البطل المغمور "زهور القمر"

الجزء الثاني عشر"2"

#البطل_المغمور2  "زهور القمر"
#جمان_فريد
#الجزء_الثاني_عشر "وإصبر"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
وصل جهاد في هيثم اللي لقاه واقف وع وجهه باديه ملامح الإستغراب وعدم الفهم...
هيثم:شن في ياجهاد شن صاير!؟
جهاد وصل فيه خدي نفس وبدي يحكيله..
ورفيق داخل مع عناصر الشرطه اللي يفتشوا في الحوش..
يشبح في الكلب كيف يخش ويطلع ويشم....
في فراشاتهم...دواليبهم..في كل ركن فيه...
لعند ماوصل في دولاب تهاني:لالا وين...
داوود بحده:اقعد غادي..
رفيق بغضب:اني قلت لا...وقدم بيسكر دولاب اخته..
شدوه زوز عناصر وطلعوه برا وهو يعيط ويسب ويلعن..
والكلب خش دولاب تهاني ويشم فيه وحوايجها العناصر يفتشوا فيهم..
هدا شغلهم وهادي ضرورياته ماذنبهم شي..
الذنب ذنب كل من حط عيلته في موقف زي هدا وجابلهم الإهانه بإيديه...
طلع داوود وهو يمرر في نظره ع الحوش..ويسمع في رفيق كيف مازال قاعد يعيط ويسب بلامبالاة..
وعقله كان يفكر في شغله وفي حاجه تانيه شتتاته..
طلع واحد من العناصر وقال:مالقينا شي سيدي..
قدم داوود لدار عفاف..
طلعوا منها العناصر وقالوا :نظيفه سيدي..
التفت داوود وقال:اللي داخل شن صار فيهم..
يقصد اللي في جناح رفيق..
رفيق:الله يلعنكم..
طلعوا وكذلك قالوا مالقوا شي..
داوود ؛وراي..
مشي طلع برا هو وعناصره..
شاف هيثم واقف ع جهاد..
شاف لجهاد شويه بعدين قال:اركبوا فوق..
جهاد قدمله وقال:وين فوق..
داوود بتهكم:وشن الدور الفوقي مأجرينه!؟
هيثم كان يشبحلهم وفي عيونه نظرة خوفت رفيق لما طلع وشافه..
جهاد بحده:استنوا..
ومشي خش داخل وركب وهما وراه طول..
هيثم غير عيونه عنهم وشبح لرفيق بحده بعدين مشي طلع ..
رفيق غمض عيونه بأسف وتأفف بعدين فتحهم وقال:شن درت فينا ياخليل...
🍁فوق لما خشوا شقة خليل..
وبدوا يفتشوا فيه..
لين وصلوا لدار النوم..
عيونه داوود جو ع الكتب اللي فيها قعد مركز عليهم هلبه
بعدين قال؛طلعوا الكلب وكملوا انتم..
طول طلعوا الكلب وكملوا تفتيش وقلبوا الدار قلب..
ومالقوا شي في الشقه...
وختموا تفتيشهم بشقة جهاد..
بعدين نزلوا طول..
وطلع داوود هو والعناصر اللي معاه وركبوا سيارتهم..
والناس تتفرج...
فاتوا من قدام حوش اللي كانت قايمه فيه القيامه..
ماجده بصدمه؛لالا مش مصدقه اني كذب..
هيثم هز راسه بعصبيه:اني نكلم احسان يمشي معاي للمركز وغادي نفهم كل شي..
ومشي طلع وهو يتكلم بالتليفون..
سارة بصدمه؛ياروحي ياعميمه قداش وجعتني ياخالتي..
ماجده بلعت ريقها وهي تقول:واني شن نقول يابنتي! حاسه الموت جتني..
وقعمزت ع الكنبه وهي تمسح ع رجلها وتاكل في شاربها التحتاني من قهرتها ع بنت اختها...
سارة ودموعها ينزلوا:عنده الحق زياد شكله..
ماجده شبحت لسارة....
ريحان:خيرها عمتو..
سارة مشتلهم وخدتهم من ايديهم وقالت:ماخيرها شي هي تعالوا نبدوا حوايجنا..
جنان:علاش تبكي..
سارة بنرفزة؛خلاص عادي ساد اسئله..
سكتوا الزوز بزعل..
وهي ماكانتش مهتمه وقتها لشي غير لعمتها وبس..
🍁🍁🍁
وفي حوش خالد..
كان منقام عزي بمعنى الكلمه...
عفاف وتهاني يبكوا بألم....
ونسيبه تذرف في الدموع وهي تشوفلهم وتسمع فيهم شن يقولوا..
