البطل المغمور "زهور القمر"

الجزء العاشر2

#البطل_المغمور2  "زهور القمر"
#جمان_فريد
#الجزء_العاشر "فرحة عمري2"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
خش داخل وهو يضحك ويفنص فيها وهي طول ضماته وتقول بلهفه ودهشه..
سارة بدموع:ياربي مش مصدقه ياربي..زيزو والله زيزو..
ع طلعة النساوين وفي مقدمتهم ماجده لما شافاته..
طول من فرحتها قعدت تزغرد وكلهم قعدوا يزغردوا معاها..
وزياد يبوس في راس اخته وهو فرحان ومتحشم في نفس الوقت..
ع طلعة نسيبه اللي كانت توتي في روحها بش تمشي لمركز التجميل..لما شافاته انصدمت..
نسيبه:زيزو..
شبحلها وقال بضحكه:عروسه..واخيرا..
جاته تجري ودموعها ينزلوا...
وخرت سارة وهي طول ضماته وهو ضمها..
نسيبه بدموع:ياروحي اني..هدا وين فرحت هدا وين..
وهو يضحك ودموعه في عيونه ويبوس ع راسها..
كلهم كانوا يتفرجوا ع المشهد حتى جنان وريحان اللي كانوا يشبحوا لخوهم متغير عليهم شكله شويه..
ريحان:زياد..
هو سمع صوتها شبحلهم..
لقاهم الزوز واقفات معلقات عيونهم فيه..
وهو مشتاقلهم موت...مشتاقلهم شوق ماله حد...
باس راس عمته تاني وبعد عنهاوقاللهم:عرفتوني!
جنان:زيزو..
طبس وفتح ايديه وقال:باهي تعالوا لزيزو...
جوه الزوز بسرعه وخشوا حضنهم وهو ضمهم وقعد يشم في ريحتهم وماقدرش يتمالك نفسه كان كاب الطاقيه مغطيه وهو يبكي وهما الزوز يمسحوا ع ظهره..
ريحان:استاحشتك هلبه زيزو..
جنان:حتى اني..
ريحان:زيزو اني درت عمليه وصح قلبي بنولي نلعب معاكم كورة عادي..
هو زاد دفن وجهه في رقبتها وقعد يبكي بدون صوت..بس من هزة جسمه حسوا بيه..
وكلهم كانوا يدمعوا معاه..بما فيهم تهاني اللي خشت ووقفت حدا الباب وتفرجت ع اللقاء كله..
جنان:زيزو خلاص معاش تبكي حني نديروا في عرس راهو..
ريحان:ايه عرس يغنوا فيه ويرقصوا..
ضحكوا غصب عنهم..
وهو ضحك ووخر عنهم وقال:هاتوا بوسه..
الزوز باسوه مع بعض...وهو بعدين باسهم..
ومسح دموعه ووقف ع حيله..
ماجده زغردت مرة تانيه وهما شاركوها..
وكانت اصوات زغاريدهم مسموعه في الشارع كله..
هو ضحك ومشي لماجده وقال:خالتي..
ماجده بضحكه من بين دموعها:وليدي..
وضماته...
شويه وبعدت وجاته نوسه حاوطت وسطه وحطت راسها ع كتفه وقالت:اااه ياربي مازال مش مصدقه..
والنساوين وبنات العيله بدوا يقولوا باصوات متقطعه .
"حمد لله ع سلامه..كيف حالك يازياد"
هو بدون مايقيم عيونه فيهم:تسلموا تسلموا...الحمد لله..
ماجده:تعال خش خش..
هو هز راسه ومشي خش وهو شاد عمته وخالته ماجده..
ومشوا كلهم خشوا داخل ماعدا سارة..
اللي جت لتهاني وضمتها وهي تضحك بفرح وتقول:فرحانه بنطير..
تهاني بضحكه:خلوني بنطير طيارة خلوني زي الفرارة..
ضحكت سارة وبعدت وقعدت تدور وهي ترقص وتغني..
خلوني بنطير طيارة خلوني زي الفرارة..
وتهاني تضحك بعدين قالت:تي هيا جيبي الكندره..
وقفت سارة وشبحتلها شويه بعدين شدت يدها وقالت:تعالي خشي معاي .
تهاني وهي مخلوعه ومتحشمه:وين رافعتيني يراجو فيا..
خشت بيها داخل..
وفاتوا الزوز من قدام الصاله اللي كان زياد واقف قدامها ويهدرز عليهم ويجاوب ع اسئلتهم..
التفت لما فاتوا سارة وتهاني من وراه قعد معاهم بعيونه وهو يقول:سمحولي اليوم..وشبحلهم وكمل يقول..وغدوة بعد تم الحفله نولي..
نسيبه وهي شاده يدها:المهم تحضر ياعمري..وراهو انت بدخلني غدوة..
زياد:ندخلك وين!!؟
ماجده بضحكه:للصاله..
زياد؛لالا تبيني نخش وسط النساوين لا..
نسيبه:تي كلهم بحجابهم انتي دخلني واطلع طول..
زياد:لا انسي..
نسيبه:بتسكر بخاطري قصدك!
وحده من النساوين؛وصلها الكوشه وبس..
تنهد وقال:ع خاطرك نوسه بس..
وضمها وباس راسها..
نسيبه بإبتسامه:يسلم خاطره حبيب عمته..
ماجده:باهي توا عادي هكي يخلوك تطلع وتخش..
زياد بضحكه:تحت المراقبه ياخالتي..
وحده من النساوين؛ربي يفك اسرك ان شاء الله..حبستك بشرف
ابتسم مجامله
ماجده:هي برا للمربوعه تريح تو ونجيبلك فطورك..وناضت
هز راسه وقال:نبي دبش..
نسيبه:تو نجيبهولك...
ومشت بسرعه لداره..ع فوتت سارة وتهاني..
تهاني عيونها لوطا وهو يشبحلها ويشبح شن شاده في يدها..
