..
بوها يوصي في خليل عليها..
خليل:تو جاي توصينا حني!؟
منتصر؛عارف مش من حقي..لكن نقعد بوها..
رفع خليل حواجبه وقعد يمرر في نظره قدامه وهو ساكت..
منتصر:وبوكم ماتقطعوشي..
شبحله خليل بطرف عينه وقال:من قالك مقاطعينه؟
منتصر؛هو ماقال شي لكن اني فهمت بروحي..
غير خليل عيونه عنه...
تنهد منتصر وقعد ساكت...
وخليل قعد يفكر بضيق في بوه اللي مش قادر يسامحه ع اللي داره نهائي...
🍁🍁🍁🍁
واخده المعطر وتبخ فيه في الحوش...
وصوت واحد من علماء الدين  مسموع في الحوش كله من الراديو...
فجأة سمعت صوت جرس الشقه..
لبست وشاحها ومشت للباب..
وصلت فيه وقالت؛مني؟
"اني دانيه"..
ابتسمت برفعة حاجب وفتحت الباب..
خشت دانيه وفي يدها صونيه فيها فطيره وقالت:السلام عليكم..
سكرت مقبوله الباب وقالت؛وعليكم السلام..خشي يادانيه خشي..
دانيه:لالا مانبيش نضايقكم امي بعتتلكم فطيره تفضلي..
مقبوله خدت الصونيه وقالت:باهي خشي داخل خشي..
دانيه شافتها مصره استلسمت ومشت خشت..
مقبوله قعمزي ع الصالون شويه وجايه..
مشت دانيه قعمزت ع الصالون وكأنها قعمزت ع شوك ماتبيش تقعد..
حطت مقبوله الصونيه في الكوجينه وطلعتلها..
جتها قعمزت حداها وقالت:شن حالك يادانيه شن دايرة في القرايه..
دانيه:الحمدلله كله تمام..
هزت راسها وقالت:اممم..دانيه..انتي الله يبارك عليك بنيه جميله جدا ومعرضه للفتن علاش ماتلبسيش خمار..
دانيه:مايسمحوش بيه في المدرسه...
مقبوله:وعلاش تقري فيهم المدارس هادم...العلوم الدنيويه ماتنفعكش في اخرتك..التفقه في الدين اهم من علوم الدنيا مجتمعه..
دانيه قعدت ساكته وهي مضايقه مش عارفه شن تقوللها..
مقبوله:شن رايك تسيبي المدرسه هادي وتسجلي في مدرسه سلفيه...
دانيه؛هو اني نبي مش توا..نبي بعد نكمل قرايتي..
مقبوله:ضامنه تعيشي لهداكا الوقت؟
دانيه قعدت ساكته وهي مضايقه حست روحها مخنوقه وتبي تنوض..
مقبوله تنهدت وقالت:الهدايه بيد الله سبحانه وتعالى فذكر انما انت مذكر..بس اني صراحه خايفه عليك من التوغل في الفتن.. بالذات بعد اللي شفته اليوم..
انصدمت دانيه وشبحتلها وقالت؛شن شفتي؟
مقبوله رفعت حاجبها وقالت؛الشاب اللي كان ماشي وراك وانتي تكلمي فيه..
دانيه بخوف:لالا والله انتي فاهمه غلط هو قال يبي يبعت اهله ويخطب..
مقبوله:لو يبي يخطب يجي لبوك طول مايكلمش انتي..
نزلت دانيه عيونها وهي مضايقه ومنحرجه..
مقبوله:خايفه عليك من الوقوع في المحظور يادانيه...وبعدين نماذج هادي مافيهمش امان اللي يسلك الطرق الملتويه بش يوصل فيك مافيشي خير ليك..ننصحك لوجه الله..لما تجي تفكري في الزواج تزوجي من ترضين دينه وخلقه..انسان ملتزم سلفي..غيره صدقيني ماينفعك لادنيا ولاآخره...
دانيه ولاكلمه تسمع وبس..
مقبوله؛ونصيحه اخيره...البنت ماليها الا بيتها وزوجها..اني خواتي طلعوا من الثانويه زوجانهم طول لان في الزواج السترة والعفه للبنت تقعمز في حوشها وتقول بواجب راجلها وصغارها وربها قبل كل شي هادي تخش الجنه طول..
دانيه هزت راسها وقعدت ساكته..
مقبوله ابتسمت وهزت راسها وقالت؛تقدري تروحي..
دانيه ناضت طول وقالت؛تصبحي ع خير..
ومشت طول للباب..
ومقبوله وراها شافتها لما طلعت.
بعدين مشت لصونية الفطيره..
عرتها وقعدت تشبحلها...قامت طرف بروس صوابعها وشبحتله بقرف..بعدين رداته..وخدت الصونيه ومشت لسطل الكناسه..لوحت الفطيره كلها...