تهاني ببكي؛مافيهمش خير اولاد يما مافيهمش خير زي بوهم..نكرههم هما وياه نكرههم...حسبي الله ونعم الوكيل فيك ياخليل باهي..
نسيبه شدت ع قبضة يدها بقوة وحاسه قلبها يتمزق..
ومريم تشوفها ودموعها في عيونها...
عفاف وهي تبكي بتعب:ااه ياخليل ياولدي ااه..علاش هكي بس ياولدي علاش...لا وفوقها قبل يطلع يقولي ادعيلي ربي يقويني..يقويه ع شني ع الحرام!؟ ع هدتي اني واخته..ع تقطيع لينا بلسناتهم بعد فرحنا انهم نسونا!
نسيبه بلهفه؛هو قال ادعيلي هكي!؟
شبحولها الزوز بعدين عفاف قالت؛تو كيف بيصير فيك كيف بديري...خوك..خوك شن بيدير!؟
نسيبه مسحت دموعها وقالت بحزم؛مش طالعه من حوشي..
تفاجئول تهاني وامها..
تهاني:قصدك انتي جايه معاه فوق عملته!؟
نسيبه بعد سمعت سؤالها رجعت بيها الذاكره شهور للخلف..
🔺️في وقت سابق...
في مربوعة حوش خوها..
خليل؛حاليا مش من حقي نعبرلك عن شعوري تجاهك..بس بنقولك..اني نشوف المراة اللي يتمناها احسن راجل مش أي راجل..واني عند نفسي راجل بمعنى الكلمه والحمد لله ومافي حد يستاهلك غيري..مش غرور ولاشوفة نفس..بس اني الراجل الوحيد اللي يقدر مراة زيك انتي ويعرف قيمتها مراة تصونه في غيابه..مراة تدرق ورا ظهرة هو يتكى عليها..
مراة معاه مراه ومع غيره بألف راجل..مراة تقدر تحمل معاه حمول ثقيله وتهون عليه طول الطريق اللي ماشي فيها...
نسيبه...انتي تعرفيني وتعرفي ماضيا كويس..واني توا وربي يشهد تبت توبه نصوحة ونبي نثبت عليها ومن بعد عون ربي نبي عونك..
نسيبه كانت متأثرة بكلامه هلبه لدرجه دموعها نزلوا...
خليل:قبل كل شي..راضية بيا..
نسيبه طول هزت راسها بالموافقه بدون تردد..
خليل بإبتسامه؛يعني تبيني ومافي شي يخليك توخري..
نسيبه هزت راسها ومتلهفه تعرف شن يبي يقول...
خليل خدي نفس وقال:نسيبه..اني نبي نكفر عن ذنب عظيم درته وحاس ربي مش حيغفرهولي الا اذا بدلته بحسنه تساويه لا ماتساويشي حتكون اقوى منه...
نسيبه منتبهه معاك تماما..
خليل:نحلفك قبلها بالله اللي بنقوله توا مايطلع لحد...
نسيبه:والله العظيم مايطلع لواحد من ماكان يكون..بس تكلم بسرعه قلبي معاش يتحمل..
تنهد بعمق بعدين بدي يحكيلها..
🔺️في الوقت الحاضر
نسيبه بلعت ريقها وقالت؛لو دار شي اكيد داره غصب عنه...
عفاف عقدت حواجبها بإستغراب..
نسيبه؛اني زيكم صادمني اللي صار لكن ماقدرتش نشك في صدقه...هو مجبور يدير اللي دار بش يحميكم...نسيتوا انتم شن صار في حوشكم من فترة...نسيتوا شن صار في الورشه!!؟ كله كان تهديد برواحكم انتم...ضحى بنفسه ع خاطركم..
تهاني قعدت تشبحلها وتفكر في كلامها...
وعفاف وقفت وجتها وهي تقول:هو قالك هكي!؟
نسيبه ببكي:ماقالي شي اكيد مش حيقولي خاف يخسرني..واني قبل ماشفت عليه شي..بس من امس لليوم واني نفكر ومالقيتش قدامي غير هالسبب ...
عفاف:وعلاش يدير هكي علاش علاش ماخبرش الشرطه..
نسيبه:ايه بش يمسحوكم مسح من الدنيا!
مريم كانت تسمع وهي حزينه ع حال هالعيله واللي عاشوه ومروا بيه..وحست اتجاههم بالمسؤوليه ليها يومين بس في وسطهم بس حست انها بنتهم مش بس كنتهم...
عفاف حطت ايديها ع وجهها وقالت بألن:آه ياولدي اه..اني اللي درتها فيكم اني كان سيبت بوكم من زمان راهو مش هدا حالكم..نزلت يدها وقالت بحسرة..راهو توا دكتور ليه قدره وقيمته بين الناس ومافي حد يقدر يطق فيه بكلمه..لكن اني الساذجة الحمارة اللي صبرت وضحيت ع خاطر واحد مايسوى...
