البطل المغمور "زهور القمر"

الجزء الرابع عشر2

#البطل_المغمور2  "زهور القمر"
#جمان_فريد
#الجزء_الرابع_عشر "دقات قلب2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
مقعمزة في حديقة الفيلا متاعها.
كانت متكيه بمرفقها ع الكرسي وحاطه يدها تحت خدها وسرحانه...
وحداها بمسافه مدبرة المنزل تسقي في الورد ومرة مرة تشبحلها..
ع طلعة بنتها مع بناتها الزوز..
نرجس:بروا العبوا...
خدوا البنات العابهم ومشوا في تركينه وبدوا يلعبوا..
وهي كانت تشوف لأمها كيف مقعمزة وسرحانه..
مشت للدادة متاعهم ووقفت عليها وقالت:ملاحظه التغيير..
نوارة؛كتير قوي..دي بقت هاديه ومابتخرجش من البيت خالص..
نرجس:نحس في اللي صار مع هاتف السبب..
نوارة:لافي سبب تاني وماتزعليش مني..طلاقها من ابوكي..
نرجس تنهدت وقالت:صح وكأنها كانت مكبله وانفك قيدها..
نوارة قعدت تشبح لنوال كيف ارتسمت ع وجهها ابتسامه خفيفه وهي سارحه..
رفعت حواجبها ونزلتهم وهي مبتسمه بعدين رجعت شافت للورد..
ونرجس تنهدت..ولفت لبناتها ومشت تشاركهم اللعب..
🍁🍁🍁🍁
طلع من الورشة..
نزل السيرانتي متاعها ومشي بطريقه للحوش وهو مضايق..
وين وصل غادي..
ركب لشقته طول دوش وبعدين نزل لوطا..
فتح الباب وخش..
كان الحوش هادي تماما...
وصل في الصاله لقي امه واخته فيها راقدات..
اما مرته كانت متكيه تتفرج ع التلفزيون..
لما شافاته قالت:جيت..
هو لف ومشي ..
وهي ناضت لحقاته..
جهاد؛في غدي؟
مريم؛اكيد..
وخشوا للكوجينه هما الزوز..
جهاد؛الحليب فوق ..
مريم؛باهي سلمك جياب..
ابتسم وقعد ساكت..
وهي حطتله الغدي وجت بتطلع..
جهاد؛خليك..
هي شبحتله شويه بعدين قعمزت قدامه..
هو تنهد وقال:من 14يوم من لما شدوا خليل لليوم معاش جانا زبون واحد..
مريم حست بالضيق...
جهاد حط ع جبهته ونزلها بعدين قال:مش عارف كيف ندير..الوضع مولي صعب..
مريم بضيق:لاحول ولاقوة الا بالله..
جهاد بضيق شديد؛تو امي تزيد تتنكد خايف عليها تصير فيها حاجه...الله يسامحك ياخليل قلبت حياتنا قلب..
مريم حطت يدها ع يده وشدتها بقوة وهي تقول؛ربي يفرجها ان شاء الله انت اهدى بس بش تعرف تفكر..
جهاد شد يدها وقال بشي من الانفعال؛مش قادر نهدا مش قادر نحس في روحي مسؤول ع الكل عني ولو كنت اصغر من رفيق لكن رفيق من يوم بارد واتكالي مش مدور شي..شوفي اليوم ماجاش بكل للورشه برغم اني اتفقت معاه نتلاقوا غادي بش نلقوا حل...
مريم قعدت تشبحله وهي ساكته مش عارفه شن تقوله...
هو تنهد بضيق...وجبد يده منها وبدي يتغدى بعصبيه..
ومريم مضايقه ع خاطره ع الآخر...
وحدا باب الكوجينه...
عفاف..كانت واقفه وسمعت كل شي قاله ولدها...
قلبها زاد وجعها...والدنيا ظلمت في عيونها اكثر..
مشت لدارها خشتلها وسكرت عليها..
قعمزت ع سريرها..ومسحت وجهها بإيديها بعدين وخرت بيهم شعرها للخلف وقالت بنبرة مخنوقه؛يارب فرج ياربي..حطت يدها ع رقبتها وقالت..انخنقت...
وبدت تبكي بصمت...وبحرقه..
🍁🍁🍁🍁
مطعم السجن..
عجيلي:الله الله الله الله...تي هدا شنو هدا...تي من دايره الغدي..
زياد ضحك..
