البطل المغمور "زهور القمر"

الجزء الحادي عشر2

#البطل_المغمور2 "زهور القمر"
#جمان_فريد
#الجزء_الحادي_عشر "علاش ياخليل2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
"قداش بنقعدوا غادي؟!"
جهاد:يومين بس..سامحيني مفروض نسفرك وتدهوري وتهيجي لكن امكانيات حاليا مافيش يدوب نمشوا للحوازة نقعدوا فيها يومين وتالت يوم لازم نبدا خدمه..
مريم بضحكه:شن تقول ياعبيط انت..سفر شني هدا اللي تحكي عليه ولاخاطرلي اصلا..وبعدين في الحوازة حني نديروا جونا ونخلوا هاليومين احلى من شهر عسل في المالديف..
جهاد بإبتسامه؛يعني مافيهاش ليك احراج قدام عيلتك..
مريم قربت منه وهي تحركت فيدها اتجاهها واتجاهه:بيني وبينك مش مدروتهم طز فيهم..
جهاد ضحك بصدمه..
مريم بعدت وقالت؛طبعا مانقصدش بوي وامي وخوتي هاه!
جهاد بضحكه:اها فهمتك توا باقي العيله..اني نقصد بوك وامك وخوتك..تنهد وقال..من غير مستخسرينك فيا..
مريم ابتسمت بألم وقالت في نفسها "ماهم مايعرفوش": مادورش ماليا همهم كله نكون مرتاحه وبس ولما يلقوني مرتاحه معاك يتغير كل شي..
جهاد هز راسه بعدين قال؛تمام تصبحي ع خير..
مريم بإبتسامه:وانت من اهله..
مشي طلع من حداها..
وهي تنهدت وبدت توتي في شنطة فيها حوايجه وحوايجها...
🍁🍁🍁🍁
"برا شوف المعامله والاحترام ولادلال خوتك لنساوينهم ماريتش ربعه واني عروسه"
رفيق قعمز ع السرير وقال بإزدراء:شكلك ناسية كيف خديتك؟
هي قعدت تشبحله بكره ودموعها بدوا ينزلوا..
رفيق:معاش تنسي مرة تانيه..وتمدد ع السرير وعطاها بالظهر
هي بهمس:ان شاء الله ترقد معاش تنوض..
و مشت رقدت ع الفراش اللي دايرته حدا المكيف...
🍁🍁🍁🍁
وعدت هالليله..
وطلع فجر اليوم التاني..
هيثم كالعاده كان في الجامع يصلي..وبعد كمل الصلاة قعد في المسجد يذكر الله وعيونه ع الشيخ يراجي فيه يفضى بش يمشيله يكلمه..
بعد مافضي ناض ومشاله..
قعمز قدامه وقال:السلام عليكم..
الشيخ بإبتسامه؛وعليكم السلام ورحمة الله وبركاته..كيف الحال..
هيثم:الحمد لله..كيف حالك انت ياشيخ..
الشيخ:الحمد لله...
هيثم:شيخ عندي بنتي تبي تحفظ القرآن بالأحكام والتجويد وتبي يعني خلوة حفظ القرآن يكون فيها قولا وفعلا..
ابتسم الشيخ وقال:قولا وفعلا عجبني كلامك هدا...هز راسه وقال...ايه عندي بنتي مسؤوله عن خلوة لتحفيظ كتاب الله في المسجد هذا وهي زي ماقلت...تعلم في القرآن قولا وفعلا...
هيثم بإبتسامه؛ممتاز..وامتى الوقت بالضبط؟
الشيخ:من بعد العصر للمغرب..
هيثم هز راسه وقال؛كويس..نجيبها بعد العصر بإذن الله..
الشيخ:واني تو نعطي بنتي علم..
هيثم مد يده والشيخ صافحه وقال:جزاك الله خير ياشيخ..
الشيخ شد ع يده وقال:نبيك في موضوع..
هيثم شبحله شويه بعدين هز راسه بشي من البطئ وقال:نسمع فيك...
🍁🍁🍁🍁
الساعه التاسعه صباحا..
تسقد فيهم في الباب وهي تقول..
عفاف:كلموني لما توصلوا..
الزوز بأصوات متقطعه:ان شاء الله..
قعدت واقفه وهي حاطه ايديها في نصها وتشبحلهم بإبتسامه..فرحانه لفرحتهم..
وفرحانه انهم استقروا وكل واحد فيهم حط عقله في راسه...
لما طلعوا من الحوش بسياراتهم دعتلهم...
"في وديعه ربي"
ع طلعة رفيق وقال؛ناس تعسل وناس ليها الهم والشقى..
قعدت تشبحله وهو يلبس في رجليه بش يمشي الورشه وقالت:والله كل واحد يعيش نتيجه افعاله..
ولفت وخشت..
وهو قعد معاها بعيونه لين ادرقت..
تنهد بضيق بعدين مشي وطلع من الحوش..
وفي الجنان من الجهة التانيه اخته تهاني تتكلم بالتليفون..
تهاني؛تمام نقول لأمي ونرد عليك..
"خلاص..خل نكلم دانيه حتى هي"
تهاني:باهي سلام..
"وعليك السلام"..
سكرت تهاني ومشت خشت للكوجينه..
🍁اما عند دانيه اللي كانت ضم في دارهم ...
رن تليفونها..
مشتله تجري بلهفه ع امل يكون المتصل رقم غريب صاحبه قريب...
بس خاب هالامل لما لقاته رقم صاحبتها..
فتحت الخط وردت..
دانيه:اهلا سارة صباح الخيرات..
وخوها فات من قدام دارهم فهاللحظه ابتسم لما سمع اخته شن قالت..
وكمل طريقه للحمام وخش..
ع بعد مسافه بسيطه من الحمام..
دار بوه...
اللي كانت تحكيله ع مرته ع خوها..
مقبوله:نحاولوا نقنعوه بيها المشكله هو تعشم في بنتك الله المستعان..
مجيد:نصيبه مش فيها يامقبوله ونصيب حد ماياخده حد..
مقبوله تنهدت وقالت؛فعلا..المهم اني حتى اليوم بنمشي غادي بنمشي معاه يشوف البنت..
مجيد:حتى اليوم تبيني نقعد بروحي!..
مقبوله؛مضطرة يامجيد والله مضطره مايقدروا يديروا شي من غيري..