حسبي الله ونعم الوكيل فيك ياخالد وين ماتكون...
🍁🍁🍁
وين مايكون خالد...
فهالوقت....اللي ماكان فيه يندري ع شي...
في سجن ابوسليم..
السجن المخصص لأصحاب القضايا الجنائيه الكبيرة..
الاعتداء بأنواعه....القتل ومايتبعه...تجارة المخدرات...
في ساحة كبيرة فهالسجن..
كانوا المساجين طالعين ساعة برا العنابر بش يديروا وظيفة ما مكلفين بيها فيه....
الساحه اللي كانت من كبرها وكأنها منطقه بحالها..
محاطه بسور متوسط الطول...في جنبه قطعه ارض خضراء مخصصة للزراعه..
وكلها محاطه بسور عالي جدا تعلوه اسلاك شائكه...
••في وسط الساحه...
"خلاص ياسر وجدي برا كمل غاديتكها كله تراب"
رد عليه يقول بنفاد صبر:باهي..ومشي يكنس وين ماقاله..
التفت هدا اللي يعطي في الأوامر..
شاف واحد بعد كنس لما اللي كنسه في جيهه ومشي قعمز..
قال بتهكم:لا والله...هكا هو!!؟
:بورا اطلع من راسي...
بورا "العجيلي":لانطلع من راسك لامن كرعيك..نوض نوض تحرك خيرلك..خير ماتقعد من غدي ولاعشي..
ناض وهو معصب قال؛اعوذ بالله منك الله لايسلطك ع مؤمن 
بورا بضحكه:وهدا اللي صاير مسلطني ع الكفرة..
ضحكوا كلهم...
وهو قعد يضحك ويمرر في نظره ع الساحه لين جو عيونه في عيون خالد اللي كان يكنس حتى هو ويفنص بعيونه ويأشرله ع حد..
عقد بورا حواجبه وهو مش فاهم سأله بحركة الراس شني..
وخالد يأشرله بعيونه وحواجبه..
بورا:والله القوي مافهمت حاجه...
واحد منهم قاله:شوف غادي يالوح..
التفت البورا وشاف راجل خميسني مقصر الإزار ومطلق اللحيه ومقعمز شاد في يده كتاب ويشبحله بحده..
هو خبط بيده ع راسه وقال بضحكه:والله القوي نسيتك بكل..
كلهم قعدوا يضحكوا..
وخالد يحرك في راسه يمين ويسار..
البورا:وبعدين ياشيخ اني ما فتش من ركنك ولاكلمتك..رغم ان عندي عليك عتب مانقدر نبلعه..يعني الرسول كان يخدم في حوشه يضم ويغسل ويخيط في دبشه ويعجن حتى في العجينه...ليش حضرتك ماتتواضعش ودير زيه!
عقيل بغضب:نتواضع!! قصدك اني متكبر ع رسول الله والعياذ بالله..!
بورا بإرتباك:ياراجل ياطيب مش هدا قصدي اني نبيك تكون قدوة  للشباب الصغير اللي قاعدين يتفرجوا عليك..
عقيل:تعرف وين البركه كل البركه في المكان هدا ياعجيلي!؟
بورا بإبتسامه عريضه:اكيد فيك انت..والله صدقت...اني اسف عندك حق اصلا هالمكان ماكانت فيه بركه قبلك انت ربي يحفظك ويعليك ويزيد يبارك فيك و...
قاطعه بصوت عالي بعد مافقد اعصابه وهو يقول:في سكوتك...في سكوتك...
العجيلي قعد يشوفله بإبتسامة فجعه..
وهو هدى وقعد يقول بصوت هادي.. البركه في سكوتك ياعجيلي...وابتسم ابتسامه صفرا ...
العجيلي هز راسه وهو ساكت..
وكلهم يضحكوا عليه..
حتى من العناصر الموجودين في الساحه...
بس فجأة..سكتت اصوات الضحك..
بعد ماسمعوا بباب الساحه انفتح...
شبحوله كلهم...
طلع من الباب واحد يبان في اواخر الاربيعنات ووراه زوز..
كان يمشي بملامح وجهه متجهمه ويبان معصب..
لما جي فايت من قدام خالد..
خالد قعد يكنس وهو شبحله بطرف عينه بعدين شبح القدام وكمل طريقه...
شويه جبد المكنسه من واحد من المساجين وبدي يكنس..
العجيلي بصوت واطي:جاته الحاله...
الكل بأنظارهم عليه بين الكاره واللي ركباته الرهبه..