سارة بضحكه؛طويل شن جو..
زياد؛مليح يادريه..
ضحكت سارة وطلعوا من الحوش وهو لحقهم..
وقعدوا النساوين يهدرزوا بين بعض....
:ماتقولش كان مدمن بكل..
:ايه ماشاء الله...
🍁برا...
طلع وشاف سارة واقفه مع تهاني ويهدرزوا..
قدم كم خطوة ووقف وهو يقول؛شن عطتيها..
هما شبحولها..وتهاني متفاجأة في سؤاله زي سارة..
سارة بضحكه وهي تفنص؛وانت شن دخلك؟
زياد رفع حاجبه وقال:واضح كندره..شن ماعندكش كنادر.
سارة انصدمت..
وتهاني قعدت تشبحله بحده وعيونها تعبوا دموع..
سارة:زياد!
زياد بضحكه متهكمه:Sorry بس من زمان فيها هالعاده تلبس منك انتي تقول ماعندها شي..
تهاني طلقت كيسة الكندره وقالت:ياريتهم عدموك ياوقح..
ولفت ومشت بسرعه للباب
سارة بربكه:تهاني..شبحت لخوها وقالت..خزي عليك خزي ولحقت صاحبتها..
تهاني وهي تفتح في الباب انفتح الباب..
وخش هيثم وشافها كيف تبكي..عقد حواجبه وقال:خيرك بنتي!..
تهاني ببكي:حول عمي بالله عليك بنطلع..
سكر هيثم الباب وقال؛ماتطلعيش من حوشي تبكي..شبح لسارة بعدين شاف لزياد وقال:خيرها..
زياد مط شواربه للأسفل بعدم معرفه..
سارة؛ولدك البارد ماحله وصل قعد يتبرد ع البنت..
شبحله بوه بإمتعاض بعدين شبحلها وقال:ماتعدليش عليه بنتي..هدا اللي في قلبه..شبحله برفعة حاجب وكمل يقول..مش على لسانه..
زياد فنص ووجهه ولى احمر..
وسارة شدت ضحكتها..
تهاني بدموع:هو هكي ديما يتقصد يهيني ويتسهوك عليا مش عارفه علاش..
هيثم :اني نعرف علاش..
زياد عيونه قريب يطلعوا.
وسارة خلاص بتضحك..
هيثم شبحلها وقال؛لانه متخلف بنتي متخلف ولدي هدا..
زياد؛شكرا جزيلا..
هيثم شبحله وقال ببرود؛عفون بالنون..
سارة ضحكت..وتهاني قعدت تمسح في دموعها وهي تضحك..
سارة بضحكه:هي خودي الكندرة للأبد معاش نبيها..
تهاني قعدت تشبح للكيسه..
هيثم؛خودي من صاحبتك..
تهاني خدتها وقالت؛ع خاطرك عمي هيثم..
هيثم؛-يسلم خاطرك بنتي..
تهاني :صحيتي سارة..وفتحت الباب وطلعت..
هيثم سكر وراها الباب والتفتله وقال:نبي نضربك ماتخليهاش في خاطري..
سارة تضحك ومشت وهي تقول:يستاهل..
وخشت داخل..
قدمله وشحه من الطاقيه وقال؛غبي..
زياد؛انت لشن تلمح مافهمتش..
هيثم شبحله ع جنب وقال:مادام انت مافهمتش معناها حتى اني مالمحتش..
ومشي خش للمربوعه..
زياد ابتسم ع جنب وحرك راسه يسار شويه بعدين لحقه للمربوعه...
🌸🌸🌸🌸🌸
شويه ومشت نسيبه لمركز التجميل لغرض العناية بالبشرة ..
وبعدين تروح وتلبس البودري في حوش خوها...
اما مريم مشت لحمام البخاري...جهلا منها من اهلها حرمانية الحمام البخاري..وحرمانيه نزع المرأة ثيابها خارج بيتها..
وجيهان مشت لمركز تجميل بش دير حمام غادي صح مافيه حد غيرها بس وقعت في محضور نزع الثياب خارج البيت..
وهدا كله يرجع للتفاوت في الثقافه الدينيه..
بين عالم بيها ومتمسك..وبين جاهل بيها..وبين عارف بس مطنش...
🍁🍁🍁🍁
في المركز..
كانت مستمرة ايام الحمله وهاليوم هيثم مش حيكون موجود لوقت طويل..
كان مشرف من بعيد ونوال كانت يوميا تجي...
وطول ايام الحمله كانت بكامل اناقتها والزينه مافارقتش وجهها..وكانت محط انظار الجميع..
فاتح ماكانش مهتم هلبه للشي هدا لأنه متعود عليه واخد على انه عادي...
هو اكيد مش ديوث...بس الغيرة عنده محصورة في امور معينه..
هيثم كان مش عاجبه اللي يشوف فيه خصوصا ان نوال قاعده في عدةالطلاق...
وفي كل الحالات هيئتها ولبسها كله من المحضورات بعدة  ومن غيرها..
وقعد هيثم متردد بين انه يدير واجبه تجاه ربه..او انه يطلع منها ويقول اني مادخليش..
وماارتاحش لين اهتدي لطريقه يوصل بيها لنوال اللي يبيه..
••ثريا؛ايه بس هي هكي تعودت يعني البيئة اللي عاشت فيها هكي خلتها..
هيثم تنهد وقال:وصليلها ع لساني انه غلط ومايجيش اللي دير فيه ع الأقل المكياج مبالغ فيه صراحه..
ثريا بإبتسامه:إن شاء الله..
••••••••
"والمتخلف الرجعي هدا شن دخله"
ثريا:مش تخلف ورجعيه هدا الدين يانوال..
نوال:بيني وبين ربي هو مادخلاش..
ثريا:ايه وهو ماجبرك ع شي مجرد نصيحه خديتي بيها باهي ماتبيش انسي..
نوال رفعت حاجبها وقالت:شكله هو المركز اكثر من غيره..
