البطل المغمور "زهور القمر"

الجزء السادس عشر2

#البطل_المغمور2  "زهور القمر"
#جمان_فريد
#الجزء_السادس_عشر "قلوب منكسرة"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
"من وين جبته"
وهو ياكل في شاربه التحتاني من التوتر كان واقف قدام مدير السجن اللي يستوجب فيه بعد ماسمع سؤال رد متظاهرا بالبرود..
فاتح؛مانعرفش من وين جاني اساسا.لو كنت نعرف قلت..ولو كان ليا من الاصل كنت قلت انه ليا مش حننكر..لكن هو مش ليا..وابتسم بإستفزاز...
عمر البكوش"المدير":لهالدرجه لامبالي ومستهين بالحبس وبقوانينه .
فاتح؛والله مش اني المستهين..المستهين هو اللي قدر يدخل هدا داخل من الاساس وعده حق يستهين ع فكره..
مدير السجن قعد يشبحله بإمتعاض..
والعنصر اللي واقف وراه كان يشوفله بحده..
تنهد المدير بعدين قال:يعني ماتبيش تقول..
فاتح بإبتسامه متهكمه:قتلك لو نعرف نقول والله...
هز راسه وقال؛ارفعوه للإنفرادي خل يقعد اسبوع يراجع فيه ويفكر بعدين نشوفوه مرة تانيه..
ضحك فاتح ضحكه تهكم..
والعنصر خداه ومشي طلع بيه من المكتب...
وتوجه بيه طول لمكان الحبس الإنفرادي...
🍁في المهجع..
زياد بإنفعال:اني لاصق فيه 24ساعه..حتى في الوقت اللي يخلي فيا فيه اني واثق ومتأكد انه مايديرش حاجه زي هادي..ماعنده علاش يجيبه اصلا..
خالد:اهدى ياولدي اهدى..كله واضح واضح من مدبرهاله..
سراج:ربي يهديه حتى هو يحساب روحه قد الكبير...
وعقيل يسمع فيهم وهو يفكر..
زياد هز راسه وشبح جهة بوابة المهجع وقال:عندك حق مش قده كان الحكومه بروحها معاه..
عقيل شبح لزياد..
خالد:خلاص زياد انهي..
مراد؛توا اسكت خل نعرفوا شن يصير في قبل..
ع جية واحد من العناصر..
مشاله زياد طول وقاله؛وينه فاتح..
:في الانفرادي...
كلهم استاءوا لما سمع شن قال العنصر..
ورد فعل زياد كانت بنفس درجه انفعال...خبط بيده باب المهجع بقوة..بعدين مشي طول لغرفته وخشلها وسكر وراه الباب بقوة..
🍁••••
وفي المهجع ب1
كان خليل مقعمز ع وحده من الطاولات يراجع..
وعيون اسعد وجماعته عليه وهما مقعمزين في طاوله تانيه...
شويه وجي العجيلي حط طاسة الشاهي لخليل وقال؛تفضل يادكتور..
قام خليل عيونه في العجيلي ابتسمله وقال:بارك الله فيك..
العجيلي:تسلم..موفق ان شاء الله..
خليل:ان شاء الله...
مشي العجيلي..
وخليل رفع طاسة الشاهي بيشرب منها عيونه جو ع اسعد..
اسعد حياه بحركة الراس..
خليل شبحله شويه بعدين ردله..
ع جية عنصر للمهجع وقف في الباب وشاف لأسعد واسعد شبحله..
اشرله بعيونه...واسعد هز راسه...
وهدا كله ع عيون خليل...غيرهم بعدها ورجع يقرا..
واسعد رجع يشوفله...
🍁🍁🍁🍁
الجو صقع...
ضمت نفسها وهي تراجي والقلق مسيطر عليها..
عاودت اتصلت بيه...مايردش...
مريم بقلق:ياربي خير...يارب...
معاش قدرت تتحمل بروده الجو وهي لابسه لبس غير ملائم..
ناضت ومشت للدروج ونزلت للشقه...
خشتلها من هني..وتليفونها رن من هني...
سكرت باب الشقه وردت طول..
مريم بلهفه وخوف:ايوه جهاد وينك!؟
جاها صوته يتكلم نبرة ماعجبتهاش..
"جتني خدمه مستعجله ماشي لزليطن (زليتن)"
مريم؛توا!!
"ايه صاحب الورشه ماقدرش يمشي وبعتني اني..."
مريم بخوف:توا ياجهاد الساعه قريب 12!!
"مش مشكله الطريق امان...هي توا بنسكر  سلام"
سكر وهي تقول؛جهاد..جهاد..راجي...الو...
شبحت للشاشه لقاته سكر...
قعدت تفكر بخوف...في شي صاير قلبه هالقلبه..
اسلوبه معاها جاف ويتكلم بالسيف..
عقلها طول جابلها اللي صار معاها في الجامعه...
