البطل المغمور "زهور القمر"

الجزء العاشر1

#البطل_المغمور2  "زهور القمر"
#جمان_فريد
#الجزء_العاشر "فرحة عمري"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
بعد صلاة العشاء...
خش لشقته...رمي سباطه...وحط المفاتيح ع المدخل..
ومشي وهو يكح ويتنحنح ويقول:إيمان...
ماردتش..
هو عاود مرة تانيه ناداها:انتي يامراة..
وماردتش..
هو كمل طريقه لدار النوم يقول:وين مشت هادي..
خش للدار لقاها قدامه مقعمزة ع السرير ورجليها لوطا وتشبحله بنظرة استغربها..
فتح بطم سوريته وقال:نضبح عليك خيرك ماترديش..
ورمي سوريته..
هي بدون ولاكلمه..ناضت وجاته ومدتله تليفونها وقالت بصوت مبحوح:شن هدا..
هو ركز ع وجهها عليه اثار خدوش..خدي التليفون وقال؛خيره وجهك!؟
ايمان؛لما تشوف اللي في التليفون تعرف ياشيخ عمران..
نبرتها وتراته...شاف للتليفون فتح الشاشه..
وطلعوا قدامه المحادثات..
هو انصدم..وخاف هلبه..بس حاول مايبينش..
ايمان بنبرة باكيه؛قول ان الحساب هدا مش ليك لحد تاني نصدقك طول..
هو عقد حواجبه وشبحلها وقال بثقه؛لا ليا...انتي كيف لقتيه فتشتي هاتفي!
ايمان بصدمه:وانت هدا همك!! مش هامك بكل اني شن شفت وشن عرفت..
نزلت ايديه لوطا وحطهم ع بعض وقال:شن شفتي وشن عرفتي..انتي توا قاعده تسألي فيا شن هدا..خليني نجاوبك بعدين احكمي..
ايمان كانت مستعده تصدقه شن ماقال حتى وان كان كلامه مش منطقي:باهي جاوب نسمع فيك..
هو تنهد وقال:اني وكم شيخ مدايرين مجموعه نكشفوا فيها النماذج هادي من معلمي القرآن والطلبه..وهادي محادثه شفتيها كانت بيني بين واحد فيهم محاوله مني لإستدراجه ونبوا نشدوا عليه دليل..والمحادثات هادم خير دليل..وبش تتأكدي اكثر..
طلع تليفونه وحط ع تطبيق الواتساب وفتح ع محادثه في قروب دايرة هو شيوخ جامع..
ومدلها التليفون وقال:اقري..
هي خداته وقعدت تقرا...
فعلا المحادثات هادي كانت توافق كلامه بالزبط..
هي غمضت عيونها بشده..بعدين زفرت بقوة وفتحت عيونها وشبحتله وقالت...اسفه..بالله عليك سامحني..انت الفترة الأخيرة متغير عليا ومتباعد هلبه وخليتني نشك فيك..
عمران؛ناقصات عقل..يعني الراجل لما يتغير ولايبعد معناها يدير في منكر والعياذ بالله..ماعنداش ضغوطات في الخدمه ماعنداش ضغوطات في المعيشه ماعنداش مشاكل بكل..
انتي لو تعرفي اني في شن مشغول تكرهي روحك وتحتقريها..اني قاعد نجري بش نشري ارض ونبدا نبني..نبي نطلعه من الشقه اللي مش عاجباتك نبي نستقل اني وياك والصغار...من كثر مامهموم الحياة كلها مولي زاهد فيها مش غير انتي..وانتي بدال ماتوقفي معاي وتعاونيني شوفي شن قاعده ديري..
ايمان كانت محرجه هلبه ونادمه اشد الندم لين كرهت روحها ع اللي داراته..
شدت يده باستها وحطت جبهتها عليها وهي تقول:سامحني.
وهو يشبحلها برفعة حاجب..ورفعت راسها وكبت ع راسه وهي تقول...سامحني ياعمران بالله عليك..
هو قلب وجهه عنها وجبد يده وقال؛ربي يهديك ويصلح حالك..بري ديري عشي بري...ومشي طلع من الدار للحمام..
وهي خبطت بيدها ع خدها وقالت؛حمارة حمارة عليك موقف حطيت فيه روحي...
ومشت طول طلعت من الدار للكوجينه...
🍁فعلا ناقصات عقل ينضحك علينا بكلمتين..فإن كان اللي دارته امرأة العزيز في يوسف كيد عظيم..فاللي داروه فيه خوته كيد اعظم🍁
🍁🍁🍁🍁🍁
واللي قاعد يصير لوطا في الدور الأول الشيطان يصفقله اعجابا...
مقبوله:ملتزمه؟
اختها:ايه ملتزمه..
مقبوله؛لالا ملتزمه نشوفوله بنت عاديه افضل الملتزمه مش حطول معاه وانتي فاهمه قصدي..
:باهي بنت عاديه كيف راهو بنطولوا ع مانلقوا وحده ترضى بشروطنا..
مقبوله بضحكه:اضحكي حتى انتي..توا غير يبان عليهم الراجل تشوفيهم كيف يرضوا وهما يضحكوا وفرحانات..تلقي تلقي كان دورتي...
تنهدت اختها وقالت؛باهي تو نشوف...
مقبوله:المهم توا كان جيتي غدوة اقلبي الكوجينه وقولي لوحده من نساوين خوتك تعاونك..
:حاضر..راجلك امتى يطلع؟
مقبوله؛بداية الأسبوع الجاي..
؛ربي يكون في عونك..
مقبوله تنهدت وقالت: ايه والله...الله المستعان...
