البطل المغمور "زهور القمر"

الجزء الثاني"1"

#البطل_المغمور2  "زهور القمر"
#جمان_فريد
#الجزء_الثاني  "عطيني فرصة1"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
في الصاله..
مقعمزة وهي رابطه محرمتها فوق راسها ع وجهها ملامح الأسى..
وحداها بنتها وكنتها وولادها الزوز واقفين فم الصاله واحد منهم يقول..
خليل:ربي يستر ع ولايانا ويجيرنا..
عفاف:هادي اخرة الرباية المسخه وطلق البناويت ع حل شعرهم..
خليل:مش غير البنات يام..راهو بيحاسب الزوز الزوز زي بعضهم في الغلط..والزوز عندهم مالي خلوهم سايبين يديروا مايبوا لين وصلوا لهني...
عفاف شبحت لرفيق بطرف عينها..
هو شبحلها بعدين غير عيونه عنها احراجا وشبح لخليل..
اما سجى حطت يدها ع بطنها وهي تشبح في الفراغ وتفكر...
وتهاني كانت مقعمزة تسمع وهي محرجه هلبه..
نخصه رفيق واشرله بعيونه ع تهاني..
خليل شبحلها وقال:عندك مدرسة ولا..
شبحتله تهاني وقالت:ايه بس نبيك تمشي معاي لصاحب الباص وتتفاهم معاه قاعد يلقح عليا راهو..
عقدوا خوتها حواجبها بغضب.
رفيق:شن يقول الحيوان..
تهاني:شن صار فيهم الجماعه اللي يلحقوا فيك..ومتأكده مافيش ورانا حد يدور فيك ومن هالكلام يقولي فيه كل مانركب..
خليل اشرلها بيده؛تعالي معاي اني نوصل بسيارتي وهو نتفاهم اني وياه الواطي هدا..هيا...
ناضت تهاني لبست شنطتها ومشت مع خوها...
سجى:اليوم عندي موعد رفيق مش تنسى..
رفيق؛مش ناسي...ومشي بيطلع من الحوش..
عفاف تنهدت بتهكم وناضت من حداها..
وسجى معاها بعيونها المعبيات دموع...
🍁🍁🍁🍁
"مريم"
"مريومه"...
وجهها للسرير وايديها الزوز تحت ذقنها.... كانت راقده ع سريرها بعمق....
ماتسمعش في صوت امها وهي تنادي...
لين اضطرت امها دق ع الباب..
الصوت نوضها...فتحت عيونها...
"مريم..علاش مسكرة الباب يابنتي"
"شن في"
"اختك مسكرة ع روحها الباب من بكري نطق عليها ونادي ماتردش"
"ترا حولي يام شويه..."
دق من جديد خوها وقال
"مريم...مريم"
هي ناضت قعمزت..بعدين نزلت من السرير..
كانت تمشي بشي من التعب..
تسمع في اصواتهم..والدق ع الباب ماوقفش..
وصلت في الباب ولفت المفتاح...
وفتحاته..
خوها وامها كانوا يشبحولها بقلق...
مريم:صباح الخير..
خوها جاها ضمها وقال:علاش مسكرة على روحك الباب يامشفشفه..
مريم:مش عارفه كنت نبدل امس ونسيته..
امها:ووك عليا يابنتي رعشتيني قريب قتلتيني.
شدت يد امها وقالت؛سامحيني ماما..
بعد خوها وهو حاط يده ع راسها وقال؛شن رايك نرفعك نعاينك ونديرلك تحاليل..
هي شبحتله بخوف بلعت ريقها وقالت؛لالا مانبيش مش لازم اني كويسه..
خوها قعد يشبحلها بنظرة قلق ممزوجه بالشك..
هي هربت بعيونها عنه وشبحت لأمها وقالت؛وتي الفطور ماما...خل نوتي روحي...
امها؛باهي هي سقدي روحك..ومشت..
هي هزت راسها ومشت طلعت من دارها..
وخوها طلع وراها من الدار وعيونه عليها..
حط ايديه في جيوبه وقعد يفكر...
🍁زي ماكان داير جهاد وهو مقعمز ورا حوشهم....
المنظر ماراحش من بين عيونه مش قادر ينساه...
لما كان يعيش لحظات اللهو والهوى...