بعدين غسلت الصونيه..
ع خشة مجيد للحوش...
هي مشت كفت الصونيه فوق مفرش ع الطاوله وهو خش عليها قال:السلام عليكم..
حط شكاير ع الطاوله وقال؛هاك قسميها بينا وبينهم..
مقبوله؛باهي..تبي تتعشى..
مجيد؛اكيد..ايه واني راكب شميت ريحة تطييب فطيرة انتي درتيها .
هي ابتسمت وقالت:لا لكن كان خاطرك فيها نديرها..
مجيد:ياريت والله..
مقبوله:حاضر..
مجيد؛يحضرلك الخير حلقومتي...هي نمشي نغير ونجي..
ومشي طلع من حداها...
وهي عقدت حواجبها وشبحت للبضاعه وقعدت تقسم فيها بينهم وبين حوش ضرتها...
كل شي مولي تحت يدها هي..لأنها هكي متعوده تتحكم وتسيطر...
🍁🍁🍁🍁
"شوفي ماما هدا شن رايك فيه"
عواطف:حلو..بس مازال في احلى..
جيهان؛ايه..وقعدت تقلب في كتالوج فساتين افراح موضة السنة..
عواطف:اختاري اللي تبيه كله توا اسبوع الجاي مسافرين راهو..
جيهان:الموديلات اللي نبيها كلها اخترتها قعد بس الفيلو..
ع خشة راجح؛السلااااام..عليكم..
وانطرح ع المندار قدام المكيف.
جيهان:باهي اللي ريناك..قريب ننسى شكلك..
عواطف:من هالخدمه السودا بتاخد عمره كله مش ملحق معاها يدير شي..
راجح بضحكه؛لا خلاص ياطوفا بنتزوجوا المرة هادي رسمي..
جيهان خافت..
وامه قالت؛حق ولاتتسهوك زي عادتك..
راجح:حق يام حق..ونبيك تخطبيلي..
جيهان؛قصدك هي تشوفلك ولابتعبتها لوحده معينه..
راجح:بنبعتها...
عواطف:جديات..من هي وبنت مني وكم عمرها..بالله المرة هادي اختار صح..
جيهان قعدت تشبحله وهي تراجي في اجابته..
راجح:المهم يكون اختيار صح بالنسبه ليا هني..هي يام ملكة جمال...
رفعت امه حواجبها .
ضحك وقال:تقرا في المدرسه قاعده تانيه تانوي..
ابتسمت عواطف وقالت:هدا الصح..وبنت مني..
راجح؛بنت ناس محترمين..بوها يخدم في جهة حكوميه..وعندها خوها مهندس نفط..واختها متزوجه رجل اعمال معروف في البلاد..
جاب لأمه المواصفات هادي بش يخدرها ويخليها تتقبل الموضوع..
عواطف:كويس كويس لاشكلك هالمرة عرفت تختار..
جيهان؛نعرفها اني؟
راجح شبحلها شويه وقال:ايه...البنت نفسها..
جيهان؛حي عليك مريضة سكر راهو..
امه بصدمه قالت؛كيف!!؟
راجح؛وكان مريضة سكر وين المشكله..
عواطف:وين المشكله!!!؟اسكت اسكت سلم ولدي اسكت والموضوع هدا انساه ومرة تانيه خليني اني نختار..ولافوته الموضوع بكل..
راجح قعد يشبح لجيهان بحده..
وهي غيرت عيونها عنه للمجله..
عواطف:علاش طيح في سعدك وتاخد وحده مريضه وتقعد تعاني فيها...وسكر فوقها..سكر...لاحول ولاقوة الابالله وخلاص..
راجح بحزم؛يام البنت هادي اني نبيها بجديات ونحبها....ورب الكون يام كان مامشيتش خطبتيها وجهي معاش تشبحيه عمرك كله..
وناض ومشي طلع وهو يقول..وانتي اختاري..
قعدوا امه واخته في حالة صدمه لين سمعوا باب الحوش تسكر..
جيهان؛ردي بالك تخليه يأثر فيك يام البنت شلافطيه ومش لينا بكل وفوق هكي مريضه..
عواطف:لايأثر فيا ولامحرك فيا شعره..كيف مافات بنت الكاتب ونساها تو ينساها حتى هي..
جيهان هزت راسها وقالت؛ايوه صح..
ومن داخلها مازال خايفه وحاسه ان راجح هالمرة مش زي اللي قبلها ...
🍁🍁🍁🍁
"عطتني محاضرة طويله عريضه.."
هادي دانيه تكلم في اختها رتاج هاتفيا..
"وهي شن دخلها الحيزبونه هادي"
دانيه بخوف:هي خشت في ماكلتنا ماتبيهاش تخش في حاجه زي هادي..