بس الشيخ عقيل قال بصوت مسموع وبنبرة قرف...
أعوذ بكلمات الله التامات ...من شر ماخلق..
قام عيونه وشبحله..
وعقيل تجاهله ورجع يقرا في الكتاب..
هو رجع يكنس مرة تانيه وقال للي معاه:ماتصبوش فوق راسي..
هما الزوز طول مش من حداه وتوزعوا في الساحه..
وخالد وهو يلم.في اللي كنسه كان يسرقله في النظر ونظراته ليه كانت نظرات كره...
🍁🍁🍁🍁
خشوا للمديريه الزوز..
واحد يقول للثاني..
هيثم:اني لتوا مش مستوعب عقلي مش قادر يجمع..خليل اني...سكت وغمض عيونه بشده بعدين فتحهم وقال..الله المستعان..
احسان:انت اهدا نخش نشوف الوضع ونفهم شن صاير ونجيك..قعمز هني..
هيثم هز راسه وقعمز..
واحسان مشي طول لمكتب الضابط المسؤول عن قضيه خليل...
🍁فهالوقت..
مشوا ماجده وسارة ومعاهم التوأم لحوش خالد..
وشافوا الوضع اللي كانوا عليه...
قلوبهم وجعتهم عليهم..وتقطعت ع حال نسيبه..
عفاف ببكي؛ريتي حالي ريتي قداش نعاني...ااه الله يرحمك يااسيمه قداش مر قدامها من حالنا تجيني وتقعد تواسي فيا وتقولي اصبري وكلي امرك لربي كله يفوت كله يفوت...ومابي شي يفوت ياأسيمه ياوخيتي مابي شي يفوت...ياريت ربي يريحني من هالدنيا كيف مايريحك..
تهاني ببكي:يما معاش تقولي هكي بالله..
سارة بدموع كانت تهمس:إنا لله وإنا إليه راجعون...
ماجده رشفت وقالت؛باهي نوضوا خشوا داخل الجو سخن .
عفاف:مانخشش لحوش نجس..
مريم؛نضفوه عمتي..نسيقوه ونقيموا الفراشات ونغسلوهم ونفرشوا الحصاير اللي في المخزن..
عفاف؛غير شن تقولي يابنتي بس..
ماجده:عندها الحق تو اللي بيسمع بيجي ياعفاف تبيهم يخشوا ويشوفوا حوشك هكي..
عفاف ابتسمت بتهكم وقالت:معاش تفرق..
مريم؛لا تفرق ياعمتي..اني مانعرفكمش هلبه صح بس اللي سمعته عنك من الناس خلاني مش متحمله نشوفك هكي..كلهم يقولوا مراة صابرة وقويه وتحملت هلبه..مراة فالحه ومقومه....
ماجده:ايه والله صدقوا ماكذبوا ..
نسيبه مسحت دموعها وقالت:مريم عندها الحق عمتي ماتخلي يشوفك مكسورة بالذات توا واللي يقول كلمه توجعك نحط صوابعي في عيونه..
تهاني ابتسمت من بين دموعها..
وعفاف مررت نظرها عليهم بعدين شبحت في الفراغ..
خدت نفس وقالت..لاإله إلا الله...وناضت وهي تمسح في دموعها؛هي خشوا داخل..
ابتسمت مريم...
ماجده؛هي خشوا خشوا نو ياكبدي..نطلعوهم البساطات كان هدا توا والعشيه وين تبرد الدنيا نغسلوهم..
وخشوا داخل وبدوا يد بيد يقلبوا في الحوش..
وسارة تعاون في تهاني ع تقليب دارها..
طلعوا الحوايج كلهم للغساله...
وبعد ماطلعوا فرشوا الحوش كله...
بدوا يسيقوا فيه...
عفاف وهي تشتغل معاهم مش قادرة تمنع دموعها من النزول..
ونسيبه عكسها كانت تقوي في روحها ماتبيش تضعف تبي تكون زي ماهو يبيها...
اما مريم كانت تشتغل معاهم من قلبها...كانت شهلوليه وناشطه ولفتت انتباه عزوزتها ليها وحمدت ربي في قلبها اللي ياخد شي ويعطي خير منه....
🍁🍁🍁🍁
واقف قدام المركز يتكلم بالتليفون...
داوود؛ايوه معاذ شن جو يامعلم..
"داوود عاش من سمع صوتك ياافندي"
داوود بإبتسامه؛تعيش وتسمع..شنجو شن الامور
"والله تمام افندينا ماشيه الحمد لله.. انت شن امورك"
داوود:تمام الحمد لله منظمه...موعا..
"إي نعم"
داوود؛كيف حال قهوة خالتي ناجيه..
