البطل المغمور "زهور القمر"

الجزء الثامن

#البطل_المغمور2  "زهور القمر"
#جمان_فريد
#الجزء_الثامن "حكم نهائي"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
يوم الخميس..
كانوا سدينه وبناتها قالبات الشقة..
مسح ..تنظيف...تلميع..
هي الشقة ديما نظيفة..بس لان كل شي فيها قديم هما حاولوا يضفولها لمسات من باب التغيير اقلها بش هما يرتاحوا نفسيا..
بعتوا ع ضيافه كامله من برا مابوش يتعبوا في شي وكلها كانت رتاج..
وشرت لأختها ماتلبس قدام الضيوف.....
يعني كانوا جاهزين من جميع النواحي...
وهذا كله ومجيد مايندري على شي..عارفينه بيخلي مقبوله تحضر وهما مايبوهاش..
ومقبوله حاسة ان في شي وفضولها بيقتلها بش تعرف بش شدت روحها ماتبيش تتشاكل هي ورتاج..
ومرت الساعات...
وجي الموعد..
دانيه بعد ماصلت العصر بدت تجهز في نفسها ورتاج دارتلها شعرها وزينتها...
ودانيه حاسة بمشاعر مختلطه بين الفرحه والتوتر...
مع الساعه السادسه والربع مساءا..
وصل راجح بأمه واخته قدام العمارة..
عواطف وهي تشوف للعمارة:يسكنوا هني قصدك؟
راجح:ايه..
عواطف تنهدت وقعدت ساكته..فتحت الباب ونزلت..
وجيهان نزلت بعدها...
وفي ايديهم بوكس شكولاته..وسفرة بكلاوة..
ومشوا خشوا للعمارة..وراجح مشي..
••عواطف:واك ياكبدي هدا شنو الله يسامحك ياولدي وخلاص..
جيهان:امي خل الموضوع يمشي ع خير مادام يبيها خلاص..
عواطف تنهدت بحسرة وسكوت..
ركبوا الزوز الدروج..وعواطف منقرفه لأبعد حد..
وجيهان زيها واحرف..
العمارة كانت نظيفه..بس هما مش متعودين يخشوا لعمارات عاديه وبسيطه...
عواطف:الدور الثاني..
جيهان:ايه..الشقه رقم 4..
وقفوا قدام الشقه..
عواطف حطت الكلينكس ع صبعها ورنت بيه الجرس..
شويه وانفتح الباب واستقبلتهم سدينه..
سدينه بإبتسامه:اهلا اهلا..تفضلوا..
خشت عواطف الأولى وهي تقول:يزيد فضلك..
وخشت بعدها جيهان وهي مبتسمه مجامله..
سكرت سدينه الباب وبدت تسلم وترحب..
وعواطف وجيهان يدوب مدوا روس صباعهم وحتى خدودهم يدوب لامست خد سدينه..
سدينه حست بس تجاهلت كعادتها..
خدت منهم اللي جابوهم وقالت:علاش متعبين ارواحكم..
عواطف:تعب شني حاجه بسيطه..وهي تقلب بعيونها في الشقة قريب تموت..
سدينه:تفضلوا تفضلوا...
برغم ان الحوش ريحته حلوة ويلمع بنظافته زي الطاسه..بس كل شي فيه قديم وبايد..
وهالشي لاحظوه جيهان وامها اللي كانت تدعي لولدها ربي يسامحه ع الإختيار..
سدينه؛تفضلوا..ودخلتهم للصاله..
مشوا الزوز وقعمزوا وهي استأذنت منهم تحط الحاجات في الكوجينه..ومشت..
عواطف:هدا شنو ياهمومي هدا شنو خيره خوك هكي..
جيهان فنصت وقالت؛اسكتي خلاص..
ع خشة رتاج..
لما شافوها انذهلوا فيها جمالها كان مبهر للعين..
ولفت نظرهم لبسها وذهبها..
هني ارتسمت الإبتسامه ع وجه عواطف..
رتاج بإبتسامه:السلام عليكم..
وطبست ع عواطف وسلمت عليها..
عواطف اعجبت بيها هلبه..اما جيهان زادت انغاضت وغارت...
سلمت عليها رتاج وكان سلامها باردع جيهان والأخيره لاحظت..
قعمزت رتاج وقالت:كيف الحال..
عواطف وجيهان:الحمد لله..
ع خشة سدينه وفي يدها سفرة العصير والشكولاته..
ناضت رتاج خدتها منها..وسدينه مشت قعمزت..
بعد مافرقت عليهم بدوا يهدرزوا وهدرزتهم كانت مقتضبه..
مافي حد متريح في القعده هادي..
ودانيه في دار مجاهد مقعمزة قبالة المكيف وهي تراجي ومتوترة...
🍁زي صاحبتها اللي كانت مقعمزه قدام التلفزيون هي عمتها وخالتها وخواتها..
حاطين ع قناه عارضة برنامج اسمه"نون النسوة"..
وكانت سارة ضيفه فيه ع الهاتف..