"هادي طقت اسبوع وهكي مالا شن مازال بدير القدام!!؟"
دانيه بقلق؛مش عارفه..خايفه تحرش بوي يارتاج بنموت من الخوف من بكري نراجي يجي يهجم عليا "
"مجاهد قاعد ماتخافيش"
دانيه تنهدت بخوف..
"باهي هدا زعمه يجي يخطبك حق"
دانيه بحزن؛مش عارفه..بس كان دارها حق لما يعرف باللي عندي يهرب..
"وعلاش فيك الإيدز! مرض عادي راهو"
دانيه ودموعها ينزلوا:لا مش عادي بكل يارتاج وانتي تعرفي..
سكتت رتاج..
ودانيه انهارت بالبكي...
ورتاج اللي كان واجعها حالها قعدت تهدي وتدعي ع من كان السبب...
🍁ومازلنا فهالليله الصيفية الطويله عكس المعتاد...
بعد تمت حفله ملاك وجي راجلها وروح بيها بعد وداع حار بينها وبين حناها..
وروحوا بعدين كلهم...
خليل روح بأمه ومرته واخته ومعاهم ماجده وسارة وجنان..
ورفيق روح بمرته والحاجه صالحه وعرفه...
كانوا عيون رفيق ع سيارة خوه قريب يموت ع مايكون مكانه...ومرته كانت مركزة عليه ومن داخلها بتموت من الغيره والقهر...
اما عند خليل..
••ماجده وفي حجرها جنان راقده؛قداش ليا ع العراس...
عفاف:اهو جايك عرس نوسه...
خليل شبحلها من المرايه هي شبحتله وابتسمت.
ماجده؛لاعرس نوسه هدا بنهيج فيه لين نقول ياني..
عفاف بضحكه؛ان شاء الله ع خير ياربي..
كلهم قالوا:آمين..
ماجده:اهم حاجه النوبه خليلو ايوه..
ضحكوا كلهم..
خليل بإبتسامه؛من عيوني..
ماجده؛ وخيتي نجيه ياربي والله بنية اختي ماتهنيت عليها كان لما ولت ليك.....
نسيبه نخصت خالتها..
ماجده:هاه خيرك تنخصي..
ضحكوا...
نسيبه غمضت عيونها وحطت يدها ع وجهها.
وعيون خليل عليها وهو يضحك..
ماجده؛شن قلت من غلط اني مرته ولامش مرته انتي..
نسيبه:كلمه تانيه نفتح الباب وننزل..
قعدوا يضحكوا..
ماجده بضحكه:لاخلاص بنسكت ع خاطر العرس..
عفاف بضحكه:عطيك الهني ياماجده...
وكملوا هدرزة..
وتهاني كانت حاطه راسها ع كتف ساره وسارة حاطه راسها ع راس تهاني..والزوز نعسات..بس كانوا معاهم يسمعوا فيهم ويضحكوا معاهم...
🍁وروحوا للحوش..
لقوا ريحان راقده..وهيثم سهران ع كتاب ليه علاقه بتخصصه..
هدرزوا عليه شويه بعدين اللي هادي مشت لدارها ورقدت...
وخلوه يكمل باقي سهرته مع الكتاب..
بعدين...سيبه وقعد يفكر في هلبه حاجات..كلها كانت هموم ثقيلة الحمل...
لما حس ان كثرت التفكير بدي يرهق فيه..
ناض..ومشي توضا..وصلى ركعتين..
كان دعاء فيهم واحد بس..
"ربي آتني من لدنك رحمة وهييء لي من أمري رشدا"
🍂وفي اخر هالليله الصيفيه..
وفي عز هدوئها...
ناضت عفاف من نومها مفجوعه...
صدرها مطبق ونفسها مغموم ونبضات قلبها متسارعه...
وقفت وهي حاطه يدها ع صدرها..
فتحت باب دارها وطلعت تجري وهي تنادي؛تهاني...تهاني...
وعيطت بصوت عالي...تهاني...
فتحت تهاني دارها وطلعت وهي مخلوعه..
شافت امها حاطه يدها ع صدرها وتحاول تتنفس...
جت الحيط وقعمزت وهي تقول بتعب:بنموت..بنموت يابنتي بنموت..
تهاني وهي مفجوعه؛لالا ماما اسكت..
وجتها رقدتها لوطا..ورفعت رجليها فوق...وقعدت تنادي وهي تعيط:رفيق..خليل...خليل...جهاد..
عفاف؛بنتي...يابنتي..خلاص شكلي خلاص يابنتي...
تهاني ببكي؛لالا ياماما لا ماتقوليش هكي...وعيطت تاني وهي تنادي..خليل...
ع جية رفيق ووراه مرته تجري...
وباب الحوش انفتح وخشوا خليل جهاد وهما مفجوعين كانوا بايتين فوق في شققاهم..