عقيل؛ثقته بنفسه كانت في محلها..
واحد من السجناء:قداش لينا ع الماكله السمحه..
الضابط اللي واقف في المطعم حراسه:ذوقونا ياهوو..
فاتح من ورا البوفيه:لالالا..انتم ياحكومه ماتاكلوش بلاش..
شبحوا للضابط وهما مبتسمين بمكر..
فاتح؛حابسينا واقفين علي رووسنا وين مانمشوا مش مخليينا نتنفسوا وتبوا تشاركونا في ماكلتنا بلاش..
:من الاخير..
فاتح؛من الاخير تبي تاكل ادفع..
خليل وهو ياكل كان مبتسم طول الوقت بدون مايشبح لطرفي النقاش..
وبوه يشبحله وبس...
؛تمام..معناها نخلوك طيبلنا حني وبالفلوس وتبدا هادي خدمتك في الحبس شن رايك..
توجهت الأنظار لفاتح..
وخليل قاعد ع حاله..
فاتح؛اني سجلت في الخدمة اللي بنخدمها هني مع الشباب ماعين الفخار..
:والله ماتجيبلك حاجه زي لو خدمت شيف عندنا..
فاتح:اخر همي الفلوس..
مراد:اللي تشبح فيه هدا يجيبلكم احسن طباخ هني يطيبلكم..
اسعد الكبير وهو ياكل قعد يشبح لفات بتضييقه عيون بعدين قال؛ولد مني...
فاتح؛ولد عبد من عباد الله...خلاصة الدوة اللي يبي ياكل هني من جماعة الشرطه يدفع...
:وجه فقر شكلك...
ضحكوا...
اسعد الكبير؛ياشيف...هيي حبيبي..
شبحله فاتح..
وكلهم وجهوا انظارهم لفتح بقلق..
ماعدا خالد وعقيل اللي كانوا يشبحوا للكبير..
وخليل ع حاله...
اسعد بإبتسامه صفرا؛حبيبي سألتك رد عليا بابا ولد مني انت؟
فاتح رفع حواجبه وقال:مانبيش نقول..
ناضوا زوز من جماعة الكبير..
واحد من الضباط؛قعمز لوطا انت وياه..
اسعد اشر بيده لجماعته وقال؛قعمزوا...
قعمزوا طول..
واسعد هز راسه بعدين؛ديما عامر ان شاء الله..
وناض وفي يده قايم الصفره متاعه...
وجماعته وراه كالعاده...
مشوا ناحية فاتح اللي كان يشبحلهم...
اسعد خش داخل وقال؛الفاصوليا مش عادي فيها بنه عمري ماذقت زيها..هات ترا..
رفع فاتح حاجبه ومدله الساقم..
وهو خداه وبدي يصب في الصونيه:تعرف اني مخروم فاصوليا نحب ناكلها مع خبزة المداس اكيد تعرفها..تو نقوللهم هني يجيبوا منها...ضيق عيونه وحط الساقم وقال..هدا شني..
وقرب الصونيه..
وفاتح يشبحله برفعة حاجب...
اسعد بقرف؛اهو هدا اللي مانحباش الخمر..
فاتح عقد حواجبه وقال؛خمر ؟؟
والعيون عليهم...
وخليل هدا وين قام عيونه وقعد مركز معاهم..
اسعد؛شعرة...شوف بعينك...وقربله الصونيه..
وفاتح نزل راسه شويه بيركز فيها..
ماحسش الا ووجهه كله غارق في طبيخة الفاصوليا...
زياد فتح عيونه ع وسعهم وناض وقف...
اسعد الكبير وهو عاقد حواجبه ويشبح للصونيه؛شفتها؟
وفاتح اللي صدماته ع الحركه من الغضب انفاسه كانت متسارعه من العصبيه..
اسعد حطها وقال:رد بالك مرة تانيه النظافه اهم حاجه..
لف ومشي وهو يقول:اهم حاجه...
فاتح خدي الساقم وجي بيحدفه بيه..
واحد من جماعة الكبير شده بيه وحطه ع الحيط..
وزياد مشاله يجري وهو يقول؛حول ياكلب..
شده واحد تاني من جماعة الكبير وهو يقول:وين ماشي بابا..
ضربه زياد ع جبهته براسه...وفكه شده التاني وضربه بوكس..
خليل التفت وشبح للحرس لقاهم يتفرجوا في صمت..