🍀🍀🍀🍀
وتمر الأيام..
ويكملوا سارة وتهاني ودانيه امتحاناتهم..
وتنتهي السنه الدراسيه..حتى لمريم اللي كملت امتحاناتها وتفرغت تماما للإستعداد لعرسها اللي حيبدا يوم 29\7...
زي نسيبه اللي جابت نتيجة بنات خوها من المدرسة..
الزوز نجحوا حتى ريحان اللي راعو ظروفها ونجحوها وخلوها تمر للصف التاني مع اختها...
وبدوا كلهم يتجهزوا لعرس عمتهم..
عمتهم اللي كانت مش مصدقه امتى يجي اليوم اللي يجمعها بخليل في حوش واحد تحت سقف الحلال..
وماعندهاش ادنى فكرة انها سعادتها معاه مش حتدوم اكثر من ثلاثه ايام..
خليل ماباش يقوللها بش مايخربش عليها فرحتها واحتفظ بهالسر لنفسه فقط...
🍁🍁🍁🍁
فتح بيبان الشقه الزوز..
بعدين طلع ودخل بوه بالكرسي المتحرك...
مجاهد:هدا وين نور الحوش..
مجيد ابتسم مجامله وهز راسه...
مجاهد:كلهم يستنوا فيك فالصاله..وصلوا في الصاله...
مجيد عيونه جو ع سدينه وبناويته..
ناضتله سدينه وهي تقول:حمد لله ع سلامتك حمد لله ع سلامتك..
وبناويتها مع مقبوله تبعوها بعيونهم لين وصلت فيه وكبت ع راسه وهي تقول:كيف حالك يامجيد..
مجيد:وشن تشوفي فيه قدامك!
هي غصت بإبتسامتها ومعاش عرفت شن ترد..
ورتاج من الغيظ قعدت تحك في يدها...
ودانيه تشوف لبوها بإزدراء..
ومجاهد يشوف لأمه بحزن..
جاته مقبوله وهي تقول:حمد لله ع سلامتك مجيد..
شبحلها وابتسم وقال:الله يسلمك يامقبوله..طلعتي بنت اصل.
ابتسمت مقبوله..
ودانيه بصدمه مررت نظرها ع رتاج ورشيد ومجاهد..
رتاج زادت تحك في يدها..
ومجاهد زاد ضايق..
اما سدينه تباعدت وولت قعمزت في مكانها ودموعها في عيونها..
مجيد:فضيتوا الدار ولا.."يقصد دار النوم"
سدينه:احمم..ايه..
مجيد:بتقعد معاي فيها مقبوله..
كلهم انصدموا..ع بالهم مقبوله بتقعد مع سدينه في دار رشيد ورشيد بيقعد مع خوه في داره...
مقبوله:اللي تبيه نديره..
فكت رتاج ايديها من بعض وقالت؛كيف هكي هادي دار امي!
مجاهد:رتاج!
مجيد:امك معاش عندها حيل بش تعانيني مقبوله اولى منها...
مقبوله؛مزبوط ياسدينه انتي سادك الحوش واني عليا مجيد وشن مايحتاج عندي خبرة ونعرف نتعامل معاه كيف ماكنت نتعامل مع بوي...
رتاج؛كان هكي باهي..اريحلك يام..
مجيد قعد يشبح لرتاج بحده ومجاهد يفنص فيها..
غير عيونه عنها وقال:مقبوله ارفعيني للدار..
مقبوله:حاضر..ومشت بيه لدار النوم..
وسدينه معاهم بعيونها وهي مقهورة..
رتاج؛خاطر عليا ناخدكم ونمشي لحوشي ..
مجاهد؛اسمعي جاي مانبيش نتعامل معاك معاملة خي يارتاج لسانك قصريه واحترمي نفسك وبوك..
رتاج ودموعها ينزلوا:عاجبك اللي صاير..
مجاهد بحده وعصبيه؛انتي شن دخلك في اللي صاير..خليك في نفسك بس..كل حد في الحوش هدا عليه في نفسه وبس..الراجل مريض ونفسيته تاعبه ومش متحمل شي خلوه في حاله..
خواته يشبحوله ودموعهم في عيونهم..
اما امه كانت تشبح لأيديها اللي تفرك فيهم ببعض ودموعها ينزلوا..
رتاج ناضت وهي تقول:باهي زي ماتبي..
ومشت طلعت من حداه ودانيه ناضت لحقتها..
اما هو شبح لأمه وتنهد ومشاله..
قعمز جنبه..خدي يدها وباسها وقال:مانقصدكش انتي يام عارفتيني..
هي هزت راسها وقعد ساكت..
هو حط يده ع راسها وضمها لحضنه وقال؛معليشي يام كلنا مجبورين نسايروه هو توا حاس روحه عاجز ومايصلح لشي والحاجه هادي صعبة ع الراجل بالذات اللي زي بوي..وبعدين اللي داره راحه ليك انتي..ساد سنين عمرك اللي عانيتي فيهم..وتوا تريحي وخلي الكيد ع غيرك...
هي ارتاحت شويه من كلامه..
مجاهد:يام..
سدينه:نعم..
مجاهد:نحبك..
ضحكت وقالت؛واني نموت فيك ياضي عيوني...
ورشيد واقف يشبحلهم وابتسامه ع وجهه...
••في دار البنات..
رتاج؛سحيقه ليه وليها الحيزبونه هادي...
دانيه؛خليني منهم توا وقوليلي درتيه!..
رتاج تنهدت وقالت:تس...خايفه..
دانيه؛لازم تعرفي بش تتأكد وترتاحي...