ماكانش عارف ان نتيجة هاللحظات اللي شافه اليوم مرمي في مكب القمامه..
مخلوق صغير..بني آدم..طفل رضيع..دم ولحم...يتلوح في الكناسه...
المخلوق هدا..ذنبه في رقبة مني...
يوم القيامه ربي حياخد حقه من مني!؟
من الزوز اللي تسببوا في وجوده...
ومن اللي دفعهم يديروا هالشي وسهله عليهم...
زي الوالدين اللي مخليين بناتهم يطلعوا امتى مايبوا ومع من يبوا...
ويباتوا برا الحوش..
"بابا ماما نبي نبات عند صاحبتي!"
هدا غير اللبس الفاضح..والمكياج...والتمايع في الشارع..والجامعه...والسوق...
ولافي رقيب ولاحسيب...
ايضا..حتى الكبت والتزمت....
تكون ليهم نتيجة عكسيه...
زي ماصار مع رتاج ودانيه....
وكذلك...الثقه الزايده عن حدها..
مش بس في البنت...لا..وفي الأقارب حتى...
يعني زي وحده تبعت بنتها لحوش عمها وعمتها او حوش خالها وخالتها...وتبات في حوش مليان شباب...
ماتقولوش واثقين فيهم وفي ربايتهم.
ماتقوليش نعرف بنتي واني مربيتها..
في حاجه اسمها درء المفاسد..
يعني الباب اللي يجيك منه الريح سده واستريح....
وهالباب اللي ماسكرتاش ام مريم ولابوها ولاخوتها..
لأنهم زي هلبه ناس واثقين في رباية ولاد العيله..
••مقعمزين ع الأرض في وسط الحوش يفطروا..
ام مريم؛امس كلمتني خديجه مرت خوك ياحاج..
مريم قريب غصتها في لقمتها اللي بلعتها من غير ماتمضغها كويس بعد ماسمعت كلام امها..
بوها:اكيد خبراتك..
ام مريم:ايه قالت خطبوا لضرار..
قامت مريم عيونها وشبحت لأمها..
واحد من خوتها:الولد ماينطلقش برا من غير مراة..
شبحله بوه بحده..
وخوه نخصه واشرله بصبعه بدون مامريم تلاحظ عليها..
خوها اللي قال كلمته سكت..
امه تبي تغير مجرى الحديث قالت:الفضانيه غدوة تبيني نمشيلها نعاونها..
بومريم؛بري..
امها؛حتى انتي تبيك تجي معاي..
مريم حركت راسها بالنفي وقالت:لالا ماما عندي قراية مش فاضيتلهم..
امها:عيب بنيتي المراة طلباتك طلبه..
مريم بإنفعال؛قتلك عندي امتحان كان سقطت بتنفعني هي ولا ولدها..
كلهم شبحولها بإستغراب...
هي هربت من نظراتهم واسئلتهم لما خدت شنطتها وتليفونها وقالت:خلاص بنمشي وقت عليا اكيد الباص جي..
وناضت ومشت طول من حداهم..
امها:تو اني شن قلتلها بش ترد عليا هكي..
بوها:البنت مضغوطه ماتزيدهاش..تقولك بنقرا وانتي تقوليلها بري عاوني مرت عمك..
واحد من خوتها:ع قولتك مضغوطه مفروض مانزيدوش نضغطوا عليها اكثر ونخلوها ع راحتها..
امها:ياودي خلاص ع كيفها...وكملت ماكله...
وخوها التاني اللي كان يفطر معاهم قعد ساكت وهو يفكر..
هو مش شاك في شي كبير..بس بدي يحس ان اخته فيها شي تاني مالاش علاقه بالقرايه...
🍁🍁🍁🍁
في المدرسه..
قبل الطابور الصباحي..
سارة:لحمي كشش لما سمعت بابا مسكين لين رقي عليه السكر..
دانيه بإستياء:استغفر الله العظيم ربي يجيرنا ويسترنا دنيا وآخره..بس صراحه اني مستغربه كيف بوك حكي قدامك حاجه زي هادي..
سارة:حسيته قاصد يتكلم واني وموجوده..
دانيه:تعرفي سارة بوك راجل راقي هلبه وعقله متفتح صح..