ومن غير ولد عمها...اللي ماسداش اللي داره فيها ومازال يبي يدمر حياتها ع الآخر...
مشت بخطوات ثقيله لدار النوم..
خشتلها...ومشت للسرير قعمزت عليه...
قعدت تشبح للفراغ ودموعها يطيحوا...
ماكانتش تحساب ان لحظة الضعف اللي استسلمتها حتدفع ثمنها غالي لهالحد...
كل اللي قاعده تعيشه مريم..هو نتيجه هديكا اللحظه اللي سلمت فيها نفسها لشيطان الحب المزيف...
🍁وجهاد كان يدفع في ثمن اخطاء ماضي كان فيها هو هدا الشيطان..
العذاب اللي قاعد يعيشه توا كله كان نتيجة لقلوب حرقها..ومشاعر لعب بيها...واعراض هتكها وهو يدعي الحب...
ممكن هو ماانخدعش في مريم..بس اختار يكون موجود معاها وهو عارف عنها كل شي...وهدا اصعب...
حتى لو كان مايحسش اتجاهها بمشاعر حب...بس تقعد مرته وع ذمته...اي شي يصير معاها يمسه..
اي غلطه ترتكبها ترجع عليه...هي في وجهه هو ع كل حال..
لما فكر يعيش معاه حياة زوجيه حقيقيه...
كان رغبة منه انه يعطي نفسه ويعطيها فرصه ممكن بعد هالفرصه الزوز يلقوا السعاده اللي فقدوها وقاعدين يدوروا عليها...
بس مع الأسف...السعاده بعيده بعيده هلبه ابعد مايكون عنه🍁
توجه للمزرعه متاعهم هديكا الليله بش بيبات فيها..
واتصل بصاحب الورشه وزاد تأكد منه ع الخدمه في زليتن وقال انه حيقعد فيها يومين..وجهاد فرح وين عرف الحاجه هادي...محتاج يكون بعيد بش يهدى...ويعرف يتصرف صح..
🍁🍁🍁🍁
وتاني اللي كان الجمعه..
مرت ساعاته الأولى عاديه زي كل جمعه من كل اسبوع..
بس مريم كانت في حالة تانيه..
مهبيه ومش مريم اللي يعرفوها..
وهدا اللي خلا عفاف تشك انها متعاركه هي وجهاد..
والباقي لاحظوا حالتها اللي تغيرت بس ماقدر حد يسألها.
لاحماتها ولاسلفتها...
🍁بينما في حوش جيرانهم..
هيثم بعد ماروح من صلاة العصر...
طلب من خالته تقول لسارة تجيه في داره...
وسارة حست بالقلق او مابلغتها خالتها وفي بالها توقعت في شن يبيها بوها..
وصلت باب الدار ودقت..
"خشي"
فتح الباب وخشت..
هيثم وهو مقعمز ع كرسي كنبه في الدار؛سكري الباب..
سكراته ساره...
هيثم؛جيبي الكرسي وقعمزي..
سارة جابت كرسي المكتب وقعمزت مقابله بوها..
سارة؛نعم بابا..
هيثم ابتسم وقال؛شن جو القرايه..
سارة؛الحمد لله لحد الآن ماشية تمام..
هيثم؛ومقال الشهر الجاي.
سارة وهي تحاول تخفي حزنها:باديه نكتب فيه..
هيثم؛تمام تو نعرف ع شني لما ينزل...باهي..والقرآن..
سارة؛الحمد لله..المعلمه اللي نتعلموا عندها الله يبارك مراة ملمه بالقرآن من جميع النواحي قاعدين نتعلموا منها هلبه حاجات..
هيثم؛حلو...غير عيونه عنها وعقد حواجبه وقال:بابا سارة...شبحلها وقال...بنحكي معاك في موضوع نبيك تسمعيني وتحاولي تستوعبيه تمام..
سارة قلبها بدي يدق بخوف..
هيثم؛امس جاني مجاهد زي ماتعرف..
وجهها بدي يحمر شويه شويه...
وهو ركز عليها وقال:الشاب هدا...عاجبني هلبه...خلوق..متدين..رزين..عقله كبير راجل قد المسؤوليه اي اب يجب بنته زي عيونه يتمنالها شاب زي هدا يكون زوج ليها..
نزلت سارة عيونها وهي بتتبخر من الخجل..
هيثم؛وهو طلبك مني امس..
قلبها فر فران...
هيثم؛اني توا نبي نعطي فيها كلمه..والزواج نبيه بعد تكمل الثانويه..وحندعمها بش تكمل قرايتها ومش حنوقف في وجه طموحها بكل..وبالحرف الواحد قال...كلامي مسؤول عنه وشدوني منه...
سارة كانت كل مالها تزيد تميل لمجاهد اكثر واكثر وتعجب بيه اكثر..وخوفها عليه يكبر..