بس الضيفة الرئيسيه في الإستديو كانت..
نوال فتحي..
سبب إستضافتها مشاركتها في الإنتخابات البرلمانيه وهي ايضا ناشطه في المجتمع المدني ومتبنيه قضايا المرأة ورافعات شعارات المساواة بين الرجل والمرأة وغيره..
في كافي مركز الإدمان..
كانوا النزلاء ومعاهم موظفين واطباء وع راسهم هيثم يتابعوا في اللقاء..
وفاتح بس اللي متجاهله وحابس روحه في المطبخ ويفش في غله في الطبخ..
•••نوال؛الشي هدا مش ساهل يبي سنين من النضال وانا لاأبالغ ..لأن مجتمعنا ذكوري بإمتياز..يعني لما يشوفوا مراة شاده وزارة أو أي منصب سيادي تتعرض للتنمر والسخريه ومافيش من يدعمها نهائي ومع الاسف تلقي نساء زيها يهاجموا فيها..فالفكرة هني هي في الترسبات اللي عالقه في عقول الليبين تبي وقت على ماتزول وحتزول بإذن الله..
المذيعه؛ان شاء الله استاذة وفعلا زي ماقلتي المراة لازم تناضل بش توصل للمكانه اللي تستحقها...استاذة نوال..قريتي مقال أحلام موؤودة لسارة الكاتب..
نوال:ايه قريته..وصدقا..كنت فخورة بكاتبة المقال لسببين..
اولهم انها تكلمت عن موضوع خطير جدا وحساس..وتانيا لأنها في عمر صغير يعني اللي يقرا المقال يصدقه ويحس انه حقيقي اكثر ...
🍂هيثم رفع حواجبه...عجبه الكلام...
وسارة كذلك عجبها هلبه...
المذيعه؛فعلا..شي يبعث ع الفخر خصوصا ان المقال طلع حتى برا ليبيا لأن موضوعه موجود في كل الدول العربيه مش بس ليبيا...نعم....نعم....سارة الكاتب اهلا وسهلا..
"السلام عليكم"
الزوز ردوا عليها:وعليكم السلام..
المذيعه:سارة...علاش عنونتي مقالك ب "أحلام موؤده"
"بسم الله والصلاة والسلام على رسول الله"
🍁فهاللحظه طلع فاتح من المطبخ وقعد يشوف لصورة سارة ع التلفزيون بلهفه..
تشبه لهفة رفيق بش كانت ممزوجه بالغيره لان صورتها معروضه ع الشاشه..
ومش مهتم نهائي لمشاعر سجى اللي كانت واجعه خالتها عفاف...
بس تهاني مش مهتمه لحد غير صاحبتها..
🍁بس في من كان يتفرج عليه بث مباشر وهو في سيارته وع وجهه ابتسامه حلوة...مجاهد..
وهو يسمع فيها تقول..
"نشكركم ع الاستضافه والاهتمام هدا اولا ..
وتانيا العنوان...يعبر عن الحالة..عن حالة القاصر اللي تجبر ع الزواج وهي مازال تقرا في المدرسه..اكيد حيكون عندها احلام وطموحات تبي تحققها وكلها تدفن وهي حيها...ممكن من بوها او امها او أي حد متولي أمرها..وفي منهم هما اللي يدفنوا في ارواحهم واحلامهم بالحياة ويجروا ورا زواج ظنا منهم انه حيعطيهم الاستقرار والحياة المثاليه الكامله.."
ابتسمت نوال..
المذيعه؛ماشاء الله...سارة..شن رايك في العبارة اللي تقول المراة ماليها الاحوشها وراجلها وصغارها..
"حق اريد بيه باطل"
عقد نوال حواجبها بإستغراب..
المذيعه؛كيف ياسارة مايكونش كلامك هدا مناقض لمقالك..
"نهائيا...اني..تربيت في حوش قاداته ام مانبالغش لو قلت مافيش زيها...ام سخرت نفسها وحياتها لزوجها وصغارها..ودارت عيله تفتخر بيها...ممكن اسم هيثم الكاتب مش غريب عليكم...اللي دار هالأسم وكبره الى جانب اجتهاده  ومن قبلهم فضل الله..امي المرحومه اسيمه ***** اللي وفرتله جو دافي وحلو وكله هدوء ودعماته بقوة بش وصل ان يمسك منصب سيادي في البلاد..
هيثم ومبتسم مسح دموعه قبل ينزلوا..بعدين شاف لزياد لقاه منزل عيونه ودموعه تنزل حط يده ع كتفه..
زياد هز راسه وغمض عيونه بعدين فتحهم وقعد يمسح في دموعه..
وسارة مكمله تقول
"امي خلت بصمة في كل حد فينا اللي وصلني اني هني امي واهتمامها بيا وبموهبتي وتشجيعها دائم ليا..وكذلك خوتي كلهم..وراهو امي مراة عامله كانت معلمه رياضيات بس مافيش مرة قدمت شغلها علينا نهائيا....وزي مايقول بابا ربي يطول في عمره..المراة لو توصل للقمر ولو ماقدرتش تأسس اسرة ناجحه حتكون فاشله...."