ثريا بضحكه:انتي بروحك تتنرفزي منه لما يكلم فيه بدون مايشوفلك..
نوال؛جو زايد يديروا فيه هلبه زيه ع اساس التقي العفيف وهو من تحت لتحت..علق ع لبسي ومكياجي لأنه يفصل فيا واضحه..
ثريا بضحكه:الراجل عنده عيون في راسه يشبح بيهم طبيعي بيطيحوا عليك وركز عليك فتركيزه لا من باب الشهوة ولا حتى الإعجاب..بل عدم الرضا..
نوال؛قريب ديروهولي ملاك نازل من السمي راهو راجل زيه زي كل الرجاله..
ثريا بإبتسامه:توا خلينا منه هو...وخلي تركيزك في كلامه صح ولاغلط!؟
نوال تبي تسكر الموضوع:مش انتي جيتي وصلتيلي كلامه ولا..خلاص..غيري الموضوع وخلي نطلبوا الغدي جعانه..
ثريا بضحكه:اطلبي هي..
🌸🌸🌸🌸
روحت نسيبه من المركز..
وطول لدارها....ووحده من النساوين خشت تلبس فيها الردي البودري...
نسيبه كانت حاسة بشعور من جماله لايوصف..
ومش مصدقه روحها جاها ودارت عرس ولبست البودري قبل عام لو جاها وقاللها هكي بيصير معاك ماتصدقش...
:وتوا قعدت الحوته...
وقعدت تلبس فيها في خلال الحوته...بعدين بعدت وقالت:الله يبارك عليك..
نسيبه ابتسمت بحماس ومشت شافت روحها في المرايه ضحكت..
:هي البسي الشبشب وخودي المروحه..
نسيبه خدت نفس ومشت للشبشب ولبساته وخدت المروحه من فوق الزيانه..
مشت المراة فتحت الباب...ونسيبه مشت طلعت..
وتوجهت للدروج وقعدت تنزل ووراها المراة...
وصلت لوطا..وفاتت من الممر متاع الديار لين طلعت ع الصاله..
لما شافوها قعدوا يزغردوا..
ماعدا ماجده اللي كنت تتملا منها وهي بطير من الفرحه وعيونها تعبوا دموع..
سارة:عسل نوسه تهبلي..
ضحكت..
ريحان؛محلاك عمتو..
جنان؛حلوة هلبه..
نسيبه:ياعمري انتم الحلوات..
والباقي قعدوا يقولولها في كلام حلو ويدعولها بالهني..
نسيبه؛مجدي شني!
ماجده من بين دموعها:مجدي عينك يانسيم حميد..
وجتها ضمتها ونسيبه ضمتها وهي تضحك ودموعها في عيونها...
ماجده بعدت وقعدت تمسح في دموعها وتغني.
لبست بوخطين توامه...وعروستنا تقول حمامه...
وشدوا الدربوكه وبدوا بشوط ماتمش لين طابت الرشده المبكبكه..."المقطع"..
🥀اما مريم..
قعدوا يدوروا بيها في شوارع طرابلس وبنات العيله قالبينها اغاني وزغاريد..
هما هكي جوهم عيلة مريم..كله..عادي..عادي..عادي...
لما وصلت لحوش اهلها..
استقبلوها بشوط دربوكه...
وامها تمشي وتبخر في بنتها...
ووسط هالأجواء مريم كانت تتصنع في الفرحه اللي مش حاسة بأي شي منها..
🍁ياقداش خسرتي مريم مقابل لحظة ضعف🍁
🌸اما جيهان..
روحت بالنوبه..
وكانت ع البدله البودريه لابسه حدايد كبار ذهب وخناق ذهب وخواتم ذهب كبار وحاطه شي بسيط من الزينه....
وهي وصاحباتها هيجوا لين عييوا ع النوبه..
والمصورة تصور في كل شي بكاميرا الفيديو....
🍁🍁🍁🍁
وعدا الوقت..
وجي وقت صلاة العصر..
اللي بعده مباشرة جهاد بيقعد ع مريم...
كان وكيله خاله...وهي وكيلها بوها...
خوتها كانوا كلهم موجودين..ياسر حضر غصب عنه قدام الناس..
ومعاذ كان يتفرج ويتمنى لو مايصيرش مستخسر اخته في جهاد ومتحسر عليها...
بينما واحد من ولاد عمهم..
يكون الاخ الكبير لضرار..اسمه رضوان..
هدا مايكونش موجود في ليبيا الا شهرين بس في السنه بحكم شغله اللي برا البلاد..اسمه..رضوان...
كان يصور في الفاتحه بالبث المباشر وفرحان لمريم اكثر من خوتها..
البث متاع الفاتحه كان يتابع فيه ضرار وهو برا..
يتفرج وحداه كاس شرب"خمر" ويشرب ومقهور...
مش حبا في مريم..بل لانه نرجسي متملك بس...يبي مريم تقعد هكي طول عمرها...
ومش مستوعب فكرة انها بتكون لواحد تاني مريم تشوف فيه خير منه...هو يبي يقعد عند مريم كل شي..
"بارك الله لهما وبارك عليهما وجمع بينهما في خير"
كاد ينجن لما سمع هالدعاء..وشاف جهاد كيف وقف ومشي سلم ع عمه...
كان يبي يخرب وينكد عليهم بأي شكل...
🍁والنساوين في حوش اهل مريم كانوا يتابعوا في البث..
لما تم عقد القران بدوا يهنوا ويباركوا لمريم...
"مبروك عليك البراني...ياجدي الريم الغزلاني"...
وبدوا يغنولها وهي انسجمت معاهم..
وامها تشوفلها والدمعه معبيه العين...
🌸زي الدموع اللي في عيون عواطف وهي تشوف بنتها كيف يهنوا فيها بعد عقد قرانها...
ومريم وجيهان وحيدات اهلهم...وطلعتهم حتكون واعرة بزياده...