سارة ابتسمت وقعدت ساكته...
تنهدت دانيه بعدين قال؛بوي اليوم بيجيب مرته الجديده..
سارة قعدت لدانيه بضيق..
دانيه:بس احسن حاجه اليوم رتاج عزمتنا ع حوازة راجلها بنمشوا كلنا نباتوا غادي..
سارة:احسن شي..
فجأة سمعوا جرس الطابور رن...
سارة بضيق:حتى اليوم رهف ماجتش..
دانيه مطت شواربها لداخل بأسف بعدين قالت؛نتلاقوا بعدين..
ومشت وقفت في طابوها..
وسارة وقفت في طابوها وعقلها عند رهف..
🍁🍁🍁🍁🍁
"سامحيني خالتي عطلت عليك"
ماجده:ولايهمك ولدي...
وقعدوا ماشيين مع بعض بإتجاه باب المستشفى...
وهما ماشيين..
لفت انتباه هيثم بنت شابه ومع مراة كبيرة واقفين ع شاب والزوز يبكوا..
غير عيونه لما سمع خالته تكلم فيه..
وقعد يهدرز هو وياها لين طلعوا من المستشفى..
وعند الناس اللي كان يشوفلهم..
رنيم بدموع:قالوا يقدروا يديروا العمليه هني..
خطيبها سفيان:ايه مزبوط المستشفى هادي خاصه فيها كل شي واحسن الدكاترة موجودين فيها..
ام رنيم؛يعني نطمنوا ولدي..
سفيان؛ع الآخر عمتي وان شاء الله عمي ينوض منها سالم..
رنيم وامها:ان شاء الله..
سفيان؛هي اطلعوا معاي نروح بيكم قعادكم هني مافيش منه فايده..
رنيم:مانيش متحركه من مكاني..روح بماما تعبانه هي..
سفيان:ماتسكريش راسك رنيم..
رنيم:اني قلت مش متحركه من هني..
ام رنيم:خلاص خليها تقعد مش حترتاح لو روحت نعرفها..
سفيان عقد حواجبه بعصبيه حاول يكتمها بعدين قال:باهي بري خشي داخل قعمزي غادي..نروح بعمتي ونوليلك..
رنيم؛خليك في عملك انت..
سفيان هز راسه وهو يحاول يكتم غضبه وقال؛هي ياعمتي تفضلي..
امها مشت طلعت..
وهي لقت ومشت..
خطيبها شبحلها شويه بنظرات كلها عصبيه بعدين مشي لحق امها...
رنيم مشت قعمزت في صالة المستشفى..
ماكانش فيها هلبه ناس..
وهي كانت مش مركزة فيها على حد عقلها مع بوها وخلاص..
عرفت من امها القصة اللي صارت معاه..
وقعدت تقول في نفسها..
"هدا عقاب ليا ع سكوتي..والله كنت عارفه ان ربي حيديرلي شي بس ماتوقعتاش يجي في بابا بكل..ياريته جي فيا اني وفكني من هالدنيا"
حطت يدها ع فمها وقعدت تمرر في نظرها يمين ويسار..
كتمت بكاها..وخلاته صامت..بش ماتلفتش الإنتباه..
من جهة تانيه..
بعد نص ساعه..هيثم خش للمستشفى ومشي طول لحجرة ريحان...
قعمز هدرز هو وياها مشوار..
بعدين خشله واحد من زملائه وخداه برا الغرفه بش بيكلمه في شي مهم..
هيثم:تفضل..
الدكتور:اني عارف انك مسيب الخدمه الفترة هادي..بس سبحان الله ربي جابك المدة هادي تحديدا ع خاطر حالة جتنا امس العمليه متاعها انت بس اللي تقدر ديرها بدون كثرة احتمالات..هو احتمال واحد ناجحه مية في الميه..
هيثم بضحكه قال؛بعون الله..لكن شن بنقولك..الموقف قاعد يتكرر معاي مرة تانيه..قبل مشيت زيارة لمريض لقيت روحي نديرله في عمليه..
الدكتور بإبتسامه؛ربك عاطيك شي ماعطاشي لغيرك دكتور واللي زيك مافيش منهم هلبه في البلاد هما كلهم تلاته..انت..والدكتور حفيظ في درنه..والدكتور الهاشمي في مصراته..