خليل بصدمه؛خيرك يام خيرك..
جي عند راسها وقعمز ع ركابه وخدي يدها وشدها وقعد يمسح فيها بإيديه وهو يقول..شن تحسي يام...
عفاف:بنموت...بنموت...
رفيق قعد يتلمس في وجهها ودموعه ينزلوا قال:مصقعه ياخليل..
جهاد؛بنطلع نولع السيارة لبسوها..
عفاف:لاخليك..اسمعني...اسمعوني..سامحوني بالله عليكم سامحوني..سامحوني..وجعتكم وتعبتكم...كله مني اني كان خديت راجل مقوم راهو مش هدا حالكم...
خليل بدموع؛تي غير شن تقولي يام بس..
تهاني ببكي:شن تراجو ارفعوها...
جهاد طلع يجري...
خليل؛خشي جيبي عابيتها ياتهاني..
تهاني مشت تجري لدارها..
وقعدوا معاها رفيق وخليل حداها..
رفيق:يام حبيبتي مافيك شي..
وخليل مسح ع جبهتها وحط يده ع راسها وبدي يقرا عليها...
وهي شاخصة ببصرها في السقف تاخد في أنفاسها بصعوبه...
شويه وناضت قعمزت وهي تقول: بنرجع...جيبوا الكروانه...
ناض رفيق يجري للكوجينه..
خليل:رجعي يام ومادوريش..
حركت راسها بالنفي..
رمي التيشرت متاعه وحطه قدامه وقال؛رجعي يام...
معاش قدرت تشد روحها وقعدت ترجع ع تيشرت خليل..
سجى انقرفت لفت وجهها وبعدت...
خليل:جيب مية يارفيق ..
ع طلعة تهاني بالعبايه قعدت تشبح لأمها وهي ترجع..
تهاني:حي عليا خيرها...
خليل بنرفزة:اسكتي وسكري فمك..
ع جية رفيق يجري بالكروانه وطاسة ميه ووراه جهاد يجري حتى هو..
وصلوا فيهم..
وهي بطلت ترجيع..
خليل؛شني يام..
هزت راسها وقالت:ميه..
رفيق طبس ومدلها الطاسه..
خدتها وقعدت تشرب منها...وصغارها يشبحولها بخوف...
بعدين مدتها لرفيق...
خليل؛هي نوضي يام نرفعوك المستشفى..
عفاف:لا لامستشفى لامستشفيات..بري تهاني جيبيلي جبنه مالحه شكله ضغطي هبط..
تهاني مشت تجري...
رفيق:يام نوضي ربي يهديك..
عفاف؛ماعنديش جهد للعياط..قلت لا افهموا..
خليل:خلاص خلوها ع راحتها..
ولم الفانيليا متاعه وخدي الكروانه من رفيق وحطها فيها وناض للحمام..
جهاد جي لأمه ساعدها بش تنوض وهو يقول:تعالي للجنان خودي نفس..
هزت راسها..ومشت معاه..وتهاني طلعت من الكوجينه ولحقتهم...
رفيق بعد ماكان يشوفلهم التفت لمرته وقال؛خيرك واقفه غادي متعيفه!؟
هي قعدت تشبحله بخوف معاش عرفت شن تقول .
ع طلعة خليل من الحمام شبحله وقال؛هييه رفيق..خليها ياراجل..
رفيق شبحلها شبحة قسمتها نصين ومشي طلع لأمه..
وخليل طلع قبله..
سجى وعيونها معبيات دموع بحقد؛حقير...
ولفت ومشت لجناحها...
🍁🍁🍁🍁
تاني يوم...الجمعه
الساعه الخامسه الاربع عصرا..
واقف فم حوشه وهو لابس عربي كاط طويل لونه رصاصي في الأسود..حاط ايديه ورا ظهره ويسمع لولد جارهم اللي كان لابس بدله عربيه فرملة لونها عسلي..
جهاد؛اللي جاها جاها امس وتقول قلبي وقاعده تحس فيه..كان تجي معاي دكتور تكلمك هي وتفهم منها اكثر..
هز هيثم راسه وقال؛تمام..تفضل..
مشي جهاد قدامه وهو يقول؛والله اسود ليله تمر عليا في حياتي..
هيثم تنهد بألم وقال:عارف عارف..ربي يحفظها ويطول في عمرها ع الطاعه وبإذنه حتكون مشكلتها بسيطه..
جهاد؛يارب...
وصل في حوشهم فتح الباب ودخل هيثم..
قعد هيثم واقف في الجنان وهو يستنى..
••داخل..
عفاف:تي غير علاش مكلمه وجايبه شن فيا مافيا شي..
جهاد؛يام معاش تناقشي خشي البسي حجابك واطلعي معاي..
تأففت ومشت لدارها..