"راس بنية يامحلاني...إن شاء الله لانمرض لانعاني"
🌸🌸🌸🌸🌸🌸🌸🌸🌸🌸🌸🌸🌸🌸🌸🌸🌸
اما في حوش اهل العرسان..
عفاف؛خالتك اابتسام ومعاها نجوي ومهيبه ومعاهم كريمه مرت خالك وبناويتهم والحاجه صالحه وملاك  بيمشوا لحوش نساباتك..واني والباقي بنمشوا لحوش الدكتور هيثم..
جهاد؛تمام..معناها واتيين..
عفاف:ايه واتيين..
جهاد هز راسه وطلع...
وعفاف خشت وسقدتهم وطلعوا طول...
اما الباقي  ركبوا باقي السيارات وقعدوا يدوروا في المنطقه...
بعدين جو لحوش الدكتور...
طبعا الزوز جهاد وخليل كل واحد منهم رفع فرقه..
جهاد..زكرة...وخليل نوبه...
لما وصلوا قدام حياش نساباتهم.
خشوا النساوين بالكساوي وبدوا كل من الزكرة والنوبه يضربوا...
عند اهل مريم...هيجوا عليها ولاد عمامها وصحاب جهاد مع جهاد...وداخل النساوين...
اما عند حوش الدكتور هيثم...
"عيني ياعيني هيا نرحلوا..عيني ياعيني هيا نرحلوا..
عيني ياعيني وهيا نرحلوا وقولوا محمد وعليه نصلوا..
ورفيق وجماعته وجماعة خليل ومعاهم نيار وولاد العيله قالبين الشارع..
وهيثم واقف يتفرج ومعاه احسان وزياد..وخليل وهو يضحك...
والنساوين داخل يهيجوا عليها حتى هما بدون مايطلعوا صوت...
شويه رفيق جي لزياد ودخله وقعد يرقص فيه..
في الاول كان متحشم بعدين انسجم..
هيثم جي لخليل وقال؛هي خش ياعريس..
خليل؛لا فكي منهم هادم..
هيثم؛تي غير خش ياراجل فرحة عمر هادي ماتتفوتش..
خليل شبحله شويه وقال بضحكه؛حمستني..
هيثم بضحكه:كنت تراجي في دفه.
ضحك خليل وخش..
وهيثم ولى لأحسان..
احسان بإبتسامه؛ليا وقت ع الأفراح..
هيثم:ومن سمعك..
شويه وجاه زياد شده من يده وقاله:هيا..
هيثم فنص وقال:هيا وين..
احسان بضحكه؛خش خش وخود بخاطره..
هيثم؛برا عليا غادي خيرلك..
زياد هز راسه وقال:باهي..شبحلهم وقال بصوت عالي:هوووو...
شبحوله والفرقه قاعده تضرب..
زياد بصوت عالي:هيثم..هيثم...هيثم..
 وبدوا كلهم يردوا وراه ومعاهم احسان..
🌸داخل..
سارة بضحكه؛يبوا بابا يرقص..
ماجده؛ووك عليا بيفوتني..بالله صوريه كله سويره..
ساره بضحكه؛ان شاء الله يرضى..
وخشت تجري لبست حجابها وركبت لدار عمتها وصلت فيها وخشت..كانت فاضيه لأن نسيبه يلبسوا فيها الحولي في دارها تحت..
وقفت في الروشن وبدت تصور من الفتحه..
ولوطا..
مازالوا يهتفوا بإسم بوها..
هيثم انحرج ورفع يده وهز راسه بمعنى باهي.
وخش مع زياد ..
هيثم؛ترد فيها ياتافه..
زياد بضحكه؛هاه هاه هاه هيا هيا وقعد يرقص في بوه..
وهيثم كان يتحرك معاه وهو محرج ع الآخر..
وإحسان يضحك عليه..
خش معاهم خليل وشد هيثم وقعد يشجع فيه..
شويه وهيثم انسجم معاهم برغم انه حركاته كانت محدوده بس عجبت سارة هلبه...وزادت حبت بوها اكثر واكثر..
والحواجز اللي بينه وبين زياد واحد ورا التاني بدوا يطيحوا...
🌸🌸🌸🌸
طلعوا مريم من دارها وهي مغمومه بحولي البدله الكبيرة..
وع يمينه ويسارها زوز صدارات من العيله..
وقدامها زوز شادات المرايه..وقام بنت صغيره شاده صونيه الحنه الشموع ...
ووحده قدامهم طق ع الدربوكه..
وبدوا في غني المالالاة النساوين الكبار..
🌸ونسيبه طلعت من دار سارة..
والصدارات شادينها حتى هي...
وخالتها ماجده اللي كانت لابسه التركيبه ومعاها مرت سليم ولد خوها..
بدوا يلالوا حتى هما...
🌸وعلى جيهان كانوا يلالوا الزمزامات في الصاله....
تستاهلي التخليله..
وتستاهلي الباشا اللي مشتيله..
وتستاهلي الشنبير بشناقيله
وتستاهلي سوق الربيع برحيله
وتستاهلي الخلخال والشعريه
وتستاهلي حزام الذهب يابنيه..
تستاهلي تكليفك..
وتستاهلي واحد قنين كيفك
تستاهلي الحوته..
وتستاهلي الشنبير بالياقوته..
وتدرجي مابين امه وخوته..
وبدوا الثلاته في اماكن منفصله يدوروا بيهم..
وقعدوا يغنوا عليهم...
دوروا بيها دوروا بيها وإن شاء الله السعد يواتيها...
ودارو بيهم السبعه دورات..
ورفعوا ونزلوا سبعه مرات..وقعمزوا وكملوا باقي تفاصيل تقاليدنا الحلوة في يوم الكسوة...
🍁🍁🍁🍁
الساعه الحادية عشر ليلا..
في جنان الحوش من الخلف..
"جموعه"
تنهد وقال؛نعم..
جاته اخته وقعمزت حداه وقالت؛ماتقوليش خيرك هكي وخيي كئيب ومهموم ماتقولش عريس بكل..
