البطل المغمور "زهور القمر"

الجزء الثالث عشر

#البطل_المغمور2  "زهور القمر"
#جمان_فريد
#الجزء_الثالث_عشر "إنهيار"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
في المسجد..
بيت الله...المكان الذي يذكر فيه الله بالغدو والأصال..
المكان اللي تأسس بش ينهى عن الفحشاء والمنكر....
في حلقة التحفيظ متاعه الخاصه بالذكور شن قاعد يصير فيه!؟
كانوا الاولاد اللي جايين يتعلموا كتاب الله..اعمارهم من سبع الا13سنه...
مقعمزين يراجو في المعلم متاعهم اللي ماشي يوصل واحد من زملائهم للحمام...
وعطل...
رشيد هني كان مش قادر يحتمل اللي قاعد يفكر فيه..السبب اللي يكون ورا هالتأخير..
حط الجزء متاعه وناض ومشي بطريق الحمام...
والولاد مش لاهيين بيه..
هو وين قرب من الحمام قعد يسمع في اصوات غمض عيونه بألم وين سمعها ذكراته بحاجات يتمنى لو يقدر يمسحها من ذاكرته..
قدم اكثر لعند ماجي مقابل باب الحمام...
وشاف الشي اللي كان متوقع يشوف...
الولد شافه وخاف..واللي مفروض يكون معلم لكلام الله حس ان في شي..التفت وشاف رشيد..
فنص فيه وقاله بصوت مخيف:شن دير هني!
رشيد خاف منه هلبه...وطول طلع يجري...
وهو طلع في جرته ويقول شدوه...شدوه...
الولاد كانوا مصدومين وماقدر منهم حد يتحرك..
ورشيد طلع يجري من الشارع حفيان وهارب...
هارب من الجامع...هارب من مكان مفروض يتعلم فيه الخير والفضيله..ويكرهه في الرذيله وكل منكر...
واحد من الناس شافه كيف طالع يجري شده وهو يقول:خيرك تجري هكي من يجري وراك..
رشيد حس ان الراجل هدا الوحيد اللي عبره من بين كل الناس اللي كانت معبيه شارع طوق نجاه...طول جاه وشد فيه وقال:بالله عليك ياعمي نبي هاتفك نبي نكلم خوي..
الراجل بقلق:غير خيرك من مخوفك!؟
رشيد بخوف:باهي اتصل انت بيه خوي رقمه ...
الراجل:باهي اهدى اهدى وتعالي..
وخداه وقعمزه ع رشادة كبير..وطلعه هاتفه وقال:مل الرقم هي..
وبدي رشيد يمل في الرقم وهو يرعش..
وجو زوز تانيين يسألوا فيه شن صاير معاه وهو مايبيش يحكي..
حصل الراجل مجاهد وكلمه وعطي لرشيد يكلمه..
ومجاهد اللي كان عنده مشوار يقضي فيه سيبه طول ومشي لخوه..
فهالوقت شيطان الإنس اخ مقبوله سبق بخطوه واتصل بأخته...وبدي يحكيلها في اللي صار بس بروايته هو طبعا..
🍁🍁🍁🍁
في السيارة..
مجاهد بصدمه؛كيف!؟
رشيد؛اني من الاول حسيته ماينفعش من شبحاته يامجاهد لين مرة مسني..
مجاهد عرق جبهته قريب ينفجر من الغضب..
وخوه متابع يقول:وماخليتاش ومعاش دورني بعدين واليوم لما رفع الولد للحمام لحقته وشفت شن دار..
مجاهد كان مصدوم بقوة ومش مستوعب اللي سمعه ماكانش باين ع عمران في المرات اللي شافه فيهم انه بني آدم غير سوي...
بس وقت تفكر كلام الدكتورة النفسيه اللي خلا رشيد يتعالج عندها صدق...وملامح رشيد ورعشة صوته..وخوفه من اللي صار هما علامات قالتله عليهم الدكتورة نفسه بعد الشفاء حتصير معاه لو رجع تكرر معاه الموقف او شافه...
لأنه بيبدا في حالة رفض وخوف من العودة...
رشيد بنبرة رجاء سأل خوه؛مصدقني ولا؟
مجاهد شد ذراع خوه وقال:مصدقك...
بانت ملامح الراحه ع وجه رشيد..
ومجاهد حول يده وشغل السيارة وتحرك....
🍁🍁
"شن تقولي يامقبوله!!؟"
مقبوله بملامح وجه حاده؛اللي سمعته يامجيد اني ماتوقعتش ان تربية صغارك سيئة لهالدرجه...
مجيد في حالة صدمه ومش مصدق اللي سمعه منها .
مقبوله:الموضوع هدا خطير لازم يندارله حل ولدك اليوم في للجامع وغدوة في المدرسه ويدير فضيحه ليها اول ماليها آخر..
عقد مجيد حواجبه بغضب وقال؛بري شوفي كان خوه روح بيه جيبيه هني للدار..
مقبوله هزت راسها وقالت:حاضر..
ومشت طلعت من الدار...
وصلت في الصاله لقت البنات مقعمزات حدا امهم يتعشوا..