"تراجي فيك العشيه افندينا"
ضحك داوود وقال:خلاص مالا نشوفك بعد العصر..ماتبي شي..
"شرقيات بس"
داوود بضحكه؛من عيوني...اوينا..
"سلام"..
سكر وشبح القدام وهو يفكر بعدين تنهد ولف خش داخل...
🍁وداخل..
كان هيثم يشوف لإحسان اللي جايه من بعد..
لما وصل فيه ناض وقف...
هيثم؛شني!؟
احسان تنهد وشبح يمينه وقال؛شن بنقولك الموضوع كبير هلبه ياهيثم .
شبحله وقال:مع الأسف الباين خليل كان ناشط في تجارة المخدرات يخدم لصالح شبكه كبيره بوه كان فيها....مقبوض عليه بالجرم المشهود وهو مانكرش شي لا ومش هكي تحمل كل شي هو واللي معاه...
هيثم؛احسان..انت متأكد ميه في الميه من اللي تقول فيه!؟ يعني الموضوع مافيشي لعبه فخ اي شي...
احسان هز راسه وقال:متأكد زي مانشوف فيك..
هيثم قعد يشبح لإحسان وبس..
ملامح وجهه كلها جمود...هز راسه بعدين قال؛دبرلي كيف نشوفه وماتقولش صعب في ضابط هني اسمه راجح نعرفه كويس تعال معاي تفاهملي معاه...مش طالع من هني قبل نشوفه..
احسان؛تمام...
هيثم مشي واحسان رافقه لمكتب لراجح...
🍁🍁🍁🍁
"واك يما بنموت شن هدا"
سدينه:معليشي بنتي تحملي فترة تعدي..
رتاج بتعب:امتى تعدي امتى..
دانيه بقلق:مازال سته شهور يارتاج راهو تحملي..
رتاج؛سكري فمك بالله عليك...وفجأة ناضت تجري للحمام..
وامها لحقتها..
دانيه بخوف؛استغفر الله العظيم..شكلي بنكنسل موضوع الزواج بكل..
"اياه من توا بتندمي"..
دانيه التفتت للباب وع وجهها ملامح الامتعاض..
مقبوله خشت ووقفت ع الفريز بطلع منه دجاج دير بيه غدي مجيد وهي تقول:هدا الزواج اللي انتم تحسابوه لعبه راهو مسؤوليات وصغار وتربيه..مشت تحط الدجاجه في ميه وهي تقول...يبي مراة ناضجه وواعيه تعرف تربي...وهالجيل  بسلامته ناقص ربايه..
دانيه بحده:من اللي ناقص ربايه!
مقبوله بضحكه؛هالجيل مش انتي..انتي ماشاء الله عليك سابقه جيلك..
دانيه؛في هادي صدقتي سابقة جيلي بهلبه عقلي يوزن بلاد اكبر من عقل مراة في الأربعين..ضحكت وقالت...مانلقحش عليك راهو..
ولفت ومشت طلعت وهي تضحك..
وخلت مقبوله وهي مبتسمه بغل تفك في كيسة الدجاجه بعصبيه...
ع وقفة رشيد فم الكوجينه وهو يشبحلها بخوف وكره..تفكر خوها....وهرب طول لداره
🍁🍁🍁🍁
"مش اكثر من ربع ساعه دكتور"
هيثم؛عشرة دقايق...
راجح هز راسه ونادى العنص وقال؛وصل الدكتور هيثم  للحجز...
🍁وفي الحجز كان خليل في فقص بروحه مقعمز مع واحد..
وفي جنبه قفص تاني فيه اشرف..وعليوان..
الزوز كانوا يشبحوله ويتكلموا عليه..
اما هو كان سرحان في عالم تاني...
شويه وخش هيثم ومعاه العنصر اللي جايبه..
وقفوا قدام القفص اللي فيه خليل...
الضابط اللي كان مسؤول عن حراستهم قال؛خليل..
قام خليل عيونه وشاف هيثم..
ناض وقف طول...
نظرات هيثم ليه تبدلت...ولت هي نفسها نظرات ايام زمان اللي كلها ازدراء..
هيثم؛يعني هدا جزائي..!؟
خليل عيونه تعبوا دموع..
هيثم بحده؛هدا جزائي اللي وثقت فيك وصدقتك وقلت عليك راجل وعطيتك اختي!..
كلهم كانوا يشبحولهم ويسمعوا في الكلام..
هيثم بإنفعال:خيرك ساكت تكلم! دافع عن روحك قول اي شي..اي شي..وقعد يضرب ع صدره وهو يقول...اي شي يخلي الندم اللي قاعد ياكل فيا يموت ياخليل...
خليل غير عيونه عنه وماقدرش يفتح فمه بكلمه..