جمعه؛حتى اني مش حاس اني عريس..
:العفو وخيي علاش تقول هكي..اللي يسمعك يقول حني جابرينك عليها جيهان..
جمعه:انتم ماجبرتوني على شي اني جبرت روحي المرة هادي..
:وخيي فضفض احكي قول شن في..
جمعه قعد ساكت وهو يشبح في الفراغ بحزن...
:لاحول  ولاقوة الا بالله...باهي توا خلاص ياجمعه البنيه ولت مرتك..
جمعه شبحلها وابتسم بعدين قال؛خلاص انسي ومعاش تشغلي بالك بيا..تو تتساوا اموري..
اخته تنهدت وقالت:إن شاء الله...تبي حاجه نجيبلك حاجه..
حرك راسه بالنفي سريعا وهويقول:تس..
ناضت اخته ومشت خشت داخل..
وهو قعد برا سرحان يفكر في حاله وكيف بيعيش مع انسانه ما يحسش اتجاهها بولا شعور وقلبه مع غيرها..
🍁🍁🍁🍁
"جاني استأذن مني..واني مشيت وسألت وعرفت ان مافيش مشكله بشرط الكلام يكون بحدود يادانيه واني واثقه فيك وهو يبان راجل محترم والحق تريحتله هلبه".
دانيه منزله راسا لوطا وهي متحشمه..
مجاهد؛نعطيه رقمك؟
دانيه معاش عرفت شن ترد..
رتاج بضحكه؛هزي راسك بس..
ابتسم مجاهد..
دانيه هزت راسها بالموافقه..
مجاهد؛خلاص..ونرجع ونقولك ثقتي فيك كبيرة..
وهي تهز في راسها وخلاص...
هو بإبتسامه قال؛تمام..تصبحوا ع خير..
ومشي طلع من الدار وسكر الباب..
دانيه حطت يدها ع قلبها وقالت؛حي عليا يارتاج كيف بندير مش حاسبه الحساب هدا بكل..
رتاج بضحكه؛افرحي ياهبله واحمدي ربك كلها جاتك كيف ماتبي ومتيسرة من جميع النواحي الله يبارك..تنهدت بحسرة وقالت..شوفيني اني لاخديت اللي نحبه..ولاعشت مرتاحه مع اللي يحبني كان في عمر بوي وعنده مراة وصغار تزوجت زي الهاربه وعانيت من بنته ومرته وفي النهايه مات وخلاني حامل هدا كله وعمري بس22سنه...بري بري سلم وخيتي صلي ركعتين شكر لله انتي في نعمة كبيرة..
دانيه بحزن؛ربي يعوضك خير حبيبتي يارب..
نزلوا دموع رتاج وقالت؛الاسبوع هدا عرسه يادانيه..
دانيه:شن خطره عليك وشن فكرك بيه..
رتاج رشفت وقالت:مش عارفه من لما ريته اخر مرة وعرفت انه حيتزوج..منعت نفسي نفكر فيه واني ع ذمة راجل تاني..بس بعد مامات قعدت نفكر فيه هلبه..صح هو مادارش فيا خير..لكن مش عارفه علاش في اخر مرة شفته فيها شفت في عيونه نظرة اول مرة نشوفها وماقدرتش نفهمها..
دانيه:بالله عليك ماتزيديها ع روحك مش ناقصى عذاب انتي..فكري في عيلك توا وبس..
رتاج؛واني قدرت مانفكرش فيه هو اللي كاسر ظهري كيف بيصير فيه وفيا بعد نجيبه..نتمنى من ربي يعطيني وليد همه مش زي هم  البنت..نبي ولد نلقاه بعدين مانبيش بنت همها ينحط فوق همي..
دانيه قعدت تشبحلها بحزن ودموعها نزلوا..
وهي قعدت تبكي حالها بصمت...
🌸🌸🌸🌸🌸
وجي وقت الحنه..
فرشوا لنسيبه في الصاله بش يحنوها...
والبنات شغلوا مدي ايدك..من ثراتنا الحلو يوم الحنه الطرابلسيه...
نسيبه؛اسمعوا ماتكثروهاش مانحبهاش..
ماجده؛عفاف قالت خليل يحبها..
نسيبه رفعت حاجبها؛ماقاليش اني..
ماجده؛هاتي يدك هاتي من غير تجعوين زايد..
ضحكوا..
:هيا نويسه هاتي يدك..
مدت ايديها الزوز وهي معصبه...
وسارة تشبحلها وشاده ضحكتها...
🌸مدي ايدك نحنيها..
نواسيها صغيرة ونفرح بيها..
مدي ايدك نحنيها..
نظرفها صغيره بش نعرفها
مزين الحنه الحمراء
في ايديها واجعل السعد يجيها..
••وجيهان كانوا يحنوا ع الحان نفس الاهازيج متاع الحنه..
نزفزتهم من كثر ماتدلع وتتشرط..وهما عليهم ينفدوا وخلاص.
نساوين خوتها...
🌸في اليديه والخواتم ذهبيه
مزين الحنه الحمراء
في الصوابع والخواتم بالطابع..
مزين الحنة الحمراء
مذباله وبوك عز الرجاله..
واجعلك يالعروسه
بالقبالي والشبوب الجلوالي
••فهالوقت
مريم كانت تصلي في العشي قبل لتمشيلهم بش يحنوها..
كملت صلاة..ومشت شافت تليفونها وهي تراجي في جهاد يتصل..
وفجأة رن تليفونها كان رقم غريب..
قالت في بالها اكيد هو..
فتحت الخط وردت..
مريم؛ايوه..
"بتتزوجي خلاص...قصدك بتتزوجي انتي"..
وقعد يضحك...
وهي مصدومه..
وبدي يقول في كلام قذر هي طول سكرت عليها وترعش مع بعضها..
وزادت شافت الرقم..كان رقم دولي بس هي من لهفتها لإتصال جهاد ماركزتش ع الرقم وردت طول..