مقبوله؛علاش خبزة الطاجين والخبزة قاعده  عرام عرام في السله عاجبكم الدقيق هلبه!!
البنات شبحولها بإزدراء...
سدينه:هديكا يابسه يامقبوله..
مقبوله؛ينحطوا في كسكاس فوف طنجرة ويتبوخوا..
رتاج:ديرها انتي وكوليها..
مقبوله :طبعا...شن خاسره حضرتك مقعمزة تاكلي وتشربي بلاش..
شبحولها بصدمه..
وسدينه خرجت عن صمتها وطورها؛شن الكلام اللي تقولي فيه حوش بوها هدا!؟
البنات تفاجئوا في امهم كيف تجرأت وردت عليها..
مقبوله؛قلتيلي حوش بوها يعني بوها راضي بحالها هدا!!؟
دانيه:انتي شن دخلك شن علاقتك..تصرفي علينا توكلي فينا من رزق بوك!؟
مقبوله هزت راسها وقالت:انتم مايقدر عليكم حد كان بوكم...
وكيف جت بتمشي..
انفتح باب الشقه وخشوا مجاهد ورشد..
هي رفعت حاجبها وشبحت لرشيد من فوق لتحت..
ومجاهد يشوفلها بحده ويقول:خيره صوتكم طالع!..
كلهم كانوا يشبحوا لمقبوله وهي عيونها ع رشد..
هو طول هرب منها خوفا وبيمشي داره..
مقبوله بحده؛بوك يبيك يارشيد..
رشيد خاف..
ومجاهد حس ان في شي سأل مستغرب؛شن يبي فيه؟
مقبوله:تعالى معاه وتو تعرف..
مجاهد شبحلها بحده بعدين جي لخوه وشد يده ومشي هو وياه لدار بوه وهي لحقتهم..
سدينه بخوف:زعمه شن صاير!
رتاج بقلق:مش عارفه لأن البومه هادي مايجيش من وراها خير...
ودانيه قعدت ساكته وهي تسمع فيهم وتفكر بقلق...
🍁🍁🍁🍁
"تو مش تاب مش قلتوا تاب وولى ماشي جاي ع الجامع!؟"
هادي ام سجى متسائله..
وهما ماعرفوش شن يردوا عليها..
سجى:اني من الاول حسيت بشي وسامحيني فيها خالتي زيه زي راجلي زي جهاد التلاته دايرنه ستار بس..
مريم بحده:تكلمي ع اللي يخصك جهاد ماشي ع الصراط المستقيم والحمد لله..
تهاني زي من مسح ع قلبها..
سجى:واهو خليل كان داير زيه وشفنا اخرتها..
نسيبه وهي مضيقه عيونها؛انتم جايين تواسو ولاتتشمتوا..
عفاف تسمع ومكتفيه برد كناينها..
:العفو تو اني بنتشمت في ولد اختي!؟
سجى:كلامي حق وكلام الحق وجاع..
عفاف بعصبيه:اي حق تعرفيه انتي ياام حق سكري فمك وخليني ساكته..
سجى خافت..
وامها قالت:خيرك ياعفاف كارهه بنتي هكي اللطف مش متحمله منها كلمه ودايرة الفرق بينها وبين سلفاتها.
عفاف وعيونها تعبوا دموع:تو بالله بالله...هدا وقت القطاف الفارغ هدا وقته...صدقت نسيبه مش جايه تواسي..جاية تقصقصي وتبي تعرفي شن صاير..خواتك التانيات كان بالتليفون ماكلموني واني فاهمه علاش..وانتي الوحيده اللي بش تعرفي شن في وبعدها معاش نشبح وجهك..
ناضت اختها وهي تقول:قالولي ماتمشيش لكن اني اللي ماسمعتش الكلام نستاهل..
عفاف:ايه تستاهلي..
سجى:خالتي معقوله هكي؟!
عفاف بضجر:مش عاجبك بري مع امك...
سجى برفعة حاجب:لا وين ماراجلي وين ماني..
وخدت ولدها ومشت لجناحها...
:كلا اني ياوخيتي حوشك معاد عافسته..
عفاف؛طريق السلامه الحقيهم..
مشت طول طلعت وهي معصبه وتمتم..
وعفاف بدت تبكي وهي تقول؛الله غالب هدا ماعندي ع قد ماندير معاهم وين طيح بيا هما اول من يرخيني...
مريم بألم؛مقيوله وين دمك وين سمك..ماتجيك كان من القريب ياعمتي..
نسيبه سرحت وهي تتفكر في موقف خوها وقلبها موجوع...
فجأة..
سمعوا باب الحوش انفتح...
تهاني؛واحد من خوتي روح..
شويه وسمعوا في حد ينادي..
"مريم"
مريم بفجعه؛معاذ!
وناضت ومشت تجري..
تهاني بخوف:شكله واحد من خوتها!..
ناضت عفاف وهي بتموت من خوفها ولحقتها
🍁برا...
طلعت مريم شافت معاذ ومعاه واحد تاني من خوتها..
كان يتعارك هو وجهاد بالكلام..
جهاد:مرتي هادي مرتي مالكش حكم عليها..
معاذ:ليا حكم عليها ونص...ورجع ينادي..مريم..لين شافها..هيا حطي حاجه ع راسك وهيا..