نوال وجهها تغير والكلام اللي سمعاته ضايقها هلبه حبست دموعها بقوة..وزادت حست اتجاه هيثم بالكره..
المذيعه:كلام جميل ياسارة ووجهة نظر جدا صائبه...سؤال اخير سارة...وهو فضول مني اني..وضحكت..
"تفضلي.."
المذيعه:اني قريتلك القصة القصيرة اللي فازت بجائزة عربيه..
اسمها الرجل المغمور..سارة ع من كانت تحكي فيها..
رفعت نوال حاجبها وقالت:اني حسيتها تحكي ع حد جدا مقرب منها لان الاحساس فيها كان عالي جدا..
زياد قعد يشبح لبوه..
وهيثم ربع ايديه وقعد يشبح للشاشه وعيونه معبيات دموع..
"من اسمها..عن الرجل بشكل عام..سوا كان زوج اب اخ ابن..مش شخص محدد بعينه"
وتجاهلت في ردها كلام نوال..
وهيثم ونوال لاحظوا هالشي..
المذيعه:جميل ياسارة جميل..سارة عزيزتي مشكورة جدا لتواجدك معانا ونتمنى نشوفك اسم لامع في عالم الكتابة والتأليف..
"ان شاء الله..شكرا...السلام عليكم"
وسكرت سارة وزفرت بقوة..
وتجيها قبله قويه ع خدها من عمتها اللي خدتها في حضنها وهي تخبط ع ظهرها؛سلم بنت خوي سلمها..
وسارة تضحك وهي مفنصة عيونها..
ماجده بضحكه:قتلتيها..
وجنان وريحان يشبحولهم وهما يضحكوا...
🍁ومن لقاء سارة...
للقاء صاحبتها دانيه بأهل العريس..
خشت عليهم..
لما شافتها عواطف ماتت عليها صغيره وجميله جدا...
اما جيهان كان تلقى تخنقها...بس توا المهم عندها ان موضوعها مع خوها يتم..
سلمت عليهم دانيه ومشت قعمزت حدا امها..
وعواطف تفصل فيها بعيونها..
•••••••••
عواطف:والله ماعندي مانقول فيها البنية الله يبارك وعنده الحق يدير ع خاطرها اللي داره..لكن حالتهم المادية بالهون ومش مستوانا الحق..
بوراجح:مشيتك انتي وبنتك شكليات راهو الولد يبيها كيف هي بوضعها بمستواها..
عواطف تتأففت بضيق...
بوراجح؛ع شن اتفقتوا..
عواطف:خليناهم ع اساس بيفكروا ويردوا علينا...تلقاهم توا يزغرطوا ويغنوا من فرحتهم..
بوراجح شبحلها بطرف عينها وقعد ساكت..
عواطف؛ماتشبحليش هكي..خليني بالله ندوي عييت من الكمد..
هو ضحك وقال؛ادوي ادوي وربي يعين...
🍀🍀🍀🍀
وبعد ثلاثه ايام..
ردوا عليهم بالمواقفه..واتفقوا ع يوم يجوا فيه الرجاله يفضوا في دانيه...
وهاليوم كان الجمعه...
مجيد لما عرف بالموضوع فرح بيه هلبه وقعد يراجي في الجمعه بفارغ الصبر اكثر من دانيه نفسها..
وجي يوم الجمعه...
ومع العصر رفع راجح بوه وخوته وزوز من عمامه وواحد من خواله لحوش مجيد..
استقبلهم كلهم في مربوعته اللي في شقة مقبوله..
اقترحت عليه هي هالإقتراح بش تولي صاحبة فضل ع سدينه وبناويتها وتبان ديما في صورة الطيبه البريئة...
🍁وهاليوم كان ثقيل ع جمعه..
تعذب فيه هلبه..ماكانش عارف انه يحبها لدرجة كبيرة الابعد هاليوم..
قعد في البحر هداكا اليوم ماباش يروح منه...وسكر تليفونه مايبي يسمع صوت حد ولايشوف حد...
🍁🍁🍁🍁
"شبح بروحه قال نبيها...مادلوه الناس عليها.."
هادي رتاج تغني ع دانيه والجارات يردوا وراها ومقبوله واقفه في وسطهم مربعه ايديها...
سدينه..
يامولاي علينا كمل...ماهي بإيد اللي يجمل..
رتاج:اقوى عليهم ياسوسو..
ضحكت سدينه..
ومقبوله تشبح لرتاج من فوق لتحت..
ودانيه اللي واقفه معاهم كانت طول الوقت مبتسمه بخجل وقلبها يرفرف من السعاده..
 ••••••••
"العرس ان شاء الله بعد نتخرج من الثانويه"
"اها معناها بتقري عنده"
دانيه بإبتسامه فرح:اكيد هدا كان شرطي الوحيد وهو طول قال باهي..
"مبارك عليك ياقلبي تستاهلي كل خير دنو.."
دانيه:الفال ليك ياربي..