قفلت هاتفها..خدت نفس عميق ومشت طلعت الدار..
امها؛هيا وينك عاد معاش في وقت..
ومريم مازالت تسمع في كلام ضرار القذر وتزيد تنقهر اكثر وتكره نفسها كيف فرطت فيها وضحت بكل شي حلو كانت تملكه ومشاعر حلوة تستنى تعيشها واولهم فرحة العمر اللي تحولت لقهرة عمر..
مالحقت توصل فيهم في الصاله الا وطاحت فاقده الوعي..
امها عيطت ع طول رقبتها..
والنساوين ناضولها يجروا..
قعدوا يحاولوا معاها لين فاقت ولما فاقت قعدت تبكي وهي منهاره...
وقعدوا يبخروا فيها ويقروا ويطرشقوا في الملح وغيرها من العادات الغير جائزة...بش يطيروا عليها العين..
ع بالهم اللي فيه من العين...
بعدين هدت وسكتت..وخلتهم يحنوها وقعدوا يحاولوا فيها بش يغيروا جوها مرة بأغنيه ومرة بنكته وهي قعدت تساير مسايرة..وامها خايفه عليها..
🍁وماكانتش تندري مريم..
ان.ضرار بعت رساله لجهاد فيها كلام قذر يستفز رجولته..
وهديكا الليله بات جهاد في الشقه وقلبه محروق...
في النهايه هي خشت ذمته...كان شي من شعور الندم حسه جهاد للحظات بعدين طرده وين اذكر كلام هيثم ليه..
وخدي عهد ع نفسه انه يحمي مريم حتى منه هو..
🍁🍁🍁🍁
فجر اليوم التالي..
في الجامع..
كان هيثم ماشي هو وزياد وخليل وجهاد بش يصلوه حاضر..
وبعد الصلاة...
هيثم؛هدا هو ياشيخ ولدي زياد..
الشيخ؛اهلااهلا بحامي الحمى..
ابتسم زياد..
الشيخ؛كيف حالك يازياد..
زياد؛في نعمه وفضل من الله الحمد لله..
الشيخ:الحمد لله..بنقولك حاجه يازياد..هنيئا لك بهكذا والد الآباء اللي ليا وقت طويل ماقابلتش زيهم لين عرفت بوك..
هيثم نزل راسه وهو ساكت..
الشيخ؛الباب الأوسط من الجنه قاعد ياولدي رد بالك تعرض عنه وديرله ظهرك ..
زياد بإبتسامه:اكيد ياشيخ من غير ماتوصي..
الشيخ؛نعم الإبن لنعم الاب..
هيثم:جزاك الله خير وتسلم...
جو خليل وجهاد قعمزوا..
الشيخ:مسك الختام..والاواب..اسأل الله ان يبارك لكم ويرزقكم الذرية الصالحه..
جهاد هز راسه وهو ساكت..
وخليل قال:آمين..كثف دعاء ياشيخ..
الشيخ فهم عليه وهز راسه وقال:ان شاء الله...
وخليل ابتسم بس وحده الله يعلم باللي يحس فيه من داخل..
قعد يتعذب بروحه ومافي حد يندري عليه ولاعارف شي عن اللي هو فيه...حتى شريكة حياته ماتعرفش الحقيقه كامله..
شويه..
وناضوا طلعوا من الجامع...
خليل مشي قدامهم لاقي واحد كمل معاه الطريق وهما يهدرزوا..
:خلاص راهو اتفقوا ع نفس اليوم..
خليل:تمام..لكن زيد حذر الصافي من الكابور راهو مش مزبوط ومش مرتاحله..
:وهو يقول قول لخليل يطمن من ناحيته ع الآخر..
خليل؛اني.اللي عليا درته وهو يتحمل نتيجة اي شي يصير بعدين..
هز راسه وقال:ع العموم مبارك..
خليل:يبارك فيك..
:هي اوينا...ومشي..
وخليل هز راسه وكمل طريقه للمدرسه..
قعمز جنبها وين ماكان حاط كتاباته وقعمز يقرا..
🍁يدير في امتحانات الشهادة الثانويه واليوم أخر يوم🍁
🌸🌸🌸🌸🌸
وجي الوقت اللي كل وحده فيه من العرايس بتمشي للمزين..
هدا اخر يوم ليهم في حوش اهلهم..بعدين يبدوا يجوه ضيوف إلى أن يشاء الله...
عدي مربوحه يازينه..ياللي عمرك ماوجعتينا
عدي مربوحه ياحنه...درتي حوش تجينا منه..
🌸سلمت جيهان ع بوها وكان يبكي بدموعه هي اتفاجئت في بوها هلبه تعرفيه جامد وشديد..بس معاها هي يولي في قمة الرقه..بنته الوحيده اللي مش مصدق انها بتولي في حوش راجل تاني غير بوها...
طلعت جيهان وهي متأثرة ع الآخر..وامها من بعد ماطلعت ياما صار فيها.
🥀نفس الحال صار مع مريم..بس اللي قاهرها ان خوتها ماجوش شافوها حتى اللي بيوصلها للمزين ولد خالته ومعاه اخته..
طلعت من حوش بوها وهي مكسورة وخايفه من الوقت وشن مازال مدرقلها فيه...
🌸اما نسيبه طلعت وهي في قمة السعاده حتكون مجاورة لخوها والباب في الباب ماعندها علاش تتكدر ولاتبكي....
ووصلتها وحده من قريباتها للمزين..
والباقي من كل عيله قعدوا يجهزوا في انفسهم لليلة الحفله...
بس في الزوايا كانت دور احاديث جانبيه..
ملاك؛بكل والله ماتوقعته هكي ياسجى تعرفي خلاني نضحك ع روحي كيف دايرة ع خاطر خليل..ياوخيتي راجلي يهبل اكثر منه بألف مرة..
سجى وهي تحاول تخفي ضيقها؛ربي يهنيكم..