مريم:لا مش طالعه..
جهاد؛شن رايك توا؟!..
خوها تاني مشالها طول بس وقفله جهاد ودفه وهو يقول؛هي وين ماشي وين....
قدمت مريم وهي تقول؛معاذ خود صهيب واطلعوا..
معاذ:خير بلاك خيرك حتى بعد اللي صار مازال تبي تقعدي معاه...تعرفي انتي شن يصير فيك مع هادم عصابات ومجارم ..
جهاد؛الزم حدك ماتخلنيش نبدا فيك...
معاذ تجاهله وجي لأختها جبدها من يدها..
مريم بعيطه؛لاحول..
وجهاد جبدها منه وحطها وراه وقال:شاد روحي بالسيف ع خاطرها ماتخلونيش نطلع عن طوري ونخلطكم في بعض..
خوها ناداها برجاء؛مريم!
هي قعدت شاده في تيشرت جهاد وحاطه جبهتها ظهره ودموعها ينزلوا..
مشي طلع طول ...
اما معاذ فقد اعصابه التفت للباب ضربه بقوة وصاح بأعلى صوته بعدين التفت نص التفاته وقال:انتي اللي حكمتي ع روحك يامريم من اليوم تنسي ان عندك عيله...انسي..
وخبط الباب بيده بغضب..وطلع وسكر الباب بقوة قريب رفعه معاه...
جهاد حس التفت لمريم شافها كيف ضامه ايدها لبعض ومنزل راسها وتبكي..
وجعاته هلبه...قاللها بصوت هادي...تعالي...
احتواها احتواء الزوج لزوجته..ومشي بيها للكرسي..
قعمزها عليه...وبعد شعرها عن وجهها وقعمز قدامها ع رووس صباعه وشده ايديها وهو يقول:اشبحيلي..
شبحتله ودموعها ينزلوا..
جهاد:طبيعي يديروا اللي داروه لكن ردي بالك تصدقي انهم يخلوك..شفت في عيونهم قداش يحبوك وخايفين عليك خلي اللي صار ياخد وقته واني وياك نمشولهم ونطلبوا رضاهم..
مريم هزت راسها وهي تمسح في دموعها طاح شعرها ع وجهها ووخره للخلف وقال بضحكه:عزوزة حتى وانتي تبكي..
ضحكت وقالت:علاش ديما تقولي عزوزة...اني حسيتك قاصد بيها حاجه حلوة لكن مافهمتش كيف..
هو ضحك وقال:عزوزة هادي كلمه كان يقول فيها خليل لتهاني لما كانت صغيره..كانت دريه زيك وحلوة وسمونيه....
مريم بضحكه:عزوزة معناها حلوه..
جهاد:ايه وللدريات اللي زيك بس..
مريم؛عينك ان طولي مناسب مش قصيرة انت اللي طويل هلبه هدا علاش تشوف فيا قصيره..
هو ضحك وناض وقف ويقول؛تي نوضي ياعزوزة نوضي خشي داخل..
هي ضحكت وناضت ومشت بتخش..
وهو حط ايديه في جيوبه وقعد يشبحلها بإبتسامه..
وهي لما جت بتخش التفتت وقالت:شكرا.
ضحك وغمض عيونه وفتحهم..
هي ابتسمت بتهنيده ومشت خشت داخل..
وتلقتها عزوزتها ضمتها في حضنها وقالت:زي ماقالك راجلك مايخلوكش..
ضمتها مريم بقوة وهي مبتسمه بحب...
 🍁🍁🍁🍁
"كذب"
مقبوله:تكذب في خوي حامل كتاب الله!
شبحلها مجاهد بحده..
مجيد:شن خلاك تقول كذب..
مجاهد شبح لبوه وقال:كذب واني عارف زي مانشبح فيك رشيد مايديرش العفن اللي قالت عليه..
مقبوله؛مش اني قلت خوي قال..
مجاهد؛ماتواخدنيش..هو الكذاب..
مجيد:مجاهد..
مجاهد بإنفعال؛مجاهد وصلتله لهني يابوي..وحط صبعه ع انفه وتابع يقول..ماطلعوشي عن طوره يابوي..
مجيد؛تعلي في صوتك واني موجود!
مجاهد:اسف يابوي وسامحني لكن خلاص معاش نقدر نسكت اكتر من هكي..مرتك بتقعد معاك هني تخليها دابها دابك معاش دخلها بحد في الحوش لامن كلي لامن شرب لامات لامن قعد حي..الحوش هو اني نصرف عليه تمام..
هي فهمت ان سمع النقاش اللي صار بينها وبين خواته..
مجاهد:واني بس اللي من حقي نحاسب فيه..مش عاجبك مرت بوي..هونا عندك شقه فوق اقعدي فيها انتي وبوي ع راحتكم..
مجيد؛تلز فيا من حوشي!؟
مجاهد؛مانزلش فيك وانت عارف يابوي..لكن بش ماتزعلش خلاص..نطلع اني وامي وخوتي لحوش رتاج وانتوا اقعدوا براحتكم...
وخدي رشيد ومشي فتح الباب وطلع وسكر الباب..