هو هز راسه بقلة حيلة وقال:مش مشكله تو نتحمل والله المستعان تو نقول لمجاهد يفضي روحه..
مقبوله:لالالا كلمت خوي وقال جاي..
مجيد؛اني قلت يرفعك مجاهد..
مقبوله ؛ياودي فكني من تنفيخ وقلب الوجوه والله ماعرفت امس كيف مشيت وكيف روحت مانحبش نكون موجوده في مكان غير مرغوب في وجودي فيه..
مجيد:لالا حولي من راسك الكلام الفاضي هدا انتي ومسؤوله مني حتى كاني عاجز مايرفعوكش خوتك ويجيبوك يا مقبوله ومجاهد في حكم ولدك حتى هو ملزوم بيك..
تنهدت وقالت:اييه...ع راحتك...
🍁🍁🍁🍁
"الجو مش عادي هني"
جهاد؛لكن بعد العشرة ماتقدريش تقعدي برا..
مريم:ايه صح الجو الايام هادي سخون زياده..
هما كانوا يتمشوا..
جهاد وقفها وقال:نقولك..
مريم؛شني!؟
جهاد؛شن رايك نكملوا عقاب اليوم في البحر..
مريم رفعت حاجبها وقالت؛ياريت..
جهاد خداها من يدها ومشي بيها طول للسيارة..
مريم بضحكه؛بالشويه ياهمي...
🍁🍁🍁🍁
"مروح؟!"
"ايه مروح ونهائيا"
رضوان؛كيف نهائيا وقرايتك؟
"حولتها من راسي بعد ماانعرض عليا المشروع اللي قتلك عليه'
رضوان بتعجب؛ع حسب مانعرف كنت رافضه...!
"غيرت رايي قلت بدال مانضيع السنين في القرايه خل نخدم فيهم ونلم مبلغ باهي ونشري بيه حوش..خير مانراجي اربعه سنين ع مانكمل ونروح وين تروح نبي 4سنين تانيات خدمه و4سنين تانيات نبني فيهم...وبرا..."
رضوان مااقتنعش بكلام ضرار بس معاها ماباش يناقشه ماتعودش يدخل في حياة خوته وقرارته:والله ع راحته اللي تشوفه يصلح بيك ديره...بس سؤال..
"أسأل"
رضوان؛كيف يصير في مرتك..
"شن كيف بيصير فيها..بنتزوج وبنقعد في دار اني وياها مع العيله هو اصلا الحوش من فيه خوتك اللي هدا في حوشه وانت بعد وين وين تمشي عادي وماطولش.."
رضوان:وهي راضيه!؟ تخاف بعدين تبدا فيها المشاكل..
"لالا راضيه راضيه متفاهمين"
سكت رضوان شويه بعدين قال:ضرار...عيني في عينك مافيش سبب تاني!؟
ضحك وقال
"والله مافي حاجه غير اللي قتلك عليه بطله جو الوسوسه اللي عايش فيه هدا"
تنهد رضوان وقال:ياسيدي باهي اجعل خيرتك فيها...
"تسلم"
🍁🍁🍁🍁
في مديرية الأمن..
خاش ومعاه المساعد متاعه يبلغ فيه بأخر التطورات..
:كله ماشي زي مانبوا سيدي..وخليل مشي لغنيمه الصبح.
راجح:عندي علم...اي جديد يصير خبرني بيه فورا مهما كان تافه..
:حاضر سيدي...ادى التحية ومشي..
وراجح كمل طريقه لمكتبه واللي يقابله من ضباط او عناصر يسلم عليك..
وصل في مكتبه فتح الباب وخش وسكره وراه..
ومشي قعمز...
حط تليفونه ع الطاوله وقعد يشوفله شويه بعدين تأفف بإنزعاج وقال:تو مش عيب عليك راجل..عنده رتبه في الشرطه..يتردد ويخاف..ايه خايف تكلم بنيه مازال مافاتتش 18عام لا وخطيبتك فوقها....!
غمض عيونه خدي نفس وزفر..بعدين فتحهم وقام التليفون حط ع رقمها..وبدي يعد...
واحد تنين تلاته اربعه خمسه...وضغط ع الاتصال طول..
مسح انفه بصوابعه ورشف بعدين حط التليفون ع وذنه...
ويسمع في الخط ينادي..وقلبه يزيد يدق بقوة..
نادى لين فصل وماردتش..
ابتسم..وعاود تاني...وكذلك نادى لين فصل وماردتش..
ضحك..بعدين بدي يكتب في رساله..بعتها...
راجى شويه...بعدين اتصل طول..
نادى ثلاثه مرات...بعدين انفتح الخط..
هو توسعوا عيونه ارتباكا وقال:ايوه..السلام عليكم..
جاه صوتها واطي يبان خجول..
"وعليكم السلام"..
هو غمض عيونه ومسح وحده فيهم وابتسامته ع وجهه بعدين فتحهم وقال؛دانيه شجو..
🌸ودانيه ترعش مع بعضها وقلبها قريب يطلع من مكانه ردت بعد تنحنحت:الحمد لله...وقعدت ساكته..
هو ضحك وقال:حتى اني مليح وتمام والحمد لله..
ضحكت بدون صوت..
هو تنهد وقال:شوفي دانيه اني طلبت رقمك بش نوضحلك بعض الأمور..
"ايه قالي مجاهد"
هو ابتسم وقال؛تمام...اني توا مشغول بعد العشيه ان شاء الله نكون فاضي ونهدرزوا يناسبك الوقت؟
"العشيه..تمام فاضيه"
راجح:اتفقنا..نهدرزوا بعدين..
"تمام...السلام عليكم"
وسكرت عليه..
هو ضحك وقال:باهي راجيتي رديتها بعد سكرتي...
••••••
دانيه:تحشمت ياهمي افهمي والله هو يكلم فيا واني بندوخ..
رتاج بضحكه:هبله..
دانيه بإبتسامه:صوته فيه هيبه..
رتاج:طبعا ياماما حتى هو ضابط امن..
ابتسمت دانيه بتنهيده..
رتاج بضحكه؛هي بري اطلع وسكري عليا الضي والدار..
دانيه:ماتشبعيش من النوم!؟
رتاج تمددت ع الفراش وهي تقول:والله مامني غصب عني طول الوقت حاسه روحي خامله ونبي نرقد وبس..