"اني توا خليني نطلع من الامتحانات قبل متوترة هلبه هلبه بعد غدوة بيبدوا وفي نفس اليوم جلسة زياد"
دانيه:ربي يفرج عليه وتسمعوا عنه شي يفرحكم..
"آمين يارب العالمين"
🍁فهالوقت..
كان زياد في حديقة المركز مقعمزة يقرا في ختمة للقرآن ليه اسبوع بادي فيها وقريب يختم..
اما فاتح فكان مستني اليوم اللي بعده بش يشوف فيه المحامي متاعه بش يوضحله شن بيصير معاه بالزبط..
🍁🍁🍁🍁
تاني يوم
الساعه التاسعه صباحا
ع الفطور
مجيد بصدمه؛ماعنداش علم
مقبوله:ايه للأسف مدرقينها وشي زي هدا غلط كبير بل حرام انه يدرق لازم يكون عند زوجها علم..
مجيد هز راسه وقال:اول حاجه بنديرها لما نطلع من هني نمشيله طول..
مقبوله:وهدا الصح...
🍁تسمعت عليهم وهما يتكلموا وكانت سدينه توصي في رتاج تقول لراجاها عن حملها وهي رافضه..ومقبوله حصلت فيها الفرصه بش تتخلص منها🍁
ومشي مجيد وين مايكون عادل متواجد في طرابلس بلغوه انه مسافر وحيروح اليوم اللي بعده..
وهو يروح مبيت النيه يجيه تاني يوم....
🍁🍁🍁🍁
بعد العصر...
خشت للمركز..وكعادتها كانت تمشي بخيلاء وكأن ربي ماخلقش في الدنيا غيرها..
استقبلتها ثريا وهي تقول:شن صار بش جيتي..
نوال؛نبي نشوف ولدي..
ثريا:ماتقدريش بدون اذن..
نوال بملل:عارفه..ماشيتله مكتبه..
ثريا:مش في مكتبه في حديقة المركز..
نوال وقفت وهي تقول:امم..
ثريا:اني حاليا مشغوله تو نقول لواحد من الموظفين يمشي معاك .
نوال:تس تس مافيش داعي تو نمشي بروحي.
ثريا؛براحتك..نستأذن توا..
نوال هزت راسها..
ثريا مشت في طريق..
ونوال في طريق تاني..
كانت يمروا من حداها مرة دكاترة ومرة ممرضات ومرة موظفين ..وكلهم يشبحولها..مستغربين في جياتها اللي كثرت...
وهي قبل ماكانت تفوت من حدا المركز مش تخشله..
🌻فهالوقت..
في الحديقه..
لجين؛بإذن الله الجلسة غدوة حتكون لصالح زياد..
هيثم بإبتسامه؛ان شاء الله..
لجين :حسيتك هالمرة متفائل هلبه..
هيثم؛الرسول كان يحب الفأل الحسن..
ابتسمت لجين وقالت:اللهم صل وسلم عليه..
هيثم؛بعد شهر تاني حنسيب المركز..
لجين؛توقعتك بعد مايكمل زياد علاجه..بس من توا وجعني كل من موجود فهالمركز حيجربوا شعور جربناه في الوزارة قبلهم..
هيثم ابتسم بعدين تنهد وقال:المسؤولية تخوف فيا هلبه يالجين..واني حاس روحي في الوقت الحالي مش قادر عليها..
لجين؛باهي شن ناوي دير بعدين..
هيثم؛في راسي مشروع ربي يسخر ونفذه..
لجين:نقدر نعرف شن هو..
هيثم هز راسه وقال؛نبي نفتح مجمع عيادات في منطقه مافيهاش خدمات طبيه..
لجين بإبتسامه:حلو..
هيثم؛بس مازال ماخططلاش مزبوط..بعد ماتخلص مشكلة زياد ع خير نلهى بيه..
لجين:إن شاء الله..وفي حالة تبي مني اي مساعده اني في الخدمه..
هيثم؛مشكورة جدا لجين..
ابتسمت وهي تشوفله وهو طول الوقت كانوا عيونه القدام يمرر في نظره ع الحديقه وبس..
فهالوقت خشت نوال للحديقه وشافتهم..
مررت نظرها ع لجين من فوق لتحت بعدين شبحتله هو..
ركزت كيف هي تكلم فيه وتشبحله وهو مايشبحش جيهتها نهائي..
خدت نفس وقالت؛السلام عليكم..
هما الزوز التفتوا وشبحوله..
هيثم رفع حواجبه وقال؛وعليكم السلام..
نوال؛نبي ناخد من وقتك شويه لوسمحت..
لجين جتها وهي تقول؛استاذة نوال...ليا الشرف اللي شفتك اليوم..خاشة في نشاط لدعم المركز..؟
هيثم قعد يشبح لنوال ويراجي في اجابتها..
نوال شبحتلها بطرف عينها بعدين شبحت للجين وقالت؛حاجه زي هكي..
ابتسم تهكما وغير عيونه عنها..
