البطل المغمور "زهور القمر"

الجزء الثاني عشر

#البطل_المغمور2 "زهور القمر"
#جمان_فريد
#الجزء_الثاني_عشر "وإصبر"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
•••قبل اربع ساعات••••
في احدى المزارع الكبيرة البعيده في العاصمه طرابلس..
كانوا في رجال متوزعين ع شاحنات يعبوا فيهم بصناديق كبار لحفاظات الأطفال..
هو كان واقف يراقب فيهم معاه زوز تانيين..
:بيطلعوا من هني طول لطريق***** والحبايب بيديروا الحوله ويخلوها تفوت انت مهمتك تم مجرد ماتسلمها ل***** في *******..تمام..
خليل:تو انت اللي بتوريني ياكابوريا الخطه هادي اني اللي دايرها..
:من باب الحرص ياشارون..
خليل:زي مايقولوا ماتوصيش حريص..
شبحلها شويه وقال:تمام..اني توا بنطلع ل****** نتلاقوا غادي...
خليل هز راسه وكابوريا مشي قعد معاه بعيونه لين طلع من الحوازة بكل بعدين التفت للي معاهم ومشالهم وقعد يستعجل فيهم بس يكملوا فيسع..
خليل:بسرعه انت وياه بسرعه معاش في وقت...
🍁بعد نص ساعه بالضبط..
طلعوا الشاحنات المسكره واللي كان لوحة الاعلان والعلامة التجاريه للحفاظ .
وخليل كان يسوق في وحده منهم...
كانوا ثلاته شاحنات..
حيطلعوا زيهم 3 تانيات من اكثر من منطقه في العاصمه وبأشكال مختلفه...
في منهم حتى سيارات اسعاف...
العمليه كانت كبيرة جدا ومتخططلها من فترة طويله استغلالا لفترة الهدوء اللي عاشتها المنظمه هادي بعد نشاط رضوان بوكراع وزير الداخليه اللي طيح روس كبار في المنظمه هادي بأسلوب مختلف بحيث خلاهم هما يسلموا بعضهم بش يحولوا العيون عنهم...
وهالعمليه كان لبعض الشخصيات الامنيه يد فيها للأسف..
الشاحنات التابعه لخليل كانت تمشي وراه في طريق محدده...
وخليل وهو يسوق كان متوترهلبه..
وفي قلبه يردد في "لاحول ولاقوة الابالله"
"حسبي الله ونعم الوكيل"..
علاش يردد فيهم في قلبه!؟
"خليل"
جاه الصوت عن السماعه اللي حاطه وذنه..
خليل وهو مركز في الطريق:ايوه..
"شن جو"
خليل:ميه ميه..
"تمام تمام"..
خدي نفس وقعد مركز في الطريق..
لين وصلوا للطريق اللي دخل للمنطقه المتفقين عليها..
كان في نقطة تفتيش..
دارو رواحهم فتشوا الشاحنات بعدين خلوهم يفوتوا...
وبعد مافاتوا..
خليل؛خشينا خلاص..
"فوتوكم الحبايب"
خليل:دارو جوهم بعدين عطونا الخضرا..
"كويس كويس"..
خليل:وعندكم..
"ميه ميه...ميه ميه"
خليل رشف..ولف يسار ووراه الشاحنتين التانيات...
وفجأه...بانوا عليه من بعيد سيارات الشرطه..
عقد حواجبه بصدمه وقال؛كابو الحبايب نفوتوا عليهم مرتين!؟
"كيف مرتين!!؟"
خليل:توا قدام ياراجل وحده تانيه فيها جيش...
"شن تقول انت!!؟"
خليل؛كابوريا كابوريا شن درت قول!
"تي شن بندير"
خليل سكت لما لقي روحه قرب منهم...
وقف الشاحنه..ووقفوا اللي وراهم..
نزل طول من الشاحنه وطلع يجري...
الضباط شافوه قعدوا ينادوا بصوت عالي..
"وقف..وقف خيرلك..وقف"
وقعد يجري وهما يجروا وراه..
وباقي العناصر شدوا الزوز التانيين..
"شارون وقف خيرلك شارون"
وخليل يجري بسرعه ويخش بين الشجر ويفوتهم...
وهما وراه...