خشت وهي تقول بعصبيه وخجل:عليك مواقف يديرولي فيها..
لبست عبايتها..وشاربتها ومشت طلعت..
وهيثم برا يمرر في نظرها ع جنان عجبه نظيف وكله خضرة خطر عليه جنان حوشه ايام وجود اسيمه...
سمع صوت حركه عرفهم طالعين..
نزل عطي بالجنب وعيونه القدام..
وعفاف جايه مع ولدها وعيونها لوطا قالت:السلام عليكم..
هيثم:وعليكم السلام اختي عفاف ان شاء الله لاباس خيرك..
عفاف:شن بنقولك صغاري مرعوشين وخلاص حاجه عاديه راهو..
جهاد؛شن عاديه يام وانتي قعدتي توصي وتقولي سامحوني!
جبداته من كم سوريته وفنصت فيه..
هيثم؛باهي اني نبي نعرف شن صار معاك بالزبط..
عفاف نزلت عيونها وقالت؛مش عارفه نضت مخلوعه وحسيت زي اللي قلبي مغموم ومش قادره ناخد نفس وهو يدق بسرعه تقول في وذاني قاعد..
هيثم:امم..ماكنتي تحسي شي قبل؟
عفاف:لانحس مرات بضيق بنفس مرات مش ديمه ومرات هكي قلبي يدق بسرعه لكن فيسع يولي عادي..
هيثم:هو في الواقع مايدقش بسرعه هو يدق ببطئ ..باهي تحسي بوجع في عضلاتك وارهاق اغلب الوقت وشي من الخمول..
عفاف:ايه صح نحس بيهم بالذات المدة الاخيره...
هيثم هز راسه وقال؛تمام..انت ياجهاد ولاواحد من خوتك نبيكم ترفعوا الوالده دير التحاليل اللي بنقوله عليها توا...
Cbc..مخزون الحديد..فيتامين دال..وب12...والغدة الدرقيه...تو نكتبهم بعدين ونعطيهملك..
عفاف بقلق؛علاش هدا دكتور!؟
هيثم؛هادي تحاليل روتينيه مافي شي يخوف حتى اللي في بالي مايخوفش مع الدواء تمشي اموره غير نتأكد من التحاليل قبل..
تنهدت بقلق وبعدين قالت؛بارك الله فيك دكتور وسامحنا تعبناك..
هيثم؛تعب شني ربي يهديك حني عيله..
جهاد؛ربي يحفظك..
عفاف:السلام عليكم..ولفت ومشت خشت داخل..
بعد خشت جهاد قال؛مافي شي يخوف دكتور ولا؟
هز راسه وقال:مافي شي يخوف..وهي تحرك ورانا موضوع كبير..
تنهد جهاد وقال:يستر الله..هي تفضل دكتور..
هيثم؛هي..توكلنا على الله...
ومشوا الزوز طلعوا من الحوش...
🍁🍁🍁🍁
مقعمزة مع اختها اللي عازمتها لحوشها وتهدرو هي وياها في امر خطير..
مقبوله بصدمه؛شن تقولي انتي!؟
:راجلي قالي في ناس شافوه غادي بعيونهم في تونس يامقبوله..
مقبوله؛هدا يابيجلطني يابيجلط بوه وامه...
:قولي لعمران..
مقبوله:لا بنقوله خلاص معاش فيها...
🍁يحكوا ع واحد من خوتهم ماكانش ملتزم هداكا الالتزام اللي هما ماشيين بيه قدامهم يدير في روحه مستقيم وين يسافر كل المنكرات يدير فيها🍁
مقبوله؛هدا طبه الزواج..يتزوج ويحصن نفسه عن الحرام..
؛هو مايبيش..
مقبوله:مش بكيفه غصب عنه..ولا نخلوه يفضحنا..
:وباهي كان مشينا خطبناله شن بنقولوا عليه خونا تقي نقي ويخاف ربي نشهدوا زور..
مقبوله؛لا مش شهادة زور..هدا اسمه ستر...في مرة شيخ سمعته يحكي ع قصة واحد كان يشرب ولما تاب مشي بيخطب قاله نقول اني كنت نشرب قال لا مادام تبت استر ع نفسك...
:خل يتوب خوك قبل..
مقبوله برفعة حاجب؛لايتوب..غصب عنه يتوب...
تنهدت اختها وقالت؛عليك كشايف وخلاص..
مقبوله ضمت شواربها لداخل بعدين قالت:الله المستعان..
🍁🍁🍁🍁
مقعمزة ع سريرها في دارها..
ضامه رجليها وهي تردد..
"لاإله إلا انت سبحانك اني كنت من الظالمين"
هدا حال مريم من لما عرفت بجيه زوز رجاله لبوها وخوتها..
واحد منهم عرفوه من شهرته..هيثم الكاتب..
وهي طول عرفت ان اللي معاه جهاد...