لجين بإبتسامة؛توقعت...ع العموم ان شاء الله في الانتخابات صوتي حيكون ليك..
ابتسمت نوال مجامله وقالت:ان شاء نكون عند حسن الظن.
لجين:ان شاء الله...التفتت لهيثم وقالت..نستأذن دكتور وربي يطمنا كلنا غدوة..
هيثم؛إن شاء الله..
لجين؛السلام عليكم..
هيثم ونوال:وعليكم السلام..
مشت لجين طلعت من الحديقه..
ونوال قدمت لهيثم ووقف قدامه..
نوال:نبي نشوف فاتح..
هيثم:اسف ماتقدريش..
نوال؛تبي تمنعني نشوف ولدي..
هيثم؛هو مش أني..
نوال؛بيني وبينه ماتدخلش..
هيثم:في الحوش مش هني..هني انتي تمشي بالقوانين وبس في حالة المريض رفض يشوف حد جي يزوره مانجبروشي ع العكس..ولانحطوه في الأمر الواقع..
نوال؛نبيه يعرف ان امه واقفه معاه..
هيثم؛بريله المحكمه غدوة إن شاء الله..
قعدت ساكته وهي تشوفله بحده وعيونها تعبوا دموع..
ابتسم تهكما وقال؛طبعا مش حتمشي حتنضري كان مشيتي البرلمان الأهم...
نوال:ماتكلمنيش بالأسلوب هدا .
هيثم بحده؛وكيف تبيني نكلم ام ناكرة ولدها ماعندهاش احساس بالمسؤوليه كل همها نفسها وبس..
نوال؛سادك تنظير ومثاليات فارغه..انت مش خير بكل..
هيثم قعد ساكت .
نوال؛اني اكثر وحده تفهم القصة اللي كتبتها بنتك شن كانت تقصد بيها حتى في كلامها ع امها كان واضح هالشي...واضح  ان لأمهم المساحه الاكبر في حياتهم..
هيثم؛وماننكرش..اني كنت اب جاف قاسي جافي وبعيد عنهم بس لما استاقظت لنفسي عرفت اخطائي وقعد نصلح فيها..سيبت كل شي ع خاطرهم ومانكرتش ولدي ولاجيت ضده برغم كل اللي صار..الفرق كبير كبير هلبه بيني وبينك يااستاذه نوال..
نوال ودموعها ينزلوا:ماليكش حق تحكم ع حد ماتعرفش ظروفه شن شاف وشن قاعد يشوف بشن مر في حياته..
هيثم؛مافيش مبرر والله مافي...لأن شفت نموذج تاني عاش نفس حالتك مراة مستواها التعليمي ماتعداش الإعداديه تزوجت في عمر صغير وعانت معاناه ربي عالم بيها...راجلها تاجر مخدرات وولادها مشوا في طريقه قعدت عمر وهي تحارب بش تحافظ ع بنتها وتحاول في راجلها وولادها بش يرجعوا من الطريق اللي مشوا فيه..والله سبحانه وتعالي كفائها ع صبرها وردلها ولادها ..برغم طلاقها من بوهم بس مازالت تكافح لعند هاللحظه بش يقعدوا مع بعض تحت جناحها هي..انتي المتعلمه صاحبة المكانة الاجتماعيه الرفيعه ماتقدريش ديري ربع اللي داراته..
نوال بنبرة باكيه؛انت ماتعرف شي عن اللي مريت بيه  وعانيته ماتعرف شي..قاعد تجلد فيا وخلاص...مافي حد يعرف اني شن عانيت وشن حسيت غيري مافي حد يعرف..المراة اللي تحكي عنها ماكانتش زيي عندي طموح واحلام تبي تحققها..متأكده انها خشت ع زواج والحياة الزوجيه برغبتها وهدا واضح ماانجبرتش..مانجبرتش تعيش مع راجل اكبر منها بعشرين سنه..كان ابعد الناس عنها..تخيل روحك تعيش مع وحده مافيش بينك وبينها اي شي مشترك..حياة بارده مافيهاش الوان غير الأبيض والأسود بس..اني اندفنت واني حيه اني من داخل عكس اللي تشوف فيه من برا...مدمرة منتهيه...
وغطت وجهها بشنطتها وانهارت بالبكي..
وهو ياللي كره نفسه بسبب اسلوب السيء معاها معاش عرف كيف يتصرف ارتبك..
هي نزلت الشنطه والتفتت شافت كرسي..
مشتله قعمزت عليه..وطلعت كلينكس وقعدت تمسح في دموعها وانفها..
بعدين طلعت المرايه متاعها وقعدت تشوف في شكلها..
هو كان يشوفلها بأسف..فهم ان اللي صار معاها خلاها تعاني نفسيا هلبه...
هي بعدين وقفت وخدت نفس عميق..بعدين مشت للسله لوحت الكلينكس..شدت شنطتها في يدها كويس وجت ماشيه..
"أسف".
هي ولا عبراته مشت طول طلعت من الحديقه..
هو بعد مامشت مسح بإيديه ع وجهه..ووزفر بعدين قال:الله المستعان..