ابتسمت دانيه وقالت:باهي هاني طالعه..
ومشت طفت الضي وطلعت..
مشت باتجاه الكوجينه وين قربت منها سمعت اكثر صوت تكره تسمعه...
مقبوله:ديروا بالكم عليه ياسدينه مش معقوله هكي مهما كان يقعد زوجك وبناتك هدا بوهم..
سدينه:ماناش مقصرين معاه يامقبوله لكن هو يبيك انتي..
مقبوله:لأنه مش شايف منكم معامله كويسه..
خشت دانيه وهي تقول؛امي عمرها كله تخدم في بوي خير من اي مراة خداها هدا علاش مخليها ع ذمته وماجابش من غيرها عكس اللي تنزل ع الخانه التانيه ماتسكرش معاه سنه وطلق طول..
سدينه عجبها رد بنتها بس خافت من ردة فعل مقبوله..
مقبوله ابتسمت وقالت:مولي لسانك يادانيه طلقت عليك اختك..
دانيه قعدت تشبحلها برفعة حاجب ومابتش ترد..
مقبوله:ع كل حال..هدا بوكم لو تغسلوا ارواحكم بمية البحر ماتطلعوا منه..وطاعته والقيام بخدمته فرض مش واجب ولامنيه منكم..يعني الحكايه فيها ثواب وعقاب بعدين..
دانيه هزت راسها وقالت؛هدا علاش حني قاعدين متحملين وصابرين ع كل اللي يديرلنا ويجيبلنا فيه من مصايب..
سدينه:دانيه!
سكتت وقعدت تشبح لمقبوله من فوق لتحت..
مقبوله ابتسمت تهكما وشبحت لسدينه وقالت؛ربي بناتك ياسدينه ربي..
ومشت طلعت من الكوجينه ودانيه تشبحلها من فوق لتحت وقالت؛اللي يسمع يقول امها ربت..
سدينه جتها وقالت؛خير بلاك انتي خير بلاك تشري في المشاكل شري علاش..
دانيه بلامبالاة:خل اللي بيصير يصير اخر همي..
ومشت طلعت من حداها..
سدينه تنهدت وقالت بقلة صبر وتوسل؛ياربي صبرني..ياربي ساعدني..
🍁🍁🍁🍁
الساعه الواحده ظهرا...
في مركز علاج الإدمان..
كان اليوم الأخير للحمله اللي اشرفت عليها وكانت ناجحه جدا وهيثم راضي عنها لأنها دارت نتايج سريعه وواضعه ع النزلاء..
بعد ماتم حفل الختام هو توجه للجامع اللي جنب المركز صلى الظهر..
ونوال تستنى فيه قدام مكتبه..
كانت تمشي وتجي ومش طايقه صبر..تكره الانتظار..
شويه وبان عليها جاي من اول الممر..
هو وقفت وغيرت عيونها عنه..
لعند ماوصل في مكتبه فتحه وقال:تفضلي..وكالعاده خش قبلها وهي حاولت تسيطر ع اعصابها وخشت بعده..
قعد واقف ورا مكتبه يشوف في ملف قدامه وبدي يوقع في اوارقيه ع الواقف وقال؛تفضلي..
نوال؛مش جايه نقعمز..
هيثم؛واني قتلك تفضلي قولي اللي عندك..
هي تمالكت اعصابها وقالت:الحمله...كانت متابعه ع نطاق واسع يعني برا البلاد بما ان حضروها اختصاصين من البلدان العربيه وطبعا دارت اعلان عن المركز وحده من القنوات العربيه المشهور تبي دير معاك لقاء..
هو قعد ساكت ماعلقش..
كمل توقيع وخدي ختم من الدرج وبدي يختم..
نوال رفعت حاجبها وقالت:سمعتني!؟
هز راسه بإيجاب..
نوال؛باهي علاش ماعلقتش..هادي فرصو كبيره جاتك لعندك سببها الحمله اللي درناها هني ماعندك شي تقوله..
دس الختم في الدرج وسكره كويس وخدي الملف وشبحلها وقال؛شن تبيني نقول نشكرك مثلا..
وخدي تليفونه..
ومشي للباب وقال:تفضلي..
هي شبحتله من فوق لتحت وقالت:اقل شي..
ومشت طلعت..
هو طلع وراها وسكر الباب بالمفتاح وحط في جيبه وقال؛بسيطه..شكرا..
ومشي..
وهي تشوفله بصدمه..
بعدين لحقاته بسرعه وقالت بغضب؛قلة احترام ياسيد هادي معامله بتليقش بدكتور بكل..
هو تنهد ووقف وشبحلها:انتي جيتي تطلبي في الشكر واني شكرتك وينها قلة الإحترام..!؟ وبالنسبه للقناة ولا اللقاء رقمي ورقم المصحه معروف...واخيرا..لوسمحتي اني مانبيش يكون بيني وبينك اي نوع من التعامل وماتسألنيش عن السبب..ومشي وخلاها..
بس وقف لما قالت..
"خايف مني"..
هو عقد حواجبه وابتسم بإستغراب والتفتلها وقال:نعم!؟
هي قدمتلها وقالت بإبتسامة كبر:خايف مني..يعني من تاثيري عليك..هدا علاش عيونك يهربوا مني لما نوقف عليك ونكلمك وطلعت مركز في تفاصيلي وحتى الغيره بانت عليك
هيثم شد ضحكته وقال؛استاذه في الجامعه ومرشحه في الإنتخابات البرلمانيه وام ل4شباب..وتفكيرك طفولي..ابتسم تهكما وقال...اخر مرة نشوفك جايه لمكتبي وتعاملك مرة تانيه حيكون مع استاذ خليفه... تجيبي لروحك الإحراج اللي حنتسببلك فيه لو تمسكتي بعنادك...انقلبت ملامح وجهه للحده..ومشي وخلاها
بعد ماحسسها انها اتفه من اتفه مخلوق ع وجه الأرض..
خلاها تكره روحها وتكره كل شي حواليها وتزيد تحس بالنفور من كل شي..
كلامه لانه كان حق..كان موجع لابعد حد..كان زي السكين اللي ينغرس مكان الجرح..
استغصرت نفسها هلبه هلبه......
مشت بسرعه طلعت من المصحه وهي شاده دموعها بش ماتنهارش...
🍁🍁🍁🍁
ع الغدي..