العجيلي ناضلهم وقال:خلاص انت وياه اطلقوهم وبروا الحقوا سيدكم ..
طلقوا فاتح وزياد ومشوا وهما مازال يشبحولهم ويتوعدوا..
وخليل قعد مركز ع العجيلي وهو مستغرب..
فاتح مشي يغسل في وجهه..
اما زياد وهو يمسح في فمه من الدم قال للحراسات؛وانتم تتفرجوا عادي!!
:مافي شي يستدعي التدخل..
زياد؛وشن اللي يستدعي التدخل لما نقتلوا بعضنا!؟
:حط لسانك في فمك وارجع لمكانك..
زياد؛تعرف امتى تعلي صوتك..
خالد؛زياد..
زياد؛شن ماتشوفش ياعمي خالد صار اللي صار قدامهم وهما يتفرجوا عادي علاش قاعدين كان ماعندكم شي ديروه..
:تبي تبات في الانفرادي من اول سبوع..
فاتح وهو يسمح في وجهه؛خلاص زياد اسكت..
زياد؛لا مش ساكت تحساب روحك بتخوفني....
"زياد ضم فمك واسمع الكلام"
سكت زياد وهو يشبح لخليل..
خليل بحده:ولي قعمز في مكانك..
زياد مصمص شواربه..بعدين هز راسه وولى قعمز في مكانه..
خليل بعد ماكان معاه بعيونه رجع ياكل مرة تانيه..
وكلهم ولوا ياكلوا عادي....
وفاتح قعد يضم في المكان هو واللي معاه وكان يغلي غلي..
مراد؛هدي زياد هدي مايمشيش حالك هني هكي..
خالد:زياد..
التفتله زياد..
خالد؛فوت مدة الحكم متاعك وانت بعيد عن المشاكل الحبس مش مكانك ولدي..فاهمني..
زياد غمض عيونه وهز راسه بعدين فتحهم والتفت القدام..
العجيلي التفت شبح للشيخ عقيل..لقاه ياكل وهو يحرك في راسه يمين ويسار اسفا...
🍁🍁🍁🍁
"اني معتمد عليه وواثق فيه قد المهمه اللي وكلناه بيها"
راجح:بس اهله قاعدين يمروا بوضع صعب..
رضوان بوكراع؛كل شي ليه ثمن ياراجح..وبعدين هما متعودين عاشوا في ظروف اصعب من هكي وتخطوها المهم توا..داخل لازم يكون في ضغط ع خليل والمعامله معاه في السجن تكون قاسيه بزياده..
راجح؛معاليك اني فاهم عليك..لكن في النهاية خليل بني آدم يعني حجم الضغط عليه لو زاد مانعرفوش شن يصير معاه..
بوكراع بإبتسامه؛تس..الراجل اللي قعمزت معاه هني قبل وحكيت معاه مرن هلبه ويتحمل....اللي يهمني انه يكون ملفت للإنتباه وبس..
راجح هز راسه وقال؛تمام..باهي هو توا نجح في امتحان الشهاده التانويه ويبي يقدم ع كلية الطب..
بوكراع؛ايه عارف..خلي كل شي يمشي طبيعي..ويخش لأمتحان المفاضله عادي جدا..قتلك نبي كل شي يمشي طبيعي بش يكون ملفت للإنتباه..
راجح ابتسم وقال؛حاضر معاليك..
بوكراع؛شن وضع الكاتب؟
راجح؛ولى احسن..بس الباين علاقته بحوش خالد انقطعت تماما حتى مع اخته...
بوكراع هز راسه وقعد يشرب في القهوة وهو يفكر...
🍁🍁🍁🍁
"وينها عمتي!؟"
مريم:خشت لدارها شكلها..
نسيبه قعمزت هي وبنات خوها وقالت:بالله تهاني حطيلهم رسوم..
ابتسمت تهاني وغيرت القناة..
مريم شبحت لنسيبه لاحظت ع وجهها ملامح سعاده واضحه..
ماقدرتش تسألها عن السبب..بس عقلها كان مشغول بالحال اللي وصلوله...
وفكرت لو تحكيلها عنه ولاتقعد ساكته...
تهاني:عمتي صالحه معاش تبي تجي شكلها...
نسيبه؛حتى اني لاحظت انها معاش تتصل ولاتسأل..
تهاني:المواقف هادي تغربل يانوسه...
مريم؛احسن...الوضع توا بروحه مش ناقص..