ولف وخش داخل...
🍁🍁🍁🍁🍁
السابع عشر من يوليو..
في الجنان...نسيبه مقعمزة تتكلم بالتليفون..
نسيبه:قلبي يدق بقوة من الخوف..
"اطمني نواستي بإذن الله حيكون الحكم لصالح زياد ومش هكي بس حيعطوه اذن يحضر العرس"
نسيبه ابتسمت وهي تقول برجاء:يارب ياخليل يارب..
خليل وهو يشوف في العمال كيف يركبوا في المطبخ في الشقه متاعه:يارب..
رن تليفونه البيلا..
طلعه من جيبه وقال:معليشي حبيبتي جاني تليفون مهم..
نسيبه:ولايهمك تكمل كلمني..
خليل:تمام...سلام..
نسيبه؛وعليكم السلام..
سكرت..وهو رد ع تليفونه التاني..
خليل:ايوه..
"تأكدنا من المعلومات اللي عطتيهالنا...لكن على هكي العمليه حتكون بعد تلاته ايام من فرحك خليل"
ابتسم خليل بحزن وعيونه معيبات دموع وهو يقول:عارف...
"مستعد لكل شي"
خليل تنهد وقال:اكيد..والله المستعان..
"طلعت راجل حقاني ياخليل "
ضحك خليل وحك مقدمة انفه بعدين هز راسه بإيجاب وقال:بارك الله فيك..تصدق متمنيك تحضر..
ضحك ورد عليه يقول
"والله حتى اني نتمنى...ع كل حال مش حنقدر نحضر عرس اختي في نفس الأسبوع"
خليل:اها...مبارك..ربي يكمل ع خير.
"اجمعين ان شاء الله"
🍁🍁🍁🍁🍁
في مدرسة المجد الثانويه للبنات...
امتحانات اخر السنه..
في امتحان الفيزياء..
كان واقف يمرر في نظره ع الطالبات وهو يقول:اسئله بسيطه وساهله ماتاخدش ساعه..
سارة شبحتله بعدين نزلت راسها لورقتها..
وعيونها يشوفوا لمقعد رهف ومكانها فيه اللي كان فاضي..
نزلت من عينها دمعه مسحتها طول ورجعت شافت لورقتها
🍁🍁🍁🍁
"الله المستعان ياسدينه معقوله اللحم كله تميتوه!!؟"
سدينه؛هدا مابد يامقبوله عيلة رانا..
مقبوله؛تعرفي الكيلو بقداش انتي تعرفي ولامش عارفه ولاغير تبزعقي هكي وخلاص..
"شن دخل فيتك انتي..فية امك شن دخلها"
مقبوله؛الله المستعان..
رتاج:الله المستعان عليك وعلى اشكالك..
سدينه؛رتاج!
رتاج؛بلا رتاج بلا مرواج..المخلوقه هادي تبي يندارلها حد..لحم شاريه خوي..خوي انتي شن دخلك فيه ناكلوه ولانلوحوه للكلاب والقطاطيس..
مقبوله برفعة حاجب:توا بس عرفت علاش راجل لزك في الليل مراة قليل ادب ورباية زيك من يخليها عنده..
رتاج؛اول شي لازم تعرفي ان هداكا حوشي
حوشي بإسمي والعقد متاعه عندي ماننلزش من حوشي ياماما..وايه قليله ادب وربايه مع عديمين الأدب والربايه وتوا تسقدي..اركبي لشقتك تحركي..
مقبوله شبحت لسدينه وقالت؛عليك ربايه..
وحطت خمارها ع وجهها وجت بتمشي شدتها رتاج من مرفقها وقالت؛تعالي هني شن قلتي لأمي توا ياعزوز النار!
سدينه بصوت عالي؛رتاج...
طلقتها طول..
مقبوله بنبرة تهديد؛غير يجي بوك لما نخليه يقول ياشر اشتر..
ومشت بسرعه لباب الشقه...ووراها رتاج ووراهم سدينه اللي كانت ترعش وخايفه..
فتحت مقبوله الباب وطلعت وركبت لشقتها.
ورتاج تقول:شن بديري قولي شن بديري..
وجيرانهم اللي قدامهم كانوا فاتحين الباب ويتفرجوا..
رتاج طلعت وركبت درجه وقعدت واقفه وهي تقول:كانك مراة تنزلي..انزلي وريني شن بديري
سدينه بخوف:ت تعالي جاي يابنت ياسر من العار الناس تتفرج..
رتاج:مانيش متحركه لين تنزل الحقيره ونوريها قدرها...
سدينه:ياحليلي اني ياحليلي راك حامل يابنت كان تصير فيك حاجه..
رتاج؛ان شاء الله تصير ان شاء الله..
🍁🍁🍁🍁
في الطريق..
عادل:اني والله مانبي ولاناويه لكن بنت مسكرة راسها..
مجيد:نكسرلهوها راسها هدا غصب عنها تولي..
عادل ؛لا رد بالك يامجيد تمد يدك عليها والله مايصير خير بعدين..اني المهم عندي ولدك يطلع منها..