رتاج خدت نفس وقالت؛باهي...ومشت فتحت الدولاب وطلعت منه كيسه ومشت طلعت من الدار..
ودانيه تستنى فيها بتوتر...
🍁🍁🍁🍁
"شن بتعطوها مش سادها الحوش والمزرعه"
:مالاش علاقه بالورث ياأمي..المراة عندها حق ولازم تاخده..
ام همانه؛والله ماتستاهله..
:تستاهله ماتستاهلاش مش شغلي..بما اني الكبير وبوي مفوضني بكل شي من قبل مايموت بندير شرع ربي..ماناكلش حق حد..
امه؛طبعا طالعين لبوكم ماديروا كان اللي تقهرني..
همانه:اللي بتاخده هي اكثر من اللي بتاخده امي..
خوها بغضب وتهديد:انتي ضمي فمك خيرك وماتخشيش في حاجات اكبر منك..راهو شاد روحي عليك بالسيف..
هي خافت..
خوها التاني قال:نوضي لدارك تحركي..
هي بالسيف ناضت ومشت من حداهم..
والكبير تابع يقول؛غدوة بإذن الله بنمشوا لطرابلس نعطوا المراة نصيبها..وتم الكلام...
🍁🍁🍁🍁
فتحت باب الدار وخشت وع وجهها ملامح التعاسه..
دانيه:حامل!؟
هزت رتاج  راسهاوهي قريب تبكي..
دانيه بضيق؛لازم تمشي ديري تحاليل وتتأكدي اكثر..
رتاج؛حي عليا يادانيه كيف بيصير فيا توا!؟
دانيه سكتت ماعرفتش شن تقوللها..
ورتاج تشبح في الفراغ وتفكر في وضعها وبدت تذرف في دموع الحسرة ع نفسها...
🍁لكن يارتاج عسى ان تكرهي شيئا يجعل الله فيه خيرا كثيرا...وفي كل شر خير زي مايقولوا🍁
🍁🍁🍁🍁
"قريب نديرولك مكتب في المركز"
نوال:تتسهوكي يعني..
ثريا بضحكه؛جاياتك كثرت هلبه..بس ردي بالك تقولي نبي نشوف ولدي..
نوال:لهالمرة جيت لغرض تاني..
ثريا:نقدر نعرف شن هو..
نوال:تعرفيه من مديرك المثالي..
ثريا ضحكت..
نوال؛في مكتبه ولايدور كعادته..
ثريا بضحكه؛لا في قاعة المحاضرات..
نوال:اها...
ثريا:تعالي معاي..
ومشوا مع بعض بإتجاه قاعة المحاضرات..
اللي كانوا فيها النزلاء كلهم..
وهو متكي ع الطاوله ومربع ايديه ويعطي فيهم محاضرة بس هي اقرب للدردشة من كونها محاضرة..
هيثم؛العادات السبعه اللي بنحكي عليها مش هي نفسها العادات السبعه المعروفه..هادي عادات اني مشيت بيها في حياتي خلال الشهور الأخيره..وحسيت معاها ان في شي داخلي تغير...والتغيير هدا كان نفسيا وجسديا....العادات هادي من لما التزمت بيها التزام..وليت ايجابي بزياده..مستكين...مرتاح حتى واني في اصعب الظروف...البنادم لما يواجه ظروف صعبة جدا يحس الدنيا كلها مسكرة في وجهه سودا ظلام في ظلام..بس اني مع صعوبة اللي مريت بيه كنت زي اللي قاعد يمشي في نفق مظلم يشوف من بعيده في اخره فتحه جايه منها ضي يفرح لأنه متأكد ان للظلام اللي هو فيه اخر ومن بعد حيشوف النور..
العادات هي بالترتيب حسب الأهميه...
واحد...صلاة الفجر في وقتها...
🍁فهاللحظه وقفت نوال في الباب وقعد تشوفله وتسمع فيه وثريا معاها..
هيثم؛لو بنحكي عن الصلاة الفجر من هني لغدوة مانكملش فيها كلام من عظمتها وعظم فضلها..
الرسول قال عنها خير من الدنيا ومافيها..راهو هدا مش مجرد كلام وخلاص..لاينطق عن الهوى ان هو الا وحي يوحى..
وقت الفجر..هدا احسن وقت يعيشه الانسان في يومه كامل..
الجسم يكون في افضل وانشط حالاته هداكا الوقت..
الهواء متاع الفجر الهواء اللي نتنفسوه انقى وانظف هواء..
يعني تخيلوا معاي لو..الواحد ناض الفجر..ومشي للجامع اللي يكون قريب من حوشهم مثلا..يمشي ع رجليه...
حياخد اعظم فايدتين للجسم..
المشي..والمشي اكثر حاجه ننصحوا بيها حني اطباء القلب تحديدا..
والإستفاده من الهواء النظيف اللي يخش الجسم..تأثيره يكون نفسي بقوة..يريح...يرفع من هرمون السعاده..يخلي البنادم في احسن حالاته.
ناهيك عن بشر المشائين في الظلمات الى المساجد بالنور التام يوم القيامه..
دقايق المشي هادوا يخليك تخش ع الصلاة بخشوع وذهن صافي وقلب خالي من غير الله سبحانه وتعالى..
ومن بعد الصلاة...لو تخدم او تقرا حيكون يومك كله بركة ان شاء الله تعالى بفضل دعاء الرسول اللهم بارك لأمتى في بكورها...
عندكم علم في العالم الغربي..ساعة الفجر هادي شن يسموا فيها...ساعة المعجزة...او الساعة السحريه..هلبه من الشخصيات الناجحه والمؤثرة عندهم مايخلوش الساعه هادي تفوت في النوم نهائي...