هيثم:اني شخصيا مش معارض..ونقولك علاش..لأن يابابا الراجل الباهي في وقتنا هدا ولى عمله نادره..واللي زي مجاهد مافيش منه هلبه في وقتنا هدا...لهدا يابابا مانبيش نفرط فيه...راجل نقدر نأمن ع بنتي معاه ونطمن عليها..
سارة وهي تسمع في كلام بوها...
كانت فرحانه هلبه اللي بوها حاب مجاهد لهالدرجه..
بس وين يجي بين عيونها رفيق..قلبها ينقبض بقوة...
هيثم؛هاه بابا شن رايك؟
رفعت عيونها فيه وقالت؛مانبيش بابا...
بانت ع وجه هيثم ملامح المفاجأه...
سارة؛توا ولبعدين مانبيش اني نبي نلهى بقرايتي وبس..وزي ماتعرف انت اني نبي الطب..والطب مشواره طويل ويبي الواحد يكون متفرغ ليه هو بس..وانت عارفني لما تبدا القرايه ننسى نفسي..
هيثم؛قتلك هو حيدعمك...وياما منهم اللي تزوجوا وهما يقروا وتخرجوا بتفوق..لما يكونوا الطرفين متفاهمين كله يصير بنتي...
سارة بضيق؛اني مانبيش توا..
قعد يشبحلها وهو ساكت..
وهي نزلت عيونها لوطا وكانت متوترة..
هيثم هز راسه وقال؛خودي وقت وفكري بابا عند الاسبوع هدا قدامك فكري فيه كويس وقلبيها ف راسك واني عارفك لأنك واعيه زياده عن اللزوم حتاخدي القرار الصح..
سارة تنهدت وقالت مسايرة:إن شاء الله...
هيثم؛تقدري تطلعي..
سارة؛قبل مانطلع بنقولك حاجه..
هيثم؛شني؟
سارة:خبراتك خالتو ماجده..
هيثم؛بشني؟
سارة بخجل؛عمتو..بتولي ام..
قلبه دق دقه وجعاته...وعيونه تعبوا بالدموع اللي شدهم بقوة..
عقد حواجبه وقال:تمام..بري ديريلي قهوتي بابا جي وقتها..
تنهدت وهزت راسها وناضت طلعت من حداه...
وهو بعد ماطلعت سرح بتفكيره في اخته وقلبه واجعه عليها...
🍁وفي دار نسيبه في الدور الثاني..
كانت ماجده تكلم فيها بالتليفون وتشوفلها من الروشن..
وهي من روشن شقتها كانت واقفه تشوف لخالتها...
"اني كنت نحسابها ماشيه طيب طلعت تغسل في الماعين ياخالتي.."
ماجده بصدمه؛كيف!؟
"والله سمعت الحاجه صالحه بوذني تعارك فيها وتقوللها عفاف ع اخر الوقت تغسل للناس في ماعينهم.."
ماجده بصدمه ممزوجه بالأسف؛لهالدرجه وضعكم صعب..
"شن بنقولك ياخالتي اني مانبيش نشكي بس قلبي وجعني ع عمتي ونبي نتكلم مع حد بش نرتاح بس"
صوت نسيبه الباكي واللي قالت عن عزوزتها خلى ماجده في حالة من الغضب والحسرة ع الحال اللي وصلوله هي واهل زوجها..
بعد مانهت المكالمه...
نزلت لوطا وهي تبكي بصمت...
وصلت لوطا بتمشي بطريقها للكوجينه وتمسح في دموعها..
لمحت ولد اختها مقعمزة في الصاله يشرب في القهوة ويشوف للروشن..
فكرت هلبه قبل لتمشيله وتقعمز معاه وتحكي...
ماجده بألم؛مش مصدقه الحال اللي وصلوله حوش خالد..
هو حرك عيونه جيهتها..
ماجده:تكلم فيا نسيبه وهي تبكي قالت عزوزتها تمشي للمناسبات بش تغسل الماعين..تصور..عفاف!! زمان صح خدمت طيب للناس في المناسبات لكن هدا شي وغسيل الماعين شي تاني...
غير عيونه للروشن..
ماجده شبحت لوضعية البرود اللي هو فيها وقالت؛مش هامك يعني
هيثم؛وشن تبيني نديرلهم..نمشي نطق ع بابهم ونعطيهم فلوس!
ماجده:هيثم خيرك هكي مولي!راهو اختك عايشه في وسطهم ووضعها صعب حتى هي..قعدت ع اخر الوقت تخدم في حضانه تشمل وترضع في صغار الناس وانت عارف كويس درجتها شن هي في تدريس...
هيثم؛والله اني خيرتها وهي اختارت خليها تتحمل نتيجة اختيارها..
وقعد يرشف من القهوة..
وخالته تشبحله بأسف بعدين قالت؛هكي دير في امانة بوك وامك..
هو ناض بفنجان القهوة ومشي طلع من الصاله ومن الحوش للجنان..