واحد منهم يكون نقيب..
اسمه "داود"..
كان حلم عنده يشد بإيديه شارون اللي كان معروف جدا في الشرطه ع انه من العقول المدبرة لمنظمة المخدرات الكبيرة في العاصمه وكان من اكثر الناس اللي مش مصدق توبته نهائيا..وحاول يخلي راجح يكلفه بمراقبته بس راجح رفض تماما ووجهه لمهمه تانيه..وفهاليوم استدعاه بش يحققله امنيته...
داوود؛شارون...ورفع مسدس فوق وضرب نار..
وخليل مازال يجري بدي نفسه ينقطع..
ودواد في جرته....
سحب المسدس من جديد وضرب نار فوق مرة تانيه..
خليل وهو يجري طلعوا قدامه زوز من العناصر...
وقف في مكانه وهو داهش...
داوود؛واخيرا ياشارون...
التفت خيل وشبحله وهو ياخد في انفاسه..
قدمله داوود ومعاه واحد من العناصر وهو يقول:واخيرا طحت..وين استرحت..ومد يده..
وحطله العنصر الكلبش في يده..
خداه داوود وقعد يكلبش في ايديه وهو يقول؛تحساب البلاد قاعده زي زمان يقعدوا اشكالك يسرحوا ويمرحوا فيها ويديروا مايبوا ...
خليل بإبتسامه جانبيه قال؛داوود انت؟
داوود شبحله شويه بعدين قال؛حتى اني مشهور غادي!؟
خليل ضحك نص ضحكة وقال؛اني بس نعرفك...
داوود رفع حاجبه وقال؛تحرك قدامي..تحرك..
وخداه وقعد يمشي بيه وين مافي سيارات الشرطه..
ووراهم العناصر....
🍁في مكان تاني
في نفس الوقت..
اللي الكابوريا فقد فيه الاتصال بخليل...
كان كابوريا ماشي بسيارة عاديه ورا الشاحنات...
قعد يشبحلهم وهو يقول:خليل...خليل...الو...خبط الدومان بإيديه الزوز واطلق لفظ نابي...
وفجأه..
طلعت عليهم سيارات الشرطه من الجانبين..
هو بصدمه قال:كمين....وبدي بالسب والشتم..
بعدين لف بالسيارة وجي بيهرب وسيارات الشرطه وراه..
راجح وفيده اللاسلكي:خلولي كابوريا وانتم اهتموا بالباقي...
حطه ع تركينه وبدي يطارد فيه...
وكابوريا يجري بالسيارة قريب يطير..
طلع راجح اللي فيها المسدس من الروشن وقعد يحاول يضرب العجل...
كان صعب جدا التركيز ع حاجتين بس هو مدرب ع الشي ومكتسب خبره كبيره..
صاب عجلة سيارة كابوريا...
وكابوريا في السيارة يسيب ويلعن ومازال يسوق ماوقفش بس ماقدرتش السيارة تصمد اكثر من هكي...
وقفها وراجح وقف وراه..
سحب السلاح وفتح الباب وطلع يجري..
وراجح نزل في جرته..
وقعد يجري وراه وهو يقول:سلم تسلم ياكابو..
كابوريا التفت صوب عليه...
هو طول ادرق ورا شجرة وخواها...
وكمل كابوريا جري..
وهو طلع من ورا الشجره ورجع يجري وراه..
وبدي يضرب عليه بس ماكانش قاصد يصيبه...
ورجع كابوريا صوب عليه وهو تفادها...
وكمل كابوريا جري...وراجح قعد يخفف من السرعه متاعه لين وقف...
رفع يده فوق وقعد يضرب طلقه اتنين تلاته...
بعدين نزل يده وقال:اهرب اهرب...
ولف ومشي يجري بسرعه مولي لباقي الوحده التابعه ليه..
🍁وتحركوا باللي شدوهم لمديرية الامن..
وبدوا بالتحقيقات...
حققوا معاهم كلهم وكان اهمهم 3 خليل..وواحد اسمه اشرف..وواحد اسمه عثمان عليوان..
عثمان؛ماعندي شي نقوله ومش متكلم لين يجي المحامي..
••••••
اشرف؛اني مسؤول ع اللي نعرفه وبس غير مانعرف حد ولاعندي معلومه...