امها في الكوجينه دير في القهوة وقلبها واكلها من الخوف..
وفي المربوعه..
بو مريم اربعه من ولاده من بينهم ياسر ومعاذ اللي ماحولش عيونه عن جهاد ونظراته ليه كانت تخوف..
وجهاد ماباش يركز عليه قعد بنظره مع هيثم وبو مريم وهما يهدرزوا..
كان الحديث بكلمات مقتضبه..
لعند ماجت سفرة القهوة..
ضيفوهم وبعدين خش هيثم في الموضوع..
هيثم؛حاج سعيد صل ع النبي..
كلهم قالوا بأصوات متقطعه؛اللهم صل وسلم وبارك عليه..
هيثم؛اني اليوم جايك ياحاج وقاصدك في طلب..ونبيك تسمعني للأخر..
شبحوا لجهاد..بعدين سعيد شبح لهيثم وقال؛ان شاء الله نقدر عليه..
هيثم:تقدر بإذن الله تقدر..اني ياحاج بإعتباري نسيب لعيله ****** وهما بارك الله فيهم داروني الكبير متاعهم ودخلوني في الموضوع..جايك وجايب معاي ولدهم نخطبوا منك كريمتك مريم..
ياسر:معليشي شويه..
شبحوله..
ياسر:علاش نسيبهم يجي يخطبله..وين بوه وين عمامه وين خواله؟
هيثم:موجودين..
بو مريم؛ وعلاش مش هما اللي جو معاه؟
هيثم تنهد وقال:حيجوا ان شاء الله بعد ماانتم توافقوا بس اني اليوم جاي واسطه خير زي مايقولوا..
ياسر:ع اي اساس حني مانعرفوكش معرفه شخصيه كل اللي نعرفوه عنك ان عندك ولد مدمن وعنده قضيه كبيرة بسببها نحوك من منصبك..
جهاد بدي يعصب..
وهيثم كذلك بس كان يحاول يهدي نفسه ومايخلي شي يستفزه قال؛اول شي المنصب اللي كنت فيه اني سيبته بإرادتي من قبل ماتطلع مشكلة ولدي للعلن بوقت...ومش ناكرها ولدي فعلا كان مدمن مخدرات..بس قبل الأدمان لو كتبت اسم زياد الكاتب في الغوغل حتشوف انجازات دارها وهو تحت 18 عام مادارش ربعها من عمره تعدى 40..بعد وفاة امه خش في حالة اكتئاب وصلاته للأدمان..وربي يطول في عمر الوالده وماتجرب اللي حني عشناه...
هما تأثروا وياسر من داخله انحرج باس دار روحه عادي..
وهيثم متابع يقول:والحمد لله اللي صار الفترة الاخيره بين براءة ولدي اللي كلي فخر بيه حتى وهو مدمن قعدت فيه النخوه والغيريه ودار اللي ماقدروش يديروه صحاح بعقولهم....
هما يسمعوله بصمت..
وجهاد يشبح لتعابير وجوههم..
هيثم؛ع العموم اني من جاي نحكي عن نفسي..اني جاي نتكلم عن الشاب هدا اللي اني نعرفه شخصيا ونعرف عيلته ولما كانوش ناس كويسه ومعدنهم ذهب ماكنتش عطيتهم اختي..نقولك حاجه..اني كنت زيك مزديرهم مترفع عنهم شايفهم ناس ماتنفعش مايشرفوش اللي يعرفهم..لين دارت بيا الدنيا وربي عطاني درس أدبني..وخلاني لما طحت مالقيت حد معاي يمدلي يده بش ينهضني كان هما..رغم انهم ماروش مني خير بكل..
جهاد عقد حواجبه وعيونه تعبوا دموع..
هيثم عقد حواجبه وقال؛انتم شن سمعتوا عنهم..ان بوهم تاجر مخدرات..باهي اللي قاللكم هكي ماقاللكمش ان سلم نفسه وتاب وفي السجن غادي يشهدوله بحسن سلوكه والتزامه..
قالولكم ان الولاد ماينفعوش وممكن اتهموهم بهلبه اتهامات اغلبها زور...لكن ماقالوش ان ولدهم الكبير اللي هو نسيبي التزم وولى صديق لامام مسجد ***** الشيخ******
بومريم؛الشيخ ***** نعرفه عز المعرفه..
هيثم:كويس برا اسأله عن خليل خالد***** وشوف شن يقولك..خوه تاني راجل متزوج قريبته كان ماينفعش مايعطوشي بنتهم وهما عيلته وادرى بيه..
اما جهاد..وحط يده ع كتفه...وهادي شهاده نتحاسب عليه يوم غدوة لو طلب مني بنتي نعطيه لأنه مواقفه اثبتلي انه راجل بكل معنى الكلمه ومش حنلقى راجل يحافظ ع بنتك زيه ياحاج..