وهي بعد لحقاته بعيونها شافتله من الروشن كيف وقف وقعد يشرب في قهوته بروقان..
حركت راسها يمين ويسار بأسف بعدين مشت لدار البنات الصغار بش تقعد معاهم وتنسى همها...هم بنت اختها...
🍁🍁🍁🍁
وفي من همه في حبيب ع قد ماهو قريب قلبه ابعد من ابعد نجمه...
مقعمزة في الصالون ع الكنبه اللي يرقد عليها.
وطارحه قدامها شيتاتها وفي يدها بيرو تلعب بيه ع صوابعها..
وتشوف في التليفون وهي تراجي منه في اي شي..
اتصال...رساله....
بس بدون فايده...لوحت التليفون والبيرو ع الشيت ..
واتكت ع مسند الكنبه وهي تشوف للسقف...
اخترقت ريحته انفها..ريحه عطره العالقه فيها..
غرقوا عيونها بالدموع...غمضتهم..طاحوا دموعها اللي القلب يذرف زيهم دم....
🍁وهو في زليتن..
لاهي بالخدمه ع السيارات اللي خدوا اغلب نهاره..
وصحاب السيارات اكرموه وقامو بواجب الضيافه معاه...
وبرغم هدا كله مازال عقله مشغول بطرابلس واللي فيها والصورة مازالت بين عيونه مش قادر ينساها..
🍁🍁🍁🍁
وفي الحبس..
خوه في المكتبه..
مقعمز يقرا كان غارق في عالم القرايه وناسي بيها وجوده في السجن...
وفي عز الهدوء والإنسجام...
انفتح باب المكتبه..
شبحله...وشاف وجهه مكروه اشمئز لما شافه..
بس دار روحه عادي وتجاهله ولهي بالقرايه..
هو قدمله وقعمز قدامه...
اسعد؛والله قصتك قصه ياراجل انت..
وخليل متجاهله تماما..
اسعد؛قراية شني اللي مضيع سنينك الضايعه فيها غير شن بديرلك بس...
وخليل ع حاله..
اسعد؛تعرف...لو شغلت دماغك كويس تطلع من هني قبل ماتم المده متاع حبسك بوييين...
قام عيونه وشبحله..
اسعد بضحكه؛عجباتك ولا..عجباتك يامعفن...عارفني نعزك هلبه اكيد وصلولك سلامي قبل...من ايام كنت مع بوك في الخدمه والجماعه يشكرولي فيك وماصدفتش وتلاقينا..مكتوبلنا نتلاقوا هني...
خليل يشبحله وهو ساكت..
اسعد عكرش وجهه وقال؛انت ديما ساكت ومنطوي ع روحك هكي!!...
خليل مازال يشبحله بنفس النظرات...
اسعد:ع العموم اني مش جاي نهدرز عليك...اني جاي...ضحك وقال...نعرض عليك عرض وانت قدامك واحد من زوز..
ياتوافق...ياتوافق...
خليل؛شن مازال تبو..
اسعد بضحكه:واخيرا سمعت صوتك الحمد لله...قتلي شن تبوا..ياغالي اللي نبوه عارفه كويس..
خليل عقد حواجبه وقال:شن هو؟
اسعد؛تكمل معانا المشوار..
رفع حواجبه متعجب..
اسعد؛ايه ماتستغربش تكمل معانا من هني...اصلا اني اخترت نخش الحبس بش نخدم ع راحتي الخدمه هني اسهل من الخدمه برا..
خليل؛اسمع جاي..اني رجعت نخدم معاكم لأني مجبور..وصار وطحت وحطيت ع كتافي نص البلي وخديت نصيبي لهني وساد ياسر...
اسعد قعد يشوفله بإبتسامه وهو ساكت...
خليل:دوروا ع غيري واني فوتوني وطلعوني من روسكم..
اسعد هز راسه وهو ساكت.
خليل:وتوا توكل...
اسعد ناض وهو مازال يهز في راسه ومشي طلع من المكتبه...
بعد ماطلع...خليل خدي نفس عميق بعدين رجع يقرا وهو يردد...
"لاحول ولاقوة إلا بالله"
🍁🍁🍁🍁
وعدى هاليوم....
وجي اليوم اللي بعده..
كانت سارة طالعه من الحوش بطريقها للباب الخارجي..
فتحت الباب وطلعت وسكراته وراها...
ومشت...
ع طلعة تهاني ورفيق معاها..
لما شاف سارة قال لتهاني؛بريلها طول بري..
تهاني بخوف؛فكنا من المشاكل..
دفها وقال؛قتلك بري..
تهاني وهي مضايقه وخايفه مشت لسارة..
وقفت جنبها وقالت..
تهاني؛صباح الخير سارة..
سارة :صباح النور..
لاحظت تهاني ملامح البكي باينه ع وجهها مابتش تسألها عن السبب لأنها عارفاته..