ابتسم هيثم وحك حاجبه بعدين قال:والله مش عارف شن نقولك..
الدكتور:تعال معاي لإدارة المستشفى وغادي تقرر وياريت يكون قرارك سريع لان الحالة مستعجله..
هيثم هز راسه وقال؛تمام نخش لبنتي شويه بس..
ومشي هيثم خش لريحان كلمها بعدين وصى عليها الممرضات ومشي مع الدكتور...
🍁🍁🍁🍁
"حول ماتبوسش يدي ولاتكلمني "
جلال:معقوله يام معقوله..قلبك قسي عليا لهالدرجة..
امه:اني ع خاطرك انت..الراجل دار فيك معروف لولاه راك ميت وانت دير فيه هكي..
جلال:معروف شني يام..اني مافي حد دار فيا معروف كان ربي اما هدا اللي مقاطعتيني ع خاطره رقع عملة ولده بس..
امه:الولد طايش ومدمن يعني عقله مش عليه..
جلال:شن تقولي يام..! باهي افرضي لو بعد ماضربتي متت وقتي شن ديري انتي!؟ وحط ايديه ع بعض..
امه قعدت ساكته معاش عرفت شن تقول..
جلال:هاه ريتي يام
امه:باهي خلاص انت توا عايش ومافيك شي والراجل هو اللي نجاك بعد ربي..وكان سكر راسه وقال مادخليش بعد مااني هزبت ولزيته راك توا بعيد وبر تحت التراب.
جلال بأنزعاج؛خلاص يام سكري عليه الموضوع هدا اني جاي نهدرز عليك ونغير جوي قبل لنمشي للخدمه ياريتني ماجيت..
امه:مالا نوض نوض...اربح..
جلال؛صار هكي يام..باهي ع اللي مازال يجيك..
وناض ومشي طلع من حداها..
امه تنهدت وقالت؛ربي يهديك وخلاص..
🍁🍁🍁🍁
"هديكا بنته..نقدروا ناخدوا توقيعها"..
هيثم قعد يشبح لرنيم كيف متكيه براسها ع الحيط..
سرحانه ودموعها تنزل..
تنهد ومشالها...
وصل فيها وقال؛السلام عليكم..
هي استاقظت من سرحانها وشبحتله...توسعوا عيونها بصدمه..
هيثم:كيف حالك بنتي..
رنيم وقفت وهي تقول؛شن تبي؟
هو ابتسم وقال:اني هيثم الكاتب الدكتور اللي بيدير لبوك العمليه بإذن الله..
زادت انصدمت...
هيثم؛عملية بوك لازم تندار توا..وحني نبوا ناخدوا توقيع حد منكم...
رنيم قعدت تشبحله وهي مصدومه..
هيثم؛ع حسب ماقالولي انتي بس اللي قعدتي من العيله ياريت توقعي ع الورقه..
رنيم نزلت من عينها دمعه وهزت راسها..
هيثم شبح لزميله...
جاهم وفي يده الورقه وبيرو وقال:تفضلي وقعي..
غيرت رنيم عيونها عن هيثم...وخدت الورقه والبيرو وهي ترعش مع بعضها..
هيثم ركز عليها وقال؛ماتخافيش بنتي بإذن الله بوك حيكون بخير..
رنيم وهي توقع طاحوا دموعها ع ورقه..
تسمع في صوت هيثم..ونبرته الحنونه..وقلبها يتقطع...
ع جية خطيبها لما شافهم واقفين عليها شبح لهيثم وقال:دكتور هيثم!
هيثم ضيق عيونه وقال؛نعرفك اني..غير لحظه..لقبك المنصوري ولا؟
ضحك سفيان وقال:ايه كنت ندرب عندك دكتور..
هيثم هز راسه بإبتسامه وقال:تفكرتك..
رنيم مدت الورقه لهيثم وقالت بنبرة مبحوحه:اهي..
هما شبحولها..
سفيان بإستغراب:شن في؟
رنيم؛بيديروا لبابا العمليه توا..
سفيان؛بديرها انت دكتور؟!
هيثم؛بإذن الله..
سفيان بإبتسامه؛عمي في ايدين امينه..
هيثم:عمك هو؟
سفيان؛بو خطيبتي..رنيم خطيبتي دكتور..