مجيد:ماتخممش فيه تو نتفاهم اني وياه....
عادل هز راسه وقعد ساكت..
ومجيد قعد يشبحله وهو مبتسم براحه..
بعدين شبح القدام...
فجأة طلعت عليهم سيارة صاحبها مايسوقش بوعيه ...
عادل وهو مفجوع؛خيره هدا!.
مجيد بهلع؛عادل..ياعادل...لااا لااا.
وعادل حاول يجتازه...لكن مع الأسف...
..قضاء الله...حل وصار....ولامفر....
🍁🍁🍁🍁
في نفس الوقت...
الساعه الحادية عشر صباحا..
في الطريق...
احسان يسوق في السيارة وهيثم راكب جنبه..
شاد المصحف ويقرا في القرآن...
الزوز متوجهين بطريقهم للمحكمه..
احسان:دكتور وصلنا..
هيثم؛سبحانك اللهم وبحمدك اشهد ان لاإله الا انت استغفرك واتوب اليك..
سكر المصحف وحطه في درج السيارة..
احسان:اهم شي توا تحافظ ع هدوئك دكتور..الصحافه والتلفزيون قدام المحكمه ممكن يستفزوك بالأسئله انت تجاهلهم تماما لين نخشوا داخل..
هيثم:تمام تمام..
ورجع يهمس بذكر..
《لاحول ولاقوة الا بالله》
وبعد طول مسافه...
وصلوا للمحكمه...
نزلوا من السيارة..وبدت الصحافه تصور والتلفزيون...
والصحفيين هجموا عليهم..
بس هما رفضوا يقولوا أي شي..
بمساعدة رجال الأمن خشوا داخل
🍁وهو خاش للمحكمه برفقه صديقه ومحامي ولده احسان...
عيونهم جت في عيون الخصوم اللي كانوا يشبحولهم بنظرات تحدي مستفزة..
جلال...ومحاميه..
احسان:ياكان تندروا ع اللي يراجي فيكم..
ابتسم هيثم وشبحله..بعدين رجع شاف لجلال وقال...
"إن الله يدافع عن الذين ءامنوا ان الله لايحب كل خوان كفور"
•••محامي جلال؛معاش تشبحلهم..
جلال شبحله وقال؛مش مرتاح من لما حكيتلي ع المحامي متاعه واني قلبي قابضني..
محامي:قتلك مافي شي يخوف الفضيحة اللي صارت ماتغير شي في مجرى في القضيه..
زفر جلال ورجع شاف جيهتهم...
:عيونك هني فكنا من غبائك متاع أخر لحظه..
شبحله ع جنب بعدين شبح القدام وقعد ساكت...
شويه وطلع الآذن ينادي..
"زياد هيثم عبدالحكيم الكاتب...جلال مختار الوافي"
مشوا كلهم خشوا لقاعه المحاكمه...
قعمزوا كلهم في أماكنهم...
ع خشة النائب العام..قعمز في مكانه..
ولحظات ودخلوا زياد..
وبوه بعيونه معاه..
زياد شبحله..
هيثم غمض عيونه وفتحهم بإبتسامه..
زياد ابتسم وحرك راسه بإيجاب..
ع خشة القاضي ومستشاريه..وقفولهم...
قعمزوا في اماكنهم...وقعمزوا باقي الحضور..
▪▪▪▪▪
◇لما شفت القاضي وقتها غمضت عيوني لحظات ورفعت عيون قلبي لفوق...للقاهر فوق عباده وهو احكم الحاكمين املي فيه هو بس هالمرة وفعلا حسيت بهالشي شعوري توا ماكانش يشبه شعوري في أول جلسة...
كنت متفائل هلبه
▪▪▪▪▪
وبدت الجلسه بكلام من القاضي...
سمع فيه لمحامي جلال يتكلم الأول وكانت هي هي نفس المرافعه مافي شي جديد..
من بعده جي دور احسان..
••احسان؛سيدي القاضي الفيصل في هذه القضية هو شهادة البنت اللي تعرضت للتحرش من طرف والطرف التاني دافع..
والبنت موجوده سيدي القاضي وحاضرة للشهاده..
زياد شبح لإحسان وهو متفاجئ...
وجلال ومحاميه انصدموا بقوة..
احسان؛رنيم محمود رزق...
القاضي:نادوا ع الشاهده رنيم محمود رزق ...
نادوا عليها..
انفتح الباب وخشت رنيم..
وكلهم يشبحولها..
كانت لابسه عباية سودا ووشاح لونه موقف فاتح..وملامح وجهها باهته..
احسان اشرلها ع المكان اللي توقف فيه..
هي وقفت..شبحت يمينها شافت لجلال بحقد وازدراء بعدين شبحت للقاضي..
القاضي:انتي رنيم محمود رزق...
رنيم:ايه..
القاضي:إثبات الشخصيه..
قدم احسان عطاهم الهويه..
تفحصوها عن طريق البحث في السجلات ع النت والتأكد منها...