ملاك؛تسلمي يارب..خلاص موعدك قرب..
سجى حطت يدها ع بطنها وقالت:ايه اخر الأسبوع الجاي..
ملاك:تحلي عويناتك ع خير..
سجى بإبتسامه مصطنعه:ان شاء الله...
ملاك؛مستعده لإستقبال السلفات..
سجى؛بالله معاش ذكريني..
ضحكت ملاك..
🍁🍁🍁🍁
الساعه السابعه مساءا...
"الله يبارك عليك ياعمتو عسل عسل تغيرتي هلبه"
نسيبه بإبتسامه وعيونها مليانات دموع:حق!
سارة:والله العظيم مش قادرة نحول عيوني من عليك ..
نسيبه بضحكه؛ياوخيتي نجيها...
ع خشة ماجده...هي هاك اشربي الميه..شويه وبيخش زياد..
خدت منها الشيشه وقعدت تشرب بالمصاصه..
شويه طق الباب..
سارة مشت فتحت لقت زياد.
زياد:نخش..
سارة بإبتسامه؛خش...
زياد خش ولما شبحت عمته وقف في مكانه مندهش..
نسيبه ضحكت لين قريب شرقت من ردة فعله..
زياد؛تي من هادي !!بالك غلطتوا وجبتوا وحده تانيه!
نسيبه رفعت الشيشه؛نحدفك بيها راهو..
ماجده بضحكه؛الاندر تيكر متنكر..
قعدوا يضحكوا..
نسيبه مدتلها الشيشه وقالت:غير جيتي خالتي بس..
خدت ماجده الشيشة وهي تضحك..
نسيبه:تعالى جاي انت التاني..
مشي وقف حداها وقال؛بنحطك وبنطلع..
نسيبه؛لابتقعمز لين يروحوا بيا..
زياد بضحكه؛قصدي جو اقعد صور ومش عارف شنو لا..
نسيبه:باهي اسكت اسكت..هيا وينها المصورة..
زياد بضحكه:والله ماطالع عليها باهي..
قعدوا يضحكوا وهي ضرباته ع كتفه قريب كسراته..
شويه وجت المصورة.
وبدت زفه نسيبه..
ولما خشت القاعه كانت مفاجأة للجميع...
تغيرت هلبه اول مرة يشوفها جميله لهالدرجه بانت ع حقيقتها...
وزياد طول الوقت عيونه ع الكوشه ياعليها هي...
وماصدق وصلها للكوشه..وطول طلع....
نسيبه وعيونها معبيات دموع؛ربي يحفظه حبيبي...
🌸ومريم...
خشت بروحها وكانت طالعه اية من الجمال شبهوها بالروسيات في طلتها..
وياما نساوين في العيله تحسروا عليها واولهم خديجه ام ضرار...
🌸وجيهان خشت بزفه للفرقه اللي جايه لحفلتها..
وكان كل المهم ليها ولأنها المظاهر وبس..
صاله فخمه وغاليه...ضيافه غاليه..بهرجه زايده...
وهديكا الليله انصرف عليها مبلغ وقدره...
🍁🍁🍁🍁
ومرت ليلة جميله تحفظ في الذاكرة وماتنتساش لعيلة هيثم اللي عاشوا الفرح بعد وقت طويل من الألم..
وجي خليل بيروح بمرته..طبعا ماخشش الصاله بس استناها قدام الباب بعد مالبسوها كابها وغطوها تماما..
قعدت تسمع في صوت ماجده وهي توصي..
"في عيونك ولدي راهي بنتي هادي"
خليل قلبه وجعه هلبه ابتسملها وقال :ان شاء الله..
ونسيبه شدت دموعها بقوة..
ركبها السيارة..
بعدين ركب هو..
خليل؛شن جو..
نسيبه:مليح..
ضحك وتحرك طول...
خليل بضحكه:قوليها قولي قولي..
نسيبه قعدت تضحك بعدين قالت؛والله ماكليت حاجه اليوم نقش تنقيش بس..
خليل شد يدها وقال؛عمتك دايرة عشي مش عادي قالت ولادي وكنايي  مايتعشوش ماكلة الصالات..
نسيبه؛عسل عمتي هادي ساد جاباتك انت..
خليل بمزح:ختسلمها ...اهو بدي يطلع الكلام الحلو.
ونسيبه تضحك وخلاص..
خليل؛نحبك..نحبك...نحبك...وطول في الأخيره..
نسيبه بضحكه؛افتح الروشن وقولها ترا..
خليل:لاحبي الحركات هادي للشلاتيت مش لينا حني..
ونسيبه تضحك..
🌸وكملوا طريقهم وكان جوهم مافيش احلى منها..
🍁🍁🍁🍁
ركب جهاد مريم للسيارة ..
ومشي ركب وهو يحي في شباب عيلة مريم..
ركب جنبها وتحرك طول..
هي كانت خايفه ومتوترة...
اما هو..
جهاد؛رقدتي!
مريم بضحكه:نحسابك انت اللي رقدت..
جهاد بضحكه؛والله حق ناعس او مانوصلوا بنرقد طول..
مريم:الله..جديات!..حتى اني نبي نرقد طول بكل اليوم من الفجر منوضيني..
جهاد؛مابعدكم..وضحك..
مريم:وسعدودكم...
جهاد ابتسم وفتح الراديو جي ع برنامج للشعر الشعبي..
قعدوا يسمعوا هما الزوز ويعلقوا ويضحكوا..
كانوا متشابهين في حب الطرفه والسخريه وهالشي خلاهم يتعاملوا مع بعض بأريحيه...
🍁🍁🍁
اما جمعه بعد ماركب جيهان وركب وهو مش طايق روحه منها ومن خوها اللي كان يلقى يذبحه ويشرب من دمه..
روح بجيهان وطول الطريق القرآن مفتوح..
كان يبيها تسكت وماتنفخلاش راسه ع اللي صار في العرس..