نسيبه وتهاني شبحولها بتساؤل..
تنهدت مريم وقالت:الورشه واقفه معاش فيها خدمه بكل..
تهاني قلبها اطبق...
ونسيبه حست بضيق شديد..
مريم بحزن؛ كان تشوفوا جهاد كيف يحكي عنها قريب يبكي قلبي تقطع عليه..
نسيبه مسحت وجهها بإيديها وقالت؛لاحول ولاقوة الابالله..
وتهاني دموعها بدوا ينزلوا...
🍁🍁🍁🍁
"وين بيتزوج؟"
مقبوله؛شن وين يتزوج..الشقه اللي فوق فاضيه ولدك اولى بيها..
مجيد قعد ساكت وهو يفكر..
مقبوله؛صدقني مش حيلقى خير من بنت اختي جمال وحسب ونسب ودين اللهم بارك وسنها مناسب...هاه شن قلت..
مجيد؛باهي تو نفتح معاه الموضوع.. ربي يجيب اللي فيه الخير..
مقبوله بإبتسامه؛آمين...
🍁وبرا دارهم...
في دار البنات...
رتاج ودانيه بدهشه؛الله!
مجاهد بضحكه؛والله..
رتاج بضحكه؛ياوخيتي سلمه وأخير بنفرحوا
بيه...
مجاهد.يضحك وهو محرج..
دانيه بإبتسامه؛وهكي الرد حيوصل معاي اني..
مجاهد؛طبعا..
رتاج؛والله ماعندها ماترد كان.بإيه تبيك كيف ماانت تبيها..
فنص في رتاج وقال؛تحشمي ع وجهك..
رتاج نزلت عيونها وشدت ضحكتها..
هو ناض وقال؛هي نوضي دانيه وتي روحك..
دانيه بضحكه؛ثواني..
هو مشي وطلع وسكر الباب..
وهما يضحكوا...
🍁🍁🍁
جهزت دانيه نفسها وطلعت مع خوتها الزوز..
وصلها مجاهد للجامع....بعدين وصل رشيد لعيادة ثريا اللي ليه اسبوعين يمشيلها..
قاعد عندها ساعه وبعد ماتمت الجلسه..
مجاهد خلاه يمشي يركب السيارة...وقعد هو يسأل في الدكتورة عن حالته..
ثريا؛اطمن خوك وضعه كويس وهو متشافي تماما..والفضل من بعد الله يرجع لوجودك..
مجاهد ابتسم ونزل عيونه لمفاتيحه اللي كان شادهم..
ثريا:مجاهد خوك متعلق بيك هلبه..
رفع عيونه وشافلها..
ثريا؛ويشوف قدوة..كلامه كله عنك وقال كلمه اليوم لفتت انتباهي هلبه قال مرات نحس في مجاهد بوي...
عيون مجاهد تعبوا دموع..
ثريا؛قال نبي نولي زيه لما نكبر...خليك علاقتك معاه متينه ع طول اللي عنده اخ زيك انت مايضيعش يامجاهد..
ابتسم وبلع ريقه وهو شاد دموعه من كثر ماتأثر وقال؛بارك الله فيك..
🍁كلام ثريا فرحه..وضايقه في نفس الوقت..ضايقه لما حس ان بوه مالاش أي دور في حياتهم..بل انه سبب للهم والغم ومايعرفش يدخل ع قلوبهم غير الحزن...
ووين طاح في مشكله كبيره ماقدرش يتوجهله وشاف صورة الاب في راجل تاني غيره استعان بيه بعد الله بش يحلها🍁
قدام المسجد اللي يدرس فيه خو مقبوله..
كان واقف بسيارته وخوه معاه في السيارة..
يشبح في واحد من اولياء الامور خاش مع ولد صغير ومعاهم شيخ...كان جاي من وزارة الاوقاف...
رشيد؛هو هدا الولد يامجاهد..
هز مجاهد راسه وقال:عارف...
رشيد؛شن بيصير توا...
مجاهد؛تو نشوفوا....
طولوا شويه داخل..
بعدين شافوا زوز شيوخ تانيين خاشين يجروا..
مجاهد؛اشبح شن صاير..
لحظات ولقوهم مطلعين عمران وهما شادين يضربوا فيه..
ع جية سيارة امن تراجي بيها..
جوه وشدوه طول حطوه فيها وتحركوا بيه..
مجاهد؛رد بالك تنزل..ونزل ومشي جيهتهم..