فهاليوم امها سكرت وفاتها السنه...
وتاريخ موتها لاينسى عند كل الناس اللي تحبها...
تهاني:شن الجو..
سارة هزت راسها وقالت؛تمام...
ورفيق قرب منهم لين وصل فيهم..
رفيق بتهديد؛شن جي يدير عندكم هداكا يوم الخميس!
سارة خافت وسرعت مشيتها وخلت تهاني وراها.
تهاني وهي قريب تبكي:رفيق فكنا بالله عليك..
ورفيق لحق سارة وقال:تعرفي لو يطلع اللي فبالي صح..نخليك تبكي عليه ياسارة بالله...ومش تقولي كلام...اقسم بالله نخلي امه تعيط عليه ...
وفات من حداها...
وخلاها ترعش مع بعضها ودموعها ينزلوا...
جتها تهاني شدتها من يدها وقالت:سارة..
جبدت سارة يدها وقالت؛خليني..
ومشت تجري للباص وركبت فيه..
وتهاني كملت طريقها وهي تمشي وعيونه لوطا ودموعها نزلوا كان في من يتفرج ع اللي صاير من الناس..
ماصدقت وصلت في الباص حتى هي وركبت...
🍁🍁🍁
وطول الطريق وسارة في الباص تبكي والبنات اللي معاها يحاولوا يهدوها وهما مش عارفين خيرها...
وماصدقت وصلت للمدرسه..
نزلت من الباص وخشت للمدرسه وهي تمشي بإندفاع...
وصلت في الساحه وقعدت دور بعيونها ع دانيه..
لين لقتها..
مشتلها طول...خدتها من وسط البنات اللي انصدموا في حركتها..
دانيه بصدمه؛سارة خيرك!
سارة ودموعها ينزلوا قالت بلهجه حاده وقاسيه؛قولي لخوك يدور غيري اني مانبيشي مانبيشي...
دانيه وهي مصدومه:سارة خيرك شن جاك!
سارة؛من تصرفات خوك التافهه ماشي يكلم في بابا شن يحساب بابا بيجبرني عليه!؟ اني مانبيشي قوليله مانبيش مايصلحش بيا....
دانيه وجعها خوها ومارضتش فيه انتابها الغضب من كلام سارة؛خوي عمره ماكان تافه والحركات التافهه مش ليه خوي راجل مامنهم اللي يتمنوا عفسة رجليه غير انتي المسكينه وربي حارمك بس...
ومشت وخلتها ودموعها في عيونها...
وسارة وهي تسمح في دموعها مشت طول بتركب لفصلها لأن النظافه عليها..
ركبت وراها زميلتها اللي معاها في الدور..
واول ماخشت للفصل..
لقت ساره مقعمزة ع المقعد وحاطه راسه عليه ومدرقاته بذراعها وهي تبكي بالعبره...
وتقول...
"وينك ياماما..وينك..محتاجتك هلبه ياماما هلبه"
والبنت تشوفلها ودموعها ينزلوا وجعتها وقلبها تقطع ع حالتها...
🍁اللي عاش نفسها زياد...
وهو في الساحه مقعمز بروحه...
يرسم بالتراب ويبكي...
والحرس يشبحوله ومش عارفين خيره...
وهو مستمر يرسم ويذكر في تفاصيل هداكا اليوم ..
اليوم اللي من بعده ظلمت حياته...وفقد فيها طعم كل شي حلو...
《 نبيك قبل تخش الكليه تعقد النيه..انك ماتطلعش منها الاوانت ناوي تكون للناس زي البلسم بوجهك البشوش وكلامك الطيب... مفروض اول حاجه يتعلمها الدكتور ان نص العلاج في سماحة اخلاقه وطيب نفسه مع مرضاه..زي بوك توا..》
وهو يذكر في اخر وصيه منها ليه...
قعد يشوف للي رسمه بالرمله..
كان وجهها هي وع وجهها ابتسامه ماشافش احلى منها في حياته...
غمض عيونه وانهار بالبكي...
ع خشة خليل للساحه فقده ع الفطور وقعد يدور فيه...
لين جابه واحد من العناصر للساحه..
؛تراجني بش يقعد هني بروحه ومن بكري وهو مقعمز غادي وهادي حالته...
خليل:نبي نمشيله..
هز العنصر راسه بالموافقه..
وخليل مشاله ..
وصل فيها قعمز جنبه وشاف الرسمه تألم هلبه..وخدي زياد في حضنه...
وزياد يبكي ع امه زي طفل الصغير وهو يقول؛مازال ماشبعتش منها مازال...مازال قاعد نبيها زي زمان...نبي امي...
خليل زاد ضمه وقعد يمسح ع ظهره وقاله؛وبشر الصابرين الذين اذا اصابتهم مصيبه قالوا إنا لله وإنا إليه راجعون...كلنا لله وسيورنا بنولوله يازياد كلنا لهالطريق...اصبر واحتسب والموعد في الجنه ان شاء الله..غادي لافي موت ولاهم ولافراق ياصاحبي..