مجيد بخوف:زعمه يديروها..
مقبوله؛الله المستعان..بجديات مصدومه في صغارك كلهم فيهم العقوق..
مجيد:الا مجاهد عمره ماكان عاق ولدي..اسمعي جاي مقبوله اللي يبيه مجاهد يندار مانتحملش ولدي هدا يخليني بكل..
مقبوله تمالكت اعصابها وقالت؛حاضر..حاضر يامجيد حاضر..
🍁برا..
رشيد:علاش ماخلتنيش نحكيله اللي صار حق..
مجاهد؛في حاجه في راسي بنديرها..وانت خليك ساكت وماتحكي لحد تمام.
رشيد:حاضر..
مجاهد:هي توا خش دوش بش نمشوا نصلوا العشاء..
رشيد؛حاضر..ومشي خش لداره..
مجاهد تنهد ومشي للصاله..خش عليهم امه تلقاته بالسؤال:شن في خيره رشيد؟
مجاهد؛دار مشكله في الجامع وسيبه..وقعمز حداهم..
سدينه؛مشكلة شني ياكبدي!؟
مجاهد؛مشكله وخلاص يام..
دانيه:احسن..
رتاج؛ايه والله احسن شوفله جامع تاني..
مجاهد هز راسه وقال:جيبي الخبزة جاي..
مدتله رتاج وقالت:هديكا تحاسب فيا اللقمه...ودمعوا عيونها..
مجاهد:من اليوم معاش تفوت حتى من ركنك..
دانيه:شكلك سمعت شن قالت..
مجاهد وهو ياكل:امم..وحطتلها حد....
رتاج باساته من خده وقالت؛نجيه ياربي..
ضحك وقال:تعشي تعشي..
وامه تضحك وتشوفله بنظرات كلها حب...
وهو قعد يهدرز ويبصر معاهم وغيرلهم جوهم ومدرق عليهم كدره وهمومه..لين جاه خوه رشيد...
يدوب تعشى بعدين طلعوا الزوز للجامع...
🍁🍁🍁🍁
"والله مافاهم حاجه شدينه في قضية مخدرات هكي كبرها ويصلي"
هادم الحراس متاعين الحجز..
؛في ناس هكي راهو عندهم انفصام في الشخصيه مرة ابيض مرة اسود..
:قصدك مريض..
عثمان من الحجز:تي هدا اصح مني منك غير طروح يدير فيهم من توا يخمم في حسن السيرة والسلوك ..
ضحكوا الموجودين..
وهو كمل صلاه ورفع سوريته اللي كان يصلي عليها نفضها وناض بيها وقعد يلبس فيها بعدين التفت لعثمان واشرف وقال:انتم الزوز تعرفوا كويس اني كيف وليت بعد سيبت..
اني راجل اتهدد بعيلته واحبابه وانجبرت نولي للوسخ بش نحميهم..
اشرف:باهي اسكت اسكت وماتخلنيش نصدق..انت عاجبك الجو اللي كنت عايش فيه.. راس تأمر وتنهي والكلام كلامك والسلام سلامك..الجو اللي دير فيه توا مشيه ع غيري..
عثمان بصوت عالي؛خلاص انت وياه...وقال لفظ نابي..
الحارس:سكر فمك يا حمار..
الثلاثه شبحوا للحراس بعدين سكتوا...
خليل رجع شافلهم بكره..بعدين ولى قعمز..
ع خشة واحد من العناصر:طلعوهم..
اشرف:وين..
العنصر:لمكتب التحقيق..
خشوا الحراس ولبسوهم الكلابشات وتوجهوا بيهم لمكتب التحقيقات...
وخليل مازال يردد في قلبه...
"لاحول ولاقوة إلا بالله"
🍁🍁🍁🍁
"لاماقال شي تاني شن بيقول يعني"
عمران ارتاح في داخله بعدين قال:وين نندري عليه..المهم يامقبوله قولي لزوجك يرد باله منه ..
"ان شاء الله هي توا بنسكر عمران..السلام عليكم"
عمران؛وعليكم السلام ورحمة الله وبركاته..
وسكر..تنفس براحه بعدين التفت بيمشي شبح مرته واقفه قدامه..
ايمان بإبتسامه؛درت كيكه بكري انت تحبها شن رايك نقعمزوا مع بعض نهدرزوا ونعدوا بيها هدرزتنا..
عمران؛معاش نبي ناكل حلو في الليل مش باهي ونبي نرقد بكري بش مايفوتش عليا القيام...ومشي من حداها وخش الدار..
وهي ابتسامتها تبدلت بملامح القهر..ومشت طول للحمام بش تغسل وجهها من الزينه...
🍁🍁🍁🍁
الساعه الواحده ليلا..
كانت مقعمزة في الجنان بحجابها..
تتفرج ع القمر ودموعها ينزلوا وهي تفكر فيه..
زعمه شن صاير فيه...بشن يحس توا...كيف داير بروحه..
شن يسمع شن يقولوله..ياكل ويشرب ولالا....مستاحشتها زي ماهي مستاحشاته!؟
قعدت تبكي بصمت وقلبها يوجع فيها هلبه..