معاذ:بتتحاسب ع شهاده دنيا واخره راهو عندك بنت حتى انت..
هيثم:ان شاء الله يجيها واحد زي جهاد..شوفوا مافي حد يعرف شن يصير معاه ولاشن مدسوسله في القدر متاعه..ياما منهم بداية حياتهم كانوا صالحين وفي اخرها فسدوا..وياما منهم في اولها ضالين بعدين ربي هداهم..مافي حد يزكي نفسه ويأمن عليها...جهاد ياحاج يبي البنت بنية صافيه وجاها من الباب وبالأصول..نتمنى انك ماتوقفش في وجوههم..وتخلي الرأي الأخير لصاحبة الشأن...
بو مريم شبح لجهاد وقال؛ماسمعناش صوتك..
جهاد بلع ريقه وقال؛ماعنديش كلام نقوله زياده ع اللي قاله..غير حاجه وحده..لو ردتيني مرة حنجيك مية مرة بعدها لين ترضى...
معاذ قعد يهز في رجله بعصبيه...
وبوه هز راسه وقال:يصير خير...يصير خير..
هيثم؛إن شاء الله...
🥀"يارب استرني يارب يارب اغفرلي يارب تجاوز عني..يارب استرني يارب"
فجأة سمعت صوت بوها يقول..
"تعال هني ياولد"..
شبحت لباب دارها بخوف..
انفتح خشت امها تجري ووقفت قدامها وعطتها بالظهر..
ع خشة معاذ وهو في قمة الغضب وخوته يشدوا فيه..
معاذ؛شن في بينك وبينه ياكلبه تكلمي..
بوه؛معاذ..
معاذ:مش طالع..مش مخليها لين تقول الحق الحيوانه..
ياسر بحده؛تكلمي..
واحد تاني من خوتهم؛شن تقول انت وياه..راهو هادي مريم اختنا حني اللي ربيناها..
معاذ:اني معاش عندي ثقة في حد..
امها بخوف؛تو مش الراجل جي من الباب خلاص..
معاد خبط راسه وقال:شن خلاص هادي شن خلاص..كان مقرنتنا هادي..حني قريب نقيموها عن الوطا وهي تقرن فينا الحقيره...
بوه:عليا اليمين تزيد كلمة اخرى امك طالق..
كلهم انصدموا..
ومريم ورا امها ترعش ودموعها ينزلوا .
بوها شبحلها وقال؛انتي راضيه..
مريم قعدت تشبح للدموع اللي في عيون بوها وتمنت لو ماتت ولا شافتهم...بس يقعد شي اهون من شي..
تصنعت القوة وقالت؛ايه راضيه..
خوتها قعدوا يشبحولها بخذلان وغضب..
ياسر:مالا اني من اليوم لاعادت اختي ولانعرفها..
امه؛ياسر..
ياسر؛هذا اللي عندي...ومش خاشلها في شي بكل..
ومشي طلع من حداهم...
معاذ قعد يشبحلها شويه بعدين قال؛اني مش داير زيه تمام..دام انتي راضيه باهي..لكن ورب العزة يامريم يضرك نقتله..نقتله...وراهو مش مسامحك ع اللي درتيه فينا عمري كله..
وحتى هو مشي طلع وخوتها الزوز التانيين اكتفوا بنظرات قاسيه قاعده تذبح فيها..وبعدين لحقوا خوتهم..
مريم شبحت لبوها وقالت؛با...
قاطعها وقال؛اصص..مانبيش نسمع صوتك..
مريم ببكي؛بابا هو جاني من الباب يابابا..
بوها بصوت عالي:ضمي فمك قلت..اقطعي حسك معاش نبي نسمعه بكل..خلاص مش تبيه خلاص لكن لازم تعرفي اني مش راضي وعطيتك مجبور كسرتيلي عيني ماعندي ماندير...الله يسامحك يابنتي...ومشي طلع وهو يردد الله يسامحك..
مريم قعدت تفكر وهي في حالة الصدمه في ردود افعالهم وتخيلت لو عرفوا بالكارثه اللي دارتها شن يصير فيهم..
حالة الخوف والصدمه اللي كانت فيهم انهكوها تماما...
ومعاش قدرت تقاوم...وطول فقدت الوعي..
امها صرخت بأعلى صوتها:مريم...
وهما كلهم ولوا يجروا...ولما شافوا حالتها..نسوا كل شي..
وطلعوا بيها يجروا زي المجانين للمستشفى..
وعرفوا غادي ان عندها هبوط ...داروله اللازم...وطلعت في الليل من المستشفى...
🍁🍁🍁🍁
تاني يوم ...
الساعه السادسه والنصف عصرا...
مقعمزة ع الصالون وطارحه قدامها شيتاتها تقرا لأمتحاناتها النهائية...