واني والحمد لله من لما ولت الحاجه هادي عندي عاده واني حاس نفسي داخليا وليت اقوى من قبل هلبه...
🍁كانوا يسمعوله بإنسجام تام وهي منهم....
هيثم فك ايديه وقال:ثاني عاده...
قراءة القرآن...اني شخصيا كنت مقصر هلبه فهالجانب كنت بسبب انشغالاتي يدوب نصلي الصلاة في وقتها والمصحف ممكن مانفتحاش الا من رمضان لرمضان..او لولقيتله فضوة..
لو لقيتله فضوة...وهادي اكبر غلط كنت ندير فيها..والدنيا اللي خدتني نستني اني مفروض نخصص وقت للقرآن نخليه يزاحم اشغالي...لأن في نهاية المطاف مش حنلقى غيره ونيس في القبر..وحامي يوم القيامة ومن بعد الرسول صلى الله عليه وسلم شفيع..
القرآن افضل صديق يتخذه الانسان في حسابه..
الصديق يوقف مع صديقه..يغير جوه لو كان متكدر..يواسيه لو كان حزين يقويه لما يضعف..لما يقعد بروحه في القبر هو اللي يونسه..يوم القيامه يقول لربي اني شغلته وسهرته وكنت معاه كنت رفيقه ماخلانيش بكل خله الجنه ياربي...يشفعله...
في محنتي من بعد الله لقيته كلامه..القرآن هو اللي خلا هيثم قوي ويواجه ويتغلب عن كل صعب عاشه...
القرآن للي ياخده بقوة...يكون ليه زي ماقال الرسول اللهم صل وسلم عليه..
نور لك في الأرض...وذكر لك في السماء...
عندكم علم..ان القرآن يحافظ ع عقل البنادم..
الامام الشعبي قال...من قرأ القرآن لم يخرف...
وعبد الملك بن عمير قال..
أبقى الناس عقولا قرأة القرآن...
وصدقوني..حيأدبكم ويربيكم شرط انكم تقروه بقلوبكم مش بس باللسان...حيغيركم تغيير تام...
🍁نوال:ولى شيخ يعطي في خطب..
ثريا؛مش شرط يكون شيخ كان يعرف دينه كويس..
نوال شبحتلها شويه بعدين رجعت شافتله..
هيثم؛العاده الثالثه...وياه عالعاده الثالثه وع جمال العاده الثالثة..حكاية بروحها...
إن الله وملائكته يصلون على النبي ياأيها الذين ءامنوا صلوا عليه وسلموا تسليما...
الصلاة ع النبي...كفاية الهم وغفران الذنب..اقصى اماني الإنسان دنيا وآخره..شن يبي البنادم اكثر من انه يرتاح من الهموم..وان ربي يغفرله ذنوبه بش ينجى بعدين..
الصلاة ع النبي...اني شخصيا لاحظت معاها ان دعائي اصبح مستجاب..مرات والله حاجة نفكر فيها ومازال مادعيت بيها نلقاها قدامي....هدا غير الراحه النفسيه اللي يحسها الواحد تنزل عليه من فوق نزول..كيف لا..وهو قال من صلى علي صلاة صلى الله عليه بها عشرا..وصلاة الله ع العباد هي الرحمات والبركه اللي ينزلها سبحانه...
الاجمل في العاده هادي انها تخليك قريب هلبه منه هو توصله صلاتك..تخيلوا هكي توصله ويعرفك بالاسم ولما يقولوله فلان بن فلان يصلي عليك..يبتسم ..ويجيك يوم القيامه يناديك...يافاتح..
فاتح تفاجئ ودموعه عبوا عيونه وقعد قلبه يدق بقوة..
واللي حواليه يشبحوله..
هيثم:وانت تقعد دور من اللي ينادي فيا..لين يجوا عيونك عليه..يجيك هو يقولك نعرفك كويس صلاتك عليا ديما توصلني..
مسح بسرعه الدمعه اللي نزلت..واللي حواليه كلهم تأثروا وتخيلوا الموقف..
ومنهم نوال اللي طلعت الكلينكس من شنطتها وقعدت تمسح في دموعها...
هيثم؛شن بنقول ولابنحكي اللهم صل وسلم وبارك عليك يارسول الله..صلوا عليه..
كلهم صلوا ع النبي..
هيثم؛زيدوه وحده تانيه...
صلوا عليه من جديده..
هيثم:زيدوا غيرها..
وصلوا عليه مرة تانيه...
هيثم:كل صلاة مقابلها عشرة تخيلوا الرحمات اللي نزلت علينا زي المطر في مكانا هدا..
ابتسموا..
وهيثم تنهد بإبتسامه واتكى بإيديه ع الطاوله وقال؛العاده الرابعه...الإستغفار...ابن تيميه قال...استغفار الإنسان اهم من جميع الأدعيه..فعلا لأن حني بصفه مستمرة نرتكبوا في الذنوب صغيرة كانت ولاكبيرة..اذا الرسول كان يوميا لازم يستغفر سبعين مرة كيف بينا حني...!؟
غير عن هكي الاستغفار سبب لكل خير ينزل ع البني آدم..
علاش..لأن الذنوب هي اللي تحول بين البنادم ورزقه..من خدمه..من زواج..من ذريه..من نجاح..من تيسير امور..تفريج كرب..من راحة بال وسكينه...فلما الإنسان يستغفر من قلبه اعترافا بالذنب واقراره به وندما عليه...يتحول الحاجز اللي بين الانسان ورزقه...وينزل عليه الخير كله وكل شي بوقت وقدر معلوم..مرات مش كله في مرة ع دفعات...هدا غير يوم القيامه..لما يستلم صحيفته ويشبح فيها استغفار هلبه يفرح ويحس انه نجى...