حاسه بشي مضيق صدره..وكأني في شي قاعد عليه وكاتم نفسها...
مش قادره تاخده النفس زي قبل وهو بعيد هكي وفي الحبس..
البعد مش حيكون يوم ولايومين...سنين....شن بيصبرهم ع بعض!؟
نزلت عيونه وشافت لسطوح حوش خوها...
زاد وجع قلبها اكثر واكثر...فهالوقت مفروض هو اللي يوقف معاها ويساندها وللأسف كان اول المتخلين..
نسيبه توا..حاسه روحها وحيده فهالدنيا الواسعه والكبيره...
غيرت عيونها فوق وقعدت تشبح للسمي الواسعه المليانه نجوم حدا القمر...
وجابلها عقلها ذكرى حلوة...
🔺️وقت سابق..
"مولاي قد نامت عيون وتيقظت ايضا عيون..
نامت عيون الخائنين وعين نجمك لاتخون.."
نسيبه؛تهبل..عليك احساس حسيته وانت تنشد فيها..
"وين يجي الليل ويفارقني النوم ونقعد نفكر في همي تخطر عليا..وبعد ننشدها قلبي يقولي نوض صل نوض شن تراجي..تعرفي فكرت ان ربي ينزل للسمي متاعنا هادي ويكون قريب لهالدرجه فكره عقلي مااستوعبهاش في الاول..لعند ماصليت..وربي يانسيبه حسيت جلدي شوك شوك طول الصلاة اقسملك بالله قعدت نرعش..ونتفكر كيف كنا في وقت زي هدا نديروا مايكره تحت عينه ونقول لروحي..يااه قداش ربك رحيم ياخليل قداش يحبك صبر عليك لين جيت للطريق وقربك منه...اني وقتها حسيت روحي نبي نديرله شي كبير يمسحلي اللي تجرأت بيه عليه كله..."
نسيبه وهي ترشف قالت بإبتسامه:سعدودك بقلبك ياخليل كيف تعلق بسرعه......
"ماهو ساعدني..عارف اني صادق وساعدني..تعرفي ع قد مايصير حنتحمل ع خاطره ومهما تحملت مش موفيه شي من حقه..ونقولك نوسه مش اني نبيك تحبيني اكثر من روحك كيف مااني نحبك..لكن نبيك تتعلقي بيه هو كلنا نمشوا ونجوا الا هو وين تتعلقي بيه هو مايعذبكش فراق حد.."
🔺️في الوقت الحاضر..
ابتسمت ومسحت دموعها...وشبحت للسمي وبدت تنشد..
مولاي قد نامت عيون..وتيقظت ايضا عيون
نامت عيون الخائنين وعين نجمك لاتخون...
ضحكت وقالت..وين صوتي وين صوته..بعدين ناضت ومشت خشت داخل..
توجهت للحمام...توضت..ومشت للصاله وبدت تصلي...
وكل اهل الحوش نيام...
بل كل اهل الشارع...ماعدا خوها..
اللي كان يصلي القيام في الجنان...
والدعاء كان واخد كل صلاته....
🍁وخليل..
كان راقد ع الكرسي عاطي بالظهر ويدعي في قلبه وهو مغمض عيونه...
وفي مكان بعيد عنه...
كان يدور حديث بين زوز..
:شوفه من لما هرب لااتصل ولابعت حد ياما حذرني منه خليل لكن اني درت الطرشه قلت خليل يحب الرياسه ومايبيش من يشاركه..
؛علاش ماقلتش الكلام هدا من قبل!!؟
:قتلك نحسابه جو حسد وحساسيات..
:تعرف بعد نلقوه وين ماهو كابوريا...وقال لفظ نابي...ونصفي امه..تو نحاسبك بطريقتي..
ومشي ركب سيارته ومعاه الحراسات...
وطلعوا طول..
وخلاه يخبط في سيارته بيده بقوة وهو يسب في كابوريا...
هالحديث كان بين افراد من المنظمه المسؤولين عن تجارة المخدرات في طرابلس..
بعد فشل العمليه والكمين اللي صار قعدوا يدوروا ع اللي باعهم ومالقوش قدامهم غير كابوريا اللي هرب من الشرطه بسهوله واختفي مرة وحده....
🍁🍁🍁🍁
اليوم التالي...
في المركز...
الساعه الثانيه عشر قبل الظهر..
زياد؛عمتي شن حالها توا؟
هيثم:شن بيكون حالها يعني..
زياد؛شن صار بيناتكم!
هيثم قعد يشبحله وهو ساكت..
زياد:واضح تتكلم عليها بالسيف..
هيثم تنهد وقال؛المهم جاوبتك ع اسئلتك وغيره؟
زياد حس ان بوه معصب ماباش يزيد يعصبه حتى هو خاف عليه زي سارة وقال:لاخلاص تمام..
هيثم طول مشي وفات من حداه..
وزياد قعد معاه بعيونه لين درق من قدامهم...
تنهد بضيق بعدين ولى لزملائه...
وقعد هيثم طول فترة دوامه بعيد عن النزلاء مايبيش يحتك بيهم وهو في هالحاله بش مايغلطش في حد منهم...
ومع نهاية دوام روح للحوش...