هيثم هز راسه وقال:اها...شبحلها وقال.. زي ماقتلك اطمني بنتي حيكون بخير بإذن الله..انتي كثري استغفار...قالها وهو يحرك في سبابته حركة دائريه قدام فمه..
هي ضمت شواربها لداخل بقوة حتبكي خلاص..وهزت راسها بإيجاب..
هيثم:هيا دكتور..
الدكتور؛هيا تفضل دكتور..
ومشي هيثم وعيون رنيم معاها..وقعدوا دموعها ينزلوا زي السيل..
سفيان:هدا هيثم الكاتب عملية زي هادي ساهله عنده..
رنيم مشت..
سفيان:وين..
رنيم وهي ماشيه: نبي نتستنى غادي..وقامت تليفونها بش تبلغ امها..
وهو تنفس بعصبيه ولحقها...
 🍁🍁🍁🍁
في وحده من المعاهد الخاصه بدورات التقويه في مواد كلية الطب..
كان جلال مقعمز في قاعه ورا لاب توبه ويتفرج ع ماهو منحط ورذيل....
وشويه وبدوا الطلبه والطالبات يخشوا..
وهو يلحق مااخره تات التأنيث بنظراته الخبيثه..
بسرعه طلع من اللي كان بتفرج عليه وحط ع مجلدات المحاضرات..
ع خشة بنت اول مرة يشوفها.
لبسها كان عادي مافيه شي غلط..بس هي كانت جميله في ملامحها ولمسات المكياج زايديها جمال..
هو وقفها وقعد يمرر في نظره عليها؛جديده انتي؟
البنت:ايه سجلت امس..
هو هز راسه وقال؛خشي..
البنت مشت قعمزت وقعدت تمرر في نظرها ع القاعه..
وهو وقف وقعد.يشبحلها بعدين قال؛وين وقفنا امس...
شبحتله البنت..
هو اشر عليها وقال؛اللي فاتك خوديه من زملائك واي شي مش فاهمتيه تعاليلي..
هي ابتسمت وقالت:حاضر استاذ..
هو يدوب ابتسم ابتسامه جانبيه وغير عيونه للسبورة...
🍁🍁🍁🍁🍁
الساعه الحادية عشر صباحا...
مقعمز في سيارته قدام كلية الطب..
كان يشبح جهة الكليه...ومش عارف شن اللي جابه ليها...
اللي صار معاه اليومين اللي فاتوا اثر فيه بقوة..
ماقدرش يتجاوزه..قعد واقف عنده..
من هداك وجهاد حس روحه مولي انسان تاني..
واللي صار الصبح لتوا قاعد يحس في رعشته في أحشائه..
خاف هلبه..
خاف من مصيره...خاف من نهايته...خاف من يوم غدوة..
يوم غدوة يخوف اللي زيه هلبه...
فتح الباب..ونزل...
سكره ومشي خش داخل...
وقعد يدور عليها...يمشي ويدور...يمشي ويدور...
بس مالقالهاش اثر..
وقال في نفسه" اكيد توا في محاضرة خل نستناها لين تطلع.."
ومشي قعمز برا وقعد يستنى..
🍁فهالوقت...
سارة كانت واصله لمكتب الإداره...
دقت الباب..سمعت الإذن بالدخول..
خشت...
سارة:السلام عليكم..
المديرة؛وعليكم السلام..عارفاتك علاش جايه ياسارة..
سارة بقلق؛ قصدك مافيش جديد؟
المديرة؛لافي..بوها امس جي وسحب ملفها..
سارة بصدمه؛علاش!؟
المديرة بأسف:ماعنديش اي معلومه هو ماباش يقول شي..
غرقوا عيون سارة بالدموع..هزت براسها ولفت وطلعت بدون ماتقول كلمه وقعدوا دموعها ينزلوا..
عرفت ان كل امال واحلام رهف خلاص ماتت واندفنت...
وانحكم عليها مؤبد تعيش حياة رافضتها رفض تام...
قعدت الاستراحه كلها تبكي عليها ودانيه تحاول تهديها وهي نفسها مقهورة ع رهف الموؤودة...
🍁🍁🍁🍁
طلع من باب غرفة العمليات وع وجهه ابتسامه..