هيثم قعد يشبحله ويراجي فيه يتكلم بعدين قال؛الحق مش فيك والله مافيك..الحق كله راكبني من ساسي لراسي..وكان سمعت ولدي ماوصلتش لهني..مارميتش اختي بإيديا في النار...لكن والله مانخليها ع ذمتك.
رفع خليل راسه وقاله بحده؛ماتقدرش من غير رضاها..
هيثم بتهكم؛وانت تحسابها مازال ترضى تقعد ع ذمة واحد زيك...اااخ بس اااخ واني اللي درت جهدي بش نقنعها بيك ونقول الراجل تاب الراجل كويس معدنه باهي ساعديه اوقفي معاه بش يثبت ع التوبه ويكمل في الطريق الصح اللي بدي يمشي فيها...غبي وساذج كلا اني اكبر ساذج..ولااشكالكم انتم اشكال صلاح وهدايه..
خليل رفع راسه شويه بكبرياء وهو يبلع في ريقه وشاد دموعه بقوة...
هيثم؛اسف جدا اسف اني في يوم درتكم ناس وكبرت بيكم وخليتكم تناسبوني..
ومشي طول والعنصر وراه..
وخليل قعد معاه بعيونه لين اختفي..بعدين مرر نظره ع الموجودين اللي كانت نظراتهم تختلف في معناها..
هو هرب منها كلها ومشي تمدد ع الكرسي وعطي بالظهر...
غمض عيونه بألم وبدي بهمس يردد من قلبه موجوع...
"لاحول ولاقوة إلا بالله"
🍁🍁🍁🍁
"طلعتي الطليه من الغساله ياتهاني"
تهاني؛ايه يام ونشرت الحوايج..
عفاف وهي تفرش في الشلتات في الصاله قالت؛الحوش برد..
ماجده؛وولى يشرح الصدر..
ابتسمت عفاف ابتسامه باهته..
ع جية مريم وهي مشمره كمام التوته فوق:وتيت الشرموله والدلاع..وحطيت فاصوليا ع النار للعشي كان جي حد..
عفاف؛عطيك الصحه بنتي..نوسه وين؟
مريم:نوسه في دارك تمسح في الدولاب..
عفاف؛باهي جيبوا الغدي وضبحي عليهم..
مريم:حاضر..ومشت للكوجينه وهي تنادي:نوسه تهاني سارة بروا للصاله بنحط الغدي..
وخشت للكوجينه وبدت توتي فالسفرة...
شويه وخش جهاد للحوش ونادي؛يما...
طلعت مريم تجري:تعالى هني..
وهو مستغرب خش للكوجينه؛في حد هني؟
مريم:اهل نوسه..
تنهد جهاد بعدين شبح للسفرة وقال:بالكم في غدي!؟..
مريم مشت للخبزة طلع فيها وهي تقول؛-بالنا لغدي ولعشي ولفطور مالا كيف الواحد يقعد واقف ع رجليه ويقاوم..
ابتسم ع جنب وقال:تعرفي تدوي مليح ياعزوزة..
مريم؛مال شني تحسابني مازال ماشفت شي..
ضحك ضحكة خفيفه وقال:حطيلي نتغدا..
مريم رفعت السفرة وقالت:راجي شويه..
ومشت طلعت وهو معاها بعيونه بعدين ابتسم ومشي قعمز...
وفيسع تلاشت الإبتسامة وحلت محلها ملامح الهم..
حطت مريم لراجلها الغدي..وولت تغدت معاهم..
وكانوا يتغدوا بهدوء لكن البال مش رايق...
ماجده؛هي كولي ريحان..وطعمتها...
سارة؛جنان كولي..
جنان؛باهي..وكلت من يد اختها...
وعفاف تشبحلهم بإبتسامه..
تلاشت هالإبتسامه لما سمعت صوت باب الحوش يدق بقوة..
كلهم. خافوا..
جاهم صوت جهاد وهو يقول...
"تو نشوف مني.."
عفاف بقلق؛ياربي مني زعمه..
ماجده؛باك وحده من خواتك..
ونسيبه قلبها كان مقبوض حاسه بشعور مخيف...
شويه وخش جهاد وهو ينادي بعصبيه؛مريم!
مريم انفجعت وناضت تجري...
عفاف؛شكلهم.ماليها سمعوا ياغبارتنا...
ونسيبه بدت تحس بمغص من الخوف..
شويه وجت مريم وهي تقول؛خالتي ماجده هدا الدكتور قال هيا..
ناضت ماجده طول وهي حاسه بشي مش مزبوط..
وسارة ناضت وهي تشوف لعمتها اللي كان باين وجهها اصفر من الخوف..
ماقدر حد يقوللهم اقعدوا...