••••••
:تو انت مش درتلنا روحك شيخ تقي وماشي جاي ع الجامع..يعني هدا كله كان تمويه...
خليل بتهكم؛زعمه!؟
رفع المحقق حاجبه وقال؛انت المسؤول عن العمليه كلها؟
خليل؛كابوريا..
:ومن اللي يحرك في كابوريا..
خليل؛مانعرفش..
؛عديتوا من نقطة التفتيش الأولى من غير مايفتوشكم..
خليل:فتشوا..
قعد يشبحله شويه بعدين قالت:تعرف انت بالذات قداش حيحكموا عليك؟
خليل؛20 25 سنه صح؟
:اها يعني مش فارقه معاك..تمام مدام مش فارق معاك علاش تتزوج ياخليل..
خليل بضحكه سخريه؛تمويه...وبدي يضحك ويضحك..
ومن ورا المرش العازل كان راجح ومعاه رئيس المديريه وضابط كبير من المكافحه يتفرجوا ع التحقيق..
راجح؛سيدي..
رئيسه؛خش...
راجح مشي خش وعيون الضابط معاه..
لما جي خاش..المحقق ناض..
راجح؛تقدر تتفضل انت ياباسط..
ادى التحيه ومشي طلع..
وراجح قعمز في مكانه..
قعد يشبح لخليل وهو يهدي يضحك بعدين مسح شاربه السفلي بإبهامه وقال؛اووو راجح عاش من شافك..
راجح؛تعيش وتشوف...طحت هاه..
خليل مط شواربه للأسفل بعدين قال؛نصيب..
راجح؛كابوريا هرب..سلمكم وهرب واكيد الجماعه اللي يحركوا فيكم بيطلعوه منها وانتم اللي بتحصلوا..
خليل:نصيبه..
راجح:شوف خليل..الحكم اللي حتاخده حيخليك تكمل النص التاني من عمرك في الحبس كان مش متت قبل..
خليل؛الاعمار بيد الله مرات انت تموت قبلي..
راجح؛مش مهم مني يموت قبل مني..المهم اللي يموت كيف وعلى شني وشن اللي بيخليه للناس من بعده وانت فوق ماانك زدت لوثت اسمكم وسمعتكم بتشوه سمعة مرتك وعيلتها..
خليل قعد يشبحله بحده وعيونه معبيات دموع..
راجح؛مش حنضغط عليك اللليله..بنخليك تفكر في كلامي بعدين قرر...
ناض راجح ومشي طلع..
وخلا خليل سرحان وهو يشبح في الفراغ..
🍁برا..
راجح؛حنحاولوا فيهم الايام الجايه ان شاء الله وحتطلع من واحد منهم معلومه تفيدنا مهما كانت صغيره..
رئيسه؛تابعوا حكاية نقاط التفتيش هادي وجيبوا المسؤولين عنها...
راجح؛حاضر سيدي..
الضابط التابع للمكافحه؛كيف فلت كابوريا..
راجح؛الظاهر كانت عنده خطه بديله خلاته يفلت من ايدينا..
؛خطة هروب قصدك..
راجح:هدا الواضح..
هز الضابط راسه وقعد ساكت..
وفهالوقت خوته كانوا برا يراجو شن يصير معاه..
اللي اتصل بيهم وبلغهم واحد في المنطقه يخدم غادي...
طلعلهم راجح وقال..
راجح؛خوكم مقبوض عليه يالجرم المشهود وحاول يهرب من الشرطه يعني القضيه لابساته لبس هالمرة مايقدر حد يحملها عنه مهما يدير..
رفيق بصدمه:باهي نبي نشوفه..
راجح؛ممنوع ليوم المحكمه..
جهاد:ضروري نشوفوه ونفهموا منه؟
راجح بضحكه:شن بتفهم منه اني عطيتك الزبده اللي هو عطهالنا بروحه..
جهاد شبح لراجح بحده بعدين لف ومشي..
رفيق:ينفع نديروله محامي..
راجح بتهكم:ينفع..
رفيق هز راسه وقال:غدوة نجيبه ونجي..
ولف ومشي لحق خوه...
وراجح قعد معاهم بعيونه لين درقوا..
بعدين تنهد ومشي...