لما شافتها رنيم قعدت تمسح في دموعها وهي
مستبشرة..
هيثم وصل فيها وقال:الحمد لله ع سلامة بابا..
رنيم ابتسمت بفرح وقالت؛يعني بابا قاعد عايش..
هيثم بضحكه؛والحمد لله...بس لازم يقعد تحت المراقبة في غرفة الملاحظه للإطمئنان...
سفيان: الحمد لله...
رنيم بإبتسامه من بين دموعها:شكرا دكتور بجد شكرا بارك الله فيك...وغلبها البكي..غمضت عيونها وقالت بنبرة باكيه..مش عارفه شن نقولك..وحطت ايديها ع وجهها وانهارت بالبكي..
سفيان:رنيم!
هيثم؛اذكري الله بنتي وصلي ع النبي..شبح لسفيان وقال..عطيها ميه..
فتح سفيان شيشة المية ومدها لخطيبته وقال:خودي اشربي..
خدت البنت الشيشة ومسحت دموعها وقعدت تشرب وهي ترجف..
هيثم:من الافضل تروحي توا مش حتقدري تشوفي بوك لغدوة ان شاء الله يعني قعادك هني مافيش منه فايده..
رنيم:مانقدرش نشوفه حتى شويه!؟
هيثم؛للأسف ممنوع..
غمضت عيونها وتنهدت..
سفيان؛هي خلاص رنيم تعالي نروح بيك..
هيثم رفع حواجبه وقال:انت تروح بيها..
شبحوله الزوز وسفيان استغرب..
هيثم؛انتي عندك خوت ولا؟
رنيم؛ايه كانوا معانا امس قعدوا للفجر وتوا في اعمالهم..
هيثم:قوليلهم يروحوا بيك..
هزت رنيم راسها بإيجاب..
هيثم بإبتسامه؛لاباس ع الوالد..
ومشي من حداهم..
هي تبعاته بعيونها اللي كانت تشوفله بنظرة امتنان ممزوجه بالإحساس بالذنب وقالت؛لايوريك باس..
سفيان؛تو هو شن دخله نروح بيك اني ولاخوتك..
رنيم شبحتله وقالت:هدا الصح..انت خطيبي بس راهو..
سفيان؛جديد الكلام هدا!
رنيم؛لا مش جديد خليني ساكته ياسفيان..
ومشت وخلاته..
هو شبحله شويه بغضب..بعدين لحقها..
🍁🍁🍁🍁
مازال مقعمز يستنى وهو يدخن...
بعدين لوح دخانه..وناض بيمشي...
وقف لما شافها جايه...كانت تمشي وملامح الكآبة مسيطره ع وجهها..لعند ماقعمزت ع واحد من الكراسي وضمت شنطتها وهي تتفرج ع قدامها ع اللي يمشي واللي يجي بعدين سرحت..
هو خدي نفس...وقدملها..
قعد يمشي خطوة ورا التانيه لين وصل فيها..
هي ماانتبهتش لوجوده نهائي..
هو تنحنح وقال:السلام عليكم...
ولاكأنه في حد موجود..
جهاد؛مريم..
هي ضيقت عيونها وشبحتله..وسعتهم وهي متفاجئة..
جهاد؛معليشي نبيك في الكلمتين..
وقفت وهي تشوفله بحده وتتكلم بنبرة حاده:لاكلمتين لاتلاته ماعنديش معاك كلام..
ومشت خلاته..
وهو لحقها..
جهاد؛غير راجي..غير شويه بس..
سبقها وجي قدامها وقفها وقال: #عطيني_فرصه ندوي معاك..
مريم؛في شن بتدوي!؟
جهاد:يومها..سمعت مكالمتك راهو..
انصدمت..بعدين شبحت حواليها وشبحتله وقالت :شن سمعت..
جهاد؛سمعت اللي خلاني نعرف بشن قاعده تمري..
رفعت حاجبها وابتسمت تهكما وهي تقول:ولانك صايع ومن بنت لبنت جاي تبي تبتزني ولا....لكن والله ماك محصل حاجه..توا نمشي نلوح روحي قدام وحده من هالسيارات ولانكون هكي...