شويه سمعت باب الحوش انفتح..
غمضت عيونها وقالت بهمس؛يارب صبرتي على مابليتني...
"رتاج"
فتحت عيونها وقالت؛هني هني..
شويه وبانت عليها همانه خشتلها وهي تقول؛ابله رتاج..
وجتها ضمتها وهي تقول:ليك وحشة بصغارها..وغرست ضوافرها في ظهرها..
فنصت رتاج..
وعادل ضحك وهو يقول؛غير من وين تجيبي فيه الكلام هدا بس..
وخرت عن رتاج واشرت ع قلبها وهي تقول؛من هني يابابا..
عادل:حبيبتي..قدملها وضمها وقال..حتى ابله رتاج تحبك وفرحانه بجيتك..
رتاج رفعت حواجبها وقالت؛ايه هلبه هلبه..
شبحتلها همانه وهي مبتسمه بحقد ورافعه حاجبها وقالت؛نجك نجك ع قولة الشراقه..
وبوها يضحك وهو يقول؛عمرك شفتي بنية عسل زيها مافيش بكل..
رتاج هزت راسها وقالت؛ربي يحفظهالك"ويفكني من شرها"
همانه"والله لما نكرهك في جلدك في اخر ايامك مع بابا نخليك تشعفي ومعاش تاخدي راجل من مرته وصغاره"
🍁🍁🍁🍁
"تفضلي نوال"
نوال؛وينهم..
ثريا؛في حديقه المركز عندهم محاضرة اليوم بيعطيها المدير..هي مش محاضرة محاضرة..تقدري تقولي هدرزة مفيده..
نوال؛قداش مازال وتم؟
ثريا:نص ساعه...من هني..تفضلي..
ونوال مشت طلعت ووراها ثريا..
ثريا؛هونا غادي...
نوال ركزت بالنظر وين مااشرتلها ثريا..
شافت هيثم مقعمز مربع رجليه ع ارضيه خضرا...
والنزلاء مقعمزين قدامه بطريقه عشوائيه...
شافته فاتح...
كان متغير هلبه...احسن بهلبه...مولي احلى من قبل..
وضحكته...خلت يدق بقوة..تبي تمشيله ضمه وماتخليشي بكل لين تموت...
مسحت دموعها وغيرت عيونها لهيثم لقاته يتكلم بحركات اليد...ويبان فاتح يكلم فيه..واللي حواليهم يضحكوا...
ثريا؛هيثم الكاتب شخصية جميله جدا عن قرب...تشوفيه اول مرة تقولي عنه متكبر ومترفع...بس مع الوقت تكتشفي انه مثال للتواضع..ومحترم لأبعد حد...يعني لو تلاقيتي انتي وياه ردي بالك تسلمي باليد مش حيصافحك وردي بالك تقولي بنحرجه..يحرجك ولايخليك تحرجيه..ولما يتكلم معاك قليل النادر يشبح لوجهك...احيانا يكون سريع الغضب وانفعالي ردود افعاله وقتها مؤذيه وتخوف..
نوال تسمع فيها وهي مركزة معاه...بعدين شبحت لثريا وقالت؛تعاملت مع اللي اكبر منه مش حنعرف نتعامل معاه هو!؟ شبحتله وقالت..اني جايه لولدي مش جاياته هو..
ثريا:مش حنقدري تشوفيه لو هو منعك..
شبحتلها:من هو اللي بيمنعني نشوف ولدي؟
ثريا؛ولدك نفسه...
تنهدت نوال ورجعت شاف لفاتح..
لقتهم كلهم ناضوا وهو معاهم ..
شويه هما مشوا....وهو قعد واقف يكلم في واحد من الموظفين..
ثريا؛هي تعالي..
مشوا هما الزوز بإتجاهه...
لين وصلوا فيه..
:يعني نسكره من غادي..
هيثم؛ايه وسكره وافتحه ساعتين في اليوم بس..
:حاضر..ومشي...
ثريا؛دكتور..
التفت هيثم شاف ثريا ومعاها وحده اول مرة يشوفها..
عقد حواجبها وقال؛تفضلي...
ثريا بإبتسامه؛اسفه الموضوع جي فجأة هكي لأنه مستعجل...اشرت ع نوال وقالت... استاذه نوال...نوال فتحي
نوال ابتسمت بكبر ومدت يدها وهي تقول؛
نائبة رئيس حزب الوطن..استاذة في العلوم السياسيه..وقريبا عضوة في البرلمان...
ثريا قعدت تشبح لهيثم بتوتر وقالت:والدة فاتح...
وهو شبح ليدها بعدين رفع حواجبه وشبحلها وقال...
"اها والدة فاتح بهادي بس نعرفك"

#استغفروا
#مقسوم
#البطل_المغمور2

...يتبع...