تهاني:يام شوفي الصور اللي بعتوهم جهاد وخليل..ومدت لأمها التليفون...
خداته عفاف وهي تاكل ومبتسمه..
وبدت تشوف فيهم..
تهاني:مشي يسار..
عفاف بضحكه:الله يبارك الله يبارك..ماشاء الله ماشاء الله..مريم وجهاد مش مفروض في الحوازة!؟.
تهاني:شكلهم مشوا للبحر..
عفاف:تبيلنا حتى حني مشيه للبحر بعد يروحوا..
صالحه:ان شاء الله..
وسجى تاكل وهي ساكته ومن داخل تسحن سحن..
عفاف مدت التليفون لصالحه وقالت؛تفرجي..
خداته صالحه وقعدت تتفرج؛الله يبارك..
وسجى تشبحلها وهي بتموت من الغيظ..
فجأة حست بوجع..عقدت حواجبها وضيقت عيونها من الألم...
مررت عيونها بين صالحه وعفاف وهما يتكلموا..بعدين شبحت لتهاني هي تمد في الخبزة لعرفه بش ياكل..
زاد الوجع قالت بهمس:آيي..
شبحتلها تهاني..
حطت يدها.ع بطنها وبدت انفاسها تتسارع..
تهاني:شني سجى!؟
ركزوا عليها صالحه وعفاف..
سجى بدت تاخد في النفس وتزفر..
عفاف:سجى!..
وهني عيطت سجى بأعلى صوتها...
عفاف بتوتر:كلمي رفيق كلميه..
تهاني ناضت وهي تقول؛باهي..واتصلت بخوها...ومشت تجري للجناح متاعهم بتجيب لسجى حاجه تلبسها..
وسجى مازال تعيط من قوة الألم وتقول:بنموت..
وصالحه وعفاف يحاولوا يهدوها..
🍁في حوش جيرانهم..
سارة بإبتسامه؛واضح ع عمتو الفرحه والراحه..
ماجده؛ايه ماشاء الله باينه فيهت العرسه..
سارة بضحكه:شوفيها هني كيف تضحك..
ماجده بضحكه؛شكلهم كانوا يبخوا ع بعض في الميه جو التسعينات..
ضحكت سارة...
ريحان؛ترا حني نشوفوا..
ماجده؛خودوا ياقطوسات..
خدوا الزوز تليفون ماجده وقعدوا يتفرجوا..
شويه ورن تليفون سارة..
ردت طول؛ايوه تاهو؟
"سارة اليوم مانقدرش نمشي"
سارة بإستغراب:علاش!؟
"مرت خوي بتجيب وامي مشت معاها المستشفى لازم نقعد في الحوش"
سارة:اها..ان شاء الله تنوض بالسلامه..
"الله يسلمك غدوة نمشي ان شاء الله..سلام"
سارة؛ان شاء الله حبيبتي...وعليك السلام..
سكرت سارة وقالت:مرت خوها بتجيب..
ماجده رفعت حواجبها وقالت؛اها...
🍁وقعدت سجى نص ساعه وهي تعاني في المستشفى لعند ماولدت..وجابت ولد...
عفاف ماقدرتش تفرح بيه هلبه لانه ثمرة الحرام اللي طاحوا فيه ولدها وبنت اختها..اما رفيق فكان فرحان بيه هلبه لما شافه حس اتجاهه بشعور ابوة جارف..
عكس امه اللي كانت حاسه تجاهه بالنفور لأنه يذكر فيها بغلطها في حق نفسها...
ومافيش من يستحق الشفقه غير هالطفل البريئ اللي جي نتيجه ذنوب الكبار..
🍁🍁🍁🍁
بعد العصر..
طلعت مقبوله من دارها بعد وتت روحها فاتت من قدام دار البنات اللي كانت مردوده..
شافت دانيه تتكلم بالتليفون وهي مبتسمه..
رفعت حاجبها وكملت طريقها لباب الشقه..
🍁دانيه بضحكه؛والله اسفه مش عارفه كيف راح من بالي..
"مش مشكله حتى غدوة ان شاء الله.."
دانيه بإبتسامه؛إن شاء الله..
"تمام..في أمان الله"
دانيه؛مع السلامه..وسكرت..
ومشت تجري وطلعت من الدار..
ورتاج راقده...
🍁🍁🍁
في الطريق..
كانت دانيه سرحانه وتفكر في راجح..
ومقبوله تفكر فيها...
ومجاهد يفكر في وضعه اللي ولى لايطاق روح من الخدمه اللي قعد فيها 8ساعات وحصل في مشوار تاني لمرت بوه.. هو مش مجبر يرضي الكل ع حساب نفسه..
بل مجبر مايبيش يغضب بوه بش ربي مايغضبش قعد يتحمل في نفسه وخلاص..
درس بدانيه حدا الجامع وقال:هوهدا؟
مقبوله قعدت تشبح للجامع..
دانيه؛ايه..
فالوقن نفسه درست سيارة هيثم..
ونزلت منها سارة..
دانيه ابتسمت لما شافتها ونزلت طول..
ومجاهد يشبح لسارة كيف طالعه بالعبايه الشرعيه والشاربه الكبيرة..ابتسم..
وين جي هيثم فايت مجاهد كلكسله..
هيثم وقف السيارة ونزل المرش وقال:اووو مجاهد السلام عليكم..
مجاهد بإبتسامه:وعليكم السلام كيف حالك دكتور..
سارة ودانيه مشوا طول خشوا للجامع وعيون مقبوله معاهم..
هيثم؛كيف حال الوالد..
مجاهد:الحمد لله ع كل خير..
هيثم؛الحمد لله..
مجاهد؛امورك تمام..
هيثم؛الحمد لله..تعالى طل علينا مرة مرة قاعدين صحاب حني..
ضحك مجاهد وقال؛ان شاء الله..
هيثم:تمام..السلام عليكم..
مجاهد؛وعليكم السلام..
تحرك هيثم طول ومجاهد بعده..
مقبوله:غريب..
مجاهد عقد حواجبه وقال:غريب شني!؟
مقبوله؛دانيه..يعني يبان عليها ملتزمه بس في بعض تصرفاتها يبان العكس..
مجاهد بدي يعصب؛ياريت تتكلم بوضوح..
مقبوله؛انت تعرف ان اختك تكلم في خطيبها..