🍀وماصار بعدين معروف..
اللي خلا الكل في حالة صدمة مش مستوعب شي..
عفاف ساعه وهي تبكي ماقدرتش تسكت بكل وبنتها حداها تبكي معاها..
وخليل خش لجناحه يبي يرقد بش ينسى شويه اللي صار لكن وينه النوم اللي يجي مع الهموم..
اما جهاد ومريم..
حاطه يدها ع كتفه وهي تقول:جهاد تكلم فضفض ترتاح..ابكي كان يريحك البكي ابكي..
جهاد مسح ع وجهه بعدين خدي نفس عميق وقال:قصدي في واحد يقدر يكذب في التوبه للدرجة هادي..تي الراجل انقلب قلب...الراجل اللي كان سبان عنده زي صباح الخير ولى لحمه يكشش لما يسمع حد يسب...الراجل اللي بالصدفه مرتين شفته مقعمزة في عز الليل يقرا قرآن مايشوف فيه حد كان ربي ولافي من يندري عليه...قصدي اللي بيكذب ويمثل يبان عليه والله يبان..هدا خوي خوي واني اللي نعرفه...ونزبطه زين...في شي في شي..رفع سبابته وقعد يحرك فيها للأسفل بسرعه وهو يقول...في شي هو مدرقه مايعرفه حد...
هو كتوم هلبه خوي هدا وغامض اللي يدرقه اكثر من اللي يطلع فيه..باهي..علاش يتزوج علاش..قصدي اني نعرفه قداش يحبها نسيبة..نسيبة هادي حلم حياته....كيف يدير هكي اني مش فاهم..باهي وخوها لما يعرف شن بيدير..
حط يده ع جبهته وقال..ااااه يامريم...شن اللي قاعد يصير شني..
مريم ودموعها ينزلوا:جهاد..نوض معاي توضى وصل ركعتين..
جهاد بضيق شديد:خليني يامريم بالله عليك..
هي شداته من يده بإيديها الزوز وناضت وهي تقول:نوض جهاد واسمع كلامي بالله عليك والله ترتاح الله..اسألني اني..
هو قعد ساكت شويه يفكر...بعدين ناض..
هي جت جنب وحطت يدها ع ظهره وقالت؛وحد ربي وسلم الأمر ليه وكله ينحل كله..
قعد يمشي هو وياها وهي شاده يده وحاطه يدها التانيه ع ظهره...
خشوا داخل وركبوا لشقتهم...
وفي الشقه اللي مقابلتهم..
كانت نسيبه لابسه ملايه الصلاه...وفي مصلاها ساجده تبكي وتناجي في الله...في اللي فيده امرها وامر راجلها وامر كل شي...
تناجي وتقول...
"مانبيش نضعف ياربي مانبيش نخونه..قويني ياربي قويني كل شي نديروه فيه ليك انت وانت الاعلم بالنوايا يارب قويني وخليني نحافظ ع سره يارب...يارب قويه حتى هو وكون معاه...يارب انت تعرفه مكانه في قلبه ياربي احفظه واجمعني بيه مرة دنيا وآخرة يارب..يارب استودعتك خليل يارب...ياحبيبي ياسندي يامولاي يارب.."
ورفعت من السجود وهي تبكي بالعبره..
وكملت صلاتها وماقدرتش توقف بكاء...
بعدين شبحت جهة الكتب...
قعدت تشبحلهم هلبه واذكرت لما كلمها عليهم وقال..
"مخليهوملك"
مسحت دموعها وناضت ومشت قعمزت ع السرير وخدت الكتب بالواحد قعدت تشوف في اسماهم لين شافت كتاب..
"الوابل الصيب"..
خداته وفتحاته ولقت ع الصفحه الأولى ورقه مطبقه...
خدتها وفتحتها وبدت تقرا..
كانت مخطوبه بخط حلو بالمرة...
وماكانتش طويله..
"عارفك زعلانه مني...اعذريني..مجبور...
عارفك حتعذريني زي ماعارفك مش حترخي بيا
نوسه...خليك قويه زي مانعرفك خليك البنت اللي حبيتها وعمري ماحبيت غيرها...بألف راجل...راهو من بعد ربي متكي عليك......نحبك..."