🍁وين درست سيارته قدام حوش..شبح جهة حوش خالد وقلبه موجوع..مخلي قطعه منه فيه وهي بأمس الحاجه ليه..
تنهد بألم..وخش بالسيارة للحوش...
🍁🍁🍁
وفي حوش خالد..
رفيق بضيق؛المحامي قال القضيه صعبه لدرجة مافيش محامي يقدر ياخدها خاسرة..
عفاف بدموع؛وباهي بقداش يحكموا عليه ماقالكش..
رفيق؛مش عارف يام كل مرة يقول كلام مافهمت منه شي....
عفاف بحرقه قعدت تبكي..
ورفيق يشوفلها بألم...
ونسيبه في الكوجينه تسمع فيهم وهي تغسل في الماعين وتذرف في الدموع..
ومريم اللي كانت واقفه ع الغدي تشبحلها بحزن...
🍁🍁🍁
الساعه الخامسه والنصف عصرا..
كانت سارة برا تسيق في الجنان بس تبرده..
وخواتها مقعمزات ع الكراسي يرسموا..
وبوهم واقف في روشن الصاله يتفرج عليهم وهو يشرب في البابونج..
سارة بعد كملت تسييق..مشت خدت طوبو الميه بتحطه للغرس...
هي حطاته من همي وجرس الحوش ضرب من هني..
مشت للباب وقالت؛شكون؟
🍁وورا الباب كان واقف مجاهد اللي جاب مع اخته..
اللي سمعوا صوت سارة ابتسموا..
دانيه بضحكه:ترا احزري..
سارة من فرحتها بيها فتحت الباب طول..
وانصدمت بمجاهد في وجهها..
تلاقت عيونهم ومافاتش هاللقاء ثواني وطول اعرضوا عن بعض حياءا..
سارة بخجل؛خشي دانيه..
دانيه بضحكه:باهي وخشت..
سارة بخجل؛تو نادي بابا...وردت الباب في وجهه..
هو ضحك ...
وهدا كله شاف رفيق وهو طالع من الحوش..
ولعت في صدره نار تحرق في كل جزء فيه...
قعد يشبح لمجاهد وهوماشي بحقد وغيره..
لين طلعله هيثم وهو يرحب بيه ترحيب حار..
بعدين دخله لحوشه وسكره الباب..
وكمل رفيق طريقه وهو يسب ويقول في الفاظ نابيه...
🍁اما عند هيثم وضيفه..
بعد الترحيب قعمز هو وياه في الجنان ...
وبعد سؤال عن الأحوال مجاهد قال..
مجاهد؛والله جايك بناخد استشارتك في موضوع حساس وخطير هلبه..
هيثم؛استشارتي اني؟
مجاهد مسح ع حاجبه وقال:مالقيتش غيرك قدامي..معرفتي بيك خلتني نحترمك هلبه ونوثق فيك ونحس انك عندك خبرة في الحياة تخليني نستشيرك ومتأكد انك حتنفعني..
▪▪▪▪▪
◇سبحان الله...وكأنهم كانوا مبعوثين قصدا...يعني اني كنت من النوعيه اللي مانحبش ندخل في حد عايش حياتي وهمي كله شغلي وعليا في بيتي بس...وليت نحب نمشي في حاجه الناس نساعد من يحتاجني واللي مايحتاجني..صح شي مرهق ومتعب بالذات واني في وضع مايسمحليش نفكر في هم حد..بس بعد نقضي حاجه اللي قصدني نحس بفرح ورضا  غير عاديين...ونحس ان ربي حيوقف معاي زي ماوقفت مع عباده..
كان الله في عون العبد مادام العبد في عون اخيه..
▪▪▪▪▪
ضيق عيونه وقال؛بارك الله فيك ولدي..خش في الموضوع شغلتني..
🍁داخل...
دانيه بصدمه:ياروحي قداش وجعتني هدا واني جاية نبارك!
سارة بحزن؛مسكينه مالحقتش تفرح...تنهدت وقالت..انا لله وانا اليه راجعون..
دانيه؛تعرفي جبت معاي حتى هديه نحساب روحي بنمشيلها معاك ونشوف تهاني..
سارة بدموع؛بابا معاش يبينا نواصلوها قطع علاقته بيها وبحوش عمي خالد كله..
دانيه حطت يدها ع فمها وهي متأسفه هلبه...
وسارة تسمع في دموعها وهي تقول؛-قدر الله وماشاء فعل..
دانيه وهي مضايقه نزلت يدها وقالت:ربي يفرج...
🍁برا...
هيثم بإبتسامه متهكمه؛اللي قتل عثمان وعلي رضي الله عنهم كانوا من طلبة العلم وحفاظ قرآن راهو..ماتستغربش..
الناس اللي مخليه الدين جامد..عبارة عن اوامر ويتم تنفيدها وقلوبهم خاليه من الايمان سهل عليهم الانحراف ومش اي انحراف لأقصى مراحله..
يفكروا فيا بالنصارى زمان هكي كانوا..لين وصلوا لمرحله خلوا فيها الناس تكره الدين وتتجه للعلمانيه..
بحيث يكون الدين بعيد عن الحياة كل البعد ويقعد مجرد طقوس يمارسها الانسان امتى مايبي...