جهاد بضيق:اقسم الله مافكرت في الشي هدا ولاخطرلي..ايه عنده اني صايع ومن بنت لبنت..لكن والله نيتي معاك انتي غير..يشهد عليا ربي من بعد هداكا اليوم ماعرفتش نعيش زي الناس..لاناكل لانشرب لانطلع لانرقد..مش رايحه من بالي بكل..شكلك وانتي تبكي الكلام اللي قلتيه..لما جيتي تبي تنتحري...تصدقي اني نفسي مش مصدق اني تأثرت باللي صار معاك لهالدرجه..لدرجة اني نحس في روحي مش نرتاح الا لو ساعدتك..
نزلوا دموعها وهي تقول:وكيف تبي تساعدني!؟
شبحلها شويه وقال..
"نتزوجك"
فتحت عيونها على وسعهم بصدمه..
حك حاجبه وقال؛رسمي نتزوجك..بنخطبك من ماليك وناخدك فترة بعدين كل حد فينا يمشي ع حاله..تكوني مطلقه خيرلك ..
عيونها فيه وهي تسمع فيه شن يقول ودموعها سيل..
زادت كرهت نفسها واستحقرتها اللي وصلت روحها لهالمواصيل..في جرة مشاعر طايشة..وغبيه ضيعت مش بس شرفها...حتى كرامتها..بس اللي قاله جهاد بعد هكي صابها بالدهشه..
جهاد؛راهو انتي لو رضيتي بتساعديني حتى اني..تعبوا عيونه بالدموع لما قال..اقسم بالله..غير عيونه عنها ووزع نظره قدامه بعدين رشف وقال..اقسم بالله تقول ربي دارلي هكي بالقصد..حاجات صاروا ورا بعضهم...وقظوني وفتحوا عيوني..شبحلها وقال..خايف نموت واني مسخ..خايف ع الوطا اللي يدفنوني فيها ماتقبلنيش..
مسح دموعه قبل ينزلوا وقال..مش بلاش جيتي قدامي انتي مش بلاش..ربي عطاني فرصه تانيه فيك انتي..بالله عليك انتي ماتحرمنيش منها...نبي نستر عليك ونبيك تستري عليا..
نسترك انتي اليوم..بش يوم غدوة ربي يسترني..
مسحت دموعها اللي مازال ينزلوا وقالت:انت..احمم..انت متأكد من اللي تقول فيه؟
جهاد:انتي مصدقتيني؟
مريم؛مش مستوعبه!
جهاد؛اقسم بالله لو قلتي باهي مستحيل نرخي بيك والله ناخدك يامريم بالله...وزي ماقتلك فترة بس..عام..عام وكل حد فيني يمشي ع حاله..وانتي تشوفي حياتك مع راجل يناسبك..
مريم مسحت دموعها وقعدت تشوفله بشي من الشك..
جهاد:تمام..انتي زيدي فكري..وتأكدي من روحك ومن وضعك..يعني..غير عيونه عنها وقال بإحراج..لو في حاجه من توا قولي..
هي فهمت قصدها وتمنت لو ربي خداها ولا تعرضت لهالموقف اللي كله خزي من اوله لأخره..
نزلت راسها وقالت بنبرة مخنوقه...لا..مافي شي..
هو مسح ع لحيته وقال؛مال فكري واني نراجي في ردك...حنجيك كل يوم هني وامتى ماتاخدي قرار تعالي وقوليه..تمام.
هي مازال منزله راسها هزاته وقالت بصوت يدوب طالع:باهي..
هو تنهد بعدين قال؛ماتبي شي..
قامت عيونها وشبحتله بعدين يدوب ابتسمت وهي تحرك في راسها بالنفي..
هو ابتسم ولبس نظراته بعدين قال؛سلام..ولف ومشي..
وهي قعدت معاه بعيونها ومازال مش مصدقة اللي صار معاها توا...
🍀🍀🍀🍀🍀
ومروا تلاته ايام...
حالة بو رنيم كانت احسن..
وزملائه سمعوا بيه وجو زاروه...وزميله اللي كانت شاهد ع نزاهته..ماتحملش اللي صار فيه..ومشي شهد لصالحه وعطي اسماء الناس المتأمرة عليه وقال انهم هددوه..
والشرطه اتخدت الإجراءات اللازمه..
ومحمود رزق والد رنيم رجعت فيه الروح من جديد لما رجعله اعتباره..