مجاهد ابتسم تهكما ؛اني اللي عطيته رقمها..سألت وعرف ان فق فتوى للعلماء تحل للخاطب يكلم خطيبته بش يتفاهموا ع بعض الأمور بشرط يكون الكلام في حدود وبعلم ولي الأمر..واني عارف تربية اختي كويس..
مقبوله؛اها مزبوط لو بعلم ولي الامر اللي هو بوها
مجاهد قاعد يوسع في باله؛واني ماندير شي بدون علمه اساسا..
مقبوله:كويس..جزاك الله خيرا..بس..يعني خاطبها الضابط هدا من دله عليها؟
مجاهد؛لشن تبي توصلي بالزبط..
ودرس قدام حوش اهلها...
مقبوله؛شي..غير اني تعلمت اني نشوغ المنكر وننهي عنه ولو بلساني..
مجاهد بعصبيه؛شن تقولي انتي منكر شني!؟
مقبوله:مرة شفته يلحق في اختك وهي مروحه المدرسه هو يكلم فيها وهي ترد عليه..
انصدم مجاهد..
مقبوله؛قتلك بش ماتكونش غافل بس..
وفتحت باب السيارة ونزلت..
وخلاته يشبح في الفراغ وهو مصدوم مش قادر يصدق اللي سمعه...
يدوبه فاق من صدمته وتحرك بسيارته من قدام حوش اهل مقبوله...
🌸في الجامع..
تحديدا حلقة التحفيظ للنساء..
كانت المرتب ومنظم وريحته حلوة بالمرة..
والطالبات كل وحده وجزء من القرآن فيدها وتراجع وجنب كل وحد في دوسي يختلف لونه من وحده للتانيه..
دانيه؛تفكرت اول يوم ليا في المدرسه..
سارة بضحكه:والله صح..
شويه وخشت وحده مختمره قالت:السلام عليكم..
كلهم ردوا عليها؛وعليك السلام..
قعمزت في صدر المكان..ورفعت خمارها ومررت نظرها عليهم وقالت؛كيف حالكم ريحاناتي..
ابتسموا دانيه وسارة ومرروا نظرهم ع الطالبات اللي كان يشبحولها بنظرات حب واضحه ويردوا..الحمد لله معلمتي...
هي قالت:الحمد لله..وشبحت لسارة ودانيه ضيقت عيونها وقالت..جدد معانا صح؟
سارة؛ايه..
هي ابتسمت وقالت:اسمي فاطمه عبدالجليل بوخريص المعلمه هني..نادوني معلمتي وبلاش منها شيخه.. خريجة لغة عربيه ندرس في مدرسة سلفيه في تخصصي..وتوا عرفوني عليكم...
سارة بإبتسامه؛سارة هيثم الكاتب بنخش ان شاء الله ثانيه ثانوي علمي...
دانيه؛دانيه عبد المجيد المجذوب وان شاء الله السنه الجاية شهادة ثانويه..
فاطمه بإبتسامه:حللتم اهلا ووطئتهم سهلا..الله يبارك عليكم..بس..سارة الكاتب انت نفسها الكاتبه المشهورة صح؟
سارة ضحكت بإحراج وقالت:مش لهالدرجه..
فاطمه وهي مبتسمه؛جميل...وتوا بنسألكم اهم سؤال...علاش تبوا تحفظوا القرآن؟
السؤال فاجئهم...
فاطمه:استغربتوا السؤال... وتقولوا اجابته بديهيه...بالعكس اجابة السؤال هدا صعبه للي يفكر هكي..لان في من يبي يتعلم قرآن لغرض التباهي..وفي من يفوتوا بيه في عطلة الصيف وخلاص..وفي من يبي يتعلمه لأنهم فرضوا عليه هالشي...وفي اللي عكس هدا كله...انتم جايين تتعلموا قرآن علاش وبصراحه؟
سارة؛بصراحه..اني نحب نطلع ونهتم بهلبه حاجات..لقيت روحي نعرف في الأدب وفي علوم وفي اللغة عربيه وانجليزيه..بس بين هدا كله لقيت روحي في القرآن مانعرف شي..صح حفظت في الحوش بروحي..بس يعني حفظ عادي...لا احكام ولاتجويد وقلت لروحي انتي متعمقه في كل علم ماعدا اهم علم...القرآن..وقررت اني نتعلمه في مكانه المناسب..
فاطمه؛اجابه متوقعه من اديبه..
سارة بخجل:هلبه اديبه قتلك مش لهالدرجه..
ضحكت فاطمه ومعاها الطالبات بعدين شبحت لدانيه وقالت:وانتي يادانيه..
دانيه؛بش نرتاح..
كلهم شبحولها بإهتمام يبوا يفهموا قصدها..
فاطمه؛تقدري توضحي اكثر..
دانيه عيونها تعبوا دموع وقالت؛نبي نرتاح من هموم الدنيا واولهم مرضي..يقولوا القرآن يسكن في صدر البنادم واني نبيه يسكن هني..حطت يدها ع تحت رقبتها وقالت..بس نرتاح...وبس..
سارة قعدت تشوفلها بحزن..
وفاطمه قالت بإبتسامه عيونها غارقات بالدموع؛اللهم اني آمتك بنت عبدك بنت آمتك ناصيتي بيدك ماضي فيا حكمك عدل فيا قضاؤك اسألك بكل إسم هو لك سميت به نفسك انزلته في كتابك او علمته احدا من خلقك او استأثرت به في علم الغيب عندك ان تجعل القرآن العظيم ربي قلبي ونور صدري وجلاء حزني وذهاب همي وغمي...رددي الدعاء هلبه يادانيه...تو نمله عليكم كلكم تكتبوه بعدين...بس اخر سؤال دانيه نقدر نعرف مرضك؟
دانيه؛سكر..
فاطمه؛اجر وعافيه ان شاء الله...
دانيه:آمين.
فاطمه شبحت لوحده من البنات وقالت؛سكينه عطيهم زوز من الدوسيهات اللي في الدولاب..
ناضت البنت وقالت؛حاضر...
فاطمه:نبدا بيكم انتم الأولات اليوم..اقربوا..
ناضوا الزوز ومشولها قعمزوا قدامها..
وهي فتحت كراسه التحضير متاعه وحولت قفازاتها وخدت بيرو وبدت تكتب..
وهما يشبحولها..