وزي مانقال...
إن التدين المغشوش انكى ع الأمم من الإلحاد الصارخ..
الناس اللي زي هدا اللي حكيت عنه قاعدين يعادوا في الدين اكثر من اعدائه الواضحين...
مجاهد؛فعلا...بس اني توا نفكر في خوي يادكتور خايف عليه هو كان زي المدمنين وماصدقت تعالج من الكارثه مرات ينتكس..
هيثم هز راسه وقال؛نعطيك عنوان دكتورة متخصصه في علاج الادمان بكل انواعه تخدم عندما في المركز ومتأكد انها تنفع خوك وهلبه مش شويه..خل نخش نجيبلك كرت عيادتها من داخل عن اذنك..
مجاهد بإبتسامه؛تفضل..
مشي هيثم خش داخل ومجاهد يشبح لريحان وجنان كيف مقعمزين حدا الورد ويرسموا ابتسم..
وهما شبحوله وابتسموا..
🍁هيثم وهو طالع ووراه ساره بسفرة القهوة..
سارة:خود بابا..
خدي السفره..
سارة؛انت هدا...واشرتله ع الفنجان..
هو شبحلها شويه وقال:يشرب فيها حلوة ولامعدله!
سارة طمسها السؤال شبحت للفنجان شويه بعدين شبحت لبوها وقالت بسرعه؛معدله..اخته قالت..ووجهها ولى احمر..
بوها هز راسه ومشي طلع..
حطت سارة ايديها ع خدودها وقالت؛قريب دخت..وزفرت بقوة وخشت داخل..
🍀🍀🍀🍀🍀
وتمر الأيام..
والتحقيق مازال شغال مع اشرف وعثمان وخليل وهما تلاته ع اقوالهم مافيش حد غير كلامه...
لعند ماجي يوم محاكمتهم...
عفاف كانت بتموت من التخميم ماقدرت تحط في فمها شي  هداكا اليوم ع قد ماحاولوا فيها..
اما نسيبه فكانت تقوي في روحها وتدعيله ربي يقويه لأنه من بعد هاليوم حيخش ع مرحلة صعبه هلبه وخطيره..
نفسها المرحله اللي حيخشها زياد ومعاه فاتح اليوم اللي حيترحلوا فيه لسجن ابوسليم..
هيثم في هاليوم ماكانش ع بعضه بكل متوتر ع الآخر..
وعصبي جدا...وماباش يشوف حد ولايحتك بحد في مكتبه وبس...
🍁🍁🍁🍁
في المحكمه...
الساعه الواحدة ظهرا وقت الجلسه..
القاعه اللي كانت معبيه بالحضور من اهالي المتهمين...
وماكانش في محامي ليهم..
والصحافه تستنى برا....
في حضور القاضي ومستاشريه ووكيل النيابه بدت الجلسه..
تكلم القاضي وسمع لوكيل النيابه..
وجهاد ورفيق يشبحوا لخوهم اللي كان يسمع في كلام وكيل النيابه اللي يحكي عن تاريخ بوه ومن بعده هو في عالم تجارة المخدرات..
بعد ماكمل كلامه القاضي سأل المتهمين:مافي شي تبوا تقوله يااشرف وياعثمان وياخليل..
الثلاته قعدوا ساكتين..
القاضي هز راسه بعدين قال...كل شي واضح..شبح قدامه وقال...النطق بالحكم....حكمت المحكمه ع المتهمين في قضية تهريب وتجارة المخدرات..
المتهم اشرف محمد **** بالسجن خمسة عشر عاما ...
والمتهم عثمان عبد السلام عليوان بالسجن خمسة عشر عاما...
والحكم على المتهم خليل خالد ***** بالسجن عشرون عاما
كلهم توجهت بصدمه انظارهم ناحية خليل...
وجهاد قال بصدمه:عشرين سنه!!؟
خليل ابتسم تهكما وعيونه تعبوا دموع...
القاضي؛رفعت الجلسه...
🍁وطلعوا خليل واللي معاه والعناصر يقودوا فيهم ناحية سيارة السجن الكبيرة المصفحه...
والكاميرات تصور...
وهما فايتين..
رفيق بلوم؛علاش ياخليل علاش دير في روحك وفينا هكي علاش..
خليل شبحله بعدين شبح لجهاد.
جهاد حس بإن نظرات خليل ليه في من وراها معنى لأنها أثرت فيه هلبه..
وتمنى لو مادرقوش عنه عيون خوه بعد ماركب السيارة..
وسكروها بإحكام وتحركت طول ووراها حراسه مشدده...
🍁فهالوقت..
في ساحة المركز...
كانوا النزلاء موجودين ومعاهم هيثم وثريا ونوال ودكاترة من كادر المركز...
يودعوا في زياد وفاتح...
فاتح:صحيتي دكتورة ثريا بارك الله فيك..
ثريا بإبتسامه؛واجبي ماعنديش جميل..
ابتسملها بعدين شبح لأمه وقال؛نشوفك ع خير..
هي ضماته..
وهو تحشم قدام صحابه..
نوال؛رد بالك ع روحك حبيبي..