وافضل الاوقات اللي قبل الفجر اللي يستغفر في الوقت هدا تكون ليه منزله عظيمه عند الله سبحانه وتعالى...
استغفر الله واتوب اليه...
خامس عاده...وهالعاده..ابتسم وقال..اكتسبتها من زوجتي الله يرحمها ويغفرلها..
زيادة ابتسم بحزن..
هيثم؛التسبيح...كانت كل صبح تطلع تسقي الورد وتسبح بصوت مسموع...كنت نحب نسمعه صوتها وهي تسبح...من لما تزوجنا لاخر ليها معاي وهالعاده ماخلتهاش بكل وخلتني اني مدمن عليها معاها..في وذاني كلامها لتوا..ووصيتها ليا بيه...بالذات بعد مااستلمت منصب في الدوله..
كانت تقولي حتقويك ع الحمل..وفعلا مع التسبيح اني كنت نحس بقوة عجيبه بالذات وين نحط في مآزق أو مواقف صعبه...ولزياد قصة مع التسبيح..بالذات دعاء يونس..
لاإله الا انت سبحانك اني كنت من الظالمين..
زياد:احمم..مزبوط..شفت امي في رؤيا مرتين وفي المرتين كانت توصي فيا بالتسبيح وبالذات دعاء يونس..واللهم لك الحمد كانت النتيجه واضحه..
هيثم تنهد وقال:الحمد لله...العادة السادسه...قال عنها رسول الله..انها دواء لتسع وتسعين داء ادناها هاه..ركزوا ادناها الهم...مالا اعظمها شن يكون..في قضية زياد بالذات ع اللي تعرضله ومريت بيه كنت متمسك بالحوقله بقوة..وسبحان من كان يفتحلي في البيبان المسكرة بإحكام...نخش ع الشي اللي نخاف منه بقوة نتعجب فيها من وين جتني بعدين نقول..طبيعي اللي يقول..لاحول ولاقوة الا بالله...اللي يتبرا من قوته وحوله وحيلته ويلجأ لقوة الله وحوله مايخليشي مستحيل...
شيخ اسمه عبدالرزاق بدر قال..
ومن قال هذه الكلمه أي لاحول ولاقوة إلا بالله..محققا مادلت عليه من التوكل والتفويض وحسن الإلتجاء هدي ووقي وكفي وكان من اقوى الناس قلبا...وأحسنهم حالا ومالا...
🍁هني نوال خشت...
كان القاعه جايه تحت اللي يخش بنزل الدروج بش يوصل للكراسي..
وهي نزلت درجتين وقعمزت..
وهو ماحسش عليها ولافي من حس..
وثريا تشوفلها بإبتسامه..
هيثم:العاده السابعه والأخيره...الخبيئة...يعني العمل الصالح اللي مايندري حد غيرك انت وربي..لازم كل حد فينا يكون عنده خبيئة مايعرف بيها حد غير الله...صدقه...خلوة ذكر...اعانه لعبد من عباد الله محتاج او مكروب....اعمال صالحه تندار في العلن بس لكن الفرق بينها وبين اللي في السر ان التانيه تكون فيها النية خالصه تماما مية في المية لله...الخبيئة هادي ترفع من قدرك عنده ويدسهالك في يوم تحتاجها فيه سواء في الدنيا والآخره..
العادات السبعه هادم اني توا مش متخيل نكمل حياتي من غيرهم...ولوا اهم من اهم شي عندي...ولايمكن يمر يوم ونتخلف عن أي وحده فيهم....
مرر نظره عليهم وقال نرجع نذكركم بيهم بالترتيب..
رفع يده فوق وبدي يعد ع صوابعه...صلاة الفجر... قراءة القرآن...الصلاة ع النبي
...الإستغفار..التسبيح...الحوقله...والخبيئة الصالحه...
لما قال اخر عاده عيونه جو ع نوال...اتفاجئ..
وهي طول نزلت عيونها وقعد تشوف لخاتمها..
هيثم غير عيونه عنها وقال بشي من الربكه:ايه..الخبيئة الصالحه نزل يده وضم كفوفه لبعض وقال..ياريت تكون عادات ليكم حتى انتم ..مانقولش جربوها مش لتجربة العادات هادي..ياخش عليها بيقين يابلاش منها كان تبي تجربها...
ابتسم وقال...ايه فاتح شن ناوي تعشينا اليوم..
نوال شبحتله..
فاتح؛كل خير ان شاء الله مادام كسرتوا القاعده اليوم..
زياد رفع يده واشر ع بوه وقال؛ماعدا انت دكتور ماكلتك هي هي..
فاتح؛ماتخممش دايرله شي يمشي معاه..
هيثم رفع حاجبه وقال؛تردولي فيها يعني..
ضحكوا..
فاتح بضحكه؛ديما ظالمنا يادوك حني نفكروا في مصلحتك بس..
هيثم حك رقبته من الخلف وقال؛باهي وين المشكله لوخديت حاجه ولااتنين...
كلهم قعدوا بصوت واحد...لالالا..
هيثم؛ذوقه..ندوق بس..
كلهم:لااا..ممنوع...
هيثم بضحكه؛تي باهي باهي..
واحد منهم قال:القوانين قوانين يادكتور..