ماجده؛هي بالسلامه توا ياعفاف تو نولي بعدين ان شاء الله..
عفاف هزت راسها وهي ساكته..
ماجده شبحت لنسيبه بقلق..
ونسيبه ناضت ومشت تسقد فيهم..
ومريم وعفاف وتهاني معاهم بعيونهم...
••نسيبه؛خالتي..
ماجده؛ان شاء الله خير يابنتي..
فاتوا من قدام الكوجينه اللي كان فيها جهاد مقعمز ياكل بعصبيه..
طلعوا برا..
شافوا هيثم واقف يشوفلهم بنظره خلت قلوبهم ترجف...
هيثم؛خالتي خودي البنات وللحوش
طول...
ماجده شبحت لنسيبه..
هيثم؛خالتي!
ماجده شبحتله هزت راسها وقالت؛هيا سارة..
وسارة تمشي معاها عيونها يشوفوا لبوها بقلق..
طلعوا كلهم من الحوش...
وهيثم شبح لنسيبه وقال:اركبي لمي حوايجك وهيا..
نسيبه ودموعها في عيونها عقدت حواجبها قالت؛وين هيا!؟
هيثم؛لحوش خوك يعني وين..قدملها وقال...نسيبه التهمه لابساته لبس طلع مش قد الثقه اللي حطيتها فيه وسامحيني اني اللي شجعتك اني اللي سلمتك ليه بإيديا..وتوا بنصلح غلطتي ونخليه يطلقك برضاه او غصب عنه..
عفاف كانت واقفه ورا الباب تسمع..
وجهاد يسمع من روشن الكوجينه..
وتهاني مقعمزة تحت روشن دار خوتها وهي تبكي بصمت..
نسيبه بلعت ريقها وقالت؛واني مانبيش نطلق وحوشي مش طالعه منه..
هيثم قعد يشبحلها وهو ساكت..
نسيبه ودموعها ينزلوا:مافي حد جبرني ولاشجعني ناخد خليل اني من داخل كنت نبي ومقتنعه..ومايهمنيش شن ماقالوا وبشن مااتهموه..الراجل اللي اني ع ذمته ماريتش منه الا كل خير وماشفتش منه شر بش نطلب الطلاق..
هيثم قدملها وقال؛انتي مستوعبه  اللي تقولي فيه...! راهو هدا عضو في تشكيل عصابي كبير البلي داره زمان مع بوه واللي داره امس تعرفي يخليهم يحكموا عليه بكم سنه!؟
نسيبه؛نقعد لأخر يوم في عمري نراجي فيه..
ابتسمت عفاف ودموعها ينزلوا..
وجهاد ومريم كذلك ابتسموا..
وتهاني تمسح في دموعها وابتسامتها غلبت ملامح البكاء ع وجهها..
هيثم قعد يشبحلها لحظات بعدين بحزم قال؛عندك واحد من اتنين..وتختاري توا وفي هاللحظه..
اختفت الإبتسامه عن وجوههم في لحظه..
هيثم رفع يده وهو يعدد بالسبابة والوسطى:ياتطلعي معاي توا.......وسكت...
نسيبه حاسه قلبها بيوقف....
بعدين قال...
"ياتنسيني لأخر يوم في عمرك"..
عفاف غمضت عيونها بألم...
نسيبه كلامه خش في وذانها زي السيف...
وخلا روحها تنحرق..وقلبه ينعصر ألما...
هيثم كل عيلتها...بوها وامها وخوها وكل شي بالنسبه ليها..
معقوله تفرط فيه !؟
《نسيبه اني متكي عليك بعد ربي》
نزلوا دموعها وهي تذكر في كلام زوجها وحب عمرها الراجل اللي تعرفه اكثر من امه..الراجل اللي ولت عايشه بيه فالدنيا..
الراجل اللي تعشم فيها هلبه توقف معاه وماتتخلاش عنه..
هيثم هز راسه وهو يشوف لعيونها بنظرات وجعتها اكثر ماهي موجوعه..
هيثم اشر بسبابته ع الباب؛لو طلعت من هني بروحي..معاش نبيك تعرفيني ولاتعرفي صغاري وحوشي يحرم عليك..
ولف ومشي للباب بخوات فيها شي من البطأ...
لعند ماوصل فيه..فتحه...وطلع...شبحلها...
هي غيرت عيونها عنه ودموعها بنزلوا بغزارة...
هو تنهد بألم..وسكر الباب...
هي مجرد سمعت الباب تسكر..
نزلت ع رووس صباعها وغطت وجهها بذراعها وانهارت بالبكي...
وعفاف طلعتلها جتها ونوضتها معاها وحضنتها..