غمضت عيونها بقوة وانهارت بالبكي...
والورقه في يدها تتعركش..من الوجع اللي كانت تحس بيه..
فتح عيونها وشافتها..
مسحت دموعها وقعدت تساوي فيها ورجعت طبقتها..
وكيف جت بتردها للكتاب قعدت تشبح للكتاب هلبه..
واذكرت انه قال يقرا فيه ويحبه...
ردت الكتابات في مكانهم والورقه حطتها فوقهم وساوت جلستها ع السرير وفتحت الكتاب وبدت تقرا فيه...
🍁وعدت ليلة من اصعب الليالي عيلة خالد..
بالذات خليل اللي كان راقد ع كرسي طويل في حبس المركز..
عاطي ظهره للضابط وهو مغمض عيونه كان يردد..
"لاحول ولاقوة الا بالله"بهمس...
لين خداه النوم ورقد...ومن استعان بحوله وقوته لايغفل وينام يدبرله في امره احسن تدبير...
🍁وياكم مرة رقدنا وقلوبنا مليانه هم وحزن وحني غارقين في حيره وخوف...والله يشوف في قلوبنا وهو ادري باللي نعيشوا فيه..ويدبرلنا امرنا تدبير عجيب بأمره بش تقر عيونا الراقده بتعب وترتاح قلوبنا المهمومه...سبحانه🍁
🍁🍁🍁
وطلع فجر اليوم التالي...
هيثم كانت بداية يومه ماشيه طبيعيه زي كل يوم...
برغم انه فقد اولاد خالد في المسجد بس عطاهم عذر وقال في نفسه اكيد راحت عليهم نومه..
روحه لحوشه وبدي يوتي فالفطور مع خالته ويهدرز هو وياها..
بعدين شاركتهم سارة وشويه وطلعوا التوأم حتى هما وكملت قعدتهم...
بس انفتح فيها موضوع غريب..
ماجده:فاتح الوليد هداكا اللي يطيب غادي..
هيثم :ايه..
سارة بدهشه:نوال فتحي امه !؟
هيثم هز راسه بإيجاب..
سارة؛كيف بابا المراة تبان صغيره..
تنهد هيثم وقال؛لماتزوجت كانت في عمرك او اصغر شوي..
سارة زادت اندهشت..
وماجده قالت؛اها قول هكي من الأول...
ماجده؛باهي وامتى بترفعنا؟
هيثم:بعد الفطور فيه زياره الوقت هدا..
ماجده:ع صبح ربي!؟
هيثم حك رقبته من الخلف بعدين قال؛وين المشكله وبعدين عيادة المريض اجرها كبير..
ماجده شبحت لسارة..
سارة وهي تشوف لبوها بتضييقة عيون؛باهي نمشوا..
هو ابتسم بشي من الإرتباك بعدين رجع ياكل..
وخالته تاكل وهو تشبحله ع جنب ...
وريحان وجنان يشبحولهم كلهم...
🍁🍁🍁
الساعه العاشرة صباحا...
فيش المستشفى..
"جيبيلي مرايه جيبي"
نرجس باست خدها وقالت بضحكه:والله عسل من غير ميكاب ماما..بلعت ضحكتها وقالت..نونو..
شبحتله نوال شويه بعدين باستها من خدها وقالت:بنتي الحلوة..
نرجس طارت من الفرحه لما سمعت كلمه ليها سنين وسنين ماسمعتها...بنتي..
حضنت امها وقعدت تبوس فيها زي الطفله وتقول:نحبك ماما..
ضحكت نوال وقالت؛هي ياسرك من جو البيبيات خليه لبناويتك..
نرجس:اني بيبي معاك انتي...
نوال بضحكه؛هبله..
بعدت نرجس وهي تضحك وباستها بعدين قالت:بابا امس كان هني..
نوال هزت راسها وقعدت ساكته...
نرجس:نوفل اتصل اكثر من مرة..
نوال:كان نهمه راهو جي...
تنهدت نرجس...
نوال:واسيد وينه..
نرجس:قال عنده موضوع بيديره ويجي بعدين...
نوال عيونها تعبوا دموع وهي تقول؛وفاتح عنده علم!؟
نرجس:لا..دكتورة ثريا قالت ماخبرتاش..