وقف ع بوه الولد اللي اعتدي عليه عمران؛شن صار..
؛القذر الفاجر وين خشينا لقيناه واخد عيل تاني وخش بيه الحمام..
مجاهد بإشمئزاز:قذر..
الراجل بعصبيه؛كان الواحد يخاف يطلق صغاره في الشارع باش مايتعلموا الغلط ولايحطهم في الجامع باش يتعلموا الغلط مالا وين يمشي بيهم شن هالوقت اللي وصلناله هدا حسبنا الله ونعم الوكيل..
وركب بولده للسيارة وتحرك..
ومجاهد معاهم بعيونه اللي كانت نظراتهم كلها اسف..
🍁🍁🍁🍁
"الله المستعان...الله المستعان"
دانيه؛والله زي مانحكيلك معلمتي خوي امس حكالي اللي صار كله انصدمت وماصدقتش ان شي زي هدا يصير في الجامع..!؟
فاطمه بأسف؛مع الاسف يادانيه النماذج هادي كثرت من مدعين السلفيه وهما ابعد مايكونوا عنها..هي ولت عندهم زي الموضى اللي يجي يلبسها ويمشي..
دانيه:معقوله الواحد توا يخاف يبعت صغاره للجامع زي مايخاف يطلقهم للشارع!؟
فاطمه؛لا يادانيه زي مافي شر في خير..وبالنسبه لخوك جيبوه يقرا في خلوة الذكور..زوجي معلم قرآن من ثلاته سنوات ولله الحمد هو اهل للثقه ولاأزكيه على الله..
دانيه بإبتسامه؛نتريح لأي حاجه تجي من جيهتك..
فاطمه بضحكه؛ربي يحفظك دنون..
رن تليفون دانيه شافت المتصل وقالت؛خوي..خلاص تو نقوله..السلام عليكم..
فاطمه بإبتسامه؛وعليك السلام..سلمي ع سارة..
دانيه بإبتسامه؛يوصل..
ومشت طلعت من الجامع...
🍁🍁🍁🍁
الساعه الثانية عشر ليلا..
واقف في بلاكونة شقته يتكلم بالتليفون...
جهاد بعصبيه؛سكران يامسخ سكران..ناقصين حني عار ياحيوان...........ضم فمك ياكلب واسكت ورد بالك تروح ورب الكون يارفيق لو روحت ماضال الا قاتلك بالله..وسكر في وجهه التليفون وقال..ياعن....وبلعها وسكت..
بعدين غمض عيونه شده وقال..استغفر الله العظيم..فتح عيونه وشبح للسمي وقال...تشبح في كل شي يارب تسمع وتشوف..ديرلي حل ياربي بروحي مانقدر ندير شي...
شد دموعها بقوة...وتنهد من وسط قلبه..
بعدين لف وخش داخل وسكر البلاكونه..
لقي قدامه مريم تقوله؛خش ارقد وارتاح شويه..
جهاد مشي وهو يقول؛مانبيش..
مريم وهي وراه؛جهاد وجهك مولي اصفر خش ارقد..
جهاد بعصبيه؛بالله عليك اسكتي انتي التانيه مش ناقص همك..
وفتح الباب وطلع وسكره وراه بقوة..
وخلاها موجوعه من الكلام اللي قاله...هو اكيد مايقصد بيه شي..بس وضعهم  والسبب اللي جمعهم وحالة الحب اللي بدت تعيشها معاه مخليينها حساسه اتجاه اي كلمه جارحه منه..
نزلوا دموعها من عيون الكسر واضح فيهم ومشت خشت للدار وهي تبكي...
اما هو لما ركب فوق السطح..
وقعمز في الجلسه..حس بالندم ع اسلوبه في كلامه معاها...
بس مش منه من الضغط النفسي اللي عايش فيه..حاس روحه عاجز مش قادر يدير شي..وفي نفس الوقت كان خايف يضعف ويحن لأيام كانت فيها الفلوس تجري في ايديه..
فجأه...
عيونه جو ع ورقه ملصقه ع لوحه من لوحات المظله..
هو متأكد انها ماكانتش هني قبل..
قرب يشوف شن مكتوب فيها لقاه..
"لاحول ولاقوة إلا بالله لها تأثيرعجيب في دفع الفقر...ابن القيم"
جهاد هني تفكر نصيحة هيثم ليه عن تكرار لاحول ولاقوة الا بالله بش يثبت ع التوبه..