فاتح قعد ساكت وماباش يقول شي حضنها ليها كان بارد عكس هي..
هيثم؛انت توا مش تحت عيوني لكن واثق فيك حتطلع من غادي راجل...
زياد ابتسم وقال:ان شاء الله..ردوا بالكم تنسوني بس..
ضربه بوه ضربه خفيفه ع خده..بعدين خداه في حضنه وضمه بقوة..
وزياد ضم بوه بحب وقعد يشم في ريحته...
ونوال تشبحلهم...
بعدوا عن بعض وهيثم شد وجه زياد بإيديه وقال؛استعن بالله ولاتعجز تمام...راك تنساها الوصيه..
زياد؛حافظها صم..
ابتسم هيثم وقرب راس ولده ليه وباس جبهته بعدين قال:في حفظ الله...
بعدين شبح لفاتح وقال؛تعالى..
فاتح ضحك وجاه طول حضنه..
ونوال عيونها تعبوا دموع..
هيثم؛في امانتك راهو..
فاتح؛اطمن يادكتور..
الضابط:دكتور هيثم..
هيثم بعد عن فاتح وقال:هي استودعناكم الله..
زياد وفاتح مرر نظرهم عن الكل ورفعوا ايديهم وحيوهم وهما يقولوا...نشوفوكم ع خير شباب...في امان الله...
جوهم عناصر الأمن لبسوهم كلبشات..
بعدين خدوهم وتحركوا بيهم لسيارة السجن..
نوال دموعها ينزلوا وهي تمسح فيهم وقلبها واكلها ع ولدها..
وهيثم كان حاس بشعور بشع ومؤلم..
ولده هالمرة حيكون بعيد عنه ومش تحت عينه ووسط الخطر..
قال في نفسه
"الله خير حافظا"
بس مازال الخوف ماتلاشاش..
ركبوهم السيارة وسكروا عليهم الباب بإحكام وطول تحركت وطلعت بيهم..
هيثم التفت خدي نفس عميق وقال:واني فهاليوم والساعه اللي كانت اخر ساعه ليا في هالمكان نبي نشكركم كلكم ع الفرصه اللي عطيتوها لهيثم الكاتب بش يكون معاكم..
تعلم منكم اكثر ماتعلمتوا منه..تقوى بيكم..حبكم كلكم...ووليتوا جزء مهم في حياته..حتى بعد نطلع من هني مش ناسيكم ولامخليكم..سلمتكم لإيدين امينه الاستاذ خليفه يستحق المكان اللي حيكون فيه اهم شي حاجه اهلاته ليه هي مكانه في قلوبكم موفق ان شاء الله..
:بارك الله فيك..
هيثم؛استودعكم الله الذي لاتضيع ودائعه..
وهما جوه بالواحد قعدوا يسلموا عليه ومنهم كان يبكي بدموعه..
وهو شد روحه بقوة....
ونوال عيونها ماتحولوش من عليه..
نوال:مش طبيعي..
ثريا:شني!؟
نوال؛وضعه مش طبيعي يبان تعبان..
ثريا؛اكيد بيكون تعبان من اللي صار مش ساهل بكل..
تبعاته نوال بعيونها وهو ماشي لين خش داخل..
والنزلاء ردوهم وين ماكانوا..والدكاترة ولو لشغلهم..
ثريا:ماشيه..
نوال؛لانبيك في حاجه..
ثريا؛مالا تعالي خشي..
نوال هزت راسها وخشوا داخل...
🍁🍁🍁🍁
"عشرين سنه راح عمره معناها"
جهاد ورفيق كانوا واقفين قدام امهم ومش عارفين شن يقولوا..
وعفاف انهارت بالبكي...
وتهاني معاها..
ومريم قلبها موجوع عليهم...
اما نسيبه كانت في الجنان تتكلم بالتليفون..
"ايوه نوسه معاي"
نسيبه؛معاك سميه هاه شن صار..
"الله يبارك يانوسه الله يبارك ناجح بتقدير 98.89%'
نسيبه بدهشه؛خليل خالد ******* راهو؟
"تي ايه بابنتي راهو هدا ميه في الميه من الثلاثه الأوائل ع مستوى طرابلس"
نسيبه بدت تضحك وتبكي في نفس الوقت بعدين قالت بفرحه؛صحيتي صحيتي ياسميه...صحيتي...
🍁🍁🍁🍁
وهيثم...
فهالوقت...
كان طالع من المكتب بشنطته...
يمشي ويمشي...لين تلاقي في اخر الممر بنوال بطريقها لباب المركز..
وقف...
وقعد يشبحلها..
وهي وقفت وقعدت تشوفله..
قعد يبادل فيها النظرات...وهي تشوفله ومش فاهمه خيره..
هل ناوي يعتذر...!؟
فجأة..
طاحت شنطته..
هي ضيقت عيونه بإستغراب..
بعديم شبحتله....
توسعوا عيونها ع الآخر وهي تشوف..
في راجل مثيل الجبل الجليدي...وهو ينهار قدامها وسقط بقوة ع الأرض..
هي صرخت بصوت عالي وقالت..
"تعالوا....تعالوا"

.#صلوا_على_الحبيب
#انهيار
#البطل_المغمور2