🍁🍁🍁
وكانت نسيبه عايشه نفس الحاله وهي فالروضه...
مع الصغار تلعب وتغني معاهم...
بسم الله...بسم الله...احلى كلام تعلمناه...
وتذكر في اسيمه اللي كانت تحب تغنيها لصغارها...
فوق همومها واحزانها هالذكرى المؤلمة زادتها على مابيها..
🍁🍁🍁🍁
بس هالذكرى مرت ع جنان وريحان بدون مايحسوا بيها صغيرات ومازال مش واعيين كفايه..
ومافي فالحوش حسسهم بأي شي...
لاخالتهم....ولابوهم...
هيثم هداكا اليوم كان في المبنى اللي خداه بس يحوله لمجمع عيادات في وحده من مناطق طرابلس..
وكان معاه موظف من وزارة الصحه جايه معاه لجين..
هيثم:نبي كل شي يكون ع عينكم..
:والله يادكتور غير نعرفوا انك صاحب هالمكان تاخد الترخيص..
ابتسمت لجين..
هيثم بإبتسامه؛بارك الله فيك..ان شاء الله حنفتتحه الاسبوع جاي..
:موفق ان شاء الله..
هيثم؛آمين..
لجين؛حيكون اسمه ع اسم المنطقه..
هيثم:اكيد...ومن البدايه حيكون الدوام فيه 24ساعه...
لجين بإبتسامه؛ممتاز..حيفرحوا اهل المنطقه هلبه مساكين يعانوا من نقص الخدمات الطبيه..يعني الواحد لو عنده حاله مستعجله يقطع مسافه بش يوصل لأقرب مستشفى...
هيثم وهو يمرر في نظره ع المكان..وهذا اللي خلاني نفتحه هني...
ولجين تشوفله بإبتسامه وفي عيونها نظرة فيها لمعه حلوة...
🍁🍁🍁🍁
هو بعد ماكمل شغله غادي...
مشي بسيارته للروضه اللي تخدم فيها اخته..وقف بعيد عنها بمسافه وهو يراقب..
لعند ماشافها طلعت من الروضه وروحت بسيارتها..
هو قدم بسيارته قدام الروضه ونزل...وخشلها...
🍁🍁🍁🍁
الساعه الخامسه عصرا...
"راجيه لين يتغدا وبعدين قوليله وسادك بكي تو سكرك يرقى"
دانيه ببكي؛وجعتني منها هلبه ووجعني خوي..شايفاته مش قد المقام..لما قلبتها في راسها قالت مش حيقدر يعيشني زي ماعشت في حوش بوي..
رتاج بحزن؛لالا سارة ماتفكرش هكي..
دانيه بنبرة باكيه وانفعال؛اني كنت نقول زيك في نفس الكلام..وكنت نقول انها تحبه ولما يخطبها حتوافق طول...صدمتني لما قالتلي اني نفكر...وبعدين قالت..مانبيش توا..وبعدها مانبيشي لما كلم بوها...شن معناه هدا يارتاج...!؟
فجأه..دق باب الدار...
وجاهم صوته وهو يقول...
"دانيه..رتاج"
شبحوا لبعض وماقدروش يردوا...
دق مرة تانيه وقال..
"دانيه"
مسحت دانيه دموعها وقالت:خش ..
هو فتح الباب وخش ورده ردان بدون مايسكره..
شاف حالة دانيه وقال؛خيرك!
دانيه:انت مشيت لدكتور هيثم كلمته ع بنته؟
عقد حواجبه وهز راسه بإيجاب..
دانيه؛مالا اسمع...انساه موضوعها بكل وشوف غيرها تستاهل اللي خير منها الف مرة..
هو بإستغراب شديد قال:علاش تقولي هكي..
ورتاج تشبحله بحزن..
دانيه نزلوا دموعها وهي تقول:اليوم جتني في الساحه قدام الكل وقالتلي قولي لخوك يشوف غيري مانبيشي...تقول فيها وكأنك قاتل روحك عليها باش توافق..قالتلي يحساب بوي بيجبرني عليه..
مجاهد بصدمه:هي هكي قالت..
دانيه ببكي:لتوا مش مصدقه اقسم بالله..شن اللي خلاها ترفضك ماعرفتش كل مرة نحط سبب ونقول هو بس وين نذكر انها سارة مانصدقش....
مجاهد قعد يشبح لأخته..
بنظرة عيونه تبان حاده..بس في داخلها ألم قاللها بصوت مخنوق:ماتبكيش..
ولف ومشي طلع من حداهم لداره خشلها وسكره عليه..
ومن اخر الممر كانت مقبوله واقفه تشوف لدار البنات وهي رافعه حاجبها وتهز في راسها..
🍁🍁🍁🍁
وهداكا اليوم..