جتهم زميلتهم عطت كل وحده فيهم دوسي..ومشت قعمزت..
فاطمه؛هي طلعوا المذكرات والأقلام وابدوا معاي..وخير مانبدأ به السبع المثاني ام الكتاب...فاتحه القرآن...اللي ماتصحش الصلاة من دونها...الشافيه الكافيه وهي رقية زي ماقال عنها رسول الله اللهم صل وسلم عليه..نقوللكم ع حاجه ديروها وهالحاجه قلت عنها لزميلاتكم اول ماعلمتهم الفاتحه..خودوا شيشه ميه..واقروا علي الميه سورة الفاتحه مرات ومرات بقدر استطاعتكم بعدين انفثوا في الميه هادي..واشربوا منها الصبح والعصر والليل وين تجوا ترقدوا..وفي وقت الفراغ اقعدوا رددوا السورة مرات ومرات...من اليوم ابدوا وانتي يادانيه بعدين تعالي قوليلي شن يصير معاك..
ابتسمت دانيه وقالت؛ان شاء الله.
فاطمه:تمام..ناضت وقفت ع السبورة وخدت خطاط وبدت تكتب وهي تقول...هي توا ابدوا اكتبوا....وبدت تتلى...
بسم الله الرحمن الرحيم الرحيم...
🍁🍁🍁🍁
في مكان يشبه لهدا..
في واحد من مساجد العاصمه..لكن حلقه لتحفيظ الذكور...
مقعمز ورا المصحف ويحك في سنونه بالسواك وهو يسمع في واحد من الطلبه يقرا..وعيونه ع واحد من طلابه..
رشيد..
اللي كان يخاف من نظراته هلبه...
كمل زميله الحفظ...وهو قال..
عمران؛هي تعالى يارشيد..
رشيد شبحله بخوف..بعدين ناض ومشاله قعمز قدامه ..
عمران بإبتسامه؛اقرب اقرب خيرك ديما بعيد...
رشيد بلع ريقه..
وزاد قرب...وعمران قرب وقال؛هي سمع...
رشيد نزل عيونه وبدي يسمع في السورة...
تبت يدا..ابي لهب وتب...مااغنى عنه ماله وماكسب...
فنص فجأه..لما يده عمران انحطت ع فخده...
طول بعدها بقوة وهو يقرا بإنفعال..تبت يدا ابي لهب وتب..
شبحله عمران بفجعه..شاف نظرة في عيونه تخوف كان حاده وعنيفه..
والولاد يشبحولهم وبعضهم فهم خيره...
عمران؛خيرك يارشيد وجعاتك حاجه..
رشيد بعد شويه وقال:مش حافظ..
عمران حط يده ع يده التانيه اللي كان حاطها ع رشيد وقال؛لاعليك..غدا ان شاء الله تجي حافظ ارجع لمكانك..
ناض رشيد وولى لمكانه وهو يرعش..
اللي صار معاه بعد التعافي كان النفور والاشمئزاز من هالأفعال وتأثره بكلام مجاهد ونصايحه بني حاجز كبير بينه وبين الغلط بكل انواعه...
وتوا ولى خايف ع نفسه وخايف لو قال شي من دون دليل تصير مشاكل في الحوش اكثر ماهي صايرة...
خصوصا بعد ماكذب ع ماجده قبل بوه مش حيصدقه ولافي حد من عيلته ممكن يصدقه...
بيصدقوا في شيخ يحفظ في القرآن!!!؟
🍁وفي مكان تاني...
وفي نفس الدائرة قاعده القصة دور....
مقبوله؛نوصلك داخل وانتي تخشي عليه باهي..
البنت:ان شاء الله...
امها؛هي نوضي بنتي البسي عبايتك ووشاحك..
البنت ناضت ومشت طلعت من حداهم..
مقبوله؛في فتوى لكبار العلماء تجيز في النظرة الشرعيه اظهار الشعر يعني القفطان اللي لابساته محترم مافيش باس لو خشت عليه هكي...
🍁كانت تبي خوها يرضى بالبنت بأي وسيله🍁
ام البنت؛لاوخيتي سامحيني ماحد يرضالها بيه وكان تخش هكي وخوها يشوفها يذبحها وقتي.
مقبوله ابتسمت بإرتباك وقالت؛والعياذ بالله..هو مجرد اقتراح ع العموم ان شاء الله يطرح القبول بينهم..
امها؛اللي فيها الخيره يجيبها ربي..
هي واختها قالوا:آمين...
🍁🍁🍁🍁🍁
" والله لولا هالسفرة المفاجئة مافوته العرس"
ماجده؛معليشي معذورة خدمتك هادي..
لجين بإبتسامه؛صار اليوم في الخمس..
ماجده بضحكه؛ايه تهيج..
لجين :ربي يهنيها..
ماجده:آمين والفال ليك..
ابتسمت لجين بخجل وقالت:تسلمي...احمم..الدكتور ماهناش؟
ماجده:ايه في المصحه..
هزت لجين راسها وهي مبتسمه..وماجده تشوفلها بإبتسامه..
••وريحان وجنان من ورا الحيط متاع فتحة الممر..
جنان وهي تعجب؛التكتور ماهناش.
ريحان بإزدراء:دراه كبد...
🍁🍁🍁🍁
"نوال خيرك شن صايرلك هبلتي..!؟"
وهي في سريرها راقده ومتكمشه في بعضها ودموعها بلوا وسادتها..كانت تتكلم بالتليفون:خلاص يامهاب معاش تناقشني ارجوك...مش موليه في كلامي خلاص..
"نوال خيره صوتك هكي"
نوال بصوت ناعس:بنرقد..بنرقد..وسكرت عليه..ويدوب قدرت تلوح التليفون...بعدين شدت المخده بإيديها وهي تتفكر في كلامه...
《 استاذه في الجامعه ومرشحه في الإنتخابات البرلمانيه وام ل4شباب..وتفكيرك طفولي..ابتسم تهكما وقال...اخر مرة نشوفك جايه لمكتبي وتعاملك مرة تانيه حيكون مع استاذ خليفه... تجيبي لروحك الإحراج اللي حنتسببلك فيه لو تمسكتي بعنادك.》
شدت ع سنونها بقوة من القهر وقعدت تبكي بكتمان....
وتبكي..وتبكي...وشويه وبدت تهدي..وتهدي لين رقدت...
🍁برا...