ونسيبه ضمنها بقوة وقعدت تبكي وهي منهاره..
عفاف تمسح ع ظهرها وتقول؛معليشي بنتي معليشي...يفوت..كله يفوت..وخنقتها العبرة...
🍁سيمر...كل مر🍁
🍁🍁🍁🍁
الساعه السادسه والنصف مساءا..
"شن تقول انت"
داوود؛كيف انتم ماسألتوش عنه لما جاها يخطب..
معاذ بتهكم وعصبيه؛ع اساس تابوا ولوا ناس كويسه..وجابوا هداكا الدكتور اللي اسمه الكاتب بش يخش واسطه وطاح يشكر فيهم ويحط قريب دارهم صحابه..
داوود؛الحق عليكم انتم بس يامعاذ وسامحني فيها ناس زي هادي متحاوطه بالخطر ديما كيف ترموها بإيديكم في النار!
•••••••••••
ياسر؛جيت لكلامي..جيتوا لكلامي شفتوا ش جانا من ورا هالنسبه السودا..
معاذالله يسامحك يابوي ويهديك..تأثرت بكلام الراجل هداكا ولوحت بنتك الوحيده في جهنم..داوود صاحبي يابوي لما خطبها مني طلعتوا مية لولا لأنه ضابط شرطه وعطيتوها لمجرم وتاجر مخدرات...اااخ مش عارف شن نقول ولاشن ندير...
بوهم بعصبيه وخوف:خلاص انت وياه خلاص..بروا روحوا بيها..
ياسر؛ماليش علاقه بيها وقلتلكم قبل..
امهم وهي تبكي؛ياحي عليا اني وخلاص المراة ماسكرتش اسبوع..شن هالبخت ياربي!
راجلها؛توا خير من بعدين ياناجيه..
معاذ:اني ماشي نجيبها ...
ومشي خدي مفاتيح سيارته وطلع من الحوش...
ام مريم؛يافضيحتنا ياعارنا..
راجلها معاش تحمل مشي من حداهم..
ياسر؛اهرب يابوي اهرب..لما تحصل ديما تهرب...
🍁🍁🍁🍁
طلعت من دارها ومشت طلعت من ممر الديار..
هو كان مقعمز في الصاله وفي يده الآيباد كان لاهي بيه وين شبحها ماشيه قال..
هيثم؛وين خالتي؟
ماجده بجديه؛لحوش خالد..
هيثم:خالتي..انت متقصده تعانديني..
ماجده؛اني عندي بنتي غادي مستحيل نخليها بروحها..
هيثم؛هي اختارت..
ماجده؛انت جبرتها..
سكت وهو يشوفلها..
ماجده؛ماتقدرش تمنعني نشوفها كلامك مايمشيش عليا..
هيثم؛من حوشي اني مانبي حد يواصلها..
رفعت حواجبها وقالت؛من حوشك!
ع طلعة سارة قعدت تشبحلهم وهي متوترة وخايفه..
ماجده؛تمام..معناها اني ولهني سادني قعدت هلبه..
سارة بدموع؛خويله بالله لا!
ماجده:اني انلزيت يابنتي من ولد اختي اللي دايراته ولدي مازال بنقعد..
سارة؛لالا شن لزك هادي شن تقولي..بابا قول حاجه راهو قالت انت لزيتها..
هو قعد لاهي بالآيباد وماباش يتكلم..
هزت ماجده راسها وهي مبتسمه بأسف..
بعدين مشت ولت للدار..
سارة:خالتي!..
شبحت لبوها وقالت؛بابا خيرك شن جاك بتطلع خالتك ملزوزة من حوشك لمن تمشي..
هيثم ببرود؛لحوش ولدخوها قداش ليه يلح عليها تجي تقعد عنده..
سارة بصدمه؛بابا...
هيثم بأنفعال؛خلاص عاد خلاص..هي كلمه قلتها بتمشوا بيها..
نسيبه باعت خوها بواحد زي راجلها شن مازال نراجي منها هادي..قولي..
سارة خافت سكره يرتفع؛باهي بابا حاضر اللي تبيه نديره..
هيثم قعد يحاول بهدي نفسه ورجع شاف للآيباد
ع طلعة ماجده بشنطه في يدها وهي تقول:ماشيه لحوش ولد خالك ردبالك تتصل بيا ولاتجيني ياهيثم..
وهيثم ساكت..
ماجده باست سارة ع راسها وقالت؛رد بالك ع روحك وع وخياتك..
سارة تبكي بصمت..
مشت ماجده طلعت ووراها سارة..
ركبت سيارة نسيبه وطلعت بيها من الحوش..
وخلت سارة تبكي بعبرتها....

.#سبحوا
#وإصبر
#البطل المغمور2