مر بصعوبه ع سارة...اللي كانت حابسه في روحها في دارها وهي تقرا في القرآن وتبكي..
حتى للجامع مامشتش..
وخالتها عارفه مابيها..هدا علاش شغلت روحها مع الصغار..
ماتبيش تذكر تفاصيل هداكا اليوم المر..
اما هيثم..
كان مقعمز وفيده الآيباد متاعه يتمم في اجراءات معينه تخص مجمع العيادات اللي بيفتحه..
رفع عيونه وشاف للوحة زياد ابتسم وقال؛هدا كله ليك انتي..
شد دمعته اللي عبت عينه ومسحها قبل ماتنزل ورجع لهي باللي كان يدير فيه...
🍁🍁🍁🍁
تاني يوم...
لبست وشاحها..
بعدين خطت شنطتها وقامت كتابها...ومشت بتطلع مم الشقه..
انفتح الباب..
وخش هو....
هي لما شافاته تفاجئت..
اما هو سكر الباب وحول اللي في رجليه وقال:صباح الخير من غير مايشوفلها..
مريم وهي تشوف لحالته قالت؛صباح النور..
خش وهو يقول؛تعالي..
هي لحقاته وقلبها يدق بقوة من الخوف...
وقف في الصالون وهي وقفت قدامه..
قام تليفونه وحط ع الصورة ومدهولها..
هي خداته ولما شافت الصورة انصدمت...
جهاد؛اني يامريم لما فكرت ناخدك..صح واخدك واني ناوي الفراق وحتى انتي..واني ربي عالم بنيتي معاك شن شكلها..
ماشي معاك بنيه صافيه وربي عالم..قبل لما هدرزت وقتلك صارحني وكنت نحسابك وقتها كنتي معاي صريحه وصادقه..لكن شكلي طلعت غالط...شوفي اني قلبك مانقدرش نتحكم فيه..لكن نقدر نتحكم فيك انتي..اني مش درويش ياغبي يامريم اني مايستغفلني حد بابنت الناس حاسه روحك مش قادره تعيشي معاي وانتي محترمتيني.
توا توا نعطيك كلمتك وتمشي ع حالك..اما بش نخلي كلب زي هدا يضحك عليها ويهزا مستحيل...
مريم اللي كانوا دموعها زي السيل قالت؛كملت كلامك..قلت اللي عندك كله...تمام..او شي بارك الله فيك ع الجميل اللي درته معاي وحيقعد في رقبتي ليوم الدين...وتاني شي..اقسم بالله العظيم..اقسم بالله..مانحمل في قلبي لهالمخلوق الحقير الا الكره والحقد..تي اني كرهت روحي بسببه...اما عنك انت والله مانفكر نزل من احترامك حتى بالتفكير اقسم بالله صايناتك اكثر وحطاتك في عيوني ومراعيه ربي فيك وربي يشهد...اما عن الصورة هادي غلطت لما ماقتلكش غلطت خوف عليك لاني عارفه ردة فعلك كيف حتكون...الحقير هدا جاني يومها واني هربت منه وهددني انه حيفضخ بيا لو ماوقفتش وسمعته واني نعرفه حقير ومسخ يدير كل شي..كان جايني بش يعطيني الدعوة متاع عرسه..مدهالي وقالي كلام ماجرحنيش ولاقهرني زي ماذبحني كلامك توا..
كلامك انت هو اللي قهرني ياجهاد..لكن عندك حق..تقعد راجل زيك زي كل الرجاله صعب عليك الوضع اللي حطيت نفسك فيه ومانبيش نزيدك ع مابيك لأنك مش ناقص..
مشت طول لدار النوم..
وهو مشي وراها..
طيحت شنطتها وكتابها..
وخدت شنطة كبيره وحطتها ع السرير وفتحتها وهي تبكي بقهر..
وهو يشبحلها..
ندم اشد الندم ع اللي قاله...واذكر كلام هيثم ونصيحته ليه وكأنه عارف ان هدا اللي حيصير..
مشالها وسكر الشنطه وقال؛خلاص انسي.
مريم ببكي:حول بالله عليك..
جهاد خدي منها الحوايج اللي في يدها ولوحهم..
وقال:اسف خلاص..تعالي..
غضبها وحزنها والمها احتواهم في لحظه..وقعد يهدي فيها وهو يعتذر ويقول..اني حمار مانفهمش..مفروض مشيتله وين ماهو فتحتله بطنه وريحت البشريه منه المسخ هدا..
مريم ببكي:لا رد بالك ديرها ماضيعش روحك بسببه الكلب هدا بالله عليك..كان تصير فيك حاجه مش حنسامح روحي عمري كله..
جهاد تنهد وقال؛باهي انتي سامحيني...
قعدت ساكته..
بعدها وباس راسها وقال؛سامحيني..
مريم شبحتله بعيون نظرتهم مكسورة..وجعاته هلبه..