بس بنته...كانت عايشه هالايام مع الخوف وتأنيب الضمير..
وين تشوف هيثم قلبها يتقطع وضميرها يعذب فيها..
 وين تشوف لبوها تخاف عليه من القصه لو طلعت اكيد مش حيتحمل..
كانت مخنوفه ومش عارفه شن دير حايرة والحيرة حتجننها...
اما مريم..
تفكيرها في عرض جهاد خلاها تنسى اللي جني عليها وخطوبته..
قعدت بس تفكر في نفسها..كيف تقدر تنقد روحها من كارثه محققه...
في اخر ليله ليها وهي تفكر..
طرحت صلايتها وبدت تصلي..
قعدت تصلي وتبكي..حاسة بالخجل..والخزي..والخوف...
ماكانتش قادره تقول غير "يارب سامحني"
وبعد كملت صلاه..
رفعت راسها وغمضت عيونها خجلا وهي تناجي في الله بهمس.
يارب..يارب اغفرلي يارب..يارب اغفرلي يارب..يارب اعفو عني يارب..ياربي اني ماليش غيرك..لو كنت للصالحين...اللي زيي اني من ليهم ياربي...ياربي انت خلقتني انت ربي غلطت ونبيك تغفرلي ياربي..ياربي اغفرلي ياربي..ماليش غيرك...
نزلت راسها وغطت وجهها بإيديها وقعدت تبكي...
بعدين نزلتهم ورفعت وجهها فوق وفتحت عيونها..لو..لوجهاد فرصة تانيه انت عطيتهالي اني بنوافق عليه ياربي..ياربي خليه ليا فرصه تانيه ياربي تستر بيه عليا الذنب اللي درته ياربي...ياربي..ونحلف بيك والله اني تعذبت وتعاقبت وتبت وشعفت ياربي خلاص..استرني ياربي اغفرلي يارب..
🍁🍁🍁🍁
تاني يوم...
"هونا يهيج بيها في تونس ارتحنا منهم الزوز"
ضحكت سارة..
دانيه؛والله جديات راحه نفسيه ياريت يريحوا غادي ومعاش يولوا..
سارة بضحكه؛ياسر يادعوة...
ودانيه تضحك..بعدين رفعت عيونها للروشن لقت جمعه واقف يشبحلها..
نزلت اختفت ضحكتها وطول نزلت عيونها وهي مضايقه..
ع جية وحده من بنات فصل سارة تجري كانت جاية من الاداره..
البنت وعيونها غارقات بالدموع:سمعتي سارة!
سارة بقلق:شني؟
"رهف...ماتت اليوم الصبح..."
🍁🍁🍁🍁
"لا الله يبارك دكتور بناتك عينة منك"
هيثم بضحكه؛وخير مني..
ريحان؛لابابا اني مانبيش نولي دكتورة نبي نلعب كاراتيه..
احسان بضحكه:حي عليك حي..
لجين بضحكه:وجنان؟
جنان قلبت عيونها في لجين وقالت:مانعرفش..
خفت ضحكة لجين..
واحسان رفع حواجبه وشبح لهيثم..
هيثم ارتبك ويبي يغير الجو:ان شاء الله غدوة ع طلعتها بندير عزومة..بش تجوا..وانتي لجين تو نكلم خوك ..
لجين؛ان شاء الله...
وجنان تشبحلها بحده..
احسان:ان شاء الله..
هيثم:وجيب الحاجه وولدك تجيني بروحك نلزك..
احسان ضحك وهز راسه بالموافقه وقال:حاضر..
دق باب الغرفه..
هيثم:تفضل..
انفتح الباب وخشت رنيم وكانوا عيونها ع ريحان وهيثم قالت بإبتسامه؛السلام عليكم..
هيثم؛وعليكم السلام..اهلا بالدكتورة رنيم..
لجين كانت تشبحلها بفضول..
لكن نظرات احسان كانت نظرات صدمه...
رنيم؛اهلا بيك..مررت نظرها لضيوفه..
ويجوا عيونها ع احسان...الابتسامه تلاشت وحلت محلها ملامح الصدمه..

#صلوا_على_النبي
علقوا ب #عطيني_فرصة  #البطل المغمور

.....يتبع...