ليه مده مسيبها ومعاش يقول فيها....وتوا رجع من يذكره بيها..
الخط كان خط خليل..وكأنه حطها قصدا وعارف شن بيصير بعدين...
فجاه جابتله ذاكرته شي مهم هو نساه...
《 "نعبى عليك"
جهاد:في شنو؟!
خليل ابتسم وقال؛الهوندا هديكا كملها عني》
وجو بين عيونه نظراته ليه لما بيركبوه سيارة السجن..
جهاد قعد يفرك في جبهته وهو يفكر..
في ان...في شي مدرق...في من ورا اللي داره خليل سبب تاني غير اللي يعرفه...
فكر هلبه هديكا الليله وماوصلش لنتيجه..ولما تعب من التفكير قعد يردد في "لاحول ولاقوة الا بالله " لين رقد...
ومافاقش الا ع اذان الفجر...
نزل طول للشقه...
خشلها وتوجه للحمام بش بيدوش..
شاف مريم طالعه منه وتبان زعلانه...
جهاد؛صباح الخير..
ردت بدون ماتشوفله؛صباح الخير..
هو شدها من ذراعها وقال:آسف..
هي هزت راسها وقالت بنبرة مخنوقه؛حصل خير..عادي..
هو ماتحملش...
احتواها بحنان وباس راسها وقال:سامحيني تعرفي الوضع اللي نمر بيه..
مريم بعدت وشبحتله وقالت؛والله عارفه وفاهمه اني نبي نخفف عنك تبي ندير اي شي يريحك..
رجع باس راسها تاني وقال؛والله عارف ياعزوزة عارف..هي بري صلي واني خليني ندوش بش نحلق الصلاة وين نجي مروح وتيلي القهوة والميلكا..
مريم بضحكه من بين دموعها؛من عيوني..
جهاد بضحكه؛عزوزة..ومشي خش للحمام..
وهي قعدت تضحك وقلبها يرفرف بين ضلوعها...
🍁🍁🍁🍁
الساعه التاسعه صباحا..
"سامحيني عمتي بس مش قادره نمشي اني"
عفاف؛ماتبكيش بنتي ماتبكيش ..
نسيبه؛قولي لجهاد..
عفاف؛حاضر انتي امسحي دميعاتك بس..وقعدت تمسح في دموع نسيبه..بعدين مشت طلعت من الكوجينه..
🍁🍁🍁🍁
"تولي نوريك خالتك ماجده جايه بتقعد معاي وتمت"
سارة بإستسلام؛حاضر..
هيثم؛يومين تانيات ونطلع ان شاء الله..
سارة؛ان شاء الله...
هيثم؛زي ماقتلك ابعتيلي اي كتاب لادهم الشرقاوي...
سارة بإبتسامه؛حاضر...
▪▪▪▪
◇ادهم الشرقاوي الكاتب المفضل لأسيمه كنت نغير منه ومانحبش نقراله...بس بعد موت اسيمه قعدت نقراله هو اكثر من غيره..بس لأنه يذكرني بيها..وفي هداكا الوقت بالذات كنت محتاج نقراله..
▪▪▪▪
🍁🍁🍁🍁
في الطريق..
رتاج؛متأكد ان عندهم دكاترة باهيين؟
مجاهد؛مستشفى خاص هدا فيها كوادر ممتازة..
تنهدت وقعدت ساكته..
وصلوا للمستشفى..خشولها..
وبعد درس سيارته في موقف السيارات..
نزل هو واخته..
وقعدوا يمشوا لين خشوا داخل..
وقف مجاهد ع الإستعلامات وسألهم عن طبيبة النساء وقالوله مازال ماجتش..
••مجاهد؛قعمزي هني..شويه وجاي..
قعمزت رتاج وهي ساكته..وهو مشي طول للدروج...
قعدت مقعمزة تراجي وبش تفوت الوقت لهت بتليفونها..
ع خشت جهاد وأمه للمستشفى..
جهاد؛اركبي يام نراجي فيكم هني..
عفاف هزت راسها ومشت للدروج..
وهو قدم وين في مافي صاله الانتظار..
قعد يمشي ويجي...قدامها..
رتاج اللي كانت منشغله بتليفونها..
شويه وعطشت..
رتاج؛تس كيف بنشرب توا!؟ مايصير كان قمته شويه وشربت..
خدت الشيشه فتحتها...