ردوله البطاقه وولى لمكانه..
القاضي:قولي وراي اقسم بالله العظيم ان اقول الحق..
رنيم؛أقسم بالله العظيم ان اقول الحق..
القاضي؛شن صار بالزبط يارنيم..
خدت نفس وبدت تحكي:جلال الوافي كان يعطي فيا في مادة درت فيها امتحان النتيجه متاعي فيه كانت ظالمه..درت طعن..
وهالطعن قعد مشحورني فيه قصدا..كنت كل مانمشيله نسمع منه كلام ونسكت كله بش يقبل الطعن وتتصلح النتيجه..
وفي مرة..طلب مني نجيه للمكتب بعد تردد مشيت..ونزلوا دموعها..طلب مني نجي معاه للفيرندا بعد مااني رفضت يتسكر علينا باب مكتبه..
قالي بش تطمني تعالي نراجعوا ورقتك في مكان مفتوح..
ومشيت معاه..وطلعنا للفيرندا..اتفاجئت لما شفت كيف المكان فاضي مافيه حد صدقا اول مرة نشوفه بعد قريب 5سنين..وغادي..رشفت وقالت..وغادي بدي يتمادى معاي..
لما جيت بنهرب منه شدني..سكتت شويه وهي تبكي بصمت..
وجعت هيثم..وزياد كره روحه لأن البنت انحطت فهالموقف بسببه..
هي كملت تقول...شدني وكان يبي يعتدي عليا واني قعدت نقاوم فيه لين ربي بعتلي زياد..وشبحتله..
هو نزل عيونه لوطا حياءا..
شبحت للقاضي وقالت؛فكني منه وقالي بري ماكانش يبي يخلي حد يشوفني..واني طول هربت بعدها..
حطت يدها ع فمها وهي تبكي..
القاضي هز راسه وقال؛تقدري تتفضلي..
هي لفت بتمشي وقفت لما سمعت زياد قال.
"آسف"
هي شبحتله وقالت؛اني اللي اسفه..ومشت بسرعه طلعت من القاعه..
نط جلال وهو يقول؛كذابه كذابه مانعرفهاش ولاعمري ريتها..
دق القاضي بالمطرقه متاعه وقال:تسكت ولاتطلع برا..
محاميه شده وقعمزه وهو قعد يشبح لإحسان وهيثم بحقد..
وقف محامي جلال وقال؛مافي شي يثبت ان هي البنت نفسها مانعرفوش اذا كانت وحده مستأجرة او شي من هدا القبيل..
احسان؛معلومات البنت موجوده في الكليه تقدروا تتأكدوا من انها طالبه غادي ومن قصة الطعن ووجود جلال في الكليه في هديكا الساعه وغير هكي اني حسبت حساب موقف زي هدا وجبت شاهد تاني عضو هيئة تدريس يشهم ع افعال جلال الوافي اللا أخلاقيه..الأستاذ محي الدين التومي.
جلال غمض عيونه بشده..
ومحاميه قعد مصدوم وعاجز تماما..
نادى القاضي ع محي اللي شهد ضد جلال وتكلم عن انحرافه في الكليه وكيف انطرد منها بسببه..
وكمل احسان مرافعته وتكلم عن الفيديو اللي طلع واستخدمه كدليل يثبت صحة كلام رنيم ومحي الدين..
قال النائب العام كلامه اللي تكلم فيه بحياديه تامه.ومن بعده
القاضي قعد ينتناقش هو ومستشاريه وبعدين هز راسه وشبح للملف قدامه وقال:بعد الاستماع الى شهاده الشهود ومرافعة دفاع الطرفين..
حكمت المحكمه بإعتقال جلال مختار الوافي ع خلفية حوادث التحرش والإعتداء اللي قام بها في الحرم الجامعي..ومحاولة تضليله للعداله..
وحكمت ع زياد هيثم الكاتب بالسجن لمدة ثلاث سنوات ع خلفية حادثة الإعتداء بالضرب...رفعت الجلسه...
وناض القاضي هو مستشاريه طلعوا.
وهيثم يشوف لزياد كيف يسجد لله شكر..
من مؤبد لثلات سنوات رحمه عظيمه واهم شي عنده انه تبرأ من قضية تمس شرفة وتربيته...
ناض وقف بيطلع شبح لبوه..
هيثم شافله بإبتسامه وغمز..
وهو ضحك..بعدين طلعوه العناصر برا...
وجو تانيين بش يعتقلوا الوافي اللي قعد يعيط في القاعه...
ومحاميه هرب وخلاه..
••بعد ماطلعوا من القاعه..
هيثم خدي نفس عميق وقال:الحمد لله...قعدت بس حكاية الإذن بش يحضر يوم من عرس عمته..
احسان:نوعدك اني نحاول جهدي..
هيثم هز راسه وقال:بارك الله فيك..
احسان؛يبارك الله في الجميع..استعد توا لازم تعطي تصريح..
تنهد هيثم وقال؛فعلا...لازم...
وطلعوا برا قاعة المحكمة....

...يتبع....