هيثم ابتسم وقال؛تعرفوا قبل كنت نخلي في المرضى يمشوا ع نظام غذائي ونحرص عليه هلبه..فيهم منهم ماكانش يلتزم بيه واني طيرلي ونقعد نعارك فيهم..في منهم من الخوف ماكانوش يقولوا واني نكتشف بروحي بعدين...وتوا لما انحطيت في مكانهم وشفت روحي اني اللي كنت ماندورش في الحلو متشوق عليه..وماكنتش ناكل هلبه ولانجوع هلبه..وتوا نجوع بإستمرار ونبي ناكل في كل وقت لكن للأسف مش كل شي نقدر ناكله..فهمت شعور مرضاي ونفسيتهم وتمنيت لو عرفت نتعامل وقتها صح..
واحد منهم قال:لكن هلبه دكتور هني ماكلتنا كلها بروتين وبعد وين ووين دخلوا نشويات وسكريات...
هيثم؛لأن النظام هدا احسن نظام..الماكله تتحكم في نفسيتك ومزاجك وانتم هني بسبب الوضع اللي انتم فيه مكان مغلق وحبسه طبيعي نفسيتكم بتتعب..لهدا درتلكم النظام هدا لأنه يخليكم اهدى واكثر تسامح وتقبل لكل شي هني..نعطيكم معلومه تفاجئكم..الادمان ع السكريات زي الادمان ع المخدرات..يخي السكر اللي يدمن عليه يكون تأثيرة ع جسمه زي تأثير الهيروين والكوكايين..
كلهم تفاجئوا...
هيثم؛السكريات والنشويات والدهون لو كانوا هما بس ع قايمة ماكلتنا يوميا..معناها نبشروا بأمراض تدمر الجسم..
امراض الجهاز العصبي...الخرف الزهايمر المبكر..مرض السرطان بأنواعه..امراض الجهاز الهضمي..كوارث يديريهم النظام هدا..حتى السكتات القلبيه راهو..
واحد منهم قال؛وتوا مافيش في البلاد اكثر من القهاوي..
هيثم:للأسف الشديد..شبح لفاتح وقال..مستقبلا ان شاء الله نتمنى تبعد عن موضوع الوجبات السريعه هدا..
فاتح؛إن شاء الله...وتوا يادوك لازم نطلع معاش في وقت..
هيثم شبح لنوال بعدين شبحله وقال؛تمام تفضلوا...
هما ناضوا..
وهيثم عيونه ع فاتح بس زي مانوال كانوا عيونها عليه..
هو التفت شافها جمد في مكانها.
وباقي زملائه قعدوا يشبحولها...
هي ناضت وقفت وقالت:معليش بناخد من وقتكم شويه..
فاتح التفت وشبح لهيثم..
هيثم غمض عيونه وفتحهم..بمعنى خليك عادي..
هي قدمت وقالت؛بعد اذنكم...وبعد اذن الدكتور طبعا.
شبحت لهيثم بإبتسامه كبر..
هيثم غير عيونه عنها وخلالها المكان من غير مايكلمها..
هي وقفت في مكانه ومررت نظرها عليهم وقالت؛اغلبكم يعرفني كان مش كلكم..اني نوال فتحي بشير..شبحت لفاتح وقالت...ام فاتح..
هو كان يشبحلها بحده..وعيون هيثم وزياد عليه..
نوال وهي تمرر في نظرها عليهم قالت:مدايرين حمله ضد المخدرات والحمله هادي حتكون لمدة عشرة ايام في المركز هدا والمركز التاني اللي يخص المدمنات..حيحضروا فيها اهم الاستشاريين والأطباء والشخصيات المؤثرة وطبعا هني مش حيكون في تغطيه اعلاميه..فمن بعد اذن ولدي اولا..وشبحتله..
والدكتور هيثم ثانيا..قالتها بدون ماتشبحله...واذنكم تسمحولنا نديروا الحمله هني؟
فاتح شبح لهيثم وقال:الدكتور هيثم هو المدير هني شن مايقول هو يمشي..
هي شبحت لهيثم..وهو شبح للنزلاء وقال:هاه شن رايكم شباب..
كلهم بأصوات منقطعه..عادي..ياريت..مش مشكله..
هيثم؛خلاص...مادام الكل موافقين اني موافق..
زياد:ممكن سؤال استاذه..
هيثم شبح لولده برفعة حواجب..
نوال:تفضل..
زياد ضيق عيونه وقال؛ترسمي صح؟
هي تفاجئت من سؤاله..
وفاتح وبوه يشبحوله..
نوال:ايه صح..
تفاجئوا كلهم هالمرة..
زياد؛واضح من ملامح وجهك ونظرة عيونك..
نوال يدوب ابتسمت..
فاتح؛اني ماشي دكتور...ومشي..
هيثم:تمام تفضلوا كلكم..
هما مشوا وركبوا الدروج وطلعوا...
هيثم قدم وقال بدون مايشوفلها؛تفضلي..ومشي قدامها..
هي كانت تتنرفز من الحركه هادي هلبه..
لحقاته وقالت:هادي قلة ذوق ولاأستفزاز مقصود تقولي تفضلي وتمشي قدامي..
هيثم:هدا قمة الإحترام ياأستاذه..
نوال:مازال تستفز فيا..
هيثم؛لا انتي مش فاهمه بس.
ومشي طلع من الباب وهي وراه وكانت متنرفزة منه هلبه..
وثريا معاهم بعيونها...
نوال؛نبي نتفاهم معاك ع موضوع الحمله علاش تمشي وتخلي فيا..
هيثم عقد حواجبه وهو مبتسم بعدين وقف وقال:اكيد في عندك مشرفين ع الحمله ابعتي منهم حد نتفاهم اني وياه بأريحيه...وتوا نستأذن مشغوله هلبه..شبح لثريا وقال..وصليها لباب المصحه...