جهاد بألم؛بالله عليك سامحيني مريم..
مريم بنبرة باكيه:مسامحاتك..
هو ابتسم..وحط يده في جيبه وطلع منها العقد اللي شراه..
ولبسهولها...
وقلبها كان في حاله يرثى لها..
جهاد؛شوفي ع المرايا..
هي مشت وقفت ع المرايه وشافت العقد ابتسمت من بين دموعها..
جهاد وهو وراها؛عجبك!؟
مريم ابتسمت من بين دموعها وهزت راسها بإيجاب..
هو غمزلها وقال؛عزوزة..
وهي ضحكت...
🍁🍁🍁🍁
خدت اذن من الروضه..
وتحركت بسرعه للجامعه...
كان فيه مكان مخصص للسجناء بش يمتحنوا فيه..
هي كانت واقفه قدامه تراجي بفارغ الصبر...
وهو داخل كان يمتحن...
وغارق في الاسئله يحل فيهم واحد ورا التاني..
وهالشي لفت انتباه الدكتور اللي واقف يراقب..
الوحيد اللي كان يجاوب بمعنى الكلمه...
وعدى الوقت..وانتهي وقت الامتحان...
برا
كانت نسيبه واقفه حدا السيارة تشبح للباب..
فجأة انفتح..
قدمت وهي ملهوفه...
بدوا يطلعوا واحد ورا التاني مكلبشين والعناصر عن يمينهم ويسارهم..
شويه وطلع هو..
لما شافاته قلبها فر..ومعاش عرفت كيف بتلفت انتباهه..
التفتت للسيارة وحطت بدها ع الكلاكس..
فجعت كل الموجودين..
هو لما شافه حتى من عيونه ضحكوا..
هي ضحكت وقعدت تاشرله بيدها من بعيد..
وهو يضحك..
اشرتله بيدها شن درت..
هو هز راسه ورفع ابهامه .
هي بالإشارات قالت الحمد لله....لما شافت فوق..
وهدا كله والعناصر والمسؤول عنهم يتفرجوا..
المسؤول؛هيا هيا جيبوه..
نسيبه لما شافتهم بياخدوه..
عاودت كلكست مرة تانيه..
خليل؛ثانيه بس بالله عليك..بعدين شبحلها وسألها بحركة الراس..
نسيبه بإبتسامه اشرت عليها وعليه..بعدين دارت رقم ثلاته بيدها..
هو بعدم فهم حرك راسه.
هي اشرتله تاني بنفس الحركه..
وهو برضو مافهمش..
نسيبه؛كيف بنقولهاله توا!..
العناصر اللي معاه ضحكوا واحد.منهم قال؛شكلك جايك عزري في الطريق..
التاني قال؛مرات بنيه..
المسؤول؛مبارك.. وهيا..
خليل وهو مصدوم؛بالله عليكم!..وشبحلها وهو يضحك بصدمه من الفرحه..
نسيبه هزت براسها تقول بمعنى فهمت..
هو هز راسه وقعد يضحك ويضحك...بعدين صاح بصوت عالي....
هما قعدوا يضحكوا ورفعوه للسيارة ودخلوه ..
وشويه وتحركت السيارة وهو قالبها داخل ضحك...
واللي معاه مش فاهمين شي لين فهموهم الحرس..
اما هي بعد مامشي تبدلت ضحكتها لملامح الحزن...
وركبت سيارته وتوجهت للروضه ودموعها ماوقفوش...
ولما وصلت غادي..
كان الدوام خلاص انتهي.
••نسيبه؛اسفه جدا خليتكم واحلين..
المديرة وهي تشوفلها بملامح اسف:لازم نتعودوا..
نسيبه بعدم فهم؛تتعودوا؟
المديرة تنهدت وقالت؛مش عارفه شن نقولك..اني اسفه جدا اسفه هلبه..بس مضطرة نقولك ان شغلك معانا لهني وتم..
نسيبه بصدمه؛علاش!؟
المديرة؛بالله سامحيني بس مجبورة واحد من اولياء الامور لما بقصة زوجك دار مشكله وسمعوه الباقي وعرفوا شن في..
وكانوا حيسحبوا صغارهم من هني لولا اني...
نسيبه؛قلتليهم انك حتفصليني؟
المديرة قعدت ساكته..
نسيبه؛امتى صار هدا؟
المديرة؛امس بعد ماروحتي..
نسيبه هزت راسها وقالت وهي شاده روحها:تمام...
طلعت المديرة ملفها من الدرج ومدتهولها وقالت؛اسفه جدا.
خدت نسيبه الملف وقالت؛ولايهمك...
ومشت طلعت من حداها من غير ماتسلم..
خافت كالعاده لو تكلمت اكثر تبكي....
وصلت برا...ركبت سيارتها...وتحركت بطريقها للحوش...

#سبحوا
#قلوب_منكسرة
#البطل_المغمور2

...يتبع....