ورفعت الخمار وبدت تشرب..
هني لفة جهاد جت ع حركتها هادي وعيونه جو عليها...
هي كملت ونزلت الخمار وقعدت تسكر في الشيشه بدون ماتلاحظه..
بدون ماتلاحظ شي من الزلزال اللي تسببت فيه لقلب راجل من اول ما عرفها وهو في حالة تخبط دائم...
راجل ماعرفش قيمتها الا لما راحت من بين ايديه..
ماعرفش انه حبها فعلا الا بعد فوات الأوان..
الشعور اللي يحس بيه لما يشوفها اكدله هالشي بقوة...
تلقائيا لقي روحه هارب من المكان اللي هي فيه..
وطلع من المستشفى...
🍁فوق..
كانت سارة واقفه في الباب تراجي وهي مبتسمه بخجل ودقات قلبها متسارعه...
"صباح الخير سارة"
التفتت يمينها وهي متفاجئة قالت؛خالتي عفاف!
••داخل..
مجاهد:اكيد توا بيحاولوا يتكتموا ع الموضوع..
هيثم؛المهم انه انكشف وياريت يكون في حرص ومراقبه بعدين اكثر من هكي بس يكشفوا النماذج اللي زيه..
مجاهد؛ياريت..ع العموم جزاك الله خير دكتور وقفتك معاي مش حننساها..
هيثم؛ماتكبرش الموضوع هي مجرد استشارة انت درت كل شي بروحك..
مجاهد ضحك وقال؛تمام..مانزيدش نعطل عليك ارحم من زار وخفف..
هيثم ضحك ضحكه خفيفه..
مجاهد بإبتسامه؛السلام عليكم..
هيثم؛وعليكم السلام ورحمة الله وبركاته..
مشي طلع مجاهد..
وهو طالع جو عيونه في عيون ساره.
زوز غيروا عيونهم عن بعض وابتسموا..
هو مشي ع حاله وعيون عفاف معاه بعدين شبحت لسارة شويه وقالت:ولد سدينه؟
سارة ووجهها احمر؛ايه..
عفاف مررت نظرها ع ملامحها وهزت راسها بعدين قالت؛باهي خشي معاي بنتي..
سارة بقلق؛زي مااتفقنا خالتي..
عفاف؛ماتخافيش هي خشي..
مشت سارة فتحت الباب وخشت وعفاف بعدها..
هيثم لما شافتها تفاجأ بعدين غير عيونه عنها وعقد حواجبه..
عفاف بشي من الخجل؛السلام عليكم.
هيثم:وعليكم السلام..
ساوت شاربتها بارتباك وعيونها منزلتهم وهي تقول:اول شي لاباس عليك وتاني شي..دكتور اختك من امس دموعها ماجفوش وصايرة فيها حالة مركبه روحها ذنب وتقول خوي مايبيش يشوفني..اختك مابدتش راجلها عليك هي دارت اللي تربت عليه واللي تعلماته في حوشكم..بنت الاصل توقف مع راجلها مادامها مصدقاته مايديرش الغلط..
تو بتقولي كيف مش داير الغلط نقولك مانعرفش..لكن وين تشوفها هي كيف دافع عليه تصدق انه مش داير غلط حتى لو كان دايره..شوف دكتور انت من زمان مستصغرنا ومش شايفنا ناس وكنت تمنع في مرتك الله يرحمها انها تسلم علينا حتى السلام رغم انها مسكينه عمرها ماوجعتنا بشبحه يخي الوحيده اللي كانت تحترم فينا من الناس كلهم..ومع هدا ربي العالم اني ديما نحترم فيك ونقدرك ونقولك عليك راجل مافيش منه...واني جيتك توا نبيك تقدر موقف اختك وماترخيش بيها وخليك ساندها هي توا محتاجتك اكثر من قبل...
انهت عفاف كلامها وهيثم ع حاله ماباش يرد بأي شي..
تنهدت عفاف وقالت؛هيا سارة بنتي..
ومشت طلعت من الحجره..
سارة وهي حزينه مشت لبوها باست ع راسه بعدين طلعت بدون ماتقول شي وسكرت وراها الباب..
دمعه طاحت من عينه بعد ماطلعوا..
هو مسحها وبدي يقول بصوت مخنوق..
"لاحول ولاقوة إلا بالله"
🍁🍁🍁🍁
وقعد ساعات هداكا النهار بروحه..