نرجس كانت ماشيه بإتجاه دارها لاقتها نوارة..
نوارة؛رايحه فين ياحبيبتي..
نرجس:نوال في دارها؟
نوارة؛ايوه زمانها نايمه دلوقتي اخدت حباية المنوم..
نرجس بقلق:ماقالتش خيرها؟
نوارة:وهي من امتى بتحكيلي ولابتحكي لحد طول عمرها صندوق مفقول..
تنهدت نرجس وهزت راسها ولفت ومشت..
نوارة بأسى؛ربي يصلح حالكم...
🍁🍁🍁🍁
الساعه الثامنه ونصف..
طلع هيثم من الجامع وركب سيارته وقعد يستنى في سارة..
كان مشغول بالحوقله لين قاطعه الشخص اللي دق ع الروشن .
شبح للروشن وابتسم ونزل..
هيثم؛اهلا اهلا...
مجاهد بإبتسامه؛اهلا بيك..وسلموا ع بعض...كنت داخل نصلي شكلك من زحمه ماشفتنيش..
هيثم؛لا والله ماانتبهت لحاجه بالي مشغول شويه هالفترة نمشي ومانشوفش قدامي..
مجاهد؛ان شاء الله خير!
هيثم؛خير خير ان شاء الله خير..انت كيف حالك وحال الأهل..وشن داير في الزاويه..
مجاهد؛والله الحمد لله ماشي الحال واهو نحاول نوفق..
هيثم؛ربي يعاون..
مجاهد؛ان شاء الله..مبارك ماعولتوا..
هيثم ضحك وقال:الله يبارك فيك وعقبالك ياسيدي..
ابتسم مجاهد بشي من الخجل وقال:تسلم..بعدين شبحله وهو عاقد حواجبه وقال..دكتور في عندي استسفسار ..
هيثم؛قول وان شاء الله نقدر نساعدك..
مجاهد حط يده في جيبه وقال؛عندي اختي انخطبت المدة الللي فات وخطيبها اني سألت عليه كويس والكل يشكر ومؤخرا عرفت ان في بيناتكم معرفه قلت نزيد نسألك عنه..
هيثم بإستغراب؛مني!؟
مجاهد:راجح*****
هيثم وهو متفاجئ:لالا!.
مجاهد؛شكلها المعرفه قويه..
هيثم؛مش بالزبط..بس راجل الله يبارك عليه اعطوه وانتم مغمضين عيونكم...
مجاهد هز راسه وقال:كل من سألته عنه قال نفس الكلام.بس لما طلع منك.اطمنت اكثر..
هيثم بإبتسامه؛بارك الله فيك..وفعلا راجح زي مانقال عنه ربي يتمم بخير..
ع طلعة سارة ودانيه من الجامع..
سارة وين شافت مجاهد واقف يهدرز.مع بوها قلبها طار بين ضلوعها..
بس دانيه كانوا عيونها في مكان تاني؛سارة سارة شوفي شكله راجل المعلمه فاطمه..
شبحت وين تشبح دانيه..
شافوا راجل مقصر الازار لابس ثوب انيق ومطلق لحية مهذبه وكوفيه ع راسه...
نازل من السيارة وعيونه ع مرته وهو مبتسم فتحلها الباب..
هي ركبت السيارة وهو طبس دخل عبايتها وسكر الباب..
ومشي ولى ركب السيارة وكانت ببشاشة وجه يهدرز معاها وشغل السيارة وتحرك..
سارة؛محلاهم..
دانيه؛ريتي كيف فتحلها الباب!
ع جية وحده من الطالبات؛كلنا هكي صار فينا اول ماشفنا الحركه هادي..راجلها يحبها هلبه وحتى هي بس ربي مارزقهمش بصغار..
دانيه؛قداش ليهم متزوجين..
:4سنوات..
دانيه؛ياروحي...لكن غريبه كيف ماخداش عليها وهو ملتزم..
سارة؛وعلاش من الألتزام انه يعدد.!؟
دانيه؛هما هكي الملتزمين لازم يعددوا..
:لا مش كلهم هو مش واجب اصلا..وراجل المعلمه فاطمه يحبها هلبه وقال مايبيش صغار من غيرها..
سارة؛تعرفيهم!؟
؛ايه جيراننا..
فجأة سمعوا صوت كلاكس..كانت سيارة هيثم لقوهم الزوزيشبحولهم.....
دانيه؛حيي وحني قعدنا نهدرزوا في الشارع..
سارة؛السلام عليكم..
دانيه؛سلام..ومشوا...
البنت؛وعليكم السلام ومشت لسيارتها..
دانيه ركبت سيارة خوها وسارة كملت القدام لين وصلت في سيارة..
هيثم؛وين الهدرزة في الشارع هادي!؟
سارة انحرجت؛اسفه خدتنا الدوة..
ومجاهد بدون مايشبحلها كان مبتسم..
هيثم ابتسم وقال:باهي بري اركبي..
سارة من الاحراج والارتباك لما جت بتمشي تركب عترت قريب طاحت شدها بوها وقال: ياستير..خيرك خيرك!
سارة كان تبخرت من الاحراج وقالت بصوت يدوب طالع:عترت..
ومشت طول ركبت..
بوها قعد يشبحلها بإستغراب..
مجاهد؛احمم..هي مالا دكتور نشوفك على خير..
شبحله هيثم شويه بعدين هز راسه وصافحه وهو يقول؛ان شاء الله في أمان الله..
مشي مجاهد للسيارة..
وهيثم ركب السيارة شبح لسارة اللي كانت تشبح القدام شويه..بعدين شغل السيارة وتحرك وهو يقول:ايه احكينا شن الجو...
🍁اما عند مجاهد ودانيه..
ركب بدون مايتكلم..
شغل السيارة وتحرك..
دانيه؛روحت بهديكا..
مجاهد؛روح بيها خوها..
دانيه؛احسن..
مجاهد قعد ساكت..
دانيه ابتسمت وقال؛والله ساعتين مروا عليا خلوني نراجي امتى يجي غدوة..
مجاهد ولاكلمه..
هي استغربت سكوته بعدين قالت؛تصدق هما اللي يفرقوا في المذكرات والادوات..شوف..وراته الدوسيه..
وهو ولاعبرها..
عقدت حواجبها وقالت؛مجاهد خيرك ساكت في حاجه؟!