ومشي..
حطت نوال يدها في نصها وتعباته بنظرات عيونها الحاده اللي درقت من قدامه..
ثريا:انتي خلتيه يتعامل معاك هكي اني من قبل حذرتك..
نوال شبحتله وقالت؛ع اساس يهمني في شي..طز فيه..
ومشت وهي معصبه..وثريا ضحكت ولحقتها..
🍁🍁🍁🍁
خشوا الزوز للعياده...
سدينه؛تعرفي تطلعي تلعبي عليا تشوفي..
رتاج بإنزعاج:نلعب شنو يام بس..ان شاء الله يطلع كذب ياربي..
ومشوا مع بعض وين مافي مكان التحاليل طبعا رتاج كانت متختمره..وامها لابسه ملايه بس..
سحبوا منها الدم...وقعدوا يراجو..
وبعد وقت طلعوا التحاليل ورفعوهم لدكتورة نساء وولاده..
••الدكتورة؛متزوجه حضرتك..
رتاج؛زوجي متوفي ليه 10ايام..
الدكتوره بأسف:عظم الله اجرك...
رتاج؛اجرنا واجرك..
الدكتورة؛انتي حامل يامدام..
غمضت رتاج عيونها بأسف..وامها قعدت تشوفلها بحزن..
وكملت رتاج يومها وهي حابسه روحها في الدار تبكي وتصلي وتدعي ربي يديرلها طريق...العيل من غير بوه كيف بيصير فيه حاسة روحها بروحها ماتقدرش عليه..حمل وامانه ثقيله هلبه....
مش عليها بس حتى على خوها..
اللي نايض من عز نومه بش يدخل بوه الحمام..
مجيد كان منكسف منه...لكن هو كان ع قد مايقدر يحسس فيه انه امر عادي جدا..
مجاهد؛كم مرة دخلتني الحمام واني صغير ومرات حتى ندير فيها عليك..
ضحك مجيد وهز راسه..
مجاهد بضحكه؛هاه ريت..وتوا جي دوري اني..
مجيد تنهد وقال:انت بروحك عندي دون خوتك كلهم..
مجاهد بضحكه:عارف...
🍁وطلعه من الحمام لمقبوله اللي كانت تراجي فيه..
وولى توضا..وطلع صلى قيام الليل...وناجى ربه وسأل يقويه ويعينه...وكان يقول..
"اللهم قوة الظهر لاتخفيف الحمل"...
كان يبي الأجر ويبي ربي يعينه بش يكسبه....
🍁في من مجاهد في وقتنا هدا! 🍁
🍁🍁🍁🍁
تاني يوم..
كذلك رتاج قعدت حابسة روحها في الدار..
وماطلعتش الا لما جو ضيوف مفاجئين جدا..
••:جينا بش نعطوك حقك من الورث..
رتاج تفاجئت..
:ليك حق زيك زي امي وجيت نعطيهولك...
رتاج شبحت لخوها...
مجاهد شبحلها شويه بعدين شبحلهم وقال؛في حاجه لازم تعرفوها..
هما الزوز شبحوله بإنتباه..
مجاهد؛هي توا حامل..
هما الزوز شبحولها متفاجئين...
وهي عيونها لوطا كانت محرجه..
:ع هكي مفروض نرجعوا نقسموا الورث مرة تانيه بعد الولاده..
رتاج؛بصراحه اني مانبي شي سادني الحوش والمزرعه..
:هدا حقك مش فضل عليك..واللي بيجي اختنا ولا خونا وليهم حق في ورث بوهم...
هي سكتت ..
:ع العموم اني مسافر غدوة وحنقعد معاكم العيله ع تواصل ومن هني لموعد الولاد بإذن الله يصير خير...
ناضوا الزوز..
ورتاج ناضت ومشت طلعت..
مجاهد سقدهم وولى خش داخل وهو يقول؛بارك الله فيهم طلعوا يخافوا ربي..
مجيد؛شن في..؟
مجاهد؛جايين بيعطوها حقها من الورث ولما عرفوا بحملها قالوا نراجو لين تجيب ونعطوها نصيبها هي وياه..
عيون مجيد ومقبوله لمعوا..
مقبوله:ربي يرزقها بالولد..
كلهم شبحولها..
هي ابتسمت بإرتباك..
وتحمد ربها اللي رتاج مش مقعمزة حداهم بش ماكلتهاش بقشورها..
رتاج كانت تعلق في عبايتها وتخمم في اللي بيصير وشن مازال مدرقلها في القدر...
🍀🍀🍀🍀🍀🍀🍀🍀🍀🍀🍀🍀🍀🍀🍀🍀
"الغالي عابيلك ع الراحه..دايرلك حوش بمفتاحه"..
هادوا عفاف وبنتها وخواتها وبناتهم واقفين في المستراح بين شقق خليل وجهاد ودايرين شوط دربوكه..
عفاف...
لاسلف لاباع جنانه جاب عروسه من ذراعنه...
وهما يردوا وراها ويصفقوا..
تهاني..
يامبروك على ولد امي..ان شاء الله قبل الحول يسمي..
زغردوا .
وعفاف بدت ترقص في وسطهم وهي تصفق وتغني..
ياوين ترعوني اني وولادي...صلوا ع النبي الهادي..
خواتها قعدوا يزغردوا...
ام سجى..
جيابه الولاد غزلة ان شاء الله ماتمرض بعله..
تهاني..ايييه ايييه..