وهي كانت ساكته وتسحن وخلاص...
🍁🍁🍁🍁
وصلوا كناين عفاف لحوشها..
واستقبلوهم بمرحبا يالافيه...
نسيبه كانت مرتاحه ع الآخر..
لكن مريم متوترة شويه...
كانوا جايين معاها خالاتها...
وبدت الشتاوات...
جابها المكتوب وجتكم ديروها كيف وخيتكم....
تهاني..
كان عفست في عفستنا...هو ولدنا وهي بنيتنا..
عفاف
ياغالي وصيها عليا وين نجيها تفرح بيا..
ماجده..
الزينه ماتحتاج وصيه..
ببور امرسي بميه...
وحده من خوات عفاف..
ياغالي وصيها ديما ..تقابلنا بضحكه وتبسيمه..
وحده من خالات مريم
الزينه كيف عروق السدرة تعرف كل قدير وقدره..
عفاف بضحكه..
اه منك يالكنينه وليدي وين مشيتي..
كلهم صاحوا بصوت واحد..
ردت عليها وحده من خالات مريم..
وليدك حطيته في عيوني وسكرت برموشي عليه..
من حضنك والله مانشيله جميلك فوق الراس عليه..
ماجده..
انتي راس المال الأول ومفتاح الجنه بتعطيه..
وليدك في قلبي حطيته وديما عليك نوصي فيه..
خالة مريم..
جميلك سابق ياوداده يكفي انك كبرتيه..
وليدك في قلبي وعيوني من الحساد نخاف عليه..
ماجده
محلا زولك ياوداده ومحلا الغزال اللي جبتيه..
والبنات صاحوا مرة وحده..
ومريم ونسيبه يضحكوا..
شويه وواحد من الولاد ضبح ع امه..
جهاد..
عفاف:هيا الولاد يبوا عرايسهم..ومشتلهم...
لقتهم التلاته واقفين مع بعض جنب الخيمه..
عفاف:الله يبارك ع غزلاي لاقوة الابالله..
هما قعدوا يضحكوا..
عفاف بدت تغني..
ثلاته اولا الله عاطيني...ان شاء الله ماتفقدهم عيني..
وبدوا يردوا وراها.
عفاف..
يامولاي احفظلي ولادي من عين الحاسد والعادي.
خليل بضحكه؛خلاص يام..
عفاف شاشت..
الله وحد ياعين عليك..ثلاثه صقورة يحادوا فيك..
رفيق بضحكه؛افصلي يام خلاص..
عفاف..
عيني سلم اولادها...غير تشبح فيهم سادها..
وضمتهم كلهم مع بعض وهما يضحكوا..
وتهاني تشوف فيه وتضحك..
وبعد ماعفاف سيبتهم..
ركبولهم عرايسهم للشقق وهما يغنوا عليهم..
جعل ليلتها ضاويه كيف طريق الزاويه..
ومريم تسمع والعبرة خانقتها..
🌸🌸🌸🌸
في شقة خليل..
فكت نسيبه الكاب وحولاته..
خليل:اهو االعشي واتي.. والتفت وجمد في مكانه..
نسيبه بضحكه:خير دعوتك..
خليل:قصدك انتي نفسها اندر تيكر..
نسيبه بتهديد؛بتخيلني نحول الكندره..
خليل وهو.يضحك؛والله جديات..الله يبارك الله يبارك..
وقدملها وباس جبينها..وهي ابتسمت..
خليل بعد وقال بحب:ربي عطاني فوق ماتمنيت..
ابتسمت وعيونها مليانات ورفعت يده وباستها..
وهو ابتسم و رجع باس راسها....
والقلوب واخيرا تلاقت واجتمعت تحت نظرة الرب الراضيه والبركه تنزل عليهم زي الغيث النافع..
🥀🥀🥀
اما في الشقه اللي مقابلتهم..
جهاد بضحكه؛تلبسي في توت لولو كاتي!
مريم بضحكه؛نموت فيهم..هي تعالى خل نتعشوا جعانه ويحة الماكله تسهف..
جهاد.قعمز حداها وبدي ياكل..
مريم؛مممم...ماكله امك ابداع..
جهاد بضحكه؛تعرفي طيبي انتي؟
مريم رقصت حواجبها وقالت:يس مش حنقولك شي عن.تطييبي نخليك انت تحكم بروحك..
جهاد؛نراجو..
مريم؛صيم لهداكا اليوم باهي..
جهاد خبطها بكتفه وقال:ااه ياعبد الواثق هدا غير ماتبيش تشكري روحك..
ضحكت وقالت؛باهي بنسكت خلاص المهم خليك مذكر كلامي...امم العصبان..يالهو بالي..وخدت مصران وبدت تاكل فيه..
وجهاد يشوفلها وهو مبتسم بصدمه..
مريم وهي تاكل:مش ليا جو ركيكات..اني حمشه وع طبيعتي راهو مانحبش التصنع..
جهاد بضحكه:احسن حاجه حتى اني هكي..
هي شبحتله بإبتسامه وقال:شكله هالعام حيكون احلا عام في حياتي..
جهاد؛حتى اني مش ناسيه عمري كاه..هي كولي كولي..
هي ابتسمت بألم وكملت ماكلة..
فجأة رن تليفونها بنغمة رساله..
خداته من ع الطاوله وجت بتسكره..
جهاد؛افتحيها واقريها..
هي بلعت لقمتها وقعدت تشبح للتليفون وعيونها تعبوا دموع..
هو جبده.منها..
وهي انخلعت وقعدت تشبحله بخوف..
فتح جهاد الرساله..
الكلام اللي كان فيها قمة في القذاره..
هو كان شاده حكة مشروب شد عليها بقوة لين كرمشها والمشروب تبزع منها..
 ومريم بدت ترعش من الخوف..لدرجه انها بعدين عنه بدون ماتحس...

#صلوا_على_الحبيب

...يتبع....
#فرحة_عمري
#البطل_المغمور2