مجاهد بحده؛كلمك راجح؟
هو ووجهها مولي احمر؛ايه اليوم مرتين..
مجاهد قعد ساكت ودانيه بدت تخاف..
درس السيارة ع تركينه ووقف..
طلع المصحف من درج السيارة ومده قدامها وقال:حطي يدك وقولي والله ماكان في حاجه بيني وبينه قبل..
دانيه انصدمت..ودموعها عبوا عيونها..
مجاهد بحده؛هيا...
دانيه وهي ترعش حطت يدها ع المصحف وقالت بنبرة باكيه؛اقسم بالله اقسم بالله ماكان في بينا حاجه..حولت يدها وقالت..ايه صح هو كان يلحق فيا ومن بعيد لبعيد والله واخته هي اللي كلمتني ع موضوع الخطوبه والله ماكنت نعرف انه خوها..
هو تنهد بضيق وركب المصحف للدرج..وشغل السيارة وقال؛خلاص معاش تبكي..
دانيه ببكي؛كيف ماتبنيش نبكي! اول مرة دير معانا موقف زي هدا يامجاهد عمرك ماكنت هكي..صدقت فيا كلام مقبوله..حتى انت بتبدا تمشي بكلامها يامجاهد...
مجاهد قعد ساكت وهو مضايق ع الآخر..
دانيه ببكي؛شافاته مرة لاحقني وهددتني بطريقه غير مباشرة واني قتلها والله مافي بيني وبينه حاجه نحسابها صدقتني وقالت لأمي وحطتني معاها.في موقف خيي..الحقيرة هادي دايرة روحها تعرف ربي...لكن الحق مش فيها الحق في االلي يصدق فيها..وجعتني منك هلبه هلبه يامجاهد..
وانهارت بالبكي..
مجاهد مسح بيده ع شعره للخلف وقال؛حسبي الله ونعم الوكيل..دانيه..اني أسف..
ودانيه قعدت تبكي وشويه وصوتها هدي..
هو شبحلها لقاها بدوخ..
مجاهد انفجع ومعاش عرف شن يدير يلهى بيها ولا بالطريق..
شد يدها يقوة وقال:دانيه دانيه...شدي روحك.خلاص دانيه..
ودانيه تقاوم ماتبيش تفقد الوعي...
ومجاهد يسوق بسرعه لين وصل في مجمع صحي..
درس ونزل ونزل وقامها وخش بيها يجري وهو يقول بخوف شديد:خليك فايقه دانيه خليك فايقه..
🍁🍁🍁🍁🍁
في نفس الوقت..
في حوش اهل راجح..
طلعوا جيهان وجمعه للجنان وهما يدوروا ع راجح..
جو يسلموا قبل يسافروا لشهر العسل..
جمعه؛شكله طالع..
جيهان ابتسمت؛لالا هونا مقعمز غادي شكله عنده مكالمه مهمه...
ومشتله..وجمعه مشي وراها وشعور الغيره هو اللي حركه..
جيهان؛افندي..
راجح التفت وقال؛اوو عروسه..وناض...سلم عليها بالأحضان وهو يقول؛كيف الحال..
جيهان:تمام..
بعدوا عن بعض شبح لجمعه وقال؛شايفك امس..
جمعه؛لكن مش بايت معاك.
ضحك ومد يده وقال؛بصارة ياراجل وانت كل شي واخده جديات..
صافحه جمعه وهو يقول بإبتسامه صفرا:حتى اني نبصر تصدق!
طلقوا ايدين بعض وراجح يشبحله برفعة حواجب..
وجيهان تمرر في نظرها عليهم بعدين قالت:شكلنا قطعنا عليك مكالمه مهمه...
جمعه حط ايديه في جيوبه..
راجح؛ايه والله..
جيهان:خطيبتك؟!
جمعه كور قبضه ايديه وشد عليهم بقوة..
راجح بضحكه؛ايه..
جيهان؛ايه وشن جوها..
راجح:مالحقناش نهدرزوا اتفقنا نكلمها بعد تروح من الجامع ومن بكري نتصل بيها وماتردش..
جيهان؛تقرا في الجامع؟!
راجح هز راسه بإبتسامه وقال؛تعرفي جيجي حنقعد ممنوك عمري كله..
جمعه اللي كانت النار والعه في صدره..شبح لمرته بطرف عينه..
جيهان بضحكه تخفي بيها ارتباكها:بش تعرف اختك بس...المهم حني غدوة مسافرين شهر عسل جيتك نسلم عليك..
راجح:تمشوا وتجوا سالمين..
جيهان:آمين..ماتوصي ع شي!؟
راجح؛لا بنوصي جيبي معاك حاجه ع ذوقك لخطيبة خوك..
جمعه قلب عيونه وقعد يمرر فيهم في ع الجنان وهو يحاول يتمالك اعصابه..
وراجح متابع يقول؛قبل بنديرلها بيان كبير لكن قدر الله وماشاء فعل..
جيهان: توتطلع اختها من العده وديره ان شاء الله..
راجح بضحكه؛مرات بيان في فاتحه مع بعض..
جمعه بإنفعال:مش هيا!
شبحوله الزوز...
وهو ارتبك..شبح لجيهان وقال:هيا وقت غدوة ورانا نوضه بكري..
راجح؛عنده الحق راجلك..بري انتي اركبي السيارة وخليني مع نسبينا دقايق معدودة..
جمعه استغرب..
وجيهان سلمت ع خوها وقالت؛نشوفك ع خير..
راجح؛ان شاء الله في حفظ الله...
جيهان لفت ومشت بعد ماشبحت لراجلها بطرف عينها..
وخوها راجاها لين بعدت بعدين شبح لراجلها وقال:شن يقربلك خالد *****
جمعه ابتسم بثقه وقال؛عمي خو بوي..
راجح؛وعلاش حني مانعرفوش..
جمعه تهكما:والله كانت ليكم حق السؤال علينا استخدمتوه؟
راجح؛اكيد بس اللقب الاخير مختلف..
جمعه؛عمي خالد غيره بعدين..
راجح:مقطوع التواصل بيناتكم!؟
جمعه؛ايه..
راجح هز راسه وقال؛تمام ابو نسب مانزيدش نعطلك تصبح ع خير
فجأة رن تليفون راجح..قامه وشاف المتصل
بانت ع وجهه ملامح اللهفه تباعد ورد:ايوه دانيه