وقعدوا يردوا ورا ام سجى بعدين خشت تهاني ترقص هي وامها شدت في ايديها وقعدوا ويغنوا عليهم..
هاللي ترقص هي وياها..ان شاء الله ماتقعدش بلاها..
وقعدوا يرددوا فيها لين غنت عفاف..
العقبة ليها هالحفيانه...وتجيها قفه مليانه...
ضحكت تهاني... وكلهم قعدوا يزغردوا..
🌸وفي حوش جيرانهم..
الأقارب عبوا الحوش..اول عرس بعد سنين..
كلهم كانوا في دار نسيبه اللي تعبت ببتاتها دايرين شوط...
وحده منهم غنت..
مبارك ياعقد اللولو....تستاهل الأقوال نقولوا...
وقعدوا يردوا وراها...
ماجده..
يامبروك عليها هي ان شاء الله تعيش ايام هنيه..
وقعدوا يردوا وراها..
وحده تانيه من الأقارب..
هي الزينه والزين سلاسل...ياسعد اللي بيها استاصل..
وقعدوا يردوا وراها..
مشت ماجده لنسيبه اللي كانت واقفه تسمعلهم وهي مبتسمه..
جبدتها في الوسط وبدت ترقص معاها..
كان جيتي لأمك والخالات...سلاسل فضة مطبوعات..
قعدوا كلهم يزغردوا..
ويردوا وراها...
سارة بضحكه..
اللي حازك يامبرك يومه...مايخمم كان دار عزومه..
وتطربق ماجده بالضحك وكلهم قعدوا يضحكوا..
سارة بضحكه؛استغفر الله..
نسيبه جتها وقالت:تونوريك ياشفشفه..وقعدت تنكشلها في شعرها وتضرب فيها بالكذب وسارة ميته ضحك..
وكلهم يضحكوا بالذات جنان وريحان...
🍁وفي حوش اهل سلفتها..
كانوا القريبات ملتمات ويديروا في الحلويات والبنات حداهم دايرات شوط..
وهدا عرس مرومه قالوا والعقبه اللي مازالو...
ومريم تسمع فيهم وتصفق معاهم وهي مبتسمه...
امها..
الطير الحر وين هبط...على مربوعه حط..
ابتسمت بفرح وين سمعت امها شن غنت وهما يردوا وراها..
خديجه مرت عمها..
حتى كان طلعتي برا...لنقانك حاجه تورى..
حافظت ع ابتسامته بالسيف وهي تسمع فيها وهما يردوا..
وحده من خالاتها..
يامولاي علينا كمل...ماهي بإيد اللي يتجمل...
وكلهم قعدوا يزغردوا...
🍁وبعيد عنهم...
في حوش تاني..
حفلة توديع عزوبيه...
عيني ماتنزل ع الهابط..معروفة رباية ضابط..
وعواطف تلود وتبخر فيها وفي صاحباتها وبنات العيله..
وحده من صاحبتها غنت..
جمعه وين قالوله سمي..قال جهونه عسل في فمي..
وجيهان فرحانه بطير..
شويه نوضتها مرت خوها وقعدت ترقص فيها وهي تغني..
سر امك يازينه باهي..طيب كيف شراب الشاهي..
وعواطف نفشت ريشها..
وكنتها اللقاقه كملت اللقاقه وسلفاتها قعدوا ينافسوا فيها...
🌸🌸🌸🌸
واستمرت هالأجواء الحلوة في اسبوع ماقبل العرس..
لين خش سبوع العرس...
وقاموا خيم الأفراح..
والشارع يصدح بأصواتهم وهما يغنوا...
دوري ياخيمة الأفراح...دوري ماتخلي مطراح..
وكانت ايام حلوة بكل معنى الكلمه..
ع نسيبه وخليل عاشوا اجواء الفرح كلها...
عكس مريم وجهاد ماكانتش هادي فرحة العمر اللي يتمنوها كله كان مجرد شكليات لمهمه معينه بمده محدده ولما تنتهي كل حد حيمشي في حاله..
اما جيهان فماخلت شي في خاطرها كانت فرحانه بروحها بطير..
لكن جمعه كان زي المحكوم عليه بالإعدام ويراجي امتى ينفدوا فيه الحكم...
🍁🍁🍁🍁
في صباح يوم الكسوة..
تهاني؛ع السريع نمشي ناخده منها ونجي..
عفاف:بسرعه بسرعه..
تهاني ساوت وشاحها وفتحت الباب وطلعت بتمشي لسارة تاخد منها كندرة تمشي مع قفطانها..
وصلت في الباب ورنت الجرس..
وكانت خايفه واحد من خوتها يشوفها ويعاركها..
شبحت يسار بعدين يمين..
شافت واحد جاي من بعيد..
لابس سروال جينز زيتي وتيشرت بنفس اللون بس اخف وع راسه طاقيه لونها رمادي..ومدرقات عيونه بالنظارت..
شبحت للباب وقالت؛افتحوا الهم هدا كله راقدين..
رنت الجرس من جديد..
وبدت تسمع في خطوات الشخص تقرب..
تهاني في سرها"جاي هني هدا ..غبارتي كان شافوني خوتي"..
وجت بتهرب..
"خليك علاش هاربه"
جمدت في مكانها مصدومه..
والتفتت طول..
حول نظاراته واشرلها ع الجرس:رني عليهم تاني...
تهاني زي التمثال واقفه مش مصدقه اللي تشوف..
:مطوله هلبه هكي شكلك..وقدم هو وضرب الجرس..
وانفتح الباب..
وتسمع عيطه قويه خلعتها اكثر ماهي مخلوعه...

...يتبع....