يقرا في القرآن بس...لين قرب يختمه وهو مش حاس نفسه..
قالها قبل...راحته فيه..
بعد العصر...وبعد ماصلى تحديدا..
قعمز ع السرير ورجليه لوطا وكان يشوف لتليفونه...
فجأه دق الباب...
حك حاجبه وقال؛ادخل..
انفتح الباب..
هيثم وهو لاهي بالتليفون؛اهم شي هربتيلي معاك حويجه حلوة وزعت سارة ع خاطرها..
عقد حواجبه لما ماسمعش رد..
وشبح الباب..
بدت ع وجهه ملامح المفاجأة...
كانت تشبحله وهي تحاول جاهده بش ماتضحكش وقالت:السلام عليكم..
هيثم هز راسه وغير عيونه عنها وقال؛ وعليكم السلام..
هي ابتسمت وقدمت وحطت ع الطاوله علبه شكولاته من النوع الغالي الخام السودا...
وخرت خطوتين وقالت؛لاباس..
هيثم وهو يشوف للشكولاته؛لايوريك باس..
نوال:آسفه..
هو شبحلها بتساؤل..
نوال ابتسمت وقالت:ع اي شي شفته او سمعته مني استفزك وخلاك تغلط معاي..
غير عيونه عنها وقال؛اسف..
نوال؛ولايهمك..
هيثم؛شكرا..
نوال؛شويه من دينك عليا وعلى فاتح..
هيثم:واجبي..
نوال؛
 ابتسمت وقعدت ساكته..
هيثم؛يومها غلطت فيك هلبه وجرحتك وكنت قاصد اسلوبك معاي كان مستفز لأبعد حد...مانقولش ماغلطتش قي ردي..بس انتي ساهمتي..
نوال:فاهمه وعارفه..واني اسفه مرة تانيه.
هيثم؛اسف مرة تانيه..
ابتسمت ونزلت عيونها..
هو شبحلها وقال؛بصدق نتمنى تقعدي هكي ديما..
شبحتله..
وهو متابع يقول:عارفه غلطك ومعترفه بيه وتبي تصلحيه بالذات مع صغارك..
نوال عيونها تعبوا دموع..
هيثم غير عيونه عنها وقال؛يوم من الايام كنت زيك..ولما عرفت واعترفت وصلحت ارتحت هلبه وتغير فيا كل شي..
ابتسمت من بين دموعها ...
هيثم؛مش اي مراة تقدر تكون ام..المنصب هدا مش اي مراة تقدره..
نوال بضحكه:اني نقدره ونتحداك..
يدوب ابتسم وقال؛تو نشوفوا..
ضحكت بعدين تنهدت وقالت؛قبل لنمشي نبي نسألك سؤال..
هيثم؛تفضلي..
نوال؛نبي نعرف شن هي الكتب الدينيه اللي تقرا فيها..
هيثم ؛هلبه..بس ننصحك بالبدايه والنهايه لإبن كثير..كبدايه..
نوال هزت راسها وقالت؛باهي سؤال تاني..
هز راسه وهو ساكت..
نوال؛علاش لما نكلم فيك ماتشبحليش وعلاش لما نعدي او نخش لمكان معاك تقولي تفضلي وتخش قبلي..
هيثم:تو تعرفي بروحك..
هي ابتسمت وقالت؛باهي اخر سؤال...علاش جبت بنتك وخالتك يزروني في المستشفى علاش ماجبتش انت..
هيثم ابتسم وقال؛بصفتي شنو؟
هي قعدت تشبحله وساكته..
وهو عيونه ع علبة الشكولاته وع وجهها ابتسامه ماتحولتش..
هي بعد تفكير وصلتها منه فكره واضحه..
ان جيتها ليه من اساسه غلط..
ابتسمت وهزت راسها وقالت؛فهمت...لاباس عليك..
هيثم راسه وقال؛شكرا ع كل شي..
هي قالت بإبتسامه؛العفو..
وفتحت الباب وطلعت..
وكانت حاسه بشعور من حلاوته ماقدرتش تمنع ابتسامتها مم الثبات...
وكأن مافيش ناس تشوف فيها...
فاتت من جنب احسان اللي شبحلها بضحكه بعدين كمل طريقه وهو يقول؛مايطلع منه هيثم هدا قالب الدنيا ع راسه...

#دعاء_يونس
#دقات_قلب
#البطل_المغمور2

....يتبع....